੨੮. ਕਪਣਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਮ੍ਹਾਕਂ ਭਗਵਤਿ ਪਰਿਨਿਬ੍ਬੁਤੇ ਬਾਰਾਣਸੀਨਗਰਵਾਸੀ ਏਕੋ ਦੁਗ੍ਗਤਪੁਰਿਸੋ ਪਰਗੇਹੇ ਭਤਿਂਕਤ੍ਵਾ ਜੀਵਿਕਂ ਕਪ੍ਪੇਤਿ, ਤਸ੍ਮਿਂ ਸਮਯੇ ਨਗਰਵਾਸਿਨੋ ਯੇਭੁਯ੍ਯੇਨ ਤਸ੍ਮਿਂ ਤਸ੍ਮਿਂ ਠਾਨੇ ਮਣ੍ਡਪਾਦਯੋ ਕਾਰਾਪੇਤ੍ਵਾ ਮਹਾਦਾਨਂ ਦੇਨ੍ਤਿ, ਤਂ ਦਿਸ੍ਵਾ ਦੁਗ੍ਗਤੋ ਏਵਂ ਚਿਨ੍ਤੇਸਿ, ਅਹਂ ਪੁਬ੍ਬੇ ਅਕਤਪੁਞ੍ਞਤ੍ਤਾ ਪਰਗੇਹੇ ਭਤਿਂ ਕਤ੍ਵਾ ਕਿਚ੍ਛੇਨ ਕਸਿਰੇਨ ਜੀਵਾਮਿ. ਨਿਵਾਸਨਪਾਰੁਪਨਮ੍ਪਿ ਵਾਸਟ੍ਠਾਨਮਤ੍ਤਮ੍ਮਿ ਦੁਕ੍ਖਤੋ ਲਭਾਮਿ. ਇਦਾਨਿ ਬੁਦ੍ਧੁਪ੍ਪਾਦੋ ਵਤ੍ਤਤਿ ਭਿਕ੍ਖੁਸਙ੍ਘੋਪਿ.

