੧. ਚਿਤ੍ਤੁਪ੍ਪਾਦਕਣ੍ਡਂ
ਕਾਮਾਵਚਰਕੁਸਲਂ
ਪਦਭਾਜਨੀ
੧. ਕਤਮੇ ਧਮ੍ਮਾ ਕੁਸਲਾ? ਯਸ੍ਮਿਂ ਸਮਯੇ ਕਾਮਾਵਚਰਂ ਕੁਸਲਂ ਚਿਤ੍ਤਂ ਉਪ੍ਪਨ੍ਨਂ ਹੋਤਿ ਸੋਮਨਸ੍ਸਸਹਗਤਂ ਞਾਣਸਮ੍ਪਯੁਤ੍ਤਂ ਰੂਪਾਰਮ੍ਮਣਂ ਵਾ ਸਦ੍ਦਾਰਮ੍ਮਣਂ ਵਾ ਗਨ੍ਧਾਰਮ੍ਮਣਂ ਵਾ ਰਸਾਰਮ੍ਮਣਂ ਵਾ ਫੋਟ੍ਠਬ੍ਬਾਰਮ੍ਮਣਂ ਵਾ ਧਮ੍ਮਾਰਮ੍ਮਣਂ ਵਾ ਯਂ ਯਂ ਵਾ ਪਨਾਰਬ੍ਭ, ਤਸ੍ਮਿਂ ਸਮਯੇ ਫਸ੍ਸੋ ਹੋਤਿ, ਵੇਦਨਾ ਹੋਤਿ, ਸਞ੍ਞਾ ਹੋਤਿ, ਚੇਤਨਾ ਹੋਤਿ, ਚਿਤ੍ਤਂ ਹੋਤਿ, ਵਿਤਕ੍ਕੋ ਹੋਤਿ, ਵਿਚਾਰੋ ਹੋਤਿ, ਪੀਤਿ ਹੋਤਿ, ਸੁਖਂ ਹੋਤਿ, ਚਿਤ੍ਤਸ੍ਸੇਕਗ੍ਗਤਾ ਹੋਤਿ, ਸਦ੍ਧਿਨ੍ਦ੍ਰਿਯਂ ਹੋਤਿ, ਵੀਰਿਯਿਨ੍ਦ੍ਰਿਯਂ [ਵਿਰਿਯਿਨ੍ਦ੍ਰਿਯਂ (ਸੀ. ਸ੍ਯਾ.)] ਹੋਤਿ, ਸਤਿਨ੍ਦ੍ਰਿਯਂ ਹੋਤਿ, ਸਮਾਧਿਨ੍ਦ੍ਰਿਯਂ ਹੋਤਿ, ਪਞ੍ਞਿਨ੍ਦ੍ਰਿਯਂ ਹੋਤਿ, ਮਨਿਨ੍ਦ੍ਰਿਯਂ ਹੋਤਿ, ਸੋਮਨਸ੍ਸਿਨ੍ਦ੍ਰਿਯਂ ਹੋਤਿ, ਜੀਵਿਤਿਨ੍ਦ੍ਰਿਯਂ ਹੋਤਿ, ਸਮ੍ਮਾਦਿਟ੍ਠਿ ਹੋਤਿ, ਸਮ੍ਮਾਸਙ੍ਕਪ੍ਪੋ ਹੋਤਿ, ਸਮ੍ਮਾਵਾਯਾਮੋ ਹੋਤਿ, ਸਮ੍ਮਾਸਤਿ ਹੋਤਿ, ਸਮ੍ਮਾਸਮਾਧਿ ਹੋਤਿ, ਸਦ੍ਧਾਬਲਂ ਹੋਤਿ, ਵੀਰਿਯਬਲਂ [ਵਿਰਿਯਬਲਂ (ਸੀ. ਸ੍ਯਾ.)] ਹੋਤਿ, ਸਤਿਬਲਂ ਹੋਤਿ, ਸਮਾਧਿਬਲਂ ਹੋਤਿ, ਪਞ੍ਞਾਬਲਂ ਹੋਤਿ, ਹਿਰਿਬਲਂ ਹੋਤਿ, ਓਤ੍ਤਪ੍ਪਬਲਂ ਹੋਤਿ, ਅਲੋਭੋ ਹੋਤਿ, ਅਦੋਸੋ ਹੋਤਿ, ਅਮੋਹੋ ਹੋਤਿ, ਅਨਭਿਜ੍ਝਾ ਹੋਤਿ, ਅਬ੍ਯਾਪਾਦੋ ਹੋਤਿ, ਸਮ੍ਮਾਦਿਟ੍ਠਿ ਹੋਤਿ, ਹਿਰੀ ਹੋਤਿ, ਓਤ੍ਤਪ੍ਪਂ ਹੋਤਿ, ਕਾਯਪਸ੍ਸਦ੍ਧਿ [ਕਾਯਪ੍ਪਸ੍ਸਦ੍ਧਿ (ਸ੍ਯਾ.)] ਹੋਤਿ, ਚਿਤ੍ਤਪਸ੍ਸਦ੍ਧਿ [ਚਿਤ੍ਤਪ੍ਪਸ੍ਸਦ੍ਧਿ (ਸ੍ਯਾ.)] ਹੋਤਿ, ਕਾਯਲਹੁਤਾ ਹੋਤਿ, ਚਿਤ੍ਤਲਹੁਤਾ ਹੋਤਿ, ਕਾਯਮੁਦੁਤਾ ਹੋਤਿ, ਚਿਤ੍ਤਮੁਦੁਤਾ ਹੋਤਿ, ਕਾਯਕਮ੍ਮਞ੍ਞਤਾ ਹੋਤਿ, ਚਿਤ੍ਤਕਮ੍ਮਞ੍ਞਤਾ ਹੋਤਿ, ਕਾਯਪਾਗੁਞ੍ਞਤਾ ਹੋਤਿ, ਚਿਤ੍ਤਪਾਗੁਞ੍ਞਤਾ ਹੋਤਿ, ਕਾਯੁਜੁਕਤਾ [ਕਾਯੁਜ੍ਜੁਕਤਾ (ਸੀ. ਕ.)] ਹੋਤਿ, ਚਿਤ੍ਤੁਜੁਕਤਾ [ਚਿਤ੍ਤੁਜ੍ਜੁਕਤਾ (ਸੀ. ਕ.)] ਹੋਤਿ, ਸਤਿ ਹੋਤਿ, ਸਮ੍ਪਜਞ੍ਞਂ ਹੋਤਿ, ਸਮਥੋ ਹੋਤਿ, ਵਿਪਸ੍ਸਨਾ ਹੋਤਿ, ਪਗ੍ਗਾਹੋ ਹੋਤਿ, ਅਵਿਕ੍ਖੇਪੋ ਹੋਤਿ; ਯੇ ਵਾ ਪਨ ਤਸ੍ਮਿਂ ਸਮਯੇ ਅਞ੍ਞੇਪਿ ਅਤ੍ਥਿ ਪਟਿਚ੍ਚਸਮੁਪ੍ਪਨ੍ਨਾ ਅਰੂਪਿਨੋ ਧਮ੍ਮਾ – ਇਮੇ ਧਮ੍ਮਾ ਕੁਸਲਾ.
੨. ਕਤਮੋ ਤਸ੍ਮਿਂ ਸਮਯੇ ਫਸ੍ਸੋ ਹੋਤਿ? ਯੋ ਤਸ੍ਮਿਂ ਸਮਯੇ ਫਸ੍ਸੋ ਫੁਸਨਾ ਸਂਫੁਸਨਾ ਸਂਫੁਸਿਤਤ੍ਤਂ – ਅਯਂ ਤਸ੍ਮਿਂ ਸਮਯੇ ਫਸ੍ਸੋ ਹੋਤਿ.
੩. ਕਤਮਾ ਤਸ੍ਮਿਂ ਸਮਯੇ ਵੇਦਨਾ ਹੋਤਿ? ਯਂ ਤਸ੍ਮਿਂ ਸਮਯੇ ਤਜ੍ਜਾਮਨੋਵਿਞ੍ਞਾਣਧਾਤੁਸਮ੍ਫਸ੍ਸਜਂ ਚੇਤਸਿਕਂ ਸਾਤਂ ਚੇਤਸਿਕਂ ਸੁਖਂ ਚੇਤੋਸਮ੍ਫਸ੍ਸਜਂ ਸਾਤਂ ਸੁਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਸਾਤਾ ਸੁਖਾ ਵੇਦਨਾ – ਅਯਂ ਤਸ੍ਮਿਂ ਸਮਯੇ ਵੇਦਨਾ ਹੋਤਿ.
੪. ਕਤਮਾ ਤਸ੍ਮਿਂ ਸਮਯੇ ਸਞ੍ਞਾ ਹੋਤਿ? ਯਾ ਤਸ੍ਮਿਂ ਸਮਯੇ ਤਜ੍ਜਾਮਨੋਵਿਞ੍ਞਾਣਧਾਤੁਸਮ੍ਫਸ੍ਸਜਾ ਸਞ੍ਞਾ ਸਞ੍ਜਾਨਨਾ ਸਞ੍ਜਾਨਿਤਤ੍ਤਂ – ਅਯਂ ਤਸ੍ਮਿਂ ਸਮਯੇ ਸਞ੍ਞਾ ਹੋਤਿ.
੫. ਕਤਮਾ ਤਸ੍ਮਿਂ ਸਮਯੇ ਚੇਤਨਾ ਹੋਤਿ? ਯਾ ਤਸ੍ਮਿਂ ਸਮਯੇ ਤਜ੍ਜਾਮਨੋਵਿਞ੍ਞਾਣਧਾਤੁਸਮ੍ਫਸ੍ਸਜਾ ਚੇਤਨਾ ਸਞ੍ਚੇਤਨਾ ਚੇਤਯਿਤਤ੍ਤਂ [ਸਞ੍ਚੇਤਯਿਤਤ੍ਤਂ (ਸ੍ਯਾ.)] – ਅਯਂ ਤਸ੍ਮਿਂ ਸਮਯੇ ਚੇਤਨਾ ਹੋਤਿ.
੬. ਕਤਮਂ ਤਸ੍ਮਿਂ ਸਮਯੇ ਚਿਤ੍ਤਂ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਤਸ੍ਮਿਂ ਸਮਯੇ ਚਿਤ੍ਤਂ ਹੋਤਿ.
੭. ਕਤਮੋ ਤਸ੍ਮਿਂ ਸਮਯੇ ਵਿਤਕ੍ਕੋ ਹੋਤਿ? ਯੋ ਤਸ੍ਮਿਂ ਸਮਯੇ ਤਕ੍ਕੋ ਵਿਤਕ੍ਕੋ ਸਙ੍ਕਪ੍ਪੋ ਅਪ੍ਪਨਾ ਬ੍ਯਪ੍ਪਨਾ ਚੇਤਸੋ ਅਭਿਨਿਰੋਪਨਾ ਸਮ੍ਮਾਸਙ੍ਕਪ੍ਪੋ – ਅਯਂ ਤਸ੍ਮਿਂ ਸਮਯੇ ਵਿਤਕ੍ਕੋ ਹੋਤਿ.
੮. ਕਤਮੋ ਤਸ੍ਮਿਂ ਸਮਯੇ ਵਿਚਾਰੋ ਹੋਤਿ? ਯੋ ਤਸ੍ਮਿਂ ਸਮਯੇ ਚਾਰੋ ਵਿਚਾਰੋ ਅਨੁਵਿਚਾਰੋ ਉਪਵਿਚਾਰੋ ਚਿਤ੍ਤਸ੍ਸ ਅਨੁਸਨ੍ਧਾਨਤਾ ਅਨੁਪੇਕ੍ਖਨਤਾ – ਅਯਂ ਤਸ੍ਮਿਂ ਸਮਯੇ ਵਿਚਾਰੋ ਹੋਤਿ.
੯. ਕਤਮਾ ਤਸ੍ਮਿਂ ਸਮਯੇ ਪੀਤਿ ਹੋਤਿ? ਯਾ ਤਸ੍ਮਿਂ ਸਮਯੇ ਪੀਤਿ ਪਾਮੋਜ੍ਜਂ ਆਮੋਦਨਾ ਪਮੋਦਨਾ ਹਾਸੋ ਪਹਾਸੋ ਵਿਤ੍ਤਿ ਓਦਗ੍ਯਂ ਅਤ੍ਤਮਨਤਾ ਚਿਤ੍ਤਸ੍ਸ – ਅਯਂ ਤਸ੍ਮਿਂ ਸਮਯੇ ਪੀਤਿ ਹੋਤਿ.
੧੦. ਕਤਮਂ ਤਸ੍ਮਿਂ ਸਮਯੇ ਸੁਖਂ ਹੋਤਿ? ਯਂ ਤਸ੍ਮਿਂ ਸਮਯੇ ਚੇਤਸਿਕਂ ਸਾਤਂ ਚੇਤਸਿਕਂ ਸੁਖਂ ਚੇਤੋਸਮ੍ਫਸ੍ਸਜਂ ਸਾਤਂ ਸੁਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਸਾਤਾ ਸੁਖਾ ਵੇਦਨਾ – ਇਦਂ ਤਸ੍ਮਿਂ ਸਮਯੇ ਸੁਖਂ ਹੋਤਿ.
੧੧. ਕਤਮਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸੇਕਗ੍ਗਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ ਅਵਟ੍ਠਿਤਿ ਅਵਿਸਾਹਾਰੋ ਅਵਿਕ੍ਖੇਪੋ ਅਵਿਸਾਹਟਮਾਨਸਤਾ ਸਮਥੋ ਸਮਾਧਿਨ੍ਦ੍ਰਿਯਂ ਸਮਾਧਿਬਲਂ ਸਮ੍ਮਾਸਮਾਧਿ – ਅਯਂ ਤਸ੍ਮਿਂ ਸਮਯੇ ਚਿਤ੍ਤਸ੍ਸੇਕਗ੍ਗਤਾ ਹੋਤਿ.
੧੨. ਕਤਮਂ ਤਸ੍ਮਿਂ ਸਮਯੇ ਸਦ੍ਧਿਨ੍ਦ੍ਰਿਯਂ ਹੋਤਿ? ਯਾ ਤਸ੍ਮਿਂ ਸਮਯੇ ਸਦ੍ਧਾ ਸਦ੍ਦਹਨਾ ਓਕਪ੍ਪਨਾ ਅਭਿਪ੍ਪਸਾਦੋ ਸਦ੍ਧਾ ਸਦ੍ਧਿਨ੍ਦ੍ਰਿਯਂ ਸਦ੍ਧਾਬਲਂ – ਇਦਂ ਤਸ੍ਮਿਂ ਸਮਯੇ ਸਦ੍ਧਿਨ੍ਦ੍ਰਿਯਂ ਹੋਤਿ.
