੧੫. ਬ੍ਯਗ੍ਘਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ਚੂਲਰਟ੍ਠਾ ਸਨ੍ਨੇ ਬਾਰਾਣਸੀਨਗਰੇ ਏਕਂ ਪਂਸੁਪਬ੍ਬਤਂ ਵਿਨਿਵਿਜ੍ਝਿਤ੍ਵਾ ਮਹਾਮਗ੍ਗੋ ਹੋਤਿ, ਤਤ੍ਥ ਵੇਮਜ੍ਝੇ ਏਕੋ ਬ੍ਯਗ੍ਘੋ ਅਤ੍ਤਨੋ ਅਨ੍ਧਪਿਤਰਂ ਪਬ੍ਬਤਗੁਹਾਯਂ ਕਤ੍ਵਾ ਪੋਸੇਨ੍ਤੋ ਵਸਤਿ. ਤਸ੍ਸੇਵ ਪਬ੍ਬਤਸ੍ਸ ਵਨਦ੍ਵਾਰੇ ਤੁਣ੍ਡਿਲੋ ਨਾਮ ਏਕੋ ਸੁਵਪੋਤਕੋ ਰੁਕ੍ਖਸ੍ਮਿਂ ਵਸਤਿ. ਤੇ ਉਭੋਪਿ ਅਞ੍ਞਮਞ੍ਞਂ ਪਿਯਸਹਾਯਾ ਅਹੇਸੁਂ, ਤਸ੍ਮਿਂ ਸਮਯੇ ਪਚ੍ਚਨ੍ਤਗਾਮਵਾਸੀ ਏਕੋ ਮਨੁਸ੍ਸੋ ਅਤ੍ਤਨੋ ਮਾਤੁਗਾਮੇਨ ਸਦ੍ਧਿਂ ਕਲਹਂ ਕਤ੍ਵਾ ਬਾਰਾਣਸਿਂ ਗਚ੍ਛਨ੍ਤੋ ਤਂ ਵਨਦ੍ਵਾਰਂ ਸਮ੍ਪਾਪੁਣਿ. ਅਥ ਸੁਵਪੋਤਕੋ ਪਰਿਹੀਨਤ੍ਤਭਾਵਂ ਦੁਕ੍ਖਿਤਂ ਤਂ ਦਿਸ੍ਵਾ ਕਮ੍ਪਮਾਨਹਦਯੋ ਤਂ ਪਕ੍ਕੋਸਿਤ੍ਵਾ ਭੋ ਕੁਹਿਂ ਗਚ੍ਛਸੀਤਿ ਆਹ, ਤੇਨ ਪਰਖਣ੍ਡਂ ਗਚ੍ਛਾਮੀਤਿ ਵੁਤ੍ਤੇ ਤੁਣ੍ਡਿਲੋ ਭੋ ਇਮਸ੍ਮਿਂ ਵਨਖਣ੍ਡਮਜ੍ਝੇ ਏਕੋ ਬ੍ਯਗ੍ਘੋ ਵਸਤਿ. ਕਕ੍ਖਲੋ ਫਰੁਸੋ ਸਮ੍ਪਤ੍ਤਸਮ੍ਪਤ੍ਤੇ ਮਾਰੇਤ੍ਵਾ ਖਾਦਤਿ. ਮਾ ਤ੍ਵਂ ਤੇਨ ਗਚ੍ਛਾਤਿ ਆਹ. ਸ੍ਵਾਯਂ ਦੁਬ੍ਭਗੋ ਮਨੁਸ੍ਸੋ ਹਿਤਕਾਮਸ੍ਸ ਤਸ੍ਸ ਵਚਨਂ ਅਨਾਦਿਯਿਤ੍ਵਾ ਗਚ੍ਛਾਮੇਵਾਤਿ ਆਹ. ਤੁਣ੍ਡਿਲੋ ਤੇਨਹਿ ਸਮ੍ਮ ਯਦਿ ਅਨਿਵਤ੍ਤਮਾਨੋ ਗਚ੍ਛਸਿ. ਏਸੋ ਬ੍ਯਗ੍ਘੋ ਮਮ ਸਹਾਯੋ. ਮੇ ਵਚਨਂ ਤਵ ਸਨ੍ਤਿਕਾ ਸੁਤ੍ਵਾ ਨ ਗਣ੍ਹਾਤੀਤਿ. ਤਸ੍ਸ ਤਂ ਅਨਾਦਿਯਨ੍ਤੋ ਸੋ ਸੁਵਰਾਜੇ ਪਦੁਟ੍ਠਚਿਤ੍ਤੋ ਮੁਗ੍ਗਰੇਨ ਪਹਰਿਤ੍ਵਾ ਮਾਰੇਤ੍ਵਾ ਅਰਣਿਂ ਅਗ੍ਗਿਂ ਕਤ੍ਵਾ ਮਂਸਂ ਖਾਦਿ. ਅਸਪ੍ਪੁਰਿਸਸਂਸਗ੍ਗੋ ਨਾਮੇ ਸ ਇਧ ਲੋਕਪਰਲੋਕੇਸੁ ਦੁਕ੍ਖਾਵਹੋਯੇਵ. ਤਥਾਹਿ.

੧. ਮਯਾ ਕਤਂ ਮਯ੍ਹਮਿਦਂ, ਇਤਿ ਵੇਸ੍ਸਾਨਰਂ ਨਰੋ;

ਸਮਾਲਿਙ੍ਗਤਿ ਸਪ੍ਪੇਮੋ, ਦਹਤੇਵਸ੍ਸ ਵਿਗ੍ਗਹਂ.

੨. ਮਧੁਖੀਰਾਦਿਦਾਨੇਨ, ਪੇਮਸਾ ਪਰਿਪਾਲਿਤੋ;

ਸੋਰਗੋ ਕੁਪਿਤੋਵਸ੍ਸ, ਡਸਤੇਵਸ੍ਸ ਵਿਗ੍ਗਹਂ.

੩. ਏਵਂ ਨਿਹੀਨਜਚ੍ਚੇਨ, ਪਾਪੇਨ ਅਕਤਞ੍ਞੁਨਾ;

ਨਰਾ ਧਮੇਨ ਦੀਨੇਨ, ਕਤੋਪਿ ਖਣਸਙ੍ਗਮੋ.

੪. ਅਸਾਧੁਕੋ ਅਯਂਤੇਵਂ, ਜਾਨਮਾਨੇਨ ਜਨ੍ਤੁਨਾ;

ਮੁਹੁਤ੍ਤਮ੍ਪਿ ਨ ਕਾਤਬ੍ਬੋ, ਸਙ੍ਗਮੋ ਸੋ ਅਨਤ੍ਥਦੋਤਿ.

ਤਤੋ ਸੋ ਅਸਪ੍ਪੁਰਿਸੋ ਮਂਸਂ ਖਾਦਿਤ੍ਵਾ ਗਚ੍ਛਨ੍ਤੋ ਵਨਖਣ੍ਡਮਜ੍ਝਂ ਸਮ੍ਪਾਪੁਣਿ. ਅਥ ਬ੍ਯਗ੍ਘੋ ਤਂ ਦਿਸ੍ਵਾ ਮਹਾਨਾਦਂ ਕਰੋਨ੍ਤੋ ਗਹਣਤ੍ਥਾਯ ਉਟ੍ਠਾਸਿ. ਸੋ ਬ੍ਯਗ੍ਘਂ ਦਿਸ੍ਵਾ ਭਯਪ੍ਪਤ੍ਤੋ ਤੁਣ੍ਡਿਲਸ੍ਸ ਵਚਨਂ ਸਰਿਤ੍ਵਾ ਅਹਂ ਭੋ ਤਵ ਸਹਾਯਤੁਣ੍ਡਿਲਸ੍ਸ ਸਨ੍ਤਿਕਾ ਆਗਤੋਮ੍ਹੀਤਿ ਆਹ, ਤਂ ਸੁਤ੍ਵਾ ਬ੍ਯਗ੍ਘੋ ਅਤ੍ਤਮਨੋ ਏਹਿ ਸਮ੍ਮਾਤਿ ਤਂ ਪਕ੍ਕੋਸਿਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਨੇਤ੍ਵਾ ਖਾਦਿਤਬ੍ਬਾਹਾਰੇਨ ਤਂ ਸਨ੍ਤਪ੍ਪੇਤ੍ਵਾ ਪਿਤੁਸਨ੍ਤਿਕੇ ਨਿਸੀਦਾਪੇਤ੍ਵਾ ਪੁਨ ਵਨਖਣ੍ਡ ਮਗਮਾਸਿ. ਅਥਸ੍ਸ ਪਿਤਾ ਪੁਤ੍ਤਸ੍ਸ ਗਤਕਾਲੇ ਤੇਨ ਸਦ੍ਧਿਂ ਸਲ੍ਲਪਨ੍ਤੋ ਤਸ੍ਸ ਵਚਨਾਨੁਸਾਰੇਨ ਤੁਣ੍ਡਿਲਂ ਮਾਰੇਤ੍ਵਾ ਖਾਦਿਤਭਾਵਂ ਅਞ੍ਞਾਸਿ. ਤਤੋ ਸੋ ਪੁਤ੍ਤਸ੍ਸ ਆਗਤਕਾਲੇ ਤਵ ਸਹਾਯੋ ਤੇਨ ਮਾਰਿਤੋਤਿ ਆਹ. ਤਂ ਸੁਤ੍ਵਾ ਬ੍ਯਗ੍ਘੋ ਅਨਤ੍ਤਮਨੋ ਵੇਗੇਨ ਤਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਸਮ੍ਮ ਤੁਣ੍ਡਿਲਾਤਿ ਸਦ੍ਦਂ ਕਤ੍ਵਾ ਅਪਸ੍ਸਨ੍ਤੋ ਲੁਞ੍ਚਿਤਪਤ੍ਤਂਚਸ੍ਸ ਦਿਸ੍ਵਾ ਨਿਸ੍ਸਂਸਯਂ ਤੇਨ ਮਾਰਿਤੋ ਮੇ ਸਹਾਯੋਤਿ ਸੋਚਨ੍ਤੋ ਪਰਿਦੇਵਨ੍ਤੋ ਆਗਞ੍ਛਿ. ਅਥ ਸੋ ਅਸਪ੍ਪੁਰਿਸੋ ਤਸ੍ਮਿਂ ਤਤ੍ਥ ਗਤੇ ਤਸ੍ਸ ਪਿਤਰਂ ਪਾਸਾਣੇਨ ਪਹਰਿਤ੍ਵਾ ਮਾਰੇਤ੍ਵਾ ਬ੍ਯਗ੍ਘਂਚ ਦਾਨਿ ਮਾਰੇਸ੍ਸਾਮੀਤਿ ਬ੍ਯਗ੍ਘਾਗਮਨਮਗ੍ਗਂ ਓਲੋਕੇਨ੍ਤੋ ਨਿਲੀਨੋ ਅਟ੍ਠਾਸਿ. ਤਸ੍ਮਿਂ ਖਣੇ ਬ੍ਯਗ੍ਘੋਪਿ ਆਗਞ੍ਛਿ. ਸੋ ਤਸ੍ਸਾ ਗਤਕਾਲੇ ਤਸ੍ਸ ਤੇਜੇਨ ਭੀਤੋ ਗਨ੍ਤ੍ਵਾ ਜੀਵਿਤਂ ਮੇ ਸਾਮਿ ਦੇਹੀਤਿ ਪਾਦਮੂਲੇ ਉਰੇਨ ਨਿਪਜ੍ਜਿ, ਬ੍ਯਗ੍ਘੋ ਪਨ ਤੇਨ ਕਤਕਮ੍ਮਂ ਦਿਸ੍ਵਾ ਤਸ੍ਮਿਂ ਚਿਤ੍ਤਂ ਨਿਬ੍ਬਾਪੇਤ੍ਵਾ ਮਮ ਸਹਾਯਸ੍ਸ ਸਾਸਨਮਾਦਾਯਾਗਤਸ੍ਸ ਦੁਬ੍ਭਿਤੁਂ ਨ ਯੁਤ੍ਤਨ੍ਤਿ ਚਿਨ੍ਤੇਨ੍ਤੋ ਤਂ ਸਮਸ੍ਸਾਸੇਤ੍ਵਾ ਗਚ੍ਛ ਸਮ੍ਮਾਤਿ ਸੁਖਂ ਪੇਸੇਸਿ. ਏਵਞ੍ਹਿ ਸਪ੍ਪੁਰਿਸਸਮਾਗਮੋ ਨਾਮ ਇਧ ਲੋਕਪਰਲੋਕੇਸੁ ਸੁਖਾਵਹੋਯੇਵ, ਵੁਤ੍ਤਂਹਿ.