ਸਬ੍ਬੇ ਇਮੇ ਦਾਨਂ ਦਤ੍ਵਾ ਸਗ੍ਗਮਗ੍ਗਂ ਸੋਧੇਨ੍ਤਿ. ਮਯਾਪਿ ਦਾਨਂ ਦਾਤੁਂ ਵਟ੍ਟਤਿ. ਤਮ੍ਮੇ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤਿ. ਅਪਿ ਚ ਮਯ੍ਹਂ ਤਣ੍ਡੁਲਨਾਲਿਮਤ੍ਤਮ੍ਪਿ ਨਤ੍ਥਿ, ਅਕਤਵੀਰਿਯੇਨ ਤਂ ਮਤ੍ਥਕਂ ਪਾਪੇਤੁਂ ਨ ਸਕ੍ਕਾ, ਏਤਦਤ੍ਥਾਯਾਹਂ ਉਯ੍ਯੋਗਂ ਕਤ੍ਵਾ ਦਾਨਂ ਦਸ੍ਸਾਮੀਤਿ ਚਿਨ੍ਤੇਤ੍ਵਾ ਤਤੋ ਪਟ੍ਠਾਯ ਭਤਿਂ ਪਰਿਯੇਸਮਾਨੋ ਗਨ੍ਤ੍ਵਾ ਤਤ੍ਥ ਤਤ੍ਥ ਭਤਿਂ ਕਤ੍ਵਾ ਲਦ੍ਧਨਿਵਾਪੇ ਚ ਭਿਕ੍ਖਾਚਰਿਯਾਯ ਲਦ੍ਧਤਿਲਤਣ੍ਡੁਲਾਦਯੋ ਚ ਏਕਤ੍ਥ ਸਂਹਰਿਤ੍ਵਾ ਮਨੁਸ੍ਸੇ ਸਮਾਦਾਪੇਤ੍ਵਾ ਤਸ੍ਮਿਂ ਮਣ੍ਡਪਂ ਕਾਰਾਪੇਤ੍ਵਾ ਵਨਕੁਸਮਾਦੀਹਿ ਤਂ ਅਲਙ੍ਕਰਿਤ੍ਵਾ ਭਿਕ੍ਖੂ ਨਿਮਨ੍ਤੇਤ੍ਵਾ ਮਣ੍ਡਪੇ ਨਿਸੀਦਾਪੇਤ੍ਵਾ ਸਬ੍ਬੇਸਂ ਪਾਯਸਂ [ਪਾਯਾਸਂ ਇਤਿਸਬ੍ਬਤ੍ਥ] ਪਟਿਯਾਦੇਤ੍ਵਾ ਭੋਜੇਸਿ. ਅਥ ਸੋ ਮਰਣਕਾਲੇ ਅਤ੍ਤਨਾ ਕਤਂ ਤਂ ਦਾਨਵਰਂ ਅਨੁਸ੍ਸਰਿ. ਸੋ ਤੇਨ ਕੁਸਲਕਮ੍ਮੇਨ ਸੁਤ੍ਤਪ੍ਪਬੁਦ੍ਧੋ ਵਿਯ ਦੇਵਲੋਕੇ ਨਿਬ੍ਬਤ੍ਤਿ. ਤਸ੍ਮਿਂ ਤੇਨ ਕਤਪੁਞ੍ਞਾਨੁਰੂਪਂ ਮਹਨ੍ਤਂ ਕਨਕਵਿਮਾਨਂ ਨਿਬ੍ਬਤ੍ਤਿ. ਸਮਨ੍ਤਾ ਤਿਗਾਵੁਤਟ੍ਠਾਨੇ ਦੇਵਤਾ ਨਾਨਾ ਵਿਧਾਨਿ ਤੁਰਿਯਾਨਿ ਗਹੇਤ੍ਵਾ ਉਪਹਾਰਂ ਕਰੋਨ੍ਤਿ. ਨਿਚ੍ਚਂ ਦੇਵਚ੍ਛਰਾਸਹਸ੍ਸਾਨਿ [ਦੇਵਚ੍ਛਰਾਸਹਸ੍ਸਂ ਇਤਿਸਬ੍ਬਤ੍ਥ] ਤਂ ਪਰਿਵਾਰੇਤ੍ਵਾ ਤਿਟ੍ਠਨ੍ਤਿ. ਏਵਂ ਸੋ ਮਹਨ੍ਤਂ ਸਮ੍ਪਤ੍ਤਿਂ ਅਨੁਭਵਤਿ. ਅਥੇਕਦਿਵਸਂ ਸੁਵਣ੍ਣਸੇਲਵਿਹਾਰਵਾਸੀ ਮਹਾਸਙ੍ਘਰਕ੍ਖਿਤਤ੍ਥੇਰੋ ਪਤ੍ਤਪਟਿਸਮ੍ਭਿਦੋ ਦੇਵਚਾਰਿਕਂ ਚਰਮਾਨੋ ਤਂ ਦੇਵਪੁਤ੍ਤਂ ਅਨੁਪਮਾਯ ਦੇਵਸਮ੍ਪਤ੍ਤਿਯਾ ਵਿਰੋਚਮਾਨਂ ਦਿਸ੍ਵਾ ਉਪਸਙ੍ਕਮ੍ਮ ਠਿਤੋ ਤੇਨ ਕਤਕਮ੍ਮਂ ਪੁਚ੍ਛਿ. ਸੋਪਿਸ੍ਸ ਯਥਾਭੂਤਂ ਬ੍ਯਾਕਾਸਿ, ਤੇਨਤ੍ਥ.

੧. ਸਬ੍ਬਸੋਵਣ੍ਣਯੋ ਆਸਿ, ਪਾਸਾਦੋ ਰਤਨਾਮਯੋ;

ਸੋਣ੍ਣਸਿਙ੍ਗਸਤਾਕਿਣ੍ਣੋ, ਦੁਦ੍ਦਿਕ੍ਖੋ ਚ ਪਭਸ੍ਸਰੋ.

੨. ਕੂਟਾਗਾਰ ਸਤਾਕਿਣ੍ਣੋ, ਸੋਣ੍ਣਮਾਲਾਸਮਾਕੁਲੋ;

ਮੁਤ੍ਤਾਕਲਾਪਾਲਮ੍ਬਨ੍ਤਿ, ਤਤ੍ਥ ਤਤ੍ਥ ਮਨੋਰਮਾ.

