੩. ਸੁਵਣ੍ਣਭੂਮਿਸਾਸਨਵਂਸਕਥਾਮਗ੍ਗੋ

੩. ਇਦਾਨਿ ਯਥਾਠਪਿਤਮਾਤਿਕਾਵਸੇਨ ਸੁਵਣ੍ਣਭੂਮਿ ਰਟ੍ਠੇ ਸਾਸਨਵਂਸਕਥਾਮਗ੍ਗਸ੍ਸ ਵਤ੍ਥੁਂ ਓਕਾਸੋ ਅਨੁਪ੍ਪਤ੍ਥੋ, ਤਸ੍ਮਾ ਸੁਵਣ੍ਣਭੂਮਿਰਟ੍ਠਸਾਸਨਵਂਸਕਥਾਮਗ੍ਗਂ ਆਰਭਿਸ੍ਸਾਮਿ.

ਤਤ੍ਥ ਸੁਵਣ੍ਣਭੂਮੀਤਿ ਤੀਸੁ ਰਾਮਞ੍ਞਰਟ੍ਠੇਸੁ ਏਕਸ੍ਸ ਨਾਮਂ. ਤੀਣਿਹਿ ਰਾਮਞ੍ਞਰਟ੍ਠਾਨਿ ਹੋਨ੍ਤਿ ਹਂਸਾਵਤੀਮੁਤ੍ਤਿਮਸੁਵਣ੍ਣਭੂਮਿਵਸੇਨ ਏਕਦੇਸੇਨ ਸਬ੍ਬਮ੍ਪਿ ਰਾਮਞ੍ਞਰਟ੍ਠਂ ਗਹੇਤਬ੍ਬਂ. ਤਤ੍ਥ ਪਨ ਉਕ੍ਕਲਾਪਜਨਪਦੇ ਤਪੁਸ੍ਸਭਲ੍ਲਿਕੇ ਆਦਿਂ ਕਤ੍ਵਾ ਭਗਵਤੋ ਅਭਿਸਮ੍ਬੁਜ੍ਝਿਤ੍ਵਾ ਸਤ੍ਤਸਤ੍ਤਾਹੇਸੁ ਅਤਿਕ੍ਕਨ੍ਤੇਸੁਯੇਵ ਆਸਾਲ਼੍ਹਿਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਦਿਵਸਤੋ ਪਟ੍ਠਾਯ ਰਾਮਞ੍ਞਰਟ੍ਠੇ ਸਾਸਨਂ ਪਤਿਟ੍ਠਤਿ.

ਇਦਂ ਰਾਮਞ੍ਞਰਟ੍ਠੇ ਪਠਮਂ ਸਾਸਨਸ੍ਸ ਪਤਿਟ੍ਠਾਨਂ.

ਭਗਵਤੋ ਅਭਿਸਮ੍ਬੁਦ੍ਧਕਾਲਤੋ ਪੁਬ੍ਬੇਯੇਵ ਅਪਰਣ੍ਣਕਰਟ੍ਠੇ ਸੁਭਿਨ੍ਨਨਗਰੇ ਤਿਸ੍ਸਰਞ੍ਞੋ ਕਾਲੇ ਏਕਸ੍ਸ ਅਮਚ੍ਚਸ੍ਸ ਤਿਸ੍ਸੋ ਜਯੋ ਚਾਤਿ ਦ੍ਵੇਪੁਤ੍ਤਾ ਅਹੇਸੁਂ. ਤੇ ਗਿਹਿਭਾਵੇ ਸਂਵੇਗਂ ਲਭਿਤ੍ਵਾ ਮਹਾਸਮੁਦ੍ਦਸ੍ਸ ਸਮੀਪੇ ਗਜ੍ਜਗਿਰਿਮ੍ਹਿ ਨਾਮ ਪਬ੍ਬਤੇ ਇਤ੍ਥੁਸਿਪਬ੍ਬਂ ਪਬ੍ਬਜਿਤ੍ਵਾ ਨਿਸੀਦਿਸੁਂ. ਤਦਾ ਨਾਗਿਯਾ ਵਿਜ੍ਜਾਧਰੋ ਸਨ੍ਤਵਂ ਕਤ੍ਵਾ ਦ੍ਵੇ ਅਣ੍ਡਾਨਿ ਵਿਜਾਯਿਤ੍ਵਾ ਸਾ ਨਾਗੀ ਲਜ੍ਜਾਯ ਤਾਨਿ ਵਿਜਹਿਤ੍ਵਾ ਗਚ੍ਛਿ.

ਤਦਾ ਜੇਟ੍ਠੋ ਤਿਸ੍ਸਕੁਮਾਰੋ ਤਾਨਿ ਲਭਿਤ੍ਵਾ ਕਨਿਟ੍ਠੇਨ ਸਦ੍ਧਿਂ ਵਿਭਜਿਤ੍ਵਾ ਏਕਂ ਏਕਸ੍ਸ ਸਨ੍ਤਿਕੇ ਠਪੇਸਿ. ਕਾਲੇ ਅਤਿਕ੍ਕਨ੍ਤੇ ਤੇਹਿ ਅਣ੍ਡੇਹਿ ਦ੍ਵੇ ਮਨੁਸ੍ਸਾ ਵਿਜਾਯਿਂਸੁ. ਤੇ ਦਸ ਵਸ੍ਸਵਯੇ ਸਮ੍ਪਤ੍ਤੇ ਕਨਿਟ੍ਠਸ੍ਸ ਅਣ੍ਡਤੋ ਵਿਜਾਯਨਦਹਰੋ ਕਾਲਂ ਕਤ੍ਵਾ ਮਜ੍ਝਿਮਦੇਸੇ ਮਿਥਿਲਨਗਰੇ ਗਵਂਪਤਿ ਨਾਮ ਕੁਮਾਰੋ ਉਪਜ੍ਜਿ. ਸੋ ਸਤ੍ਤਵਸ੍ਸਿਕਕਾਲੇ ਬੁਦ੍ਧਸ੍ਸ ਭਗਵਤੋ ਸਨ੍ਤਿਕੇ ਨਿਯ੍ਯਾਦੇਤ੍ਵਾ ਪਬ੍ਬਾਜੇਤ੍ਵਾ ਅਚਿਰੇਨੇਵ ਅਰਹਾ ਅਹੋਸਿ.

ਜੇਟ੍ਠਸ੍ਸ ਪਨ ਅਣ੍ਡਤੋ ਵਿਜਾਯਨਦਹਰੋ ਦ੍ਵਾਦਸਵਸ੍ਸਿਕਕਾਲੇ ਸਕ੍ਕੋ ਦੇਵਾਨਮਿਨ੍ਦੋ ਆਗਨ੍ਤ੍ਵਾ ਰਾਮਞ੍ਞਰਟ੍ਠੇ ਸੁਧਮ੍ਮਪੁਰਂ ਨਾਮ ਨਗਰਂ ਮਾਪੇਤ੍ਵਾ ਸੀਹਰਾਜਾਤਿ ਨਾਮੇਨ ਤਤ੍ਥ ਰਜ੍ਜਂ ਕਾਰਾਪੇਸਿ. ਸਿਲਾਲੋਨੇ ਪਨ ਸਿਰਿਮਾਸੋਕੋਤਿ ਨਾਮੇਨਾਤਿ ਵੁਤ੍ਤਂ. ਗਵਂਪਤਿਤ੍ਥੇਰੋ ਚ ਅਤ੍ਤਨਾ ਮਾਤਰਂ ਦਟ੍ਠੁਕਾਮੋ ਮਿਥਿਲਨਗਰਤੋ ਆਗਨ੍ਤੁਂ ਆਰਭਿ. ਤਦਾ ਦਿਬ੍ਬਚਕ੍ਖੁਨਾ ਮਾਤੁਯਾ ਕਾਲਙ੍ਕਤਭਾਵਂ ਞਤ੍ਵਾ ਇਦਾਨਿ ਮੇ ਮਾਤਾ ਕੁਹਿਂ ਉਪ੍ਪਜ੍ਜਤੀਤਿ ਆਵਜ੍ਜਨ੍ਤੋ ਬਾਹੁਲ੍ਲੇਨ ਨੇਸਾਦਕੇਵਟ੍ਟਾਨਂ ਨਿਵਾਸਨਟ੍ਠਾਨਭੂਤੇ ਦੇਸੇ ਉਪ੍ਪਜ੍ਜਤੀਤਿ ਞਤ੍ਵਾ ਸਚਾਹਂ ਗਨ੍ਤ੍ਵਾ ਨ ਓਵਾਦੇਯ੍ਯਂ, ਮਾਤਾ ਮੇ ਅਪਾਯਗਮਨਿਯਂ ਅਪੁਞ੍ਞਂ ਵਿਚਿਨਿਤ੍ਵਾ ਚਤੂਸੁ ਅਪਾਯੇਸੁ ਉਪ੍ਪਜ੍ਜੇਯ੍ਯਾਤਿ ਚਿਨ੍ਤੇਤ੍ਵਾ ਭਗਵਨ੍ਤਂ ਯਾਚਿਤ੍ਵਾ ਰਾਮਞ੍ਞਰਟ੍ਠਂ ਵੇਹਾਸਮਗ੍ਗੇਨ ਆਗਚ੍ਛਿ. ਰਾਮਞ੍ਞਰਟ੍ਠੇ ਸੁਧਮ੍ਮਪਰਂ ਪਤ੍ਵਾ ਅਤ੍ਤਨੋ ਭਾਤੁਨਾ ਸੀਹਰਾਜੇਨ ਸਦ੍ਧਿਂ ਰਟ੍ਠਵਾਸੀਨਂ ਧਮ੍ਮਂ ਦੇਸੇਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਸਿ.

ਅਥ ਸੀਹਰਾਜਾ ਆਹ, ਲੋਕੇਸੁ ਭਨ੍ਤੇ ਤ੍ਵਮਸਿ ਅਗ੍ਗਤਰੋ ਪੁਗ੍ਗਲੋਤਿ. ਨ ਮਹਾਰਾਜ ਅਹਂ ਅਗ੍ਗਤਰੋ, ਤੀਸੁ ਪਨ ਭਵੇਸੁ ਸਬ੍ਬੇਸਂ ਸਤ੍ਤਾਨਂ ਮਕੁਟਸਙ੍ਕਾਸੋ ਗੋਤਮੋ ਨਾਮ ਮਯ੍ਹਂ ਸਤ੍ਥਾ ਅਤ੍ਥਿ, ਇਦਾਨਿ ਮਜ੍ਝਿਮਦੇਸਂ ਰਾਜਗਹਂ ਪਟਿਵਸਤੀਤਿ. ਏਵਂ ਪਨ ਭਨ੍ਤੇ ਸਤਿ ਤੁਮ੍ਹਾਕਂ ਆਚਰਿਯਂ ਮਯਂ ਦਟ੍ਠੁਂ ਅਰਹਾਮ ਵਾ ਨੋ ਵਾਤਿ ਪੁਚ੍ਛਿ. ਗਵਂਪਤਿਤ੍ਥੇਰੋਚ ਆਮ ਮਹਾਰਾਜ ਅਰਹਥ ਭਗਵਨ੍ਤਂ ਦਟ੍ਠੁਂ, ਅਹਂ ਯਾਚਿਤ੍ਵਾ ਆਗਚ੍ਛਾਮੀਤਿ ਵਤ੍ਵਾ ਭਗਵਨ੍ਤਂ ਯਾਚਿ. ਭਗਵਾ ਚ ਅਭਿਸਮ੍ਬੁਜ੍ਝਿਤ੍ਵਾ ਅਟ੍ਠਮੇ ਵਸ੍ਸੇ ਸਦ੍ਧਿਂ ਅਨੇਕਸਤਭਿਕ੍ਖੂਹਿ ਰਾਮਞ੍ਞਰਟ੍ਠੇ ਸੁਖਮ੍ਮਪੁਰਂ ਆਕਾਸੇਨ ਆਗਮਾਸਿ. ਰਾਜਵਂਸੇ ਪਞ੍ਚਹਿ ਭਿਕ੍ਖੁਸਤੇਹਿ ਆਗਮਾਸੀਤਿ ਵੁਤ੍ਤਂ. ਸਿਲਾਲੇਖਨੇ ਪਨ ਵੀਸਤਿਸਹਸ੍ਸਮਤ੍ਤੇਹਿ ਭਿਕ੍ਖੂਹੀਤਿ ਵੁਤ੍ਤਂ. ਏਤ੍ਥ ਚ ਯਸ੍ਮਾ ਭਗਵਾ ਸਪਰਿਸੋਯੇਵ ਆਗਚ੍ਛਿ, ਨ ਏਕਕੋਤਿ ਏਤ੍ਤਕਮੇਵ ਇਚ੍ਛਿਤਬ੍ਬਂ, ਤਸ੍ਮਾ ਨਾਨਾ ਵਾਦਤਂ ਪਟਿਚ੍ਚ ਚਿਤ੍ਤਸ੍ਸਾਕੁਲਿਤਾ ਨ ਉਪ੍ਪਾਦੇਤਬ੍ਬਾਤਿ.

