੧੯. ਪਾਨੀਯਦਿਨ੍ਨਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ਅਞ੍ਞਤਰਸ੍ਮਿਂ ਜਨਪਦੇ ਕਿਰੇ ਕੋ ਮਨੁਸ੍ਸੋ ਰਟ੍ਠਤੋ ਰਟ੍ਠਂ ਜਨਪਦਤੋ ਜਨਪਦਂ ਵਿਚਰਨ੍ਤੋ ਅਨੁਕ੍ਕਮੇਨ ਚਨ੍ਦਭਾਗਾਨਦੀਤੀਰਂ ਪਤ੍ਵਾ ਨਾਵਂ ਅਭਿਰੁਹਿਤ੍ਵਾ ਪਰਤੀਰਂ ਗਚ੍ਛਤਿ. ਅਥਾਪਰਾ ਗਬ੍ਭਿਨਿਤ੍ਥੀ ਤਾਯ ਏਵ ਨਾਵਾਯ ਗਚ੍ਛਤਿ, ਅਥ ਨਾਵਾ ਗਙ੍ਗਾਮਜ੍ਝਪ੍ਪਤ੍ਤਕਾਲੇ ਤਸ੍ਸਾ ਕਮ੍ਮਜਵਾਤਾ ਚਲਿਂਸੁ. ਤਤੋ ਸਾ ਵਿਜਾਯਿਤੁਮਸਕ੍ਕੋਨ੍ਤੀ ਕਿਲਨ੍ਤਾ ਪਾਨੀਯਂ ਮੇ ਦੇਥ, ਪਿਪਾਸਿਤਾਮ੍ਹਿਤਿ ਮਨੁਸ੍ਸੇ ਯਾਚਿ. ਤੇ ਤਸ੍ਸਾ ਵਚਨਂ ਅਸੁਣਨ੍ਤਾ ਵਿਯ ਪਾਨੀਯਂ ਨਾਦਂਸੁ, ਅਥ ਸੋ ਜਾਨਪਦਿਕੋ ਤਸ੍ਸਾ ਕਰੁਣਾਯਨ੍ਤੋ [ਕਰੁਣਾਯਪਾਨੀਯਂ, ਕਰੁਣਾਯਨ੍ਤੋਪਾਨੀਯਂ, ਕਰੁਣਾਯਤੋਯਂ ਇਤਿਚਕਤ੍ਥਚਿ] ਤੋਯਂ ਗਹੇਤ੍ਵਾ ਮੁਖੇ ਆਸਿਞ੍ਚਿ, ਤਸ੍ਮਿਂ ਖਣੇ ਸਾ ਲਦ੍ਧਸ੍ਸਾਸਾ ਸੁਖੇਨ ਦਾਰਕਂ ਵਿਜਾਯਿ, ਅਥ ਤੇ ਤੀਰਂ ਪਤ੍ਵਾ ਕਤਿਪਯਦਿਵਸੇਨ ਅਤ੍ਤਨੋ ਅਤ੍ਤਨੋ ਠਾਨਂ ਪਾਪੁਣਿਂਸੁ. ਅਥਾਪਰਭਾਗੇ ਸੋ ਜਾਨਪਦਿਕੋ ਅਞ੍ਞਤਰਕਿਚ੍ਚਂ ਪਟਿਚ੍ਚ ਤਸ੍ਸਾ ਇਤ੍ਥਿਯਾ ਵਸਨਨਗਰਂ ਪਤ੍ਵਾ ਤਤ੍ਥ ਤਤ੍ਥ ਆਹਿਣ੍ਡਨ੍ਤੋ ਨਿਵਾਸਨਟ੍ਠਾਨਂ ਅਲਭਿਤ੍ਵਾ ਨਗਰਦ੍ਵਾਰੇ ਸਾਲਂ ਗਨ੍ਤ੍ਵਾ ਤਤ੍ਥ ਨਿਪਜ੍ਜਿ. ਤਸ੍ਮਿਂਯੇਵ ਦਿਵਸੇ ਚੋਰਾ ਨਗਰਂ ਪਵਿਸਿਤ੍ਵਾ ਰਾਜਗੇਹੇ ਸਨ੍ਧਿਂ ਛਿਨ੍ਦਿਤ੍ਵਾ ਧਨਸਾਰਂ ਗਹੇਤ੍ਵਾ ਗਚ੍ਛਨ੍ਤਾ ਰਾਜਪੁਰਿਸੇਹਿ ਅਨੁਬਨ੍ਧਾ ਗਨ੍ਤ੍ਵਾ ਤਾਯੇਵ ਸਾਲਾਯ ਛਡ੍ਡੇਤ੍ਵਾ ਪਲਾਯਿਂਸੁ. ਅਥ ਰਾਜਪੁਰਿਸਾ ਆਗਨ੍ਤ੍ਵਾ ਚੋਰੇ ਅਪਸ੍ਸਨ੍ਤਾ ਤਂ ਜਾਨਪਦਿਕਂ ਦਿਸ੍ਵਾ ਅਯਂ ਚੋਰੋਤਿ ਗਹੇਤ੍ਵਾ ਪਚ੍ਛਾਬਾਹਂ ਗਾਲ਼੍ਹਂ ਬਨ੍ਧਿਤ੍ਵਾ ਪੁਨ ਦਿਵਸੇ ਰਞ੍ਞੋ ਦਸ੍ਸੇਸੁਂ. ਰਞ੍ਞਾ ਕਸ੍ਮਾ ਭਣੇ ਚੋਰਕਮ੍ਮ ਮਕਾਸੀਤਿ ਪੁਚ੍ਛਿਤੋ ਨਾਹਂ ਦੇਵ ਚੋਰੋ, ਆਗਨ੍ਤੁਕੋਮ੍ਹੀਤਿ ਵੁਤ੍ਤੇ ਰਾਜਾ ਚੋਰੇ ਪਰਿਯੇਸਿਤ੍ਵਾ ਅਲਭਨ੍ਤੋ ਅਯਮੇਵ ਚੋਰੋ, ਇਮਂ ਮਾਰੇਥਾਤਿ ਆਣਾਪੇਸਿ. ਰਾਜਪੁਰਿਸੇਹਿ ਤਂ ਗਾਲ਼੍ਹਂ ਬਨ੍ਧਿਤ੍ਵਾ ਆਘਾਤਨਂ ਨੀਤੇ ਸਾ ਇਤ੍ਥੀ ਤਂ ਤਥਾ ਨੀਯਮਾਨਂ ਦਿਸ੍ਵਾ ਸਞ੍ਜਾਨਿਤ੍ਵਾ ਕਮ੍ਪਮਾਨਹਦਯਾ ਮੁਹੁਤ੍ਤੇਨ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਦੇਵ ਏਸੋ ਨ ਚੋਰੋ ਆਗਨ੍ਤੁਕੋ ਮੁਞ੍ਚਥੇਤਂ ਦੇਵਾਤਿ ਆਹ. ਰਾਜਾ ਤਸ੍ਸਾ ਕਥਂ ਅਸਦ੍ਦਹਨ੍ਤੋ ਯਜ੍ਜੇਤਂ ਮੋਚੇਤੁ ਮਿਚ੍ਛਸਿ. ਤਸ੍ਸਗ੍ਘਨਕਂ ਧਨਂ ਦਤ੍ਵਾ ਮੁਞ੍ਚਾਪੇਹੀਤਿ, ਸਾ ਸਾਮਿ ਮਮ ਗੇਹੇ ਧਨਂ ਨਤ੍ਥਿ. ਅਪਿਚ ਮਮ ਸਤ੍ਤਪੁਤ੍ਤੇਹਿ ਸਦ੍ਧਿਂ ਮਂ ਦਾਸਿਂ ਕਰੋਹਿ, ਏਤਂ ਮੁਞ੍ਚ ਦੇਵਾਤਿ ਆਹ, ਅਥ ਰਾਜਾ ਤ੍ਵਂ ਏਤਂ ਅਧੁਨਾਗਤੋਤਿ ਵਦਸਿ. ਏਤਂ ਨਿਸ੍ਸਾਯ ਪੁਤ੍ਤੇਹਿ ਸਦ੍ਧਿਂ ਅਤ੍ਤਾਨਂ ਦਾਸਤ੍ਤਂ ਸਾਵੇਸਿ. ਕਿਮੇਸੋ ਤੇ ਞਾਤਿ ਵਾ, ਉਦਾਹੁ ਉਪਕਾਰਕੋਤਿ ਪੁਚ੍ਛਨ੍ਤੋ ਆਹ.

