੧੭. ਚੋਰਸਹਾਯਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਮ੍ਹਾਕਂ ਭਗਵਤਿ ਪਰਿਨਿਬ੍ਬੁਤੇ ਜਮ੍ਬੁਦੀਪੇ ਦੇਵਦਹਨਗਰੇ ਏਕੋ ਮਨੁਸ੍ਸੋ ਦੁਕ੍ਖਿਤੋ ਤਤ੍ਥ ਤਤ੍ਥ ਵਿਚਰਨ੍ਤੋ ਪਚ੍ਚਨ੍ਤੇ ਅਞ੍ਞਤਰਂ ਗਾਮਂ ਗਨ੍ਤ੍ਵਾ ਤਤ੍ਥ ਏਕਸ੍ਮਿਂ ਕੁਲਗੇਹੇ ਨਿਵਾਸਂ ਕਪ੍ਪੇਸਿ. ਤਤ੍ਥ ਮਨੁਸ੍ਸਾ ਤਸ੍ਸ ਯਾਗੁਭਤ੍ਤਂ ਦਤ੍ਵਾ ਪੋਸੇਸੁਂ, ਤਤੋ ਸੋ ਤਤ੍ਥ ਮਨੁਸ੍ਸੇਹਿ ਮਿਤ੍ਤਸਨ੍ਥਵਂ ਕਤ੍ਵਾ ਕਤਿਪਾਹਂ ਤਤ੍ਥ ਵਸਿਤ੍ਵਾ ਅਞ੍ਞਟ੍ਠਾਨਂ ਗਨ੍ਤ੍ਵਾ ਅਪਰਭਾਗੇ ਚੋਰਕਮ੍ਮਂ ਕਰੋਨ੍ਤੋ ਜੀਵਿਕਂ ਕਪ੍ਪੇਤਿ. ਅਥੇਕਦਿਵਸਂ ਚੋਰੇਨ੍ਤਂ ਤਂ ਰਾਜਪੁਰਿਸਾ ਗਹੇਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ਤਂ ਬਨ੍ਧਨਾਗਾਰੇ ਕਰੋਥਾਤਿ ਆਣਾਪੇਸਿ, ਤੇ ਤਂ ਬਨ੍ਧਨਾਗਾਰਂ ਨੇਤ੍ਵਾ ਸਙ੍ਖਲਿਕਾਹਿ ਬਨ੍ਧਿਤ੍ਵਾ ਆਰਕ੍ਖਕਾਨਂ ਪਟਿਪਾਦੇਤ੍ਵਾ ਅਗਮਂਸੁ, ਬਨ੍ਧਨਾਗਾਰੇ ਵਸਨ੍ਤਸ੍ਸ ਤਸ੍ਸ ਦ੍ਵਾਦਸਸਂਵਚ੍ਛਰਾਨਿ ਅਤਿਕ੍ਕਨ੍ਤਾਨਿ. ਤਤੋ ਅਪਰਭਾਗੇ ਤਸ੍ਸ ਪੁਬ੍ਬਸਹਾਯੋ ਪਚ੍ਚਨ੍ਤਗਾਮਵਾਸੀ ਮਨੁਸ੍ਸੋ ਕੇਨਚਿ ਕਮ੍ਮੇਨ ਦੇਵਦਹ ਮਾਗਤੋ ਤਤ੍ਥ ਤਤ੍ਥ ਆਹਿਣ੍ਡਨ੍ਤੋ ਬਨ੍ਧਨਾਗਾਰੇ ਬਦ੍ਧਂ ਤਂ ਅਦ੍ਦਸ. ਦਿਸ੍ਵਾ ਤਸ੍ਸ ਹਦਯਂ ਕਮ੍ਪਿ, ਸੋ ਰੋਦਿਤ੍ਵਾ ਪਰਿਦੇਵਿਤ੍ਵਾ ਕਿਂ ਤੇ ਮਯਾ ਕਤ੍ਤਬ੍ਬਂ ਸਮ੍ਮਾਤਿ ਪੁਚ੍ਛਿ. ਤਤੋ ਤੇਨ ਸਮ੍ਮ ਬਨ੍ਧਨਾਗਾਰੇ ਵਸਨ੍ਤਸ੍ਸ ਮੇ ਇਦਾਨਿ ਦ੍ਵਾਦਸਸਂਵਚ੍ਛਰਾਨਿ ਅਤਿਕ੍ਕਨ੍ਤਾਨਿ, ਏਤ੍ਤਕਂ ਕਾਲਂ ਦੁਬ੍ਭੋਜਨਾਦਿਨਾ ਮਹਾਦੁਕ੍ਖਂ ਅਨੁਭੋਮਿ. ਯਾਵਾਹਂ ਆਹਾਰਂ ਪਰਿਯੇਸਿਤ੍ਵਾ ਭੁਞ੍ਜਿਤ੍ਵਾ ਆਗਮਿਸ੍ਸਾਮਿ. ਤਾਵ ਮਂ ਇਤੋ ਮੁਞ੍ਚਨੁਪਾਯਂ ਜਾਨਾਹੀਤਿ ਵੁਤ੍ਤੇ ਸੋ ਸਪ੍ਪੁਰਿਸੋ.

