੨੬. ਚੋਰਘਾਤਕਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਏਕਸ੍ਮਿਂ ਕਿਰ ਸਮਯੇ ਅਮ੍ਹਾਕਂ ਭਗਵਾ ਸਾਵਤ੍ਥਿਯਂ ਉਪਨਿਸ੍ਸਾਯ ਜੇਤਵਨੇ ਵਿਹਰਤਿ ਧਮ੍ਮਦੇਸਨਾਯ ਮਹਾਜਨਸ੍ਸ ਸਗ੍ਗਮੋਕ੍ਖਸਮ੍ਪਦਂ ਦਦਮਾਨੋ. ਤਸ੍ਮਿਂਸਮਯੇ ਪਞ੍ਚਸਤਾ ਚੋਰਾ ਅਟਵਿਤੋ ਨਗਰਂ ਆਗਨ੍ਤ੍ਵਾ ਰਤ੍ਤਿਭਾਗੇ ਚੋਰਕਮ੍ਮਂ ਕਤ੍ਵਾ ਤੇਨ ਪੁਤ੍ਤਦਾਰੇ ਪੋਸੇਨ੍ਤਿ. ਅਥੇਕਦਿਵਸਂ ਚੋਰਾ ਚੋਰਕਮ੍ਮਤ੍ਥਾਯ ਨਗਰਂ ਪਵਿਸਨ੍ਤਾ ਨਗਰਦ੍ਵਾਰੇ ਏਕਂ ਦੁਕ੍ਖਿਤਂ ਜਨਪਦਮਨੁਸ੍ਸਂ ਪਸ੍ਸਿਤ੍ਵਾ ਹਮ੍ਭੋ ਕਤ੍ਥ ਵਸਤੀਤਿ ਪੁਚ੍ਛਿਂਸੁ, ਸੋ ਅਤ੍ਤਜਨਾ ਜਨਪਦਵਾਸਿਭਾਵਂ ਪਕਾਸੇਸਿ. ਅਥਸ੍ਸ ਤੇ ਕਸ੍ਮਾ ਭੋ ਇਮਿਨਾ ਦੁਕ੍ਖਵਾਸੇਨ ਵਸਿਸ੍ਸਸਿ, ਏਹਿ ਅਮ੍ਹੇਹਿ ਸਦ੍ਧਿਂ ਚੋਰਕਮ੍ਮਂ ਕਰੋਨ੍ਤੋ ਵਤ੍ਥਾਲਙ੍ਕਾਰਸਮ੍ਪਨ੍ਨੋ ਪੁਤ੍ਤਦਾਰਂ ਪੋਸੇਹਿ. ਇਮਿਨਾ ਕਪਣਵਾਸੇਨ ਨ ਵਸਾਤਿ ਆਹਂਸੁ. ਸੋ ਪਨਿਮੇ ਯੁਤ੍ਤਂ ਕਥੇਨ੍ਤੀਤਿ ਤੇਸਂ ਵਚਨਂ ਸਮ੍ਪਟਿਚ੍ਛਿ. ਅਥ ਤੇ ਏਵਂ ਸਤਿ ਅਮ੍ਹੇਹਿ ਸਦ੍ਧਿਂ ਆਗਚ੍ਛਾਹੀਤਿ ਵਤ੍ਵਾ ਨਂ ਗਹੇਤ੍ਵਾ ਅਨ੍ਤੋਨਗਰਂ ਪਵਿਟ੍ਠਾ ਤਤ੍ਥ ਤਤ੍ਥ ਵਿਲੁਮ੍ਪਨ੍ਤਾ ਚੋਰਕਮ੍ਮਂ ਅਕਂਸੁ. ਤਦਾ ਜਾਨਪਦਿਕੋ ਲਦ੍ਧਵਿਭਵੋ ਇਮਮੇਵ ਵਰਤਰਨ੍ਤਿ ਤੇਹਿ ਸਦ੍ਧਿਂ ਚੋਰਕਮ੍ਮਂ ਕਰੋਨ੍ਤੋ ਜੀਵਿਕਂ ਕਪ੍ਪੇਸਿ, ਅਥੇਕਦਿਵਸਂ ਰਾਜਪੁਰਿਸਾ ਕਤਕਮ੍ਮੇ ਤੇ ਸਬ੍ਬੇਵ ਗਹੇਤ੍ਵਾ ਪਚ੍ਛਾਬਾਹਂ ਗਾਲ਼੍ਹਂ ਬਨ੍ਧਿਤ੍ਵਾ ਕੋਸਲਰਞ੍ਞੋ ਦਸ੍ਸੇਸੁਂ, ਰਾਜਾ ਤੇ ਦਿਸ੍ਵਾ ਏਵਮਾਹ, ਭਣੇ ਤੁਮ੍ਹਾਕਂ ਅਨ੍ਤਰੇ ਯੋ ਏਤੇਸਂ ਮਾਰੇਤ੍ਵਾ ਜੀਵਿਤਕ੍ਖਯਂ ਪਾਪੇਸ੍ਸਤਿ, ਤਸ੍ਸ ਜੀਵਿਤਦਾਨਂ ਦਮ੍ਮੀਤਿ, ਤਂ ਸੁਤ੍ਵਾ ਤੇ ਚੋਰਾ ਸਬ੍ਬੇ ਅਞ੍ਞਮਞ੍ਞਞਾਤਿਸੁਹਦਸਮ੍ਬਨ੍ਧਭਾਵੇਨ ਤਂ ਨ ਇਚ੍ਛਿਂਸੁ. ਸੋ ਪਨ ਜਨਪਦਵਾਸੀ ਮਨੁਸ੍ਸੋ ਅਹਮੇਤੇ ਸਬ੍ਬੇ ਮਾਰੇਸ੍ਸਾਮੀਤਿ ਰਞ੍ਞੋ ਵਤ੍ਵਾ ਤੇਨਾਨੁਞ੍ਞਾਤੋ ਤੇ ਸਬ੍ਬੇ ਮਾਰੇਸਿ. ਤਂ ਦਿਸ੍ਵਾ ਤੁਟ੍ਠੋ ਰਾਜਾ ਤਸ੍ਸ ਚੋਰਘਾਤਕਮ੍ਮਂ ਅਦਾਸਿ. ਸੋ ਚੋਰੇ ਚ ਵਜ੍ਝਪ੍ਪਤ੍ਤੇ ਚ ਮਾਰੇਨ੍ਤੋ ਪਞ੍ਚਵੀਸਤਿਵਸ੍ਸਾਨਿ ਵਸਨ੍ਤੋ ਅਪਰਭਾਗੇ ਮਹਲ੍ਲਕੋ ਅਹੋਸਿ. ਅਥ ਸੋ ਮਨ੍ਦਬਲਤ੍ਤਾ ਕਤਿਪਯਪਹਾਰੇਨਾਪਿ ਚੋਰਂ ਮਾਰੇਤੁਂ ਨ ਸਕ੍ਕੋਤਿ, ਰਾਜਾ ਤਂ ਞਤ੍ਵਾ ਅਞ੍ਞਸ੍ਸ ਚੋਰਘਾਤਕਮ੍ਮਂ ਅਦਾਸਿ. ਅਥ ਸੋ ਚੋਰਘਾਤਕਮ੍ਮਾ [ਚੋਰਘਾਤਕਮ੍ਮ ਇਤਿਪਿਕਤ੍ਥਚਿ] ਪਰਿਹੀਨੋ ਅਤ੍ਤਨੋ ਗੇਹੇ ਵਸਤਿ. ਤਦਾ ਅਞ੍ਞਤਰੋ ਮਨੁਸ੍ਸੋ ਮਨ੍ਤਂ ਪਰਿਵਤ੍ਤੇਤ੍ਵਾ ਨਾਸਾਵਾਤੇਨ ਮਨੁਸ੍ਸਮਾਰਣਕਮਨ੍ਤਂ ਜਾਨਾਤਿ. ਤਥਾਹਿ ਹਤ੍ਥਪਾਦਕਣ੍ਣਨਾਸਸੀਸਾਦੀਸੁ ਯਂਕਿਞ੍ਚਿ ਛੇਜ੍ਜਭੇਜ੍ਜਂ ਕਤ੍ਤੁਕਾਮੋ ਮਨ੍ਤਂ ਪਰਿਵਤ੍ਤੇਤ੍ਵਾ ਨਾਸਾਵਾਤਂ ਵਿਸ੍ਸਜ੍ਜੇਤਿ. ਤਂ ਤਂ ਠਾਨਂ ਛਿਜ੍ਜਤਿ ਭਿਜ੍ਜਤਿ, ਏਵਂ ਮਹਾਨੁਭਾਵੋ ਸੋ ਮਨ੍ਤੋ, ਅਥ ਸੋ ਤਂ ਪੁਰਿਸਂ ਉਪਟ੍ਠਹਿਤ੍ਵਾ ਮਨ੍ਤਂ ਲਭਿਤ੍ਵਾ ਰਞ੍ਞੋ ਸਾਸਨਂ ਪੇਸੇਸਿ. ਅਹਂ ਇਤੋ ਪੁਬ੍ਬੇ ਮਹਲ੍ਲਕਤ੍ਤਾ ਚੋਰਾਨਂ ਹਤ੍ਥਪਾਦਾਦਯੋ ਦੁਕ੍ਖੇਨ ਛੇਜ੍ਜ ਭੇਜ੍ਜਂ ਕਰੋਮਿ, ਮਾਰੇਤਬ੍ਬੇਪਿ ਦੁਕ੍ਖੇਨ ਮਾਰੇਮਿ. ਇਦਾਨਿ ਪਨਾਹਂ ਤਥਾ ਨ ਕਰੋਮਿ, ਮਮ ਮਨ੍ਤਾਨੁਭਾਵੇਨ ਛੇਜ੍ਜਭੇਜ੍ਜਕਮ੍ਮਂ ਕਰਿਸ੍ਸਾਮੀਤਿ. ਰਾਜਾ ਤਂ ਸਾਸਨਂ ਸੁਤ੍ਵਾ ਸਾਧੂਤਿ ਤਂ ਪਕ੍ਕੋਸਾਪੇਤ੍ਵਾ ਠਾਨਨ੍ਤਰਂ ਤਸ੍ਸੇਵ ਪਾਕਤਿਕ ਮਕਾਸਿ. ਸੋ ਤਤੋ ਪਟ੍ਠਾਯ ਤਂ ਕਮ੍ਮਂ ਕਰੋਨ੍ਤੋ ਪੁਨ ਪਞ੍ਚਵਸ੍ਸਾਨਿ ਅਤਿਕ੍ਕਾਮੇਸਿ. ਸੋ ਮਹਲ੍ਲਕੋ ਖੀਣਾਯੁਕੋ ਦੁਬ੍ਬਲੋ ਮਰਣਮਞ੍ਚਪਰਾਯਣੋ ਹੁਤ੍ਵਾ ਮਰਣਵੇਦਨਾਦੁਕ੍ਖੇਨ ਮਹਨ੍ਤੇਨ ਭਯਾਨਕੇਨ ਸਦ੍ਦੇਨ ਵਿਸ੍ਸਰਂ ਵਿਰਵਨ੍ਤੋ ਨਿਮੀਲਿਤੇਨ ਚਕ੍ਖੁਨਾ ਭਯਾਨਕਂ ਨਰਕਗ੍ਗਿਜਾਲਾਪਜ੍ਜਲਨ੍ਤਅਯਕੂਟਮੁਗ੍ਗਰਧਰੇ ਨਿਰਯਪਾਲੇ ਚ ਪਸ੍ਸਨ੍ਤੋ ਨਿਪਨ੍ਨੋ ਹੋਤਿ, ਤਤੋ ਤਸ੍ਸ ਪਟਿਵਿਸ੍ਸਕਗੇਹੇ ਮਨੁਸ੍ਸਾ ਤਸ੍ਸ ਭਯਾਨਕਸਦ੍ਦਸਵਣੇਨ ਗੇਹਂ ਛਟ੍ਟੇਤ੍ਵਾ ਪਲਾਯਿਂਸੁ. ਤਸ੍ਮਿਂ ਕਿਰ ਦਿਵਸੇ ਮਹਾਸਾਰਿਪੁਤ੍ਤਤ੍ਥੇਰੋ ਦਿਬ੍ਬਚਕ੍ਖੁਨਾ ਲੋਕਂ ਓਲੋਕੇਨ੍ਤਾ ਤਂ ਚੋਰਘਾਤਕਂ ਤਦਹੇਵ ਕਾਲਂਕਤ੍ਵਾ ਨਿਰਯੇ ਨਿਬ੍ਬਤ੍ਤਮਾਨਂ ਦਿਸ੍ਵਾ ਮਯਿ ਤਤ੍ਥ ਗਤੇ ਪਨੇਸ ਮਯਿ ਪਸਾਦੇਨ ਸਗ੍ਗੇ ਨਿਬ੍ਬਤ੍ਤਤੀਤਿ ਞਤ੍ਵਾ ਅਜ੍ਜ ਮਯਾ ਤਸ੍ਸਾਨੁਗ੍ਗਹਂ ਕਾਤੁਂ ਵਟ੍ਟਤੀਤਿ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਤਸ੍ਸ ਘਰਦ੍ਵਾਰ ਮਗਮਾਸਿ. ਅਥ ਸੋ ਥੇਰਂ ਦਿਸ੍ਵਾ ਕੁਦ੍ਧੋ ਕੋਪੇਨ ਤਟਤਟਾਯਮਾਨਦੇਹੋ ਅਜ੍ਜ ਤਂ ਵਿਜ੍ਝਿਤ੍ਵਾ ਫਾਲੇਤ੍ਵਾ ਮਾਰੇਸ੍ਸਾਮੀਤਿ ਨਿਪਨ੍ਨੋਵ ਮਨ੍ਤਂ ਪਰਿਵਤ੍ਤੇਤ੍ਵਾ ਨਾਸਾਵਾਤਂ ਵਿਸ੍ਸਜ੍ਜੇਸਿ, ਥੇਰੋ ਤਸ੍ਮਿਂ ਖਣੇ ਨਿਰੋਧਸਮਾਪਨ੍ਨੋ ਨਿਰੋਧਾ ਵੁਟ੍ਠਾਯ ਸੁਰਿਯੋ ਵਿਯ ਵਿਰੋਚਮਾਨੋ ਅਟ੍ਠਾਸਿ, ਅਥ ਸੋ ਥੇਰਸ੍ਸ ਤਯੋ ਵਾਰੇ ਤਥੇਵ ਕਤ੍ਵਾ ਕਿਞ੍ਚਿ ਕਾਤੁਂ ਅਸਕ੍ਕੋਨ੍ਤੋ ਅਤਿਵਿਯ ਵਿਮ੍ਹਿਤਚਿਤ੍ਤੋ ਥੇਰੇ ਚਿਤ੍ਤਂ ਪਸਾਦੇਤ੍ਵਾ ਅਤ੍ਤਨੋ ਪਟਿਯਤ੍ਤਂ ਪਾਯਸਂ ਥੇਰਸ੍ਸ ਦਾਪੇਸਿ, ਥੇਰੋ ਮਙ੍ਗਲਂ ਵਡ੍ਢੇਤ੍ਵਾ ਵਿਹਾਰਮੇਵ ਅਗਮਾਸਿ, ਚੋਰਘਾਤਕੋ ਥੇਰਸ੍ਸ ਦਿਨ੍ਨਦਾਨਂ ਅਨੁਸ੍ਸਰਨ੍ਤੋ ਤਸ੍ਮਿਂ ਖਣੇ ਕਾਲਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤਿ. ਅਹੋ ਵੀਤਰਾਗਾਨਂ ਬੁਦ੍ਧਪੁਤ੍ਤਾਨਂ ਆਨੁਭਾਵੋ. ਏਵਂ ਨਰਕੇ ਨਿਬ੍ਬਤ੍ਤਮਾਨੋਪਿਸ੍ਸ ਬਲੇਨ ਸਗ੍ਗੇ ਨਿਬ੍ਬਤ੍ਤੋਤਿ. ਤਥਾਹਿ.