੫. ਸਬ੍ਭਿਰੇਵ ਸਮਾਸੇਥ, ਸਬ੍ਭਿ ਕੁਬ੍ਬੇਥ ਸਨ੍ਥਵਂ;

ਸਬ੍ਬਤ੍ਥ ਸਨ੍ਥਵੋ ਤੇਨ, ਸੇਯ੍ਯੋ ਹੋਤਿ ਨ ਪਾਪਿਯੋ.

੬. ਸੁਖਾਵਹੋ ਦੁਕ੍ਖਨੁਦੋ, ਸਦਾ ਸਬ੍ਭਿ ਸਮਾਗਮੋ;

ਤਸ੍ਮਾ ਸਪ੍ਪੁਰਿਸੇਹੇਵ, ਸਙ੍ਗਮੋ ਹੋਤੁ ਜਨ੍ਤੁਨਂ.

ਤਤੋ ਸੋ ਬ੍ਯਗ੍ਘੋ ਤੇਨ ਮੇਤ੍ਤਚਿਤ੍ਤਾਨੁਭਾਵੇਨ ਕਾਲਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤੋਤਿ.

੭. ਏਵਂਵਿਧੋਪਿ ਫਰੁਸੋ ਪਰਮਂਸਭੋਜੀ;

ਬ੍ਯਗ੍ਘੋ ਦਯਾਯੁਪਗਤੋ ਸੁਗਤਿਂ ਸੁਮੇਧੋ;

ਤਸ੍ਮਾ ਕਰੋਥ ਕਰੁਣਂ ਸਤਤਂ ਜਨਾਨਂ,

ਤਂ ਵੋ ਦਦਾਤਿ ਵਿਭਵਞ੍ਚ ਭਵੇਸੁ ਭੋਗਨ੍ਤਿ.

ਬ੍ਯਗ੍ਘਸ੍ਸ ਵਤ੍ਥੁਂ ਪਞ੍ਚਮਂ.