੨੪. ਉਤ੍ਤਰਸਾਮਣੇਰਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ
ਸੋ ਕਿਰ ਪੁਰਿਮਬੁਦ੍ਧੇਸੁ [ਪੁਰਿਮਬੁਦ੍ਧੇ ਇਤਿਸਬ੍ਬਤ੍ਥ] ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਪੁਞ੍ਞਂ ਉਪਚਿਨਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਵਿਜ੍ਜਾਧਰੋ ਹੁਤ੍ਵਾ ਹਿਮਵਤਿ ਪਟਿਵਸਤਿ. ਤਦਾ ਸੁਮੇਧੋ ਨਾਮ ਸਮ੍ਮਾਸਮ੍ਬੁਦ੍ਧੋ ਵਿਵੇਕ ਮਨੁਬ੍ਰੂਹਨ੍ਤੋ ਹਿਮਵਨ੍ਤਂ ਗਨ੍ਤ੍ਵਾ ਰਮਣੀਯੇ ਪਦੇਸੇ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸੀਦਿ. ਤਦਾ ਵਿਜ੍ਜਾਧਰੋ ਆਕਾਸੇਨ ਗਚ੍ਛਨ੍ਤੋ ਛਬ੍ਬਣ੍ਣਰਂਸੀਹਿ ਵਿਰਾਜਮਾਨਂ ਭਗਵਨ੍ਤਂ ਦਿਸ੍ਵਾ ਤੀਹਿ ਕਣਿਕਾਰਪੁਪ੍ਫੇਹਿ ਪੂਜੇਸਿ, ਪੁਪ੍ਫਾਨਿ ਬੁਦ੍ਧਾਨੁਭਾਵੇਨ ਸਤ੍ਥੁ ਉਪਰਿ ਛਤ੍ਤਾਕਾਰੇਨ ਅਟ੍ਠਂਸੁ, ਸੋ ਤੇਨ ਭੀਯ੍ਯੋਸੋ ਮਤ੍ਤਾਯ ਪਸਨ੍ਨਚਿਤ੍ਤੋ ਹੁਤ੍ਵਾ ਅਪਰਭਾਗੇ ਕਾਲਂਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿਤ੍ਵਾ ਉਲ਼ਾਰਂ ਦਿਬ੍ਬਸਮ੍ਪਤ੍ਤਿਮਨੁਭਵਨ੍ਤੋ ਯਾਵਤਾਯੁਕਂ ਤਤ੍ਥ ਠਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਨਗਰੇ ਬ੍ਰਾਹ੍ਮਣਮਹਾਸਾਲਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਉਤ੍ਤਰੋਤਿਸ੍ਸ ਨਾਮਂ ਅਹੋਸਿ. ਸੋ ਉਤ੍ਤਮਰੂਪਧਰੋ ਵਿਞ੍ਞੁਤਂ ਪਤ੍ਤੋ ਬ੍ਰਾਹ੍ਮਣਵਿਜ੍ਜਾਸੁ ਨਿਪ੍ਫਤ੍ਤਿਂ ਪਤ੍ਵਾ ਜਾਤਿਯਾ ਰੂਪੇਨ ਵਿਜ੍ਜਾਯ ਸੀਲਾਚਾਰੇਨ ਚ ਲੋਕਸ੍ਸ ਮਹਨੀਯੋ ਜਾਤੋ, ਤਸ੍ਸ ਤਂ ਪਞ੍ਞਾਸਮ੍ਪਤ੍ਤਿਂਦਿਸ੍ਵਾ ਵਸ੍ਸਕਾਰੋ ਮਗਧਮਹਾਮਤ੍ਤੋ ਅਤ੍ਤਨੋ ਧੀਤਰਂ ਦਾਤੁਕਾਮੋ ਹੁਤ੍ਵਾ ਅਤ੍ਤਨੋ ਅਧਿਪ੍ਪਾਯਂ ਪਵੇਦੇਸਿ. ਸੋ ਨਿਸ੍ਸਰਣਜ੍ਝਾਸਯਤਾਯ ਤਂ ਪਟਿਕ੍ਖਿਪਿਤ੍ਵਾ ਕਾਲੇਨਕਾਲਂ ਧਮ੍ਮਸੇਨਾਪਤਿਂ ਪਯਿਰੁਪਾਸਨ੍ਤੋ ਤਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਤ੍ਤਸਮ੍ਪਨ੍ਨੋ ਹੁਤ੍ਵਾ ਥੇਰਂ ਉਪਟ੍ਠਹਤਿ. ਤੇਨ ਚ ਸਮਯੇਨ ਥੇਰਸ੍ਸ ਅਞ੍ਞਤਰੋ ਆਬਾਧੋ ਉਪ੍ਪਨ੍ਨੋ ਹੋਤਿ, ਤਸ੍ਸ ਭੇਸਜ੍ਜਤ੍ਥਾਯ ਉਤ੍ਤਰਸਾਮਣੇਰੋ ਪਾਤੋਵ ਪਤ੍ਤਚੀਵਰ ਮਾਦਾਯ ਵਿਹਾਰਤੋ ਨਿਕ੍ਖਮ੍ਮ ਅਨ੍ਤਰਾਮਗ੍ਗੇ ਤਲ਼ਾਕਸ੍ਸ ਤੀਰੇ ਪਤ੍ਤਂ ਠਪੇਤ੍ਵਾ ਉਦਕਸਮੀਪਂ ਗਨ੍ਤ੍ਵਾ ਮੁਖਂ ਧੋਵਤਿ, ਤਦਾ ਅਞ੍ਞਤਰੋ ਉਮ੍ਮਗ੍ਗਚੋਰੋ ਕਤਕਮ੍ਮੋ ਆਰਕ੍ਖਪੁਰਿਸੇਹਿ ਅਨੁਬਦ੍ਧੋ ਅਗ੍ਗਦ੍ਵਾਰੇਨੇਵ ਨਗਰਤੋ ਨਿਕ੍ਖਮਿਤ੍ਵਾ ਪਲਾਯਨ੍ਤੋ ਅਤ੍ਤਨਾ ਗਹਿਤਂ ਰਤਨਭਣ੍ਡਿਕਂ ਸਾਮਣੇਰਸ੍ਸ ਪਤ੍ਤੇ ਪਕ੍ਖਿਪਿਤ੍ਵਾ ਪਲਾਯਿ. ਸੋ ਸਾਮਣੇਰੋਪਿ ਪਤ੍ਤਸਮੀਪਂ [ਸਤ੍ਤੁਸਮੀਪਂ ਇਤਿਪਿ ਕਤ੍ਥਚਿ] ਉਪਗਤੋ ਹੋਤਿ, ਚੋਰਂ ਅਨੁਬਨ੍ਧਨ੍ਤਾ ਰਾਜਪੁਰਿਸਾ ਸਾਮਣੇਰਸ੍ਸ ਪਤ੍ਤੇ ਭਣ੍ਡਿਕਂ ਦਿਸ੍ਵਾ ਅਯਂ ਚੋਰੋ, ਇਮਿਨਾ ਚੋਰਿਯਂ ਕਤਨ੍ਤਿ ਸਾਮਣੇਰਂ ਪਚ੍ਛਾਬਾਹਂ ਬਨ੍ਧਿਤ੍ਵਾ ਵਸ੍ਸਕਾਰਸ੍ਸ ਬ੍ਰਾਹ੍ਮਣਸ੍ਸ ਦਸ੍ਸੇਸੁਂ. ਵਸ੍ਸਕਾਰੋ ਚ ਤਦਾ ਰਞ੍ਞੋ ਵਿਨਿਚ੍ਛਯੇ ਨਿਯੁਤ੍ਤੋ ਹੁਤ੍ਵਾ ਛੇਜ੍ਜਭੇਜ੍ਜਂ ਅਨੁਸਾਸਤਿ. ਸੋ ਏਸੋ ਪੁਬ੍ਬੇ ਮਮ ਵਚਨਂ ਨਾਦਿਯਿ. ਸੁਦ੍ਧਪਾਸਣ੍ਡਿਯੇਸੁ ਪਬ੍ਬਜੀਤਿ ਚ ਬਦ੍ਧਾਘਾਤਤ੍ਤਾ ਤਂ ਕਮ੍ਮਂ ਅਸੋਧੇਤ੍ਵਾਵ ਜੀਵਨ੍ਤਮੇਵੇਤਂ ਸੂਲੇ ਉਤ੍ਤਾਸੇਥਾਤਿ ਆਣਾ ਪੇਸਿ, ਰਾਜਪੁਰਿਸਾ ਤਂ ਨਿਮ੍ਬਸੂਲੇ ਉਤ੍ਤਾਸੇਸੁਂ. ਸਾਮਣੇਰੋ ਸੂਲਗ੍ਗੇ ਨਿਸਿਨ੍ਨੋ ਉਪਜ੍ਝਾਯਸ੍ਸ ਮੇ ਕੋ ਭੇਸਜ੍ਜਂ ਆਹਰਿਸ੍ਸਤੀਤਿ ਸਾਰਿਪੁਤ੍ਤਤ੍ਥੇਰਂ ਸਰਿ. ਤਤੋ ਥੇਰੋ ਤਂ ਪਵਤ੍ਤਿਂ ਞਤ੍ਵਾ ਸਮ੍ਮਾਸਮ੍ਬੁਦ੍ਧਸ੍ਸ ਕਥੇਸਿ, ਭਗਵਾਪਿ ਮਹਾਸਾਵਕਪਰਿਵੁਤੋ ਤਸ੍ਸ ਞਾਣਪਰਿਪਾਕਂ ਓਲੋਕੇਤ੍ਵਾ ਤਂ ਠਾਨਮਗਮਾਸਿ. ਤਤੋ ਭਗਵਤੋ ਨਿਕ੍ਖਨ੍ਤਭਾਵਾ ਸਕਲਨਗਰੇ ਕੋਲਾਹਲਂ ਅਹੋਸਿ, ਮਹਾਜਨਕਾਯੋ ਸਨ੍ਨਿਪਤਿ. ਅਥ ਭਗਵਾ ਵਿਪ੍ਫੁਰਨ੍ਤਹਤ੍ਥਤਲੇ ਨਖਮਣਿਮਯੂਖਸਮ੍ਭਿਨ੍ਨਪੀਤਾਭਾਸਤਾਯ ਪਗ੍ਘਰਨ੍ਤਜਾਤਿਹਿਙ੍ਗੁਲਕਸੁਵਣ੍ਣਰਸਧਾਰਾਵਿਯ ਜਾਲਾਵਗੁਣ੍ਠਿਤਮੁਦੁਤਲੁਨਙ੍ਗੁਲਂ ਹਤ੍ਥਂ ਉਤ੍ਤਰਸ੍ਸ ਸੀਸੇ ਠਪੇਤ੍ਵਾ ਉਤ੍ਤਰ ਇਦਂ ਤੇ ਪੁਬ੍ਬੇ ਕਤਪਾਪਕਮ੍ਮਸ੍ਸ ਫਲਂ ਉਪ੍ਪਨ੍ਨਂ, ਤਤ੍ਥ ਤਯਾ ਪਚ੍ਚਵੇਕ੍ਖਣਬਲੇਨ ਅਧਿਵਾਸਨਾ ਕਾਤਬ੍ਬਾਤਿ ਆਹ. ਤੇਨੇਵ ਆਹ.
੧. ਅਤੀਤੇ ਕਿਰ ਏਕਸ੍ਮਿਂ, ਗਾਮੇ ਤ੍ਵ ਮਸਿ ਦਾਰਕੋ;
ਦਾਰੇਕੇਹਿ ਸਮਾਗਮ੍ਮ, ਕੀਲ਼ਨ੍ਤੋ ਕੇਲ਼ਿਮਣ੍ਡਲੇ.
੨. ਗਹੇਤ੍ਵਾ ਸੁਖੁਮਂ ਸੂਕਂ, ਤਦਾ ਤ੍ਵਂ ਨਿਮ੍ਬਜਲ੍ਲਿਯਾ;
ਉਤ੍ਤਾਸੇਸਿ ਤਤ੍ਥ ਸੂਲੇ, ਜੀਵਮਾਨਕਮਕ੍ਖਿਕਂ.
