ਤੇਲਕਟਾਹਗਾਥਾ |ਓ੦.੦੦੦੧|

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧. ਲਂਕਿਸ੍ਸਰੋ ਜਯਤੁ ਵਾਰਣਰਾਜਗਾਮੀ

ਭੋਗਿਨ੍ਦਭੋਗ ਰੁਚਿਰਾਯਤ ਪੀਣ ਬਾਹੁ,

ਸਾਧੁਪਚਾਰਨਿਰਤੋ ਗੁਣਸਨ੍ਨਿਵਾਸੋ

ਧਮ੍ਮੇ ਠਿਤੋ ਵੀਗਤਕੋਧਮਦਾਵਲੇਪੋ;

੨. ਯੋ ਸਬ੍ਬਲੋਕਮਹਿਤੋ ਕਰੁਣਾਧਿਵਾਸੋ

ਮੋਕ੍ਖਾਕਰੋ ਰਵਿਕੁਲਮ੍ਬਰ ਪੁਣ੍ਣ ਚਨ੍ਦੋ,

ਞੇਯ੍ਯੋਦਧਿਂ ਸੁਵਿਪੁਲਂ ਸਕਲਂ ਵਿਬੁਦ੍ਧੋ

ਲੋਕੁਤ੍ਤਮਂ ਨਮਥ ਤਂ ਸਿਰਸਾ ਮੁਨਿਨ੍ਦਂ;

੩. ਸੋਪਾਨਮਾਲਮਮਲਂ ਤਿਦਸਾਲਯਸ੍ਸ

ਸਂਸਾਰ ਸਾਗਰਸਮੁਤ੍ਤਰਣਾਯ ਸੇਤੁਂ,

ਸਬ੍ਬਾਗਤੀਭਯ ਵਿਵਜ੍ਜਿਤ ਖੇਮ ਮਗ੍ਗਂ

ਧਮ੍ਮਂ ਨਮਸ੍ਸਥ ਸਦਾ ਮੁਨਿਨਾ ਪਣੀਤਂ;

੪. |ਓ੦.੦੦੦੨|

ਦੇਯ੍ਯਂ ਤਦਪ੍ਪਮਪਿ ਯਤ੍ਥ ਪਸਨ੍ਨ ਚਿਤ੍ਤਾ

ਦਤ੍ਵਾ ਨਰਾ ਫਲਮੁਲ਼ਾਰਤਰਂ ਲਭਨ੍ਤੇ,

ਤਂ ਸਬ੍ਬਦਾ ਦਸਬਲੇਨਪਿ ਸੁਪ੍ਪਸਤ੍ਥਂ

ਸਙ੍ਘਂ ਨਮਸ੍ਸਥ ਸਦਾਮਿਤਪੁਞ੍ਞਖੇਤ੍ਤਂ;

੫. ਤੇਜੋ ਬਲੇਨ ਮਹਤਾ ਰਤਨਤ੍ਤਯਸ੍ਸ

ਲੋਕਤ੍ਤਯਂ ਸਮਧਿਗਚ੍ਛਤਿ ਯੇਨ ਮੋਕ੍ਖਂ,

ਰਕ੍ਖਾ ਨ ਚਤ੍ਥਿ ਚ ਸਮਾ ਰਤਨਤ੍ਤਯਸ੍ਸ

ਤਸ੍ਮਾ ਸਦਾ ਭਜਥ ਤਂ ਰਤਨਤ੍ਤਯਂ ਭੋ;

੬. ਲਂਕਿਸ੍ਸਰੋ ਪਰਹਿਤੇਕਰਤੋ ਨਿਰਾਸੋ

ਰਤ੍ਤਿਮ੍ਪਿ ਜਾਗਰਰਤੋ ਕਰੁਣਾਧਿਵਾਸੋ,

ਲੋਕਂ ਵਿਬੋਧਯਤਿ ਲੋਕਹਿਤਾਯ ਕਾਮਂ

ਧਮ੍ਮਂ ਸਮਾਚਰਥ ਜਾਗਰਿਯਾਨੁਯੁਤ੍ਤਾ;

੭. |ਓ੦.੦੦੦੩|

ਸਤ੍ਤੋਪਕਾਰ ਨਿਰਤਾ ਕੁਸਲੇ ਸਹਾਯਾ

ਭੋ ਦੁਲ੍ਲਭਾ ਭੁਵਿ ਨਰਾ ਵਿਹਤਪ੍ਪਮਾਦਾ,

ਲਂਕਾਧਿਪਂ ਗੁਣਧਨਂ ਕੁਸਲੇ ਸਹਾਯਂ

ਆਗਮ੍ਮ ਸਂਚਰਥ ਧਮ੍ਮਮਲਂ ਪਮਾਦਂ;