ਅਥ ਆਗਨ੍ਤ੍ਵਾ ਰਤਨਮਣ੍ਡਪੇ ਨਿਸੀਦਿਤ੍ਵਾ ਸਰਾਜਿਕਾਨਂ ਰਟ੍ਠਵਾਸੀਨਂ ਅਮਤਰਸਂ ਅਦਾਸਿ. ਤੀਸੁ ਸਰਣੇਸੁ ਪਞ੍ਚਸੁ ਚ ਸੀਲੇਸੁ ਪਤਿਟ੍ਠਾਪੇਸਿ. ਅਥ ਭਗਵਾ ਦਸ੍ਸਨਤ੍ਥਾਯ ਆਗਤਾਨਂ ਛਨ੍ਨਂ ਤਾਪਸਾਨਂ ਛ ਕੇਸਧਾਤੁਯੋ ਪੂਜਨਤ੍ਥਾਯ ਅਦਾਸਿ. ਤਤੋ ਪਚ੍ਛਾਸਤ੍ਤਤਿਂਸਵਸ੍ਸਾਨਿ ਪੂਰੇਤ੍ਵਾ ਪਰਿਨਿਬ੍ਬਾਨਕਾਲੇਪਿ ਭਗਵਤੋ ਅਧਿਟ੍ਠਾਨਾਨੁਰੂਪੇਨ ਚਿਤਕਟ੍ਠਾਨਤੋ ਤੇਤ੍ਤਿਂਸ ਦਨ੍ਤੇ ਗਹੇਤ੍ਵਾ ਗਵਂਪਤਿਤ੍ਥੇਰੋ ਸੁਧਮ੍ਮਪੁਰਂ ਆਨੇਤ੍ਵਾ ਸੀਹਰਞ੍ਞੋ ਦਤ੍ਵਾ ਤੇਤ੍ਤਿਂਸਚੇਤਿਯਾਨਿ ਪਤਿਟ੍ਠਾਪੇਸਿ. ਏਵਂ ਭਗਵਤੋ ਪਰਿਨਿਬ੍ਬਾਨਤੋ ਅਟ੍ਠਮੇਯੇਵ ਵਸ੍ਸੇ ਗਵਂਪਤਿਤ੍ਥੇਰੋ ਰਾਮਞ੍ਞ ਰਟ੍ਠੇ ਸੁਧਮ੍ਮਪੁਰੇ ਸਾਸਨਂ ਪਤਿਟ੍ਠਾਪੇਸਿ.

ਇਦਂ ਰਾਮਞ੍ਞਰਟ੍ਠੇ ਦੁਤਿਯਂ ਸਾਸਨਸ੍ਸ ਪਤਿਟ੍ਠਾਨਂ.

ਭਗਵਤੋ ਪਰਿਨਿਬ੍ਬੁਤਪਞ੍ਚਤਿਂਸਾਧਿਕਾਨਂ ਦ੍ਵਿਨ੍ਨਂ ਸਤਾਨਂ ਉਪਰਿਸੁਵਣ੍ਣਭੂਮਿਂ ਨਾਮ ਰਾਮਞ੍ਞਰਟ੍ਠਂ ਆਗਨ੍ਤ੍ਵਾ ਸੋਣਤ੍ਥੇਰੋ ਉਤ੍ਤਰਤ੍ਥੇਰੋਚਾਤਿ ਦ੍ਵੇ ਥੇਰਾ ਪਞ੍ਚਵਗ੍ਗਕਮ੍ਮਾਰਹੇਹਿ ਭਿਕ੍ਖੂਹਿ ਸਦ੍ਧਿਂ ਸਾਸਨਂ ਪਤਿਟ੍ਠਾਪੇਸੁਂ. ਤੇ ਚ ਥੇਰਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਸ੍ਸ ਸਦ੍ਧਿਵਿਹਾਰਿਕਾਤਿ ਅਟ੍ਠਕਥਾਯਂ ਆਗਤਾ.

ਤਪੁਸ੍ਸਭਲ੍ਲਿਕੇ ਗਵਂਪਤਿਤ੍ਥੇਰਞ੍ਚ ਪਟਿਚ੍ਚ ਸਾਸਨਂ ਤਾਵ ਪਤਿਟ੍ਠਹਿ. ਤਞ੍ਚ ਨ ਸਬ੍ਬੇਨ ਸਬ੍ਬਂ ਓਗਾਹੇਤ੍ਵਾ ਯੇ ਯੇ ਪਨ ਸਦ੍ਧਾ ਪਸਨ੍ਨਾ, ਤੇ ਤੇ ਅਤ੍ਤਨੋ ਇਚ੍ਛਾਵਸੇਨੇਵ ਸਾਸਨਂ ਪਸੀਦਿਂਸੁ. ਪਚ੍ਛਾ ਪਨ ਸੋਣੁਤ੍ਤਰਤ੍ਥੇਰਾ ਮਹੁਸ੍ਸਾਹੇਨ ਆਚਰਿਯ ਆਣਤ੍ਤਿਯਾ ਸਾਸਨਸ੍ਸ ਪਤਿਟ੍ਠਾਪਨਤ੍ਥਾਯ ਉਸ੍ਸੁਕ੍ਕਂ ਆਪਨ੍ਨਾ ਪਤਿਟ੍ਠਾਪੇਸੁਂ. ਤੇਨ ਅਟ੍ਠਕਥਾਯਂ ਏਤਂ ਰਟ੍ਠਂ ਗਨ੍ਤ੍ਵਾ ਏਤ੍ਥ ਸਾਸਨਂ ਪਤਿਟ੍ਠਾਪੇਹੀਤਿ ਕਾਰਿਤਪਚ੍ਚਯਵਸੇਨ ਆਣਤ੍ਤਿਵਿਭਤ੍ਤਿਵਸੇਨਚ ਵੁਤ੍ਤਂ.

ਤਦਾ ਪਨ ਸੁਵਣ੍ਣਭੂਮਿਰਟ੍ਠੇ ਸੁਧਮ੍ਮਪੁਰੇ ਸਿਰਿਮਾਸੋਕੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਞ੍ਚ ਸੁਧਮ੍ਮਪੁਰਂ ਨਾਮ ਕੇਲਾਸਪਬ੍ਬਤਮੁਦ੍ਧਨਿ ਦਕ੍ਖਿਣਾਯ ਅਨੁਦਿਸਾਯ ਪੁਬ੍ਬਡ੍ਢਭਾਗੇਨ ਪਬ੍ਬਤਮੁਦ੍ਧਨਿ ਅਪਰਡ੍ਢਭਾਗੇਨ ਭੂਮਿਤਲੇ ਤਿਟ੍ਠਤਿ. ਤਂਯੇਵ ਗੁਲ਼ਪਾਚਕਾਨਂ ਮਸ੍ਸਾਨਂ ਗੇਹਸਦਿਸਾਨਿ ਗੇਹਾਨਿ ਯੇਭੁਯ੍ਯੇਨ, ਤੇਨੇਵ ਗੋਲ਼ਮਿਤ੍ਤਿਕ ਨਾਮੇਨਾਪਿ ਵੋਹਾਰਿਯਤਿ. ਤਸ੍ਸ ਪਨ ਨਗਰਸ੍ਸ ਮਹਾਸਮੁਦ੍ਦਸਮੀਪੇ ਠਿਤਤ੍ਤਾ ਦਕਯਕ੍ਖਿਨੀ ਸਬ੍ਬਦਾ ਆਗਨ੍ਤ੍ਵਾ ਰਾਜਗੇਹੇ ਜਾਤੇ ਜਾਤੇ ਕੁਮਾਰੇ ਖਾਦਿ.

ਸੋਣੁਤ੍ਤਰਤ੍ਥੇਰਾਨਂ ਸਮ੍ਪਤ੍ਤਦਿਵਸਯੇਵ ਰਾਜਗੇਹੇ ਏਕਂ ਪੁਤ੍ਤਂ ਵਿਜਾਯਿ. ਦਕਯਕ੍ਖਿਨੀਚ ਖਾਦਿਸ੍ਸਾਮੀਤਿ ਸਹ ਪਞ੍ਚਹਿ ਯਕ੍ਖਿਨਿਸਤੇਹਿ ਆਗਤਾ. ਤਂ ਦਿਸ੍ਵਾ ਮਨੁਸ੍ਸਾ ਭਾਯਿਤ੍ਵਾ ਮਹਾਵਿਰਵਂ ਰਵਨ੍ਤਿ. ਤਦਾ ਥੇਰਾ ਭਯਾਨਕਂ ਸੀਹਸੀਸਵਸੇਨ ਏਕਸੀਸਸਰੀਰਦ੍ਵਯਸਮ੍ਬਨ੍ਧਸਣ੍ਠਾਨਂ ਮਨੁਸੀਹਰੂਪਂ ਮਾਪੇਤ੍ਵਾ ਦਸ੍ਸੇਤ੍ਵਾ ਤਂ ਯਕ੍ਖਿਨਿਂ ਸਪਰਿਸਂ ਪਲਾਪੇਸੁਂ.

ਥੇਰਾ ਚ ਪੁਨ ਯਕ੍ਖਿਨਿਯਾ ਅਨਾਗਮਨਤ੍ਥਾਯ ਪਰਿਤ੍ਤਂ ਅਕਂਸੁਤਸ੍ਮਿਞ੍ਚ ਸਮਾਗਮੇ ਆਗਤਾਨਂ ਮਨੁਸ੍ਸਾਨਂ ਬ੍ਰਹ੍ਮਜਾਲਸੁਤ੍ਤਂ ਅਦੇਸਯ੍ਯੁਂ. ਸਟ੍ਠਿਮਤ੍ਤਸਹਸ੍ਸਾ ਸੋਤਾਪਨ੍ਨਾਦਿਪਰਾਯਨਾ ਅਹੇਸੁਂ. ਕੁਲਦਾਰਕਾਨਂ ਅਡ੍ਢੁਡ੍ਢਾਨਿ ਸਹਸ੍ਸਾਨਿ ਪਬ੍ਬਜਿਂਸੁ. ਕੁਲਧੀਤਾਨਂ ਪਨ ਦਿਘਡ੍ਢਸਹਸ੍ਸਂ. ਰਾਜਕੁਮਾਰਾਨਂ ਪਞ੍ਚਸਤਾਧਿਕਸਹਸ੍ਸਮਤ੍ਤਂ ਪਬ੍ਬਜਿਂਸੁ. ਅਵਸੇਸਾਪਿ ਮਨੁਸ੍ਸਾ ਸਰਣੇ ਪਤਿਟ੍ਠਹਿਂਸੁ. ਏਵਂ ਸੋ ਤਤ੍ਥ ਸਾਸਨਂ ਪਤਿਟ੍ਠਾਪੇਸੀਤਿ. ਵੁਤ੍ਤਞ੍ਚ ਅਟ੍ਠਕਥਾਯਂ,–

ਸੁਵਣ੍ਣਭੂਮਿਂ ਗਨ੍ਤ੍ਵਾਨ, ਸੋਣੁਤ੍ਤਰਾ ਮਹਿਦ੍ਧਿਕਾ;

ਪਿਸਾਚੇ ਨਿਦ੍ਧਮਿਤ੍ਵਾਨ, ਬ੍ਰਹ੍ਮਜਾਲੇ ਮਦੇਸਿਸੁਨ੍ਤਿ.

