੨. ਮਿਗਲੁਦ੍ਦਕਸ੍ਸ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬਿਕਥਾ

ਇਤੋ ਕਿਰ ਏਕ ਤਿਂਸਤਿਮੇ ਕਪ੍ਪੇ ਸਿਖੀਨਾਮ ਸਮ੍ਮਾਸਮ੍ਬੁਦ੍ਧੋ ਸਮਤਿਂਸ ਪਾਰਮਿਯੋ ਪੂਰੇਤ੍ਵਾ ਪਰਮਾਤਿਸਮ੍ਬੋਧਿਂ ਪਤ੍ਵਾ ਸਦੇਵਕਂ ਲੋਕਂ ਸਂਸਾਰਕਨ੍ਤਾਰਾ ਉਤ੍ਤਾਰੇਨ੍ਤੋ ਧਮ੍ਮਰਤਨਵਸ੍ਸਂ ਵਸ੍ਸਾਪੇਨ੍ਤੋ ਧਮ੍ਮਭੇਰਿਂਪਹਰਨ੍ਤੋ ਧਮ੍ਮਕੇਤੁਂ ਉਸ੍ਸਾਪੇਨ੍ਤੋ ਏਕਸ੍ਮਿਂ ਸਮਯੇ ਵਿਵੇਕ ਮਨੁਬ੍ਰੂਹਨ੍ਤੋ ਅਰਞ੍ਞਾਯਤਨਂ ਪਾਵਿਸਿ, ਪਵਿਸਿਤ੍ਵਾ ਚਪਨ ਸੁਪੁਪ੍ਫਿਤਨਾਗਪੁਨ੍ਨਾਗਾਦਿਨਾਨਾਤਰੁਸਣ੍ਡਮਣ੍ਡਿਤੇ ਸੁਫੁਲ੍ਲਸੁਮਨਮਾਲਤਿਪ੍ਪਭੁਤਿਨਾਨਾਲਤਾਕੁਲੇ ਅਨੇਕਵਿਧਦਿਪਦਚਤੁਪ੍ਪਦਸਙ੍ਘਨਿਸੇਵਿਤੇ ਰਮਣੀਯੇ ਸੀਤਲਸਿਲਾਤਲੇ ਚਤੁਗ੍ਗੁਣਂ ਸਙ੍ਘਾਟਿਂਪਞ੍ਞਪੇਤ੍ਵਾ ਨਿਸੀਦਿ ਛਬ੍ਬਣ੍ਣਰਂਸੀਹਿ ਦਿਸਂ ਪੂਰਯਨ੍ਤੋ, ਤਦਾ ਤਤ੍ਥ ਦੇਵਬ੍ਰਹ੍ਮਨਾਗਸੁਪਣ੍ਣਾਦਯੋ ਸਨ੍ਨਿਪਤਿਤ੍ਵਾ ਦਿਬ੍ਬਮਯੇਹਿ ਗਨ੍ਧਮਾਲਾਦੀਹਿ ਭਗਵਨ੍ਤਂ ਪੂਜਯਮਾਨਾ ਥੋਮਯਮਾਨਾ ਨਮਸ੍ਸਮਾਨਾ ਅਟ੍ਠਂਸੁ, ਤਸ੍ਮਿਂ ਪਨਸਮਾਗਮੇ ਭਗਵਾ ਮਧੁਰਸ੍ਸਰਂ ਨਿਚ੍ਛਾਰੇਨ੍ਤੋ ਬ੍ਰਹ੍ਮਘੋਸੇਨ ਚਤੁਸਚ੍ਚਪਟਿਸਂਯੁਤ੍ਤਂ ਧਮ੍ਮਂ ਦੇਸੇਤਿ ਅਮਤਵਸ੍ਸਂ ਵਸ੍ਸਾਪੇਨ੍ਤੋਵਿਯ. ਤਦਾ ਏਕੋ ਮਿਗਲੁਦ੍ਦਕੋ ਵਨਂ ਪਵਿਟ੍ਠੋ ਮਿਗਸੂਕਰੇ ਹਨ੍ਤ੍ਵਾ ਮਂਸਂ ਖਾਦਨ੍ਤੋ ਤਂ ਠਾਨਂ ਪਤ੍ਵਾ ਅਦ੍ਦਸ ਭਗਵਨ੍ਤਂ ਧਮ੍ਮਂ ਦੇਸੇਨ੍ਤਂ. ਦਿਸ੍ਵਾ ਏਕਮਨ੍ਤਂ ਠਿਤੋ ਧਮ੍ਮਂ ਸੁਤ੍ਵਾ ਚਿਤ੍ਤਂ ਪਸਾਦੇਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਛਸੁ ਕਾਮਸਗ੍ਗੇਸੁ ਮਨੁਸ੍ਸੇਸੁਚ ਅਪਰਾਪਰਂ ਇਸ੍ਸਰਿਯਂ ਅਨੁਭਵਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਏਕਦਿਵਸਂ ਧਮ੍ਮਂ ਦੇਸੇਨ੍ਤਸ੍ਸ ਭਗਵਤੋ ਚਤੁਸਚ੍ਚਪਤਿ ਸਂਯੁਤ੍ਤਂ ਧਮ੍ਮਕਥਂ ਸੁਤ੍ਵਾ ਚਤੁਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਏਕਦਿਵਸਂ ਭਿਕ੍ਖੁਸਙ੍ਘਮਜ੍ਝਗਤੋ ਅਤ੍ਤਨੋ ਕਤਕਮ੍ਮਪ੍ਪਕਾਸਨੇਨ ਪੀਤਿਵਾਚਮੁਦਾਹਰਿ.