੩. ਨੇਕਗਬ੍ਭਸਤਾਕਿਣ੍ਣੋ, ਸਯਨਾਸਨਮਣ੍ਡਿਤੋ;

ਵਿਭਤ੍ਤੋ ਭਬ੍ਬਭਾਗੇਹਿ, ਪੁਞ੍ਞਵਡ੍ਢਕਿਨਾ ਕਤੋ.

੪. ਨਚ੍ਚਨ੍ਤਿ ਪਮਦਾ ਤਤ੍ਥ, ਭੇਰਿਮਣ੍ਡਲਮਜ੍ਝਗਾ;

ਗਾਯਨ੍ਤਿ ਕਾਚਿ ਕੀਲ਼ਨ੍ਤਿ, ਵਾਦੇਨ੍ਤਿ ਕਾਚਿ ਤਨ੍ਤਿਯੋ.

੫. ਤਤੋ ਤਿਗਾਵੁਤੇ ਠਾਨੇ, ਪਾਸਾਦਸ੍ਸ ਸਮਨ੍ਤਤੋ;

ਸਹਚ੍ਛਰਾ ਦੇਵਪੁਤ੍ਤਾ, ਗਹੇਤ੍ਵਾ ਆਤਤਾਦਯੋ.

੬. ਮੋਦਨ੍ਤਿ ਪਰਿਵਾਰੇਤ੍ਵਾ, ਨਚ੍ਚਗੀਤਾਦਿਨਾ ਸਦਾ;

ਉਲ੍ਲਙ੍ਘਨ੍ਤਿਚ ਸੇਲੇਨ੍ਤਿ, ਸਿਲਾਘਨ੍ਤਿ ਸਮਨ੍ਤਤੋ.

੭. ਏਵਂ ਮਹਿਦ੍ਧਿਕੋ ਦਾਨਿ, ਤੁਵਂ ਵਨ੍ਦੋਵ ਭਾਸਤਿ;

ਪੁਚ੍ਛਾਮਿ ਤਂ ਦੇਵਪੁਤ੍ਤ, ਕਿਂ ਕਮ੍ਮਮਕਰੀ ਪੁਰਾ.

ਦੇਵਪੁਤ੍ਤੋ ਆਹ.

੮. ਅਹੋਸਿਂ ਦੁਗ੍ਗਤੋ ਪੁਬ੍ਬੇ, ਬਾਰਾਣਸੀਪੁਰੁਤ੍ਤਮੇ;

ਦਾਨਂ ਦੇਨ੍ਤਿ ਨਰਾ ਤਤ੍ਥ, ਨਿਮਨ੍ਤੇਤ੍ਵਾਨ ਭਿਕ੍ਖਵੋ.

੯. ਜੀਵਨ੍ਤੋ ਭਤਿਯਾ ਸੋਹਂ, ਦਾਨਂ ਦੇਨ੍ਤੇ ਮਹਾਜਨੇ;

ਤੁਟ੍ਠਹਟ੍ਠੇ ਪਮੁਦਿਤੇ, ਏਵਂ ਚਿਨ੍ਤੇਸਹਂ ਤਦਾ.

੧੦. ਸਮ੍ਪਨ੍ਨਵਤ੍ਥਾਲਙ੍ਕਾਰਾ, ਦਾਨਂ ਦੇਨ੍ਤਿ ਇਮੇ ਜਨਾ;

ਪਰਤ੍ਥਪਿ ਪਹਟ੍ਠਾਵ, ਸਮ੍ਪਤ੍ਤਿਮਨੁਭੋਨ੍ਤਿ ਤੇ.

੧੧. ਬੁਦ੍ਧੁਪ੍ਪਾਦੋ ਅਯਂ ਦਾਨਿ, ਧਮ੍ਮੋ ਲੋਕੇ ਪਵਤ੍ਤਤਿ;

ਸੁਸੀਲਾ ਦਾਨਿ ਵਤ੍ਤਨ੍ਤਿ, ਦਕ੍ਖਿਣੇਯ੍ਯਾ ਜਿਨੋਰਸਾ.