ਤਤੋ ਪਟ੍ਠਾਯ ਰਾਜਕੁਮਾਰਾਨਂ ਸੋਣੁਤ੍ਤਰਨਾਮੇਹਿਯੇਵ ਨਾਮਂ ਅਕਂਸੁ. ਅਵਸੇਸਦ੍ਵਾਰਕਾਨਮ੍ਪਿ ਰਕ੍ਖਸਭਯਤੋ ਵਿਮੋਚਨਤ੍ਥਂ ਤਾਲਪਤ੍ਤਭੁਜਪਤ੍ਤੇਸੁ ਥੇਰੇਹਿ ਮਾਪਿਤਂ ਮਨੁਸੀਹਰੂਪਂ ਦਸ੍ਸੇਤ੍ਵਾ ਮਤ੍ਥਕੇ ਠਪੇਸੁਂ. ਮਨੁਸ੍ਸਾਚ ਸਿਲਾਮਯਂ ਮਨੁਸੀਹਰੂਪਂ ਕਤ੍ਵਾ ਸੁਧਮ੍ਮਪੁਰਸ੍ਸ ਏਸਨ੍ਨੇ ਪਦੇਸੇ ਠਪੇਸੁਂ. ਤਂ ਯਾਵਜ੍ਜਤਨਾ ਅਤ੍ਥੀਤਿ. ਇਚ੍ਚੇਵਂ ਭਗਵਤੋ ਪਰਿਨਿਬ੍ਬਾਨਤੋ ਪਞ੍ਚਤਿਂਸਾਧਿਕੇ ਦ੍ਵਿਵਸ੍ਸਸਤੇ ਸਮ੍ਪਤ੍ਤੇ ਸੋਣੁਤ੍ਤਰਤ੍ਥੇਰਾ ਆਗਨ੍ਤ੍ਵਾ ਸਾਸਨਂ ਪਤਿਟ੍ਠਾਪੇਤ੍ਵਾ ਸਾਸਨਂ ਪਤਿਟ੍ਠਾਪੇਤ੍ਵਾ ਅਨੁਗ੍ਗਹਂ ਅਕਂਸੂਤਿ.

ਇਦਂ ਰਾਮਞ੍ਞਰਟ੍ਠੇ ਤਤਿਯਂ ਸਾਸਨਸ੍ਸ ਪਤਿਟ੍ਠਾਨਂ.

ਤਤੋ ਪਚ੍ਛਾ ਛਸਤਾਧਿਕੇ ਸਹਸ੍ਸੇ ਸਮ੍ਪਤ੍ਤੇ ਪੁਬ੍ਬੇ ਵੁਤ੍ਤੇਹਿ ਤੀਹਿ ਕਾਰਣੇਹਿ ਸਾਸਨਸ੍ਸ ਉਪ੍ਪਤ੍ਤਿਟ੍ਠਾਨਭੂਤਂ ਰਾਮਞ੍ਞਰਟ੍ਠਂ ਦਾਮਰਿਕਚੋਰਭਯੇਨ ਪਜ੍ਜਰਰੋਗਭਯੇਨ ਸਾਸਨਪਚ੍ਚਤ੍ਥਿਕਭਯੇਨਚਾਤਿ ਤੀਹਿ ਭਯੇਹਿ ਆਕੁਲਿਤਂ ਅਹੋਸਿ. ਤਦਾ ਚ ਤਤ੍ਥ ਸਾਸਨਂ ਦੁਬ੍ਬਲਂ ਅਹੋਸਿ, ਯਥਾ ਉਦਕੇ ਮਨ੍ਦੇ ਤਤ੍ਰਜਾਤਂ ਉਪ੍ਪਲਂ ਉਪ੍ਪਲਂ ਦੁਬ੍ਬਲਨ੍ਤਿ. ਤਤ੍ਥ ਭਿਕ੍ਖੂਪਿ ਸਾਸਨਂ ਯਥਾ ਕਾਮਂ ਪੂਰੇਤੁਂ ਨ ਸਕ੍ਕਾ.

ਸੂਰਿਯਕੁਮਾਰਸ੍ਸ ਨਾਮ ਮਨੋਹਰਿਰਞ੍ਞੋ ਪਨ ਕਾਲੇ ਸਾਸਨਂ ਅਤਿਵਿਯ ਦੁਬ੍ਬਲਂ ਅਹੋਸਿ. ਜਿਨਚਕ੍ਕੇ ਏਕਛਸਤਾਧਿਕੇ ਵਸ੍ਸਸਹਸ੍ਸੇ ਸਮ੍ਪਤ੍ਤੇ ਕਲਿਯੁਗੇਚ ਏਕੂਨਵੀਸਤਾਧਿਕੇ ਚਤੁਵਸ੍ਸਸਤੇ ਸਮ੍ਪਤ੍ਤੇ ਅਰਿਮਦ੍ਦਨਨਗਰੇ ਅਨੁਰੁਦ੍ਧਾ ਨਾਮ ਰਾਜਾ ਤਤੋ ਸਹ ਪਿਟਕੇਨ ਭਿਕ੍ਖੁਸਙ੍ਘਂ ਆਨੇਸਿ.

ਤਤੋ ਪਚ੍ਛਾ ਜਿਨਚਕ੍ਕੇ ਨਵਾਧਿਕੇ ਸਤ੍ਤਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਲਙ੍ਕਾਦੀਪੇ ਸਿਰਿਸਙ੍ਘਬੋਧਿਪਰਕ੍ਕਮਬਾਹੁਮਹਾਰਾਜਾ ਸਾਸਨਂ ਸੋਧੇਸਿ.

ਤਤੋ ਛਨ੍ਨਂ ਵਸ੍ਸਾਨਂ ਉਪਰਿ ਕਲਿਯੁਗੇ ਦ੍ਵਤ੍ਤਿਂਸਾਧਿਕੇ ਪਞ੍ਚਸਤੇ ਸਮ੍ਪਤ੍ਤੇ ਉਤ੍ਤਰਾਜੀਵੋ ਨਾਮ ਥੇਰੋ ਸਾਸਨੇ ਪਾਕਟੋ ਅਹੋਸਿ.

ਸੋ ਪਨ ਰਾਮਞ੍ਞਰਟ੍ਠਵਾਸਿਨੋ ਅਰਿਯਾਵਂਸਤ੍ਥੇਰਸ੍ਸ ਸਦ੍ਧਿਵਿਹਾਰਿਕੋ. ਅਰਿਯਾਵਂਸਤ੍ਥੇਰੋ ਪਨ ਕਪ੍ਪੁਙ੍ਗਨਗਰਵਾਸਿਨੋ ਮਹਾਕਾਲ਼ਤ੍ਥੇਰਸ੍ਸ ਸਦ੍ਧਿਵਿਹਾਰਿਕੋ. ਮਹਾਕਾਲ਼ਤ੍ਥੇਰੋ ਪਨ ਸੁਧਮ੍ਮਪੁਰਵਾਸਿਨੋ ਪ੍ਰਾਨਦਸ੍ਸਿਤ੍ਥੇਰਸ੍ਸ ਸਦ੍ਧਿਵਿਹਾਰਿਕੋ. ਅਯਂ ਪਨ ਉਤ੍ਤਰਾਜੀਵਛਪ੍ਪਦਤ੍ਥੇਰਾਨਂ ਵਂਸਦੀਪਨਤ੍ਥਂ ਵੁਤ੍ਤਾ.

ਸੋ ਪਨ ਪ੍ਰਾਨਦਸ੍ਸਿਤ੍ਥੇਰੋ ਲੋਕਿਯਾਭਿਞ੍ਞਾਯੋ ਲਭਿਤ੍ਵਾ ਨਿਚ੍ਚਂ ਅਭਿਣ੍ਹਂ ਪਾਤੋਵ ਮਗਧਰਟ੍ਠੇ ਉਰੁਵੇਲਨਿਗਮੇ ਮਹਾਬੋਧਿਂ ਗਨ੍ਤ੍ਵਾ ਮਹਾਬੋਧਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਪੁਨ ਆਗਨ੍ਤ੍ਵਾ ਸੁਧਮ੍ਮਪੁਰੇ ਪਿਣ੍ਡਾਯ ਚਰਿ. ਇਦਂ ਥੇਰਸ੍ਸ ਨਿਬਦ੍ਧਵਤ੍ਤੁਂ. ਅਯਞ੍ਚ ਅਤ੍ਥੋ ਸੁਧਮ੍ਮਪੁਰਤੋ ਮਗਧਰਟ੍ਠਂ ਗਨ੍ਤ੍ਵਾ ਉਰੁਵੇਲਨਿਗਮੇ ਵਾਣਿਜਕਮ੍ਮਂ ਕਰੋਨ੍ਤਾ ਤਦਾਕਾਰਂ ਪਸ੍ਸਿਤ੍ਵਾ ਪਚ੍ਚਾਗਮਨਕਾਲੇ ਸੁਧਮ੍ਮਪੁਰ ਵਾਸੀਨਂ ਕਥੇਸੁਂ, ਤਸ੍ਮਾ ਵਿਞ੍ਞਾਯਤਿ.

ਤਸ੍ਮਿਞ੍ਚ ਕਾਲੇ ਉਤ੍ਤਰਾਜੀਵਤ੍ਥੇਰੋ ਪਰਿਪੁਣ੍ਣਵੀਸਤਿਵਸ੍ਸੇਨ ਛਪ੍ਪਦੇਨ ਨਾਮ ਸਾਮਣੇਰੇਨ ਸਦ੍ਧਿਂ ਸੀਹਲ਼ਦੀਪਂ ਗਚ੍ਛਿ. ਸੀਹਲ਼ਦੀਪਵਾਸਿਨੋ ਚ ਭਿਕ੍ਖੂ ਮਯਂ ਮਹਾਮਹਿਨ੍ਦਤ੍ਥੇਰਸ੍ਸ ਵਂਸਿਕਾ ਭਵਾਮ, ਤੁਮ੍ਹੇਪਿ ਸੋਣੁਤ੍ਤਰਤ੍ਥੇਰਾਨਂ ਵਂਸਿਕਾ ਭਵਥ, ਤਸ੍ਮਾ ਮਯਂ ਏਕਵਂਸਿਕਾ ਭਵਾਮ ਸਮਾਨ ਵਾਦਿਕਾਤਿ ਵਤ੍ਵਾ ਛਪ੍ਪਦਸਾਮਣੇਰਸ੍ਸ ਉਪਸਮ੍ਪਦਕਮ੍ਮਂ ਅਕਂਸੁ. ਤਤੋ ਪਚ੍ਛਾ ਚੇਤਿਯ ਵਨ੍ਦਨਾਦੀਨਿ ਕਮ੍ਮਾਨਿ ਨਿਟ੍ਠਾਪੇਤ੍ਵਾ ਉਤ੍ਤਰਾਜੀਵਤ੍ਥੇਰੋ ਸਦ੍ਧਿਂ ਭਿਕ੍ਖੁਸਙ੍ਖੇਨ ਅਰਿਮਦ੍ਦਨਨਗਰਂ ਪਚ੍ਚਾਗਮਾਹਿ.