੧. ਏ ਕ ਤਿਂ ਸੇ ਇਤੋ ਕਪ੍ਪੇ,

ਲੋਕੇ ਉਪ੍ਪਜ੍ਜਿ ਨਾਯਕੋ;

ਪਤ੍ਤਿਂਸ ਲਕ੍ਖਣਾਤਿਣ੍ਣੋ,

ਸਮ੍ਬੁਦ੍ਧੋ ਸ ਸਿਖੀਵ੍ਹਯੋ.

੨. ਜਲਨ੍ਤੋ ਦੀਪਰੁਕ੍ਖੋਵ, ਸੂਰਿਯੋਵ ਨਭ ਮੁਗ੍ਗਤੋ;

ਮੇਰੁਰਾਜਾਵ ਸਮ੍ਬੁਦ੍ਧੋ, ਜਨੇਸਗ੍ਗੋ ਪਤਾਪਵਾ.

੩. ਪੂਰੇਤ੍ਵਾ ਧਮ੍ਮਨਾਵਾਯਂ, ਸ ਨਾਥੋ ਸਕਲਂ ਪਜਂ;

ਪਤਿਟ੍ਠਪੇਨ੍ਤੋ ਸਂਸਾਰ, ਕਨ੍ਤਾਰਾ ਸਨ੍ਤਿਭੂਮਿਯਂ.

੪. ਧਮ੍ਮਕੇਤੁਂ ਸਮੁਸ੍ਸੇਨ੍ਤੋ, ਹਨਨ੍ਤੋ ਧਮ੍ਮਦੁਨ੍ਦੁਭਿਂ;

ਸਤ੍ਤੇ ਦੁਕ੍ਖਾ ਪਮੋਚੇਨ੍ਤੋ, ਵਸੀ ਤਤ੍ਥ ਜਿਨੋ ਵਸੀ.

੫. ਏਕਸ੍ਮਿਂ ਸਮਯੇ ਨਾਥੋ,

ਲੋਕਪਜ੍ਜੋਤਕੋ ਜਿਨੋ;

ਵਿਵੇਕਕਾਮੋ ਸਮ੍ਬੁਦ੍ਧੋ,

ਸੁਰਮ੍ਮਂ ਕਾਨਨਂ ਗਤੋ.

੬. ਪੁਨ੍ਨਾਗਨਾਗਪੂਗਾਦਿ, ਨਾਨਾਪਾਦਪਸਂਕੁਲਂ;

ਲਤਾ ਲਿਙ੍ਗਿਤਸਾਖਾਹਿ, ਸਾ ਮੋਦਕੁਸੁਮਾਯੁਤਂ.

