੧੪. ਅਭਿਞ੍ਞਾਨੁਯੋਗੋ

੧੯੩. ਨ ਵਤ੍ਤਬ੍ਬਂ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ? ਆਮਨ੍ਤਾ. ਨਨੁ ਅਤ੍ਥਿ ਕੋਚਿ ਇਦ੍ਧਿਂ ਵਿਕੁਬ੍ਬਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੋਚਿ ਇਦ੍ਧਿਂ ਵਿਕੁਬ੍ਬਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ.

੧੯੪. ਨ ਵਤ੍ਤਬ੍ਬਂ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ? ਆਮਨ੍ਤਾ. ਨਨੁ ਅਤ੍ਥਿ ਕੋਚਿ ਦਿਬ੍ਬਾਯ ਸੋਤਧਾਤੁਯਾ ਸਦ੍ਦਂ ਸੁਣਾਤਿ…ਪੇ… ਪਰਚਿਤ੍ਤਂ ਵਿਜਾਨਾਤਿ… ਪੁਬ੍ਬੇਨਿਵਾਸਂ ਅਨੁਸ੍ਸਰਤਿ… ਦਿਬ੍ਬੇਨ ਚਕ੍ਖੁਨਾ ਰੂਪਂ ਪਸ੍ਸਤਿ… ਆਸਵਾਨਂ ਖਯਂ ਸਚ੍ਛਿਕਰੋਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੋਚਿ ਆਸਵਾਨਂ ਖਯਂ ਸਚ੍ਛਿਕਰੋਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ.

੧੯੫. ਅਤ੍ਥਿ ਕੋਚਿ ਇਦ੍ਧਿਂ ਵਿਕੁਬ੍ਬਤੀਤਿ ਕਤ੍ਵਾ ਤੇਨ ਚ ਕਾਰਣੇਨ ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾਤਿ? ਆਮਨ੍ਤਾ. ਯੋ ਇਦ੍ਧਿਂ ਵਿਕੁਬ੍ਬਤਿ, ਸ੍ਵੇਵ ਪੁਗ੍ਗਲੋ? ਯੋ ਇਦ੍ਧਿਂ ਨ ਵਿਕੁਬ੍ਬਤਿ, ਨ ਸੋ ਪੁਗ੍ਗਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੧੯੬. ਯੋ ਦਿਬ੍ਬਾਯ ਸੋਤਧਾਤੁਯਾ ਸਦ੍ਦਂ ਸੁਣਾਤਿ…ਪੇ… ਯੋ ਪਰਚਿਤ੍ਤਂ ਵਿਜਾਨਾਤਿ… ਯੋ ਪੁਬ੍ਬੇਨਿਵਾਸਂ ਅਨੁਸ੍ਸਰਤਿ… ਯੋ ਦਿਬ੍ਬੇਨ ਚਕ੍ਖੁਨਾ ਰੂਪਂ ਪਸ੍ਸਤਿ… ਯੋ ਆਸਵਾਨਂ ਖਯਂ ਸਚ੍ਛਿਕਰੋਤਿ, ਸ੍ਵੇਵ ਪੁਗ੍ਗਲੋ? ਯੋ ਆਸਵਾਨਂ ਖਯਂ ਨ ਸਚ੍ਛਿਕਰੋਤਿ, ਨ ਸੋ ਪੁਗ੍ਗਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਭਿਞ੍ਞਾਨੁਯੋਗੋ.