੮. ਧਮ੍ਮੋ ਤਿਲੋਕ ਸਰਣੋ ਪਰਮੋ ਰਸਾਨਂ

ਧਮ੍ਮੋ ਮਹਗ੍ਘਰਤਨੋ ਰਤਨੇਸੁ ਲੋਕੇ,

ਧਮ੍ਮੋ ਭਵੇ ਤਿਭਵਦੁਕ੍ਖ ਵਿਨਾਸਹੇਤੁ

ਧਮ੍ਮਂ ਸਮਾਚਰਥ ਜਾਗਰਿਯਾਨੁਯੁਤ੍ਤਾ;

੯. ਨਿਦ੍ਦਂ ਵਿਨੋਦਯਥ ਭਾਵਯਥਪ੍ਪਮੇਯ੍ਯਂ

ਦੁਕ੍ਖਂ ਅਨਿਚ੍ਚਮ੍ਪਿ ਚੇਹ ਅਨਤ੍ਤਤਞ੍ਚ,

ਦੇਹੇ ਰਤਿਂ ਜਹਥ ਜ ਜਜ੍ਜਰਭਾਜਨਾਭੋ

ਧਮ੍ਮਂ ਸਮਾਚਰਥ ਜਾਗਰਿਯਾਨੁਯੁਤ੍ਤਾ;

੧੦. |ਓ੦.੦੦੦੪|

ਓਕਾਸ ਮਜ੍ਜ ਮਮ ਨਤ੍ਥਿ ਸੁਵੇ ਕਰਿਸ੍ਸਂ

ਧਮ੍ਮਂ ਇਤੀਹਲਸਤਾ ਕੁਸਲਪ੍ਪਯੋਗੇ,

ਨਾ’ਲਂ ਤਿਯਦ੍ਧਸੁ ਤਥਾ ਭੁਵਨਤ੍ਤਯੇ ਚ

ਕਾਮਂ ਨ ਚਤ੍ਥਿ ਮਨੁਜੋ ਮਰਣਾ ਪਮੁਤ੍ਤੋ;

੧੧. ਖਿਤ੍ਤੋ ਯਥਾ ਨਭਸਿ ਕੇਨਚਿਦੇਵ ਲੇਡ੍ਡੁ

ਭੂਮਿਂ ਸਮਾਪਤ੍ਤਿ ਭਾਰਤਯਾ ਖਣੇਨ,

ਜਾਤਤ੍ਤਮੇਵ ਖਲੁ ਕਾਰਣਮੇਕਮਤ੍ਰ

ਲੋਕਂ ਸਦਾ ਨਨੁ ਧੁਵਂ ਮਰਣਾਯ ਗਨ੍ਤੁਂ;

੧੨. ਕਾਮਂ ਨਰਸ੍ਸ ਪਤਤੋ ਗਿਰਿਮੁਦ੍ਧਨਾਤੋ

ਮਜ੍ਝੇ ਨ ਕਿਞ੍ਚਿ ਭਯਨਿਸ੍ਸਰਣਾਯ ਹੇਤੁ,

ਕਾਮਂ ਵਜਨ੍ਤਿ ਮਰਣਂ ਤਿਭਵੇਸੁ ਸਤ੍ਤਾ

ਭੋਗੇ ਰਤਿਂ ਪਜਹਥਾਪਿ ਚ ਜੀਵਿਤੇ ਚ;

੧੩. |ਓ੦.੦੦੦੫|

ਕਾਮਂ ਪਤਨ੍ਤਿ ਮਹਿਯਾ ਖਲੁ ਵਸ੍ਸਧਾਰਾ

ਵਿਜ੍ਜੁਲ੍ਲਤਾ ਵਿਤਤਮੇਘ ਮੁਖਾ ਪਮੁਤ੍ਤਾ,

ਏਵਂ ਨਰਾ ਮਰਣਭੀਮ ਪਪਾਤਮਜ੍ਝੇ

ਕਾਮਂ ਪਤਨ੍ਤਿ ਨਹਿ ਕੋਚਿ ਭਵੇਸੁ ਨਿਚ੍ਚੋ;

੧੪. ਵੇਲਾਤਟੇ ਪਟੁਤਰੋਰੁ ਤਰਂਗਮਾਲਾ

ਨਾਸਂ ਵਜਨ੍ਤਿ ਸਤਤਂ ਸਲਿਲਾਲਯਸ੍ਸ,

ਨਾਸਂ ਤਥਾ ਸਮੁਪਯਨ੍ਤਿ ਨਰਾਮਰਾਨਂ

ਪਾਣਾਨਿ ਦਾਰੁਣਤਰੇ ਮਰਣੋਦਧਿਮ੍ਹਿ;