ਛਪ੍ਪਦਸ੍ਸ ਪਨ ਏਤਦਹੋਸਿ,- ਸਚਾਹਂ ਆਚਰਿਯੇਨ ਸਹ ਜਮ੍ਬੁਦੀਪਂ ਗਚ੍ਛੇਯ੍ਯਂ, ਬਹੂਹਿ ਞਾਤਿਬਲਿਬੋਧੇਹਿ ਪਰਿਯਤ੍ਤੁਗ੍ਗਹਣੇ ਅਨ੍ਤਰਾਯੋ ਭਵੇਯ੍ਯ, ਤੇਨ ਹਿ ਸੀਹਲ਼ਦੀਪੇਯੇਵ ਵਸਿਤ੍ਵਾ ਪਰਿਯਤ੍ਤਿਮੁਗ੍ਗਹੇਤ੍ਵਾ ਪਚ੍ਚਾਗਮਿਸ੍ਸਾਮੀਤਿ.

ਤਤੋ ਆਚਰਿਯਸ੍ਸ ਓਕਾਸਂ ਯਾਚਿਤ੍ਵਾ ਸੀਹਲ਼ਦੀਪੇਯੇਵ ਪਟਿਵਸਿ. ਸੀਹਲ਼ਦੀਪੇ ਵਸਿਤ੍ਵਾ ਯਾਵ ਲਦ੍ਧਤ੍ਥੇਰਸਮ੍ਮੁਤਿਕਾ ਪਰਿਯਤ੍ਤਿਂ ਪਰਿਯਾਪੁਣਿਤ੍ਵਾ ਪੁਨ ਜਮ੍ਬੁਦੀਪਂ ਪਚ੍ਚਾਗਨ੍ਤੁਕਾਮੋ ਅਹੋਸਿ. ਅਥ ਤਸ੍ਸ ਏਤਦਹੋਸਿ,– ਅਹਂ ਏਕਕੋਵ ਗਚ੍ਛਨ੍ਤੋ ਸਚੇ ਮਮ ਆਚਰਿਯੋ ਨਤ੍ਥਿ, ਸਚੇਪਿ ਜਮ੍ਬੁਦੀਪਵਾਸਿਨਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਵਿਨਯਕਮ੍ਮਂ ਕਾਤੁਂ ਨ ਇਚ੍ਛੇਯ੍ਯਂ, ਏਵਂ ਸਤਿ ਵਿਸੁਂ ਕਮ੍ਮਂ ਕਾਤੁਂ ਨ ਸਕ੍ਕੂਣੇਯ੍ਯਂ, ਤਸ੍ਮਾ ਪਿਟਕਧਰੇਹਿ ਚਤੂਹਿ ਥੇਰੇਹਿ ਸਦ੍ਧਿਂ ਗਚ੍ਚੇਯ੍ਯਂ, ਇਚ੍ਚੇਤਂ ਕੁਸਲਨ੍ਤਿ.

ਏਵਂ ਪਨ ਚਿਨ੍ਤੇਤ੍ਵਾ ਤਾਮਲਿਤ੍ਤਿਗਾਮਵਾਸਿਨਾ ਸਿਵਲਿਤ੍ਥੇਰੇਨ ਕਮ੍ਬੋਜਰਞ੍ਞੋ ਪੁਤ੍ਤਭੂਤੇਨ ਤਾਮਲਿਨ੍ਦਤ੍ਥੇਰੇਨ ਕਿਞ੍ਚਿਪੁਰਵਾਸਿਨਾ ਆਨਨ੍ਦਤ੍ਥੇਰੇਨ ਰਾਹੁਲਤ੍ਥੇਰੇਨਚਾਤਿ ਇਮੇਹਿ ਚਤੂਹਿ ਥੇਰੇਹਿ ਸਦ੍ਧਿਂ ਨਾਵਾਯ ਪਚ੍ਚਾਗਚ੍ਛਿ. ਤੇ ਚ ਥੇਰਾ ਪਿਟਕਧਰਾ ਅਹੇਸੁਂ ਦਕ੍ਖਾ ਥਾਮਸਮ੍ਪਨ੍ਨਾ ਚ. ਤੇਸੁ ਵਿਸੇਸਤੋ ਰਾਹੁਲਤ੍ਥੇਰੋ ਥਾਮਸਮ੍ਪਨ੍ਨੋ. ਕੁਸਿਮਨਗਰਂ ਸਮ੍ਪਤ੍ਤਕਾਲੇ ਉਪਕਟ੍ਠਵਸ੍ਸੂਪਗਮਨਕਾਲੋ ਹੁਤ੍ਵਾ ਅਰਿਮਦ੍ਦਨਨਗਰੇ ਆਚਰਿਯਸ੍ਸ ਸਨ੍ਤਿਕਂ ਅਸਮ੍ਪਾਪੁਣਿਤ੍ਵਾ ਕੁਸਿਮਨਗਰਯੇਵ ਵਸ੍ਸਂ ਉਪਗਮਿਂਸੁ. ਤੇਸਂ ਵਸ੍ਸੂਪਗਮਨਵਿਹਾਰਵਤ੍ਥੁ ਆਰਾਮਪਾਕਾਰੋ ਚ ਕੁਸਿਮਨਗਰਸ੍ਸ ਦਕ੍ਖਿਣਦਿਸਾਸਾਗੇ ਯਾਵਜ੍ਜਤਨਾ ਅਤ੍ਥਿ.

ਵਸ੍ਸਂਵੁਟ੍ਠਕਾਲੇ ਪਨ ਮਹਾਪਵਾਰਣਾਯ ਪਵਾਰੇਤ੍ਵਾ ਤੇ ਪਞ੍ਚ ਥੇਰਾ ਅਰਿਮਦ੍ਦਨਨਗਰਂ ਅਗਮਂਸੁ. ਉਤ੍ਤਰਾਜੀਵਤ੍ਥੇਰੋਚ ਅਰਿਮਦ੍ਦਨਨਗਰ ਵਾਸੀਹਿ ਭਿਕ੍ਖੂਹਿ ਵਿਸੁਂ ਹੁਤ੍ਵਾ ਸਙ੍ਘਕਮ੍ਮਾਨਿ ਅਕਾਸਿ. ਕਿਞ੍ਚਾਪਿ ਚੇਤ੍ਥ ਉਤ੍ਤਰਾਜੀਵਤ੍ਥੇਰਾਦਯੋ ਸੀਹਲ਼ਦੀਪਤੋ ਪਚ੍ਚਾਗਨ੍ਤ੍ਵਾ ਅਰਿਮਦ੍ਦਨਨਗਰੇ ਵਸਿਤ੍ਵਾ ਸਾਸਨਂ ਅਨੁਗ੍ਗਹੇਸੁਂ, ਰਾਮਞ੍ਞਰਟ੍ਠੇ ਪਨ ਜਾਤਤ੍ਤਾ ਪੁਬ੍ਬੇ ਚ ਤਤ੍ਥ ਨਿਵਾਸਤ੍ਤਾ ਇਧ ਦਸ੍ਸਿਤਾਤਿ ਦਟ੍ਠਬ੍ਬਾ.

ਤਸ੍ਮਿਞ੍ਚ ਕਾਲੇ ਦਲਨਗਰੇ ਪਦੀਪਜੇਯ੍ਯਗਾਮੇ ਜਾਤੋ ਸਾਰਿਪੁਤ੍ਤੋ ਨਾਮ ਮਹਲ੍ਲਕਸ੍ਸਮਣੇਰੋ ਏਕੋ ਅਰਿਮਦ੍ਦਨਨਗਰਂ ਗਨ੍ਤ੍ਵਾ ਆਨਨ੍ਦਤ੍ਥੇਰਸ੍ਸ ਸਨ੍ਤਿਕੇ ਉਪਸਮ੍ਪਜ੍ਜਿਤ੍ਵਾ ਪਰਿਯਤ੍ਤਿ ਪਰਿਯਪੁਣਿ. ਸੋ ਬਹੁਸ੍ਸੁਤੋ ਅਹੋਸਿ ਦਕ੍ਖੋ ਥਾਮਸਮ੍ਪਨ੍ਨੋ ਚ. ਤਮਤ੍ਥਂ ਸੁਤ੍ਵਾ ਨਰਪਤਿਚਞ੍ਞਿਸੂਰਾਜਾ ਚਿਨ੍ਤੇਸਿ,- ਸਚੇਸੋ ਅਙ੍ਗਪਚ੍ਚਙ੍ਗਸਮ੍ਪਨ੍ਨੋ ਭਵੇਯ੍ਯ, ਆਚਰਿਯਂ ਕਤ੍ਵਾ ਠਪੇਸ੍ਸਾਮਿ ਅਨੁਗ੍ਗਹੇਸ੍ਸਾਮੀਤਿ. ਰਾਜਾ ਏਵਂ ਚਿਨ੍ਤੇਤ੍ਵਾ ਰਾਜਪੁਰਿਸੇ ਪੇਸੇਤ੍ਵਾ ਵੀਮਂਸਾਪੇਸਿ. ਰਾਜਪੁਰਿਸਾ ਚ ਤਸ੍ਸ ਛਿਨ੍ਨਪਾਦਙ੍ਗੁਟ੍ਠਗ੍ਗਤਂ ਪਸ੍ਸਿਤ੍ਵਾ ਤਮਤ੍ਥਂ ਰਞ੍ਞੋ ਆਰੋਚੇਸੁਂ. ਰਾਜਾ ਤਂ ਸੁਤ੍ਵਾ ਏਵਂ ਵਿਕਲਙ੍ਗਪਚ੍ਚਙ੍ਗੋ ਭਵੇਯ੍ਯ, ਪਧਾਨਾਚਰਿਯਟ੍ਠਾਨੇ ਠਪੇਤੁਂ ਨ ਯੁਤ੍ਤੋਤਿ ਕਤ੍ਵਾ ਪਧਾਨਾਚਰਿਯਭਾਵਂ ਨ ਅਕਾਸਿ. ਪੂਜਾਸਕ੍ਕਾ ਰਮਤ੍ਤੇਨੇਵ ਅਨੁਗ੍ਗਹਂ ਅਕਾਸਿ. ਏਕਸ੍ਮਿਞ੍ਚ ਕਾਲੇ ਧਮ੍ਮਵਿਲਾਸੋਤਿ ਲਞ੍ਛਂ ਦਤ੍ਵਾ ਰਾਮਞ੍ਞਰਟ੍ਠੇ ਸਾਸਨਂ ਸੋਧੇਤ੍ਵਾ ਪਰਿਸੁਦ੍ਧਂ ਕਰੋਹੀਤਿ ਰਾਮਞ੍ਞਰਟ੍ਠਂ ਪੇਸੇਸਿ.

ਸੋਚ ਰਾਮਞ੍ਞਰਟ੍ਠਂ ਗਨ੍ਤ੍ਵਾ ਦਲਨਗਰੇ ਬਹੁਨਂ ਭਿਕ੍ਖੂਨਂ ਧਮ੍ਮ ਵਿਨਯਂ ਵਾਚੇਤ੍ਵਾ ਸਾਸਨਂ ਪਗ੍ਗਹੇਸਿ. ਤਤ੍ਥ ਚ ਰਾਮਞ੍ਞਮਨੁਸ੍ਸਾ ਤਸ੍ਸ ਧਮ੍ਮਵਿਲਾਸਤ੍ਥੇਰਸ੍ਸ ਸਿਸ੍ਸਾਨੁਸਿਸ੍ਸਾ ਸੀਹਲ਼ਭਿਕ੍ਖੁ ਗਣਾਤਿ ਵੋਹਾਰਨ੍ਤਿ. ਇਚ੍ਚੇਵਂ ਸੀਹਲ਼ਦੀਪਿਕਸ੍ਸ ਆਨਨ੍ਦਤ੍ਥੇਰਸ੍ਸ ਸਿਸ੍ਸਂ ਧਮ੍ਮਵਿਲਾਸਂ ਪਟਿਚ੍ਚ ਰਾਮਞ੍ਞਰਟ੍ਠੇ ਸੀਹਲ਼ਦੀਪਤੋ ਸਾਸਨਸ੍ਸ ਆਗਤਮਗ੍ਗੋਤਿ.