੩. ਅਪਰਮ੍ਪਿ ਤੇ ਪਾਪਕਮ੍ਮਂ, ਪਵਕ੍ਖਾਮਿ ਸੁਣੋਹਿ ਮੇ;
ਓਵਦਨ੍ਤਿਂ ਹਿਤੇਨ ਤ੍ਵਂ, ਅਤੀਤੇ ਸਕਮਾਤਰਂ.
੪. ਜੀਵਸੂਲੇ ਨਿਸੀਦਾਤਿ, ਕੋਪੇਨਾਭਿਸਪੀ ਤੁਵਂ;
ਇਮੇਹਿ ਦ੍ਵੀਹਿ ਪਾਪੇਹਿ, ਸਰਂ ਸਂਸਾਰਸਾਗਰੇ.
੫. ਪਞ੍ਚਜਾਤਿਸਤੇ ਅਚ੍ਛਿ, ਜੀਵਸੂਲਮ੍ਹਿ ਨਿਮ੍ਬਜੇ;
ਅਯਂ ਤੇ ਚਰਿਮਾ ਜਾਤਿ, ਏਤ੍ਥਾਪਿਚ ਵਿਪਚ੍ਚਿ ਸੋਤਿ.
ਏਵਮਾਦਿਨਾ ਨਯੇਨ ਤਸ੍ਸ ਅਜ੍ਝਾਸਯਾਨੁਰੂਪੇਨ ਧਮ੍ਮਂ ਦੇਸੇਸਿ, ਉਤ੍ਤਰੋ ਅਮਤਾਭਿਸੇਕਸਦਿਸੇਨ ਸਤ੍ਥੁਨੋ ਹਤ੍ਥਸਮ੍ਫਸ੍ਸਸਞ੍ਜਾਤਪਸਾਦਸੋਮਨਸ੍ਸਤਾਯ ਉਲ਼ਾਰਂ ਪੀਤਿਪਾਮੋਜ੍ਜਂ ਪਟਿਲਭਿਤ੍ਵਾ ਯਥਾਪਰਿਚਿਤਂ ਵਿਪਸ੍ਸਨਾਮਗ੍ਗਂ ਸਮਾਰੂਲ਼੍ਹੋ ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਸਤ੍ਥੁ ਦੇਸਨਾਵਿਲਾਸੇਨ ਮਗ੍ਗਪਟਿਪਾਟਿਯਾ ਸਬ੍ਬਕਿਲੇਸੇ ਖੇਪੇਤ੍ਵਾ ਛਲ਼ਭਿਞ੍ਞੋ ਅਹੋਸਿ. ਧਮ੍ਮਂ ਸੁਤ੍ਵਾ ਤਤ੍ਥ ਸਮਾਗਤਾਨਂ ਦੇਵਮਨੁਸ੍ਸਾਨਂ ਚਤੁਰਾਸੀਤਿਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸੀਤਿ ਵਦਨ੍ਤਿ. ਉਤ੍ਤਰੋ ਪਨ ਛਲ਼ਭਿਞ੍ਞੋ ਹੁਤ੍ਵਾ ਸੂਲਤੋ ਉਟ੍ਠਹਿਤ੍ਵਾ ਆਕਾਸੇ ਠਤ੍ਵਾ ਪਾਟਿਹਾਰਿਯਂ ਦਸ੍ਸੇਸਿ. ਮਹਾਜਨਾ ਅਚ੍ਛਰਿਯਬ੍ਭੁਤਚਿਤ੍ਤਾ ਜਾਤਾ ਅਹੇਸੁਂ. ਤਾਵਦੇਵਸ੍ਸ ਵਣੋਰੁਨ੍ਧਿ, ਸੋ ਭਿਕ੍ਖੂਹਿ ਆਵੁਸੋ ਤਾਦਿਸਂ ਦੁਕ੍ਖਂ ਅਨੁਭਵਨ੍ਤੋ ਕਥਂ ਤ੍ਵਂ ਵਿਪਸ੍ਸਨਂ ਅਨੁਯੁਞ੍ਜਿਤੁਂ ਸਕ੍ਖੀਤਿ ਪੁਟ੍ਠੋ ਪਗੇਵ ਮੇ ਆਵੁਸੋ ਸਂਸਾਰੇ ਆਦੀਨਵੋ ਸਙ੍ਖਾਰਾਨਞ੍ਚ ਸਭਾਵੋ ਸੁਦਿਟ੍ਠੋ. ਤਸ੍ਮਾਹਂ ਤਾਦਿਸਂ ਦੁਕ੍ਖਂ ਅਨੁਭਵਨ੍ਤੋਪਿ ਅਸਕ੍ਖਿਂ ਵਿਪਸ੍ਸਨਂ ਵਡ੍ਢੇਤ੍ਵਾ ਵਿਸੇਸਂ ਅਧਿਗਨ੍ਤੁਂਤਿ ਆਹ. ਅਥਾਪਰਭਾਗੇ ਸੋ ਭਿਕ੍ਖੁਸਙ੍ਘਮਜ੍ਝੇ ਅਤ੍ਤਨੋ ਪੁਬ੍ਬਚਰਿਤਾ ਪਦਾਨਂ ਪਕਾਸੇਨ੍ਤੋ ਇਮਾ ਗਾਥਾ ਅਭਾਸਿ.
੬. ਸੁਮੇਧੋ ਨਾਮ ਸਮ੍ਬੁਦ੍ਧੋ, ਦ੍ਵਤ੍ਤਿਂਸਵਰਲਕ੍ਖਣੋ;
ਵਿਵੇਕਕਾਮੋ ਸਮ੍ਬੁਦ੍ਧੋ, ਹਿਮਵਨ੍ਤ ਮੁਪਾਗਮਿ.
੭. ਅਜ੍ਝੋਗਹੇਤ੍ਵਾ ਹਿਮਵਨ੍ਤਂ, ਅਗ੍ਗੋ ਕਾਰੁਣਿਕੋ ਮੁਨਿ;
ਪਲ੍ਲਙ੍ਕਂ ਆਭੁਜਿਤ੍ਵਾਨ, ਨਿਸੀਦਿ ਪੁਰਿਸੁਤ੍ਤਮੋ.
੮. ਵਿਜ੍ਜਾਧਰੋ ਤਦਾ ਆਸਿਂ, ਅਨ੍ਤਲਿਕ੍ਖਚਰੋ ਅਹਂ;
ਤਿਸੂਲਂ ਸੁਕਤਂ ਗਯ੍ਹ, ਗਚ੍ਛਾਮਿ ਅਮ੍ਬਰੇ ਤਦਾ.
੯. ਪਬ੍ਬਤਗ੍ਗੇ ਯਥਾ ਅਗ੍ਗਿ, ਪੁਣ੍ਣਮਾਸੇਵ ਚਨ੍ਦਿਮਾ;
ਵਨਂ ਓਭਾਸਤੇ ਬੁਦ੍ਧੋ, ਸਾਲਰਾਜਾਵ ਫੁਲ੍ਲਿਤੋ.
੧੦. ਵਨਗ੍ਗਾ ਨਿਕ੍ਖਮਿਤ੍ਵਾਨ, ਬੁਦ੍ਧਰਂਸੀ ਵਿਧਾਵਰੇ;
ਨਲਗ੍ਗਿਵਣ੍ਣਸਙ੍ਕਾਸਾ, ਦਿਸ੍ਵਾ ਚਿਤ੍ਤਂ ਪਸਾਦਯਿਂ.
੧੧. ਵਿਚਿਨਂ ਅਦ੍ਦਸਂ ਪੁਪ੍ਫਂ, ਕਣਿਕਾਰਂ ਦੇਵਗਨ੍ਧਿਕਂ;
ਤੀਣਿ ਪੁਪ੍ਫਾਨਿ ਆਦਾਯ, ਬੁਦ੍ਧਸੇਟ੍ਠਂ ਅਪੂਜਯਿਂ.
