੧੦. ਰੂਪਦੇਵਿਯਾ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਅਤੀਤੇ ਕਿਰ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਤਸ੍ਮਿਂ ਨਗਰੇ ਏਕਾ ਗਾਮਦਾਰਿਕਾ ਵਿਹਾਰੇ ਆਹਿਣ੍ਡਨ੍ਤੀ ਏਕਂ ਗਿਲਾਨਭਿਕ੍ਖੁਂ ਦਿਸ੍ਵਾ ਕਮ੍ਪਮਾਨਹਦਯਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਭਨ੍ਤੇ ਕੋਤੇ ਆਬਾਧੋ ਸਰੀਰਂ ਪੀਲ਼ੇਤੀਤਿ ਪੁਚ੍ਛਿ. ਤੇਨਾਪਿ ਭਗਿਨਿ ਖਰਾਬਾਧੋ ਮੇ ਪੀਲ਼ੇਤੀਤਿ ਵੁਤ੍ਤੇ ਸਾ ਤੇਨਹਿ ਭਨ੍ਤੇ ਅਹਂ ਤਂ ਰੋਗਂ ਵੂਪਸਮੇਸ੍ਸਾਮੀਤਿ ਨਿਮਨ੍ਤੇਤ੍ਵਾ ਗੇਹਂ ਗਨ੍ਤ੍ਵਾ ਤਂ ਪਵਤ੍ਤਿਂ ਮਾਤਾਪਿਤੁਨ੍ਨਂ ਕਥੇਤ੍ਵਾ ਤੇਹਿ ਅਨੁਞ੍ਞਾਤਾ ਪੁਨ ਦਿਵਸੇ ਨਾਨਗ੍ਗਰਸੇਨ ਭੇਸਜ੍ਜਾਹਾਰਂ ਸਮ੍ਪਾਦੇਸਿ, ਤਤੋ ਸੋ ਭਿਕ੍ਖੁ ਪੁਨਦਿਵਸੇ ਚੀਵਰਂ ਪਾਰੁਪਿਤ੍ਵਾ ਭਿਕ੍ਖਾਯ ਚਰਨ੍ਤੋ ਤਸ੍ਸਾ ਗੇਹਂ ਗਨ੍ਤ੍ਵਾ ਅਟ੍ਠਾਸਿ. ਸਾ ਥੇਰਂ ਆਗਤਂ ਦਿਸ੍ਵਾ ਸੋਮਨਸ੍ਸਜਾਤਾ ਪਤ੍ਤਂ ਗਹੇਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਤਤ੍ਥ ਨਿਸਿਨ੍ਨਂ ਤਂ ਆਹਾਰੇਨ ਸਾਧੁਕਂ ਪਰਿਵਿਸਿਤ੍ਵਾ ਸਕ੍ਕਾਰ ਮਕਾਸਿ. ਅਥਸ੍ਸਾ ਸਦ੍ਧਾਬਲੇਨ ਭੁਤ੍ਤਮਤ੍ਤੇਯੇਵ ਸੋ ਆਬਾਧੋ ਵੂਪਸਮਿ. ਤਤੋ ਸੋ ਵੂਪਸਨ੍ਤਰੋਗੋ ਦੁਤਿਯਦਿਵਸੇ ਤਸ੍ਸਾ ਗੇਹਂ ਨਾ ਗਮਾਸਿ. ਅਥ ਸਾ ਵਿਹਾਰਂ ਗਨ੍ਤ੍ਵਾ ਤਂ ਵਨ੍ਦਿਤ੍ਵਾ ਕਸ੍ਮਾਨਾਗਤਤ੍ਥਾਤਿ ਪੁਚ੍ਛਿਤ੍ਵਾ ਤੇਨ ਮੇ ਭਗਿਨਿ ਬ੍ਯਾਧਿ ਵੂਪਸਮਿ, ਤਸ੍ਮਾ ਨਾਗਤੋਸ੍ਮੀਤਿ ਵੁਤ੍ਤੇ ਸਾ ਸਾਧੁ ਭਨ੍ਤੇਤਿ ਸੋਮਨਸ੍ਸਜਾਤਾ ਗੇਹਮੇਵ ਅਗਮਾਸਿ. ਸਾ ਤੇਨ ਪੁਞ੍ਞਕਮ੍ਮੇਨ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ. ਤਸ੍ਸਾ ਤਤ੍ਥ ਦ੍ਵਾਦਸਯੋਜਨਿਕਂ ਕਨਕਵਿਮਾਨਂ ਨਿਬ੍ਬਤ੍ਤਿ. ਸਾ ਤਤ੍ਥ ਦੇਵਿਸ੍ਸਰਿਯਂ ਅਨੁਭਵਨ੍ਤੀ ਛਬੁਦ੍ਧਨ੍ਤਰਂ ਖੇਪੇਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਜਮ੍ਬੁਦੀਪੇ ਦੇਵਪੁਤ੍ਤਨਗਰੇ ਉਦਿਚ੍ਚਬ੍ਰਹ੍ਮਣਕੁਲੇ ਜੇਟ੍ਠਬ੍ਰਾਹ੍ਮਣਸ੍ਸ ਭਰਿਯਾਯ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ, ਸਾ ਪਰਿਪਾਕ ਮਨ੍ਵਾਯ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਤਸ੍ਸਾ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਕਾਲਤੋ ਪਟ੍ਠਾਯ ਦਿਵਸੇ ਦਿਵਸੇ ਅਟ੍ਠਟ੍ਠਨਾਲਿਮਤ੍ਤਂ ਤਣ੍ਡੁਲਂ ਨਿਬ੍ਬਤ੍ਤਤਿ. ਤਸ੍ਸਾ ਰੂਪਸਮ੍ਪਤ੍ਤਿਂ ਦਿਸ੍ਵਾ ਪਸਨ੍ਨਾ ਮਾਤਾਪਿਤਰੋ ਰੂਪਦੇਵੀਤਿ ਨਾਮ ਮਕਂਸੁ. ਪਚ੍ਛਾ ਤਂ ਪਤਿਰੂਪੇਨ ਦਾਰਕੇਨ ਨਿਯੋਜੇਸੁਂ. ਅਥਸ੍ਸਾ ਤਣ੍ਡੁਲ- ਨਾਲਿਮਤ੍ਤਂ ਗਹੇਤ੍ਵਾ ਪਚਿਤੁਂ ਆਰਦ੍ਧੇ ਇਚ੍ਛਿਤਿਚ੍ਛਿਤਮਂਸਾਦਿਬ੍ਯਞ੍ਜਨਞ੍ਜ ਸਪ੍ਪਿਨਵਨੀਤਦਧਿਖੀਰਾਦਿਗੋਰਸਞ੍ਚ ਜੀਰਮਰਿਚਾਦਿਕਟੁਕਭਣ੍ਡਞ੍ਚ ਕਦਲਿਪਨਸਮਧੁਗੁਲ਼ਾਦਿਉਪਕਰਣਞ੍ਚ ਭਾਜਨਾਨਿ ਪੂਰੇਤ੍ਵਾ ਨਿਬ੍ਬਤ੍ਤਤਿ, ਤਾਯ ਹਤ੍ਥੇਨ ਗਹਿਤਂ ਕਿਞ੍ਚਿ ਖਾਦਨੀਯਂ ਭੋਜਨੀਯਂਵਾ ਪੂਤਿਭਾਵਂ ਨ ਗਚ੍ਛਤਿ, ਭਤ੍ਤੁਕ੍ਖਲਿਂ ਗਹੇਤ੍ਵਾ ਸਕਲਨਗਰਵਾਸਿਨੋ ਭੋਜੇਨ੍ਤਿਯਾਪਿ ਏਕਕਟਚ੍ਛੁਮਤ੍ਤਂ ਭਤ੍ਤਂ ਗਹਿਤਟ੍ਠਾਨਂ ਨ ਪਞ੍ਞਾਯਤਿ. ਏਵਂ ਅਪਰਿਕ੍ਖਯਪੁਞ੍ਞਾ ਅਹੋਸਿ, ਸਕਲਦੇਵਪੁਤ੍ਤਨਗਰੇ ਚਨ੍ਦਸੁਰਿਯਾਵ ਪਾਕਟਾ ਅਹੋਸਿ, ਅਥ ਸਾ ਪਞ੍ਚਸਤਭਿਕ੍ਖੂ ਨਿਮਨ੍ਤੇਤ੍ਵਾ ਨਿਚ੍ਚਂ ਸਕਨਿਵੇਸਨੇਯੇਵ ਭੋਜੇਤਿ, ਤਦਾ ਤੇਸਂ ਅਨ੍ਤਰੇ ਪਟਿਸਮ੍ਭਿਦਾਪਤ੍ਤੋ ਮਹਾਸਙ੍ਘਰਕ੍ਖਿਤਤ੍ਥੇਰੋਨਾਮ ਇਮਿਸ੍ਸਾ ਪੁਞ੍ਞਾਨੁਭਾਵਂ ਦਿਬ੍ਬਚਕ੍ਖੁਨਾ ਦਿਸ੍ਵਾ ਨ ਜਾਨਾਤਿ ਏਸਾ ਅਤ੍ਥਨਾ ਪੁਬ੍ਬੇ ਕਤਕਮ੍ਮਂ. ਯਨ੍ਨੂਨਾਹਂ ਅਸ੍ਸਾ ਪਕਾਸੇਯ੍ਯਨ੍ਤਿ ਏਕਦਿਵਸਂ ਤਸ੍ਸਾ ਨਿਵੇਸਨੇ ਭੁਞ੍ਜਿਤ੍ਵਾ ਅਨੁਮੋਦਨਂ ਕਰੋਨ੍ਤੋ ਜਾਨਾਸਿ ਭਗਿਨਿ ਤਯਾ ਪੁਬ੍ਬੇ ਕਤਕਮ੍ਮਨ੍ਤਿ ਪੁਚ੍ਛਿ, ਨ ਜਾਨਾਮਿ ਭਨ੍ਤੇ. ਸੋਤੁਮਿਚ੍ਛਾਮੀਤਿ, ਅਥਸ੍ਸਾ ਸੋ ਪੁਬ੍ਬਕਮ੍ਮਂ ਪਕਾਸੇਨ੍ਤੋ.