ਇਦਂ ਰਾਮਞ੍ਞਰਟ੍ਠੇ ਚਤੁਤ੍ਥਂ ਸਾਸਨਸ੍ਸ ਪਤਿਟ੍ਠਾਨਂ.

ਤਸ੍ਮਿਞ੍ਚ ਕਾਲੇ ਮੁਤ੍ਤਿਮਨਗਰੇ ਅਗ੍ਗਮਹੇਸਿਯਾ ਆਚਰਿਯਾ ਬੁਦ੍ਧਵਂਸਤ੍ਥੇਰਮਹਾਨਾਗਤ੍ਥੇਰਾ ਸੀਹਲ਼ਦੀਪਂ ਗਨ੍ਤ੍ਵਾ ਮਹਾਹਾਰਵਾਸਿਗਣਵਂਸਭੂਤਾਨਂ ਭਿਕ੍ਖੂਨਂ ਸਨ੍ਤਿਕੇ ਪੁਨ ਸਿਕ੍ਖਂ ਗਣ੍ਹਿਤ੍ਵਾ ਮੁਤ੍ਤਿਮਨਗਰਂ ਪਚ੍ਚਾਗਨ੍ਤ੍ਵਾ ਮੁਤ੍ਤਿਮਨਗਰਵਾਸੀਤਿ ਭਿਕ੍ਖੂਹਿ ਵਿਸੁਂ ਹੁਤ੍ਵਾ ਸਙ੍ਘਕਮ੍ਮਾਨਿ ਕਤ੍ਵਾ ਸਾਸਨਂ ਪਗ੍ਗਹੇਸੁਂ. ਤੇਚ ਥੇਰੇ ਪਟਿਚ੍ਚ ਰਾਮਞ੍ਞਰਟ੍ਠੇ ਪੁਨ ਸੀਹਲ਼ਦੀਪਤੋ ਸਾਸਨਂ ਆਗਤਨ੍ਤਿ.

ਇਦਂ ਰਾਮਞ੍ਞਰਟ੍ਠੇ ਪਞ੍ਚਮਂ ਸਾਸਨਸ੍ਸ ਪਤਿਟ੍ਠਾਨਂ.

ਤਤੋ ਪਚ੍ਛਾਚ ਮੁਤ੍ਤਿਮਨਗਰੇ ਸੇਤਿਭਿਨ੍ਦਸ੍ਸ ਰਞ੍ਞੋ ਮਾਤੁਯਾ ਆਚਰਿਯੋ ਮੇਧਙ੍ਕਰੋ ਨਾਮ ਥੇਰੋ ਸੀਹਲ਼ਦੀਪਂ ਗਨ੍ਤ੍ਵਾ ਸੀਹਲ਼ਦੀਪੇ ਅਰਞ੍ਞਵਾਸੀਨਂ ਮਹਾਥੇਰਾਨਂ ਸਨ੍ਤਿਕੇ ਪੁਨ ਸਿਕ੍ਖਂ ਗਹੇਤ੍ਵਾ ਪਰਿਯਤ੍ਤਿਂ ਪਰਿਯਾਪੁਣਿਤ੍ਵਾ ਸੁਵਣ੍ਣਰਜਤਮਯੇ ਤਿਪੁਸੀਸਚ੍ਛਨ੍ਨੇ ਸੇਤਿਭਿਨ੍ਦਸ੍ਸ ਰਞ੍ਞੋ ਮਾਤੁਯਾ ਕਾਰਾਵਿਤੇ ਵਿਹਾਰੇ ਨਿਸਿਦਿਤ੍ਵਾ ਸਾਸਨਂ ਅਨੁਗ੍ਗਹੇਸਿ. ਲੋਕਦੀਪਕਸਾਰਞ੍ਚ ਨਾਮ ਗਨ੍ਥਂ ਅਕਾਸਿ. ਅਥਾਪਰਿਮ੍ਪਿ ਮੁਤ੍ਤਿਮਨਗਰੇਯੇਵ ਸੁਵਣ੍ਣਸੋਭਣੋ ਨਾਮ ਥੇਰੋ ਸੀਹਲ਼ਦੀਪਂ ਗਨ੍ਤ੍ਵਾ ਮਹਾਵਿਹਾਰਵਾਸਿਗਣਵਂਸਭੂਤਾਨਂ ਥੇਰਾਨਂ ਸਨ੍ਤਿਕੇ ਪੁਨ ਸਿਕ੍ਖਂ ਗਹੇਤ੍ਵਾ ਮੁਤ੍ਤਿਮਨਗਰਮੇਵ ਪਚ੍ਚਾਗਚ੍ਛਿ.

ਸੋ ਪਨ ਥੇਰੋ ਅਰਞ੍ਞੇਯੇਵ ਵਸਿ. ਧੁਤਙ੍ਗਧਰੋ ਚ ਅਹੋਸਿ ਅਪ੍ਪਿਚ੍ਛੋ ਸਨ੍ਤੁਟ੍ਠੋ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾ ਕਾਮੋ ਦਕ੍ਖੋ ਥਾਮਸਮ੍ਪਨ੍ਨੋ ਚ. ਸੀਹਲ਼ਦੀਪੇ ਕਲਮ੍ਬੁਮ੍ਹਿ ਨਾਮ ਜਾਤਸ੍ਸਰੇ ਉਦਕੁਕ੍ਖੇਪਸੀਮਾਯਂ ਅਤਿਰੇਕਪਞ੍ਚਵਗ੍ਗੇਨ ਵਨਰਤਨਂ ਨਾਮ ਸਙ੍ਘਰਾਜਂ ਉਪਜ੍ਝਾਯਂ ਕਤ੍ਵਾ ਰਾਹੁਲਭਦ੍ਦਂ ਨਾਮ ਵਿਜਯਬਾਹੁਰਞ੍ਞੋ ਆਚਰਿਯਭੂਤਂ ਥੇਰਂ ਕਮ੍ਮਵਾਚਾਚਰਿਯਂ ਕਤ੍ਵਾ ਉਪਸਮ੍ਪਜ੍ਜਿ. ਸੋਚ ਥੇਰੋ ਪੁਨਾਗਨ੍ਤ੍ਵਾ ਮੁਤ੍ਤਿਮਨਗਰੇਯੇਵ ਵਸਿਤ੍ਵਾ ਗਣਂ ਵਡ੍ਢੇਤ੍ਵਾ ਸਾਸਨਂ ਅਨੁਗ੍ਗਹੇਸਿ. ਏਤੇ ਚ ਦ੍ਵੇ ਥੇਰੇ ਪਟਿਚ੍ਚ ਰਾਮਞ੍ਞਰਟ੍ਠੇ ਸੀਹਲ਼ਦੀਪਤੋ ਸਾਸਨਂ ਆਗਤਂ.

ਇਦਂ ਰਾਮਞ੍ਞਰਟ੍ਠੇ ਛਟ੍ਠਂ ਸਾਸਨਸ੍ਸ ਪਤਿਟ੍ਠਾਨਂ.

ਤਤੋ ਪਚ੍ਛਾ ਸਾਸਨਵਸੇਨ ਦ੍ਵਿਵਸ੍ਸਾਧਿਕੇ ਦ੍ਵਿਸਹਸ੍ਸੇ ਕਲਿਯੁਗਤੋ ਏਕਾਸੀਤਿਕੇ ਸਮ੍ਪਤ੍ਤੇ ਹਂਸਾਵਤੀਨਗਰੇ ਸਿਰਿਪਰਮਮਹਾਧਮ੍ਮਰਾਜਾਤਿ ਲਦ੍ਧਨਾਮੋ ਧਮ੍ਮਚੇਤਿਯਰਾਜਾ ਕੁਸਿਮਮਣ੍ਡਲੇ ਹਂਸਾਵਤੀਮਣ੍ਡਲੇ ਮੁਤ੍ਤਿਮਮਣ੍ਡਲੇ ਚ ਰਟ੍ਠਵਾਸਿਨੋ ਸਪਜਂਵਿਯ ਧਮ੍ਮੇਨ ਸਮੇਨ ਰਕ੍ਖਿਤ੍ਵਾ ਰਜ੍ਜਂ ਕਾਰੇਸਿ. ਸੋ ਚ ਰਾਜਾ ਤੀਸੁ ਪਿਟਕੇਸੁ ਚਤੂਸੁ ਚ ਵੇਦੇਸੁ ਬ੍ਯਾਕਰਣਚ੍ਛਨ੍ਦਾਲਙ੍ਕਾਰਾਦੀਸੁ ਚ ਛੇਕੋ ਸਿਕ੍ਖਿਤਨਾਨਾਸਿਪ੍ਪੋ ਨਾਨਾਭਾਸਾਸੁ ਚ ਪਸੁਤੋ ਸਦ੍ਧਾਸੀਲਾਦਿਗੁਣੋਪੇਤੋ ਕੁਮੁਦਕੁਨ੍ਦਸਰਦਚਨ੍ਦਿਕਾਸਮਾਨਸਿਤਪਜਪਤਿਭੂਤੋ ਚ ਸਾਸਨੇ ਚ ਅਤਿਪ੍ਪਸਨ੍ਨੋ ਅਹੋਸਿ.

ਏਕਸ੍ਮਿਂ ਕਾਲੇ ਸੋ ਚਿਨ੍ਤੇਸਿ, ਭਗਵਤੋ ਸਾਸਨਂ ਨਾਮ ਪਬ੍ਬਜ੍ਜਉਪਸਮ੍ਪਦਤਾਵੇਨ ਸਮ੍ਬਨ੍ਧਂ, ਉਪਸਮ੍ਪਦਭਾਵੋ ਚ ਸੀਮਪਰਿਸਵਤ੍ਥੁ ਞਤ੍ਤਿਕਮ੍ਮਵਾਚਾਸਮ੍ਪਤ੍ਤੀਹਿ ਸਮ੍ਬਨ੍ਧੋਤਿ. ਏਵਞ੍ਚ ਪਨ ਚਿਨ੍ਤੇਤ੍ਵਾ ਸੀਮਵਿਨਿਚ੍ਛਯਂ ਤਸ੍ਸਂ ਵਣ੍ਣਨਂ ਵਿਨਯਸਙ੍ਗਹਂ ਤਸ੍ਸਂਵਣ੍ਣਨਂ ਸੀਮਾਲਙ੍ਕਾਰ ਸੀਮਸਙ੍ਗਹਞ੍ਚ ਸਦ੍ਦਤੋ ਅਤ੍ਥਤੋ ਚ ਪੁਨਪ੍ਪੁਨਂ ਉਪਪਰਿਕ੍ਖਿਤ੍ਵਾ ਅਞ੍ਞਮਞ੍ਞਂ ਸਂਸਨ੍ਦਿਤ੍ਵਾ ਪੁਬ੍ਬਾਪਰਂ ਤੁਲਯਿਤ੍ਵਾ ਭਗਵਤੋ ਅਧਿਪ੍ਪਾਯੋ ਈਦਿਸੋ ਗਨ੍ਥਕਾਰਾਨਂ ਅਧਿਪ੍ਪਾਯੋ ਈਦਿਸੋਤਿ ਪਸ੍ਸਿਤ੍ਵਾ ਅਮ੍ਹਾਕਂ ਰਾਮਞ੍ਞਰਟ੍ਠੇ ਬਦ੍ਧਨਦੀਸਮੁਦ੍ਦਜਾਤੇਸ੍ਸਰਾਦਯੋ ਸੀਮਾਯੋ ਬਹੁਕਾਪਿ ਸਮਾਨਾ ਅਯਂ ਪਰਿਸੁਦ੍ਧਾਤਿ ਵਵਤ੍ਥਪੇਤੁਂ ਦੁਕ੍ਕਰਂ, ਏਵਂ ਸਤਿ ਸੀਮਪਰਿਸਾਪਰਿਸੁਦ੍ਧਾ ਭਵਿਤੁਂ ਦੁਕ੍ਕਰਾਤਿ ਪਟਿਭਾਤਿ.