੧੩. ਕਤਮਂ ਤਸ੍ਮਿਂ ਸਮਯੇ ਵੀਰਿਯਿਨ੍ਦ੍ਰਿਯਂ ਹੋਤਿ? ਯੋ ਤਸ੍ਮਿਂ ਸਮਯੇ ਚੇਤਸਿਕੋ ਵੀਰਿਯਾਰਮ੍ਭੋ [ਵਿਰਿਯਾਰਮ੍ਭੋ (ਸੀ. ਸ੍ਯਾ.)] ਨਿਕ੍ਕਮੋ ਪਰਕ੍ਕਮੋ ਉਯ੍ਯਾਮੋ ਵਾਯਾਮੋ ਉਸ੍ਸਾਹੋ ਉਸ੍ਸੋਲ਼੍ਹੀ [ਉਸ੍ਸੋਲ਼੍ਹਿ (ਸੀ.)] ਥਾਮੋ ਧਿਤਿ ਅਸਿਥਿਲਪਰਕ੍ਕਮਤਾ ਅਨਿਕ੍ਖਿਤ੍ਤਛਨ੍ਦਤਾ ਅਨਿਕ੍ਖਿਤ੍ਤਧੁਰਤਾ ਧੁਰਸਮ੍ਪਗ੍ਗਾਹੋ ਵੀਰਿਯਂ ਵੀਰਿਯਿਨ੍ਦ੍ਰਿਯਂ ਵੀਰਿਯਬਲਂ ਸਮ੍ਮਾਵਾਯਾਮੋ – ਇਦਂ ਤਸ੍ਮਿਂ ਸਮਯੇ ਵੀਰਿਯਿਨ੍ਦ੍ਰਿਯਂ ਹੋਤਿ.
੧੪. ਕਤਮਂ ਤਸ੍ਮਿਂ ਸਮਯੇ ਸਤਿਨ੍ਦ੍ਰਿਯਂ ਹੋਤਿ? ਯਾ ਤਸ੍ਮਿਂ ਸਮਯੇ ਸਤਿ ਅਨੁਸ੍ਸਤਿ ਪਟਿਸ੍ਸਤਿ ਸਤਿ ਸਰਣਤਾ ਧਾਰਣਤਾ ਅਪਿਲਾਪਨਤਾ ਅਸਮ੍ਮੁਸ੍ਸਨਤਾ ਸਤਿ ਸਤਿਨ੍ਦ੍ਰਿਯਂ ਸਤਿਬਲਂ ਸਮ੍ਮਾਸਤਿ – ਇਦਂ ਤਸ੍ਮਿਂ ਸਮਯੇ ਸਤਿਨ੍ਦ੍ਰਿਯਂ ਹੋਤਿ.
੧੫. ਕਤਮਂ ਤਸ੍ਮਿਂ ਸਮਯੇ ਸਮਾਧਿਨ੍ਦ੍ਰਿਯਂ ਹੋਤਿ? ਯਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ ਅਵਟ੍ਠਿਤਿ ਅਵਿਸਾਹਾਰੋ ਅਵਿਕ੍ਖੇਪੋ ਅਵਿਸਾਹਟਮਾਨਸਤਾ ਸਮਥੋ ਸਮਾਧਿਨ੍ਦ੍ਰਿਯਂ ਸਮਾਧਿਬਲਂ ਸਮ੍ਮਾਸਮਾਧਿ – ਇਦਂ ਤਸ੍ਮਿਂ ਸਮਯੇ ਸਮਾਧਿਨ੍ਦ੍ਰਿਯਂ ਹੋਤਿ.
੧੬. ਕਤਮਂ ਤਸ੍ਮਿਂ ਸਮਯੇ ਪਞ੍ਞਿਨ੍ਦ੍ਰਿਯਂ ਹੋਤਿ? ਯਾ ਤਸ੍ਮਿਂ ਸਮਯੇ ਪਞ੍ਞਾ ਪਜਾਨਨਾ ਵਿਚਯੋ ਪਵਿਚਯੋ ਧਮ੍ਮਵਿਚਯੋ ਸਲ੍ਲਕ੍ਖਣਾ ਉਪਲਕ੍ਖਣਾ ਪਚ੍ਚੁਪਲਕ੍ਖਣਾ ਪਣ੍ਡਿਚ੍ਚਂ ਕੋਸਲ੍ਲਂ ਨੇਪੁਞ੍ਞਂ ਵੇਭਬ੍ਯਾ ਚਿਨ੍ਤਾ ਉਪਪਰਿਕ੍ਖਾ ਭੂਰੀ ਮੇਧਾ ਪਰਿਣਾਯਿਕਾ ਵਿਪਸ੍ਸਨਾ ਸਮ੍ਪਜਞ੍ਞਂ ਪਤੋਦੋ ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਪਞ੍ਞਾਸਤ੍ਥਂ ਪਞ੍ਞਾਪਾਸਾਦੋ ਪਞ੍ਞਾਆਲੋਕੋ ਪਞ੍ਞਾਓਭਾਸੋ ਪਞ੍ਞਾਪਜ੍ਜੋਤੋ ਪਞ੍ਞਾਰਤਨਂ ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਤਸ੍ਮਿਂ ਸਮਯੇ ਪਞ੍ਞਿਨ੍ਦ੍ਰਿਯਂ ਹੋਤਿ.
੧੭. ਕਤਮਂ ਤਸ੍ਮਿਂ ਸਮਯੇ ਮਨਿਨ੍ਦ੍ਰਿਯਂ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਤਸ੍ਮਿਂ ਸਮਯੇ ਮਨਿਨ੍ਦ੍ਰਿਯਂ ਹੋਤਿ.
੧੮. ਕਤਮਂ ਤਸ੍ਮਿਂ ਸਮਯੇ ਸੋਮਨਸ੍ਸਿਨ੍ਦ੍ਰਿਯਂ ਹੋਤਿ? ਯਂ ਤਸ੍ਮਿਂ ਸਮਯੇ ਚੇਤਸਿਕਂ ਸਾਤਂ ਚੇਤਸਿਕਂ ਸੁਖਂ ਚੇਤੋਸਮ੍ਫਸ੍ਸਜਂ ਸਾਤਂ ਸੁਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਸਾਤਾ ਸੁਖਾ ਵੇਦਨਾ – ਇਦਂ ਤਸ੍ਮਿਂ ਸਮਯੇ ਸੋਮਨਸ੍ਸਿਨ੍ਦ੍ਰਿਯਂ ਹੋਤਿ.
੧੯. ਕਤਮਂ ਤਸ੍ਮਿਂ ਸਮਯੇ ਜੀਵਿਤਿਨ੍ਦ੍ਰਿਯਂ ਹੋਤਿ? ਯੋ ਤੇਸਂ ਅਰੂਪੀਨਂ ਧਮ੍ਮਾਨਂ ਆਯੁ ਠਿਤਿ ਯਪਨਾ ਯਾਪਨਾ ਇਰਿਯਨਾ [ਇਰੀਯਨਾ (ਸੀ.)] ਵਤ੍ਤਨਾ ਪਾਲਨਾ ਜੀਵਿਤਂ ਜੀਵਿਤਿਨ੍ਦ੍ਰਿਯਂ – ਇਦਂ ਤਸ੍ਮਿਂ ਸਮਯੇ ਜੀਵਿਤਿਨ੍ਦ੍ਰਿਯਂ ਹੋਤਿ.
੨੦. ਕਤਮਾ ਤਸ੍ਮਿਂ ਸਮਯੇ ਸਮ੍ਮਾਦਿਟ੍ਠਿ ਹੋਤਿ? ਯਾ ਤਸ੍ਮਿਂ ਸਮਯੇ ਪਞ੍ਞਾ ਪਜਾਨਨਾ ਵਿਚਯੋ ਪਵਿਚਯੋ ਧਮ੍ਮਵਿਚਯੋ ਸਲ੍ਲਕ੍ਖਣਾ ਉਪਲਕ੍ਖਣਾ ਪਚ੍ਚੁਪਲਕ੍ਖਣਾ ਪਣ੍ਡਿਚ੍ਚਂ ਕੋਸਲ੍ਲਂ ਨੇਪੁਞ੍ਞਂ ਵੇਭਬ੍ਯਾ ਚਿਨ੍ਤਾ ਉਪਪਰਿਕ੍ਖਾ ਭੂਰੀ ਮੇਧਾ ਪਰਿਣਾਯਿਕਾ ਵਿਪਸ੍ਸਨਾ ਸਮ੍ਪਜਞ੍ਞਂ ਪਤੋਦੋ ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਪਞ੍ਞਾਸਤ੍ਥਂ ਪਞ੍ਞਾਪਾਸਾਦੋ ਪਞ੍ਞਾਆਲੋਕੋ ਪਞ੍ਞਾਓਭਾਸੋ ਪਞ੍ਞਾਪਜ੍ਜੋਤੋ ਪਞ੍ਞਾਰਤਨਂ ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਤਸ੍ਮਿਂ ਸਮਯੇ ਸਮ੍ਮਾਦਿਟ੍ਠਿ ਹੋਤਿ.
੨੧. ਕਤਮੋ ਤਸ੍ਮਿਂ ਸਮਯੇ ਸਮ੍ਮਾਸਙ੍ਕਪ੍ਪੋ ਹੋਤਿ? ਯੋ ਤਸ੍ਮਿਂ ਸਮਯੇ ਤਕ੍ਕੋ ਵਿਤਕ੍ਕੋ ਸਙ੍ਕਪ੍ਪੋ ਅਪ੍ਪਨਾ ਬ੍ਯਪ੍ਪਨਾ ਚੇਤਸੋ ਅਭਿਨਿਰੋਪਨਾ ਸਮ੍ਮਾਸਙ੍ਕਪ੍ਪੋ – ਅਯਂ ਤਸ੍ਮਿਂ ਸਮਯੇ ਸਮ੍ਮਾਸਙ੍ਕਪ੍ਪੋ ਹੋਤਿ.
੨੨. ਕਤਮੋ ਤਸ੍ਮਿਂ ਸਮਯੇ ਸਮ੍ਮਾਵਾਯਾਮੋ ਹੋਤਿ? ਯੋ ਤਸ੍ਮਿਂ ਸਮਯੇ ਚੇਤਸਿਕੋ ਵੀਰਿਯਾਰਮ੍ਭੋ ਨਿਕ੍ਕਮੋ ਪਰਕ੍ਕਮੋ ਉਯ੍ਯਾਮੋ ਵਾਯਾਮੋ ਉਸ੍ਸਾਹੋ ਉਸ੍ਸੋਲ਼੍ਹੀ ਥਾਮੋ ਧਿਤਿ ਅਸਿਥਿਲਪਰਕ੍ਕਮਤਾ ਅਨਿਕ੍ਖਿਤ੍ਤਛਨ੍ਦਤਾ ਅਨਿਕ੍ਖਿਤ੍ਤਧੁਰਤਾ ਧੁਰਸਮ੍ਪਗ੍ਗਾਹੋ ਵੀਰਿਯਂ ਵੀਰਿਯਿਨ੍ਦ੍ਰਿਯਂ ਵੀਰਿਯਬਲਂ ਸਮ੍ਮਾਵਾਯਾਮੋ – ਅਯਂ ਤਸ੍ਮਿਂ ਸਮਯੇ ਸਮ੍ਮਾਵਾਯਾਮੋ ਹੋਤਿ.
੨੩. ਕਤਮਾ ਤਸ੍ਮਿਂ ਸਮਯੇ ਸਮ੍ਮਾਸਤਿ ਹੋਤਿ? ਯਾ ਤਸ੍ਮਿਂ ਸਮਯੇ ਸਤਿ ਅਨੁਸ੍ਸਤਿ ਪਟਿਸ੍ਸਤਿ ਸਤਿ ਸਰਣਤਾ ਧਾਰਣਤਾ ਅਪਿਲਾਪਨਤਾ ਅਸਮ੍ਮੁਸ੍ਸਨਤਾ ਸਤਿ ਸਤਿਨ੍ਦ੍ਰਿਯਂ ਸਤਿਬਲਂ ਸਮ੍ਮਾਸਤਿ – ਅਯਂ ਤਸ੍ਮਿਂ ਸਮਯੇ ਸਮ੍ਮਾਸਤਿ ਹੋਤਿ.
੨੪. ਕਤਮੋ ਤਸ੍ਮਿਂ ਸਮਯੇ ਸਮ੍ਮਾਸਮਾਧਿ ਹੋਤਿ? ਯਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ ਅਵਟ੍ਠਿਤਿ ਅਵਿਸਾਹਾਰੋ ਅਵਿਕ੍ਖੇਪੋ ਅਵਿਸਾਹਟਮਾਨਸਤਾ ਸਮਥੋ ਸਮਾਧਿਨ੍ਦ੍ਰਿਯਂ ਸਮਾਧਿਬਲਂ ਸਮ੍ਮਾਸਮਾਧਿ – ਅਯਂ ਤਸ੍ਮਿਂ ਸਮਯੇ ਸਮ੍ਮਾਸਮਾਧਿ ਹੋਤਿ.
੨੫. ਕਤਮਂ ਤਸ੍ਮਿਂ ਸਮਯੇ ਸਦ੍ਧਾਬਲਂ ਹੋਤਿ? ਯਾ ਤਸ੍ਮਿਂ ਸਮਯੇ ਸਦ੍ਧਾ ਸਦ੍ਦਹਨਾ ਓਕਪ੍ਪਨਾ ਅਭਿਪ੍ਪਸਾਦੋ ਸਦ੍ਧਾ ਸਦ੍ਧਿਨ੍ਦ੍ਰਿਯਂ ਸਦ੍ਧਾਬਲਂ – ਇਦਂ ਤਸ੍ਮਿਂ ਸਮਯੇ ਸਦ੍ਧਾਬਲਂ ਹੋਤਿ.
੨੬. ਕਤਮਂ ਤਸ੍ਮਿਂ ਸਮਯੇ ਵੀਰਿਯਬਲਂ ਹੋਤਿ? ਯੋ ਤਸ੍ਮਿਂ ਸਮਯੇ ਚੇਤਸਿਕੋ ਵੀਰਿਯਾਰਮ੍ਭੋ ਨਿਕ੍ਕਮੋ ਪਰਕ੍ਕਮੋ ਉਯ੍ਯਾਮੋ ਵਾਯਾਮੋ ਉਸ੍ਸਾਹੋ ਉਸ੍ਸੋਲ਼੍ਹੀ ਥਾਮੋ ਧਿਤਿ ਅਸਿਥਿਲਪਰਕ੍ਕਮਤਾ ਅਨਿਕ੍ਖਿਤ੍ਤਛਨ੍ਦਤਾ ਅਨਿਕ੍ਖਿਤ੍ਤਧੁਰਤਾ ਧੁਰਸਮ੍ਪਗ੍ਗਾਹੋ ਵੀਰਿਯਂ ਵੀਰਿਯਿਨ੍ਦ੍ਰਿਯਂ ਵੀਰਿਯਬਲਂ ਸਮ੍ਮਾਵਾਯਾਮੋ – ਇਦਂ ਤਸ੍ਮਿਂ ਸਮਯੇ ਵੀਰਿਯਬਲਂ ਹੋਤਿ.
੨੭. ਕਤਮਂ ਤਸ੍ਮਿਂ ਸਮਯੇ ਸਤਿਬਲਂ ਹੋਤਿ? ਯਾ ਤਸ੍ਮਿਂ ਸਮਯੇ ਸਤਿ ਅਨੁਸ੍ਸਤਿ ਪਟਿਸ੍ਸਤਿ ਸਤਿ ਸਰਣਤਾ ਧਾਰਣਤਾ ਅਪਿਲਾਪਨਤਾ ਅਸਮ੍ਮੁਸ੍ਸਨਤਾ ਸਤਿ ਸਤਿਨ੍ਦ੍ਰਿਯਂ ਸਤਿਬਲਂ ਸਮ੍ਮਾਸਤਿ – ਇਦਂ ਤਸ੍ਮਿਂ ਸਮਯੇ ਸਤਿਬਲਂ ਹੋਤਿ.