੧੨. ਬੁਦ੍ਧਸ੍ਸ ਆਨੁਭਾਵੇਨ, ਤੀਣਿ ਪੁਪ੍ਫਾਨਿ ਮੇ ਤਦਾ;
ਉਦ੍ਧਵਣ੍ਟਾ ਅਧੋਪਤ੍ਤਾ, ਛਾਯਂ ਕੁਬ੍ਬਨ੍ਤਿ ਸਤ੍ਥੁਨੋ.
੧੩. ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿਚ;
ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਞ੍ਛਹਂ.
੧੪. ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਕਣਿਕਾਰੀਤਿ ਞਾਯਤਿ;
ਸਟ੍ਠਿਯੋਜਨ ਮੁਬ੍ਬੇਧਂ, ਤਿਂਸਯੋਜਨਵਿਤ੍ਥਤਂ.
੧੫. ਸਹਸ੍ਸਖਣ੍ਡਂ ਸਤਭੇਣ੍ਡੁ, ਧਜਾਲੁ ਹਰਿਤਾਮਯਂ;
ਸਤਸਹਸ੍ਸਾਨਿ ਬ੍ਯੂਹਾਨਿ, ਬ੍ਯਮ੍ਹੇ ਪਾਤੁਰਹਂਸੁ ਮੇ.
੧੬. ਸੋਣ੍ਣਮਯਾ ਮਣਿਮਯਾ, ਲੋਹਿਤਙ੍ਕਮਯਾ ਪਿਚ;
ਫਲਿਕਾ ਪਿਚ ਪਲ੍ਲਙ੍ਕਾ, ਯਦਿਚ੍ਛਕ ਯਦਿਚ੍ਛਕਾ.
੧੭. ਮਹਾਰਹਞ੍ਚ ਸਯਨਂ, ਤੂਲਿਕਂ ਵਿਕਤੀਯਕਂ;
ਉਦ੍ਦਲੋਮਿਕਏਕਨ੍ਤਂ, ਬਿਮ੍ਬੋਹਨਸਮਾਯੁਤਂ.
੧੮. ਭਵਨਾ ਨਿਕ੍ਖਮਿਤ੍ਵਾਨ, ਚਰਨ੍ਤੋ ਦੇਵਚਾਰਿਕਂ;
ਯਦਾ ਇਚ੍ਛਾਮਿ ਗਮਨਂ, ਦੇਵਸਂਘਪੁਰਕ੍ਖਤੋ.
੧੯. ਪੁਪ੍ਫਸ੍ਸ ਹੇਟ੍ਠਾ ਤਿਟ੍ਠਾਮਿ, ਉਪਰਿਚ੍ਛਦਨਂ ਮਮ;
ਸਮਨ੍ਤਾ ਯੋਜਨਸਤਂ, ਕਣਿਕਾਰੇਹਿ ਛਾਦਿਤਂ.
੨੦. ਸਟ੍ਠਿਤੁਰਿਯਸਹਸ੍ਸਾਨਿ, ਸਾਯਂ ਪਾਤਂ ਉਪਟ੍ਠਹੁਂ;
ਪਰਿਵਾਰੇਨ੍ਤਿ ਮਂ ਨਿਚ੍ਚਂ, ਰਤ੍ਤਿਨ੍ਦਿਵਮਤਨ੍ਦਿਤਾ.
੨੧. ਤਤ੍ਥ ਨਚ੍ਚੇਹਿ ਗੀਤੇਹਿ, ਤਾਲੇਹਿ ਵਾਦਿਤੇਹਿ ਚ;
ਰਮਾਮਿ ਖਿਡ੍ਡਾਰਤਿਯਾ, ਮੋਦਾਮਿ ਕਾਮਕਾਮਹਂ.
੨੨. ਤਤ੍ਥ ਭੁਤ੍ਵਾ ਚ ਪਿਤ੍ਵਾ ਚ, ਮੋਦਾਮਿ ਤਿਦਸੇ ਤਦਾ;
ਨਾਰੀਗਣੇਹਿ ਸਹਿਤੋ, ਮੋਦਾਮਿ ਬ੍ਯਮ੍ਹਮੁਤ੍ਤਮੇ.