ਤਤੋ ਪਚ੍ਛਾ ਰਾਮਞ੍ਞਰਟ੍ਠੇ ਤਿਪਿਟਕਧਰਬ੍ਯਤ੍ਤਪ੍ਪਟਿਬਲਤ੍ਥੇਰੇਹਿ ਮਨ੍ਤੇਤ੍ਵਾ ਰਞ੍ਞੋ ਪਟਿਭਾਨਾਨੁਰੂਪਂ ਸੀਮਪਰਿਸਾ ਪਰਿਸੁਦ੍ਧਾ ਭਵਿਤੁਂ ਦੁਕ੍ਕਰਾਤਿ ਥੇਰਾ ਵਿਨਿਚ੍ਛਨਿਂਸੁ.

ਅਥ ਰਾਜਾ ਏਵਮ੍ਪਿ ਚਿਨ੍ਤੇਸਿ,– ਅਹੋਵਤ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨਂ ਪਞ੍ਚਵਸ੍ਸਸਹਸ੍ਸਾਨਿ ਪਤਿਟ੍ਠਤਿਸ੍ਸਤੀਤਿ ਗਨ੍ਥੇਸੁ ਵੁਤ੍ਤੋਪਿ ਸਮਾਨੋ ਅਭਿਸਮ੍ਬੁਦ੍ਧਤੋ ਚਤੁਸਟ੍ਠਾਧਿਕਦ੍ਵਿਸਹਸ੍ਸਮਤ੍ਤੇਨੇਵ ਕਾਲੇਨ ਸਾਸਨੇ ਮਲਂ ਹੁਤ੍ਵਾ ਉਪਸਮ੍ਪਦਕਮ੍ਮੇ ਕਙ੍ਖਾਟ੍ਠਾਨਂ ਤਾਵ ਉਪ੍ਪਜ੍ਜਿ, ਕਥਂ ਪਨ ਪਞ੍ਚਵਸ੍ਸਸਹਸ੍ਸਾਨਿ ਸਾਸਨਸ੍ਸ ਪਤਿਟ੍ਠਾਨਂ ਭਵਿਸ੍ਸਤੀਤਿ. ਏਵਂ ਧਮ੍ਮਸਂਵੇਗਂ ਉਪ੍ਪਾਦੇਤ੍ਵਾ ਪੁਨਾਪਿ ਏਵਂ ਚਿਨ੍ਤੇਸਿ,- ਏਵਂ ਏਤ੍ਤਕਂ ਸਾਸਨੇ ਮਲਂ ਦਿਸ੍ਸਮਾਨੋਪਿ ਸਮਾਨੋ ਉਪਸਮ੍ਪਦਕਮ੍ਮੇ ਕਙ੍ਖਾਟ੍ਠਾਨਂ ਦਿਸ੍ਸਮਾਨੋਪਿ ਸਮਾਨੋ ਪਰਿਸੁਦ੍ਧਤ੍ਥਾਯ ਅਨਾਰਭਿਤ੍ਵਾ ਮਾਦਿਸੋ ਅਪ੍ਪੋਸ੍ਸੁਕ੍ਕੋ ਮਜ੍ਝਤ੍ਤੋ ਨਿਸੀਦਿਤੁਂ ਅਯੁਤ੍ਤੋ, ਏਵਞ੍ਹਿ ਸਤਿ ਭਗਵਤਿ ਸਦ੍ਧੋ ਪਸਨ੍ਨੋਮ੍ਹੀਤਿ ਵਤ੍ਤਬ੍ਬਤਂ ਅਨਾਪਜ੍ਜੇਯ੍ਯਂ, ਤਸ੍ਮਾ ਸਾਸਨਂ ਨਿਮ੍ਮਲਂ ਕਾਤੁਂ ਆਰਭਿਸ੍ਸਾਮੀਤਿ.

ਕੁਤੋ ਨੁਖੋ ਦਾਨਿ ਸਾਸਨਂ ਆਹਰਿਤ੍ਵਾ ਥਿਰਂ ਪਤਿਟ੍ਠਾ ਪੇਯ੍ਯਨ੍ਤਿ ਆਵਜ੍ਜਨ੍ਤੋ ਏਵਂ ਚਿਨ੍ਤੇਸਿ,- ਭਗਵਤੋ ਕਿਰ ਪਰਿਨਿਬ੍ਬਾਨਤੋ ਛਤ੍ਤਿਂਸਾਧਿਕੇ ਦ੍ਵਿਸਤੇ ਸਮ੍ਪਤ੍ਤੇ ਮਹਾਮੋਗ੍ਗਲਿ ਪੁਤ੍ਤਤਿਸ੍ਸਤ੍ਥੇਰੋ ਮਹਾਮਹਿਨ੍ਦਤ੍ਥੇਰਂ ਪੇਸੇਤ੍ਵਾ ਸੀਹਲ਼ਦੀਪੇ ਸਾਸਨਂ ਪਤਿਟ੍ਠਾਪੇਸਿ, ਤਦਾ ਦੇਵਾਨਂ ਪਿਯਤਿਸ੍ਸਰਾਜਾ ਮਹਾਵਿਹਾਰਂ ਕਾਰਾਪੇਤ੍ਵਾ ਅਦਾਸਿ, ਸਾਸਨਵਰਞ੍ਚ ਏਕਾਸਿਤਾਧਿਕਾਨਿ ਦ੍ਵਿਵਸ੍ਸਸਤਾਨਿ ਵਿਮਲਂ ਹੁਤ੍ਵਾ ਪਤਿਟ੍ਠਹਿ, ਭਿਕ੍ਖੁਸਙ੍ਘੋਪਿ ਮਹਾਵਿਹਾਰ ਵਾਸਿਗਣਵਸੇਨ ਏਕਤੋਵ ਅਟ੍ਠਾਸਿ, ਤਤੋ ਪਚ੍ਛਾ ਅਭਯਗਿਰਿਵਾਸਿਜੇ ਤਵਨਵਾਸਿਵਸੇਨ ਦ੍ਵੇਧਾ ਹੁਤ੍ਵਾ ਭਿਜ੍ਜਿ, ਜਿਨਚਕ੍ਕੇ ਅਟ੍ਠਸਤ੍ਤਸਤਾਧਿਕੇ ਸਹਸ੍ਸੇ ਸਮ੍ਪਤ੍ਤੇ ਸਿਰਿਸਙ੍ਘਬੋਧਿਪਰਕ੍ਕਮਬਾਹੁਮਹਾਰਾਜਾ ਉਦੁਮ੍ਬਰਗਿਰਿਵਾਸਿ ਮਹਾਕਸ੍ਸਪਤ੍ਥੇਰਪ੍ਪਮੁਖਂ ਮਹਾਵਿਹਾਰ ਵਾਸਿਗਣਂ ਅਨੁਗ੍ਗਹੇਤ੍ਵਾ ਯਥਾਵੁਤ੍ਤੇ ਦ੍ਵੇਗਣੇ ਵਿਸੋਧੇਸਿ, ਸਾਸਨਂ ਨਿਮ੍ਮਲਂ ਅਕਾਸਿ, ਤਤੋ ਪਚ੍ਛਾ ਵਿਜਯਬਾਹੁਪਰਕ੍ਕਮਬਾਹੁਰਾਜੂਨਂ ਦ੍ਵਿਨ੍ਨਂ ਕਾਲੇਪਿ ਸਾਸਨਂ ਨਿਮ੍ਮਲਂ ਹੁਤ੍ਵਾਯੇਵ ਅਟ੍ਠਾਸਿ, ਤੇਨੇਵ ਬ੍ਯਤ੍ਤਪ੍ਪਟਿਬਲਭਿਕ੍ਖੂ ਆਯਾਚਿਤ੍ਵਾ ਸੀਹਲ਼ਦੀਪਂ ਗਨ੍ਤ੍ਵਾ ਪੁਨ ਸਿਕ੍ਖਂ ਗਣ੍ਹਾ ਪੇਸ੍ਸਾਮਿ, ਤੇਸਂ ਪਨ ਪਰਮ੍ਪਰਵਸੇਨ ਪਵਤ੍ਤਾਨਂ ਭਿਕ੍ਖੂਨਂ ਵਸੇਨ ਅਮ੍ਹਾਕਂ ਰਾਮਞ੍ਞਰਟ੍ਠੇ ਸਾਸਨਂ ਨਿਮ੍ਮਲਂ ਹੁਤ੍ਵਾ ਪਤਿਟ੍ਠਹਿਸ੍ਸਤੀਤਿ. ਏਵਂ ਪਨ ਚਿਨ੍ਤੇਤ੍ਵਾ ਮੋਗ੍ਗਲਾਨਤ੍ਥੇਰਂ ਸੋਮਤ੍ਥੇਰਞ੍ਚ ਸੀਹਲ਼ਦੀਪਂ ਗਮਨਤ੍ਥਾਯ ਯਾਚਿ. ਥੇਰਾਚ ਸਾਸਨਪ੍ਪਟਿਯਤ੍ਤਕਮ੍ਮਮਿਦਨ੍ਤਿ ਮਨਸਿਕਰਿਤ੍ਵਾ ਪਟਿਞ੍ਞਂ ਅਕਂਸੁ.

ਰਾਜਾ ਚ ਦਾਠਾਧਾਤੁਪੂਜਨਤ੍ਥਾਯ ਭਿਕ੍ਖੁਸਙ੍ਘਸ੍ਸ ਪੂਜਨਤ੍ਥਾਯ ਭੂਵਨੇਕਬਾਹੁਰਞ੍ਞੋ ਪਣ੍ਣਾਕਾਰਤ੍ਥਾਯ ਦੇਯ੍ਯਧਮ੍ਮਪਣ੍ਣਾਕਾਰਵਤ੍ਥੂਨਿ ਪਟਿਯਾਦੇਤ੍ਵਾ ਚਿਤ੍ਰਦੂਤਂ ਰਾਮਦੂਤਨ੍ਤਿ ਇਮੇ ਦ੍ਵੇ ਅਮਚ੍ਚੇ ਦ੍ਵੀਸੁ ਨਾਵਾਸੁ ਨਾਯਕਟ੍ਠਾਨੇ ਠਪੇਤ੍ਵਾ ਕਲਿਯੁਗੇ ਸਤ੍ਤਤਿਂਸਾਧਿਕੇ ਅਟ੍ਠਵਸ੍ਸਸਤੇ ਸਮ੍ਪਤ੍ਤੇ ਮਾਘਮਾਸਸ੍ਸ ਪੁਣ੍ਣਮਿਤੋ ਏਕਾਦਸਮਿਯਂ ਸੂਰਵਾਰੇ ਚਿਤ੍ਰਦੂਤਂ ਸਦ੍ਧਿਂ ਮੋਗ੍ਗਲਾਨਤ੍ਥੇਰਪ੍ਪਮੁਖੇਹਿ ਭਿਕ੍ਖੂਹਿ ਏਕਾਯ ਨਾਵਾਯ ਗਮਾਪੇਸਿ. ਫਗ੍ਗੁਣਮਾਸਸ੍ਸ ਅਟ੍ਠਮਿਯਂ ਸੀਹਲ਼ਦੀਪੇ ਕਲਮ੍ਬੁਤਿਤ੍ਥਂ ਪਾਯਾਸਿ.

ਰਾਮਦੂਤਂ ਪਨ ਤਸ੍ਮਿਂਯੇਵ ਵਸ੍ਸੇ ਮਾਘਮਾਸਸ੍ਸ ਪੁਣ੍ਣਮਿਤੋ ਦ੍ਵਾਦਸਮਿਯਂ ਚਨ੍ਦਵਾਰੇ ਸਦ੍ਧਿਂ ਸੋਮਤ੍ਥੇਰਪ੍ਪਮੁਖੇਹਿ ਭਿਕ੍ਖੂਹਿ ਏਕਾਯ ਨਾਵਾਯ ਗਮਾਪੇਸਿ. ਉਜੁਕਂ ਪਨ ਵਾਤਂ ਅਲਭਿਤ੍ਵਾ ਚਿਤ੍ਰਮਾਸਸ੍ਸ ਜੁਣ੍ਹਪਕ੍ਖਨਵਮਿਯਂ ਸੀਹਲ਼ਦੀਪੇ ਵਲ੍ਲਿਗਾਮਂ ਪਾਯਾਸਿ.

ਤਤੋ ਪਚ੍ਛਾ ਤੇਪਿ ਦ੍ਵੇ ਅਮਚ੍ਚਾ ਦ੍ਵੀਸੁ ਨਾਵਾਸੁ ਆਭਤਾਨਿ ਦਾਤਬ੍ਬਪਣ੍ਣਾਕਾਰਵਤ੍ਥੂਨਿ ਸਨ੍ਦੇਸਪਣ੍ਣਾਨਿ ਚ ਭੂਵਨੇਕਬਾਹੁਰਞ੍ਞੋ ਭਿਕ੍ਖੂਸਙ੍ਘਸ੍ਸ ਚ ਅਦਾਸਿ. ਰਞ੍ਞਾ ਪੇਸਿਤਭਿਕ੍ਖੂਨਞ੍ਚ ਸਨ੍ਦੇਸਪਣ੍ਣੇ ਕਥਿਤਨਿਯਾਮੇਨੇਵ ਕਲ੍ਯਾਣਿਯਂ ਨਾਮ ਨਦਿਯਂ ਉਦਕੁਕ੍ਖੇਪਸੀਮਾਯਂ ਸਾਮਣੇਰਭੂਮਿਯਂ ਪਤਿਟ੍ਠਾਪੇਤ੍ਵਾ ਪੁਨ ਉਪਸਮ੍ਪਦਕਮ੍ਮਂ ਅਕਂਸੁ.

ਉਪਸਮ੍ਪਜ੍ਜਿਤ੍ਵਾ ਚ ਭੂਵਨੇਕਬਾਹੁਰਾਜਾ ਨਾਨਾਪ੍ਪਕਾਰੇ ਭਿਕ੍ਖੂਨਂ ਸਾਰੁਪ੍ਪੇ ਪਰਿਕ੍ਖਾਰੇ ਦਤ੍ਵਾ ਇਦਂ ਪਨ ਆਮਿਸਦਾਨਂ ਯਾਵ ਜੀਵਿਤਪਰਿਯੋਸਾਨਾਯੇਵ ਪਰਿਭੁਞ੍ਜਿਤਬ੍ਬਂ ਭਵਿਸ੍ਸਤਿ, ਨਾਮਲਞ੍ਛਂ ਪਨ ਨ ਜੀਰਿਸ੍ਸਤੀਤਿ ਕਤ੍ਵਾ ਰਾਮਦੂਤਸ੍ਸ ਨਾਵਾਯ ਪਖਾਨਭੂਤਸ੍ਸ ਸੋਮਤ੍ਥੇਰਸ੍ਸ ਸਿਰਿਸਙ੍ਘਬੋਧਿਸਾਮੀਤਿ ਨਾਮਂ ਅਦਾਸਿ. ਅਵਸੇਸਾਨਂ ਪਨ ਦਸਨ੍ਨਂ ਥੇਰਾਨਂ ਕਿਤ੍ਤਿਸਿਰਿਮੇਘਸਾਮਿ ਪਰਕ੍ਕਮਬਾਹੁਸਾਮਿ ਬੁਦ੍ਧਘੋਸਸਾਮਿ ਸੀਹਲ਼ਦੀਪਵਿਸੁਦ੍ਧਸਾਮਿ ਗੁਣਰਤਨਧਰਸਾਮੀ ਜਿਨਾਲਙ੍ਕਾਰਸਾਮਿ ਰਤਨਮਾਲਿਸਾਮਿ ਸਦ੍ਧਮ੍ਮਤੇਜਸਾਮਿ ਧਮ੍ਮਰਾਮਸਾਮਿ ਭੂਵਨੇਕਬਾਹੁਸਾਮੀਤਿ ਨਾਮਾਨਿ ਅਦਾਸਿ.

ਚਿਤ੍ਰਦੂਤਸ੍ਸ ਨਾਵਾਯ ਪਖਾਨਭੂਤਸ੍ਸ ਮੋਗ੍ਗਲਾਨਤ੍ਥੇਰਸ੍ਸ ਧਮ੍ਮਕਿਤ੍ਤਿਲੋਕਗਰੁਸਾਮੀਤਿ ਨਾਮਂ ਅਦਾਸਿ. ਅਵਸੇਸਾਨਂ ਪਨ ਸਿਰਿਵਨਰਤਨਸਾਮਿ ਮਙ੍ਗਲਤ੍ਥੇਰਸ੍ਸਾਮਿ ਕਲ੍ਯਾਣਤਿਸ੍ਸਸ੍ਸਾਮਿ ਚਨ੍ਦਗਿਰਿਸਾਮਿ ਸਿਰਿਦਨ੍ਤਧਾਤੁਸਾਮਿ ਵਨਵਾਸਿਤਿਸ੍ਸਸਾਮਿ ਰਤਨਲਙ੍ਕਾਰਸਾਮਿ ਮਹਾਦੇਵਸਾਮਿ ਉਦੁਮ੍ਬਰਗਿਰਿਸਾਮਿ ਚੂਲ਼ਾਭਯਤਿਸ੍ਸਸਾਮੀਤਿ ਨਾਮਾਨਿ ਅਦਾਸਿ. ਬਾਵੀਸਤਿਯਾ ਪਨ ਪਚ੍ਛਾ ਸਮਣਾਨਂ ਨਾਮਂ ਨ ਅਦਾਸਿ. ਅਭਿਨਵਸਿਕ੍ਖਂ ਪਨ ਸਬ੍ਬੇਸਂਯੇਵ ਅਦਾਸਿ.

ਤਤੋ ਪਚ੍ਛਾ ਚੇਤਿਯਪੂਜਨਾਦੀਨਿ ਕਤ੍ਵਾ ਤਂਤਂਕਿਚ੍ਚਂ ਨਿਪ੍ਫਾਦੇਤ੍ਵਾ ਪੁਨ ਆਗਮਂਸੁ. ਭੂਵਨੇਕਬਾਹੁਰਾਜਾ ਚਿਤ੍ਰਦੂਤਂ ਏਵਮਾਹ, ਰਾਮਾਧਿਪਤਿਰਞ੍ਞੋ ਪਣ੍ਣਾਕਾਰਂ ਪਟਿਦਾਤੁਂ ਇਚ੍ਛਾਮਿ, ਪਟਿਦੂਤਞ੍ਚ ਪੇਸੇਤੁਂ ਤਾਵ ਤ੍ਵਂ ਆਗਮੇਹੀਤਿ. ਏਵਂ ਪਨ ਵਤ੍ਵਾ ਪਚ੍ਛਾ ਆਗਮਨਕਾਲੇ ਚਣ੍ਡਵਾਤਭਯੇਨ ਮਹਾਸਮੁਦ੍ਦਮਜ੍ਝੇ ਨਾਵਾ ਅਵਗਚ੍ਛਤਿ. ਤੇਨ ਸੀਹਲ਼ਰਞ੍ਞਾ ਪੇਸਿਤਨਾਵਾਯ ਸਬ੍ਬੇ ਸਨ੍ਨਿਪਤਿਤ੍ਵਾ ਆਰੁਹਿਤ੍ਵਾ ਆਗਚ੍ਛਨ੍ਤਾ ਤੀਣਿ ਦਿਵਸਾਨਿ ਅਤਿਕ੍ਕਮਿਤ੍ਵਾ ਪੁਨ ਚਣ੍ਡਵਾਤਭਯੇਨ ਅਗਮ੍ਭੀਰਟ੍ਠਾਨੇ ਸਿਲਾਯ ਘਟ੍ਟੇਤ੍ਵਾ ਲਗ੍ਗਿਤ੍ਵਾ ਗਨ੍ਤੁਂ ਅਸਕ੍ਕੁਣਿਤ੍ਵਾ ਏਕਂ ਉਲ਼ੁਮ੍ਪਂ ਬਨ੍ਧਿਤ੍ਵਾ ਜਙ੍ਘੇਨੇਵ ਅਗਮਂਸੁ. ਸੀਹਲ਼ਰਞ੍ਞੋ ਚ ਦੂਤੋ ਪਣ੍ਣਾਕਾਰਂ ਦਤ੍ਵਾ ਪਚ੍ਚਾਗਮਾਸਿ. ਭਿਕ੍ਖੂਸੁ ਚ ਭਿਕ੍ਖੂ ਅਨ੍ਤਰਾਮਗ੍ਗੇਯੇਵ ਮਚ੍ਚੁ ਆਦਾਯ ਗਚ੍ਛਤਿ. ਅਹੋ ਅਨਿਚ੍ਚਾ ਵਤ ਸਙ੍ਖਾਰਾਤਿ. ਹੋਨ੍ਤਿ ਚੇਤ੍ਥ,–

ਇਮੇਸਂ ਪਨ ਆਰਦ੍ਧਂ, ਨ ਕਿਚ੍ਚਂ ਯਾਵ ਨਿਟ੍ਠਿਤਂ;

ਨ ਤਾਵ ਆਦਿਯਿਸ੍ਸਨ੍ਤਿ, ਮਚ੍ਚੁ ਨਤ੍ਥਿ ਆਪੇਕ੍ਖਨਾ.

ਨਿਕ੍ਕਾਰੁਣਿਕੋ ਹਿ ਏਸ, ਬਲਕ੍ਕਾਰੇਨ ਆਦਿਯ;

ਰੋਦਮਾਨਂਵ ਞਾਤੀਨਂ ਅਨਿਚ੍ਛਨ੍ਤਂਵ ਗਚ੍ਛਤੀਤਿ.