੨੮. ਕਤਮਂ ਤਸ੍ਮਿਂ ਸਮਯੇ ਸਮਾਧਿਬਲਂ ਹੋਤਿ? ਯਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ ਅਵਟ੍ਠਿਤਿ ਅਵਿਸਾਹਾਰੋ ਅਵਿਕ੍ਖੇਪੋ ਅਵਿਸਾਹਟਮਾਨਸਤਾ ਸਮਥੋ ਸਮਾਧਿਨ੍ਦ੍ਰਿਯਂ ਸਮਾਧਿਬਲਂ ਸਮ੍ਮਾਸਮਾਧਿ – ਇਦਂ ਤਸ੍ਮਿਂ ਸਮਯੇ ਸਮਾਧਿਬਲਂ ਹੋਤਿ.
੨੯. ਕਤਮਂ ਤਸ੍ਮਿਂ ਸਮਯੇ ਪਞ੍ਞਾਬਲਂ ਹੋਤਿ? ਯਾ ਤਸ੍ਮਿਂ ਸਮਯੇ ਪਞ੍ਞਾ ਪਜਾਨਨਾ ਵਿਚਯੋ ਪਵਿਚਯੋ ਧਮ੍ਮਵਿਚਯੋ ਸਲ੍ਲਕ੍ਖਣਾ ਉਪਲਕ੍ਖਣਾ ਪਚ੍ਚੁਪਲਕ੍ਖਣਾ ਪਣ੍ਡਿਚ੍ਚਂ ਕੋਸਲ੍ਲਂ ਨੇਪੁਞ੍ਞਂ ਵੇਭਬ੍ਯਾ ਚਿਨ੍ਤਾ ਉਪਪਰਿਕ੍ਖਾ ਭੂਰੀ ਮੇਧਾ ਪਰਿਣਾਯਿਕਾ ਵਿਪਸ੍ਸਨਾ ਸਮ੍ਪਜਞ੍ਞਂ ਪਤੋਦੋ ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਪਞ੍ਞਾਸਤ੍ਥਂ ਪਞ੍ਞਾਪਾਸਾਦੋ ਪਞ੍ਞਾਆਲੋਕੋ ਪਞ੍ਞਾਓਭਾਸੋ ਪਞ੍ਞਾਪਜ੍ਜੋਤੋ ਪਞ੍ਞਾਰਤਨਂ ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਤਸ੍ਮਿਂ ਸਮਯੇ ਪਞ੍ਞਾਬਲਂ ਹੋਤਿ.
੩੦. ਕਤਮਂ ਤਸ੍ਮਿਂ ਸਮਯੇ ਹਿਰਿਬਲਂ ਹੋਤਿ? ਯਂ ਤਸ੍ਮਿਂ ਸਮਯੇ ਹਿਰੀਯਤਿ ਹਿਰਿਯਿਤਬ੍ਬੇਨ ਹਿਰੀਯਤਿ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਸਮਾਪਤ੍ਤਿਯਾ – ਇਦਂ ਤਸ੍ਮਿਂ ਸਮਯੇ ਹਿਰਿਬਲਂ ਹੋਤਿ.
੩੧. ਕਤਮਂ ਤਸ੍ਮਿਂ ਸਮਯੇ ਓਤ੍ਤਪ੍ਪਬਲਂ ਹੋਤਿ? ਯਂ ਤਸ੍ਮਿਂ ਸਮਯੇ ਓਤ੍ਤਪ੍ਪਤਿ ਓਤ੍ਤਪ੍ਪਿਤਬ੍ਬੇਨ ਓਤ੍ਤਪ੍ਪਤਿ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਸਮਾਪਤ੍ਤਿਯਾ – ਇਦਂ ਤਸ੍ਮਿਂ ਸਮਯੇ ਓਤ੍ਤਪ੍ਪਬਲਂ ਹੋਤਿ.
੩੨. ਕਤਮੋ ਤਸ੍ਮਿਂ ਸਮਯੇ ਅਲੋਭੋ ਹੋਤਿ? ਯੋ ਤਸ੍ਮਿਂ ਸਮਯੇ ਅਲੋਭੋ ਅਲੁਬ੍ਭਨਾ ਅਲੁਬ੍ਭਿਤਤ੍ਤਂ ਅਸਾਰਾਗੋ ਅਸਾਰਜ੍ਜਨਾ ਅਸਾਰਜ੍ਜਿਤਤ੍ਤਂ ਅਨਭਿਜ੍ਝਾ ਅਲੋਭੋ ਕੁਸਲਮੂਲਂ – ਅਯਂ ਤਸ੍ਮਿਂ ਸਮਯੇ ਅਲੋਭੋ ਹੋਤਿ.
੩੩. ਕਤਮੋ ਤਸ੍ਮਿਂ ਸਮਯੇ ਅਦੋਸੋ ਹੋਤਿ? ਯੋ ਤਸ੍ਮਿਂ ਸਮਯੇ ਅਦੋਸੋ ਅਦੁਸ੍ਸਨਾ ਅਦੁਸ੍ਸਿਤਤ੍ਤਂ [ਅਦੂਸਨਾ ਅਦੂਸਿਤਤ੍ਤਂ (ਸ੍ਯਾ.)] ਅਬ੍ਯਾਪਾਦੋ ਅਬ੍ਯਾਪਜ੍ਜੋ ਅਦੋਸੋ ਕੁਸਲਮੂਲਂ – ਅਯਂ ਤਸ੍ਮਿਂ ਸਮਯੇ ਅਦੋਸੋ ਹੋਤਿ?
੩੪. ਕਤਮੋ ਤਸ੍ਮਿਂ ਸਮਯੇ ਅਮੋਹੋ ਹੋਤਿ? ਯਾ ਤਸ੍ਮਿਂ ਸਮਯੇ ਪਞ੍ਞਾ ਪਜਾਨਨਾ ਵਿਚਯੋ ਪਵਿਚਯੋ ਧਮ੍ਮਵਿਚਯੋ ਸਲ੍ਲਕ੍ਖਣਾ ਉਪਲਕ੍ਖਣਾ ਪਚ੍ਚੁਪਲਕ੍ਖਣਾ ਪਣ੍ਡਿਚ੍ਚਂ ਕੋਸਲ੍ਲਂ ਨੇਪੁਞ੍ਞਂ ਵੇਭਬ੍ਯਾ ਚਿਨ੍ਤਾ ਉਪਪਰਿਕ੍ਖਾ ਭੂਰੀ ਮੇਧਾ ਪਰਿਣਾਯਿਕਾ ਵਿਪਸ੍ਸਨਾ ਸਮ੍ਪਜਞ੍ਞਂ ਪਤੋਦੋ ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਪਞ੍ਞਾਸਤ੍ਥਂ ਪਞ੍ਞਾਪਾਸਾਦੋ ਪਞ੍ਞਾਆਲੋਕੋ ਪਞ੍ਞਾਓਭਾਸੋ ਪਞ੍ਞਾਪਜ੍ਜੋਤੋ ਪਞ੍ਞਾਰਤਨਂ ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ ਅਮੋਹੋ ਕੁਸਲਮੂਲਂ – ਅਯਂ ਤਸ੍ਮਿਂ ਸਮਯੇ ਅਮੋਹੋ ਹੋਤਿ.
੩੫. ਕਤਮਾ ਤਸ੍ਮਿਂ ਸਮਯੇ ਅਨਭਿਜ੍ਝਾ ਹੋਤਿ? ਯੋ ਤਸ੍ਮਿਂ ਸਮਯੇ ਅਲੋਭੋ ਅਲੁਬ੍ਭਨਾ ਅਲੁਬ੍ਭਿਤਤ੍ਤਂ ਅਸਾਰਾਗੋ ਅਸਾਰਜ੍ਜਨਾ ਅਸਾਰਜ੍ਜਿਤਤ੍ਤਂ ਅਨਭਿਜ੍ਝਾ ਅਲੋਭੋ ਕੁਸਲਮੂਲਂ – ਅਯਂ ਤਸ੍ਮਿਂ ਸਮਯੇ ਅਨਭਿਜ੍ਝਾ ਹੋਤਿ.
੩੬. ਕਤਮੋ ਤਸ੍ਮਿਂ ਸਮਯੇ ਅਬ੍ਯਾਪਾਦੋ ਹੋਤਿ? ਯੋ ਤਸ੍ਮਿਂ ਸਮਯੇ ਅਦੋਸੋ ਅਦੁਸ੍ਸਨਾ ਅਦੁਸ੍ਸਿਤਤ੍ਤਂ ਅਬ੍ਯਾਪਾਦੋ ਅਬ੍ਯਾਪਜ੍ਜੋ ਅਦੋਸੋ ਕੁਸਲਮੂਲਂ – ਅਯਂ ਤਸ੍ਮਿਂ ਸਮਯੇ ਅਬ੍ਯਾਪਾਦੋ ਹੋਤਿ.
੩੭. ਕਤਮਾ ਤਸ੍ਮਿਂ ਸਮਯੇ ਸਮ੍ਮਾਦਿਟ੍ਠਿ ਹੋਤਿ? ਯਾ ਤਸ੍ਮਿਂ ਸਮਯੇ ਪਞ੍ਞਾ ਪਜਾਨਨਾ ਵਿਚਯੋ ਪਵਿਚਯੋ ਧਮ੍ਮਵਿਚਯੋ ਸਲ੍ਲਕ੍ਖਣਾ ਉਪਲਕ੍ਖਣਾ ਪਚ੍ਚੁਪਲਕ੍ਖਣਾ ਪਣ੍ਡਿਚ੍ਚਂ ਕੋਸਲ੍ਲਂ ਨੇਪੁਞ੍ਞਂ ਵੇਭਬ੍ਯਾ ਚਿਨ੍ਤਾ ਉਪਪਰਿਕ੍ਖਾ ਭੂਰੀ ਮੇਧਾ ਪਰਿਣਾਯਿਕਾ ਵਿਪਸ੍ਸਨਾ ਸਮ੍ਪਜਞ੍ਞਂ ਪਤੋਦੋ ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਪਞ੍ਞਾਸਤ੍ਥਂ ਪਞ੍ਞਾਪਾਸਾਦੋ ਪਞ੍ਞਾਆਲੋਕੋ ਪਞ੍ਞਾਓਭਾਸੋ ਪਞ੍ਞਾਪਜ੍ਜੋਤੋ ਪਞ੍ਞਾਰਤਨਂ ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਤਸ੍ਮਿਂ ਸਮਯੇ ਸਮ੍ਮਾਦਿਟ੍ਠਿ ਹੋਤਿ.
੩੮. ਕਤਮਾ ਤਸ੍ਮਿਂ ਸਮਯੇ ਹਿਰੀ ਹੋਤਿ? ਯਂ ਤਸ੍ਮਿਂ ਸਮਯੇ ਹਿਰੀਯਤਿ ਹਿਰਿਯਿਤਬ੍ਬੇਨ ਹਿਰੀਯਤਿ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਸਮਾਪਤ੍ਤਿਯਾ – ਅਯਂ ਤਸ੍ਮਿਂ ਸਮਯੇ ਹਿਰੀ ਹੋਤਿ.
੩੯. ਕਤਮਂ ਤਸ੍ਮਿਂ ਸਮਯੇ ਓਤ੍ਤਪ੍ਪਂ ਹੋਤਿ? ਯਂ ਤਸ੍ਮਿਂ ਸਮਯੇ ਓਤ੍ਤਪ੍ਪਤਿ ਓਤ੍ਤਪ੍ਪਿਤਬ੍ਬੇਨ ਓਤ੍ਤਪ੍ਪਤਿ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਸਮਾਪਤ੍ਤਿਯਾ – ਇਦਂ ਤਸ੍ਮਿਂ ਸਮਯੇ ਓਤ੍ਤਪ੍ਪਂ ਹੋਤਿ.
੪੦. ਕਤਮਾ ਤਸ੍ਮਿਂ ਸਮਯੇ ਕਾਯਪਸ੍ਸਦ੍ਧਿ ਹੋਤਿ? ਯਾ ਤਸ੍ਮਿਂ ਸਮਯੇ ਵੇਦਨਾਕ੍ਖਨ੍ਧਸ੍ਸ ਸਞ੍ਞਾਕ੍ਖਨ੍ਧਸ੍ਸ ਸਙ੍ਖਾਰਕ੍ਖਨ੍ਧਸ੍ਸ ਪਸ੍ਸਦ੍ਧਿ ਪਟਿਪਸ੍ਸਦ੍ਧਿ [ਪਟਿਪ੍ਪਸ੍ਸਦ੍ਧਿ (ਸੀ. ਸ੍ਯਾ.)] ਪਸ੍ਸਮ੍ਭਨਾ ਪਟਿਪਸ੍ਸਮ੍ਭਨਾ [ਪਟਿਪ੍ਪਸ੍ਸਮ੍ਭਨਾ (ਸੀ. ਸ੍ਯਾ.)] ਪਟਿਪਸ੍ਸਮ੍ਭਿਤਤ੍ਤਂ [ਪਟਿਪ੍ਪਸ੍ਸਮ੍ਭਿਤਤ੍ਤਂ (ਸੀ. ਸ੍ਯਾ.)] – ਅਯਂ ਤਸ੍ਮਿਂ ਸਮਯੇ ਕਾਯਪਸ੍ਸਦ੍ਧਿ ਹੋਤਿ.
੪੧. ਕਤਮਾ ਤਸ੍ਮਿਂ ਸਮਯੇ ਚਿਤ੍ਤਪਸ੍ਸਦ੍ਧਿ ਹੋਤਿ? ਯਾ ਤਸ੍ਮਿਂ ਸਮਯੇ ਵਿਞ੍ਞਾਣਕ੍ਖਨ੍ਧਸ੍ਸ ਪਸ੍ਸਦ੍ਧਿ ਪਟਿਪਸ੍ਸਦ੍ਧਿ ਪਸ੍ਸਮ੍ਭਨਾ ਪਟਿਪਸ੍ਸਮ੍ਭਨਾ ਪਟਿਪਸ੍ਸਮ੍ਭਿਤਤ੍ਤਂ – ਅਯਂ ਤਸ੍ਮਿਂ ਸਮਯੇ ਚਿਤ੍ਤਪਸ੍ਸਦ੍ਧਿ ਹੋਤਿ.
੪੨. ਕਤਮਾ ਤਸ੍ਮਿਂ ਸਮਯੇ ਕਾਯਲਹੁਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਵੇਦਨਾਕ੍ਖਨ੍ਧਸ੍ਸ ਸਞ੍ਞਾਕ੍ਖਨ੍ਧਸ੍ਸ ਸਙ੍ਖਾਰਕ੍ਖਨ੍ਧਸ੍ਸ ਲਹੁਤਾ ਲਹੁਪਰਿਣਾਮਤਾ ਅਦਨ੍ਧਨਤਾ ਅਵਿਤ੍ਥਨਤਾ – ਅਯਂ ਤਸ੍ਮਿਂ ਸਮਯੇ ਕਾਯਲਹੁਤਾ ਹੋਤਿ.
