੧੨. ਉਪਾਦਾਪਞ੍ਞਤ੍ਤਾਨੁਯੋਗੋ
੯੫. ਰੂਪਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਰੂਪਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਂ ਵਿਪਰਿਣਾਮਧਮ੍ਮਨ੍ਤਿ? ਆਮਨ੍ਤਾ? ਪੁਗ੍ਗਲੋਪਿ ਅਨਿਚ੍ਚੋ ਸਙ੍ਖਤੋ ਪਟਿਚ੍ਚਸਮੁਪ੍ਪਨ੍ਨੋ ਖਯਧਮ੍ਮੋ ਵਯਧਮ੍ਮੋ ਵਿਰਾਗਧਮ੍ਮੋ ਨਿਰੋਧਧਮ੍ਮੋ ਵਿਪਰਿਣਾਮਧਮ੍ਮੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੯੬. ਵੇਦਨਂ ਉਪਾਦਾਯ… ਸਞ੍ਞਂ ਉਪਾਦਾਯ… ਸਙ੍ਖਾਰੇ ਉਪਾਦਾਯ… ਵਿਞ੍ਞਾਣਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਵਿਞ੍ਞਾਣਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਂ ਵਿਪਰਿਣਾਮਧਮ੍ਮਨ੍ਤਿ? ਆਮਨ੍ਤਾ. ਪੁਗ੍ਗਲੋਪਿ ਅਨਿਚ੍ਚੋ ਸਙ੍ਖਤੋ ਪਟਿਚ੍ਚਸਮੁਪ੍ਪਨ੍ਨੋ ਖਯਧਮ੍ਮੋ ਵਯਧਮ੍ਮੋ ਵਿਰਾਗਧਮ੍ਮੋ ਨਿਰੋਧਧਮ੍ਮੋ ਵਿਪਰਿਣਾਮਧਮ੍ਮੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੯੭. ਰੂਪਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਨੀਲਂ ਰੂਪਂ ਉਪਾਦਾਯ ਨੀਲਕਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪੀਤਂ ਰੂਪਂ ਉਪਾਦਾਯ… ਲੋਹਿਤਂ ਰੂਪਂ ਉਪਾਦਾਯ… ਓਦਾਤਂ ਰੂਪਂ ਉਪਾਦਾਯ… ਸਨਿਦਸ੍ਸਨਂ ਰੂਪਂ ਉਪਾਦਾਯ… ਅਨਿਦਸ੍ਸਨਂ ਰੂਪਂ ਉਪਾਦਾਯ… ਸਪ੍ਪਟਿਘਂ ਰੂਪਂ ਉਪਾਦਾਯ… ਅਪ੍ਪਟਿਘਂ ਰੂਪਂ ਉਪਾਦਾਯ ਅਪ੍ਪਟਿਘਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੯੮. ਵੇਦਨਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਕੁਸਲਂ ਵੇਦਨਂ ਉਪਾਦਾਯ ਕੁਸਲਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕੁਸਲਂ ਵੇਦਨਂ ਉਪਾਦਾਯ ਕੁਸਲਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਕੁਸਲਾ ਵੇਦਨਾ ਸਫਲਾ ਸਵਿਪਾਕਾ ਇਟ੍ਠਫਲਾ ਕਨ੍ਤਫਲਾ ਮਨੁਞ੍ਞਫਲਾ ਅਸੇਚਨਕਫਲਾ ਸੁਖੁਦ੍ਰਯਾ ਸੁਖਵਿਪਾਕਾਤਿ? ਆਮਨ੍ਤਾ. ਕੁਸਲੋਪਿ ਪੁਗ੍ਗਲੋ ਸਫਲੋ ਸਵਿਪਾਕੋ ਇਟ੍ਠਫਲੋ ਕਨ੍ਤਫਲੋ ਮਨੁਞ੍ਞਫਲੋ ਅਸੇਚਨਕਫਲੋ ਸੁਖੁਦ੍ਰਯੋ ਸੁਖਵਿਪਾਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੯੯. ਵੇਦਨਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਅਕੁਸਲਂ ਵੇਦਨਂ ਉਪਾਦਾਯ ਅਕੁਸਲਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਕੁਸਲਂ ਵੇਦਨਂ ਉਪਾਦਾਯ ਅਕੁਸਲਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਅਕੁਸਲਾ ਵੇਦਨਾ ਸਫਲਾ ਸਵਿਪਾਕਾ ਅਨਿਟ੍ਠਫਲਾ ਅਕਨ੍ਤਫਲਾ ਅਮਨੁਞ੍ਞਫਲਾ ਸੇਚਨਕਫਲਾ ਦੁਕ੍ਖੁਦ੍ਰਯਾ ਦੁਕ੍ਖਵਿਪਾਕਾਤਿ? ਆਮਨ੍ਤਾ. ਅਕੁਸਲੋਪਿ ਪੁਗ੍ਗਲੋ ਸਫਲੋ ਸਵਿਪਾਕੋ ਅਨਿਟ੍ਠਫਲੋ ਅਕਨ੍ਤਫਲੋ ਅਮਨੁਞ੍ਞਫਲੋ ਸੇਚਨਕਫਲੋ ਦੁਕ੍ਖੁਦ੍ਰਯੋ ਦੁਕ੍ਖਵਿਪਾਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੦੦. ਵੇਦਨਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਅਬ੍ਯਾਕਤਂ ਵੇਦਨਂ ਉਪਾਦਾਯ ਅਬ੍ਯਾਕਤਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਬ੍ਯਾਕਤਂ ਵੇਦਨਂ ਉਪਾਦਾਯ ਅਬ੍ਯਾਕਤਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਅਬ੍ਯਾਕਤਾ ਵੇਦਨਾ ਅਨਿਚ੍ਚਾ ਸਙ੍ਖਤਾ ਪਟਿਚ੍ਚਸਮੁਪ੍ਪਨ੍ਨਾ ਖਯਧਮ੍ਮਾ ਵਯਧਮ੍ਮਾ ਵਿਰਾਗਧਮ੍ਮਾ ਨਿਰੋਧਧਮ੍ਮਾ ਵਿਪਰਿਣਾਮਧਮ੍ਮਾਤਿ? ਆਮਨ੍ਤਾ. ਅਬ੍ਯਾਕਤੋਪਿ ਪੁਗ੍ਗਲੋ ਅਨਿਚ੍ਚੋ ਸਙ੍ਖਤੋ ਪਟਿਚ੍ਚਸਮੁਪ੍ਪਨ੍ਨੋ ਖਯਧਮ੍ਮੋ ਵਯਧਮ੍ਮੋ ਵਿਰਾਗਧਮ੍ਮੋ ਨਿਰੋਧਧਮ੍ਮੋ ਵਿਪਰਿਣਾਮਧਮ੍ਮੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੦੧. ਸਞ੍ਞਂ ਉਪਾਦਾਯ… ਸਙ੍ਖਾਰੇ ਉਪਾਦਾਯ… ਵਿਞ੍ਞਾਣਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਕੁਸਲਂ ਵਿਞ੍ਞਾਣਂ ਉਪਾਦਾਯ ਕੁਸਲਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕੁਸਲਂ ਵਿਞ੍ਞਾਣਂ ਉਪਾਦਾਯ ਕੁਸਲਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਕੁਸਲਂ ਵਿਞ੍ਞਾਣਂ ਸਫਲਂ ਸਵਿਪਾਕਂ ਇਟ੍ਠਫਲਂ ਕਨ੍ਤਫਲਂ ਮਨੁਞ੍ਞਫਲਂ ਅਸੇਚਨਕਫਲਂ ਸੁਖੁਦ੍ਰਯਂ ਸੁਖਵਿਪਾਕਨ੍ਤਿ? ਆਮਨ੍ਤਾ. ਕੁਸਲੋਪਿ ਪੁਗ੍ਗਲੋ ਸਫਲੋ ਸਵਿਪਾਕੋ ਇਟ੍ਠਫਲੋ ਕਨ੍ਤਫਲੋ ਮਨੁਞ੍ਞਫਲੋ ਅਸੇਚਨਕਫਲੋ ਸੁਖੁਦ੍ਰਯੋ ਸੁਖਵਿਪਾਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੦੨. ਵਿਞ੍ਞਾਣਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਅਕੁਸਲਂ ਵਿਞ੍ਞਾਣਂ ਉਪਾਦਾਯ ਅਕੁਸਲਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਕੁਸਲਂ ਵਿਞ੍ਞਾਣਂ ਉਪਾਦਾਯ ਅਕੁਸਲਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਅਕੁਸਲਂ ਵਿਞ੍ਞਾਣਂ ਸਫਲਂ ਸਵਿਪਾਕਂ ਅਨਿਟ੍ਠਫਲਂ ਅਕਨ੍ਤਫਲਂ ਅਮਨੁਞ੍ਞਫਲਂ ਸੇਚਨਕਫਲਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕਨ੍ਤਿ? ਆਮਨ੍ਤਾ. ਅਕੁਸਲੋਪਿ ਪੁਗ੍ਗਲੋ ਸਫਲੋ ਸਵਿਪਾਕੋ ਅਨਿਟ੍ਠਫਲੋ ਅਕਨ੍ਤਫਲੋ ਅਮਨੁਞ੍ਞਫਲੋ ਸੇਚਨਕਫਲੋ ਦੁਕ੍ਖੁਦ੍ਰਯੋ ਦੁਕ੍ਖਵਿਪਾਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੦੩. ਵਿਞ੍ਞਾਣਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਅਬ੍ਯਾਕਤਂ ਵਿਞ੍ਞਾਣਂ ਉਪਾਦਾਯ ਅਬ੍ਯਾਕਤਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਬ੍ਯਾਕਤਂ ਵਿਞ੍ਞਾਣਂ ਉਪਾਦਾਯ ਅਬ੍ਯਾਕਤਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਅਬ੍ਯਾਕਤਂ ਵਿਞ੍ਞਾਣਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਂ ਵਿਪਰਿਣਾਮਧਮ੍ਮਨ੍ਤਿ? ਆਮਨ੍ਤਾ. ਅਬ੍ਯਾਕਤੋਪਿ ਪੁਗ੍ਗਲੋ ਅਨਿਚ੍ਚੋ ਸਙ੍ਖਤੋ ਪਟਿਚ੍ਚਸਮੁਪ੍ਪਨ੍ਨੋ ਖਯਧਮ੍ਮੋ ਵਯਧਮ੍ਮੋ ਵਿਰਾਗਧਮ੍ਮੋ ਨਿਰੋਧਧਮ੍ਮੋ ਵਿਪਰਿਣਾਮਧਮ੍ਮੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੦੪. ਚਕ੍ਖੁਂ ਉਪਾਦਾਯ ‘‘ਚਕ੍ਖੁਮਾ ਪੁਗ੍ਗਲੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਚਕ੍ਖੁਮ੍ਹਿ ਨਿਰੁਦ੍ਧੇ ‘‘ਚਕ੍ਖੁਮਾ ਪੁਗ੍ਗਲੋ ਨਿਰੁਦ੍ਧੋ’’ਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸੋਤਂ ਉਪਾਦਾਯ… ਘਾਨਂ ਉਪਾਦਾਯ… ਜਿਵ੍ਹਂ ਉਪਾਦਾਯ… ਕਾਯਂ ਉਪਾਦਾਯ… ਮਨਂ ਉਪਾਦਾਯ ‘‘ਮਨਵਾ ਪੁਗ੍ਗਲੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਮਨਮ੍ਹਿ ਨਿਰੁਦ੍ਧੇ ‘‘ਮਨਵਾ ਪੁਗ੍ਗਲੋ ਨਿਰੁਦ੍ਧੋ’’ਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ.
੧੦੫. ਮਿਚ੍ਛਾਦਿਟ੍ਠਿਂ ਉਪਾਦਾਯ ‘‘ਮਿਚ੍ਛਾਦਿਟ੍ਠਿਯੋ ਪੁਗ੍ਗਲੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਮਿਚ੍ਛਾਦਿਟ੍ਠਿਯਾ ਨਿਰੁਦ੍ਧਾਯ ‘‘ਮਿਚ੍ਛਾਦਿਟ੍ਠਿਯੋ ਪੁਗ੍ਗਲੋ ਨਿਰੁਦ੍ਧੋ’’ਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ. ਮਿਚ੍ਛਾਸਙ੍ਕਪ੍ਪਂ ਉਪਾਦਾਯ… ਮਿਚ੍ਛਾਵਾਚਂ ਉਪਾਦਾਯ… ਮਿਚ੍ਛਾਕਮ੍ਮਨ੍ਤਂ ਉਪਾਦਾਯ… ਮਿਚ੍ਛਾਆਜੀਵਂ ਉਪਾਦਾਯ … ਮਿਚ੍ਛਾਵਾਯਾਮਂ ਉਪਾਦਾਯ… ਮਿਚ੍ਛਾਸਤਿਂ ਉਪਾਦਾਯ… ਮਿਚ੍ਛਾਸਮਾਧਿਂ ਉਪਾਦਾਯ ‘‘ਮਿਚ੍ਛਾਸਮਾਧਿਯੋ ਪੁਗ੍ਗਲੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਮਿਚ੍ਛਾਸਮਾਧਿਮ੍ਹਿ ਨਿਰੁਦ੍ਧੇ ‘‘ਮਿਚ੍ਛਾਸਮਾਧਿਯੋ ਪੁਗ੍ਗਲੋ ਨਿਰੁਦ੍ਧੋ’’ਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ.