੧. ਏਕਨਵੁਤੇ ਇਤੋ ਕਪ੍ਪੇ,

ਵਿਪਸ੍ਸੀਨਾਮ ਨਾਯਕੋ;

ਅਹੋਸਿ ਲੋਕੇ ਲੋਕੇਕ,

ਨਾਯਕੋ ਛਿਨ੍ਨਬਨ੍ਧਨੋ.

੨. ਤਦਾ ਤਸ੍ਮਿਂ ਪੁਰੇ ਰਮ੍ਮੇ, ਆਸਿ ਤ੍ਵਂ ਗਾਮਦਾਰਿਕਾ;

ਆਹਿਣ੍ਡਨ੍ਤੀ ਵਿਹਾਰਸ੍ਮਿਂ, ਅਦ੍ਦਕ੍ਖਿ ਜਿਨਸਾਵਕਂ.

੩. ਰੋਗਾਤੁਰਂ ਕਿਸਂ ਪਣ੍ਡੁਂ, ਅਸ੍ਸਸਨ੍ਤਂ ਮੁਹੁਂ ਮੁਹੁਂ;

ਦਿਸ੍ਵਾਨ ਕਮ੍ਪਿਤਾ ਚਿਤ੍ਤਾ, ਨਿਮਨ੍ਤੇਤ੍ਵਾਨ ਤਂ ਮੁਨਿਂ.

੪. ਭੇਸਜ੍ਜਞ੍ਚੇਵ ਭਤ੍ਤਞ੍ਚ, ਅਦਾ ਤ੍ਵਂ ਤੇਨ ਸੋ ਯਤਿ;

ਅਬ੍ਯਾਬਾਧੋ ਅਨੀਘੋਚ, ਅਹੋਸਿ ਅਨੁਪਦ੍ਦਵੋ.

੫. ਤਤੋ ਤ੍ਵਂ ਤੇਨ ਕਮ੍ਮੇਨ, ਸੁਕਤੇਨ ਤਤੋ ਚੁਤਾ;

ਜਾਤਾਸਿ ਦੇਵਲੋਕਸ੍ਮਿਂ, ਸਬ੍ਬਕਾਮਸਮਿਦ੍ਧਿਨੀ.

੬. ਤਤ੍ਥ ਤੇ ਪੁਞ੍ਞਤੇਜੇਨ, ਪਾਸਾਦੋ ਰਤਨਾਮਯੋ;

ਮਣਿਥੂਪਿਸਤਾਕਿਣ੍ਣੋ, ਕੂਟਾਗਾਰੇਹਿ ਲਙ੍ਕਤੋ.

੭. ਨੇਕਗਬ੍ਭਸਤਾਕਿਣ੍ਣੋ, ਸਯਨਾਸਨਮਣ੍ਡਿਤੋ;

ਅਚ੍ਛਰਾਸਤਸਂਕਿਣ੍ਣੋ, ਨਚ੍ਚਗੀਤਾਦਿਸਂਕੁਲੋ.

੮. ਰਮ੍ਭਾਮ੍ਬਜਮ੍ਬੁਸਨ੍ਨੀਰ, ਪੂਗਪੁਨ੍ਨਾਗਪਾਟਲੀ;

ਨਾਗਾਦਿਤਰੁਸਣ੍ਡੇਹਿ, ਮਣ੍ਡਿਤੁਯ੍ਯਾਨਪਨ੍ਤਿਹਿ.

੯. ਪਦੁਮੁਪ੍ਪਲਕਲ਼ਾਰ, ਕੁਨ੍ਦਕਾਨਨਮਣ੍ਡਿਤੇ;

ਮਧੁਮਤ੍ਤਾਲਿਪਾਲੀਹਿ, ਸਾਰਸੀਸਰਸਂਕੁਲੇ.

