੩੩. ਕਪਣਾਯ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ
ਭਗਵਤਿ ਪਰਿਨਿਬ੍ਬੁਤੇ ਜਮ੍ਬੁਦੀਪੇ ਤਤ੍ਥ ਤਤ੍ਥ ਭਿਕ੍ਖੁਭਿਕ੍ਖੁਣਿਯੋ ਚ ਉਪਾਸਕਉਪਾਸਿਕਾਯੋ ਚ ਜਯਮਹਾਬੋਧਿਂ ਵਨ੍ਦਿਸ੍ਸਾਮੀਤਿ ਯੇਭੁਯ੍ਯੇਨ ਗਨ੍ਤ੍ਵਾ ਵਨ੍ਦਨ੍ਤਿ. ਅਥਾ ਪਰਭਾਗੇ ਬਹੂ ਭਿਕ੍ਖੂ ਸਙ੍ਗਮ੍ਮ ਮਹਾਬੋਧਿਂ ਵਨ੍ਦਨਤ੍ਥਾਯ ਗਚ੍ਛਨ੍ਤਾ ਅਞ੍ਞਤਰਸ੍ਮਿਂ ਗਾਮਕੇ ਭਿਕ੍ਖਾਯ ਚਰਿਤ੍ਵਾ ਆਸਨਸਾਲਂ ਗਨ੍ਤ੍ਵਾ ਕਤਭਤ੍ਤਕਿਚ੍ਚਾ ਥੋਕਂ ਵਿਸ੍ਸਮਿਂਸੁ, ਤਦਾ ਤਤ੍ਥ ਏਕਾ ਕਪਣਾ ਦੁਗ੍ਗਤਿਤ੍ਥੀ ਤਥਾ ਨਿਸਿਨ੍ਨਭਿਕ੍ਖੂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਏਕਮਨ੍ਤੇ ਠਿਤਾ ਅਯ੍ਯਾ ਕੁਹਿਂ ਗਚ੍ਛਨ੍ਤੀਤਿ ਪੁਚ੍ਛਿ. ਭਿਕ੍ਖੂ ਤਂ ਸੁਤ੍ਵਾ ਜਯਮਹਾਬੋਧਿਸ੍ਸ ਆਨੁਭਾਵਞ੍ਚ ਤਂ ਵਨ੍ਦਨਤ੍ਥਾਯ ਅਤ੍ਤਾਨਂ ਗਮਨਞ੍ਚ ਕਥੇਨ੍ਤਾ ਏਵਮਾਹਂਸੁ.
੧. ਯਤ੍ਥਾਸੀਨੋ ਜਿਨੋ ਜੇਸਿ, ਸਸੇਨਂ ਮਕਰਦ੍ਧਜਂ;
ਹਨ੍ਤ੍ਵਾ ਕਿਲੇਸਸੇਨਞ੍ਚ, ਬੁਦ੍ਧੋ ਆਸਿ ਨਿਰੁਤ੍ਤਰੋ.
੨. ਯਂ ਪੂਜੇਸਿ ਮਹਾਵੀਰੋ, ਠਿਤੋ ਪਦ ਮਕੋਪਯਂ;
ਸਤ੍ਤਰਤ੍ਤਿਨ੍ਦਿਵਂ ਨੇਤ੍ਤ, ਨੀਲਨੀਰਜਰਂਸਿਨਾ.
੩. ਸੁਰਾਸੁਰਨਰਾਦੀਨਂ, ਨੇਤ੍ਤਾਲਿ ਪਾਲ਼ਿਪਾਤਨਾ;
ਮੇਚਕਾਕਾਰਪਤ੍ਤੇਹਿ, ਸਿਖਣ੍ਡੀਵਿਯ ਭਾਤਿ ਯੋ.
