੩੧. ਮਹਾਸੇਨਰਞ੍ਞੋ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਭਗਵਤਿ ਪਰਿਨਿਬ੍ਬੁਤੇ ਪਾਟਲਿਪੁਤ੍ਤਨਗਰੇ ਮਹਾਸੇਨੋ ਨਾਮ ਰਾਜਾ ਰਜ੍ਜਂ ਕਾਰੇਸਿ ਧਮ੍ਮਿਕੋ ਧਮ੍ਮਰਾਜਾ. ਸੋ ਪਨ ਪਿਤੁਪਿਤਾਮਹਾਦੀਨਂ ਧਨਰਾਸਿਂ ਓਲੋਕੇਤ੍ਵਾ ਇਮੇ ਇਮਂ ਸਾਪਤੇਯ੍ਯਂ ਪਹਾਯ ਮਚ੍ਚੁਨੋ ਮੁਖਮੁਪਗਤਾ. ਅਹੋ ਸਂਸਾਰਿਕਾਨਂ ਅਞ੍ਞਾਣਤਾ. ਧਨਂ ਠਪੇਤ੍ਵਾ ਅਤ੍ਤਨੋ ਵਿਨਾਸਞ੍ਚ ਅਤ੍ਤਾਨਂ ਠਪੇਤ੍ਵਾ ਧਨਵਿਨਾਸਞ੍ਚ ਨ ਜਾਨਨ੍ਤੀਤਿ ਸਮ੍ਪਤ੍ਤਿਯਾ ਅਧਿਗਮਞ੍ਚ ਵਿਨਾਸਂ ਚਾਤਿ ਸਬ੍ਬਂ ਚਿਨ੍ਤੇਤ੍ਵਾ ਧਮ੍ਮਞ੍ਚ ਸੁਤ੍ਵਾ ਪਟਿਲਦ੍ਧਸਦ੍ਧੋ ਦਿਵਸੇ ਦਿਵਸੇ ਦਸਸਹਸ੍ਸਾਨਂ ਭਿਕ੍ਖੂਨਂ ਮਧੁਰੇਨ ਅਨ੍ਨਪਾਨੇਨ ਸਨ੍ਤਪ੍ਪੇਨ੍ਤੋ ਅਨੇਕਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਏਕਦਿਵਸਂ ਰਹੋ ਪਟਿਸਲ੍ਲਿਨੋ ਏਵਂ ਚਿਨ੍ਤੇਸਿ. ਏਵਂ ਰਾਜਨਿਯੋਗੇਨ ਜਨਸ੍ਸ ਪੀਲ਼ਨਂ ਕਤ੍ਵਾ ਦਿਨ੍ਨਦਾਨਤੋ ਸਹਤ੍ਥੇਨ ਕਮ੍ਮਂ ਕਤ੍ਵਾ ਲਦ੍ਧੇਨ ਦਿਨ੍ਨਦਾਨਂ ਮਹਪ੍ਫਲਂ ਮਹਾਨਿਸਂਸਂ ਭਵਿਸ੍ਸਤਿ, ਏਵਂ ਮਯਾ ਕਾਤਬ੍ਬਨ੍ਤਿ ਸੋ ਸੁਹਦਾ ਮਚ੍ਚਸ੍ਸ ਰਜ੍ਜਂ ਨੀਯ੍ਯਾਤੇਤ੍ਵਾ ਅਤ੍ਤਨੋ ਕਣਿਟ੍ਠਿਕਂ ਆਦਾਯ ਕਿਞ੍ਚਿ ਅਜਾਨਾਪੇਤ੍ਵਾ ਅਞ੍ਞਤਰਵੇਸੇਨ ਨਗਰਾ ਨਿਕ੍ਖਮ੍ਮ ਉਤ੍ਤਰਮਧੁਰਂ ਨਾਮ ਨਗਰਂ ਅਗਮਾਸਿ, ਤਤ੍ਥ ਮਹਾਵਿਭਵੋ ਏਕੋ ਸੇਟ੍ਠਿ ਪਟਿਵਸਤਿ, ਤੇ ਸੇਟ੍ਠਿਨੋ ਸਮੀਪ ਮੁਪਗਮ੍ਮ ਠਿਤਾ. ਤੇਨ ਕਿਮਤ੍ਥਾਯਾਗਤਾਤਿ ਵੁਤ੍ਤੇ ਰਾਜਾ ਤਵ ਗੇਹੇ ਭਤਿਯਾ ਕਮ੍ਮਂ ਕਰਿਸ੍ਸਾਮੀਤਿ ਵਤ੍ਵਾ ਤੇਨਾਨੁਞ੍ਞਾਤੋ ਤੀਣਿ ਵਸ੍ਸਾਨਿ ਕਮ੍ਮ ਮਕਾਸਿ, ਤਤੋ ਏਕਦਿਵਸਂ ਸੇਟ੍ਠਿ ਤੇ ਦਿਸ੍ਵਾ ਪਕ੍ਕੋਸਿਤ੍ਵਾ ਅਤੀਵ ਤੁਮ੍ਹੇ ਸੁਖੁਮਾਲਤਰਾ. ਤਥਾਪਿ ਇਮਸ੍ਮਿਂ ਗੇਹੇ ਕਮ੍ਮਕਰਣੇਨ ਚਿਰਂ ਵਸਿਤ੍ਥ, ਏਤ੍ਤਕਂ ਕਾਲਂ ਕਿਸ੍ਮਿਞ੍ਚਿ ਕਮ੍ਮੇਪਿ ਕੁਸੀਤਤ੍ਤਂ ਨ ਪਞ੍ਞਾਯਤਿ. ਪਗੇਵ ਅਨਾਚਾਰਮ੍ਪਿ, ਯਾਗੁਭਤ੍ਤਂ ਠਪੇਤ੍ਵਾ ਅਞ੍ਞਂ ਉਪਕਾਰਮ੍ਪਿ ਮਮ ਸਨ੍ਤਿਕਾ ਨਤ੍ਥਿ, ਕੇਨਤ੍ਥੇਨ ਕਮ੍ਮਂ ਕਰੋਥਾਤਿ ਪੁਚ੍ਛਿ. ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਇਮਸ੍ਮਿਂ ਜਨਪਦੇ ਸਾਲਿਨੋ ਮਨਾਪਭਾਵੋ ਬਹੁਸੋ ਸੂਯਤਿ. ਤਸ੍ਮਾ ਸਾਲੀਨਮਤ੍ਥਾਯ ਇਧਾ ਗਤਮ੍ਹਾਤਿ ਆਹ, ਤਂ ਸੁਤ੍ਵਾ ਤੇਸਂ ਤੁਟ੍ਠੋ ਸੇਟ੍ਠਿ ਸਾਲੀਨਂ ਸਕਟਸਹਸ੍ਸਂ ਅਦਾਸਿ, ਰਾਜਾ ਸਾਲਿਂਲਭਿਤ੍ਵਾ ਸੇਟ੍ਠਿਨੋ ਏਵਮਾਹ, ਭੋ ਇਮਂ ਅਮ੍ਹਾਕਂ ਨਗਰਂ ਪਾਪੇਥਾਤਿ, ਤਂ ਸੁਤ੍ਵਾ ਸੇਟ੍ਠਿ ਸਾਧੂਤਿ ਵਤ੍ਵਾ ਸਾਲਿਪਰਿਪੁਣ੍ਣਸਕਟਸਹਸ੍ਸਂ ਰਞ੍ਞੋ ਨਗਰਂ ਪਾਪੇਸਿ, ਰਾਜਾ ਨਗਰਂ ਗਨ੍ਤ੍ਵਾ ਸੇਟ੍ਠਿਸ੍ਸ ਨਾਨਾਵਣ੍ਣਵਤ੍ਥਹਿਰਞ੍ਞਸੁਵਣ੍ਣਾਦੀਹਿ ਸਕਟੇ ਪੂਰੇਤ੍ਵਾ ਪਟਿਪੇਸੇਤ੍ਵਾ ਮੇਤ੍ਤਿਂ ਥਿਰਂ ਕਤ੍ਵਾ ਆਭਤਵੀਹਯੋ ਰਾਜਗੇਹੇ ਸਨ੍ਨਿਚਯਮਕਾਸਿ, ਅਥ ਰਾਜਾ ਕਤਿਪਾਹਚ੍ਚਯੇਨ ਮੁਸਲਂ ਪਗ੍ਗਯ੍ਹ ਸਹਤ੍ਥੇਨੇਵ ਵੀਹਿਂ ਕੋਟ੍ਟੇਤਿ, ਕੋਟ੍ਟਿਤਕੋਟ੍ਟਿਤਂ ਕਣਿਟ੍ਠਿਕਾ ਪਪ੍ਫੋਟੇਤਿ. ਏਵਂ ਉਭੋਪਿ ਤਣ੍ਡੁਲਾਨਂ ਮਹਨ੍ਤਂ ਰਾਸਿਂ ਕਤ੍ਵਾ ਦਾਰੂਦਕਾਦਯੋ ਆਹਰਿਤ੍ਵਾ ਅਮ੍ਬਿਲਭਤ੍ਤਂ ਪਚਿਤ੍ਵਾ ਰਾਜਗੇਹੇ ਪਞ੍ਚਸਤਆਸਨਾਨਿ ਪਞ੍ਞਾਪੇਤ੍ਵਾ ਕਾਲਂ ਉਗ੍ਘੋਸੇਸੁਂ, ਆਗਚ੍ਛਨ੍ਤੁ ਅਯ੍ਯਾ ਅਨੁਕਮ੍ਪਂ ਉਪਾਦਾਯ ਮਮ ਗੇਹੇ ਭੁਞ੍ਜਨ੍ਤੂਤਿ. ਤਂ ਸੁਤ੍ਵਾ ਪਞ੍ਚਸਤਾ ਭਿਕ੍ਖੂ ਆਕਾਸੇਨ ਆਗਮਿਂਸੁ, ਰਾਜਾ ਤੇ ਯਾਵਦਤ੍ਥਂ ਪਰਿਵਿਸਿ, ਤਤੋ ਤੇਸਂ ਅਨ੍ਤਰੇ ਪਿਯਂਗੁਦੀਪਵਾਸੀ ਏਕੋ ਮਹਾਸਿਵਤ੍ਥੇਰੋ ਨਾਮ ਭਤ੍ਤਂ ਗਹੇਤ੍ਵਾ ਏਤੇ ਮਂ ਪਸ੍ਸਨ੍ਤੂਤਿ ਅਧਿਟ੍ਠਹਿਤ੍ਵਾ ਆਕਾਸੇਨ ਪਿਯਂਗੁਦੀਪਂ ਗਨ੍ਤ੍ਵਾ ਭਤ੍ਤਂ ਪਞ੍ਚਸਤਾਨਂ ਭਿਕ੍ਖੂਨਂ ਦਤ੍ਵਾ ਪਰਿਭੁਞ੍ਚਿ. ਤਂ ਤਸ੍ਸਾਨੁਭਾਵੇਨ ਸਬ੍ਬੇਸਂ ਯਾਵਦਤ੍ਥਂ ਅਹੋਸਿ. ਏਵਂ ਅਪ੍ਪਕੇਨਾਪਿ ਦੇਯ੍ਯਧਮ੍ਮੇਨ ਸਪ੍ਪੁਰਿਸਾ ਦਾਯਕਾਨਂ ਮਨਂ ਪਸਾਦੇਤ੍ਵਾ ਪਤਿਟ੍ਠਂ ਕਰੋਨ੍ਤੀਤਿ. ਵੁਤ੍ਤਞ੍ਹਿ.