੧੨. ਅਨਾਵਟ੍ਠਿਤੋ [ਅਵਟ੍ਠਿਤੋਚ; ਅਨ੍ਧਟ੍ਠਿਤੋਚ ਇਤਿਪਿਕਤ੍ਤਚਿ] ਸਂਸਾਰੋ, ਅਪਾਯਾ ਖਲੁ ਪੂਰਿਤਾ;

ਕਲ੍ਯਾਣਵਿਮੁਖਾ ਸਤ੍ਤਾ, ਕਾਮਂ ਗਚ੍ਛਨ੍ਤਿ ਦੁਗ੍ਗਤਿਂ.

੧੩. ਇਦਾਨਿ ਦੁਕ੍ਖਿਤੋ ਹੁਤ੍ਵਾ, ਜੀਵਾਮਿ ਕਸਿਰੇਨਹਂ;

ਦਲਿਦ੍ਦੋ ਕਪਣੋ ਦੀਨੋ, ਅਪ੍ਪਭੋਗੋ ਅਨਾਲਯੋ.

੧੪. ਇਦਾਨਿ ਬੀਜਂ ਰੋਪੇਮਿ, ਸੁਖੇਤ੍ਤੇ ਸਾਧੁਸਮ੍ਮਤੇ;

ਅਪ੍ਪੇਵਨਾਮ ਤੇਨਾਹਂ, ਪਰਤ੍ਥ ਸੁਖਿਤੋ ਸਿਯਾ.

੧੫. ਇਤਿ ਚਿਨ੍ਤਿਯ ਭਿਕ੍ਖਿਤ੍ਵਾ, ਭਤਿਂ ਕਤ੍ਵਾਨ ਨੇਕਧਾ;

ਮਣ੍ਡਪਂ ਤਤ੍ਥ ਕਾਰੇਤ੍ਵਾ, ਨਿਮਨ੍ਤੇਤ੍ਵਾਨ ਭਿਕ੍ਖਵੋ.

੧੬. ਆਯਾਸੇਨ ਅਦਾਸਾਹਂ, ਪਾਯਸਂ ਅਮਤਾਯ ਸੋ;

ਤੇਨ ਕਮ੍ਮਵਿਪਾਕੇਨ, ਦੇਵਲੋਕੇ ਮਨੋਰਮੇ.

੧੭. ਜਾਤੋਮ੍ਹਿ ਦਿਬ੍ਬਕਾਮੇਹਿ, ਮੋਦਮਾਨੋ ਅਨੇਕਧਾ;

ਦੀਘਾਯੁਕੋ ਵਣ੍ਣਵਨ੍ਤੋ, ਤੇਜਸ੍ਸੀਚ ਅਹੋਸਹਨ੍ਤਿ.

ਏਵਂ ਦੇਵਪੁਤ੍ਤੋ ਅਤ੍ਤਨਾ ਕਤਪੁਞ੍ਞਕਮ੍ਮਂ ਵਿਤ੍ਤਾਰੇਨ ਕਥੇਸਿ, ਥੇਰੋਪਿ ਮਨੁਸ੍ਸਲੋਕਂ ਆਗਨ੍ਤ੍ਵਾ ਮਨੁਸ੍ਸਾਨਂ ਅਤ੍ਤਨਾ ਪਚ੍ਚਕ੍ਖਤੋ ਦਿਟ੍ਠਦਿਬ੍ਬਸਮ੍ਪਤ੍ਤਿਂ ਪਕਾਸੇਸਿ. ਤਂ ਸੁਤ੍ਵਾ ਮਹਾਜਨੋ ਕੁਸਲਕਮ੍ਮਂ ਕਤ੍ਵਾ ਯੇਭੁਯ੍ਯੇਨ ਸਗ੍ਗੇ ਨਿਬ੍ਬਤ੍ਤੋਤਿ.

੧੮. ਅਨਾਲਯੋ ਦੁਗ੍ਗਤਦੀਨਕੋਪਿ,

ਦਾਨਂ ਦਦਨ੍ਤੋ ਧਿਗਤੋ ਵਿਸੇਸਂ;

ਸਗ੍ਗਾ ਪਵਗ੍ਗਂ ਯਦਿ ਪਤ੍ਥਯਵ੍ਹੋ,

ਹਨ੍ਤ੍ਵਾਨ ਮਚ੍ਛੇਰਮਲਂ ਦਦਾਥਾਤਿ.

ਕਪਣਸ੍ਸ ਵਤ੍ਥੁਂ ਅਟ੍ਠਮਂ.