੧੧. ਨਨ੍ਦਿਯਰਾਜਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਇਤੋ ਕਿਰ ਕਪ੍ਪਸਤਸਹਸ੍ਸਮਤ੍ਥਕੇ ਪਦੁਮੁਤ੍ਤਰੋ ਨਾਮ ਸਤ੍ਥਾ ਲੋਕੇ ਉਦਪਾਦਿ ਸਦੇਵਕਂ ਲੋਕਂ ਸਂਸਾਰਕਨ੍ਤਾਰਾ ਉਤ੍ਤਾਰੇਨ੍ਤੋ. ਤਸ੍ਮਿਂ ਕਿਰ ਸਮਯੇ ਏਕੋ ਕੁਟੁਮ੍ਬਿਕੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਬੁਦ੍ਧਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਮਹਾਦਾਨਂ ਸਜ੍ਜੇਤ੍ਵਾ ਅਤ੍ਤਨੋ ਭਵਨਂ ਦੇਵਭਵਨਮਿਵ ਅਲਙ੍ਕਰਿਤ੍ਵਾ ਬੁਦ੍ਧਾਰਹਂ ਮਹਾਸਨਂ ਪਞ੍ਞਾਪੇਤ੍ਵਾ ਗਨ੍ਤ੍ਵਾ ਭਗਵਨ੍ਤਂ ਯਾਚਿ ਕਾਲੋਯਂ ਭਨ੍ਤੇ ਭਗਵਤੋ ਭਤ੍ਤਗ੍ਗਸ੍ਸ ਉਪਸਙ੍ਕਮਨਾਯਾਤਿ. ਅਥ ਭਗਵਾ ਭਿਕ੍ਖੁਸਙ੍ਘਪਰਿਵੁਤੋ ਮਹਤਾ ਬੁਦ੍ਧਾਨੁਭਾਵੇਨ ਗਨ੍ਤ੍ਵਾ ਨਿਸੀਦਿ ਪਞ੍ਞਤ੍ਤਵਰਬੁਦ੍ਧਾਸਨੇ, ਤਤੋ ਕੁਟੁਮ੍ਬਿਕੋ ਹਟ੍ਠੋ ਉਦਗ੍ਗੋ ਸਪਰਿਸੋ ਭਗਵਨ੍ਤਂ ਪਰਿਵਿਸਤਿ ਅਨੇਕੇਹਿ ਮਧੁਰਨ੍ਨਪਾਨਾਦੀਹਿ. ਤਦਾ ਤਸ੍ਸ ਭਗਵਤੋ ਸਾਸਨੇ ਧੁਤਙ੍ਗਧਰਾਨਂ ਅਗ੍ਗੋ ਵਸਭਤ੍ਥੇਰੋਨਾਮ ਮਹਾਸਾਵਕੋ ਸਪਦਾਨਵਤ੍ਤੇਨ ਪਿਣ੍ਡਾਯ ਚਰਮਾਨੋ ਤਸ੍ਸ ਕੁਟੁਮ੍ਬਿਕਸ੍ਸ ਗੇਹਦ੍ਵਾਰੇ ਅਟ੍ਠਾਸਿ, ਅਥ ਸੋ ਥੇਰਂ ਦਿਸ੍ਵਾ ਭਨ੍ਤੇ ਸਤ੍ਥਾ ਅਨ੍ਤੋਗੇਹੇ ਨਿਸਿਨ੍ਨੋ, ਤੁਮ੍ਹੇਪਿ ਪਵਿਸਥਾਤਿ ਯਾਚਿ, ਥੇਰੋ ਅਪਵਿਸਿਤ੍ਵਾਵ ਅਗਮਾਸਿ, ਕੁਟੁਮ੍ਬਿਕੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਤਮਤ੍ਤਂ ਵਤ੍ਵਾ ਕਿਂ ਭਨ੍ਤੇ ਸਦੇਵਕੇ ਲੋਕੇ ਭਗਵਤਾਪਿ ਉਤ੍ਤਰਿਤਰੋ ਗੁਣੇਨ ਸਂਵਿਜ੍ਜਤੀਤਿ ਆਹ. ਅਥਸ੍ਸ ਸਤ੍ਥਾ ਪੁਤ੍ਤੋਪਮਂ ਦਸ੍ਸੇਤ੍ਵਾ ਥੇਰਸ੍ਸ ਗੁਣੇ ਵਣ੍ਣੇਨ੍ਤੋ ਏਵਮਾਹ.

੧. ਪਾਲੇਨ੍ਤਿ ਨਿਮ੍ਮਲਂ ਕਤ੍ਵਾ, ਪਾਤਿਮੋਕ੍ਖਾਦਿਸਂਵਰਂ;

ਸਮਾਦਿਨ੍ਨਧੁਤਙ੍ਗਾਚ, ਅਪ੍ਪਿਚ੍ਛਾ ਮੁਨਿਸੂਨਵੋ.

੨. ਨਿਚ੍ਚ ਮਨ੍ਤਕਯੁਦ੍ਧਮ੍ਹਿ, ਨਦ੍ਧਾ ਯੋਧਾਵ ਦਪ੍ਪਿਤਾ;

ਪੁਞ੍ਞਾਨਂ ਵਤ੍ਥੁਭੂਤਾ ਤੇ, ਦੇਵਮਾਨੁਸਕਾ ਦਿਨਂ.

੩. ਧਾਰੇਮਹਂ ਵਣ੍ਣਵਨ੍ਤਂ, ਸੀਵੇਯ੍ਯਮ੍ਪਿਚ ਚੀਵਰਂ;

ਬੁਦ੍ਧਪੁਤ੍ਤਾ ਮਹਾਨਾਗਾ ਨ ਧਾਰੇਨ੍ਤਿ ਤਥਾਵਿਧਂ.

੪. ਧਾਰੇਨ੍ਤਿ ਤੇ ਪਂਸੁਕੂਲਂ, ਸਙ੍ਘਾਟੇਤ੍ਵਾ ਪਿਲੋਤਿਕੇ;

ਵਣਚ੍ਛਾਦਨਚੋਲਂਵ, ਇਚ੍ਛਾਲੋਭ ਵਿਵਜ੍ਜਿਤਾ.