੧. ਰੂਪੇਨ ਕਿਨ੍ਤੁ ਗੁਣਸੀਲਵਿਵਜ੍ਜਿਤੇਨ,

ਮਿਚ੍ਛਾਲਯਸ੍ਸ ਕਿਤਵਸ੍ਸ ਧਿਯਾ ਕਿਮਤ੍ਥਂ;

ਦਾਨਾ ਦਿਚਾਗਵਿਗਤੇਨ ਧਨੇਨ ਕਿਂ ਵਾ;

ਮਿਤ੍ਤੇਨ ਕਿਂ ਬ੍ਯਸਨਕਾਲਪਰਮ੍ਮੁਖੇਨਾਤਿ.

ਏਵਞ੍ਚ ਪਨ ਵਤ੍ਵਾ ਸਾਧੁ ਸਮ੍ਮ ਕਰੋਮਿ ਤੇ ਵਚਨਨ੍ਤਿ ਆਰਕ੍ਖਕਾਨਂ ਸਨ੍ਤਿਕਂ ਗਨ੍ਤ੍ਵਾ ਭੋਨ੍ਤੋ ਯਾਵੇਸੋ ਭਤ੍ਤਂ ਭੁਞ੍ਜਿਤ੍ਵਾ ਆਗਚ੍ਛਤਿ. ਤਾਵਾਹਂ ਤਸ੍ਸ ਪਾਟਿਭੋਗੋ ਭਵਿਸ੍ਸਾਮਿ. ਵਿਸ੍ਸਜ੍ਜੇਥ ਨਨ੍ਤਿ ਆਹ, ਤੇਹਿ ਨ ਸਕ੍ਕਾ ਭੋ ਏਤਂ ਵਿਸ੍ਸਜ੍ਜੇਤੁਂ, ਅਪਿ ਚ ਖੋ ਯਾਵਾਯਂ ਆਗਚ੍ਛਤਿ. ਤਾਵ ਤ੍ਵਂ ਅਯਸਙ੍ਖਲਿਕਾਯ ਬਦ੍ਧੋ ਨਿਸੀਦਿਸ੍ਸਸਿ, ਏਵਂ ਤਂ ਵਿਸ੍ਸਜ੍ਜੇਸ੍ਸਾਮ, ਨੋ ਚੇ ਨ ਸਕ੍ਕਾਤਿ ਆਹਂਸੁ, ਸੋ ਏਵਮ੍ਪਿ ਹੋਤੁ ਸਮ੍ਮਾਤਿ ਵਤ੍ਵਾ ਤਸ੍ਸ ਪਾਦਤੋ ਸਙ੍ਖਲਿਕਂ ਮੁਞ੍ਚਿਤ੍ਵਾ ਅਤ੍ਤਨੋ ਪਾਦੇ ਕਤ੍ਵਾ ਬਨ੍ਧਨਾਗਾਰਂ ਪਵਿਸਿਤ੍ਵਾ ਇਤਰਂ ਮੁਞ੍ਚਾਪੇਸਿ. ਸੋਪਿ ਅਸਪ੍ਪੁਰਿਸੋ ਬਨ੍ਧਨਾ ਮੁਤ੍ਤੋ ਨ ਪੁਨ ਤਂ ਠਾਨ ਮਗਮਾਸਿ, ਅਹੋ ਅਕਤਞ੍ਞੁਨੋ ਪਕਤਿਂ ਞਾਤੁਂ ਭਾਰਿਯਂ. ਯਥਾਹ.