੪. ਸੁਰਪਾਦਪੋਵ ਸਤ੍ਤਾਨਂ, ਯਂ ਤਿਟ੍ਠਤਿ ਮਹੀਤਲੇ;
ਇਹ ਲੋਕੇ ਪਰਤ੍ਤੇ ਚ, ਦਦਨ੍ਤੋ ਇਚ੍ਛਿਤਿਚ੍ਛਿਤਂ.
੫. ਯਸ੍ਸ ਪੁਰਾਣਪਣ੍ਣਮ੍ਪਿ, ਪਤਿਤਂ ਯੋ ਨਰੋ ਇਧ;
ਪੂਜੇਤਿ ਤਸ੍ਸ ਸੋ ਦੇਤਿ, ਭਵਭੋਗਂ ਮਹੀਰੁਹੋ.
੬. ਗਨ੍ਧਮਾਲੇਹਿ ਸਲਿਲੇਹਿ, ਯਮੁਪਾਸਤਿ ਸਦਾ ਨਰੋ;
ਅਜ੍ਝਤ੍ਤਞ੍ਚ ਬਹਿਦ੍ਧਾ ਚ, ਦੁਰਿਤਂ ਸੋ ਨਿਹਞ੍ਞਤਿ.
੭. ਯੋ ਦੇਤਿ ਇਹਲੋਕਤ੍ਥਂ,
ਯੋ ਦੇਤਿ ਪਾਰਲੋਕਿਕਂ,
ਸਮ੍ਪਦਂ ਜਯਬੋਧਿਂਤਂ,
ਭੋਤਿ ਗਚ੍ਛਾਮ ਵਨ੍ਦਿਤੁਂ.
ਤਂ ਸੁਤ੍ਵਾ ਉਦਗ੍ਗਾ ਸੋਮਨਸ੍ਸਜਾਤਾ ਭਿਕ੍ਖੂਨਂ ਏਵਮਾਹ. ਅਹਂ ਭਨ੍ਤੇ ਪਰਕੁਲੇ ਭਤਿਯਾ ਕਮ੍ਮਂ ਕਰੋਨ੍ਤੀ ਦੁਕ੍ਖੇਨ ਕਸਿਰੇਨ ਜੀਵਿਕਂ ਕਪ੍ਪੇਮਿ. ਸ੍ਵਾਤਨਾਯ ਮੇ ਤਣ੍ਡੁਲਨਾਲਿਪਿ [ਭਣ੍ਡੁਲਨਾਮ੍ਪ ਇਤਿਸਬ੍ਬਤ੍ਥ] ਨਤ੍ਥਿ, ਪਗੇਵ ਅਞ੍ਞਂ ਧਨਂ, ਇਮਂ ਵਿਨਾ ਅਞ੍ਞਂ ਸਾਟਕਮ੍ਪਿ ਨਤ੍ਥਿ, ਕਸ੍ਮਾ ਪੁਬ੍ਬੇ ਅਕਤਪੁਞ੍ਞਤ੍ਤਾ, ਤਸ੍ਮਾ ਇਮਂ ਭਨ੍ਤੇ ਸਾਟਕਂ ਮਮਾਨੁਗ੍ਗਹਾਯ ਬੋਧਿਮ੍ਹਿ ਧਜਂ ਬਨ੍ਧਥਾਤਿ ਯਾਚਿਤ੍ਵਾ ਸਾਟਕਂ ਧੋਵਿਤ੍ਵਾ ਤੇਸਂ ਅਦਾਸਿ. ਭਿਕ੍ਖੂਪਿ ਤਸ੍ਸਾਨੁਗ੍ਗਹਾਯ ਤਂ ਗਹੇਤ੍ਵਾ ਅਗਮਂਸੁ. ਸਾ ਸਾਟਕਂ ਦਤ੍ਵਾ ਪੀਤਿਪਾਮੋਜ੍ਜਮਾਨਸਾ ਗੇਹਂ ਗਨ੍ਤ੍ਵਾ ਤਦਹੇਵ ਰਤ੍ਤਿਯਾ ਮਜ੍ਝਿਮਯਾਮੇ ਸਤ੍ਥਕਵਾਤੇਨ ਉਪਹਤਾ ਕਾਲਂ ਕਤ੍ਵਾ ਤੇਸਂ ਭਿਕ੍ਖੂਨਂ ਗਮਨਮਗ੍ਗੇ ਏਕਸ੍ਮਿਂ ਰਮਣੀਯੇ ਵਨਸਣ੍ਡੇ ਭੁਮ੍ਮਦੇਵਤਾ ਹੁਤ੍ਵਾ ਨਿਬ੍ਬਤ੍ਤੀ, ਅਥਸ੍ਸਾ ਪੁਞ੍ਞਾਨੁਭਾਵੇਨ ਤਿਯੋਜਨਿਕੇ ਠਾਨੇ ਦਿਬ੍ਬਕਪ੍ਪਰੁਕ੍ਖਾ ਪਾਤੁਰਹਂਸੁ, ਤਤ੍ਤ ਤਤ੍ਤ ਨਾਨਾਵਿਰਾਗਧਜਪਤਾਕਾ ਓਲਮ੍ਬਨ੍ਤਿ. ਦੇਵਪੁਤ੍ਤਾ ਚ ਦੇਵਧੀਤਰੋ ਚ ਸਬ੍ਬਾਭਰਣਵਿਭੂਸਿਤਾ ਤਥੇਵ ਧਜਪਤਾਕਾਦਯੋ ਗਹੇਤ੍ਵਾ ਕੀਲ਼ਨ੍ਤਿ. ਨਚ੍ਚਗੀਤਾਦਿਨੇਕਾਨਿ ਅਚ੍ਛਰਿਯਾਨਿ ਪਯੋਜੇਨ੍ਤਿ. ਅਥ ਦੁਤਿਯਦਿਵਸੇ ਤੇਪਿ ਭਿਕ੍ਖੂ ਬੋਧਿਮਣ੍ਡਲਂ ਗਚ੍ਛਨ੍ਤਾ ਸਾਯਣ੍ਹੇ ਤਂ ਠਾਨਂ ਪਤ੍ਵਾ ਅਜ੍ਜ ਇਮਸ੍ਮਿਂ ਵਨਸਣ੍ਡੇ ਵਸਿਤ੍ਵਾ ਗਮਿਸ੍ਸਾਮਾਤਿ ਤਤ੍ਥ ਵਾਸਂ ਉਪਗਮਿਂਸੁ, ਤਤੋ ਤੇ ਰਤ੍ਤਿਭਾਗੇ ਨਾਨਾਵਣ੍ਣਧਜੇ ਚ ਦੇਵਤਾਹਿ ਪਯੋਜਿਯਮਾਨਾ ਗੀਤਵਾਦਿਤਾਦਯੋ ਚ ਤਿਯੋਜਨਟ੍ਠਾਨੇ ਕਪ੍ਪਰੁਕ੍ਖਾਨਿ ਚ ਇਦਂ ਸਬ੍ਬਂ ਦੇਵਿਸ੍ਸਰਿਯਂ ਤਸ੍ਸਾਨੁਭਾਵੇਨ ਨਿਬ੍ਬਤ੍ਤਭਾਵਂ ਦਿਸ੍ਵਾ ਵਿਮ੍ਹਿਤਮਾਨਸਾ ਦੇਵਧੀਤਰਂ ਆਮਨ੍ਤੇਤ੍ਵਾ ਤ੍ਵਂ ਕੇਨ ਕਮ੍ਮੇਨ ਇਧ ਨਿਬ੍ਬਤ੍ਤਾਤਿ ਪੁਚ੍ਛਿਂਸੁ. ਸਾ ਭਿਕ੍ਖੂ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਠਿਤਾ ਭਨ੍ਤੇ ਮਂ ਨ ਸਞ੍ਜਾਨਿਤ੍ਥਾਤਿ ਆਹ. ਭਿਕ੍ਖੂਹਿ ਨ ਮਯਂ ਸਞ੍ਜਾਨਾਮ ਭਗਿਨੀਤਿ ਵੁਤ੍ਤੇ ਸਾ ਅਤ੍ਤਨੋ ਸਭਾਵਂ ਕਥੇਨ੍ਤੀ ਏਵਮਾਹ.