੭. ਕੁਸੁਮਾ ਮੋਦਸਮ੍ਮਤ੍ਤ, ਛਪ੍ਪਦਾਲਿ ਨਿਸੇਵਿਤਂ;

ਨਾਨਾਮਿਗ ਗਣਾਕਿਣ੍ਣਂ, ਮਯੂਰਗਣ ਨਚ੍ਚਿਤਂ.

੮. ਸੀਤਲਚ੍ਛੋਦਿਕਾਸਾਧੁ, ਸੁਪਤਿਤ੍ਥਜਲਾਸਯਂ;

ਆਸਾਰ ਸਾਰਧਾਰਾਹਿ, ਨਿਜ੍ਝਰਾਸਤ ਸਂਕੁਲਂ.

੯. ਗਨ੍ਤ੍ਵਾਨ ਸੋ ਮਹਾਰਞ੍ਞਂ,

ਸੀਤਲਂ ਸਿਕਤਾਤਲਂ;

ਸਿਲਾਤਲੇ ਨਿਸਿਨ੍ਨੋਸਿ,

ਵਿਸ੍ਸਜ੍ਜੇਨ੍ਤੋ ਛਰਂਸਿਯੋ.

੧੦. ਦੇਵਾ ਤਤ੍ਥ ਸਮਾਗਨ੍ਤ੍ਵਾ, ਪੂਜੇਸੁਂ ਦ੍ਵਿਪਦੁਤ੍ਤਮਂ;

ਦਿਬ੍ਬੇਹਿ ਗਨ੍ਧਮਾਲਾਹਿ, ਨਚ੍ਚੇਹਿ ਤੁਰਿਯੇਹਿਚ.

੧੧. ਦੇਵਦੇਵੋ ਤਦਾ ਦੇਵ, ਸਙ੍ਘਮਜ੍ਝੇ ਨਿਸੀਦਿਯ;

ਚਤੁਸਚ੍ਚ ਮਦੇਸੇਸਿ, ਨਿਚ੍ਛਰਂ ਮਧੁਰਂ ਗਿਰਂ.

੧੨. ਤਦਾਹਂ ਲੁਦ੍ਦਕੋ ਆਸਿਂ, ਮਿਗਸੂਕਰਮਾਰਕੋ;

ਮਿਗਮਂਸੇਨ ਜਿਵਾਮਿ, ਤੇਨ ਪੋਸੇਮਿ ਦਾਰਕੇ [ਪੋਸੇਨ੍ਤੋਪੁਤ੍ਤਦਾਰਕੇ ਇਤਿਕਤ੍ਥਚਿ].

੧੩. ਤਦਾਹਂ ਮਿਗਵਂ ਯਾਤੋ,

ਸਬਾਣੋ ਸਸਰਾਸਨੋ;

ਅਦ੍ਦਸਂ ਵਿਰਜਂ ਬੁਦ੍ਧਂ,

ਦੇਵਸਙ੍ਘਪੁਰਕ੍ਖਤਂ.

੧੪. ਚਨ੍ਦਂਵ ਤਾਰਕਾਕਿਣ੍ਣਂ, ਮੇਰੁਂਵਣ੍ਣਵਮਜ੍ਝਗਂ;

ਵਿਰੋਚਮਾਨ ਮਾਸੀਨਂ, ਚਤੁਸਚ੍ਚਪ੍ਪਕਾਸਕਂ.

੧੫. ਏਕਪਸ੍ਸੇ ਠਿਤੋ ਤਤ੍ਥ, ਅਸ੍ਸੋਸਿਂ ਧਮ੍ਮਮੁਤ੍ਤਮਂ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਸੋਮਨਸ੍ਸਂ ਪਵੇਦਯਿਂ.

੧੬. ਏਕਤਿਂਸੇ ਇਤੋ ਕਪ੍ਪੇ,

ਯਂ ਪੁਞ੍ਞਂ ਪਸੁਤਂ ਮਯਾ;

ਤੇਨਾਹਂ ਪੁਞ੍ਞਕਮ੍ਮੇਨ,

ਜਾਤੋਸਿਂ ਦੇਵਯੋਨਿਯਂ.

੧੭. ਸਮ੍ਪਤ੍ਤਿਮਨੁਭੁਤ੍ਵਾਨ, ਛਕਾਮਗ੍ਗੇ ਪਰਾਪਰਂ;

ਦੇਵਸਙ੍ਘਪਰਿਬ੍ਬੂਲ਼੍ਹੋ, ਵਿਮਾਨੇ ਰਤਨਾਮਯੇ.