੨੩. ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਦੇਵਰਜ੍ਜ ਮਕਾਰਯਿਂ;
ਸਤਾਨਂ ਤੀਣਿਕ੍ਖਤ੍ਤੁਂਚ, ਚਕ੍ਕਵਤ੍ਤੀ ਅਹੋਸਹਂ;
ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਂਖਿਯਂ.
੨੪. ਭਵਾਭਵੇ ਸਂਸਰਨ੍ਤੋ, ਮਹਾਭੋਗਂ ਲਭਾਮਹਂ;
ਭੋਗੇ ਮੇ ਊਨਤਾ ਨਤ੍ਥਿ, ਬੁਦ੍ਧਪੂਜਾਯਿ ਦਂ ਫਲਂ.
੨੫. ਦ੍ਵੇ ਮੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ;
ਅਞ੍ਞਂ ਗਤਿਂ ਨ ਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੨੬. ਦ੍ਵੇ ਮੇ ਕੁਲੇ ਪਜਾਨਾਮਿ, ਖਤ੍ਤਿਯੇ ਚਾਪਿ ਬ੍ਰਾਹ੍ਮਣੇ;
ਨੀਚੇ ਕੁਲੇ ਨ ਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੨੭. ਹਤ੍ਥਿਯਾਨਂ ਅਸ੍ਸਯਾਨਂ, ਸਿਵਿਕਂ ਸਨ੍ਦਮਾਨਿਕਂ;
ਲਭਾਮਿ ਸਬ੍ਬਮੇਵੇ ਤਂ, ਬੁਦ੍ਧਪੂਜਾਯਿਦਂ ਫਲਂ.
੨੮. ਦਾਸੀਗਣਂ ਦਾਸਗਣਂ, ਨਾਰਿਯੋ ਚ ਅਲਙ੍ਕਤਾ;
ਲਭਾਮਿ ਸਬ੍ਬ ਮੇਵੇ ਤਂ, ਬੁਦ੍ਧਪੂਜਾਯਿਦਂ ਫਲਂ.
੨੯. ਕੋਸੇਯ੍ਯਕਮ੍ਬਲਿਯਾਨਿ, ਖੋਮਕਪ੍ਪਾਸਿਕਾਨਿਚ;
ਲਭਾਮਿ ਸਬ੍ਬਮੇਵੇਤਂ, ਬੁਦ੍ਧਪੂਜਾਯਿਦਂ ਫਲਂ.
੩੦. ਨਵਵਤ੍ਥਂ ਨਵਫਲਂ, ਨਵਗ੍ਗਰਸਭੋਜਨਂ;
ਲਭਾਮਿ ਸਬ੍ਬਮੇਵੇਤਂ, ਬੁਦ੍ਧਪੂਜਾਯਿਦਂ ਫਲਂ.
੩੧. ਇਮਂ ਖਾਦ ਇਮਂ ਭੁਞ੍ਜ, ਇਮਮ੍ਹਿ ਸਯਨੇ ਸਯ;
ਲਭਾਮਿ ਸਬ੍ਬਮੇਵੇਤਂ, ਬੁਦ੍ਧਪੂਜਾਯਿਦਂ ਫਲਂ.
੩੨. ਸਬ੍ਬਤ੍ਥ ਪੂਜਿਤੋ ਹੋਮਿ, ਯਸੋ ਅਚ੍ਚੁਗ੍ਗਤੋ ਮਮ;
ਮਹੇਸਕ੍ਖੋ ਘਦਾ ਹੋਮਿ, ਅਭੇਜ੍ਜਪਰਿਸੋ ਸਦਾ;
ਞਾਤੀਨਂ ਉਤ੍ਤਮੋ ਹੋਮਿ, ਬੁਦ੍ਧਪੂਜਾਯਿਦਂ ਫਲਂ.
੩੩. ਸੀਤਂ ਉਣ੍ਹਂ ਨ ਜਾਨਾਮਿ, ਪਰਿਲ਼ਾਹੋ ਨ ਵਿਜ੍ਜਤਿ;
ਅਥੋ ਚੇਤਸਿਕਂ ਦੁਕ੍ਖਂ, ਹਦਯੇ ਮੇ ਨ ਵਿਜ੍ਜਤਿ.
