੨. ਦੁਤਿਯਵਗ੍ਗੋ

(੧੧) ੨. ਅਞ੍ਞਾਣਕਥਾ

੩੧੪. ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ. ਨਤ੍ਥਿ ਅਰਹਤੋ ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਨ੍ਤਿ? ਆਮਨ੍ਤਾ. ਹਞ੍ਚਿ ਨਤ੍ਥਿ ਅਰਹਤੋ ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਅਤ੍ਥਿ ਪੁਥੁਜ੍ਜਨਸ੍ਸ ਅਞ੍ਞਾਣਂ, ਅਤ੍ਥਿ ਤਸ੍ਸ ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਨ੍ਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਅਞ੍ਞਾਣਂ, ਅਤ੍ਥਿ ਤਸ੍ਸ ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਅਰਹਤੋ ਅਞ੍ਞਾਣਂ, ਨਤ੍ਥਿ ਤਸ੍ਸ ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਨ੍ਤਿ? ਆਮਨ੍ਤਾ. ਅਤ੍ਥਿ ਪੁਥੁਜ੍ਜਨਸ੍ਸ ਅਞ੍ਞਾਣਂ, ਨਤ੍ਥਿ ਤਸ੍ਸ ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਅਰਹਾ ਅਞ੍ਞਾਣਪਕਤੋ ਪਾਣਂ ਹਨੇਯ੍ਯ, ਅਦਿਨ੍ਨਂ ਆਦਿਯੇਯ੍ਯ, ਮੁਸਾ ਭਣੇਯ੍ਯ, ਪਿਸੁਣਂ ਭਣੇਯ੍ਯ, ਫਰੁਸਂ ਭਣੇਯ੍ਯ, ਸਮ੍ਫਂ ਪਲਪੇਯ੍ਯ, ਸਨ੍ਧਿਂ ਛਿਨ੍ਦੇਯ੍ਯ, ਨਿਲ੍ਲੋਪਂ ਹਰੇਯ੍ਯ, ਏਕਾਗਾਰਿਯਂ ਕਰੇਯ੍ਯ, ਪਰਿਪਨ੍ਥੇ ਤਿਟ੍ਠੇਯ੍ਯ, ਪਰਦਾਰਂ ਗਚ੍ਛੇਯ੍ਯ, ਗਾਮਘਾਤਂ ਕਰੇਯ੍ਯ, ਨਿਗਮਘਾਤਂ ਕਰੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਪੁਥੁਜ੍ਜਨਸ੍ਸ ਅਞ੍ਞਾਣਂ, ਪੁਥੁਜ੍ਜਨੋ ਅਞ੍ਞਾਣਪਕਤੋ ਪਾਣਂ ਹਨੇਯ੍ਯ, ਅਦਿਨ੍ਨਂ ਆਦਿਯੇਯ੍ਯ, ਮੁਸਾ ਭਣੇਯ੍ਯ…ਪੇ… ਗਾਮਘਾਤਂ ਕਰੇਯ੍ਯ, ਨਿਗਮਘਾਤਂ ਕਰੇਯ੍ਯਾਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਅਞ੍ਞਾਣਂ, ਅਰਹਾ ਅਞ੍ਞਾਣਪਕਤੋ ਪਾਣਂ ਹਨੇਯ੍ਯ, ਅਦਿਨ੍ਨਂ ਆਦਿਯੇਯ੍ਯ…ਪੇ… ਗਾਮਘਾਤਂ ਕਰੇਯ੍ਯ, ਨਿਗਮਘਾਤਂ ਕਰੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਅਰਹਤੋ ਅਞ੍ਞਾਣਂ, ਨ ਚ ਅਰਹਾ ਅਞ੍ਞਾਣਪਕਤੋ ਪਾਣਂ ਹਨੇਯ੍ਯ, ਅਦਿਨ੍ਨਂ ਆਦਿਯੇਯ੍ਯ…ਪੇ… ਗਾਮਘਾਤਂ ਕਰੇਯ੍ਯ, ਨਿਗਮਘਾਤਂ ਕਰੇਯ੍ਯਾਤਿ? ਆਮਨ੍ਤਾ. ਅਤ੍ਥਿ ਪੁਥੁਜ੍ਜਨਸ੍ਸ ਅਞ੍ਞਾਣਂ, ਨ ਚ ਪੁਥੁਜ੍ਜਨੋ ਅਞ੍ਞਾਣਪਕਤੋ ਪਾਣਂ ਹਨੇਯ੍ਯ, ਅਦਿਨ੍ਨਂ ਆਦਿਯੇਯ੍ਯ…ਪੇ… ਗਾਮਘਾਤਂ ਕਰੇਯ੍ਯ, ਨਿਗਮਘਾਤਂ ਕਰੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਸਤ੍ਥਰਿ ਅਞ੍ਞਾਣਂ, ਧਮ੍ਮੇ ਅਞ੍ਞਾਣਂ, ਸਙ੍ਘੇ ਅਞ੍ਞਾਣਂ, ਸਿਕ੍ਖਾਯ ਅਞ੍ਞਾਣਂ, ਪੁਬ੍ਬਨ੍ਤੇ ਅਞ੍ਞਾਣਂ, ਅਪਰਨ੍ਤੇ ਅਞ੍ਞਾਣਂ, ਪੁਬ੍ਬਨ੍ਤਾਪਰਨ੍ਤੇ ਅਞ੍ਞਾਣਂ, ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

ਨਤ੍ਥਿ ਅਰਹਤੋ ਸਤ੍ਥਰਿ ਅਞ੍ਞਾਣਂ, ਧਮ੍ਮੇ ਅਞ੍ਞਾਣਂ, ਸਙ੍ਘੇ ਅਞ੍ਞਾਣਂ, ਸਿਕ੍ਖਾਯ ਅਞ੍ਞਾਣਂ, ਪੁਬ੍ਬਨ੍ਤੇ ਅਞ੍ਞਾਣਂ, ਅਪਰਨ੍ਤੇ ਅਞ੍ਞਾਣਂ, ਪੁਬ੍ਬਨ੍ਤਾਪਰਨ੍ਤੇ ਅਞ੍ਞਾਣਂ, ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਅਞ੍ਞਾਣਨ੍ਤਿ? ਆਮਨ੍ਤਾ. ਹਞ੍ਚਿ ਨਤ੍ਥਿ ਅਰਹਤੋ ਸਤ੍ਥਰਿ ਅਞ੍ਞਾਣਂ, ਧਮ੍ਮੇ ਅਞ੍ਞਾਣਂ, ਸਙ੍ਘੇ ਅਞ੍ਞਾਣਂ…ਪੇ… ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਅਞ੍ਞਾਣਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਅਤ੍ਥਿ ਪੁਥੁਜ੍ਜਨਸ੍ਸ ਅਞ੍ਞਾਣਂ, ਅਤ੍ਥਿ ਤਸ੍ਸ ਸਤ੍ਥਰਿ ਅਞ੍ਞਾਣਂ, ਧਮ੍ਮੇ ਅਞ੍ਞਾਣਂ, ਸਙ੍ਘੇ ਅਞ੍ਞਾਣਂ…ਪੇ… ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਅਞ੍ਞਾਣਨ੍ਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਅਞ੍ਞਾਣਂ, ਅਤ੍ਥਿ ਤਸ੍ਸ ਸਤ੍ਥਰਿ ਅਞ੍ਞਾਣਂ, ਧਮ੍ਮੇ ਅਞ੍ਞਾਣਂ, ਸਙ੍ਘੇ ਅਞ੍ਞਾਣਂ…ਪੇ… ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਅਰਹਤੋ ਅਞ੍ਞਾਣਂ, ਨਤ੍ਥਿ ਤਸ੍ਸ ਸਤ੍ਥਰਿ ਅਞ੍ਞਾਣਂ, ਧਮ੍ਮੇ ਅਞ੍ਞਾਣਂ, ਸਙ੍ਘੇ ਅਞ੍ਞਾਣਂ…ਪੇ… ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਅਞ੍ਞਾਣਨ੍ਤਿ? ਆਮਨ੍ਤਾ. ਅਤ੍ਥਿ ਪੁਥੁਜ੍ਜਨਸ੍ਸ ਅਞ੍ਞਾਣਂ, ਨਤ੍ਥਿ ਤਸ੍ਸ ਸਤ੍ਥਰਿ ਅਞ੍ਞਾਣਂ, ਧਮ੍ਮੇ ਅਞ੍ਞਾਣਂ, ਸਙ੍ਘੇ ਅਞ੍ਞਾਣਂ…ਪੇ… ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

੩੧੫. ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਨਨੁ ਅਰਹਤੋ ਰਾਗੋ ਪਹੀਨੋ ਉਚ੍ਛਿਨ੍ਨਮੂਲੋ ਤਾਲਾਵਤ੍ਥੁਕਤੋ ਅਨਭਾਵਙ੍ਕਤੋ ਆਯਤਿਂ ਅਨੁਪ੍ਪਾਦਧਮ੍ਮੋਤਿ? ਆਮਨ੍ਤਾ. ਹਞ੍ਚਿ ਅਰਹਤੋ ਰਾਗੋ ਪਹੀਨੋ ਉਚ੍ਛਿਨ੍ਨਮੂਲੋ ਤਾਲਾਵਤ੍ਥੁਕਤੋ ਅਨਭਾਵਙ੍ਕਤੋ ਆਯਤਿਂ ਅਨੁਪ੍ਪਾਦਧਮ੍ਮੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਨਨੁ ਅਰਹਤੋ ਦੋਸੋ ਪਹੀਨੋ…ਪੇ… ਮੋਹੋ ਪਹੀਨੋ…ਪੇ… ਅਨੋਤ੍ਤਪ੍ਪਂ ਪਹੀਨਂ ਉਚ੍ਛਿਨ੍ਨਮੂਲਂ ਤਾਲਾਵਤ੍ਥੁਕਤਂ ਅਨਭਾਵਙ੍ਕਤਂ ਆਯਤਿਂ ਅਨੁਪ੍ਪਾਦਧਮ੍ਮਨ੍ਤਿ? ਆਮਨ੍ਤਾ. ਹਞ੍ਚਿ ਅਰਹਤੋ ਅਨੋਤ੍ਤਪ੍ਪਂ ਪਹੀਨਂ ਉਚ੍ਛਿਨ੍ਨਮੂਲਂ ਤਾਲਾਵਤ੍ਥੁਕਤਂ ਅਨਭਾਵਙ੍ਕਤਂ ਆਯਤਿਂ ਅਨੁਪ੍ਪਾਦਧਮ੍ਮਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਨਨੁ ਅਰਹਤੋ ਰਾਗਪ੍ਪਹਾਨਾਯ ਮਗ੍ਗੋ ਭਾਵਿਤੋ…ਪੇ… ਬੋਜ੍ਝਙ੍ਗਾ ਭਾਵਿਤਾਤਿ? ਆਮਨ੍ਤਾ. ਹਞ੍ਚਿ ਅਰਹਤੋ ਰਾਗਪ੍ਪਹਾਨਾਯ ਬੋਜ੍ਝਙ੍ਗਾ ਭਾਵਿਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਨਨੁ ਅਰਹਤੋ ਦੋਸਪ੍ਪਹਾਨਾਯ…ਪੇ… ਮੋਹਪ੍ਪਹਾਨਾਯ…ਪੇ… ਅਨੋਤ੍ਤਪ੍ਪਪਹਾਨਾਯ ਮਗ੍ਗੋ ਭਾਵਿਤੋ …ਪੇ… ਬੋਜ੍ਝਙ੍ਗਾ ਭਾਵਿਤਾਤਿ? ਆਮਨ੍ਤਾ. ਹਞ੍ਚਿ ਅਰਹਤੋ ਅਨੋਤ੍ਤਪ੍ਪਪਹਾਨਾਯ ਬੋਜ੍ਝਙ੍ਗਾ ਭਾਵਿਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਨਨੁ ਅਰਹਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਨ੍ਤਿ? ਆਮਨ੍ਤਾ. ਹਞ੍ਚਿ ਅਰਹਾ ਵੀਤਰਾਗੋ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