੪੩. ਕਤਮਾ ਤਸ੍ਮਿਂ ਸਮਯੇ ਚਿਤ੍ਤਲਹੁਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਵਿਞ੍ਞਾਣਕ੍ਖਨ੍ਧਸ੍ਸ ਲਹੁਤਾ ਲਹੁਪਰਿਣਾਮਤਾ ਅਦਨ੍ਧਨਤਾ ਅਵਿਤ੍ਥਨਤਾ – ਅਯਂ ਤਸ੍ਮਿਂ ਸਮਯੇ ਚਿਤ੍ਤਲਹੁਤਾ ਹੋਤਿ.
੪੪. ਕਤਮਾ ਤਸ੍ਮਿਂ ਸਮਯੇ ਕਾਯਮੁਦੁਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਵੇਦਨਾਕ੍ਖਨ੍ਧਸ੍ਸ ਸਞ੍ਞਾਕ੍ਖਨ੍ਧਸ੍ਸ ਸਙ੍ਖਾਰਕ੍ਖਨ੍ਧਸ੍ਸ ਮੁਦੁਤਾ ਮਦ੍ਦਵਤਾ ਅਕਕ੍ਖਲ਼ਤਾ ਅਕਥਿਨਤਾ – ਅਯਂ ਤਸ੍ਮਿਂ ਸਮਯੇ ਕਾਯਮੁਦੁਤਾ ਹੋਤਿ.
੪੫. ਕਤਮਾ ਤਸ੍ਮਿਂ ਸਮਯੇ ਚਿਤ੍ਤਮੁਦੁਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਵਿਞ੍ਞਾਣਕ੍ਖਨ੍ਧਸ੍ਸ ਮੁਦੁਤਾ ਮਦ੍ਦਵਤਾ ਅਕਕ੍ਖਲ਼ਤਾ ਅਕਥਿਨਤਾ – ਅਯਂ ਤਸ੍ਮਿਂ ਸਮਯੇ ਚਿਤ੍ਤਮੁਦੁਤਾ ਹੋਤਿ.
੪੬. ਕਤਮਾ ਤਸ੍ਮਿਂ ਸਮਯੇ ਕਾਯਕਮ੍ਮਞ੍ਞਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਵੇਦਨਾਕ੍ਖਨ੍ਧਸ੍ਸ ਸਞ੍ਞਾਕ੍ਖਨ੍ਧਸ੍ਸ ਸਙ੍ਖਾਰਕ੍ਖਨ੍ਧਸ੍ਸ ਕਮ੍ਮਞ੍ਞਤਾ ਕਮ੍ਮਞ੍ਞਤ੍ਤਂ ਕਮ੍ਮਞ੍ਞਭਾਵੋ – ਅਯਂ ਤਸ੍ਮਿਂ ਸਮਯੇ ਕਾਯਕਮ੍ਮਞ੍ਞਤਾ ਹੋਤਿ.
੪੭. ਕਤਮਾ ਤਸ੍ਮਿਂ ਸਮਯੇ ਚਿਤ੍ਤਕਮ੍ਮਞ੍ਞਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਵਿਞ੍ਞਾਣਕ੍ਖਨ੍ਧਸ੍ਸ ਕਮ੍ਮਞ੍ਞਤਾ ਕਮ੍ਮਞ੍ਞਤ੍ਤਂ ਕਮ੍ਮਞ੍ਞਭਾਵੋ – ਅਯਂ ਤਸ੍ਮਿਂ ਸਮਯੇ ਚਿਤ੍ਤਕਮ੍ਮਞ੍ਞਤਾ ਹੋਤਿ.
੪੮. ਕਤਮਾ ਤਸ੍ਮਿਂ ਸਮਯੇ ਕਾਯਪਾਗੁਞ੍ਞਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਵੇਦਨਾਕ੍ਖਨ੍ਧਸ੍ਸ ਸਞ੍ਞਾਕ੍ਖਨ੍ਧਸ੍ਸ ਸਙ੍ਖਾਰਕ੍ਖਨ੍ਧਸ੍ਸ ਪਗੁਣਤਾ ਪਗੁਣਤ੍ਤਂ ਪਗੁਣਭਾਵੋ – ਅਯਂ ਤਸ੍ਮਿਂ ਸਮਯੇ ਕਾਯਪਾਗੁਞ੍ਞਤਾ ਹੋਤਿ.
੪੯. ਕਤਮਾ ਤਸ੍ਮਿਂ ਸਮਯੇ ਚਿਤ੍ਤਪਾਗੁਞ੍ਞਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਵਿਞ੍ਞਾਣਕ੍ਖਨ੍ਧਸ੍ਸ ਪਗੁਣਤਾ ਪਗੁਣਤ੍ਤਂ ਪਗੁਣਭਾਵੋ – ਅਯਂ ਤਸ੍ਮਿਂ ਸਮਯੇ ਚਿਤ੍ਤਪਾਗੁਞ੍ਞਤਾ ਹੋਤਿ.
੫੦. ਕਤਮਾ ਤਸ੍ਮਿਂ ਸਮਯੇ ਕਾਯੁਜੁਕਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਵੇਦਨਾਕ੍ਖਨ੍ਧਸ੍ਸ ਸਞ੍ਞਾਕ੍ਖਨ੍ਧਸ੍ਸ ਸਙ੍ਖਾਰਕ੍ਖਨ੍ਧਸ੍ਸ ਉਜੁਤਾ ਉਜੁਕਤਾ ਅਜਿਮ੍ਹਤਾ ਅਵਙ੍ਕਤਾ ਅਕੁਟਿਲਤਾ – ਅਯਂ ਤਸ੍ਮਿਂ ਸਮਯੇ ਕਾਯੁਜੁਕਤਾ ਹੋਤਿ.
੫੧. ਕਤਮਾ ਤਸ੍ਮਿਂ ਸਮਯੇ ਚਿਤ੍ਤੁਜੁਕਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਵਿਞ੍ਞਾਣਕ੍ਖਨ੍ਧਸ੍ਸ ਉਜੁਤਾ ਉਜੁਕਤਾ ਅਜਿਮ੍ਹਤਾ ਅਵਙ੍ਕਤਾ ਅਕੁਟਿਲਤਾ – ਅਯਂ ਤਸ੍ਮਿਂ ਸਮਯੇ ਚਿਤ੍ਤੁਜੁਕਤਾ ਹੋਤਿ.
੫੨. ਕਤਮਾ ਤਸ੍ਮਿਂ ਸਮਯੇ ਸਤਿ ਹੋਤਿ? ਯਾ ਤਸ੍ਮਿਂ ਸਮਯੇ ਸਤਿ ਅਨੁਸ੍ਸਤਿ ਪਟਿਸ੍ਸਤਿ ਸਤਿ ਸਰਣਤਾ ਧਾਰਣਤਾ ਅਪਿਲਾਪਨਤਾ ਅਸਮ੍ਮੁਸ੍ਸਨਤਾ ਸਤਿ ਸਤਿਨ੍ਦ੍ਰਿਯਂ ਸਤਿਬਲਂ ਸਮ੍ਮਾਸਤਿ – ਅਯਂ ਤਸ੍ਮਿਂ ਸਮਯੇ ਸਤਿ ਹੋਤਿ.
੫੩. ਕਤਮਂ ਤਸ੍ਮਿਂ ਸਮਯੇ ਸਮ੍ਪਜਞ੍ਞਂ ਹੋਤਿ? ਯਾ ਤਸ੍ਮਿਂ ਸਮਯੇ ਪਞ੍ਞਾ ਪਜਾਨਨਾ ਵਿਚਯੋ ਪਵਿਚਯੋ ਧਮ੍ਮਵਿਚਯੋ ਸਲ੍ਲਕ੍ਖਣਾ ਉਪਲਕ੍ਖਣਾ ਪਚ੍ਚੁਪਲਕ੍ਖਣਾ ਪਣ੍ਡਿਚ੍ਚਂ ਕੋਸਲ੍ਲਂ ਨੇਪੁਞ੍ਞਂ ਵੇਭਬ੍ਯਾ ਚਿਨ੍ਤਾ ਉਪਪਰਿਕ੍ਖਾ ਭੂਰੀ ਮੇਧਾ ਪਰਿਣਾਯਿਕਾ ਵਿਪਸ੍ਸਨਾ ਸਮ੍ਪਜਞ੍ਞਂ ਪਤੋਦੋ ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਪਞ੍ਞਾਸਤ੍ਥਂ ਪਞ੍ਞਾਪਾਸਾਦੋ ਪਞ੍ਞਾਆਲੋਕੋ ਪਞ੍ਞਾਓਭਾਸੋ ਪਞ੍ਞਾਪਜ੍ਜੋਤੋ ਪਞ੍ਞਾਰਤਨਂ ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਤਸ੍ਮਿਂ ਸਮਯੇ ਸਮ੍ਪਜਞ੍ਞਂ ਹੋਤਿ.
੫੪. ਕਤਮੋ ਤਸ੍ਮਿਂ ਸਮਯੇ ਸਮਥੋ ਹੋਤਿ? ਯਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ ਅਵਟ੍ਠਿਤਿ ਅਵਿਸਾਹਾਰੋ ਅਵਿਕ੍ਖੇਪੋ ਅਵਿਸਾਹਟਮਾਨਸਤਾ ਸਮਥੋ ਸਮਾਧਿਨ੍ਦ੍ਰਿਯਂ ਸਮਾਧਿਬਲਂ ਸਮ੍ਮਾਸਮਾਧਿ – ਅਯਂ ਤਸ੍ਮਿਂ ਸਮਯੇ ਸਮਥੋ ਹੋਤਿ.
੫੫. ਕਤਮਾ ਤਸ੍ਮਿਂ ਸਮਯੇ ਵਿਪਸ੍ਸਨਾ ਹੋਤਿ? ਯਾ ਤਸ੍ਮਿਂ ਸਮਯੇ ਪਞ੍ਞਾ ਪਜਾਨਨਾ ਵਿਚਯੋ ਪਵਿਚਯੋ ਧਮ੍ਮਵਿਚਯੋ ਸਲ੍ਲਕ੍ਖਣਾ ਉਪਲਕ੍ਖਣਾ ਪਚ੍ਚੁਪਲਕ੍ਖਣਾ ਪਣ੍ਡਿਚ੍ਚਂ ਕੋਸਲ੍ਲਂ ਨੇਪੁਞ੍ਞਂ ਵੇਭਬ੍ਯਾ ਚਿਨ੍ਤਾ ਉਪਪਰਿਕ੍ਖਾ ਭੂਰੀ ਮੇਧਾ ਪਰਿਣਾਯਿਕਾ ਵਿਪਸ੍ਸਨਾ ਸਮ੍ਪਜਞ੍ਞਂ ਪਤੋਦੋ ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਪਞ੍ਞਾਸਤ੍ਥਂ ਪਞ੍ਞਾਪਾਸਾਦੋ ਪਞ੍ਞਾਆਲੋਕੋ ਪਞ੍ਞਾਓਭਾਸੋ ਪਞ੍ਞਾਪਜ੍ਜੋਤੋ ਪਞ੍ਞਾਰਤਨਂ ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਤਸ੍ਮਿਂ ਸਮਯੇ ਵਿਪਸ੍ਸਨਾ ਹੋਤਿ.
੫੬. ਕਤਮੋ ਤਸ੍ਮਿਂ ਸਮਯੇ ਪਗ੍ਗਾਹੋ ਹੋਤਿ? ਯੋ ਤਸ੍ਮਿਂ ਸਮਯੇ ਚੇਤਸਿਕੋ ਵੀਰਿਯਾਰਮ੍ਭੋ ਨਿਕ੍ਕਮੋ ਪਰਕ੍ਕਮੋ ਉਯ੍ਯਾਮੋ ਵਾਯਾਮੋ ਉਸ੍ਸਾਹੋ ਉਸ੍ਸੋਲ਼੍ਹੀ ਥਾਮੋ ਧਿਤਿ ਅਸਿਥਿਲਪਰਕ੍ਕਮਤਾ ਅਨਿਕ੍ਖਿਤ੍ਤਛਨ੍ਦਤਾ ਅਨਿਕ੍ਖਿਤ੍ਤਧੁਰਤਾ ਧੁਰਸਮ੍ਪਗ੍ਗਾਹੋ ਵੀਰਿਯਂ ਵੀਰਿਯਿਨ੍ਦ੍ਰਿਯਂ ਵੀਰਿਯਬਲਂ ਸਮ੍ਮਾਵਾਯਾਮੋ – ਅਯਂ ਤਸ੍ਮਿਂ ਸਮਯੇ ਪਗ੍ਗਾਹੋ ਹੋਤਿ.
੫੭. ਕਤਮੋ ਤਸ੍ਮਿਂ ਸਮਯੇ ਅਵਿਕ੍ਖੇਪੋ ਹੋਤਿ? ਯਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ ਅਵਟ੍ਠਿਤਿ ਅਵਿਸਾਹਾਰੋ ਅਵਿਕ੍ਖੇਪੋ ਅਵਿਸਾਹਟਮਾਨਸਤਾ ਸਮਥੋ ਸਮਾਧਿਨ੍ਦ੍ਰਿਯਂ ਸਮਾਧਿਬਲਂ ਸਮ੍ਮਾਸਮਾਧਿ – ਅਯਂ ਤਸ੍ਮਿਂ ਸਮਯੇ ਅਵਿਕ੍ਖੇਪੋ ਹੋਤਿ.
ਯੇ ਵਾ ਪਨ ਤਸ੍ਮਿਂ ਸਮਯੇ ਅਞ੍ਞੇਪਿ ਅਤ੍ਥਿ ਪਟਿਚ੍ਚਸਮੁਪ੍ਪਨ੍ਨਾ ਅਰੂਪਿਨੋ ਧਮ੍ਮਾ – ਇਮੇ ਧਮ੍ਮਾ ਕੁਸਲਾ.
ਪਦਭਾਜਨੀਯਂ.
ਪਠਮਭਾਣਵਾਰੋ.