੮. ਹੀਯ੍ਯੋ ਆਸਨਸਾਲਾਯ, ਨਿਸੀਦਿਤ੍ਥ ਸਮਾਗਤਾ;
ਤੁਮ੍ਹਕਂ ਸਨ੍ਤਿਕਂ ਗਮ੍ਮ, ਯਾ ਵਰਾਕੀਭਿਵਾਦਯਿ.
੯. ਯਾ ਬੋਧਿਂ ਪੂਜਨਤ੍ਥਾਯ, ਵਤ੍ਥਕਂ ਪਟਿਪਾਦਯਿ;
ਸਾਹਂ ਹੀਯ੍ਯੋ ਚੁਤਾ ਆਸਿਂ, ਰਤ੍ਤਿਯਂ ਬ੍ਯਾਧਿਪੀਲ਼ਿਤਾ.
੧੦. ਨਾਨਾਸਮ੍ਪਤ੍ਤਿਸਂਯੁਤ੍ਤਾ, ਨਾਨਾਭੂਸਨਭੂਸਿਤਾ;
ਵਿਮਾਨੇ ਰਤਨਾ ਕਿਣ੍ਣੇ, ਜਾਤਾਹਂ ਏਤ੍ਥ ਕਾਨਨੇ.
੧੧. ਹੀਯ੍ਯੋ ਪਸ੍ਸਿਤ੍ਥ ਮੇ ਗਤ੍ਤਂ, ਰਜੋਜਲ੍ਲੇਹਿ ਸਂਕੁਲਂ;
ਅਜ੍ਜ ਪਸ੍ਸਥ ਮੇ ਗਤ੍ਤਂ, ਵਣ੍ਣਵਨ੍ਤਂ ਪਭਸ੍ਸਰਂ.
੧੨. ਹੀਯ੍ਯੋ ਪਸ੍ਸਿਤ੍ਥ ਮੇ ਭਨ੍ਤੇ, ਨਿਵਤ੍ਥਂ ਮਲਿਨਮ੍ਬਰਂ;
ਅਜ੍ਜ ਪਸ੍ਸਥ ਮੇ ਭਨ੍ਤੇ, ਦਿਬ੍ਬਮਮ੍ਬਰਮੁਤ੍ਤਮਂ.
੧੩. ਵਿਕਿਣ੍ਣਫਲਿਤਗ੍ਗੇਹਿ, ਕੇਸੇਹਿ ਵਿਰਲਾ ਕੁਲਂ;
ਊਕਾਗੂਥਪਟਿਕ੍ਕੂਲਂ, ਹੀਯ੍ਯੋ ਆਸਿਸਿਰਂ ਮਮ.
੧੪. ਅਜ੍ਜ ਤਂ ਪਰਿਵਤ੍ਤਿਤ੍ਵਾ, ਮਮ ਪੁਞ੍ਞਾਨੁਭਾਵਤੋ;
ਸੁਨੀਲਮੁਦੁਧਮ੍ਮਿਲ੍ਲਂ, ਕੁਸੁਮਾ ਭਰਣਭੂਸਿਤਂ.
੧੫. ਪੁਰਾ ਮੇ ਸਕਸੀਸੇਨ, ਵਹਿਤਂ ਦਾਰੂ ਦਕਾਦਿਕਂ;
ਪੁਞ੍ਞੇਨਾਹਂ ਅਜ੍ਜ ਮਾਲਾ, ਭਾਰਂ ਸੀਸੇ ਸਮੁਬ੍ਬਹੇ.