੧੫. ਰੁਦ੍ਧੋਪਿ ਸੋ ਰਥਵਰਸ੍ਸਗਜਾਧਿਪੇਹਿ

ਯੋਧੇਹਿ ਚਾਪਿ ਸਬਲੇਹਿ ਚ ਸਾਯੁਧੇਹਿ,

ਲੋਕਂ ਵਿਵਂਚਿਯ ਸਦਾ ਮਰਣੂਸਭੋ ਸੋ

ਕਾਮਂ ਨਿਹਨ੍ਤਿ ਭੁਵਨਤ੍ਤਯ ਸਾਲਿ ਦਣ੍ਡਂ;

੧੬. |ਓ੦.੦੦੦੬|

ਭੋ ਮਾਰੁਤੇਨ ਮਹਤਾ ਵਿਹਤੋ ਪਦੀਪੋ

ਖਿਪ੍ਪਂ ਵਿਨਾਸ ਮੁਖਮੇਤਿ ਮਹਪ੍ਪਭੋਪਿ,

ਲੋਕੇ ਤਥਾ ਮਰਣਚਣ੍ਡ ਸਮੀਰਣੇਨ

ਖਿਪ੍ਪਂ ਵਿਨਸ੍ਸਤਿ ਨਰਾਯੁਮਹਾ ਪਦੀਪੋ;

੧੭. ਰਾਮਜ੍ਜੁਨਪ੍ਪਭੂਤਿ ਭੂਪਤਿ ਪੁਂਗਵਾ ਚ

ਸੂਰਾ ਪੁਰੇ ਰਣਮੁਖੇ ਵਿਜਿਤਾਰਿ ਸਙ੍ਘਾ,

ਤੇਪੀਹ ਚਣ੍ਡ ਮਰਣੋਘ ਨਿਮੁਗ੍ਗਦੇਹਾ

ਨਾਸਂ ਗਤਾ ਜਗਤਿ ਕੇ ਮਰਣਾ ਪਮੁਤ੍ਤਾ?

੧੮. ਲਕ੍ਖੀ ਚ ਸਾਗਰਪਟਾ ਸਧਰਾਧਰਾ ਚ

ਸਮ੍ਪਤ੍ਤਿਯੋ ਚ ਵਿਵਿਧਾ ਅਪਿ ਰੂਪਸੋਭਾ,

ਸਬ੍ਬਾ ਚ ਤਾ ਅਪਿ ਚ ਮਿਤ੍ਤਸੁਤਾ ਚ ਦਾਰਾ

ਕੇ ਚਾਪਿ ਕਂ ਅਨੁਗਤਾ ਮਰਣਂ ਵਜਨ੍ਤਂ?

੧੯. |ਓ੦.੦੦੦੭|

ਬ੍ਰਹ੍ਮਾਸੁਰਾਸੁਰਗਣਾ ਚ ਮਹਾਨੁਭਾਵਾ

ਗਨ੍ਧਬ੍ਬਕਿਨ੍ਨਰਮਹੋਰਗਰਕ੍ਖਸਾ ਚ,

ਤੇ ਚਾ ਪਰੇ ਚ ਮਰਣਗ੍ਗਿਸਿਖਾਯ ਸਬ੍ਬੇ

ਅਨ੍ਤੇ ਪਤਨ੍ਤਿ ਸਲਭਾ ਇਵ ਖੀਣਪੁਞ੍ਞਾ;

੨੦. ਯੇ ਸਾਰਿਪੁਤ੍ਤਪਮੁਖਾ ਮੁਨਿਸਾਵਕਾ ਚ

ਸੁਦ੍ਧਾ ਸਦਾਸਵਨੁਦਾ ਪਰਮਿਦ੍ਧਿਪਤ੍ਤਾ,

ਤੇ ਚਾਪਿ ਮਚ੍ਚੁਵਲ਼ਭਾ ਮੁਖ ਸਨ੍ਨਿਮੁਗ੍ਗਾ

ਦੀਪਾਨਿਵਾਨਲਹਤਾ ਖਯਤਂ ਉਪੇਤਾ;

੨੧. ਬੁਦ੍ਧਾਪਿ ਬੁਦ੍ਧਕਮਲਾਮਲਚਾਰੁਨੇਤ੍ਤਾ

ਬਤ੍ਤਿਂਸਲਕ੍ਖਣ ਵਿਰਾਜਿਤ ਰੂਪਸੋਭਾ,

ਸਬ੍ਬਾਸਚਕ੍ਖਯਕਰਾਪਿ ਚ ਲੋਕਨਾਥਾ

ਸਮ੍ਮਦ੍ਦਿਤਾ ਮਰਣਮਤ੍ਤਮਹਾਗਜੇਨ;