ਕੋਟ੍ਠਾਸਵਾਰੋ
੫੮. ਤਸ੍ਮਿਂ ਖੋ ਪਨ ਸਮਯੇ ਚਤ੍ਤਾਰੋ ਖਨ੍ਧਾ ਹੋਨ੍ਤਿ, ਦ੍ਵਾਯਤਨਾਨਿ ਹੋਨ੍ਤਿ, ਦ੍ਵੇ ਧਾਤੁਯੋ ਹੋਨ੍ਤਿ, ਤਯੋ ਆਹਾਰਾ ਹੋਨ੍ਤਿ, ਅਟ੍ਠਿਨ੍ਦ੍ਰਿਯਾਨਿ ਹੋਨ੍ਤਿ, ਪਞ੍ਚਙ੍ਗਿਕਂ ਝਾਨਂ ਹੋਤਿ, ਪਞ੍ਚਙ੍ਗਿਕੋ ਮਗ੍ਗੋ ਹੋਤਿ, ਸਤ੍ਤ ਬਲਾਨਿ ਹੋਨ੍ਤਿ, ਤਯੋ ਹੇਤੂ ਹੋਨ੍ਤਿ, ਏਕੋ ਫਸ੍ਸੋ ਹੋਤਿ, ਏਕਾ ਵੇਦਨਾ ਹੋਤਿ, ਏਕਾ ਸਞ੍ਞਾ ਹੋਤਿ, ਏਕਾ ਚੇਤਨਾ ਹੋਤਿ, ਏਕਂ ਚਿਤ੍ਤਂ ਹੋਤਿ, ਏਕੋ ਵੇਦਨਾਕ੍ਖਨ੍ਧੋ ਹੋਤਿ, ਏਕੋ ਸਞ੍ਞਾਕ੍ਖਨ੍ਧੋ ਹੋਤਿ, ਏਕੋ ਸਙ੍ਖਾਰਕ੍ਖਨ੍ਧੋ ਹੋਤਿ, ਏਕੋ ਵਿਞ੍ਞਾਣਕ੍ਖਨ੍ਧੋ ਹੋਤਿ, ਏਕਂ ਮਨਾਯਤਨਂ ਹੋਤਿ, ਏਕਂ ਮਨਿਨ੍ਦ੍ਰਿਯਂ ਹੋਤਿ, ਏਕਾ ਮਨੋਵਿਞ੍ਞਾਣਧਾਤੁ ਹੋਤਿ, ਏਕਂ ਧਮ੍ਮਾਯਤਨਂ ਹੋਤਿ, ਏਕਾ ਧਮ੍ਮਧਾਤੁ ਹੋਤਿ; ਯੇ ਵਾ ਪਨ ਤਸ੍ਮਿਂ ਸਮਯੇ ਅਞ੍ਞੇਪਿ ਅਤ੍ਥਿ ਪਟਿਚ੍ਚਸਮੁਪ੍ਪਨ੍ਨਾ ਅਰੂਪਿਨੋ ਧਮ੍ਮਾ – ਇਮੇ ਧਮ੍ਮਾ ਕੁਸਲਾ.
੫੯. ਕਤਮੇ ਤਸ੍ਮਿਂ ਸਮਯੇ ਚਤ੍ਤਾਰੋ ਖਨ੍ਧਾ ਹੋਨ੍ਤਿ? ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ, ਵਿਞ੍ਞਾਣਕ੍ਖਨ੍ਧੋ.
੬੦. ਕਤਮੋ ਤਸ੍ਮਿਂ ਸਮਯੇ ਵੇਦਨਾਕ੍ਖਨ੍ਧੋ ਹੋਤਿ? ਯਂ ਤਸ੍ਮਿਂ ਸਮਯੇ ਚੇਤਸਿਕਂ ਸਾਤਂ ਚੇਤਸਿਕਂ ਸੁਖਂ ਚੇਤੋਸਮ੍ਫਸ੍ਸਜਂ ਸਾਤਂ ਸੁਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਸਾਤਾ ਸੁਖਾ ਵੇਦਨਾ – ਅਯਂ ਤਸ੍ਮਿਂ ਸਮਯੇ ਵੇਦਨਾਕ੍ਖਨ੍ਧੋ ਹੋਤਿ.
੬੧. ਕਤਮੋ ਤਸ੍ਮਿਂ ਸਮਯੇ ਸਞ੍ਞਾਕ੍ਖਨ੍ਧੋ ਹੋਤਿ? ਯਾ ਤਸ੍ਮਿਂ ਸਮਯੇ ਸਞ੍ਞਾ ਸਞ੍ਜਾਨਨਾ ਸਞ੍ਜਾਨਿਤਤ੍ਤਂ – ਅਯਂ ਤਸ੍ਮਿਂ ਸਮਯੇ ਸਞ੍ਞਾਕ੍ਖਨ੍ਧੋ ਹੋਤਿ.
੬੨. ਕਤਮੋ ਤਸ੍ਮਿਂ ਸਮਯੇ ਸਙ੍ਖਾਰਕ੍ਖਨ੍ਧੋ ਹੋਤਿ? ਫਸ੍ਸੋ ਚੇਤਨਾ ਵਿਤਕ੍ਕੋ ਵਿਚਾਰੋ ਪੀਤਿ ਚਿਤ੍ਤਸ੍ਸੇਕਗ੍ਗਤਾ ਸਦ੍ਧਿਨ੍ਦ੍ਰਿਯਂ ਵੀਰਿਯਿਨ੍ਦ੍ਰਿਯਂ ਸਤਿਨ੍ਦ੍ਰਿਯਂ ਸਮਾਧਿਨ੍ਦ੍ਰਿਯਂ ਪਞ੍ਞਿਨ੍ਦ੍ਰਿਯਂ ਜੀਵਿਤਿਨ੍ਦ੍ਰਿਯਂ ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪੋ ਸਮ੍ਮਾਵਾਯਾਮੋ ਸਮ੍ਮਾਸਤਿ ਸਮ੍ਮਾਸਮਾਧਿ ਸਦ੍ਧਾਬਲਂ ਵੀਰਿਯਬਲਂ ਸਤਿਬਲਂ ਸਮਾਧਿਬਲਂ ਪਞ੍ਞਾਬਲਂ ਹਿਰਿਬਲਂ ਓਤ੍ਤਪ੍ਪਬਲਂ ਅਲੋਭੋ ਅਦੋਸੋ ਅਮੋਹੋ ਅਨਭਿਜ੍ਝਾ ਅਬ੍ਯਾਪਾਦੋ ਸਮ੍ਮਾਦਿਟ੍ਠਿ ਹਿਰੀ ਓਤ੍ਤਪ੍ਪਂ ਕਾਯਪਸ੍ਸਦ੍ਧਿ ਚਿਤ੍ਤਪਸ੍ਸਦ੍ਧਿ ਕਾਯਲਹੁਤਾ ਚਿਤ੍ਤਲਹੁਤਾ ਕਾਯਮੁਦੁਤਾ ਚਿਤ੍ਤਮੁਦੁਤਾ ਕਾਯਕਮ੍ਮਞ੍ਞਤਾ ਚਿਤ੍ਤਕਮ੍ਮਞ੍ਞਤਾ ਕਾਯਪਾਗੁਞ੍ਞਤਾ ਚਿਤ੍ਤਪਾਗੁਞ੍ਞਤਾ ਕਾਯੁਜੁਕਤਾ ਚਿਤ੍ਤੁਜੁਕਤਾ ਸਤਿ ਸਮ੍ਪਜਞ੍ਞਂ ਸਮਥੋ ਵਿਪਸ੍ਸਨਾ ਪਗ੍ਗਾਹੋ ਅਵਿਕ੍ਖੇਪੋ; ਯੇ ਵਾ ਪਨ ਤਸ੍ਮਿਂ ਸਮਯੇ ਅਞ੍ਞੇਪਿ ਅਤ੍ਥਿ ਪਟਿਚ੍ਚਸਮੁਪ੍ਪਨ੍ਨਾ ਅਰੂਪਿਨੋ ਧਮ੍ਮਾ ਠਪੇਤ੍ਵਾ [ਥਪੇਤ੍ਵਾ (ਕ.)] ਵੇਦਨਾਕ੍ਖਨ੍ਧਂ ਠਪੇਤ੍ਵਾ ਸਞ੍ਞਾਕ੍ਖਨ੍ਧਂ ਠਪੇਤ੍ਵਾ ਵਿਞ੍ਞਾਣਕ੍ਖਨ੍ਧਂ – ਅਯਂ ਤਸ੍ਮਿਂ ਸਮਯੇ ਸਙ੍ਖਾਰਕ੍ਖਨ੍ਧੋ ਹੋਤਿ.
੬੩. ਕਤਮੋ ਤਸ੍ਮਿਂ ਸਮਯੇ ਵਿਞ੍ਞਾਣਕ੍ਖਨ੍ਧੋ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਅਯਂ ਤਸ੍ਮਿਂ ਸਮਯੇ ਵਿਞ੍ਞਾਣਕ੍ਖਨ੍ਧੋ ਹੋਤਿ.
ਇਮੇ ਤਸ੍ਮਿਂ ਸਮਯੇ ਚਤ੍ਤਾਰੋ ਖਨ੍ਧਾ ਹੋਨ੍ਤਿ.
੬੪. ਕਤਮਾਨਿ ਤਸ੍ਮਿਂ ਸਮਯੇ ਦ੍ਵਾਯਤਨਾਨਿ ਹੋਨ੍ਤਿ? ਮਨਾਯਤਨਂ ਧਮ੍ਮਾਯਤਨਂ.
੬੫. ਕਤਮਂ ਤਸ੍ਮਿਂ ਸਮਯੇ ਮਨਾਯਤਨਂ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਤਸ੍ਮਿਂ ਸਮਯੇ ਮਨਾਯਤਨਂ ਹੋਤਿ.
੬੬. ਕਤਮਂ ਤਸ੍ਮਿਂ ਸਮਯੇ ਧਮ੍ਮਾਯਤਨਂ ਹੋਤਿ? ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ – ਇਦਂ ਤਸ੍ਮਿਂ ਸਮਯੇ ਧਮ੍ਮਾਯਤਨਂ ਹੋਤਿ.
ਇਮਾਨਿ ਤਸ੍ਮਿਂ ਸਮਯੇ ਦ੍ਵਾਯਤਨਾਨਿ ਹੋਨ੍ਤਿ.
੬੭. ਕਤਮਾ ਤਸ੍ਮਿਂ ਸਮਯੇ ਦ੍ਵੇ ਧਾਤੁਯੋ ਹੋਨ੍ਤਿ? ਮਨੋਵਿਞ੍ਞਾਣਧਾਤੁ, ਧਮ੍ਮਧਾਤੁ.
੬੮. ਕਤਮਾ ਤਸ੍ਮਿਂ ਸਮਯੇ ਮਨੋਵਿਞ੍ਞਾਣਧਾਤੁ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਅਯਂ ਤਸ੍ਮਿਂ ਸਮਯੇ ਮਨੋਵਿਞ੍ਞਾਣਧਾਤੁ ਹੋਤਿ.
੬੯. ਕਤਮਾ ਤਸ੍ਮਿਂ ਸਮਯੇ ਧਮ੍ਮਧਾਤੁ ਹੋਤਿ? ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ – ਅਯਂ ਤਸ੍ਮਿਂ ਸਮਯੇ ਧਮ੍ਮਧਾਤੁ ਹੋਤਿ.
ਇਮਾ ਤਸ੍ਮਿਂ ਸਮਯੇ ਦ੍ਵੇ ਧਾਤੁਯੋ ਹੋਨ੍ਤਿ.
੭੦. ਕਤਮੇ ਤਸ੍ਮਿਂ ਸਮਯੇ ਤਯੋ ਆਹਾਰਾ ਹੋਨ੍ਤਿ? ਫਸ੍ਸਾਹਾਰੋ, ਮਨੋਸਞ੍ਚੇਤਨਾਹਾਰੋ, ਵਿਞ੍ਞਾਣਾਹਾਰੋ.
੭੧. ਕਤਮੋ ਤਸ੍ਮਿਂ ਸਮਯੇ ਫਸ੍ਸਾਹਾਰੋ ਹੋਤਿ? ਯੋ ਤਸ੍ਮਿਂ ਸਮਯੇ ਫਸ੍ਸੋ ਫੁਸਨਾ ਸਂਫੁਸਨਾ ਸਂਫੁਸਿਤਤ੍ਤਂ – ਅਯਂ ਤਸ੍ਮਿਂ ਸਮਯੇ ਫਸ੍ਸਾਹਾਰੋ ਹੋਤਿ.
੭੨. ਕਤਮੋ ਤਸ੍ਮਿਂ ਸਮਯੇ ਮਨੋਸਞ੍ਚੇਤਨਾਹਾਰੋ ਹੋਤਿ? ਯਾ ਤਸ੍ਮਿਂ ਸਮਯੇ ਚੇਤਨਾ ਸਞ੍ਚੇਤਨਾ ਚੇਤਯਿਤਤ੍ਤਂ – ਅਯਂ ਤਸ੍ਮਿਂ ਸਮਯੇ ਮਨੋਸਞ੍ਚੇਤਨਾਹਾਰੋ ਹੋਤਿ.
੭੩. ਕਤਮੋ ਤਸ੍ਮਿਂ ਸਮਯੇ ਵਿਞ੍ਞਾਣਾਹਾਰੋ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਅਯਂ ਤਸ੍ਮਿਂ ਸਮਯੇ ਵਿਞ੍ਞਾਣਾਹਾਰੋ ਹੋਤਿ.
ਇਮੇ ਤਸ੍ਮਿਂ ਸਮਯੇ ਤਯੋ ਆਹਾਰਾ ਹੋਨ੍ਤਿ.
੭੪. ਕਤਮਾਨਿ ਤਸ੍ਮਿਂ ਸਮਯੇ ਅਟ੍ਠਿਨ੍ਦ੍ਰਿਯਾਨਿ ਹੋਨ੍ਤਿ? ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ, ਪਞ੍ਞਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਸੋਮਨਸ੍ਸਿਨ੍ਦ੍ਰਿਯਂ, ਜੀਵਿਤਿਨ੍ਦ੍ਰਿਯਂ.
੭੫. ਕਤਮਂ ਤਸ੍ਮਿਂ ਸਮਯੇ ਸਦ੍ਧਿਨ੍ਦ੍ਰਿਯਂ ਹੋਤਿ? ਯਾ ਤਸ੍ਮਿਂ ਸਮਯੇ ਸਦ੍ਧਾ ਸਦ੍ਦਹਨਾ ਓਕਪ੍ਪਨਾ ਅਭਿਪ੍ਪਸਾਦੋ ਸਦ੍ਧਾ ਸਦ੍ਧਿਨ੍ਦ੍ਰਿਯਂ ਸਦ੍ਧਾਬਲਂ – ਇਦਂ ਤਸ੍ਮਿਂ ਸਮਯੇ ਸਦ੍ਧਿਨ੍ਦ੍ਰਿਯਂ ਹੋਤਿ.
੭੬. ਕਤਮਂ ਤਸ੍ਮਿਂ ਸਮਯੇ ਵੀਰਿਯਿਨ੍ਦ੍ਰਿਯਂ ਹੋਤਿ? ਯੋ ਤਸ੍ਮਿਂ ਸਮਯੇ ਚੇਤਸਿਕੋ ਵੀਰਿਯਾਰਮ੍ਭੋ ਨਿਕ੍ਕਮੋ ਪਰਕ੍ਕਮੋ ਉਯ੍ਯਾਮੋ ਵਾਯਾਮੋ ਉਸ੍ਸਾਹੋ ਉਸ੍ਸੋਲ਼੍ਹੀ ਥਾਮੋ ਧਿਤਿ ਅਸਿਥਿਲਪਰਕ੍ਕਮਤਾ ਅਨਿਕ੍ਖਿਤ੍ਤਛਨ੍ਦਤਾ ਅਨਿਕ੍ਖਿਤ੍ਤਧੁਰਤਾ ਧੁਰਸਮ੍ਪਗ੍ਗਾਹੋ ਵੀਰਿਯਂ ਵੀਰਿਯਿਨ੍ਦ੍ਰਿਯਂ ਵੀਰਿਯਬਲਂ ਸਮ੍ਮਾਵਾਯਾਮੋ – ਇਦਂ ਤਸ੍ਮਿਂ ਸਮਯੇ ਵੀਰਿਯਿਨ੍ਦ੍ਰਿਯਂ ਹੋਤਿ.