੧੬. ਧਜਤ੍ਥਾਯ ਮਯਾ ਹੀਯ੍ਯੋ, ਪਦਿਨ੍ਨਂ ਥੂਲਸਾਟਕਂ;
ਅਜ੍ਜ ਨਿਬ੍ਬਤ੍ਤਿ ਮੇ ਭੋਨ੍ਤੋ, ਮਹਨ੍ਤਂ ਦਿਬ੍ਬਸਮ੍ਪਦਂ.
੧੭. ਜਾਨਮਾਨੇਨ ਕਤ੍ਤਬ੍ਬਂ, ਦਾਨਾਦੀਸੁ ਮਹਪ੍ਫਲਂ;
ਦੇਵਲੋਕੇ ਮਨੁਸ੍ਸੇਸੁ, ਸੁਖਦਂ ਦਾਨ ਮੁਤ੍ਤਮਨ੍ਤਿ.
ਤਂ ਸੁਤ੍ਵਾ ਸਬ੍ਬੇ ਭਿਕ੍ਖੂ ਅਚ੍ਛਰਿਯਬ੍ਭੁਤਚਿਤ੍ਤਾ ਅਹੇਸੁਂ. ਸਾ ਦੇਵਤਾ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਭਿਕ੍ਖੂ ਨਿਮਨ੍ਤੇਤ੍ਵਾ ਦਿਬ੍ਬੇਹਿ ਖਜ੍ਜਭੋਜ੍ਜੇਹਿ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਤੇਹਿ ਸਦ੍ਧਿਂ ਆਗਚ੍ਛਨ੍ਤੀ ਅਨ੍ਤਰਾਮਗ੍ਗੇ ਦਾਨਂ ਦਦਮਾਨਾ ਮਹਾਬੋਧਿਂ ਗਨ੍ਤ੍ਵਾ ਸਬ੍ਬੇਹਿ ਧਜਪਤਾਕਾ ਦੀਹਿ ਚ ਨਾਨਾਵਿਧਵਣ੍ਣਗਨ੍ਧਸਮ੍ਪਨ੍ਨਪੁਪ੍ਫੇਹਿ ਚ ਦੀਪਧੂਪੇਹਿ ਚ ਬੋਧਿਂ ਪੂਜੇਤ੍ਵਾ ਭਿਕ੍ਖੂਨਂ ਚੀਵਰਤ੍ਥਾਯ ਦਿਬ੍ਬਵਤ੍ਥਾਨਿ ਦਤ੍ਵਾ ਆਗਮ੍ਮ ਤਸ੍ਮਿਂਯੇਵ ਵਨਸਣ੍ਡੇ ਵਸਨ੍ਤੀ ਨਾਨਾਵਿਧਾਨਿ ਪੁਞ੍ਞਾਨਿ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਭਿਕ੍ਖੂਪਿ ਤਂ ਅਚ੍ਛਰਿਯਂ ਤਤ੍ਥ ਤਤ੍ਥ ਪਕਾਸੇਨ੍ਤਾ ਬਹੂਜਨੇ ਪੁਞ੍ਞਕਮ੍ਮੇ ਨਿਯੋਜੇਸੁਂਤਿ.
੧੮. ਏਵਂ ਵਿਧਾਪਿ ਕਪਣਾ ਜਿਨਸਾਸਨਮ੍ਹਿ,
ਕਤ੍ਵਾ ਪਸਾਦ ਮਥ ਥੂਲਕੁਚੇਲਕੇਨ;
ਪੂਜੇਤ੍ਵ ਦਿਬ੍ਬਵਿਭਵਂ ਅਲਭੀਤਿ ਞਤ੍ਵਾ,
ਪੂਜਾਪਰਾ ਭਵਥ ਵਤ੍ਥੁਸੁ ਤੀਸੁ ਸਮ੍ਮਾਤਿ.
ਕਪਣਾਯ ਵਤ੍ਥੁਂ ਤਤਿਯਂ.