੨. ਵਾਰਿਪੂਰੇ ਯਥਾ ਸੋਬ੍ਭੇ, ਨੇਵਨ੍ਤੋ ਵਿਸਮਂ ਸਮਂ;

ਪਞ੍ਞਾਯਤੇਵਂਸਾਧੁਸ੍ਸ, ਭਾਵਂ ਮਨਸਿ ਸਮ੍ਭਵਂ.

੩. ਭਾਸਨ੍ਤਿ ਮੁਖਤੋ ਏਕਂ, ਚਿਨ੍ਤੇਨ੍ਤਿ ਮਨਸਾ ਪਰਂ;

ਕਾਯੇਨੇਕਂ ਕਰੋਨ੍ਤੇਵਂ, ਪਕਤਾਯਮਸਾਧੁਨਂ.

੪. ਤੇਸਂ ਯੋ ਭਾਵਮਞ੍ਞਾਸਿ, ਸੋਵ ਪਣ੍ਡਿਤਜਾਤਿਕੋ;

ਬਹੁਸ੍ਸੁਤੋਪਿ ਸੋਯੇਵ, ਪਰਚਿਤ੍ਤਵਿਦੂਪਿ ਸੋ.

ਅਥਸ੍ਸ ਬਨ੍ਧਨਾਗਾਰੇ ਵਸਨ੍ਤਸ੍ਸ ਦ੍ਵਾਦਸਸਂਵਚ੍ਛਰਾਨਿ ਅਤਿਕ੍ਕਨ੍ਤਾਨਿ. ਏਤ੍ਤਕਂ ਕਾਲਂ ਜਿਘਚ੍ਛਾਪੀਲ਼ਿਤੇਨ ਤੇਨ ਆਹਾਰਤ੍ਤਾਯ ਪਰੋ ਨ ਯਾਚਿਤਪੁਬ੍ਬੋ, ਅਨੁਚ੍ਛਿਟ੍ਠਾਹਾਰਂ ਲਭਨਦਿਵਸਤੋ ਅਲਭਨਦਿਵਸਾਯੇਵ ਬਹੁਤਰਾ ਹੋਨ੍ਤਿ, ਅਥ ਦ੍ਵਾਦਸਸਂਵਚ੍ਛਰਾਤਿਕ੍ਕਮੇ ਰਞ੍ਞੋ ਪੁਤ੍ਤੋ ਨਿਬ੍ਬਤ੍ਤਿ. ਤਦਾ ਰਾਜਾ ਅਤ੍ਤਨੋ ਵਿਜਿਤੇ ਸਬ੍ਬਬਨ੍ਧਨਾਗਾਰਾਨਿ ਵਿਵਰਾਪੇਸਿ. ਅਨ੍ਤਮਸੋ ਮਿਗਪਕ੍ਖਿਨੋਪਿ ਬਨ੍ਧਨਾ ਮੁਞ੍ਚਾਪੇਸਿ. ਦ੍ਵਾਰੇ ਵਿਵਟਮਤ੍ਤੇਯੇਵ ਬਨ੍ਧਨਾਗਾਰੇ ਮਨੁਸ੍ਸਾ ਇਚ੍ਛਿਤਿਚ੍ਛਿਤਟ੍ਠਾਨਂ ਅਗਮਂਸੁ. ਸੋ ਪਨੇਕੋਵ ਤੇਹਿ ਸਦ੍ਧਿਂ ਅਗਨ੍ਤ੍ਵਾ ਓਹੀਯਿ. ਆਰਕ੍ਖਕੇਹਿ ਤ੍ਵਂ ਭੋ ਕਸ੍ਮਾ ਨ ਗਚ੍ਛਸੀਤਿ ਵੁਤ੍ਤੇ ਅਹਂ ਭੋ ਪਞ੍ਞਾਤਭਾਵੇਨ ਇਦਾਨਿ ਨ ਗਮਿਸ੍ਸਾਮਿ. ਅਤੀਵ ਪਰਿਹੀਨਗਤ੍ਤੋਸ੍ਮਿ. ਅਨ੍ਧਕਾਰੇ ਗਮਿਸ੍ਸਾਮੀਤਿ ਵਤ੍ਵਾ ਅਨ੍ਧਕਾਰੇ ਆਗਤੇ ਨਿਕ੍ਖਮ੍ਮ ਅਨ੍ਤੋਨਗਰੇ ਵਿਸ੍ਸਾਸਿਕਾਨਂ ਅਭਾਵੇਨ ਕੁਤੋ ਆਹਾਰਂ ਲਭਿਸ੍ਸਾਮੀਤਿ ਚਿਨ੍ਤੇਨ੍ਤੋ ਨਿਕ੍ਖਮ੍ਮ ਰਤ੍ਤਨ੍ਧਕਾਰੇ ਆਮਕਸੁਸਾਨ ਮਗਮਾਸਿ. ਏਤ੍ਥਾਹਾਰਂ ਲਭਿਸ੍ਸਾਮੀਤਿ. ਤਤ੍ਥ ਸੋ ਅਧੁਨਾ ਨਿਕ੍ਖਿਤ੍ਤਮਤਮਨੁਸ੍ਸਂ ਦਿਸ੍ਵਾ ਮਨੁਸ੍ਸਟ੍ਠਿਨਾ ਮਂਸਂ ਛਿਨ੍ਦਿਤ੍ਵਾ ਸੀਸਕਪਾਲੇ ਪਕ੍ਖਿਪਿਤ੍ਵਾ ਤੀਹਿ ਮਨੁਸ੍ਸਸੀਸੇਹਿ ਕਤਉਦ੍ਧਨੇ ਠਪੇਤ੍ਵਾ ਚਿਤਕਤੋ ਓਮੁਕ੍ਕਅਲਾਤੇਹਿ ਅਗ੍ਗਿਂ ਕਤ੍ਵਾ ਸੁਸਾਨਂ ਨਿਬ੍ਬਾਪਨਤ੍ਥਾਯਾ ਭਤਉਦਕੇਨ ਮਨੁਸ੍ਸਟ੍ਠਿਨਾ ਆਲੋਲੇਨ੍ਤੋ ਮਂਸਂ ਪਚਿਤ੍ਵਾ ਓਤਾਰੇਤ੍ਵਾ ਸਾਖਾਭਙ੍ਗੇਨ ਹਿਰਿਕੋਪੀਣਂ ਪਟਿਚ੍ਛਾਦੇਤ੍ਵਾ ਨਿਵਤ੍ਥਪਿਲੋਕਿਕਂ ਵਾਤਾਵਰਣਂ ਕਤ੍ਵਾਨਿਸੀਦਿ. ਤਸ੍ਮਿਂ ਖਣੇ ਤਤ੍ਥ ਪਿਪ੍ਪਲੀਰੁਕ੍ਖੇ ਅਧਿਵਤ੍ਥਾ ਦੇਵਤਾ ਤਸ੍ਸ ਤਂ ਕਿਰਿਯਂ ਦਿਸ੍ਵਾ ਪੁਚ੍ਛਿਸ੍ਸਾਮਿ ਤਾਵ ਨਨ੍ਤਿ ਤਂ ਉਪਸਙ੍ਕਮਿਤ੍ਵਾ ਏਵਮਾਹ. ਭੋ ਤ੍ਵਂ ਘਨਤਰਤਿਮਿਰਾਕੁਲੇ ਮਹਾਰਤ੍ਤਿਯਂ ਤਤ੍ਥ ਤਤ੍ਥ ਵਿਕਿਣ੍ਣਨਰਟ੍ਠਿਸਮਾਕਿਣ੍ਣੇ ਸੋਣਸਿਗਾਲਾਦਿਕੁਣਪਾਦਕਾਕੁਲੇ ਮਨੁਸ੍ਸਮਂਸਭਕ੍ਖਯਕ੍ਖਰਕ੍ਖਸਾਕੁਲੇ ਤਤ੍ਥ ਤਤ੍ਥ ਪਜ੍ਜਲਨ੍ਤਾਨੇਕਚਿਤਕਭਯਾਨਕੇ ਸੁਸਾਨੇ ਮਨੁਸ੍ਸਮਂਸਂ ਪਚਿਤ੍ਵਾ ਕਿਂਕਰੋਸੀਤਿ ਪੁਚ੍ਛਨ੍ਤੀ ਆਹ.