੧੦. ਦੇਵਪੁਤ੍ਤੇਹਿ ਨੇਕੇਹਿ, ਤਥਾ ਦੇਵਚ੍ਛਰਾਹਿਚ;

ਨਿਚ੍ਚੁਸ੍ਸਵੇ ਮਹਾਭੋਗੇ, ਵਿਮਾਨੇ ਮਨਨਨ੍ਦਨੇ.

੧੧. ਤ੍ਵਮੇਵਂ ਦੇਵਲੋਕਮ੍ਹਿ, ਵਿਨ੍ਦਮਾਨਾ ਮਹਾਯਸਂ;

ਅਦ੍ਧਾਨਂ ਵੀਤਿਨਾਮੇਤ੍ਵਾ, ਨਿਬ੍ਬੁਤੇ ਗੋਤਮੇ ਜਿਨੇ.

੧੨. ਜਮ੍ਬੁਦੀਪੇ ਇਦਾਨਿ ਤ੍ਵਂ, ਨਿਬ੍ਬਤ੍ਤਾ ਉਦਿਤੇ ਕੁਲੇ;

ਪੁਞ੍ਞਪਞ੍ਞਾਗੁਣਾਵਾਸਾ, ਰੂਪੇਨਗ੍ਗਾ ਪਿਯਂਵਦਾ.

੧੩. ਏਤਂ ਤੇ ਦੇਵਲੋਕਸ੍ਮਿਂ, ਦੇਵਿਸ੍ਸਰਿਯਮਬ੍ਭੁਤਂ,

ਇਮਂ ਤੇ ਇਧ ਲੋਕਸ੍ਮਿਂ, ਸਬ੍ਬਂ ਮਾਨੁਸਿਕਂ ਸੁਖਂ.

੧੪. ਵਿਪਸ੍ਸਿਮੁਨਿਨੋ ਕਾਲੇ, ਤ੍ਵਂ ਤਸ੍ਸੇਕਸ੍ਸ ਭਿਕ੍ਖੁਨੋ;

ਅਦਾ ਦਾਨਂ ਗਿਲਾਨਸ੍ਸ, ਤਸ੍ਸ ਤਂ ਫਲਮੀਦਿਸਂ.

੧੫. ਕਾਤਬ੍ਬਞ੍ਹਿ ਸਦਾ ਪੁਞ੍ਞਂ, ਇਚ੍ਛਨ੍ਤੇਨ ਸੁਖਪ੍ਪਦਂ;

ਤਸ੍ਮਾ ਤ੍ਵਂ ਸਬ੍ਬਦਾ ਭਦ੍ਦੇ, ਉਸ੍ਸੁਕ੍ਕਾ ਕੁਸਲੇ ਭਵਾਤਿ.

ਏਵਂ ਸੋ ਤਸ੍ਸ ਪੁਰਿਮਤ੍ਤਭਾਵੇ ਕਤਕਮ੍ਮਂ ਪਕਾਸੇਤ੍ਵਾ ਇਦਾਨਿ ਪੁਞ੍ਞਕਮ੍ਮੇ ਅਪ੍ਪਮਾਦਾ ਭਵਾਤਿ ਅਨੁਸਾਸਿ. ਸਾ ਥੇਰਸ੍ਸ ਧਮ੍ਮਦੇਸਨਂ ਸੁਤ੍ਵਾ ਪਰਮਸੋਮਨਸ੍ਸਾ ਤਤੋ ਪਟ੍ਠਾਯ ਦਾਨਾਦੀਸੁ ਨਿਰਤਾ ਪੁਞ੍ਞਾਨਿ ਕਰੋਨ੍ਤੀ ਤੇਨੇਵ ਸੋਮਨਸ੍ਸੇਨ ਸੋਤਾਪਨ੍ਨਾ ਅਰਿਯਸਾਵਿਕਾ ਅਹੋਸੀਤਿ.

੧੬. ਇਤਿ ਤਰੁਣਕੁਮਾਰੀ ਪੁਞ੍ਞਕਮ੍ਮੇਸੁ ਸਾਰਂ,

ਅਵਿਦਿਤਗੁਣਮਤ੍ਤਾ ਦਤ੍ਵ ਭਿਕ੍ਖੁਸ੍ਸ ਦਾਨਂ;

ਦਿਵਿਮਨੁਜਸੁਖਂ ਸਾਲਤ੍ਥ ਤੁਮ੍ਹੇ ਭਵਨ੍ਤਾ,

ਵਿਦਿਤਕੁਸਲਪਾਕਾ ਕਿਂ ਨ ਲਬ੍ਭੇਥ ਸਨ੍ਤਿਂ.

ਰੂਪਦੇਵਿਯਾ ਵਤ੍ਥੁਂ ਦਸਮਂ.

ਧਮ੍ਮਸੋਣ੍ਡਕਵਗ੍ਗੋ ਪਥਮੋ.