੭੭. ਕਤਮਂ ਤਸ੍ਮਿਂ ਸਮਯੇ ਸਤਿਨ੍ਦ੍ਰਿਯਂ ਹੋਤਿ? ਯਾ ਤਸ੍ਮਿਂ ਸਮਯੇ ਸਤਿ ਅਨੁਸ੍ਸਤਿ ਪਟਿਸ੍ਸਤਿ ਸਤਿ ਸਰਣਤਾ ਧਾਰਣਤਾ ਅਪਿਲਾਪਨਤਾ ਅਸਮ੍ਮੁਸ੍ਸਨਤਾ ਸਤਿ ਸਤਿਨ੍ਦ੍ਰਿਯਂ ਸਤਿਬਲਂ ਸਮ੍ਮਾਸਤਿ – ਇਦਂ ਤਸ੍ਮਿਂ ਸਮਯੇ ਸਤਿਨ੍ਦ੍ਰਿਯਂ ਹੋਤਿ.
੭੮. ਕਤਮਂ ਤਸ੍ਮਿਂ ਸਮਯੇ ਸਮਾਧਿਨ੍ਦ੍ਰਿਯਂ ਹੋਤਿ? ਯਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ ਅਵਟ੍ਠਿਤਿ ਅਵਿਸਾਹਾਰੋ ਅਵਿਕ੍ਖੇਪੋ ਅਵਿਸਾਹਟਮਾਨਸਤਾ ਸਮਥੋ ਸਮਾਧਿਨ੍ਦ੍ਰਿਯਂ ਸਮਾਧਿਬਲਂ ਸਮ੍ਮਾਸਮਾਧਿ – ਇਦਂ ਤਸ੍ਮਿਂ ਸਮਯੇ ਸਮਾਧਿਨ੍ਦ੍ਰਿਯਂ ਹੋਤਿ.
੭੯. ਕਤਮਂ ਤਸ੍ਮਿਂ ਸਮਯੇ ਪਞ੍ਞਿਨ੍ਦ੍ਰਿਯਂ ਹੋਤਿ? ਯਾ ਤਸ੍ਮਿਂ ਸਮਯੇ ਪਞ੍ਞਾ ਪਜਾਨਨਾ ਵਿਚਯੋ ਪਵਿਚਯੋ ਧਮ੍ਮਵਿਚਯੋ ਸਲ੍ਲਕ੍ਖਣਾ ਉਪਲਕ੍ਖਣਾ ਪਚ੍ਚੁਪਲਕ੍ਖਣਾ ਪਣ੍ਡਿਚ੍ਚਂ ਕੋਸਲ੍ਲਂ ਨੇਪੁਞ੍ਞਂ ਵੇਭਬ੍ਯਾ ਚਿਨ੍ਤਾ ਉਪਪਰਿਕ੍ਖਾ ਭੂਰੀ ਮੇਧਾ ਪਰਿਣਾਯਿਕਾ ਵਿਪਸ੍ਸਨਾ ਸਮ੍ਪਜਞ੍ਞਂ ਪਤੋਦੋ ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਪਞ੍ਞਾਸਤ੍ਥਂ ਪਞ੍ਞਾਪਾਸਾਦੋ ਪਞ੍ਞਾਆਲੋਕੋ ਪਞ੍ਞਾਓਭਾਸੋ ਪਞ੍ਞਾਪਜ੍ਜੋਤੋ ਪਞ੍ਞਾਰਤਨਂ ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਤਸ੍ਮਿਂ ਸਮਯੇ ਪਞ੍ਞਿਨ੍ਦ੍ਰਿਯਂ ਹੋਤਿ.
੮੦. ਕਤਮਂ ਤਸ੍ਮਿਂ ਸਮਯੇ ਮਨਿਨ੍ਦ੍ਰਿਯਂ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਤਸ੍ਮਿਂ ਸਮਯੇ ਮਨਿਨ੍ਦ੍ਰਿਯਂ ਹੋਤਿ.
੮੧. ਕਤਮਂ ਤਸ੍ਮਿਂ ਸਮਯੇ ਸੋਮਨਸ੍ਸਿਨ੍ਦ੍ਰਿਯਂ ਹੋਤਿ? ਯਂ ਤਸ੍ਮਿਂ ਸਮਯੇ ਚੇਤਸਿਕਂ ਸਾਤਂ ਚੇਤਸਿਕਂ ਸੁਖਂ ਚੇਤੋਸਮ੍ਫਸ੍ਸਜਂ ਸਾਤਂ ਸੁਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਸਾਤਾ ਸੁਖਾ ਵੇਦਨਾ – ਇਦਂ ਤਸ੍ਮਿਂ ਸਮਯੇ ਸੋਮਨਸ੍ਸਿਨ੍ਦ੍ਰਿਯਂ ਹੋਤਿ.
੮੨. ਕਤਮਂ ਤਸ੍ਮਿਂ ਸਮਯੇ ਜੀਵਿਤਿਨ੍ਦ੍ਰਿਯਂ ਹੋਤਿ? ਯੋ ਤੇਸਂ ਅਰੂਪੀਨਂ ਧਮ੍ਮਾਨਂ ਆਯੁ ਠਿਤਿ ਯਪਨਾ ਯਾਪਨਾ ਇਰਿਯਨਾ ਵਤ੍ਤਨਾ ਪਾਲਨਾ ਜੀਵਿਤਂ ਜੀਵਿਤਿਨ੍ਦ੍ਰਿਯਂ – ਇਦਂ ਤਸ੍ਮਿਂ ਸਮਯੇ ਜੀਵਿਤਿਨ੍ਦ੍ਰਿਯਂ ਹੋਤਿ.
ਇਮਾਨਿ ਤਸ੍ਮਿਂ ਸਮਯੇ ਅਟ੍ਠਿਨ੍ਦ੍ਰਿਯਾਨਿ ਹੋਨ੍ਤਿ.
੮੩. ਕਤਮਂ ਤਸ੍ਮਿਂ ਸਮਯੇ ਪਞ੍ਚਙ੍ਗਿਕਂ ਝਾਨਂ ਹੋਤਿ? ਵਿਤਕ੍ਕੋ, ਵਿਚਾਰੋ, ਪੀਤਿ, ਸੁਖਂ, ਚਿਤ੍ਤਸ੍ਸੇਕਗ੍ਗਤਾ.
੮੪. ਕਤਮੋ ਤਸ੍ਮਿਂ ਸਮਯੇ ਵਿਤਕ੍ਕੋ ਹੋਤਿ? ਯੋ ਤਸ੍ਮਿਂ ਸਮਯੇ ਤਕ੍ਕੋ ਵਿਤਕ੍ਕੋ ਸਙ੍ਕਪ੍ਪੋ ਅਪ੍ਪਨਾ ਬ੍ਯਪ੍ਪਨਾ ਚੇਤਸੋ ਅਭਿਨਿਰੋਪਨਾ ਸਮ੍ਮਾਸਙ੍ਕਪ੍ਪੋ – ਅਯਂ ਤਸ੍ਮਿਂ ਸਮਯੇ ਵਿਤਕ੍ਕੋ ਹੋਤਿ.
੮੫. ਕਤਮੋ ਤਸ੍ਮਿਂ ਸਮਯੇ ਵਿਚਾਰੋ ਹੋਤਿ? ਯੋ ਤਸ੍ਮਿਂ ਸਮਯੇ ਚਾਰੋ ਵਿਚਾਰੋ ਅਨੁਵਿਚਾਰੋ ਉਪਵਿਚਾਰੋ ਚਿਤ੍ਤਸ੍ਸ ਅਨੁਸਨ੍ਧਾਨਤਾ ਅਨੁਪੇਕ੍ਖਨਤਾ – ਅਯਂ ਤਸ੍ਮਿਂ ਸਮਯੇ ਵਿਚਾਰੋ ਹੋਤਿ.
੮੬. ਕਤਮਾ ਤਸ੍ਮਿਂ ਸਮਯੇ ਪੀਤਿ ਹੋਤਿ? ਯਾ ਤਸ੍ਮਿਂ ਸਮਯੇ ਪੀਤਿ ਪਾਮੋਜ੍ਜਂ ਆਮੋਦਨਾ ਪਮੋਦਨਾ ਹਾਸੋ ਪਹਾਸੋ ਵਿਤ੍ਤਿ ਓਦਗ੍ਯਂ ਅਤ੍ਤਮਨਤਾ ਚਿਤ੍ਤਸ੍ਸ – ਅਯਂ ਤਸ੍ਮਿਂ ਸਮਯੇ ਪੀਤਿ ਹੋਤਿ.
੮੭. ਕਤਮਂ ਤਸ੍ਮਿਂ ਸਮਯੇ ਸੁਖਂ ਹੋਤਿ? ਯਂ ਤਸ੍ਮਿਂ ਸਮਯੇ ਚੇਤਸਿਕਂ ਸਾਤਂ ਚੇਤਸਿਕਂ ਸੁਖਂ ਚੇਤੋਸਮ੍ਫਸ੍ਸਜਂ ਸਾਤਂ ਸੁਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਸਾਤਾ ਸੁਖਾ ਵੇਦਨਾ – ਇਦਂ ਤਸ੍ਮਿਂ ਸਮਯੇ ਸੁਖਂ ਹੋਤਿ.
੮੮. ਕਤਮਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸੇਕਗ੍ਗਤਾ ਹੋਤਿ? ਯਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ ਅਵਟ੍ਠਿਤਿ ਅਵਿਸਾਹਾਰੋ ਅਵਿਕ੍ਖੇਪੋ ਅਵਿਸਾਹਟਮਾਨਸਤਾ ਸਮਥੋ ਸਮਾਧਿਨ੍ਦ੍ਰਿਯਂ ਸਮਾਧਿਬਲਂ ਸਮ੍ਮਾਸਮਾਧਿ – ਅਯਂ ਤਸ੍ਮਿਂ ਸਮਯੇ ਚਿਤ੍ਤਸ੍ਸੇਕਗ੍ਗਤਾ ਹੋਤਿ.
ਇਦਂ ਤਸ੍ਮਿਂ ਸਮਯੇ ਪਞ੍ਚਙ੍ਗਿਕਂ ਝਾਨਂ ਹੋਤਿ.
੮੯. ਕਤਮੋ ਤਸ੍ਮਿਂ ਸਮਯੇ ਪਞ੍ਚਙ੍ਗਿਕੋ ਮਗ੍ਗੋ ਹੋਤਿ? ਸਮ੍ਮਾਦਿਟ੍ਠਿ, ਸਮ੍ਮਾਸਙ੍ਕਪ੍ਪੋ, ਸਮ੍ਮਾਵਾਯਾਮੋ, ਸਮ੍ਮਾਸਤਿ, ਸਮ੍ਮਾਸਮਾਧਿ.
੯੦. ਕਤਮਾ ਤਸ੍ਮਿਂ ਸਮਯੇ ਸਮ੍ਮਾਦਿਟ੍ਠਿ ਹੋਤਿ? ਯਾ ਤਸ੍ਮਿਂ ਸਮਯੇ ਪਞ੍ਞਾ ਪਜਾਨਨਾ ਵਿਚਯੋ ਪਵਿਚਯੋ ਧਮ੍ਮਵਿਚਯੋ ਸਲ੍ਲਕ੍ਖਣਾ ਉਪਲਕ੍ਖਣਾ ਪਚ੍ਚੁਪਲਕ੍ਖਣਾ ਪਣ੍ਡਿਚ੍ਚਂ ਕੋਸਲ੍ਲਂ ਨੇਪੁਞ੍ਞਂ ਵੇਭਬ੍ਯਾ ਚਿਨ੍ਤਾ ਉਪਪਰਿਕ੍ਖਾ ਭੂਰੀ ਮੇਧਾ ਪਰਿਣਾਯਿਕਾ ਵਿਪਸ੍ਸਨਾ ਸਮ੍ਪਜਞ੍ਞਂ ਪਤੋਦੋ ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਪਞ੍ਞਾਸਤ੍ਥਂ ਪਞ੍ਞਾਪਾਸਾਦੋ ਪਞ੍ਞਾਆਲੋਕੋ ਪਞ੍ਞਾਓਭਾਸੋ ਪਞ੍ਞਾਪਜ੍ਜੋਤੋ ਪਞ੍ਞਾਰਤਨਂ ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਤਸ੍ਮਿਂ ਸਮਯੇ ਸਮ੍ਮਾਦਿਟ੍ਠਿ ਹੋਤਿ.
੯੧. ਕਤਮੋ ਤਸ੍ਮਿਂ ਸਮਯੇ ਸਮ੍ਮਾਸਙ੍ਕਪ੍ਪੋ ਹੋਤਿ? ਯੋ ਤਸ੍ਮਿਂ ਸਮਯੇ ਤਕ੍ਕੋ ਵਿਤਕ੍ਕੋ ਸਙ੍ਕਪ੍ਪੋ ਅਪ੍ਪਨਾ ਬ੍ਯਪ੍ਪਨਾ ਚੇਤਸੋ ਅਭਿਨਿਰੋਪਨਾ ਸਮ੍ਮਾਸਙ੍ਕਪ੍ਪੋ – ਅਯਂ ਤਸ੍ਮਿਂ ਸਮਯੇ ਸਮ੍ਮਾਸਙ੍ਕਪ੍ਪੋ ਹੋਤਿ.
੯੨. ਕਤਮੋ ਤਸ੍ਮਿਂ ਸਮਯੇ ਸਮ੍ਮਾਵਾਯਾਮੋ ਹੋਤਿ? ਯੋ ਤਸ੍ਮਿਂ ਸਮਯੇ ਚੇਤਸਿਕੋ ਵੀਰਿਯਾਰਮ੍ਭੋ ਨਿਕ੍ਕਮੋ ਪਰਕ੍ਕਮੋ ਉਯ੍ਯਾਮੋ ਵਾਯਾਮੋ ਉਸ੍ਸਾਹੋ ਉਸ੍ਸੋਲ਼੍ਹੀ ਥਾਮੋ ਧਿਤਿ ਅਸਿਥਿਲਪਰਕ੍ਕਮਤਾ ਅਨਿਕ੍ਖਿਤ੍ਤਛਨ੍ਦਤਾ ਅਨਿਕ੍ਖਿਤ੍ਤਧੁਰਤਾ ਧੁਰਸਮ੍ਪਗ੍ਗਾਹੋ ਵੀਰਿਯਂ ਵੀਰਿਯਿਨ੍ਦ੍ਰਿਯਂ ਵੀਰਿਯਬਲਂ ਸਮ੍ਮਾਵਾਯਾਮੋ – ਅਯਂ ਤਸ੍ਮਿਂ ਸਮਯੇ ਸਮ੍ਮਾਵਾਯਾਮੋ ਹੋਤਿ.
੯੩. ਕਤਮਾ ਤਸ੍ਮਿਂ ਸਮਯੇ ਸਮ੍ਮਾਸਤਿ ਹੋਤਿ? ਯਾ ਤਸ੍ਮਿਂ ਸਮਯੇ ਸਤਿ ਅਨੁਸ੍ਸਤਿ ਪਟਿਸ੍ਸਤਿ ਸਤਿ ਸਰਣਤਾ ਧਾਰਣਤਾ ਅਪਿਲਾਪਨਤਾ ਅਸਮ੍ਮੁਸ੍ਸਨਤਾ ਸਤਿ ਸਤਿਨ੍ਦ੍ਰਿਯਂ ਸਤਿਬਲਂ ਸਮ੍ਮਾਸਤਿ – ਅਯਂ ਤਸ੍ਮਿਂ ਸਮਯੇ ਸਮ੍ਮਾਸਤਿ ਹੋਤਿ.