੨੨. |ਓ੦.੦੦੦੮|

ਰੋਗਾਤੁਰੇਸੁ ਕਰੁਣਾ ਨ ਜਰਾਤੁਰੇਸੁ

ਖਿਡ੍ਡਾਪਰੇਸੁ ਸੁਕੁਮਾਰਕੁਮਾਰਕੇਸੁ,

ਲੋਕਂ ਸਦਾ ਹਨਤਿ ਮਚ੍ਚੁ ਮਹਾਗਜਿਨ੍ਦੋ

ਦਵਾਨਲੋ ਵਨਮਿਵਾਵਰਤਂ ਅਸੇਸਂ;

੨੩. ਆਪੁਣ੍ਣਤਾ ਨ ਸਲਿਲੇ ਨ ਜਲਾਸਯਸ੍ਸ

ਕਟ੍ਠਸ੍ਸ ਚਾਪਿ ਬਹੁਤਾ ਨ ਹੁਤਾਸਨਸ੍ਸ,

ਭੁਤ੍ਵਾਨ ਸੋ ਤਿਭੂਵਨਮ੍ਪਿ ਤਥਾ ਅਸੇਸਂ

ਭੋ ਨਿਦ੍ਦਯੋ ਨ ਖਲੁ ਪੀਤਿਮੁਪੇਤਿ ਮਚ੍ਚੁ;

੨੪. ਭੋ ਮੋਹ ਮੋਹਿਤਤਯਾ ਵਿਵਸੋ ਅਧਞ੍ਞੋ

ਲੋਕੋ ਪਤਤ੍ਯਪਿਪਿ ਮਚ੍ਚੁਮੁਖੇ ਸੁਭੀਮੇ,

ਭੋਗੇ ਰਤਿਂ ਸਮੁਪਯਾਤਿ ਨਿਹੀਨਪਞ੍ਞੋ

ਦੋਲਾ ਤਰਙ੍ਗਚਪਲੇ ਸੁਪਿਨੋਪਮੇਯ੍ਯੇ;

੨੫. |ਓ੦.੦੦੦੯|

ਏਕੋਪਿ ਮਚ੍ਚੁਰਭਿਹਨ੍ਤੁਮਲਂ ਤਿਲੋਕਂ

ਕਿਂ ਨਿਦ੍ਦਯਾ ਅਪਿ ਜਰਾਮਰਣਾਨੁਯਾਯੀ,

ਕੋ ਵਾ ਕਰੇਯ੍ਯ ਵਿਭਸੁਵੇਸੁ ਚ ਜੀਵਿਤਾਸਂ

ਜਾਤੋ ਨਰੋ ਸੁਪਿਨ ਸਂਗਮ ਸਨ੍ਨਿਭੇਸੁ;

੨੬. ਨਿਚ੍ਚਾਤੁਰਂ ਜਗਦਿਦਂ ਸਭਯਂ ਸਸੋਕਂ

ਦਿਸ੍ਵਾ ਚ ਕੋਧਮਦਮੋਹਜਰਾਭਿਭੂਤਂ,

ਉਬ੍ਬੇਗਮਤ੍ਤਮਪਿ ਯਸ੍ਸ ਨ ਵਿਜ੍ਜਤੀ ਚੇ

ਸੋ ਦਾਰੁਣੋਨ ਮਰਣਂ ਵਤ ਤਂ ਧਿਰਤ੍ਥੁ!

ਭੋ ਭੋ ਨ ਪਸ੍ਸਥ ਜਰਾਸਿਧਰਞ੍ਹਿ ਮਚ੍ਚੁ

ਮਾਹਞ੍ਞਮਾਨਮਖਿਲਂ ਸਤਤਂ ਤਿਲੋਕਂ,

ਕਿਂ ਨਿਦ੍ਦਯਾ ਨਯਥ ਵੀਤਭਯਾ ਤਿਯਾਮਂ

ਧਮ੍ਮਂ ਸਦਾ’ਸਵਨੁਦਂ ਚਰਥ’ਪ੍ਪਮਤ੍ਤਾ;