੧੦੬. ਸਮ੍ਮਾਦਿਟ੍ਠਿਂ ਉਪਾਦਾਯ ‘‘ਸਮ੍ਮਾਦਿਟ੍ਠਿਯੋ ਪੁਗ੍ਗਲੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਸਮ੍ਮਾਦਿਟ੍ਠਿਯਾ ਨਿਰੁਦ੍ਧਾਯ ‘‘ਸਮ੍ਮਾਦਿਟ੍ਠਿਯੋ ਪੁਗ੍ਗਲੋ ਨਿਰੁਦ੍ਧੋ’’ਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮ੍ਮਾਸਙ੍ਕਪ੍ਪਂ ਉਪਾਦਾਯ… ਸਮ੍ਮਾਵਾਚਂ ਉਪਾਦਾਯ… ਸਮ੍ਮਾਕਮ੍ਮਨ੍ਤਂ ਉਪਾਦਾਯ… ਸਮ੍ਮਾਆਜੀਵਂ ਉਪਾਦਾਯ… ਸਮ੍ਮਾਵਾਯਾਮਂ ਉਪਾਦਾਯ… ਸਮ੍ਮਾਸਤਿਂ ਉਪਾਦਾਯ… ਸਮ੍ਮਾਸਮਾਧਿਂ ਉਪਾਦਾਯ ‘‘ਸਮ੍ਮਾਸਮਾਧਿਯੋ ਪੁਗ੍ਗਲੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਸਮ੍ਮਾਸਮਾਧਿਮ੍ਹਿ ਨਿਰੁਦ੍ਧੇ ‘‘ਸਮ੍ਮਾਸਮਾਧਿਯੋ ਪੁਗ੍ਗਲੋ ਨਿਰੁਦ੍ਧੋ’’ਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੦੭. ਰੂਪਂ ਉਪਾਦਾਯ, ਵੇਦਨਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਦ੍ਵਿਨ੍ਨਂ ਖਨ੍ਧਾਨਂ ਉਪਾਦਾਯ ਦ੍ਵਿਨ੍ਨਂ ਪੁਗ੍ਗਲਾਨਂ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰੂਪਂ ਉਪਾਦਾਯ, ਵੇਦਨਂ ਉਪਾਦਾਯ, ਸਞ੍ਞਂ ਉਪਾਦਾਯ, ਸਙ੍ਖਾਰੇ ਉਪਾਦਾਯ, ਵਿਞ੍ਞਾਣਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਪਞ੍ਚਨ੍ਨਂ ਖਨ੍ਧਾਨਂ ਉਪਾਦਾਯ ਪਞ੍ਚਨ੍ਨਂ ਪੁਗ੍ਗਲਾਨਂ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੦੮. ਚਕ੍ਖਾਯਤਨਂ ਉਪਾਦਾਯ, ਸੋਤਾਯਤਨਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਦ੍ਵਿਨ੍ਨਂ ਆਯਤਨਾਨਂ ਉਪਾਦਾਯ ਦ੍ਵਿਨ੍ਨਂ ਪੁਗ੍ਗਲਾਨਂ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚਕ੍ਖਾਯਤਨਂ ਉਪਾਦਾਯ, ਸੋਤਾਯਤਨਂ ਉਪਾਦਾਯ…ਪੇ… ਧਮ੍ਮਾਯਤਨਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਦ੍ਵਾਦਸਨ੍ਨਂ ਆਯਤਨਾਨਂ ਉਪਾਦਾਯ ਦ੍ਵਾਦਸਨ੍ਨਂ ਪੁਗ੍ਗਲਾਨਂ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੦੯. ਚਕ੍ਖੁਧਾਤੁਂ ਉਪਾਦਾਯ, ਸੋਤਧਾਤੁਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਦ੍ਵਿਨ੍ਨਂ ਧਾਤੂਨਂ ਉਪਾਦਾਯ ਦ੍ਵਿਨ੍ਨਂ ਪੁਗ੍ਗਲਾਨਂ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚਕ੍ਖੁਧਾਤੁਂ ਉਪਾਦਾਯ, ਸੋਤਧਾਤੁਂ ਉਪਾਦਾਯ…ਪੇ… ਧਮ੍ਮਧਾਤੁਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਅਟ੍ਠਾਰਸਨ੍ਨਂ ਧਾਤੂਨਂ ਉਪਾਦਾਯ ਅਟ੍ਠਾਰਸਨ੍ਨਂ ਪੁਗ੍ਗਲਾਨਂ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੧੦. ਚਕ੍ਖੁਨ੍ਦ੍ਰਿਯਂ ਉਪਾਦਾਯ, ਸੋਤਿਨ੍ਦ੍ਰਿਯਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਦ੍ਵਿਨ੍ਨਂ ਇਨ੍ਦ੍ਰਿਯਾਨਂ ਉਪਾਦਾਯ ਦ੍ਵਿਨ੍ਨਂ ਪੁਗ੍ਗਲਾਨਂ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚਕ੍ਖੁਨ੍ਦ੍ਰਿਯਂ ਉਪਾਦਾਯ, ਸੋਤਿਨ੍ਦ੍ਰਿਯਂ ਉਪਾਦਾਯ…ਪੇ… ਅਞ੍ਞਾਤਾਵਿਨ੍ਦ੍ਰਿਯਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਬਾਵੀਸਤੀਨਂ [ਬਾਵੀਸਤਿਯਾ (?)] ਇਨ੍ਦ੍ਰਿਯਾਨਂ ਉਪਾਦਾਯ ਬਾਵੀਸਤੀਨਂ ਪੁਗ੍ਗਲਾਨਂ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੧੧. ਏਕਵੋਕਾਰਭਵਂ ਉਪਾਦਾਯ ਏਕਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਚਤੁਵੋਕਾਰਭਵਂ ਉਪਾਦਾਯ ਚਤੁਨ੍ਨਂ ਪੁਗ੍ਗਲਾਨਂ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਏਕਵੋਕਾਰਭਵਂ ਉਪਾਦਾਯ ਏਕਸ੍ਸ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਪਞ੍ਚਵੋਕਾਰਭਵਂ ਉਪਾਦਾਯ ਪਞ੍ਚਨ੍ਨਂ ਪੁਗ੍ਗਲਾਨਂ ਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਏਕਵੋਕਾਰਭਵੇ ਏਕੋਵ ਪੁਗ੍ਗਲੋਤਿ? ਆਮਨ੍ਤਾ. ਚਤੁਵੋਕਾਰਭਵੇ ਚਤ੍ਤਾਰੋਵ [ਚਤ੍ਤਾਰੋ (?)] ਪੁਗ੍ਗਲਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਏਕਵੋਕਾਰਭਵੇ ਏਕੋਵ ਪੁਗ੍ਗਲੋਤਿ? ਆਮਨ੍ਤਾ. ਪਞ੍ਚਵੋਕਾਰਭਵੇ ਪਞ੍ਚੇਵ ਪੁਗ੍ਗਲਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੧੨. ਯਥਾ ਰੁਕ੍ਖਂ ਉਪਾਦਾਯ ਛਾਯਾਯ ਪਞ੍ਞਤ੍ਤਿ, ਏਵਮੇਵਂ ਰੂਪਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ( ) [(ਆਮਨ੍ਤਾ) (?) ਏਵਂ ਅਨਨ੍ਤਰਵਾਰਤ੍ਤਯੇਪਿ] ਯਥਾ ਰੁਕ੍ਖਂ ਉਪਾਦਾਯ ਛਾਯਾਯ ਪਞ੍ਞਤ੍ਤਿ, ਰੁਕ੍ਖੋਪਿ ਅਨਿਚ੍ਚੋ ਛਾਯਾਪਿ ਅਨਿਚ੍ਚਾ, ਏਵਮੇਵਂ ਰੂਪਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤਿ, ਰੂਪਮ੍ਪਿ ਅਨਿਚ੍ਚਂ ਪੁਗ੍ਗਲੋਪਿ ਅਨਿਚ੍ਚੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਯਥਾ ਰੁਕ੍ਖਂ ਉਪਾਦਾਯ ਛਾਯਾਯ ਪਞ੍ਞਤ੍ਤਿ, ਅਞ੍ਞੋ ਰੁਕ੍ਖੋ ਅਞ੍ਞਾ ਛਾਯਾ, ਏਵਮੇਵਂ ਰੂਪਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤਿ, ਅਞ੍ਞਂ ਰੂਪਂ ਅਞ੍ਞੋ ਪੁਗ੍ਗਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੧੩. ਯਥਾ ਗਾਮਂ ਉਪਾਦਾਯ ਗਾਮਿਕਸ੍ਸ ਪਞ੍ਞਤ੍ਤਿ, ਏਵਮੇਵਂ ਰੂਪਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਯਥਾ ਗਾਮਂ ਉਪਾਦਾਯ ਗਾਮਿਕਸ੍ਸ ਪਞ੍ਞਤ੍ਤਿ, ਅਞ੍ਞੋ ਗਾਮੋ ਅਞ੍ਞੋ ਗਾਮਿਕੋ, ਏਵਮੇਵਂ ਰੂਪਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤਿ, ਅਞ੍ਞਂ ਰੂਪਂ ਅਞ੍ਞੋ ਪੁਗ੍ਗਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੧੪. ਯਥਾ ਰਟ੍ਠਂ ਉਪਾਦਾਯ ਰਞ੍ਞੋ ਪਞ੍ਞਤ੍ਤਿ, ਏਵਮੇਵਂ ਰੂਪਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਯਥਾ ਰਟ੍ਠਂ ਉਪਾਦਾਯ ਰਞ੍ਞੋ ਪਞ੍ਞਤ੍ਤਿ, ਅਞ੍ਞਂ ਰਟ੍ਠਂ ਅਞ੍ਞੋ ਰਾਜਾ, ਏਵਮੇਵਂ ਰੂਪਂ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤਿ, ਅਞ੍ਞਂ ਰੂਪਂ ਅਞ੍ਞੋ ਪੁਗ੍ਗਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੧੫. ਯਥਾ ਨ ਨਿਗਲ਼ੋ ਨੇਗਲ਼ਿਕੋ, ਯਸ੍ਸ ਨਿਗਲ਼ੋ ਸੋ ਨੇਗਲ਼ਿਕੋ, ਏਵਮੇਵਂ ਨ ਰੂਪਂ ਰੂਪਵਾ, ਯਸ੍ਸ ਰੂਪਂ ਸੋ ਰੂਪਵਾਤਿ? ਯਥਾ ਨ ਨਿਗਲ਼ੋ ਨੇਗਲ਼ਿਕੋ, ਯਸ੍ਸ ਨਿਗਲ਼ੋ ਸੋ ਨੇਗਲ਼ਿਕੋ, ਅਞ੍ਞੋ ਨਿਗਲ਼ੋ ਅਞ੍ਞੋ ਨੇਗਲ਼ਿਕੋ, ਏਵਮੇਵਂ ਨ ਰੂਪਂ ਰੂਪਵਾ, ਯਸ੍ਸ ਰੂਪਂ ਸੋ ਰੂਪਵਾ, ਅਞ੍ਞਂ ਰੂਪਂ ਅਞ੍ਞੋ ਰੂਪਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੧੧੬. ਚਿਤ੍ਤੇ ਚਿਤ੍ਤੇ ਪੁਗ੍ਗਲਸ੍ਸ ਪਞ੍ਞਤ੍ਤੀਤਿ? ਆਮਨ੍ਤਾ. ਚਿਤ੍ਤੇ ਚਿਤ੍ਤੇ ਪੁਗ੍ਗਲੋ ਜਾਯਤਿ ਜੀਯਤਿ ਮੀਯਤਿ ਚਵਤਿ ਉਪਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ ਸੋਤਿ ਵਾ ਅਞ੍ਞੋਤਿ ਵਾਤਿ? ਆਮਨ੍ਤਾ. ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ ਕੁਮਾਰਕੋਤਿ ਵਾ ਕੁਮਾਰਿਕਾਤਿ ਵਾਤਿ? ਵਤ੍ਤਬ੍ਬਂ.