੫. ਰਤ੍ਤਨ੍ਧਕਾਰੇ ਕੁਣਪਾਦਕੇਹਿ,

ਸਮਾਕੁਲੇ ਸੀਵਥਿਕਾਯ ਮਜ੍ਝੇ;

ਮਨੁਸ੍ਸਮਂਸਂ ਪਚਸੀ ਧ ਸੀਸੇ,

ਵਦੇਹਿ ਕਿਂ ਤੇਨ ਪਯੋਜਨਂ ਤੇਤਿ.

ਅਥ ਸੋ ਆਹ.

੬. ਨ ਯਾਗਹੇਤੁ ਨ ਚ ਦਾਨਹੇਤੁ,

ਸੁਸਾਨਮਜ੍ਝਮ੍ਹਿ ਪਚਾਮਿ ਮਂਸਂ;

ਖੁਦਾਸਮਂ ਨਤ੍ਥਿ ਨਰਸ੍ਸ ਅਞ੍ਞਂ,

ਖੁਦਾਵਿਨਾਸਾਯ ਪਚਾਮਿਮਮ੍ਭੋਤਿ.

ਤਤੋ ਦੇਵਤਾ ਤਂ ਤਥਾ ਹੋਤੁ, ਇਮਿਨਾ ਪਿਲੋਤਿਕੇਨ ਵਾਤਾਵਰਣਂ ਕਰੋਸਿ. ਕਿਮਤ੍ਥਮੇਤਨ੍ਤਿ ਪੁਚ੍ਛਨ੍ਤੀ.

੭. ਨਿਵਤ੍ਥਸਾਖੋ ਹਿਰਿਸਂਵਰਾਯ,

ਪਿਲੋਤਿਕਂ ਤਤ੍ਥ ਪਸਾਰਯਨ੍ਤੋ;

ਕਰੋਸਿ ਵਾਤਾਵਰਣਞ੍ਚ ਸਮ੍ਮ,

ਕਿਮਤ੍ਥਮੇਤਂ ਵਦ ਪੁਚ੍ਛਿਤੋ ਮੇਤਿ.

ਸੋ ਤਸ੍ਸਾ ਚਿਕ੍ਖਨ੍ਤੋ ਆਹ.