੩੧੬. ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਸਧਮ੍ਮਕੁਸਲਸ੍ਸ ਅਰਹਤੋ ਅਤ੍ਥਿ ਅਞ੍ਞਾਣਂ, ਪਰਧਮ੍ਮਕੁਸਲਸ੍ਸ ਅਰਹਤੋ ਨਤ੍ਥਿ ਅਞ੍ਞਾਣਨ੍ਤਿ. ਸਧਮ੍ਮਕੁਸਲਸ੍ਸ ਅਰਹਤੋ ਅਤ੍ਥਿ ਅਞ੍ਞਾਣਨ੍ਤਿ? ਆਮਨ੍ਤਾ. ਪਰਧਮ੍ਮਕੁਸਲਸ੍ਸ ਅਰਹਤੋ ਅਤ੍ਥਿ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰਧਮ੍ਮਕੁਸਲਸ੍ਸ ਅਰਹਤੋ ਨਤ੍ਥਿ ਅਞ੍ਞਾਣਨ੍ਤਿ? ਆਮਨ੍ਤਾ. ਸਧਮ੍ਮਕੁਸਲਸ੍ਸ ਅਰਹਤੋ ਨਤ੍ਥਿ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਧਮ੍ਮਕੁਸਲਸ੍ਸ ਅਰਹਤੋ ਰਾਗੋ ਪਹੀਨੋ, ਅਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਆਮਨ੍ਤਾ. ਪਰਧਮ੍ਮਕੁਸਲਸ੍ਸ ਅਰਹਤੋ ਰਾਗੋ ਪਹੀਨੋ, ਅਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਧਮ੍ਮਕੁਸਲਸ੍ਸ ਅਰਹਤੋ ਦੋਸੋ ਪਹੀਨੋ…ਪੇ… ਮੋਹੋ ਪਹੀਨੋ…ਪੇ… ਅਨੋਤ੍ਤਪ੍ਪਂ ਪਹੀਨਂ, ਅਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਆਮਨ੍ਤਾ. ਪਰਧਮ੍ਮਕੁਸਲਸ੍ਸ ਅਰਹਤੋ ਅਨੋਤ੍ਤਪ੍ਪਂ ਪਹੀਨਂ, ਅਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਧਮ੍ਮਕੁਸਲਸ੍ਸ ਅਰਹਤੋ ਰਾਗਪ੍ਪਹਾਨਾਯ ਮਗ੍ਗੋ ਭਾਵਿਤੋ…ਪੇ… ਬੋਜ੍ਝਙ੍ਗਾ ਭਾਵਿਤਾ, ਅਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਆਮਨ੍ਤਾ. ਪਰਧਮ੍ਮਕੁਸਲਸ੍ਸ ਅਰਹਤੋ ਰਾਗਪ੍ਪਹਾਨਾਯ ਬੋਜ੍ਝਙ੍ਗਾ ਭਾਵਿਤਾ, ਅਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਧਮ੍ਮਕੁਸਲਸ੍ਸ ਅਰਹਤੋ ਦੋਸਪ੍ਪਹਾਨਾਯ…ਪੇ… ਮੋਹਪ੍ਪਹਾਨਾਯ…ਪੇ… ਅਨੋਤ੍ਤਪ੍ਪਪਹਾਨਾਯ ਮਗ੍ਗੋ ਭਾਵਿਤੋ…ਪੇ… ਬੋਜ੍ਝਙ੍ਗਾ ਭਾਵਿਤਾ, ਅਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਆਮਨ੍ਤਾ. ਪਰਧਮ੍ਮਕੁਸਲਸ੍ਸ ਅਰਹਤੋ ਅਨੋਤ੍ਤਪ੍ਪਪਹਾਨਾਯ ਬੋਜ੍ਝਙ੍ਗਾ ਭਾਵਿਤਾ, ਅਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਧਮ੍ਮਕੁਸਲੋ ਅਰਹਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਅਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਆਮਨ੍ਤਾ. ਪਰਧਮ੍ਮਕੁਸਲੋ ਅਰਹਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਅਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰਧਮ੍ਮਕੁਸਲਸ੍ਸ ਅਰਹਤੋ ਰਾਗੋ ਪਹੀਨੋ, ਨਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਆਮਨ੍ਤਾ. ਸਧਮ੍ਮਕੁਸਲਸ੍ਸ ਅਰਹਤੋ ਰਾਗੋ ਪਹੀਨੋ, ਨਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰਧਮ੍ਮਕੁਸਲਸ੍ਸ ਅਰਹਤੋ ਦੋਸੋ ਪਹੀਨੋ…ਪੇ… ਮੋਹੋ ਪਹੀਨੋ…ਪੇ… ਅਨੋਤ੍ਤਪ੍ਪਂ ਪਹੀਨਂ, ਨਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਆਮਨ੍ਤਾ. ਸਧਮ੍ਮਕੁਸਲਸ੍ਸ ਅਰਹਤੋ ਅਨੋਤ੍ਤਪ੍ਪਂ ਪਹੀਨਂ, ਨਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰਧਮ੍ਮਕੁਸਲਸ੍ਸ ਅਰਹਤੋ ਰਾਗਪ੍ਪਹਾਨਾਯ ਮਗ੍ਗੋ ਭਾਵਿਤੋ…ਪੇ… ਬੋਜ੍ਝਙ੍ਗਾ ਭਾਵਿਤਾ…ਪੇ… ਦੋਸਪ੍ਪਹਾਨਾਯ ਮੋਹਪ੍ਪਹਾਨਾਯ…ਪੇ… ਅਨੋਤ੍ਤਪ੍ਪਪਹਾਨਾਯ ਮਗ੍ਗੋ ਭਾਵਿਤੋ…ਪੇ… ਬੋਜ੍ਝਙ੍ਗਾ ਭਾਵਿਤਾ, ਨਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਆਮਨ੍ਤਾ. ਸਧਮ੍ਮਕੁਸਲਸ੍ਸ ਅਰਹਤੋ ਅਨੋਤ੍ਤਪ੍ਪਪਹਾਨਾਯ ਬੋਜ੍ਝਙ੍ਗਾ ਭਾਵਿਤਾ, ਨਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰਧਮ੍ਮਕੁਸਲੋ ਅਰਹਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਨਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਆਮਨ੍ਤਾ. ਸਧਮ੍ਮਕੁਸਲੋ ਅਰਹਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ …ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਨਤ੍ਥਿ ਤਸ੍ਸ ਅਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੧੭. ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਜਾਨਤੋਹਂ [ਜਾਨਤਾਹਂ (ਸੀ.), ਜਾਨਤ੍ਵਾਹਂ (ਸ੍ਯਾ. ਪੀ. ਕ.)], ਭਿਕ੍ਖਵੇ, ਪਸ੍ਸਤੋ ਆਸਵਾਨਂ ਖਯਂ ਵਦਾਮਿ, ਨੋ ਅਜਾਨਤੋ ਨੋ ਅਪਸ੍ਸਤੋ. ਕਿਞ੍ਚ, ਭਿਕ੍ਖਵੇ, ਜਾਨਤੋ ਕਿਂ ਪਸ੍ਸਤੋ ਆਸਵਾਨਂ ਖਯੋ ਹੋਤਿ? ‘ਇਤਿ ਰੂਪਂ, ਇਤਿ ਰੂਪਸ੍ਸ ਸਮੁਦਯੋ, ਇਤਿ ਰੂਪਸ੍ਸ ਅਤ੍ਥਙ੍ਗਮੋ, ਇਤਿ ਵੇਦਨਾ…ਪੇ… ਇਤਿ ਸਞ੍ਞਾ… ਇਤਿ ਸਙ੍ਖਾਰਾ… ਇਤਿ ਵਿਞ੍ਞਾਣਂ, ਇਤਿ ਵਿਞ੍ਞਾਣਸ੍ਸ ਸਮੁਦਯੋ, ਇਤਿ ਵਿਞ੍ਞਾਣਸ੍ਸ ਅਤ੍ਥਙ੍ਗਮੋ’ਤਿ – ਏਵਂ ਖੋ, ਭਿਕ੍ਖਵੇ, ਜਾਨਤੋ ਏਵਂ ਪਸ੍ਸਤੋ ਆਸਵਾਨਂ ਖਯੋ ਹੋਤੀ’’ਤਿ [ਸਂ. ਨਿ. ੩.੧੦੧; ਇਤਿਵੁ. ੧੦੨; ਸਂ. ਨਿ. ੫.੧੦੯੫]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਜਾਨਤੋਹਂ, ਭਿਕ੍ਖਵੇ, ਪਸ੍ਸਤੋ ਆਸਵਾਨਂ ਖਯਂ ਵਦਾਮਿ, ਨੋ ਅਜਾਨਤੋ ਨੋ ਅਪਸ੍ਸਤੋ. ਕਿਞ੍ਚ, ਭਿਕ੍ਖਵੇ, ਜਾਨਤੋ ਕਿਂ ਪਸ੍ਸਤੋ ਆਸਵਾਨਂ ਖਯੋ ਹੋਤਿ? ‘ਇਦਂ ਦੁਕ੍ਖ’ਨ੍ਤਿ – ਭਿਕ੍ਖਵੇ, ਜਾਨਤੋ ਪਸ੍ਸਤੋ ਆਸਵਾਨਂ ਖਯੋ ਹੋਤਿ, ‘ਅਯਂ ਦੁਕ੍ਖਸਮੁਦਯੋ’ਤਿ – ਜਾਨਤੋ ਪਸ੍ਸਤੋ ਆਸਵਾਨਂ ਖਯੋ ਹੋਤਿ, ‘ਅਯਂ ਦੁਕ੍ਖਨਿਰੋਧੋ’ਤਿ – ਜਾਨਤੋ ਪਸ੍ਸਤੋ ਆਸਵਾਨਂ ਖਯੋ ਹੋਤਿ, ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ – ਜਾਨਤੋ ਪਸ੍ਸਤੋ ਆਸਵਾਨਂ ਖਯੋ ਹੋਤਿ. ਏਵਂ ਖੋ, ਭਿਕ੍ਖਵੇ, ਜਾਨਤੋ ਏਵਂ ਪਸ੍ਸਤੋ ਆਸਵਾਨਂ ਖਯੋ ਹੋਤੀ’’ਤਿ [ਸਂ. ਨਿ. ੫.੧੦੯੫]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸਬ੍ਬਂ, ਭਿਕ੍ਖਵੇ, ਅਨਭਿਜਾਨਂ ਅਪਰਿਜਾਨਂ ਅਵਿਰਾਜਯਂ ਅਪ੍ਪਜਹਂ ਅਭਬ੍ਬੋ ਦੁਕ੍ਖਕ੍ਖਯਾਯ, ਸਬ੍ਬਞ੍ਚ ਖੋ, ਭਿਕ੍ਖਵੇ, ਅਭਿਜਾਨਂ ਪਰਿਜਾਨਂ ਵਿਰਾਜਯਂ ਪਜਹਂ ਭਬ੍ਬੋ ਦੁਕ੍ਖਕ੍ਖਯਾਯਾ’’ਤਿ [ਸਂ. ਨਿ. ੪.੨੬; ਇਤਿਵੁ. ੭ ਇਤਿਵੁਤ੍ਤਕੇਪਿ]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਸਹਾਵਸ੍ਸ ਦਸ੍ਸਨਸਮ੍ਪਦਾਯ,

ਤਯਸ੍ਸੁ ਧਮ੍ਮਾ ਜਹਿਤਾ ਭਵਨ੍ਤਿ;

ਸਕ੍ਕਾਯਦਿਟ੍ਠੀ ਵਿਚਿਕਿਚ੍ਛਿਤਞ੍ਚ,

ਸੀਲਬ੍ਬਤਂ ਵਾਪਿ ਯਦਤ੍ਥਿ ਕਿਞ੍ਚਿ;

ਚਤੂਹਪਾਯੇਹਿ ਚ ਵਿਪ੍ਪਮੁਤ੍ਤੋ,

ਛਚ੍ਚਾਭਿਠਾਨਾਨਿ ਅਭਬ੍ਬ ਕਾਤੁ’’ਨ੍ਤਿ.