੫. ਸਾਦਿਯਾਮਿ ਸਦਾ ਹਮ੍ਭੋ, ਉਪਾਸਕਨਿਮਨ੍ਤਨਂ;

ਨੇਵ ਸਾਦੇਨ੍ਤਿ ਸਮ੍ਬੁਦ੍ਧ, ਪੁਤ੍ਤੋ ਪਾਸਕਯਾਚਨਂ.

੬. ਸਪਦਾਨੇਨ ਯਂ ਲਦ੍ਧਂ, ਲੂਖਂਵਾਪਿ ਪਣੀਤਕਂ;

ਤੇਨ ਤੁਸ੍ਸਨ੍ਤਿ ਮੇ ਪੁਤ੍ਤਾ, ਰਸਗੇਧਵਿਵਜ੍ਜਿਤਾ.

੭. ਨਿਪਜ੍ਜਾਮਿ ਅਹਂ ਸਾਧੁ, ਸਨ੍ਥਤੇ ਸਯਨੇ ਸੁਭੇ;

ਨ ਤੇ ਸੇਯ੍ਯਂ ਪਕਪ੍ਪੇਨ੍ਤਿ, ਸਂਸਾਰਭਯਭੀਰੁਕਾ.

੮. ਠਾਨਾ ਸਨਗਮਨੇਨ, ਕਪ੍ਪੇਨ੍ਤਿ ਇਰਿਯਾਪਥਂ;

ਨੇਕਭੂਮਿਸਮਾਕਿਣ੍ਣ, ਪਾਸਾਦੇਸੁ ਵਸਾਮਹਂ.

੯. ਬੁਦ੍ਧਪੁਤ੍ਤਾ ਤਥਾਚ੍ਛਨ੍ਨਂ, ਨ ਕਦਾ ਪਵਿਸਨ੍ਤਿ ਤੇ;

ਰੁਕ੍ਖਮੂਲੇ ਸੁਸਾਨਸ੍ਮਿਂ, ਅਬ੍ਭੋਕਾਸੇ ਰਮਨ੍ਤਿ ਤੇ.

੧੦. ਭਾਵੇਤ੍ਵਾ ਭਵਨਾਸਾਯ, ਹੇਤੁਂ ਭਾਵਨਮੁਤ੍ਤਮਂ;

ਅਹਂ ਗਾਮੇ ਵਸਿਸ੍ਸਾਮਿ, ਪਾਪੇਨ੍ਤੋ ਜਨਤਂ ਸਿਵਂ.

੧੧. ਰਮਨ੍ਤਿ ਮਮ ਪੁਤ੍ਤਾ ਤੇ, ਪਨ੍ਤਸੇਨਾਸਨੇ ਕਕਾ;

ਤੇਸਂ ਮਹਤ੍ਤਰੋ ਸਨ੍ਤੋ, ਥੇਰੋਯਂ ਵਸਭੋ ਮਹਾ;

ਧੁਤਪਾਪੋ ਧੁਤਙ੍ਗਗ੍ਗੋ, ਞਾਤੋਯਂ ਮਮ ਸਾਸਨੇਤਿ.