ਆਜਾਨਾਹਿ ਨਿਗ੍ਗਹਂ. ਹਞ੍ਚਿ ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ – ‘‘ਸੋਤਿ ਵਾ ਅਞ੍ਞੋਤਿ ਵਾ,’’ ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ – ‘ਕੁਮਾਰਕੋਤਿ ਵਾ ਕੁਮਾਰਿਕਾਤਿ ਵਾ’’’ਤਿ. ਯਂ ਤਤ੍ਥ ਵਦੇਸਿ – ‘‘ਵਤ੍ਤਬ੍ਬੇ ਖੋ – ‘ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ – ਸੋਤਿ ਵਾ ਅਞ੍ਞੋਤਿ ਵਾ, ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਵਤ੍ਤਬ੍ਬਂ – ਕੁਮਾਰਕੋਤਿ ਵਾ ਕੁਮਾਰਿਕਾਤਿ ਵਾ’’’ਤਿ ਮਿਚ੍ਛਾ.
ਹਞ੍ਚਿ ਵਾ ਪਨ ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਵਤ੍ਤਬ੍ਬਂ – ‘‘ਕੁਮਾਰਕੋਤਿ ਵਾ ਕੁਮਾਰਿਕਾ’’ਤਿ ਵਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਵਤ੍ਤਬ੍ਬਂ – ‘ਸੋਤਿ ਵਾ ਅਞ੍ਞੋਤਿ ਵਾ’’’ਤਿ. ਯਂ ਤਤ੍ਥ ਵਦੇਸਿ – ‘‘ਵਤ੍ਤਬ੍ਬੇ ਖੋ – ‘ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ – ਸੋਤਿ ਵਾ ਅਞ੍ਞੋਤਿ ਵਾ, ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਵਤ੍ਤਬ੍ਬਂ – ਕੁਮਾਰਕੋਤਿ ਵਾ ਕੁਮਾਰਿਕਾਤਿ ਵਾ’’’ਤਿ ਮਿਚ੍ਛਾ.
੧੧੭. ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ – ‘‘ਸੋਤਿ ਵਾ ਅਞ੍ਞੋਤਿ ਵਾ’’ਤਿ? ਆਮਨ੍ਤਾ. ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ – ‘‘ਇਤ੍ਥੀਤਿ ਵਾ ਪੁਰਿਸੋਤਿ ਵਾ ਗਹਟ੍ਠੋਤਿ ਵਾ ਪਬ੍ਬਜਿਤੋਤਿ ਵਾ ਦੇਵੋਤਿ ਵਾ ਮਨੁਸ੍ਸੋਤਿ ਵਾ’’ਤਿ? ਵਤ੍ਤਬ੍ਬਂ.
ਆਜਾਨਾਹਿ ਨਿਗ੍ਗਹਂ. ਹਞ੍ਚਿ ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ – ‘‘ਸੋਤਿ ਵਾ ਅਞ੍ਞੋਤਿ ਵਾ,’’ ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ – ‘ਦੇਵੋਤਿ ਵਾ ਮਨੁਸ੍ਸੋਤਿ ਵਾ’’’ਤਿ. ਯਂ ਤਤ੍ਥ ਵਦੇਸਿ – ‘‘ਵਤ੍ਤਬ੍ਬੇ ਖੋ – ‘ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ – ਸੋਤਿ ਵਾ ਅਞ੍ਞੋਤਿ ਵਾ, ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਵਤ੍ਤਬ੍ਬਂ – ਦੇਵੋਤਿ ਵਾ ਮਨੁਸ੍ਸੋਤਿ ਵਾ’’’ਤਿ ਮਿਚ੍ਛਾ.