੯੪. ਕਤਮੋ ਤਸ੍ਮਿਂ ਸਮਯੇ ਸਮ੍ਮਾਸਮਾਧਿ ਹੋਤਿ? ਯਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ ਅਵਟ੍ਠਿਤਿ ਅਵਿਸਾਹਾਰੋ ਅਵਿਕ੍ਖੇਪੋ ਅਵਿਸਾਹਟਮਾਨਸਤਾ ਸਮਥੋ ਸਮਾਧਿਨ੍ਦ੍ਰਿਯਂ ਸਮਾਧਿਬਲਂ ਸਮ੍ਮਾਸਮਾਧਿ – ਅਯਂ ਤਸ੍ਮਿਂ ਸਮਯੇ ਸਮ੍ਮਾਸਮਾਧਿ ਹੋਤਿ.
ਅਯਂ ਤਸ੍ਮਿਂ ਸਮਯੇ ਪਞ੍ਚਙ੍ਗਿਕੋ ਮਗ੍ਗੋ ਹੋਤਿ.
੯੫. ਕਤਮਾਨਿ ਤਸ੍ਮਿਂ ਸਮਯੇ ਸਤ੍ਤ ਬਲਾਨਿ ਹੋਨ੍ਤਿ? ਸਦ੍ਧਾਬਲਂ, ਵੀਰਿਯਬਲਂ, ਸਤਿਬਲਂ, ਸਮਾਧਿਬਲਂ, ਪਞ੍ਞਾਬਲਂ, ਹਿਰਿਬਲਂ, ਓਤ੍ਤਪ੍ਪਬਲਂ.
੯੬. ਕਤਮਂ ਤਸ੍ਮਿਂ ਸਮਯੇ ਸਦ੍ਧਾਬਲਂ ਹੋਤਿ? ਯਾ ਤਸ੍ਮਿਂ ਸਮਯੇ ਸਦ੍ਧਾ ਸਦ੍ਦਹਨਾ ਓਕਪ੍ਪਨਾ ਅਭਿਪ੍ਪਸਾਦੋ ਸਦ੍ਧਾ ਸਦ੍ਧਿਨ੍ਦ੍ਰਿਯਂ ਸਦ੍ਧਾਬਲਂ – ਇਦਂ ਤਸ੍ਮਿਂ ਸਮਯੇ ਸਦ੍ਧਾਬਲਂ ਹੋਤਿ.
੯੭. ਕਤਮਂ ਤਸ੍ਮਿਂ ਸਮਯੇ ਵੀਰਿਯਬਲਂ ਹੋਤਿ? ਯੋ ਤਸ੍ਮਿਂ ਸਮਯੇ ਚੇਤਸਿਕੋ ਵੀਰਿਯਾਰਮ੍ਭੋ ਨਿਕ੍ਕਮੋ ਪਰਕ੍ਕਮੋ ਉਯ੍ਯਾਮੋ ਵਾਯਾਮੋ ਉਸ੍ਸਾਹੋ ਉਸ੍ਸੋਲ਼੍ਹੀ ਥਾਮੋ ਧਿਤਿ ਅਸਿਥਿਲਪਰਕ੍ਕਮਤਾ ਅਨਿਕ੍ਖਿਤ੍ਤਛਨ੍ਦਤਾ ਅਨਿਕ੍ਖਿਤ੍ਤਧੁਰਤਾ ਧੁਰਸਮ੍ਪਗ੍ਗਾਹੋ ਵੀਰਿਯਂ ਵੀਰਿਯਿਨ੍ਦ੍ਰਿਯਂ ਵੀਰਿਯਬਲਂ ਸਮ੍ਮਾਵਾਯਾਮੋ – ਇਦਂ ਤਸ੍ਮਿਂ ਸਮਯੇ ਵੀਰਿਯਬਲਂ ਹੋਤਿ.
੯੮. ਕਤਮਂ ਤਸ੍ਮਿਂ ਸਮਯੇ ਸਤਿਬਲਂ ਹੋਤਿ? ਯਾ ਤਸ੍ਮਿਂ ਸਮਯੇ ਸਤਿ ਅਨੁਸ੍ਸਤਿ ਪਟਿਸ੍ਸਤਿ ਸਤਿ ਸਰਣਤਾ ਧਾਰਣਤਾ ਅਪਿਲਾਪਨਤਾ ਅਸਮ੍ਮੁਸ੍ਸਨਤਾ ਸਤਿ ਸਤਿਨ੍ਦ੍ਰਿਯਂ ਸਤਿਬਲਂ ਸਮ੍ਮਾਸਤਿ – ਇਦਂ ਤਸ੍ਮਿਂ ਸਮਯੇ ਸਤਿਬਲਂ ਹੋਤਿ.
੯੯. ਕਤਮਂ ਤਸ੍ਮਿਂ ਸਮਯੇ ਸਮਾਧਿਬਲਂ ਹੋਤਿ? ਯਾ ਤਸ੍ਮਿਂ ਸਮਯੇ ਚਿਤ੍ਤਸ੍ਸ ਠਿਤਿ ਸਣ੍ਠਿਤਿ ਅਵਟ੍ਠਿਤਿ ਅਵਿਸਾਹਾਰੋ ਅਵਿਕ੍ਖੇਪੋ ਅਵਿਸਾਹਟਮਾਨਸਤਾ ਸਮਥੋ ਸਮਾਧਿਨ੍ਦ੍ਰਿਯਂ ਸਮਾਧਿਬਲਂ ਸਮ੍ਮਾਸਮਾਧਿ – ਇਦਂ ਤਸ੍ਮਿਂ ਸਮਯੇ ਸਮਾਧਿਬਲਂ ਹੋਤਿ.
੧੦੦. ਕਤਮਂ ਤਸ੍ਮਿਂ ਸਮਯੇ ਪਞ੍ਞਾਬਲਂ ਹੋਤਿ? ਯਾ ਤਸ੍ਮਿਂ ਸਮਯੇ ਪਞ੍ਞਾ ਪਜਾਨਨਾ ਵਿਚਯੋ ਪਵਿਚਯੋ ਧਮ੍ਮਵਿਚਯੋ ਸਲ੍ਲਕ੍ਖਣਾ ਉਪਲਕ੍ਖਣਾ ਪਚ੍ਚੁਪਲਕ੍ਖਣਾ ਪਣ੍ਡਿਚ੍ਚਂ ਕੋਸਲ੍ਲਂ ਨੇਪੁਞ੍ਞਂ ਵੇਭਬ੍ਯਾ ਚਿਨ੍ਤਾ ਉਪਪਰਿਕ੍ਖਾ ਭੂਰੀ ਮੇਧਾ ਪਰਿਣਾਯਿਕਾ ਵਿਪਸ੍ਸਨਾ ਸਮ੍ਪਜਞ੍ਞਂ ਪਤੋਦੋ ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਪਞ੍ਞਾਸਤ੍ਥਂ ਪਞ੍ਞਾਪਾਸਾਦੋ ਪਞ੍ਞਾਆਲੋਕੋ ਪਞ੍ਞਾਓਭਾਸੋ ਪਞ੍ਞਾਪਜ੍ਜੋਤੋ ਪਞ੍ਞਾਰਤਨਂ ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਤਸ੍ਮਿਂ ਸਮਯੇ ਪਞ੍ਞਾਬਲਂ ਹੋਤਿ.
੧੦੧. ਕਤਮਂ ਤਸ੍ਮਿਂ ਸਮਯੇ ਹਿਰਿਬਲਂ ਹੋਤਿ? ਯਂ ਤਸ੍ਮਿਂ ਸਮਯੇ ਹਿਰੀਯਤਿ ਹਿਰਿਯਿਤਬ੍ਬੇਨ ਹਿਰੀਯਤਿ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਸਮਾਪਤ੍ਤਿਯਾ – ਇਦਂ ਤਸ੍ਮਿਂ ਸਮਯੇ ਹਿਰਿਬਲਂ ਹੋਤਿ.
੧੦੨. ਕਤਮਂ ਤਸ੍ਮਿਂ ਸਮਯੇ ਓਤ੍ਤਪ੍ਪਬਲਂ ਹੋਤਿ? ਯਂ ਤਸ੍ਮਿਂ ਸਮਯੇ ਓਤ੍ਤਪ੍ਪਤਿ ਓਤ੍ਤਪ੍ਪਿਤਬ੍ਬੇਨ ਓਤ੍ਤਪ੍ਪਤਿ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਸਮਾਪਤ੍ਤਿਯਾ – ਇਦਂ ਤਸ੍ਮਿਂ ਸਮਯੇ ਓਤ੍ਤਪ੍ਪਬਲਂ ਹੋਤਿ.
ਇਮਾਨਿ ਤਸ੍ਮਿਂ ਸਮਯੇ ਸਤ੍ਤ ਬਲਾਨਿ ਹੋਨ੍ਤਿ.
੧੦੩. ਕਤਮੇ ਤਸ੍ਮਿਂ ਸਮਯੇ ਤਯੋ ਹੇਤੂ ਹੋਨ੍ਤਿ? ਅਲੋਭੋ, ਅਦੋਸੋ, ਅਮੋਹੋ.
੧੦੪. ਕਤਮੋ ਤਸ੍ਮਿਂ ਸਮਯੇ ਅਲੋਭੋ ਹੋਤਿ? ਯੋ ਤਸ੍ਮਿਂ ਸਮਯੇ ਅਲੋਭੋ ਅਲੁਬ੍ਭਨਾ ਅਲੁਬ੍ਭਿਤਤ੍ਤਂ ਅਸਾਰਾਗੋ ਅਸਾਰਜ੍ਜਨਾ ਅਸਾਰਜ੍ਜਿਤਤ੍ਤਂ ਅਨਭਿਜ੍ਝਾ ਅਲੋਭੋ ਕੁਸਲਮੂਲਂ – ਅਯਂ ਤਸ੍ਮਿਂ ਸਮਯੇ ਅਲੋਭੋ ਹੋਤਿ.
੧੦੫. ਕਤਮੋ ਤਸ੍ਮਿਂ ਸਮਯੇ ਅਦੋਸੋ ਹੋਤਿ? ਯੋ ਤਸ੍ਮਿਂ ਸਮਯੇ ਅਦੋਸੋ ਅਦੁਸ੍ਸਨਾ ਅਦੁਸ੍ਸਿਤਤ੍ਤਂ ਅਬ੍ਯਾਪਾਦੋ ਅਬ੍ਯਾਪਜ੍ਜੋ ਅਦੋਸੋ ਕੁਸਲਮੂਲਂ – ਅਯਂ ਤਸ੍ਮਿਂ ਸਮਯੇ ਅਦੋਸੋ ਹੋਤਿ.
੧੦੬. ਕਤਮੋ ਤਸ੍ਮਿਂ ਸਮਯੇ ਅਮੋਹੋ ਹੋਤਿ? ਯਾ ਤਸ੍ਮਿਂ ਸਮਯੇ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਤਸ੍ਮਿਂ ਸਮਯੇ ਅਮੋਹੋ ਹੋਤਿ.
ਇਮੇ ਤਸ੍ਮਿਂ ਸਮਯੇ ਤਯੋ ਹੇਤੂ ਹੋਨ੍ਤਿ.
੧੦੭. ਕਤਮੋ ਤਸ੍ਮਿਂ ਸਮਯੇ ਏਕੋ ਫਸ੍ਸੋ ਹੋਤਿ? ਯੋ ਤਸ੍ਮਿਂ ਸਮਯੇ ਫਸ੍ਸੋ ਫੁਸਨਾ ਸਂਫੁਸਨਾ ਸਂਫੁਸਿਤਤ੍ਤਂ – ਅਯਂ ਤਸ੍ਮਿਂ ਸਮਯੇ ਏਕੋ ਫਸ੍ਸੋ ਹੋਤਿ.
੧੦੮. ਕਤਮਾ ਤਸ੍ਮਿਂ ਸਮਯੇ ਏਕਾ ਵੇਦਨਾ ਹੋਤਿ? ਯਂ ਤਸ੍ਮਿਂ ਸਮਯੇ ਚੇਤਸਿਕਂ ਸਾਤਂ ਚੇਤਸਿਕਂ ਸੁਖਂ ਚੇਤੋਸਮ੍ਫਸ੍ਸਜਂ ਸਾਤਂ ਸੁਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਸਾਤਾ ਸੁਖਾ ਵੇਦਨਾ – ਅਯਂ ਤਸ੍ਮਿਂ ਸਮਯੇ ਏਕਾ ਵੇਦਨਾ ਹੋਤਿ.
੧੦੯. ਕਤਮਾ ਤਸ੍ਮਿਂ ਸਮਯੇ ਏਕਾ ਸਞ੍ਞਾ ਹੋਤਿ? ਯਾ ਤਸ੍ਮਿਂ ਸਮਯੇ ਸਞ੍ਞਾ ਸਞ੍ਜਾਨਨਾ ਸਞ੍ਜਾਨਿਤਤ੍ਤਂ – ਅਯਂ ਤਸ੍ਮਿਂ ਸਮਯੇ ਏਕਾ ਸਞ੍ਞਾ ਹੋਤਿ.
੧੧੦. ਕਤਮਾ ਤਸ੍ਮਿਂ ਸਮਯੇ ਏਕਾ ਚੇਤਨਾ ਹੋਤਿ? ਯਾ ਤਸ੍ਮਿਂ ਸਮਯੇ ਚੇਤਨਾ ਸਞ੍ਚੇਤਨਾ ਚੇਤਯਿਤਤ੍ਤਂ – ਅਯਂ ਤਸ੍ਮਿਂ ਸਮਯੇ ਏਕਾ ਚੇਤਨਾ ਹੋਤਿ.
੧੧੧. ਕਤਮਂ ਤਸ੍ਮਿਂ ਸਮਯੇ ਏਕਂ ਚਿਤ੍ਤਂ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਤਸ੍ਮਿਂ ਸਮਯੇ ਏਕਂ ਚਿਤ੍ਤਂ ਹੋਤਿ.
੧੧੨. ਕਤਮੋ ਤਸ੍ਮਿਂ ਸਮਯੇ ਏਕੋ ਵੇਦਨਾਕ੍ਖਨ੍ਧੋ ਹੋਤਿ? ਯਂ ਤਸ੍ਮਿਂ ਸਮਯੇ ਚੇਤਸਿਕਂ ਸਾਤਂ ਚੇਤਸਿਕਂ ਸੁਖਂ ਚੇਤੋਸਮ੍ਫਸ੍ਸਜਂ ਸਾਤਂ ਸੁਖਂ ਵੇਦਯਿਤਂ ਚੇਤੋਸਮ੍ਫਸ੍ਸਜਾ ਸਾਤਾ ਸੁਖਾ ਵੇਦਨਾ – ਅਯਂ ਤਸ੍ਮਿਂ ਸਮਯੇ ਏਕੋ ਵੇਦਨਾਕ੍ਖਨ੍ਧੋ ਹੋਤਿ.
