੯. ਮਹਾਰਟ੍ਠਸਾਸਨਵਂਸਕਥਾਮਗ੍ਗੋ

੯. ਇਤੋ ਪਰਂ ਮਹਾਰਟ੍ਠਸਾਸਨਵਂਸਕਥਾਮਗ੍ਗਂ ਕਥਯਿਸ੍ਸਾਮਿ ਯਥਾਵੁਤ੍ਤਮਾਤਿਕਾਵਸੇਨ.

ਤਤਿਯਸਙ੍ਗੀਤਾਵਸਾਨੇ ਹਿ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਮਹਾਧਮ੍ਮਰਕ੍ਖਿਤ੍ਥੇਰਂ ਮਹਾਰਟ੍ਠਂ ਪੇਸੇਸਿ,-ਤ੍ਵਂ ਏਤਂ ਰਟ੍ਠਂ ਗਨ੍ਤ੍ਵਾ ਏਤ੍ਥ ਸਾਸਨਂ ਪਤਿਟ੍ਠਾਪੇਸੀਤਿ.

ਮਹਾਧਮ੍ਮਰਕ੍ਖਿਤਤ੍ਥੇਰੋਚ ਅਤ੍ਤਪਞ੍ਚਮੋ ਹੁਤ੍ਵਾ ਮਹਾਰਟ੍ਠਂ ਗਨ੍ਤ੍ਵਾ ਮਹਾਨਾਰਦਕਸ੍ਸਪਜਾਤਕਕਥਾਯ ਮਹਾਰਟ੍ਠਕੇ ਪਸਾਦੇਤ੍ਵਾ ਚਤੁਰਾਸੀਤਿਪਾਣਸਹਸ੍ਸਾਨਿ ਮਗ੍ਗਫਲੇਸੁ ਪਤਿਟ੍ਠਾਪੇਸਿ. ਤੇਰਸਸਹਸ੍ਸਾਨਿ ਪਬ੍ਬਜਿਂਸੁ. ਏਵਂ ਸੋ ਤਤ੍ਥ ਸਾਸਨਂ ਪਤਿਟ੍ਠਾਪੇਸਿ.

ਮਹਾਰਟ੍ਠਂ ਇਸਿ ਗਨ੍ਤ੍ਵਾ, ਸੋ ਮਹਾ ਧਮ੍ਮਰਕ੍ਖਿਤੋ;

ਜਾਤਕਂ ਕਥਯਿਤ੍ਵਾਨ, ਪਸਾਦੇਸਿ ਮਹਾਜਨਨ੍ਤਿ.

ਤਤ੍ਥ ਕਿਰ ਮਨੁਸ੍ਸਾ ਪੁਬ੍ਬੇ ਅਗ੍ਗਿਹੁਤਾਦਿਮਿਚ੍ਛਾਕਮ੍ਮਂ ਯੇਭੁਯ੍ਯੇਨ ਅਕਂਸੁ. ਤੇਨੇਵ ਥੇਰੋ ਮਹਾਨਾਰਦਕਸ੍ਸਪਜਾਤਕਕਥਂ ਦੇਸੇਸਿ. ਤਤੋ ਪਟ੍ਠਾਯ ਤਤ੍ਥ ਮਨੁਸ੍ਸਾ ਜਾਤਕ ਕਥਂ ਯੇਭੁਯ੍ਯੇਨ ਸੋਤੁਂ ਅਤਿਵਿਯ ਇਚ੍ਛਨ੍ਤਿ. ਭਿਕ੍ਖੂਚ ਯੇਭੁਯ੍ਯੇਨ ਗਹਟ੍ਠਾਨਂ ਜਾਤਕਕਥਂਯੇਵ ਦੇਸੇਨ੍ਤਿ. ਵਿਸੇਸਤੋ ਪਨ ਵਸ੍ਸਨ੍ਤਰਜਾਤਕਕਥਂ ਤੇ ਮਨੁਸ੍ਸਾ ਬਹੂਹਿ ਦਾਤਬ੍ਬਵਤ੍ਥੂਹਿ ਪੂਜੇਤ੍ਵਾ ਸੁਣਨ੍ਤਿ.

ਤਞ੍ਚ ਮਹਾਰਟ੍ਠਂ ਨਾਮ ਸ੍ਯਾਮਰਟ੍ਠਸਮੀਪੇ ਠਿਤਂ, ਤੇਨੇਵ ਸ੍ਯਾਮਰਟ੍ਠਵਾਸਿਨੋਪਿ ਭਿਕ੍ਖੂ ਗਹਟ੍ਠਾਚ ਯੇਭੁਯ੍ਯੇਨ ਸੋਤੁਂ ਇਚ੍ਛਨ੍ਤੀਤਿ. ਮਹਾਧਮ੍ਮਰਕ੍ਖਿਤਤ੍ਥੇਰੋਪਿ ਮਹਾਰਟ੍ਠਵਾਸੀਹਿ ਸਦ੍ਧਿਂ ਸਕਲਸ੍ਯਾਮਰਟ੍ਠਵਾਸੀਨਂ ਧਮ੍ਮਂ ਦੇਸੇਸਿ, ਅਮਤਰਸਂ ਪਾਯੇਸਿ, ਯਥਾ ਯੋਨਕਧਮ੍ਮਰਕ੍ਖਿਤਤ੍ਥੇਰੋ ਅਪਰਨ੍ਤਰਟ੍ਠਂ ਗਨ੍ਤ੍ਵਾ ਸਕਲਮਰਮ੍ਮਰਟ੍ਠਵਾਸੀਨਨ੍ਤਿ.

ਯਂ ਪਨ ਯੋਨਕਰਟ੍ਠਸਾਸਨਵਂਸਕਥਾਯਂ ਵੁਤ੍ਤਂ, ਤਮ੍ਪਿ ਸਬ੍ਬਂ ਏਤ੍ਥਾਪਿ ਦਟ੍ਠਬ੍ਬਂਯੇਵ, ਤੇਹਿ ਤਸ੍ਸ ਏਕਸਦਿਸਤ੍ਤੇਨ ਠਿਤਤ੍ਤਾਤਿ. ਤਥਾ ਹਿ ਨਾਗਸੇਨਤ੍ਥੇਰੋਪਿ ਯੋਨਕਰਟ੍ਠੇ ਵਸਿਤ੍ਵਾ ਸ੍ਯਾਮਰਟ੍ਠਾਦੀਸੁਪਿ ਸਾਸਨਂ ਪਤਿਟ੍ਠਾਪੇਸਿ. ਯੋਨਕਰਟ੍ਠਵਾਸਿਨੋ ਮਹਾਧਮ੍ਮਗਮ੍ਭੀਰਤ੍ਥੇਰਮਹਾਮੇਧਙ੍ਕਰਤ੍ਥੇਰਾਚ ਸਦ੍ਧਿਂ ਬਹੂਹਿ ਭਿਕ੍ਖੂਹਿ ਸੀਹਲ਼ਦੀਪਂ ਗਨ੍ਤ੍ਵਾ ਤਤੋ ਪੁਨਾਗਨ੍ਤ੍ਵਾ ਸ੍ਯਾਮਰਟ੍ਠੇ ਸੋਕ੍ਕਤਯਨਗਰਂ ਪਤ੍ਵਾ ਤਤ੍ਥ ਨਿਸੀਦਿਤ੍ਵਾ ਸਾਸਨਂ ਪਗ੍ਗਣ੍ਹਿਤ੍ਵਾ ਪਚ੍ਛਾ ਲਕੁਨ੍ਨਨਗਰੇ ਨਿਸੀਦਿਤ੍ਵਾ ਸਾਸਨਂ ਪਗ੍ਗਣ੍ਹਿ. ਏਵਂ ਯੋਨਕਰਟ੍ਠੇ ਸਾਸਨਂ ਠਿਤਂ ਸ੍ਯਾਮਾਦੀਸੁਪਿ ਠਿਤਂਯੇਵਾਤਿ ਦਟ੍ਠਬ੍ਬਂ.

ਬੁਦ੍ਧਸ੍ਸ ਭਗਵਤੋ ਪਰਿਨਿਬ੍ਬਾਨਤੋ ਦ੍ਵਿਸਤਾਧਿਕਾਨਂ ਦ੍ਵਿਨ੍ਨਂ ਵਸ੍ਸਸਹਸ੍ਸਾਨਂ ਉਪਰਿ ਨਵੁਤਿਮੇ ਵਸ੍ਸ ਸੀਹਲ਼ਦੀਪੇ ਰਜ੍ਜਂ ਪਤ੍ਤਸ੍ਸ ਕਿਤ੍ਤਿਸ੍ਸਿਰਿਰਾਜਸੀਹਮਹਾਰਾਜਸ੍ਸ ਅਭਿਸੇਕਤੋ ਤਤਿਯੇ ਵਸ੍ਸੇ ਤੇਨੇਵ ਕਿਤ੍ਤਿਸ੍ਸਿਰਿਰਾਜਸੀਹਮਹਾਰਞ੍ਞਾ ਪਹਿਤਪਣ੍ਣਾਕਾਰਸਾਸਨਂ ਆਗਮ੍ਮ ਸਰਾਮਾਧਿਪਤਿਧਮ੍ਮਿਕਮਹਾਰਾਜਾਧਿਰਾਜੇਨਾਣਤ੍ਤੇਹਿ ਲਙ੍ਕਾਦੀਪਂ ਆਗਤੇਹਿ ਉਪਾਲਿਤ੍ਥੇ ਰਾਦੀਹਿ ਪਤਿਟ੍ਠਾਪਿਤੋ ਵਂਸੋ ਉਪਾਲਿਵਂਸੋਤਿ ਪਾਕਟੋ. ਸੋਚ ਦੁਵਿਧੋ ਪੁਬ੍ਬਾਰਾਮਵਿਹਾਰਵਾਸੀਅਭਯਗਿਰਿਵਿਹਾਰਵਾਸੀਵਸੇਨਾਤਿ. ਏਵਂ ਮਹਾਨਗਰਯੋਨਕਲ੍ਯਾਮਰਟ੍ਠੇਸੁ ਸਾਸਨਂ ਥਿਰਂ ਹੁਤ੍ਵਾ ਤਿਟ੍ਠਤੀਤਿ ਵੇਦਿਤਬ੍ਬਨ੍ਤਿ.

ਇਤਿ ਸਾਸਨਵਂਸੇ ਮਹਾਰਟ੍ਠਸਾਸਨਵਂਸਕਥਾਮਗ੍ਗੋ ਨਾਮ

ਨਵਮੋ ਪਰਿਚ੍ਛੇਦੋ.