ਹਞ੍ਚਿ ਵਾ ਪਨ ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਵਤ੍ਤਬ੍ਬਂ – ‘‘ਦੇਵੋਤਿ ਵਾ ਮਨੁਸ੍ਸੋਤਿ ਵਾ,’’ ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਵਤ੍ਤਬ੍ਬਂ – ‘ਸੋਤਿ ਵਾ ਅਞ੍ਞੋਤਿ ਵਾ’’’ਤਿ. ਯਂ ਤਤ੍ਥ ਵਦੇਸਿ – ‘‘ਵਤ੍ਤਬ੍ਬੇ ਖੋ – ‘ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਨ ਵਤ੍ਤਬ੍ਬਂ – ਸੋਤਿ ਵਾ ਅਞ੍ਞੋਤਿ ਵਾ, ਦੁਤਿਯੇ ਚਿਤ੍ਤੇ ਉਪ੍ਪਨ੍ਨੇ ਵਤ੍ਤਬ੍ਬਂ – ਦੇਵੋਤਿ ਵਾ ਮਨੁਸ੍ਸੋਤਿ ਵਾ’’’ਤਿ ਮਿਚ੍ਛਾ…ਪੇ….
੧੧੮. ਨ ਵਤ੍ਤਬ੍ਬਂ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ? ਆਮਨ੍ਤਾ. ਨਨੁ ਯੋ ਪਸ੍ਸਤਿ ਯਂ ਪਸ੍ਸਤਿ ਯੇਨ ਪਸ੍ਸਤਿ, ਸੋ ਪਸ੍ਸਤਿ ਤਂ ਪਸ੍ਸਤਿ ਤੇਨ ਪਸ੍ਸਤੀਤਿ? ਆਮਨ੍ਤਾ. ਹਞ੍ਚਿ ਯੋ ਪਸ੍ਸਤਿ ਯਂ ਪਸ੍ਸਤਿ ਯੇਨ ਪਸ੍ਸਤਿ, ਸੋ ਪਸ੍ਸਤਿ ਤਂ ਪਸ੍ਸਤਿ ਤੇਨ ਪਸ੍ਸਤਿ; ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ.
੧੧੯. ਨ ਵਤ੍ਤਬ੍ਬਂ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ? ਆਮਨ੍ਤਾ. ਨਨੁ ਯੋ ਸੁਣਾਤਿ…ਪੇ… ਯੋ ਘਾਯਤਿ… ਯੋ ਸਾਯਤਿ… ਯੋ ਫੁਸਤਿ… ਯੋ ਵਿਜਾਨਾਤਿ ਯਂ ਵਿਜਾਨਾਤਿ ਯੇਨ ਵਿਜਾਨਾਤਿ, ਸੋ ਵਿਜਾਨਾਤਿ ਤਂ ਵਿਜਾਨਾਤਿ ਤੇਨ ਵਿਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਯੋ ਵਿਜਾਨਾਤਿ ਯਂ ਵਿਜਾਨਾਤਿ ਯੇਨ ਵਿਜਾਨਾਤਿ, ਸੋ ਵਿਜਾਨਾਤਿ ਤਂ ਵਿਜਾਨਾਤਿ ਤੇਨ ਵਿਜਾਨਾਤਿ; ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ.
੧੨੦. ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾਤਿ? ਆਮਨ੍ਤਾ. ਨਨੁ ਯੋ ਨ ਪਸ੍ਸਤਿ ਯਂ ਨ ਪਸ੍ਸਤਿ ਯੇਨ ਨ ਪਸ੍ਸਤਿ, ਸੋ ਨ ਪਸ੍ਸਤਿ ਤਂ ਨ ਪਸ੍ਸਤਿ ਤੇਨ ਨ ਪਸ੍ਸਤੀਤਿ? ਆਮਨ੍ਤਾ. ਹਞ੍ਚਿ ਯੋ ਨ ਪਸ੍ਸਤਿ ਯਂ ਨ ਪਸ੍ਸਤਿ ਯੇਨ ਨ ਪਸ੍ਸਤਿ, ਸੋ ਨ ਪਸ੍ਸਤਿ ਤਂ ਨ ਪਸ੍ਸਤਿ ਤੇਨ ਨ ਪਸ੍ਸਤਿ; ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ.
ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾਤਿ? ਆਮਨ੍ਤਾ. ਨਨੁ ਯੋ ਨ ਸੁਣਾਤਿ…ਪੇ… ਯੋ ਨ ਘਾਯਤਿ… ਯੋ ਨ ਸਾਯਤਿ… ਯੋ ਨ ਫੁਸਤਿ… ਯੋ ਨ ਵਿਜਾਨਾਤਿ ਯਂ ਨ ਵਿਜਾਨਾਤਿ ਯੇਨ ਨ ਵਿਜਾਨਾਤਿ, ਸੋ ਨ ਵਿਜਾਨਾਤਿ ਤਂ ਨ ਵਿਜਾਨਾਤਿ ਤੇਨ ਨ ਵਿਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਯੋ ਨ ਵਿਜਾਨਾਤਿ ਯਂ ਨ ਵਿਜਾਨਾਤਿ ਯੇਨ ਨ ਵਿਜਾਨਾਤਿ, ਸੋ ਨ ਵਿਜਾਨਾਤਿ ਤਂ ਨ ਵਿਜਾਨਾਤਿ ਤੇਨ ਨ ਵਿਜਾਨਾਤਿ; ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ.