ਏਵਂ ਭਗਵਾ ਹਤ੍ਥਂ ਉਕ੍ਖਿਪਿਤ੍ਵਾ ਚਨ੍ਦਮਣ੍ਡਲੇ ਪਹਰਨ੍ਤੋ ਵਿਯ ਥੇਰਸ੍ਸ ਗੁਣੇ ਪਕਾਸੇਸਿ, ਤਤੋ ਸੋ ਤਸ੍ਸ ਗੁਣਕਥਂ ਸੁਤ੍ਵਾ ਸਯਮ੍ਪਿਤਂ ਠਾਨਨ੍ਤਰਂ ਕਾਮਯਮਾਨੋ ਯਨ੍ਨੂਨਾਹਂ ਅਨਾਗਤੇ ਅਞ੍ਞਤਰਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨੇ ਧੁਤਙ੍ਗਧਰਾਨਂ ਅਗ੍ਗੋ ਭਵਿਸ੍ਸਾਮੀਤਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਭਗਵਤੋ ਪਾਦਮੂਲੇ ਨਿਪਜ੍ਜਿ, ਸਤ੍ਥਾ ਤਂ ਕਾਰਣਂ ਉਪਪਰਿਕ੍ਖਿਤ੍ਵਾ ਇਤੋ ਕਪ੍ਪਸਤਸਹਸ੍ਸਮਤ੍ਥਕੇ ਗੋਤਮੋ ਨਾਮ ਸਤ੍ਥਾ ਉਪ੍ਪਜ੍ਜਿਸ੍ਸਤਿ. ਤ੍ਵਂ ਤਦਾ ਧੁਤਙ੍ਗਧਰਾਨਂ ਅਗ੍ਗੋ ਹੁਤ੍ਵਾ ਕਸ੍ਸ ਪੋਤਿ ਪਞ੍ਞਾਯਿਸ੍ਸਤੀਤਿ ਬ੍ਯਾਕਰਣ ਮਦਾਸਿ. ਤਤੋ ਪਟ੍ਠਾਯ ਸੋ ਸੋਮਨਸ੍ਸੋ ਪੁਞ੍ਞਕਮ੍ਮਂ ਕਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਦੇਵਿਸ੍ਸਰਿਯਂ ਅਨੁਭਵਨ੍ਤੋ ਵਿਪਸ੍ਸੀਸਮ੍ਮਾਸਮ੍ਬੁਦ੍ਧਕਾਲੇ ਏਕਸਾਟਕੋ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਮਹਾਦਾਨਂ ਅਦਾਸਿ. ਤਤੋ ਚੁਤੋ ਕਸ੍ਸਪਸਮ੍ਮਾਸਮ੍ਬੁਦ੍ਧੇ ਪਰਿਨਿਬ੍ਬੁਤੇ ਬਾਰਾਣਸੀਨਗਰੇ ਬਾਰਾਣਸੀਸੇਟ੍ਠਿ ਹੁਤ੍ਵਾ ਨਿਬ੍ਬਤ੍ਤੋ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਤਤੋ ਚਵਿਤ੍ਵਾ ਸਂਸਾਰੇ ਸਂਸਰਨ੍ਤੋ ਦਸਵਸ੍ਸਸਹਸ੍ਸਾ ਯੁਕੇਸੁ ਮਨੁਸ੍ਸੇਸੁ ਬਾਰਾਣਸਿਯਂ ਏਕੋ ਕੁਟੁਮ੍ਬਿਕੋ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਪਨਾਯਂ ਕੁਟੁਮ੍ਬਿਕੋ ਅਰਞ੍ਞੇ ਜਙ੍ਘਾਵਿਹਾਰਂ ਅਨੁਵਿਚਰਨ੍ਤੋ ਪਚ੍ਚਨ੍ਤਿਮੇ ਜਨਪਦੇ ਅਰਞ੍ਞਾਯਤਨੇ ਅਞ੍ਞਤਰਂ ਪਚ੍ਚੇਕਬੁਦ੍ਧਂ ਅਦ੍ਦਸ. ਸੋ ਚ ਪਚ੍ਚੇਕਬੁਦ੍ਧੋ ਤਤ੍ਥ ਚੀਵਰਕਮ੍ਮਂ ਕਰੋਨ੍ਤੋ ਅਨੁਵਾਤੇ ਅਪ੍ਪਹੋਨ੍ਤੇ ਸਂਹਰਿਤ੍ਵਾ ਠਪੇਤੁਂ ਆਰਦ੍ਧੋ. ਕੁਟੁਮ੍ਬਿਕੋ ਤਂ ਦਿਸ੍ਵਾ ਭਨ੍ਤੇ ਕਿਂ ਕਰੋਥਾਤਿ ਪੁਚ੍ਛਿ. ਸੋ ਪਚ੍ਚੇਕਬੁਦ੍ਧੋ ਅਪ੍ਪਿਚ੍ਛਤਾਯ ਤੇਨ ਪੁਟ੍ਠੋ ਨ ਕਿਞ੍ਚਿ ਵੁਤ੍ਤੋ ਹੋਤਿ. ਸੋ ਚੀਵਰਦੁਸ੍ਸਂ ਨਪ੍ਪਹੋਤੀਤਿ ਞਤ੍ਵਾ ਅਤ੍ਤਨੋ ਉਤ੍ਤਰਸਾਟਕਂ ਪਚ੍ਚੇਕਬੁਦ੍ਧਸ੍ਸ ਪਾਦਮੂਲੇ ਠਪੇਤ੍ਵਾ ਅਗਮਾਸਿ. ਪਚ੍ਚੇਕਬੁਦ੍ਧੋ ਤਂ ਗਹੇਤ੍ਵਾ ਅਨੁਵਾਤਕਂ ਆਰੋਪੇਨ੍ਤੋ ਚੀਵਰਂ ਕਤ੍ਵਾ ਪਾਰੁਪਿ. ਕੁਟੁਮ੍ਬਿਕੋ ਜੀਵਿਤਪਰਿਯੋਸਾਨੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚਵਿਤ੍ਵਾ ਬਾਰਾਣਸਿਤੋ ਤਿਯੋਜਨਮਤ੍ਤਕੇ ਠਾਨੇ ਅਞ੍ਞਤਰਸ੍ਮਿਂ ਨਗਰੇ ਨਿਬ੍ਬਤ੍ਤਿ, ਤਸ੍ਸ ਮਾਤਾਪਿਤਰੋ ਨਨ੍ਦਿਯੋਤਿ [ਨਨ੍ਦੀਤਿਨਾਮਂ ਇਤਿਸਬ੍ਬਤ੍ਥ] ਨਾਮਂ ਅਕਂਸੁ, ਤਸ੍ਸ ਸਤ੍ਤ ਭਾਤਰੋ ਅਹੇਸੁਂ, ਸੇਸਾ ਛ ਭਾਤਰੋ ਨਾਨਾਕਮ੍ਮਨ੍ਤੇਸੁ ਬ੍ਯਾਵਟਾ ਮਾਤਾਪਿਤੁਨ੍ਨਂ ਪੋਸੇਨ੍ਤਿ. ਨਨ੍ਦਿਯੋ ਪਨ ਅਕਮ੍ਮਸੀਲੋ ਗੇਹੇਯੇਵ ਵਸਤਿ. ਤਸ੍ਮਾ ਤਸ੍ਸ ਸੇਸਾ ਕੁਜ੍ਝਨ੍ਤਿ. ਮਾਤਾਪਿਤਰੋਪਿ ਨਨ੍ਦਿਯਂ ਆਮਨ੍ਤੇਤ੍ਵਾ ਓਵਦਨ੍ਤਿ. ਸੋ ਤੁਣ੍ਹੀ ਹੋਤੇਵ. ਅਥਾਪਰਸ੍ਮਿਂ ਸਮਯੇ ਗਾਮੇ ਨਕ੍ਖਤ੍ਤਂ ਸਙ੍ਘੁਟ੍ਠਂ, ਤਦਾ ਸੋ ਮਾਤਰਂ ਆਹ. ਅਮ੍ਮ ਸਾਟਕਂ ਦੇਹਿ, ਨਕ੍ਖਤ੍ਤਂ ਕੀਲ਼ਿਸ੍ਸਾਮੀਤਿ, ਸਾ ਧੋਤ- ਵਤ੍ਥਂ ਨੀਹਰਿਤ੍ਵਾ ਅਦਾਸਿ, ਅਮ੍ਮ ਥੂਲਂ ਇਦਨ੍ਤਿ, ਸਾ ਅਞ੍ਞਂ ਨੀਹਰਿਤ੍ਵਾ ਅਦਾਸਿ, ਤਮ੍ਪਿ ਪਟਿਕ੍ਖਿਪਿ. ਅਥ ਨਂ ਮਾਤਾ ਆਹ. ਤਾਤ ਯਾਦਿਸੇ ਮਯਂ ਗੇਹੇ ਜਾਤਾ, ਨਤ੍ਥਿ ਇਤੋ ਸੁਖੁਮਤਰਸ੍ਸ ਪਟਿਲਾਭਾਯ ਪੁਞ੍ਞਨ੍ਤਿ, ਲਭਨਟ੍ਠਾਨਂ ਗਮਿਸ੍ਸਾਮਿ ਅਮ੍ਮਾਤਿ. ਪੁਤ੍ਤ ਅਹਂ ਅਜ੍ਜੇਵ ਤਵ ਬਾਰਾਣਸੀਨਗਰੇ ਰਜ੍ਜਪਟਿਲਾਭਂ ਇਚ੍ਛਾਮੀਤਿ ਆਹ. ਸੋ ਸਾਧੁ ਅਮ੍ਮਾਤਿ ਮਾਤਰਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਮਾਤੁਯਾ ਪਨਸ੍ਸ ਏਵਂ ਅਹੋਸਿ. ਕਹਂ ਸੋ ਗਮਿਸ੍ਸਤਿ, ਪੁਬ੍ਬੇਵਿਯ ਇਧਵਾ ਏਤ੍ਥਵਾ ਗੇਹੇ ਨਿਸੀਦਿਤ੍ਵਾ ਆਗਚ੍ਛਤੀਤਿ, ਸੋ ਪਨ ਪੁਞ੍ਞਨਿਯਾਮੇਨ ਚੋਦਿਯਮਾਨੋ ਗਾਮਤੋ ਨਿਕ੍ਖਮਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਸੇਨਗੁਤ੍ਤਸ੍ਸ ਗੇਹੇ ਪਟਿਵਸਤਿ, ਅਥੇਕਦਿਵਸਂ ਸੋ ਤਸ੍ਸ ਕਮ੍ਮਕਾਰੇਹਿ ਸਦ੍ਧਿਂ ਸਲ੍ਲਪਨ੍ਤੋ ਨਿਸੀਦਿਤ੍ਵਾ ਪਚਲਾਯਨ੍ਤੋ ਸੁਪਿਨਂ ਅਦ੍ਦਸ. ਮੁਖੇਨ ਅਨ੍ਤਂ ਨਿਕ੍ਖਮਿਤ੍ਵਾ ਸਕਲਜਮ੍ਬੁਦੀਪੇ ਪਤ੍ਥਰਿਤ੍ਵਾ ਅਨ੍ਤੋਕੁਚ੍ਛਿਮੇਵ ਪਾਵਿਸਿ. ਪਬੁਦ੍ਧੋ ਸੋ ਭੀਤੋ ਮਹਾਸਦ੍ਦਮਕਾਸਿ. ਅਥ ਨਂ ਮਹਾਸੇਨਗੁਤ੍ਤੋ ਪੁਚ੍ਛਿ. ਨਨ੍ਦਿਯੋ ਸੁਪਿਨਂ ਅਦ੍ਦਸਨ੍ਤਿ ਆਹ. ਅਥ ਤੇਨ ਕੀਦਿਸਨ੍ਤਿ ਪੁਟ੍ਠੋ ਕਥੇਸਿ, ਤਤੋ ਸੇਨਗੁਤ੍ਤੋ ਤਂ ਅਤ੍ਤਨੋ ਕੁਲੂਪਗਂ ਪਰਿਬ੍ਬਾਜਿਕਂ ਪੁਚ੍ਛਿ ਕੋ ਤਸ੍ਸ ਵਿਪਾਕੋਤਿ. ਪਰਿਬ੍ਬਾਜਿਕਾ ਯਦਿ ਭੋ ਇਤ੍ਥੀ ਪਸ੍ਸਤਿ. ਸਤ੍ਤਦਿਵਸਬ੍ਭਨ੍ਤਰੇਯੇਵ ਅਭਿਸੇਕਂ ਲਭਤਿ, ਯਦਿ ਪੁਰਿਸੋ ਪਸ੍ਸਤਿ, ਤਥੇਵ ਰਾਜਾ ਹੋਤੀਤਿ ਕਥੇਸਿ. ਸੇਨਗੁਤ੍ਤੋ ਤਸ੍ਸਾ ਤਂ ਕਥਂ ਸੁਤ੍ਵਾ ਇਮਂ ਮਮ ਞਾਤਿਂ ਕਰੋਮੀਤਿ ਅਤ੍ਤਨੋ ਸਤ੍ਤ ਧੀਤਰੇ ਪਕ੍ਕੋਸਿਤ੍ਵਾ ਪਟਿਪਾਟਿਯਾ ਪੁਚ੍ਛਿ. ਨਨ੍ਦਿਯਸ੍ਸ ਸਨ੍ਤਿਕੇ ਵਸਥਾਤਿ, ਸੇਸਾ ਸਬ੍ਬਾ ਨ ਇਚ੍ਛਿਂਸੁ, ਨ ਮਯਂ ਜਾਨਾਮ ਏਤਂ ਅਧੁਨਾਗਤਂ ਕੁਲਵਨ੍ਤਂ ਵਾ ਦੁਕ੍ਕੁਲਵਨ੍ਤਂਵਾਤਿ. ਅਥ ਕਣਿਟ੍ਠਿਕਂ ਪੁਚ੍ਛਿ. ਸਾ ਯਸ੍ਸ ਮਂ ਮਾਤਾਪਿਤਰੋ ਦਸ੍ਸਨ੍ਤਿ. ਤੇਸਂ ਵਚਨਂ ਨ ਭਿਨ੍ਦਿਸ੍ਸਾਮੀਤਿ ਸਮ੍ਪਟਿਚ੍ਛਿ, ਅਥ ਸੇਨਗੁਤ੍ਤੋ ਨਨ੍ਦਿਯਂ ਪਕ੍ਕੋਸਿਤ੍ਵਾ ਅਤ੍ਤਨੋ ਧੀਤਰਂ ਦਤ੍ਵਾ ਤਸ੍ਸ ਮਹਾਸਮ੍ਪਤ੍ਤਿ ਮਦਾਸਿ. ਤਤੋ ਸਤ੍ਤਮੇ ਦਿਵਸੇ ਨਨ੍ਦਿਯੋ ਤਤ੍ਥ ਤਤ੍ਥ ਆਹਿਣ੍ਡਨ੍ਤੋ ਰਞ੍ਞੋ ਮਙ੍ਗਲੁਯ੍ਯਾਨਂ ਪਸ੍ਸਿਸ੍ਸਾਮੀਤਿ ਗਨ੍ਤ੍ਵਾ ਧਙ੍ਗਲਸਿਲਾਪਟ੍ਟੇਸਸੀਸਂ ਪਾਰੁਪਿਤ੍ਵਾ ਨਿਪਜ੍ਜਿ, ਸੋ ਚ ਬਾਰਾਣਸੀਰਞ੍ਞੋ ਕਾਲਙ੍ਕਤਸ੍ਸ ਸਤ੍ਤਮੋ ਦਿਵਸੋ ਹੋਤਿ. ਅਮਚ੍ਚਾਚ ਪੁਰੋਹਿਤੋਚ ਰਞ੍ਞੋ ਸਰੀਰਕਿਚ੍ਚਂ ਕਾਰੇਤ੍ਵਾ ਰਾਜਙ੍ਗਣੇ ਨਿਸੀਦਿਤ੍ਵਾ ਮਨ੍ਤਯਿਂਸੁ. ਰਞ੍ਞੋ ਏਕਾਵ ਧੀਤਾ ਅਤ੍ਥਿ, ਪੁਤ੍ਤੋ ਪਨਸ੍ਸ ਨਤ੍ਥਿ. ਅਰਾਜਿਕਂ ਰਜ੍ਜਂ ਨ ਤਿਟ੍ਠਤਿ. ਫੁਸ੍ਸਰਥਂ ਵਿਸ੍ਸਜ੍ਜੇਸ੍ਸਾਮਾਤਿ. ਤੇ ਕੁਮੁਦਪਤ੍ਤਵਣ੍ਣੇ ਚਤ੍ਤਾਰੋ ਸਿਨ੍ਧਵੇ ਯੋਜੇਤ੍ਵਾ ਸੇਤਚ੍ਛਤ੍ਤਪਮੁਖਂਪਞ੍ਚਵਿਧਰਾਜਕਕੁਧਭਣ੍ਡਂ ਰਥਸ੍ਮਿਂਯੇਵ ਠਪੇਤ੍ਵਾ ਰਥਂ ਵਿਸ੍ਸਜ੍ਜੇਤ੍ਵਾ ਪਚ੍ਛਤੋ ਤੁਰਿਯਾਨਿ ਪਗ੍ਗਣ੍ਹਾਪੇਸੁਂ. ਰਥੋ ਪਾਚੀਦ੍ਵਾਰੇਨ ਨਿਕ੍ਖਮਿਤ੍ਵਾ ਉਯ੍ਯਾਨਾਭਿਮੁਖੋ ਅਹੋਸਿ. ਪਰਿਚਯੇਨ ਉਯ੍ਯਾਨਾਭਿਮੁਖੋ ਗਚ੍ਛਤਿ. ਨਿਵਤ੍ਤੇਮਾਤਿ ਕੇਚਿ ਆਹਂਸੁ. ਪੁਰੋਹਿਤੋ ਮਾ ਨਿਵਾਰਯਿਤ੍ਥਾਤਿ ਆਹ. ਰਥੋ ਕੁਮਾਰਕਂ ਪਦਕ੍ਖਿਣਂ ਕਤ੍ਵਾ ਆਰੋਹਣਸਜ੍ਜੋ ਹੁਤ੍ਵਾ ਅਟ੍ਠਾਸਿ. ਪੁਰੋਹਿਤੋ ਪਾਰੁਪਣਕਣ੍ਣਂ ਅਪਨੇਤ੍ਵਾ ਪਾਦਤਲਾਨਿ ਓਲੋਕੇਨ੍ਤੋ ਤਿਟ੍ਠਤੁ ਅਯਂ ਦੀਪੋ. ਦ੍ਵਿਸਹਸ੍ਸਦੀਪ ਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਏਕਰਜ੍ਜਂ ਕਾਤੁਂ ਸਮਤ੍ਥੋਤਿਵਤ੍ਵਾ ਤਸ੍ਸ ਧਿਤਿਂ ਉਪਧਾਰੇਤੁਂ ਤਿਕ੍ਖਤ੍ਤੁਂ ਤੁਰਿਯਾਨਿ ਪਗ੍ਗਣ੍ਹਾਪੇਸਿ. ਅਥ ਕੁਮਾਰੋ ਮੁਖਂ ਵਿਵਰਿਤ੍ਵਾ ਓਲੋਕੇਤ੍ਵਾ ਕੇਨ ਕਾਰਣੇਨ ਆਗਤਤ੍ਥਾਤਿ ਆਹ, ਦੇਵ ਤੁਮ੍ਹਾਕਂ ਰਜ੍ਜਂ ਪਾਪੁਣਾਤੀਤਿ, ਰਾਜਾ ਕਹਨ੍ਤਿ, ਦੇਵਤ੍ਤਂ ਗਤੋ ਸਾਮੀਤਿ, ਕਤਿ ਦਿਵਸਾ ਅਤਿਕ੍ਕਨ੍ਤਾਤਿ, ਅਜ੍ਜ ਸਤ੍ਤਮੋ ਦਿਵਸੋਤਿ. ਪੁਤ੍ਤੋ ਵਾ ਧੀਤਾ ਵਾ ਨਤ੍ਥੀਤਿ, ਧੀਤਾ ਅਤ੍ਥਿ ਦੇਵ. ਪੁਤ੍ਤੋ ਨ ਵਿਜ੍ਜਤੀਤਿ, ਤੇਨਹਿ ਕਰਿਸ੍ਸਾਮਿ ਰਜ੍ਜਨ੍ਤਿ, ਤੇ ਤਾਵਦੇਵ ਅਭਿਸੇਕਮਣ੍ਡਪਂ ਕਾਰੇਤ੍ਵਾ ਰਾਜਧੀਤਰਂ ਸਬ੍ਬਾਲਙ੍ਕਾਰੇਹਿ ਅਲਙ੍ਕਾਰਿਤ੍ਵਾ ਉਯ੍ਯਾਨਂ ਨੇਤ੍ਵਾ ਕੁਮਾਰਸ੍ਸ ਅਭਿਸੇਕਂ ਅਕਂਸੁ, ਅਥਸ੍ਸ ਕਤਾਭਿਸੇਕਸ੍ਸ ਸਤਸਹਸ੍ਸਗ੍ਘਨਕਂ ਵਤ੍ਥਂ ਆਨੇਸੁਂ, ਸੋ ਕਿਮਿਦਂ ਤਾਤਾਤਿ ਆਹ, ਨਿਵਾਸਨਵਤ੍ਥਂ ਦੇਵਾਤਿ, ਨਨੁ ਤਾਤਾ ਥੂਲਂਤਿ, ਮਨੁਸ੍ਸਾਨਂ ਪਰਿਭੋਗਵਤ੍ਥੇਸੁ ਇਤੋ ਸੁਖੁਮਤਰਂ ਨਤ੍ਥਿ ਦੇਵਾਤਿ, ਤੁਮ੍ਹਾਕਂ ਰਾਜਾ ਏਵਰੂਪਂ ਨਿਵਾਸੇਸੀਤਿ, ਆਮ ਦੇਵਾਤਿ. ਨ ਮਞ੍ਞੇ ਪੁਞ੍ਞਵਾ ਤੁਮ੍ਹਾਕਂ ਰਾਜਾਤਿ ਵਤ੍ਵਾ ਹਨ੍ਦ ਸੁਵਣ੍ਣਭਿਙ੍ਕਾਰਂ ਆਹਰਥ, ਲਭਿਸ੍ਸਾਮ ਵਤ੍ਥਨ੍ਤਿ, ਤੇ ਸੁਵਣ੍ਣਭਿਙ੍ਕਾਰਂ ਆਹਰਿਂਸੁ, ਸੋ ਉਟ੍ਠਾਯ ਹਤ੍ਥੇ ਧੋਵਿਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਹਤ੍ਥੇਨ ਉਦਕਂ ਆਦਾਯ ਪੁਰਤ੍ਥਿਮਦਿਸਾਯ ਅਬ੍ਭੁਕ੍ਕਿਰਿ, ਤਾਵਦੇਵ ਘਨਪਥਵਿਂ ਭਿਨ੍ਦਿਤ੍ਵਾ ਸੋਲ਼ਸਕਪ੍ਪਰੁਕ੍ਖਾ ਉਟ੍ਠਹਿਂਸੁ, ਪੁਨ ਉਦਕਂ ਹਤ੍ਥੇਨ ਗਹੇਤ੍ਵਾ ਦਕ੍ਖਿਣਂ ਪਚ੍ਛਿਮਂ ਉਤ੍ਤਰਨ੍ਤਿ ਏਵਂ ਚਤਸ੍ਸੋਪਿ ਦਿਸਾ ਅਬ੍ਭੁਕ੍ਕਿਰਿ, ਸਬ੍ਬਦਿਸਾਸੁ ਸੋਲ਼ਸ ਸੋਲ਼ਸ ਹੁਤ੍ਵਾ ਚਤੁਸਟ੍ਠਿਕਪ੍ਪਰੁਕ੍ਖਾ ਉਟ੍ਠਹਿਂਸੁ, ਸੋ ਏਕਂ ਦਿਬ੍ਬਦੁਸ੍ਸਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਨਨ੍ਦਿਯਰਞ੍ਞੋ ਵਿਜਿਤੇ ਸੁਤ੍ਤਕਨ੍ਤਿਕਾ ਇਤ੍ਥਿਯੋ ਮਾ ਸੁਤ੍ਤਂ ਕਨ੍ਤਨ੍ਤੂਤਿ ਭੇਰਿਂ ਚਰਾਪੇਥਾਤਿ ਵਤ੍ਵਾ ਛਤ੍ਤਂ ਉਸ੍ਸਾਪੇਤ੍ਵਾ ਅਲਙ੍ਕਤਪਟਿਯਤ੍ਤੋ ਹਤ੍ਥਿਕ੍ਖਨ੍ਧਵਰਗਤੋ ਨਗਰਂ ਪਵਿਸਿਤ੍ਵਾ ਪਾਸਾਦਮਭਿਰੁਯ੍ਹ ਮਹਾਸਮ੍ਪਤ੍ਤਿਂ ਅਨੁਭਵਿ. ਅਹੋ ਤਦਾ ਪਚ੍ਚੇਕਬੁਦ੍ਧਸ੍ਸ ਦਿਨ੍ਨਾਨੁਵਾਤਕਸ੍ਸ ਵਿਪਾਕੋ. ਤੇਨਾਹੁ ਪੋਰਾਣਾ.