੨੮. |ਓ੦.੦੦੧੦|

ਭਾਵੇਥ ਭੋ ਮਰਣਮਾਰਵਿਵਜ੍ਜਨਾਯ

ਲੋਕੇ ਸਦਾ ਮਰਣ ਸਞ੍ਞਮਿਮਂ ਯਤਤ੍ਤਾ,

ਏਵਞ੍ਹਿ ਭਾਵਨਰਤਸ੍ਸ ਨਰਸ੍ਸ ਤਸ੍ਸ

ਤਣ੍ਹਾ ਪਹੀਯਤਿ ਸਰੀਰਗਤਾ ਅਸੇਸਾ;

੨੯. ਰੂਪਂ ਜਰਾ ਪਿਯਤਰਂ ਮਲਿਨੀਕਰੋਤਿ

ਸਬ੍ਬਂ ਬਲਂ ਹਰਤਿ ਅਤ੍ਤਨਿ ਘੋਰਰੋਗੋ,

ਨਾਨੂਪਭੋਗ ਪਰਿਰਕ੍ਖਿਤ ਮਤ੍ਤਭਾਵਂ

ਭੋ ਮਚ੍ਚੁ ਸਂਹਰਤਿ ਕਿਂ ਫਲਮਤ੍ਤਭਾਵੇ?

੩੦. ਕਮ੍ਮਾਨਿਲਾਪਹਤਰੋਗਤਰਂਗਭਂਗੇ

ਸਂਸਾਰ ਸਾਗਰ ਮੁਖੇ ਵਿਤਤੇ ਵਿਪਨ੍ਨਾ,

ਮਾ ਮਾਪਮਾਦਮਕਰਿਤ੍ਥ ਕਰੋਥ ਮੋਕ੍ਖਂ

ਦੁਕ੍ਖੋਦਯੋ ਨਨੁ ਪਮਾਦਮਯਂ ਨਰਾਨਂ;

੩੧. |ਓ੦.੦੦੧੧|

ਭੋਗਾ ਚ ਮਿਤ੍ਤਸੁਤਪੋਰਿਸ ਬਨ੍ਧਵਾ ਚ

ਨਾਰੀ ਚ ਜੀਵਿਤਸਮਾ ਅਪਿ ਖੇਤ੍ਤਵਤ੍ਥੁ,

ਸਬ੍ਬਾਨਿ ਤਾਨਿ ਪਰਲੋਕਮਿਤੋ ਵਜਨ੍ਤਂ

ਨਾਨੁਬ੍ਬਜਨ੍ਤਿ ਕੁਸਲਾਕੁਸਲਂਵ ਲੋਕੇ;

੩੨. ਭੋ ਵਿਜ੍ਜੁਚਂਚਲਤਰੇ ਭਵਸਾਗਰਮ੍ਹਿ

ਖਿਤ੍ਤਾ ਪੁਰਾ ਕਤਮਹਾਪਵਨੇਨ ਤੇਨ,

ਕਾਮਂ ਵਿਭਿਜ੍ਜਤਿ ਖਣੇਨ ਸਰੀਰਨਾਵਾ

ਹਤ੍ਥੇ ਕਰੋਥ ਪਰਮਂ ਗੁਣਹਤ੍ਥਸਾਰਂ;

੩੩. ਨਿਚ੍ਚਂ ਵਿਭਿਜ੍ਜਤਿਹ ਆਮਕ ਭਾਜਨਂਵ

ਸਂਰਕ੍ਖਿਤੋਪਿ ਬਹੁਧਾ ਇਹ ਅਤ੍ਤਭਾਵੋ,

ਧਮ੍ਮਂ ਸਮਾਚਰਥ ਸਗ੍ਗਪਤਿਪ੍ਪਤਿਟ੍ਠਂ

ਧਮ੍ਮੋ ਸੁਚਿਣ੍ਣਮਿਹਮੇਵ ਫਲਂ ਦਦਾਤਿ;

੩੪. |ਓ੦.੦੦੧੨|

ਰਨ੍ਤ੍ਵਾ ਸਦਾ ਪਿਯਤਰੇ ਦਿਵਿ ਦੇਵਰਜ੍ਜੇ

ਨਮ੍ਹਾ ਚਵਨ੍ਤਿ ਵਿਬੁਧਾ ਅਪਿ ਖੀਣਪੁਞ੍ਞਾ,

ਸਬ੍ਬਂ ਸੁਖਂ ਦਿਵਿ ਭੁਵੀਹ ਵਿਯੋਗਨਿਟ੍ਠਂ

ਕੋ ਪਞ੍ਞਵਾ ਭਵਸੁਖੇਸੁ ਰਤਿਂ ਕਰੇਯ੍ਯ?

੩੫. ਬੁਦ੍ਧੋ ਸਸਾਵਕਗਣੋ ਜਗਦੇਕਨਾਥੋ