੧. ਕਿਂਤੇ ਭੋਤਿ ਅਯਂ ਪੋਸੋ, ਤੁਵਂ ਪੁਚ੍ਛਾਮਿ ਸਂਸਯਂ;

ਭਾਤਾ ਵਾ ਤੇ ਪਿਤਾ ਹੋਤਿ, ਪਤਿ ਵਾ ਦੇਵਰੋ ਤਵ.

੨. ਞਾਤਿ ਸਾਲੋਹਿਤੋ ਕਿਨ੍ਨੁ, ਉਦਾਹੁ ਇਣਦਾਯਕੋ;

ਅਥੋਪਕਾਰਕੋ ਕਿਨ੍ਨੁ, ਕਸ੍ਮਾਸ੍ਸ ਦੇਸਿ ਜੀਵਿਤਂਤਿ.

ਤਤੋ ਸਾ ਆਹ.

੩. ਏਸੋ ਮੇ ਪੁਰਿਸੋ ਦੇਵ, ਕਤਪੁਬ੍ਬੋਪਕਾਰਕੋ;

ਅਤਾਣਮੇਕਿਕਂ [ਅਤ੍ਤਾਨਮੇਕਿਕਂ ਇਤਿਕਤ੍ਥਚਿ] ਚੇਸੋ, ਦੁਕ੍ਖਿਤਂ ਮਰਣੇ ਠਿਤਂ.