੧੨. ਯਥਾ ਸਾਸਪਮਤ੍ਤਮ੍ਹਾ, ਬੀਜਾ ਨਿਗ੍ਰੋਧਪਾਦਪੋ;

ਜਾਯਤੇ ਸਤਸਾਖਡ੍ਢੋ, ਮਹਾਨੀਲਮ੍ਬੁਦੋਪਮੋ.

੧੩. ਤਥੇਵ ਪੁਞ੍ਞਕਮ੍ਮਮ੍ਹਾ, ਅਣੁਮ੍ਹਾ ਵਿਪੁਲਂ ਫਲਂ;

ਹੋਤੀਤਿ ਅਪ੍ਪਪੁਞ੍ਞਨ੍ਤਿ, ਨਾਵਮਞ੍ਞੇਯ੍ਯ ਪਣ੍ਡਿਤੋਤਿ.

ਏਵਂ ਗਚ੍ਛਨ੍ਤੇ ਕਾਲੇ ਏਕਦਿਵਸਂ ਦੇਵੀ ਰਞ੍ਞੋ ਸਮ੍ਪਤ੍ਤਿਂ ਦਿਸ੍ਵਾ ਅਹੋ ਤਪਸ੍ਸੀਤਿ ਕਾਰੁਞ੍ਞਾਕਾਰਂ ਦਸ੍ਸੇਸਿ. ਕਿਮਿਦਂ ਦੇਵੀਤਿ ਚ ਪੁਟ੍ਠਾ ਅਤਿਮਹਤੀ ਤੇ ਦੇਵ ਸਮ੍ਪਤ੍ਤਿ. ਅਤੀਤਮਦ੍ਧਾਨਂ ਕਲ੍ਯਾਣਂ ਕਤਤ੍ਤਾ. ਇਦਾਨਿ ਅਨਾਗਤਸ੍ਸਤ੍ਥਾਯ ਕੁਸਲਂ ਕਰੋਥਾਤਿ ਆਹ. ਕਸ੍ਸ ਦਸ੍ਸਾਮ. ਸੀਲਵਨ੍ਤਾ ਨਤ੍ਥੀਤਿ. ਅਸੁਞ੍ਞੋ ਦੇਵ ਜਮ੍ਬੁਦੀਪੋ ਅਰਹਨ੍ਤੇਹਿ, ਤੁਮ੍ਹੇ ਦਾਨਂ ਸਜ੍ਜੇਥ, ਅਹਂ ਅਰਹਨ੍ਤੇ ਲਚ੍ਛਾਮੀਤਿ ਆਹ. ਪੁਨਦਿਵਸੇ ਰਾਜਾ ਮਹਾਰਹਂ ਦਾਨਂ ਸਜ੍ਜਾਪੇਸਿ. ਦੇਵੀ ਸਚੇ ਇਮਿਸ੍ਸਾ ਦਿਸਾਯ ਅਰਹਨ੍ਤੋ ਅਤ੍ਥਿ, ਇਧਾ ਗਨ੍ਤ੍ਵਾ ਅਮ੍ਹਾਕਂ ਭਿਕ੍ਖਂ ਗਣ੍ਹਨ੍ਤੂਤਿ ਉਤ੍ਤਰਹਿਮਵਨ੍ਤਾਭਿਮੁਖੀ ਪੁਪ੍ਫਾਨਿ ਉਦ੍ਧਂ ਖਿਪਿਤ੍ਵਾ ਉਰੇਨ ਨਿਪਜ੍ਜਿ. ਅਥ ਤਾਨਿ ਪੁਪ੍ਫਾਨਿ ਆਕਾਸਤੋ ਗਨ੍ਤ੍ਵਾ ਹਿਮਵਨ੍ਤਪਦੇਸੇ ਵਸਨ੍ਤਾਨਂ ਪਦੁਮਵਤਿਯਾ ਪੁਤ੍ਤਾਨਂ ਪਞ੍ਚਸਤਾਨਂਪਚ੍ਚੇਕਬੁਦ੍ਧਾਨਂ ਜੇਟ੍ਠਕਮਹਾਪਦੁਮਪਚ੍ਚੇਕਬੁਦ੍ਧਸ੍ਸ ਪਾਦਮੂਲੇ ਪਤਿਂਸੁ. ਤਥਾਹਿ.

੧੪. ਅਹੋ ਪਸ੍ਸਥ ਭੋ ਦਾਨਿ, ਵਿਮ੍ਹਯਂ ਪੁਞ੍ਞਕਮ੍ਮੁਨੋ;

ਅਚੇਤਨਾਪਿ ਪੁਪ੍ਫਾਨਿ, ਦੂਤਕਿਚ੍ਚੇਸੁ ਬ੍ਯਾਵਟਾ.

੧੫. ਕਤ੍ਤੁਕਾਮੇਨ ਲੋਕਸ੍ਮਿਂ, ਸਕਲਂ ਅਤ੍ਤਨੋ ਵਸਂ;

ਸਬ੍ਬਤ੍ਥਾਮੇਨ ਕਤ੍ਤਬ੍ਬਂ, ਪੁਞ੍ਞਂ ਪਞ੍ਞਵਤਾ ਸਦਾਤਿ.