੧. ਅਪ੍ਪਕੇਨਪਿ ਮੇਧਾਵੀ, ਦਾਯਕਾਨਂ ਮਨਂ ਪਤਿ;

ਸਦ੍ਧਂ ਵਡ੍ਢੇਨ੍ਤਿ ਚਨ੍ਦੋਵ, ਰਂਸਿਨਾ ਖੀਰਸਾਗਰਂ.

੨. ਅਟ੍ਠਾਨੇ ਨ ਨਿਯੋਜੇਨ੍ਤਾ, ਕਰੋਨ੍ਤਾ ਨੇਵ ਸਨ੍ਨਿਧਿਂ;

ਪਰਿਭੋਗ ਮਕਤ੍ਵਾਨ, ਨੇਵ ਨਾਸੇਨ੍ਤਿ ਪਚ੍ਚਯਂ.

੩. ਨ ਪਾਪੇਨ੍ਤਾਚ ਥੇਯ੍ਯਸ੍ਸ, ਨ ਕਰੋਨ੍ਤਾ ਤਥੇਵਿਣਂ;

ਵਿਭਜਨ੍ਤਿ ਸੁਸੀਲੇਸੁ, ਸਯਂ ਭੁਤ੍ਵਾਨ ਸੀਲਵਾਤਿ.

ਅਥ ਰਾਜਾ ਕਣਿਟ੍ਠਿਕਾਯ ਸਦ੍ਧਿਂ ਥਤ੍ਥੇਵ ਠਿਤੋ ਪਿਯਂਗੁਦੀਪੇ ਪਰਿਭੁਞ੍ਜਨ੍ਤੇ ਪਞ੍ਚਸਤਭਿਕ੍ਖੂ ਦਿਸ੍ਵਾ ਹਟ੍ਠੋ ਉਦਗ੍ਗੋ ਅਹੋਸਿ. ਅਥ ਤੇ ਅਪਰਭਾਗੇ ਅਤ੍ਤਨਾ ਕਤਂ ਦਾਨਵਰਂ ਅਨੁਸ੍ਸਰਨ੍ਤਾ ਨ ਚਿਰੇਨੇਵ ਉਭੋਪਿ ਸੋਤਾਪਨ੍ਨਾ ਅਹੇਸੁਂਤਿ.

੪. ਨ ਗਣੇਨ੍ਤਾਤ੍ਤਨੋ ਦੁਕ੍ਖਂ, ਵਿਹਾਯ ਮਹਤਿਂ ਸਿਰਿਂ;

ਆਯਤਿਂਭਵਮਿਚ੍ਛਨ੍ਤਾ, ਸੁਜਨੇਵਂ ਸੁਭੇ ਰਤਾ.

੫. ਆਯਾਸੇਨ ਕਤਂ ਪੁਞ੍ਞਂ, ਮਹਨ੍ਤਫਲਦਾਯਕਂ;

ਇਤਿ ਮਨ੍ਤ੍ਵਾਨ ਮੇਧਾਵੀ, ਸਹਤ੍ਥੇਨੇਵ ਤਂ ਕਰੇਤਿ.

ਮਹਾਸੇਨਰਞ੍ਞੋ ਵਤ੍ਥੁਂ ਪਥਮਂ.