੧. ਦਾਨਂ ਤਾਣਂ ਮਨੁਸ੍ਸਾਨਂ, ਦਾਨਂ ਦੁਗ੍ਗਤਿਵਾਰਣਂ;

ਦਾਨਂ ਸਗ੍ਗਸ੍ਸ ਸੋਪਾਨਂ, ਦਾਨਂ ਸਨ੍ਤਿਕਰਂ ਪਰਂ.

੨. ਇਚ੍ਛਿਤਿਚ੍ਛਿਤਦਾਨੇਨ, ਦਾਨਂ ਚਿਨ੍ਤਾਮਣੀ ਵਿਯ;

ਕਪ੍ਪਰੁਕ੍ਖੋਵ ਸਤ੍ਤਾਨਂ, ਦਾਨਂ ਭਦ੍ਦਘਟੋਵਿਯ.

੩. ਸੀਲਵਨ੍ਤਸ੍ਸ ਦਾਨੇਨ, ਚਕ੍ਕਵਤ੍ਤਿਸਿਰਿਮ੍ਪਿ ਚ;

ਲਭਨ੍ਤਿ ਸਕ੍ਕਸਮ੍ਪਤ੍ਤਿਂ, ਤਥਾ ਲੋਕੁਤ੍ਤਰਂ ਸੁਖਂ.

੪. ਪਾਪਕਮ੍ਮੇਸੁ ਨਿਰਤੋ, ਠਿਤੋਯਂ ਨਰਕਾਯਨੇ [ਨਰਕਾਵਨੇ ਇਤਿਪਿਕਤ੍ਥਚਿ];

ਸਾਰਿਪੁਤ੍ਤਸ੍ਸ ਥੇਰਸ੍ਸ, ਪਿਣ੍ਡਪਾਤਸ੍ਸ ਵਾਹਸਾ.

੫. ਅਪਾਯਂ ਪਰਿਵਜ੍ਜੇਤ੍ਵਾ, ਨੇਕਦੁਕ੍ਖਸਮਾਕੁਲਂ;

ਦੇਵਸਙ੍ਘਪਰਿਬ੍ਬੂਲ਼੍ਹੋ, ਗਤੋ ਦੇਵਪੁਰਂ ਵਰਂ.

੬. ਤਸ੍ਮਾ ਸੁਖੇਤ੍ਤੇ ਸਦ੍ਧਾਯ, ਦੇਥ ਦਾਨਾਨਿ ਕਾਮਦਂ;

ਦਾਨਂ ਦੇਨ੍ਤੇਹਿ ਸੀਲਮ੍ਪਿ, ਪਾਲਨੀਯਂਤਿਸੁਨ੍ਦਰਨ੍ਤਿ [ਪਾਲਨਂਚਾਤਿਸੁਨ੍ਦਰਂ ਇਤਿਪਿਕਤ੍ਥਚਿ].

ਅਥ ਭਿਕ੍ਖੂ ਧਮ੍ਮਸਭਾਯਂ ਸਨ੍ਨਿਪਤਿਤ੍ਵਾ ਨਿਸਿਨ੍ਨਾ ਭਗਵਨ੍ਤਂ ਪੁਚ੍ਛਿਂਸੁ, ਕਿਂਭਨ੍ਤੇ ਸੋ ਪਾਪੋ ਚਤੂਸੁ ਅਪਾਯੇਸੁ ਕਤਰਸ੍ਮਿਂ ਨਿਬ੍ਬਤ੍ਤੋਤਿ. ਅਥ ਸਤ੍ਥਾ ਅਜ੍ਜੇਸ ਭਿਕ੍ਖਵੇ ਸਾਰਿਪੁਤ੍ਤਸ੍ਸ ਦਿਨ੍ਨਦਾਨਾਨੁਭਾਵੇਨ ਦੇਵਲੋਕੇ ਨਿਬ੍ਬਤ੍ਤੋ, ਤਸ੍ਸੇਵ ਨਿਸ੍ਸਨ੍ਦੇਨ ਅਨਾਗਤੇ ਪਚ੍ਚੇਕਬੁਦ੍ਧੋ ਭਵਿਸ੍ਸਤੀਤਿ ਬ੍ਯਾਕਾਸੀਤਿ.

੭. ਭੋ ਸਾਰਿਪੁਤ੍ਤੇ ਨਿਹਿਤਪ੍ਪਦਾਨਂ,

ਖਣੇਨ ਪਾਪੇਤਿ ਹਿ ਸਗ੍ਗਮਗ੍ਗਂ;

ਤਸ੍ਮਾ ਸੁਖੇਤ੍ਤੇਸੁ ਦਦਾਥ ਦਾਨਂ,

ਕਾਮਤ੍ਥ ਚੇ ਸਗ੍ਗਮੋਕ੍ਖਂ ਪਰਤ੍ਥ.

ਚੋਰਘਾਤਕਵਤ੍ਥੁਂ ਛਟ੍ਠਮਂ.