ਤਤੋ ਮਹਾਪਦੁਮਪਚ੍ਚੇਕਬੁਦ੍ਧੋ ਤਂ ਞਤ੍ਵਾ ਸੇਸਭਾਤਰੇ ਆਮਨ੍ਤੇਸਿ. ਮਾਰਿਸਾ ਨਨ੍ਦਿਯਰਾਜਾ ਤੁਮ੍ਹੇ ਨਿਮਨ੍ਤੇਸਿ. ਅਧਿਵਾਸੇਥ ਤਸ੍ਸ ਨਿਮਨ੍ਤਨਨ੍ਤਿ. ਤੇ ਅਧਿਵਾਸੇਤ੍ਵਾ ਤਾਵਦੇਵ ਆਕਾਸੇਨਾ ਗਨ੍ਤ੍ਵਾ ਉਤ੍ਤਰਦ੍ਵਾਰੇ ਓਤਰਿਂਸੁ. ਮਨੁਸ੍ਸਾ ਪਞ੍ਚਸਤਾ ਦੇਵ ਪਚ੍ਚੇਕਬੁਦ੍ਧਾ ਆਗਤਾਤਿ ਰਞ੍ਞੋ ਆਰੋਚੇਸੁਂ, ਰਾਜਾ ਸਦ੍ਧਿਂ ਦੇਵਿਯਾ ਗਨ੍ਤ੍ਵਾ ਵਨ੍ਦਿਤ੍ਵਾ ਪਤ੍ਤੇ ਗਹੇਤ੍ਵਾ ਪਚ੍ਚੇਕਬੁਦ੍ਧੇ ਪਾਸਾਦਂ ਆਰੋਪੇਤ੍ਵਾ ਤਤ੍ਥ ਤੇਸਂ ਦਾਨਂ ਦਤ੍ਵਾ ਭਤ੍ਤਕਿਚ੍ਚਾਵਸਾਨੇ ਰਾਜਾ ਸਙ੍ਘਤ੍ਥੇਰਸ੍ਸ ਦੇਵੀ ਸਙ੍ਘਨਵਕਸ੍ਸ ਚ ਪਾਦਮੂਲੇ ਨਿਪਜ੍ਜਿਤ੍ਵਾ ਅਯ੍ਯਾ ਪਚ੍ਚਯੇਹਿ ਨ ਕਿਲਮਿਸ੍ਸਨ੍ਤੁ, ਮਯਂ ਪੁਞ੍ਞੇਨ ਨ ਹਾਯਿਸ੍ਸਾਮ, ਅਮ੍ਹਾਕਂ ਇਧ ਵਾਸਾਯ ਪਟਿਞ੍ਞਂ ਦੇਥਾਤਿ ਪਟਿਞ੍ਞਂ ਕਾਰੇਤ੍ਵਾ ਉਯ੍ਯਾਨੇ ਨਿਵਾਸਟ੍ਠਾਨਾਦਯੋ ਕਾਰੇਤ੍ਵਾ ਯਾਵਜੀਵਂ ਪਚ੍ਚਕਬੁਦ੍ਧੇ ਉਪਟ੍ਠਹਿਤ੍ਵਾ ਤੇਸੁ ਪਰਿਨਿਬ੍ਬੁਤੇਸੁ ਸਾਧੁਕੀਲ਼ਨਂ ਕਾਰੇਤ੍ਵਾ ਚਨ੍ਦਨਾ ਗਰੁਆਦੀਹਿ ਸਰੀਰਕਿਚ੍ਚਂ ਕਾਰੇਤ੍ਵਾ ਧਾਤੁਯੋ ਗਹੇਤ੍ਵਾ ਚੇਤਿਯਂ ਪਤਿਟ੍ਠਾਪੇਤ੍ਵਾ ਏਵਰੂਪਾਨਮ੍ਪਿ ਮਹਾਨੁਭਾਵਾਨਂ ਮਹੇਸੀਨਂ ਮਰਣਂ ਭਵਿਸ੍ਸਤਿ, ਕਿਮਙ੍ਗਂ ਪਨ ਮਾਦਿਸਾਨਨ੍ਤਿ ਸਂਵੇਗਜਾਤੋ ਜੇਟ੍ਠਪੁਤ੍ਤਂ ਰਜ੍ਜੇ ਪਤਿਟ੍ਠਾਪੇਤ੍ਵਾ ਸਯਂ ਪਬ੍ਬਜਂ ਪਬ੍ਬਜਿ, ਦੇਵੀਪਿ ਰਞ੍ਞੇ ਪਬ੍ਬਜਿਤੇ ਅਹਂ ਕਿਂਕਰਿਸ੍ਸਾਮੀਤਿ ਪਬ੍ਬਜਿਤ੍ਵਾ ਦ੍ਵੇਪਿ ਉਯ੍ਯਾਨੇ ਵਸਨ੍ਤਾ ਝਾਨਾਭਿਞ੍ਞਂ ਨਿਬ੍ਬਤ੍ਤੇਤ੍ਵਾ ਝਾਨਸੁਖੇਨ ਵੀਤਿਨਾਮੇਨ੍ਤਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਂਸੁ. ਤੇ ਅਮ੍ਹਾਕਂ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਬੁਦ੍ਧਸਾਸਨੇ ਪਬ੍ਬਜਿਂਸੁ, ਤਦਾ ਨਨ੍ਦਿਯਰਾਜਾ ਧੁਤਙ੍ਗਧਰਾਨਂ ਅਗ੍ਗੋ ਮਹਾਕਸ੍ਸਪਤ੍ਥੇਰੋਨਾਮ ਹੁਤ੍ਵਾ ਚਨ੍ਦੋ ਵਿਯ ਸੁਰਿਯੋ ਵਿਯਚ ਲੋਕੇ ਪਾਕਟੋ ਹੁਤ੍ਵਾ ਭਗਵਤਿ ਪਰਿ- ਨਿਬ੍ਬੁਤੇ ਬੁਦ੍ਧਸਾਸਨਂ ਅਤਿਵਿਯ ਸੋਭੇਤਿ. ਭਰਿਯਾਪਿਸ੍ਸ ਭਦ੍ਦਕਾਪਿਲ਼ਾਨੀ ਨਾਮ ਅਹੋਸੀਤਿ.

੧੬. ਦਤ੍ਵਾ ਪੁਰੇਕੋ ਵਿਪਿਨੇ ਚਰਨ੍ਤੋ,

ਪਚ੍ਚੇਕਬੁਦ੍ਧਸ੍ਸਨੁਵਾਤਮਤ੍ਤਂ;

ਕਤ੍ਵਾ ਸਰਟ੍ਠਂ ਕੁਰੁਦੀਪਸੋਭਂ,

ਮਹਾਨੁਭਾਵੋ ਵਸੁਧਾ ਧਿਪੋਸਿ.

੧੭. ਤੁਮ੍ਹੇਚ ਭੋਨ੍ਤੋ ਖਲੁ ਸੀਲਵਨ੍ਤੇ,

ਦਦਾਥ ਦਾਨਾਨਿ ਅਨਪ੍ਪਕਾਨਿ;

ਤਂ ਵੋ ਪਤਿਟ੍ਠਾਚ ਭਵਨ੍ਤਰਸ੍ਮਿਂ,

ਚਿਨ੍ਤਾਮਣਿਂ ਕਪ੍ਪਤਰੁਂਵ ਸਾਰਨ੍ਤਿ.

ਨਨ੍ਦਿਯਰਾਜਸ੍ਸ ਵਤ੍ਥੁਂ ਪਥਮਂ.