੮. ਸੁਭਾ ਸੁਭਾਮਿਸ੍ਸਿਤਸੀਤਵਾਤੋ,

ਸਯਂ ਅਚਿਤ੍ਤੋਵ ਅਚਿਤ੍ਤਭਾਵਾ;

ਦੇਹਂ ਫੁਸਿਤ੍ਵਾਨ ਅਸਾਧੁਕਸ੍ਸ,

ਅਕਤਞ੍ਞੁਨੋ ਮਿਤ੍ਤਪਧਂਸਕਸ੍ਸ.

੯. ਸਮਾਵਹਨ੍ਤੋ ਯਦਿ ਮੇ ਸਰੀਰੇ,

ਫੁਸਾਤਿ [ਫੁਸਾਤਿਸਾਸਙ੍ਗਤਿਮਜ੍ਜਦਾਨਿ ਇਤਿਕਤ੍ਤਚਿ] ਤਂ ਵਾਯੁ ਮਮਾ ਵਿਸਿਤ੍ਵਾ;

ਦੁਕ੍ਖਂ ਦਦਾਤੀਤਿ ਵਿਸਂਵ ਤਂ ਭੋ,

ਪਰਿਵਜ੍ਜਿਤੁਂ ਬਦ੍ਧਮਿਮਂ ਕੁਚੇਲਨ੍ਤਿ.

ਦੇਵਤਾ ਆਹ.

੧੦. ਕਿ ਮਕਾਸਿ ਭੋ ਸੋ ਕਤਨਾਸਕੋ ਤੇ,

ਧਨਞ੍ਚ ਧਞ੍ਞਂ ਤਵ ਨਾਸਯੀ ਚ;

ਮਾਤਾ ਪਿਤਾ ਬਨ੍ਧਵੋ ਖੇਤ੍ਤ ਵਤ੍ਥੂ,

ਵਿਨਾਸਿਤਾ ਤੇਨ ਵਦੇਹਿ ਕਿਂ ਤੇਤਿ.

ਤਤੋ ਸੋ ਆਹ.

੧੧. ਯਂ ਰਾਜਤੋ ਹੋਤਿ ਭਯਂ ਮਹਨ੍ਤਂ,

ਸਬ੍ਬਸ੍ਸ ਹਰਣਾਦਿਵਧਾਦਿਕਞ੍ਚ;

ਅਕਤਞ੍ਞੁਨਾ ਸਪ੍ਪੁਰਿਸੇਨ ਹੋਤਿ,

ਆਰਾਵ ਸੋ ਭੋ ਪਰਿਵਜ੍ਜਨੀਯੋ.

੧੨. ਯਮਤ੍ਥਿ ਚੋਰਾਰਿਭਯਞ੍ਹਿ ਲੋਕੇ,

ਅਥੋ ਦਕੇਨਾਪਿ ਚ ਪਾਵਕੇਨ;

ਅਕਤਞ੍ਞੁਨਾ ਤਂ ਸਕਲਮ੍ਪਿ ਹੋਤਿ,

ਆਰਾਵ ਸੋ ਭੋ ਪਰਿਵਜ੍ਜਨੀਯੋ.

੧੩. ਪਾਣਾਤਿਪਾਤਮ੍ਪਿ ਅਦਿਨ੍ਨਦਾਨਂ,

ਪਰਸ੍ਸ ਦਾਰੂਪਗਮਂ ਮੁਸਾ ਚ;

ਮਜ੍ਜਸ੍ਸ ਪਾਨਂ ਕਲਹਞ੍ਚ ਪੇਸੁਨਂ,

ਸਮ੍ਫਂ ਗਿਰਂ ਧੁਤ੍ਤਜਨੇਹਿ [ਅਕ੍ਖਧੁਤ੍ਤਾਦਿਯੋਗਂ ਇਤਿਕਤ੍ਥਚਿ] ਯੋਗਂ.