੧੮. ਮਨੁਸ੍ਸੇਸੁਚ ਯਂ ਅਗ੍ਗਂ, ਤਸ੍ਸ ਭਾਗੀ ਭਵਾਮਹਂ;

ਭੋਗੇ ਮੇ ਊਨਤਾ ਨਤ੍ਥਿ, ਸਦ੍ਧਮ੍ਮਸਵਣੇ ਫਲਂ.

੧੯. ਇਮਸ੍ਮਿਂ ਭਦ੍ਦਕੇ ਕਪ੍ਪੇ,

ਸਾਵਤ੍ਤਿਪੁਰਮੁਤ੍ਤਮੇ;

ਅਡ੍ਢੇ ਮਹਦ੍ਧਨੇ ਸਾਲੇ,

ਜਾਤੋਹਂ ਉਦਿਤੇ ਕੁਲੇ.

੨੦. ਮਹਤਾ ਪਰਿਵਾਰੇਨ, ਪਤ੍ਤੋ ਵੁਦ੍ਧਿਂਚ ਵਿਞ੍ਞੁਤਂ;

ਚਾਰਿਕਂ ਚਰਮਾਨੋਹਂ, ਪਤ੍ਤੋ ਜੇਤਵਨਂ ਵਰਂ.

੨੧. ਅਦ੍ਦਸਂ ਸਹ ਸਿਸ੍ਸੇਹਿ, ਨਿਸਿਨ੍ਨਂ ਸੁਗਤਂ ਤਦਾ;

ਅਸ੍ਸੋਸਿਂ ਮਧੁਰਂ ਧਮ੍ਮਂ, ਚਤੁਸਚ੍ਚਪ੍ਪਕਾਸਕਂ.

੨੨. ਸੁਤ੍ਵਾਨ ਮਧੁਰਂ ਧਮ੍ਮਂ, ਪਬ੍ਬਜਿਤ੍ਵਾਨ ਸਾਸਨੇ;

ਅ ਜਰਾ ਮਰਂ ਸੀਤਿਭੂਤਂ, ਪਤ੍ਤੋ ਨਿਬ੍ਬਾਣਮੁਤ੍ਤਮਂ.

੨੩. ਸੁਤਂ ਏਕਮੁਹੁਤ੍ਤਂ ਮੇ, ਤਦਾ ਧਮ੍ਮਂ ਸੁਦੇਸਿਤਂ;

ਤੇਨਮ੍ਹਿ ਚਤੁਰਾਪਾਯੇ, ਨ ਜਾਤੋ ਨ ਕੁਤੋਭਯਂ.

੨੪. ਕਰਮੁਕ੍ਖਿਪ੍ਪ ਵਕ੍ਖਾਮਿ, ਕਰੋਥੇ ਕਗਿਰਂ ਮਮ;

ਮਮੋ ਪਮਂ ਕਰਿਤ੍ਵਾਨ, ਧਮ੍ਮਂ ਸੁਣਾਥ ਸਾਧੁਕਨ੍ਤਿ.

ਏਵਞ੍ਚ ਪਨ ਵਤ੍ਵਾ ਸਤ੍ਤੇ ਧਮ੍ਮਸਵਣੇ ਨਿਯੋਜੇਸੀਤਿ.

੨੫. ਇਤਿ ਤਨੁਤਰਕਾਲਂ ਸਾਧੁ ਧਮ੍ਮਂ ਸੁਣਿਤ੍ਵਾ,

ਅਧਿਗਤਵਿਭਵਾਨਂ ਆਨੁਭਾਵਂ ਸੁਣਿਤ੍ਵਾ;

ਭਵਵਿਭਵਸੁਖਂ ਭੋ ਪਤ੍ਥਯਨ੍ਤਾ ਕੁਸੀਤਂ,

ਜਹਥ ਸੁਣਥ ਧਮ੍ਮਂ ਦੁਲ੍ਲਭਂ ਦੁਲ੍ਲਭਸ੍ਸਾਤਿ.

ਮਿਗਲੁਦ੍ਦਕਸ੍ਸ ਵਤ੍ਥੁਂ ਦੁਤਿਯਂ.