੪. ਵਿਜਾਯਿਤੁ ਮਸਕ੍ਕੋਨ੍ਤਿਂ, ਗਬ੍ਭਿਨਿਂ ਦੁਕ੍ਖਵੇਦਿਨਿਂ;

ਤੋਯੇਨ ਮਂ ਉਪਟ੍ਠਾਸਿ, ਤੇਨਾਹਂ ਸੁਖਿਤਾ ਤਦਾ.

੫. ਭਙ੍ਗਕਲ੍ਲੋਲਮਾਲਾਯ, ਉਤ੍ਤਰਨ੍ਤਂ ਮਹਣ੍ਣਵਂ;

ਪਹਾਯ ਪਾਤੁਂ ਕੂਪਸ੍ਸ, ਯਾਤਿ ਲੋਕੋ ਪਿਪਾਸਿਤੋ.

੬. ਤਥੇਵ ਵਿਜ੍ਜਮਾਨੇਸੁ, ਜਨੇਸੁ ਮਨੁਜਾਧਿਪ,

ਏਕਸ੍ਸੇਵ ਮਨਸ੍ਮਿਂਹਿ, ਗੁਣਂ ਤਿਟ੍ਠਤਿ ਸਾਧੁਕਂ.

੭. ਪਹਤ੍ਵਾਨ ਮਤਂ ਹਤ੍ਥਿਂ, ਮਂਸਤ੍ਥੀ ਕੇਚਿ ਜਨ੍ਤੁਨੋ;

ਅਨੁਬਨ੍ਧਨ੍ਤਿ ਮਂਸਤ੍ਥਂ, ਸਸਂ ਧਾਵਨ੍ਤ ਮੇਕਕਂ.

੮. ਤਥੇਵ ਵਿਜ੍ਜਮਾਨੇਸੁ, ਜਨੇਸੁ ਮਨੁਜਾਧਿਪ;

ਗੁਣਵਨ੍ਤ ਮਨੁਬਨ੍ਧਨ੍ਤਿ, ਸਪ੍ਪੁਰਿਸਂ ਕਤਵੇਦਿਕਂ.

੯. ਤਸ੍ਮਾ ਸਪ੍ਪੁਰਿਸੇ ਧਮ੍ਮੇ, ਪਤਿਟ੍ਠਾਸ੍ਮਿ ਨਰਾਧਿਪ;

ਅਨੁਸ੍ਸਰਨ੍ਤਿ ਏਤੇਨ, ਕਤਪੁਬ੍ਬੂ ਪਕਾਰਕਂ.

੧੦. ਅਹਞ੍ਚ ਮਮ ਪੁਤ੍ਤਾ ਚ, ਏਤੇਨਮ੍ਹ ਸੁਖਾਪਿਤਾ;

ਜੀਵਿਤਮ੍ਪਿ ਪਰਿਚ੍ਚਜ੍ਜ, ਮੁਚ੍ਚਨੀਯੋ ਅਯਂ ਮਯਾਤਿ.

ਤਤੋ ਰਾਜਾ ਦੋਵਾਰਿਕਂ ਪਕ੍ਕੋਸਿਤ੍ਵਾ ਤਮ੍ਪਿ ਪੁਚ੍ਛਿਤ੍ਵਾ ਅਧੁਨਾਗਤਭਾਵਂ ਞਤ੍ਵਾ ਤਸ੍ਸਾ ਸਪ੍ਪੁਰਿਸਧਮ੍ਮੇ ਸਨ੍ਤੁਟ੍ਠੋ ਤੇਸਂ ਉਭਿਨ੍ਨਮ੍ਪਿ ਮਹਨ੍ਤਂ ਯਸਂ ਅਨੁਪ੍ਪਦਾਸਿ. ਤੇ ਲਦ੍ਧਯਸਾ ਤ ਤੋ ਪਟ੍ਠਾਯ ਦਾਨਾਦੀਨਿ ਪੁਞ੍ਞਕਮ੍ਮਾਨਿ ਕਤ੍ਵਾ ਸਗ੍ਗਪਰਾਯਣਾ ਅਹੇਸੁਨ੍ਤਿ.

੧੧. ਧਮ੍ਮੇ ਪਤਿਟ੍ਠਿਤਮਨਾ ਅਪਿ ਮਾਤੁਗਾਮਾ,

ਏਵਂ ਲਭਨ੍ਤਿ ਵਿਭਵਞ੍ਚ ਪਸਂਸਨਞ੍ਚ;

ਧਮ੍ਮਞ੍ਚ ਸਾਧੁਚਰਿਤਂ ਮਨਸੀਕਰੋਨ੍ਤੋ,

ਧਮ੍ਮੇਸੁ ਵਤ੍ਤਥ ਸਦਾ ਸੁਚਿਸਜ੍ਜਨਾਤਿ.

ਪਾਨੀਯਦਿਨ੍ਨਸ੍ਸ ਵਤ੍ਥੁਂ ਨਵਮਂ.