ਰਾਮਾਧਿਪਤਿਰਾਜਾਚ ਤੇਸਂ ਭਿਕ੍ਖੂਨਂ ਪਤ੍ਤਕਾਲੇ ਹਂਸਾਵਤੀਨਗਰਸ੍ਸ ਪਚ੍ਛਿਮਸ੍ਮਿਂ ਦਿਸਾਭਾਗੇ ਨਰਸੂਰੇਨ ਨਾਮ ਅਮਚ੍ਚੇਨ ਪਰਿਭੁਤ੍ਤੇ ਗਾਮਖੇਤ੍ਤੇ ਪਾਲ਼ਿਅਟ੍ਠਕਥਾਲ਼ੀਕਾਦਯੋ ਪੁਨਪ੍ਪੁਨਂ ਪਸ੍ਸਿਤ੍ਵਾ ਉਪਪਰਿਕ੍ਖਿਤ੍ਵਾ ਸੀਮਸਮੂਹਨਸੀਮਸਮ੍ਮੁਤਿਕਮ੍ਮਾਨਿ ਕਾਰਪੇਸਿ. ਸੀਹਲ਼ਦੀਪੇ ਭਗਵਤਾ ਨ੍ਹਾਯਿਤਪੁਬ੍ਬਾਯ ਕਲ੍ਯਾਣਿਯਾ ਨਾਮ ਨਦਿਯਂ ਉਦਕੁਕ੍ਖੇਪਸੀਮਂ ਕਤ੍ਵਾ ਤਤ੍ਥ ਮਹਾਵਿਹਾਰਵਾਸੀਨਂ ਭਿਕ੍ਖੂਨਂ ਸਨ੍ਤਿਕੇ ਉਪਲਦ੍ਧਉਪਸਮ੍ਪਦਭਾਵੇਹਿ ਭਿਕ੍ਖੂਹਿ ਕਤਤ੍ਤਾ ਕਲ੍ਯਾਣੀਸੀਮਾਤਿ ਸਮਞ੍ਞਂ ਅਕਾਸਿ. ਇਚ੍ਚੇਵਂ ਰਾਮਾਧਿਪਤਿਰਾਜਾ ਪਤ੍ਤਲਙ੍ਕੇ ਭਿਕ੍ਖੂ ਨਿਸ੍ਸਾਯ ਸਾਸਨਂ ਸੁਟ੍ਠੁ ਪਤਿਟ੍ਠਿਤਂ ਅਕਾਸਿ. ਕਲਿਯੁਗਸ੍ਸ ਅਟ੍ਠਤਿਂਸਾਧਿਕਅਟ੍ਠਵਸ੍ਸਸਤਕਾਲਤੋ ਯਾਵ ਏਕਚਤ੍ਤਾਲੀਸਾਧਿਕਅਟ੍ਠਵਸ੍ਸਸਤਾ ਤੇਸਂ ਭਿਕ੍ਖੂਨਂ ਵਂਸੇ ਅਸੀਤਿਮਤ੍ਤਾ ਗਣਪਾਮੋਕ੍ਖਤ੍ਥੇਰਾ ਅਹੇਸੁਂ. ਤੇਸਂ ਸਿਸ੍ਸਜਾਤਾਨਿ ਪਨ ਛਬ੍ਬਿਸਾਧਿਕਾਨਿ ਦ੍ਵਿਸਤਾਨਿ ਚਤੁਸਹਸ੍ਸਾਨਿ ਦਸਸਹਸ੍ਸਾਨਿ ਅਹੇਸੁਂ. ਏਵਂ ਭਗਵਤੋ ਸਾਸਨਂ ਰਾਮਞ੍ਞਰਟ੍ਠੇ ਵੁਡ੍ਢਿਂ ਰਾਮਞ੍ਞਰਟ੍ਠੇ ਵੁਡ੍ਢਿਂ ਵਿਰੂਲ਼ਿਂ ਵੇਪੁਲ੍ਲਮਾਪਜ੍ਜਿਤਿ.

ਇਦਂ ਰਾਮਞ੍ਞਰਟ੍ਠੇ ਸਤ੍ਤਮਂ ਸਾਸਨਸ੍ਸ ਪਤਿਟ੍ਠਾਨਂ.

ਯਦਾ ਪਨ ਅਰਿਮਦ੍ਦਨਨਗਰੇ ਅਨੁਰੁਦ੍ਧੋ ਨਾਮ ਰਾਜਾ ਸੁਧਮ੍ਮਪੁਰਂ ਸਰਾਜਿਕਂ ਅਭਿਭਵਿਤ੍ਵਾ ਵਿਦ੍ਧਂਸਿ, ਤਦਾ ਰਾਮਞ੍ਞਰਟ੍ਠਂ ਰਾਜਸੁਞ੍ਞਂ ਹੁਤ੍ਵਾ ਪਤਿਟ੍ਠਹਿ. ਰਾਮਞ੍ਞਰਟ੍ਠੇ ਮੁਤ੍ਤਿਮਨਗਰੇ ਸੋਣੁਤ੍ਤਰਵਂਸੋ ਏਕੋ ਗਣੋ, ਸਿਵਲਿਵਂਸੋ ਏਕੋ, ਤਾਮਲਿਨ੍ਦਵਂਸੋ ਏਕੋ, ਆਨਨ੍ਦਵਂਸੋ ਏਕੋ, ਬੁਦ੍ਧਵਂਸੋ ਏਕੋ, ਮਹਾਨਾਗਵਂਸੋ ਏਕੋਤਿ ਛਗ੍ਗਣਾ ਵਿਸੁਂ ਵਿਸੁਂ ਹੁਤ੍ਵਾ ਅਟ੍ਠਂਸੁ ਨਾਨਾਸਂਵਾਸਕਾ ਨਾਨਾਨਿਕਾਯਾ.

ਧਮ੍ਮਚੇਤਿਯਰਞ੍ਞਾ ਪਨ ਕਾਰਾਪਿਤਸਾਸਨਮ੍ਪਿ ਅਭਿਜ੍ਜਮਾਨਂ ਹੁਤ੍ਵਾ ਅਟ੍ਠਾਸਿ. ਸਮਾਨਸਂਵਾਸੋ ਏਕਨਿਕਾਯੋਯੇਵ ਅਹੋਸਿ. ਹਂਸਾਵਤੀਮੁਤ੍ਤਿਮਸੁਵਸੇਨ ਤੀਣਿਪਿ ਰਾਮਞ੍ਞਰਟ੍ਠਾਨਿ ਸੁਨਾਪਰਨ੍ਤ ਸਙ੍ਖਾਤੇਨ ਏਕਾਬਦ੍ਧਾਨਿ ਹੁਤ੍ਵਾ ਤਿਟ੍ਠਨ੍ਤਿ. ਪੁਬ੍ਬੇਚ ਮਰਮ੍ਮਰਟ੍ਠਿਨ੍ਦਰਾਜੂਨਂ ਆਣਾਪਵਤ੍ਤਨਟ੍ਠਾਨਾਨਿ ਅਹੇਸੁਂ. ਤਸ੍ਮਾ ਮਰਮ੍ਮਰਟ੍ਠਤੋ ਏਕਚ੍ਚੇ ਭਿਕ੍ਖੂ ਰਾਮਞ੍ਞਰਟ੍ਠਂ ਗਨ੍ਤ੍ਵਾ ਕਲ੍ਯਾਣੀਸੀਮਾਯਂ ਪੁਨ ਸਿਕ੍ਖਂ ਗਣ੍ਹਿਂਸੁ. ਧਮ੍ਮਚੇਤਿਯਰਞ੍ਞਾਕਾਰਾਵਿਤਸਾਸਨਂ ਸਕਲਂ ਮਰਮ੍ਮਰਟ੍ਠਮ੍ਪਿ ਬ੍ਯਾਪੇਤ੍ਵਾ ਓਗਾਹੇਤ੍ਵਾ ਤਿਟ੍ਠਤਿ.

ਰਾਮਞ੍ਞਰਟ੍ਠੇ ਸੋਣੁਤ੍ਤਰਤ੍ਥੇਰਾਨਂ ਸਾਸਨਂ ਪਤਿਟ੍ਠਾਪਿਤਕਾਲਤੋ ਪਟ੍ਠਾਯ ਯਾਵ ਸੁਧਮ੍ਮਪੁਰੇ ਮਨੋਹਰਿਰਞ੍ਞਾ ਅਰਹਨ੍ਤਾਨਂ ਸਂਵਿਜ੍ਜਮਾਨਤਾ ਵੇਦਿਤਬ੍ਬਾ. ਤਤੋ ਪਚ੍ਛਾ ਪਨ ਉਤ੍ਤਰਾ ਜੀਵਾਰਿਯਾਵਂਸਮਹਾਕਾਲ਼ਪ੍ਰਾਨਦਸ੍ਸਿਤ੍ਥੇਰਾਨਂ ਕਾਲੇ ਲੋਕਿਯਜ੍ਝਾਨਾਭਿਞ੍ਞਾਲਾਭਿਯੋਯੇਵ ਸਂਵਿਜ੍ਜਂਸੂਤਿ. ਅਧੁਨਾ ਪਨ ਤੀਸੁਪਿ ਰਾਮਞ੍ਞਰਟ੍ਠੇਸੁ ਧਮ੍ਮਚੇਤਿਯਰਞ੍ਞਾ ਕਾਰਾਵਿਤਸਾਸਨਂਯੇਵ ਤਿਟ੍ਠਤਿ. ਏਤ੍ਥਚ ਹੇਤੁਫਲਸਮ੍ਬਨ੍ਧਵਸੇਨ ਆਦਿਅਨ੍ਤਵਸੇਨੇ ਚ ਸਾਸਨਵਂਸਂ ਪਞ੍ਞਾਯ ਤੁਲਯਿਤ੍ਵਾ ਆਦਿਤੋਵ ਦਸ੍ਸਿਤੇਹਿ ਤੀਹਿ ਨਯੇਹਿ ਯਥਾਪਵੇਣੀ ਘਟ੍ਟਿਯਤਿ, ਤਥਾ ਗਣ੍ਹੇਯ੍ਯਾਤਿ. ਅਯਞ੍ਚ ਸਾਸਨਵਂਸੋ ਲਜ੍ਜਿਪੇਸਲਸਿਕ੍ਖਾਕਾਮਾਨਂਯੇਵ ਵਸੇਨ ਵੁਤ੍ਤੋ, ਨਾਲਜ੍ਜੀਨਂ ਵਸੇਨਾਤਿ ਦਟ੍ਠਬ੍ਬੋ.

ਤਾਯ ਚ ਥੇਰਪਰਮ੍ਪਰਾਯ ਮੁਤ੍ਤਿਮਨਗਰਵਾਸਿਮੇਧਙ੍ਕਰਤ੍ਥੇਰੋ ਲੋਕਦੀਪਕਸਾਰਂ ਨਾਮ ਗਨ੍ਥਂ ਅਕਾਸਿ. ਹਂਸਾਵਤੀਨਗਰਵਾਸੀ ਪਨ ਆਨਨ੍ਦਤ੍ਥੇਰੋ ਮਧੁਸਾਰਤ੍ਥਦੀਪਨਿਂ ਨਾਮ ਅਭਿਧਮ੍ਮਟੀਕਾਯ ਸਂਵਣ੍ਣਨਂ, ਹਂਸਾਵਤੀਨਗਰਵਾਸੀਯੇਵ ਧਮ੍ਮਬੁਦ੍ਧਤ੍ਥੇਰੋ ਕਵਿਸ੍ਸਾਰਂ ਨਾਮ ਛਨ੍ਦੋਵਣ੍ਣਨਂ, ਹਂਸਾਵਤੀਨਗਰਵਾਸੀਯੇਵ ਸਦ੍ਧਮ੍ਮਾਲਙ੍ਕਾਰਤ੍ਥੇਰੋ ਪਟ੍ਠਾਨਸਾਰਦੀਪਨਿਂ ਨਾਮ ਪਕਰਣਂ, ਤਥੇਵ ਅਞ੍ਞਤਰੋ ਥੇਰੋ ਅਫੇਗ੍ਗੁਸਾਰਂ ਨਾਮ ਗਨ੍ਥਂ ਅਕਾਸਿ. ਏਵਂ ਅਨੇਕਪ੍ਪਕਾਰਾਨਂ ਗਨ੍ਥਕਾਰਾਨਂ ਮਹਾਥੇਰਾਨਂ ਵਸਨਟ੍ਠਾਨਂ ਹੁਤ੍ਵਾ ਸਾਸਨਂ ਓਗਾਹੇਤ੍ਵਾ ਵਿਰੂਲ਼ਟ੍ਠਾਨਂਅਹੋਸੀਤਿ.

ਇਤਿ ਸਾਸਨਵਂਸੇ ਸੁਵਣ੍ਣਭੂਮਿਸਾਸਨਵਂਸਕਥਾਮਗ੍ਗਾ ਨਾਮ

ਤਤਿਯੋ ਪਰਿਚ੍ਛੇਦੋ.