੩੪. ਸੁਵਣ੍ਣਵਣ੍ਣੋ ਹੁਤ੍ਵਾਨ, ਸਂਸਰਾਮਿ ਭਵਾਭਵੇ;
ਵੇਵਣ੍ਣਿਯਂ ਨ ਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੩੫. ਦੇਵਲੋਕਾ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;
ਸਾਵਤ੍ਥਿਯਂ ਪੁਰੇ ਜਾਤੋ, ਮਹਾਸਾਲੇ ਸੁਅਡ੍ਢਕੇ.
੩੬. ਪਞ੍ਚਕਾਮਗੁਣੇ ਹਿਤ੍ਵਾ, ਪਬ੍ਬਜਿਂਅਨਗਾਰਿਯਂ;
ਜਾਤਿਯਾ ਸਤ੍ਤਵਸ੍ਸੋਹਂ, ਅਰਹਤ੍ਤਮਪਾਪੁਣਿਂ.
੩੭. ਉਪਸਮ੍ਪਾਦਯੀ ਬੁਦ੍ਧੋ, ਗੁਣਮਞ੍ਞਾਯ ਚਕ੍ਖੁਮਾ;
ਤਰੁਣੋਵ ਪੂਜਨੀਯੋ ਹਂ, ਬੁਦ੍ਧਪੂਜਾਯਿਦਂ ਫਲਂ.
੩੮. ਦਿਬ੍ਬਚਕ੍ਖੁਂ ਵਿਸੁਦ੍ਧਂ ਮੇ, ਸਮਾਧਿਕੁਸਲੋ ਅਹਂ;
ਅਭਿਞ੍ਞਾਪਾਰਮਿਪ੍ਪਤ੍ਤੋ, ਬੁਦ੍ਧਪੂਜਾਯਿਦਂ ਫਲਂ.
੩੯. ਪਟਿਸਮ੍ਭਿਦਾ ਅਨੁਪ੍ਪਤ੍ਤੋ, ਇਦ੍ਧਿਪਾਦੇਸੁ ਕੋਵਿਦੋ;
ਸਦ੍ਧਮ੍ਮੇ ਪਾਰਮਿਪ੍ਪਤ੍ਤੋ, ਬੁਦ੍ਧਪੂਜਾਯਿਦਂ ਫਲਂ.
੪੦. ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਬੁਦ੍ਧਮਭਿਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੪੧. ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;
ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.
੪੨. ਸ੍ਵਾਗਤਂ ਵਤ ਮੇ ਆਸਿ, ਬੁਦ੍ਧਸੇਟ੍ਠਸ੍ਸ ਸਨ੍ਤਿਕਂ;
ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤੋ, ਕਤਂ ਬੁਦ੍ਧਸ੍ਸ ਸਾਸਨਂ.
੪੩. ਪਟਿਸਮ੍ਭਿਦਾ ਚਤਸ੍ਸੋ ਚ, ਵਿਮੇਕ੍ਖਾ ਪਿਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂਤਿ;
ਤਂ ਸੁਤ੍ਵਾ ਬਹੂ ਕੁਸਲਕਮ੍ਮਪਰਾਯਣਾ ਅਹੇਸੁਂ.
੪੪. ਸਹੇਤੁਕਾ ਪਚ੍ਛਿਮਿਕਾਪਿ ਸਤ੍ਤਾ,
ਪਾਪਂ ਨ ਸਕ੍ਕੋਨ੍ਤਿ ਜਹਾਤੁਮੇਵਂ;
ਅਨਿਚ੍ਛਮਾਨੇਹਿ ਜਨੇਹਿ ਦੁਕ੍ਖਂ,
ਆਰਾਵ ਪਾਪਂ ਪਰਿਵਜ੍ਜਨੀਯਂਤਿ.
ਉਤ੍ਤਰਸਾਮਣੇਰਸ੍ਸ ਵਤ੍ਥੁਂ ਚਤੁਤ੍ਥਂ.