੧੧੩. ਕਤਮੋ ਤਸ੍ਮਿਂ ਸਮਯੇ ਏਕੋ ਸਞ੍ਞਾਕ੍ਖਨ੍ਧੋ ਹੋਤਿ? ਯਾ ਤਸ੍ਮਿਂ ਸਮਯੇ ਸਞ੍ਞਾ ਸਞ੍ਜਾਨਨਾ ਸਞ੍ਜਾਨਿਤਤ੍ਤਂ – ਅਯਂ ਤਸ੍ਮਿਂ ਸਮਯੇ ਏਕੋ ਸਞ੍ਞਾਕ੍ਖਨ੍ਧੋ ਹੋਤਿ.
੧੧੪. ਕਤਮੋ ਤਸ੍ਮਿਂ ਸਮਯੇ ਏਕੋ ਸਙ੍ਖਾਰਕ੍ਖਨ੍ਧੋ ਹੋਤਿ? ਫਸ੍ਸੋ ਚੇਤਨਾ ਵਿਤਕ੍ਕੋ ਵਿਚਾਰੋ ਪੀਤਿ ਚਿਤ੍ਤਸ੍ਸੇਕਗ੍ਗਤਾ ਸਦ੍ਧਿਨ੍ਦ੍ਰਿਯਂ ਵੀਰਿਯਿਨ੍ਦ੍ਰਿਯਂ ਸਤਿਨ੍ਦ੍ਰਿਯਂ ਸਮਾਧਿਨ੍ਦ੍ਰਿਯਂ ਪਞ੍ਞਿਨ੍ਦ੍ਰਿਯਂ ਜੀਵਿਤਿਨ੍ਦ੍ਰਿਯਂ ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪੋ ਸਮ੍ਮਾਵਾਯਾਮੋ ਸਮ੍ਮਾਸਤਿ ਸਮ੍ਮਾਸਮਾਧਿ ਸਦ੍ਧਾਬਲਂ ਵੀਰਿਯਬਲਂ ਸਤਿਬਲਂ ਸਮਾਧਿਬਲਂ ਪਞ੍ਞਾਬਲਂ ਹਿਰਿਬਲਂ ਓਤ੍ਤਪ੍ਪਬਲਂ ਅਲੋਭੋ ਅਦੋਸੋ ਅਮੋਹੋ ਅਨਭਿਜ੍ਝਾ ਅਬ੍ਯਾਪਾਦੋ ਸਮ੍ਮਾਦਿਟ੍ਠਿ ਹਿਰੀ ਓਤ੍ਤਪ੍ਪਂ ਕਾਯਪਸ੍ਸਦ੍ਧਿ ਚਿਤ੍ਤਪਸ੍ਸਦ੍ਧਿ ਕਾਯਲਹੁਤਾ ਚਿਤ੍ਤਲਹੁਤਾ ਕਾਯਮੁਦੁਤਾ ਚਿਤ੍ਤਮੁਦੁਤਾ ਕਾਯਕਮ੍ਮਞ੍ਞਤਾ ਚਿਤ੍ਤਕਮ੍ਮਞ੍ਞਤਾ ਕਾਯਪਾਗੁਞ੍ਞਤਾ ਚਿਤ੍ਤਪਾਗੁਞ੍ਞਤਾ ਕਾਯੁਜੁਕਤਾ ਚਿਤ੍ਤੁਜੁਕਤਾ ਸਤਿ ਸਮ੍ਪਜਞ੍ਞਂ ਸਮਥੋ ਵਿਪਸ੍ਸਨਾ ਪਗ੍ਗਾਹੋ ਅਵਿਕ੍ਖੇਪੋ; ਯੇ ਵਾ ਪਨ ਤਸ੍ਮਿਂ ਸਮਯੇ ਅਞ੍ਞੇਪਿ ਅਤ੍ਥਿ ਪਟਿਚ੍ਚਸਮੁਪ੍ਪਨ੍ਨਾ ਅਰੂਪਿਨੋ ਧਮ੍ਮਾ ਠਪੇਤ੍ਵਾ ਵੇਦਨਾਕ੍ਖਨ੍ਧਂ ਠਪੇਤ੍ਵਾ ਸਞ੍ਞਾਕ੍ਖਨ੍ਧਂ ਠਪੇਤ੍ਵਾ ਵਿਞ੍ਞਾਣਕ੍ਖਨ੍ਧਂ – ਅਯਂ ਤਸ੍ਮਿਂ ਸਮਯੇ ਏਕੋ ਸਙ੍ਖਾਰਕ੍ਖਨ੍ਧੋ ਹੋਤਿ.
੧੧੫. ਕਤਮੋ ਤਸ੍ਮਿਂ ਸਮਯੇ ਏਕੋ ਵਿਞ੍ਞਾਣਕ੍ਖਨ੍ਧੋ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਅਯਂ ਤਸ੍ਮਿਂ ਸਮਯੇ ਏਕੋ ਵਿਞ੍ਞਾਣਕ੍ਖਨ੍ਧੋ ਹੋਤਿ.
੧੧੬. ਕਤਮਂ ਤਸ੍ਮਿਂ ਸਮਯੇ ਏਕਂ ਮਨਾਯਤਨਂ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਤਸ੍ਮਿਂ ਸਮਯੇ ਏਕਂ ਮਨਾਯਤਨਂ ਹੋਤਿ.
੧੧੭. ਕਤਮਂ ਤਸ੍ਮਿਂ ਸਮਯੇ ਏਕਂ ਮਨਿਨ੍ਦ੍ਰਿਯਂ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਤਸ੍ਮਿਂ ਸਮਯੇ ਏਕਂ ਮਨਿਨ੍ਦ੍ਰਿਯਂ ਹੋਤਿ.
੧੧੮. ਕਤਮਾ ਤਸ੍ਮਿਂ ਸਮਯੇ ਏਕਾ ਮਨੋਵਿਞ੍ਞਾਣਧਾਤੁ ਹੋਤਿ? ਯਂ ਤਸ੍ਮਿਂ ਸਮਯੇ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਅਯਂ ਤਸ੍ਮਿਂ ਸਮਯੇ ਏਕਾ ਮਨੋਵਿਞ੍ਞਾਣਧਾਤੁ ਹੋਤਿ.
੧੧੯. ਕਤਮਂ ਤਸ੍ਮਿਂ ਸਮਯੇ ਏਕਂ ਧਮ੍ਮਾਯਤਨਂ ਹੋਤਿ? ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ – ਇਦਂ ਤਸ੍ਮਿਂ ਸਮਯੇ ਏਕਂ ਧਮ੍ਮਾਯਤਨਂ ਹੋਤਿ.
੧੨੦. ਕਤਮਾ ਤਸ੍ਮਿਂ ਸਮਯੇ ਏਕਾ ਧਮ੍ਮਧਾਤੁ ਹੋਤਿ? ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ – ਅਯਂ ਤਸ੍ਮਿਂ ਸਮਯੇ ਏਕਾ ਧਮ੍ਮਧਾਤੁ ਹੋਤਿ.
ਯੇ ਵਾ ਪਨ ਤਸ੍ਮਿਂ ਸਮਯੇ ਅਞ੍ਞੇਪਿ ਅਤ੍ਥਿ ਪਟਿਚ੍ਚਸਮੁਪ੍ਪਨ੍ਨਾ ਅਰੂਪਿਨੋ ਧਮ੍ਮਾ – ਇਮੇ ਧਮ੍ਮਾ ਕੁਸਲਾ.
ਕੋਟ੍ਠਾਸਵਾਰੋ.
ਸੁਞ੍ਞਤਵਾਰੋ
੧੨੧. ਤਸ੍ਮਿਂ ਖੋ ਪਨ ਸਮਯੇ ਧਮ੍ਮਾ ਹੋਨ੍ਤਿ, ਖਨ੍ਧਾ ਹੋਨ੍ਤਿ, ਆਯਤਨਾਨਿ ਹੋਨ੍ਤਿ, ਧਾਤੁਯੋ ਹੋਨ੍ਤਿ, ਆਹਾਰਾ ਹੋਨ੍ਤਿ, ਇਨ੍ਦ੍ਰਿਯਾਨਿ ਹੋਨ੍ਤਿ, ਝਾਨਂ ਹੋਤਿ, ਮਗ੍ਗੋ ਹੋਤਿ, ਬਲਾਨਿ ਹੋਨ੍ਤਿ, ਹੇਤੂ ਹੋਨ੍ਤਿ, ਫਸ੍ਸੋ ਹੋਤਿ, ਵੇਦਨਾ ਹੋਤਿ, ਸਞ੍ਞਾ ਹੋਤਿ, ਚੇਤਨਾ ਹੋਤਿ, ਚਿਤ੍ਤਂ ਹੋਤਿ, ਵੇਦਨਾਕ੍ਖਨ੍ਧੋ ਹੋਤਿ, ਸਞ੍ਞਾਕ੍ਖਨ੍ਧੋ ਹੋਤਿ, ਸਙ੍ਖਾਰਕ੍ਖਨ੍ਧੋ ਹੋਤਿ, ਵਿਞ੍ਞਾਣਕ੍ਖਨ੍ਧੋ ਹੋਤਿ, ਮਨਾਯਤਨਂ ਹੋਤਿ, ਮਨਿਨ੍ਦ੍ਰਿਯਂ ਹੋਤਿ, ਮਨੋਵਿਞ੍ਞਾਣਧਾਤੁ ਹੋਤਿ, ਧਮ੍ਮਾਯਤਨਂ ਹੋਤਿ, ਧਮ੍ਮਧਾਤੁ ਹੋਤਿ; ਯੇ ਵਾ ਪਨ ਤਸ੍ਮਿਂ ਸਮਯੇ ਅਞ੍ਞੇਪਿ ਅਤ੍ਥਿ ਪਟਿਚ੍ਚਸਮੁਪ੍ਪਨ੍ਨਾ ਅਰੂਪਿਨੋ ਧਮ੍ਮਾ – ਇਮੇ ਧਮ੍ਮਾ ਕੁਸਲਾ.
੧੨੨. ਕਤਮੇ ਤਸ੍ਮਿਂ ਸਮਯੇ ਧਮ੍ਮਾ ਹੋਨ੍ਤਿ? ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ, ਵਿਞ੍ਞਾਣਕ੍ਖਨ੍ਧੋ – ਇਮੇ ਤਸ੍ਮਿਂ ਸਮਯੇ ਧਮ੍ਮਾ ਹੋਨ੍ਤਿ.
੧੨੩. ਕਤਮੇ ਤਸ੍ਮਿਂ ਸਮਯੇ ਖਨ੍ਧਾ ਹੋਨ੍ਤਿ? ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ, ਵਿਞ੍ਞਾਣਕ੍ਖਨ੍ਧੋ – ਇਮੇ ਤਸ੍ਮਿਂ ਸਮਯੇ ਖਨ੍ਧਾ ਹੋਨ੍ਤਿ.
੧੨੪. ਕਤਮਾਨਿ ਤਸ੍ਮਿਂ ਸਮਯੇ ਆਯਤਨਾਨਿ ਹੋਨ੍ਤਿ? ਮਨਾਯਤਨਂ, ਧਮ੍ਮਾਯਤਨਂ – ਇਮਾਨਿ ਤਸ੍ਮਿਂ ਸਮਯੇ ਆਯਤਨਾਨਿ ਹੋਨ੍ਤਿ.
੧੨੫. ਕਤਮਾ ਤਸ੍ਮਿਂ ਸਮਯੇ ਧਾਤੁਯੋ ਹੋਨ੍ਤਿ? ਮਨੋਵਿਞ੍ਞਾਣਧਾਤੁ, ਧਮ੍ਮਧਾਤੁ – ਇਮਾ ਤਸ੍ਮਿਂ ਸਮਯੇ ਧਾਤੁਯੋ ਹੋਨ੍ਤਿ.
੧੨੬. ਕਤਮੇ ਤਸ੍ਮਿਂ ਸਮਯੇ ਆਹਾਰਾ ਹੋਨ੍ਤਿ? ਫਸ੍ਸਾਹਾਰੋ, ਮਨੋਸਞ੍ਚੇਤਨਾਹਾਰੋ, ਵਿਞ੍ਞਾਣਾਹਾਰੋ – ਇਮੇ ਤਸ੍ਮਿਂ ਸਮਯੇ ਆਹਾਰਾ ਹੋਨ੍ਤਿ.
੧੨੭. ਕਤਮਾਨਿ ਤਸ੍ਮਿਂ ਸਮਯੇ ਇਨ੍ਦ੍ਰਿਯਾਨਿ ਹੋਨ੍ਤਿ? ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ, ਪਞ੍ਞਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਸੋਮਨਸ੍ਸਿਨ੍ਦ੍ਰਿਯਂ, ਜੀਵਿਤਿਨ੍ਦ੍ਰਿਯਂ – ਇਮਾਨਿ ਤਸ੍ਮਿਂ ਸਮਯੇ ਇਨ੍ਦ੍ਰਿਯਾਨਿ ਹੋਨ੍ਤਿ.
੧੨੮. ਕਤਮਂ ਤਸ੍ਮਿਂ ਸਮਯੇ ਝਾਨਂ ਹੋਤਿ? ਵਿਤਕ੍ਕੋ, ਵਿਚਾਰੋ, ਪੀਤਿ, ਸੁਖਂ, ਚਿਤ੍ਤਸ੍ਸੇਕਗ੍ਗਤਾ – ਇਦਂ ਤਸ੍ਮਿਂ ਸਮਯੇ ਝਾਨਂ ਹੋਤਿ.
੧੨੯. ਕਤਮੋ ਤਸ੍ਮਿਂ ਸਮਯੇ ਮਗ੍ਗੋ ਹੋਤਿ? ਸਮ੍ਮਾਦਿਟ੍ਠਿ, ਸਮ੍ਮਾਸਙ੍ਕਪ੍ਪੋ, ਸਮ੍ਮਾਵਾਯਾਮੋ, ਸਮ੍ਮਾਸਤਿ, ਸਮ੍ਮਾਸਮਾਧਿ – ਅਯਂ ਤਸ੍ਮਿਂ ਸਮਯੇ ਮਗ੍ਗੋ ਹੋਤਿ.
੧੩੦. ਕਤਮਾਨਿ ਤਸ੍ਮਿਂ ਸਮਯੇ ਬਲਾਨਿ ਹੋਨ੍ਤਿ? ਸਦ੍ਧਾਬਲਂ, ਵੀਰਿਯਬਲਂ, ਸਤਿਬਲਂ, ਸਮਾਧਿਬਲਂ, ਪਞ੍ਞਾਬਲਂ, ਹਿਰਿਬਲਂ, ਓਤ੍ਤਪ੍ਪਬਲਂ – ਇਮਾਨਿ ਤਸ੍ਮਿਂ ਸਮਯੇ ਬਲਾਨਿ ਹੋਨ੍ਤਿ.
੧੩੧. ਕਤਮੇ ਤਸ੍ਮਿਂ ਸਮਯੇ ਹੇਤੂ ਹੋਨ੍ਤਿ? ਅਲੋਭੋ, ਅਦੋਸੋ, ਅਮੋਹੋ – ਇਮੇ ਤਸ੍ਮਿਂ ਸਮਯੇ ਹੇਤੂ ਹੋਨ੍ਤਿ.