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਯਸ੍ਮਿਂ, ਭਿਕ੍ਖਵੇ, ਸਮਯੇ ਅਰਿਯਸਾਵਕਸ੍ਸ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ‘ਯਂ ਕਿਞ੍ਚਿ ਸਮੁਦਯਧਮ੍ਮਂ ਸਬ੍ਬਂ ਤਂ ਨਿਰੋਧਧਮ੍ਮ’ਨ੍ਤਿ, ਸਹ ਦਸ੍ਸਨੁਪ੍ਪਾਦਾ, ਭਿਕ੍ਖਵੇ, ਅਰਿਯਸਾਵਕਸ੍ਸ ਤੀਣਿ ਸਂਯੋਜਨਾਨਿ ਪਹੀਯਨ੍ਤਿ – ਸਕ੍ਕਾਯਦਿਟ੍ਠਿ, ਵਿਚਿਕਿਚ੍ਛਾ, ਸੀਲਬ੍ਬਤਪਰਾਮਾਸੋ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ? ਆਮਨ੍ਤਾ. ਨਨੁ ਅਰਹਾ ਇਤ੍ਥਿਪੁਰਿਸਾਨਂ ਨਾਮਗੋਤ੍ਤਂ ਨ ਜਾਨੇਯ੍ਯ, ਮਗ੍ਗਾਮਗ੍ਗਂ ਨ ਜਾਨੇਯ੍ਯ, ਤਿਣਕਟ੍ਠਵਨਪ੍ਪਤੀਨਂ ਨਾਮਂ ਨ ਜਾਨੇਯ੍ਯਾਤਿ? ਆਮਨ੍ਤਾ. ਹਞ੍ਚਿ ਅਰਹਾ ਇਤ੍ਥਿਪੁਰਿਸਾਨਂ ਨਾਮਗੋਤ੍ਤਂ ਨ ਜਾਨੇਯ੍ਯ, ਮਗ੍ਗਾਮਗ੍ਗਂ ਨ ਜਾਨੇਯ੍ਯ, ਤਿਣਕਟ੍ਠਵਨਪ੍ਪਤੀਨਂ ਨਾਮਂ ਨ ਜਾਨੇਯ੍ਯ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ.

ਅਰਹਾ ਇਤ੍ਥਿਪੁਰਿਸਾਨਂ ਨਾਮਗੋਤ੍ਤਂ ਨ ਜਾਨੇਯ੍ਯ, ਮਗ੍ਗਾਮਗ੍ਗਂ ਨ ਜਾਨੇਯ੍ਯ, ਤਿਣਕਟ੍ਠਵਨਪ੍ਪਤੀਨਂ ਨਾਮਂ ਨ ਜਾਨੇਯ੍ਯਾਤਿ, ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ? ਆਮਨ੍ਤਾ. ਅਰਹਾ ਸੋਤਾਪਤ੍ਤਿਫਲਂ ਵਾ ਸਕਦਾਗਾਮਿਫਲਂ ਵਾ ਅਨਾਗਾਮਿਫਲਂ ਵਾ ਅਰਹਤ੍ਤਂ ਵਾ ਨ ਜਾਨੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਞ੍ਞਾਣਕਥਾ ਨਿਟ੍ਠਿਤਾ.