੧੪. ਸਬ੍ਬਂ ਅਨਤ੍ਥਂ ਅਸਿਵਂ ਅਨਿਟ੍ਠਂ,

ਅਪਾਯਿਕਂ [ਅਪਾਯਿਕਂ ਇਤਿਕਤ੍ਥਚਿ] ਦੁਕ੍ਖਮਨਨ੍ਤ ਮਞ੍ਞਂ;

ਅਕਤਞ੍ਞੁਨਾ ਸਪ੍ਪੁਰਿਸੇਨ ਹੋਤਿ;

ਆਰਾਵ ਸੋ ਭੋ ਪਰਿਵਜ੍ਜਨੀਯੋਤਿ.

ਵਤ੍ਵਾ ਅਤ੍ਤਨਾ ਅਸਪ੍ਪੁਰਿਸਸਂਸਗ੍ਗੇਨਾਨੁਭੂਤਂ ਸਬ੍ਬਂ ਦੁਕ੍ਖਂ ਕਥੇਸਿ, ਤਤੋ ਦੇਵਤਾ ਅਹਮ੍ਪਿ ਭੋ ਸਤ੍ਥੁਨੋ ਮਙ੍ਗਲਸੁਤ੍ਤਦੇਸਨਾਦਿਵਸੇ ਇਮਸ੍ਮਿਂਯੇਵ ਰੁਕ੍ਖੇ ਨਿਸਿਨ੍ਨੋ.

ਅਸੇਵਨਾ ਚ ਬਾਲਾਨਂ, ਪਣ੍ਡਿਤਾਨਞ੍ਚ ਸੇਵਨਾ;

ਪੂਜਾ ਚ ਪੂਜਨੀਯ੍ਯਾਨਂ, ਏਤਂ ਮਙ੍ਗਲ ਮੁਤ੍ਤਮਨ੍ਤਿ.

ਗਾਥਾਯ ਬਾਲਸ੍ਸ ਦੋਸੇ ਅਸ੍ਸੋਸਿਂਤਿ ਵਤ੍ਵਾ ਤਸ੍ਸ ਪਸਨ੍ਨੋ ਤਂ ਅਤ੍ਤਨੋ ਵਿਮਾਨਂ ਨੇਤ੍ਵਾ ਨਹਾਪੇਤ੍ਵਾ ਦਿਬ੍ਬਵਤ੍ਥਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਦਿਬ੍ਬਨ੍ਨਪਾਨਂ ਦਤ੍ਵਾ ਮਹਨ੍ਤਂ ਸਕ੍ਕਾਰਸਮ੍ਮਾਨਂ ਕਤ੍ਵਾ ਅਤ੍ਤਨੋ ਆਨੁਭਾਵੇਨ ਤਸ੍ਮਿਂ ਨਗਰੇ ਰਜ੍ਜੇ ਅਭਿਸਿਞ੍ਚਾਪੇਸਿ. ਸੋ ਤਤ੍ਥ ਰਜ੍ਜਂ ਕਰੋਨ੍ਤੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਆਯੁਪਰਿਯੋਸਾਨੇ ਯਥਾਕਮ੍ਮਂ ਗਤੋਤਿ.

੧੫. ਏਵਂ ਅਸਾਧੁਜਨਸਙ੍ਗਮਸਨ੍ਨਿਵਾਸਂ,

ਸਞ੍ਚਜ੍ਜ ਸਾਧੁਸੁਚਿਸਜ੍ਜਨਸਙ੍ਗਮੇਨ;

ਦਾਨਾਦਿ ਨੇਕਕੁਸਲਂ ਪਰਿਪੂਰਯਨ੍ਤਾ,

ਸਗ੍ਗਾ ਪਵਗ੍ਗਵਿਭਵਂ ਅਭਿਸਮ੍ਭੁਨਾਥਾਤਿ.

ਚੋਰਸਹਾਯਸ੍ਸ ਵਤ੍ਥੁਂ ਸਤ੍ਤਮਂ.