੧੨੧. ਨ ਵਤ੍ਤਬ੍ਬਂ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਪਸ੍ਸਾਮਹਂ, ਭਿਕ੍ਖਵੇ, ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਸਤ੍ਤੇ ਚਵਮਾਨੇ ਉਪਪਜ੍ਜਮਾਨੇ ਹੀਨੇ ਪਣੀਤੇ ਸੁਵਣ੍ਣੇ ਦੁਬ੍ਬਣ੍ਣੇ, ਸੁਗਤੇ ਦੁਗ੍ਗਤੇ ਯਥਾਕਮ੍ਮੂਪਗੇ ਸਤ੍ਤੇ ਪਜਾਨਾਮੀ’’ਤਿ [ਮ. ਨਿ. ੧.੨੧੩ ਥੋਕਂ ਵਿਸਦਿਸਂ]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾਤਿ.
੧੨੨. ਵੁਤ੍ਤਂ ਭਗਵਤਾ – ‘‘ਪਸ੍ਸਾਮਹਂ, ਭਿਕ੍ਖਵੇ, ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਸਤ੍ਤੇ ਚਵਮਾਨੇ ਉਪਪਜ੍ਜਮਾਨੇ ਹੀਨੇ ਪਣੀਤੇ ਸੁਵਣ੍ਣੇ ਦੁਬ੍ਬਣ੍ਣੇ, ਸੁਗਤੇ ਦੁਗ੍ਗਤੇ ਯਥਾਕਮ੍ਮੂਪਗੇ ਸਤ੍ਤੇ ਪਜਾਨਾਮੀ’’ਤਿ ਕਤ੍ਵਾ ਤੇਨੇਵ ਕਾਰਣੇਨ ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾਤਿ? ਆਮਨ੍ਤਾ. ਭਗਵਾ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਰੂਪਂ ਪਸ੍ਸਤਿ ਪੁਗ੍ਗਲਂ ਪਸ੍ਸਤੀਤਿ? ਰੂਪਂ ਪਸ੍ਸਤਿ. ਰੂਪਂ ਪੁਗ੍ਗਲੋ, ਰੂਪਂ ਚਵਤਿ, ਰੂਪਂ ਉਪਪਜ੍ਜਤਿ, ਰੂਪਂ ਯਥਾਕਮ੍ਮੂਪਗਨ੍ਤਿ? ਨ ਹੇਵਂ ਵਤ੍ਤਬ੍ਬੇ.
ਭਗਵਾ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਰੂਪਂ ਪਸ੍ਸਤਿ ਪੁਗ੍ਗਲਂ ਪਸ੍ਸਤੀਤਿ? ਪੁਗ੍ਗਲਂ ਪਸ੍ਸਤਿ. ਪੁਗ੍ਗਲੋ ਰੂਪਂ ਰੂਪਾਯਤਨਂ ਰੂਪਧਾਤੁ ਨੀਲਂ ਪੀਤਕਂ ਲੋਹਿਤਕਂ ਓਦਾਤਂ ਚਕ੍ਖੁਵਿਞ੍ਞੇਯ੍ਯਂ ਚਕ੍ਖੁਸ੍ਮਿਂ ਪਟਿਹਞ੍ਞਤਿ, ਚਕ੍ਖੁਸ੍ਸ ਆਪਾਥਂ ਆਗਚ੍ਛਤੀਤਿ? ਨ ਹੇਵਂ ਵਤ੍ਤਬ੍ਬੇ.
ਭਗਵਾ ਦਿਬ੍ਬੇਨ ਚਕ੍ਖੁਨਾ ਵਿਸੁਦ੍ਧੇਨ ਅਤਿਕ੍ਕਨ੍ਤਮਾਨੁਸਕੇਨ ਰੂਪਂ ਪਸ੍ਸਤਿ ਪੁਗ੍ਗਲਂ ਪਸ੍ਸਤੀਤਿ? ਉਭੋ ਪਸ੍ਸਤਿ. ਉਭੋ ਰੂਪਂ ਰੂਪਾਯਤਨਂ ਰੂਪਧਾਤੁ, ਉਭੋ ਨੀਲਾ, ਉਭੋ ਪੀਤਕਾ, ਉਭੋ ਲੋਹਿਤਕਾ, ਉਭੋ ਓਦਾਤਾ, ਉਭੋ ਚਕ੍ਖੁਵਿਞ੍ਞੇਯ੍ਯਾ, ਉਭੋ ਚਕ੍ਖੁਸ੍ਮਿਂ ਪਟਿਹਞ੍ਞਨ੍ਤਿ, ਉਭੋ ਚਕ੍ਖੁਸ੍ਸ ਆਪਾਥਂ ਆਗਚ੍ਛਨ੍ਤਿ, ਉਭੋ ਚਵਨ੍ਤਿ, ਉਭੋ ਉਪਪਜ੍ਜਨ੍ਤਿ, ਉਭੋ ਯਥਾਕਮ੍ਮੂਪਗਾਤਿ? ਨ ਹੇਵਂ ਵਤ੍ਤਬ੍ਬੇ.
ਉਪਾਦਾਪਞ੍ਞਤ੍ਤਾਨੁਯੋਗੋ.