ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਸੁਤ੍ਤਨ੍ਤਪਿਟਕ

ਮਜ੍ਝਿਮਨਿਕਾਯ

ਮੂਲਪਣ੍ਣਾਸਪਾਲ਼ਿ

ਸਂਗਾਯਨਸ੍ਸ ਪੁਚ੍ਛਾ ਵਿਸ੍ਸਜ੍ਜਨਾ

ਪੁਚ੍ਛਾ – ਪਠਮਮਹਾਸਂਗੀਤਿਕਾਲੇ ਆਵੁਸੋ ਧਮ੍ਮਸਂਗਾਹਕਾ ਮਹਾਕਸ੍ਸਪਾਦਯੋ ਮਹਾਥੇਰਵਰਾ ਦੀਘਨਿਕਾਯਂ ਸਂਗਾਯਿਤ੍ਵਾ ਤਦਨਨ੍ਤਰਂ ਕਿਂ ਨਾਮ ਪਾਵਚਨਂ ਸਂਗਾਯਿਂਸੁ.

ਵਿਸ੍ਸਜ੍ਜਨਾ – ਪਠਮਮਹਾਸਂਗੀਤਿਕਾਲੇ ਭਨ੍ਤੇ ਧਮ੍ਮਸਂਗਾਹਕਾ ਮਹਾਕਸ੍ਸਪਾਦਯੋ ਮਹਾਥੇਰਵਰਾ ਦੀਘਨਿਕਾਯਂ ਸਂਗਾਯਿਤ੍ਵਾ ਤਦਨਨ੍ਤਰਂ ਮਜ੍ਝਿਮਂ ਨਾਮ ਨਿਕਾਯਂ ਸਂਗਾਯਿਂਸੁ.

ਪੁਚ੍ਛਾ – ਮਜ੍ਝਿਮਨਿਕਾਯੋ ਨਾਮ ਆਵੁਸੋ ਮੂਲਪਣ੍ਣਾਸਕੋ ਮਜ੍ਝਿਮ ਪਣ੍ਣਾਸਕੋ ਉਪਰਿਪਣ੍ਣਾਸਕੋਤਿ ਪਣ੍ਣਾਸਕਵਸੇਨ ਤਿਵਿਧੋ, ਤਤ੍ਥ ਕਤਰਂ ਪਣ੍ਣਾਸਕਂ ਪਠਮਂ ਸਂਗਾਯਿਂਸੁ.

ਵਿਸ੍ਸਜ੍ਜਨਾ – ਤੀਸੁ ਭਨ੍ਤੇ ਪਣ੍ਣਾਸਕੇਸੁ ਮੂਲਪਣ੍ਣਾਸਕਂ ਨਾਮ ਪਾਵਚਨਂ ਧਮ੍ਮਸਂਗਾਹਕਾ ਮਹਾਥੇਰਵਰਾ ਪਠਮਂ ਸਂਗਾਯਿਂਸੁ.

ਪੁਚ੍ਛਾ – ਮੂਲਪਣ੍ਣਾਸਕੇਪਿ ਆਵੁਸੋ ਪਞ੍ਚਵਗ੍ਗਾ ਪਣ੍ਣਾਸ ਚ ਸੁਤ੍ਤਾਨਿ, ਤੇਸੁ ਕਤਰਂ ਵਗ੍ਗਂ ਕਤਰਞ੍ਚ ਸੁਤ੍ਤਂ ਪਠਮਂ ਸਂਗਾਯਿਂਸੁ.

ਵਿਸ੍ਸਜ੍ਜਨਾ – ਮੂਲਪਣ੍ਣਾਸਕੇ ਭਨ੍ਤੇ ਪਞ੍ਚਸੁ ਵਗ੍ਗੇਸੁ ਪਠਮਂ ਮੂਲਪਰਿਯਾਯਵਗ੍ਗਂ ਪਣ੍ਣਾਸਕੇਸੁ ਚ ਸੁਤ੍ਤੇਸੁ ਪਠਮਂ ਮੂਲਪਰਿਯਾਯਸੁਤ੍ਤਂ ਸਂਗਾਯਿਂਸੁ.

ਸਾਧੁ ਆਵੁਸੋ ਮਯਮ੍ਪਿ ਦਾਨਿ ਤਤੋਯੇਵ ਪਟ੍ਠਾਯ ਸਂਗੀਤਿਪੁਬ੍ਬਙ੍ਗਮਾਨਿ ਪੁਚ੍ਛਾਵਿਸ੍ਸਜ੍ਜਨਕਿਚ੍ਚਾਨਿ ਕਾਤੁਂ ਸਮਾਰਭਾਮ.

ਮੂਲਪਰਿਯਾਯਸੁਤ੍ਤ

ਪੁਚ੍ਛਾ – ਤੇਨ ਆਵੁਸੋ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਮੂਲਪਰਿਯਾਯਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਉਕ੍ਕਟ੍ਠਾਯਂ ਭਨ੍ਤੇ ਪਞ੍ਚਸਤੇ ਬ੍ਰਾਹ੍ਮਣਕੁਲਾ ਪਬ੍ਬਜਿਤੇ ਆਰਬ੍ਭ ਭਾਸਿਤਂ, ਪਞ੍ਚਸਤਾ ਭਨ੍ਤੇ ਬ੍ਰਾਹ੍ਮਣਕੁਲਾ ਪਬ੍ਬਜਿਤਾ ਭਿਕ੍ਖੂ ਪਰਿਯਤ੍ਤਿਂ ਨਿਸ੍ਸਾਯ ਮਾਨਂ ਉਪ੍ਪਾਦੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਤਂ ਪਨਾਵੁਸੋ ਸੁਤ੍ਤਂ ਭਗਵਤਾ ਕਤਿਹਿ ਵਾਰੇਹਿ ਕਤਿਹਿ ਚ ਅਨ੍ਤੋਗਧਪਦੇਹਿ ਵਿਭਜਿਤ੍ਵਾ ਭਾਸਿਤਂ.

ਵਿਸ੍ਸਜ੍ਜਨਾ – ਤਂ ਪਨ ਭਨ੍ਤੇ ਮੂਲਪਰਿਯਾਯਸੁਤ੍ਤਂ ਭਗਵਤਾ ਅਟ੍ਠਹਿ ਚ ਵਾਰੇਹਿ ਚਤੁਵੀਸਤਿਯਾ ਚ ਅਨ੍ਤੋਗਧਪਦੇਹਿ ਵਿਭਜਿਤ੍ਵਾ ਦੇਸਿਤਂ.

ਸਬ੍ਬਾਸਵਸੁਤ੍ਤ

ਪੁਚ੍ਛਾ – ਦੁਤਿਯਂ ਪਨਾਵੁਸੋ ਸਬ੍ਬਾਸਵਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਸਬ੍ਬਾਸਵਸੁਤ੍ਤਂ ਪਨ ਭਨ੍ਤੇ ਭਗਵਤਾ ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਤਤ੍ਥਾਵੁਸੋ ਭਗਵਤਾ ਆਸਵਾ ਕਤਿਹਿ ਪਕਾਰੇਹਿ ਵਿਭਜਿਤ੍ਵਾ ਦਸ੍ਸਿਤਾ.

ਵਿਸ੍ਸਜ੍ਜਨਾ – ਸਤ੍ਤਹਿ ਭਨ੍ਤੇ ਪਕਾਰੇਹਿ ਵਿਭਜਿਤ੍ਵਾ ਆਸਵਾ ਭਗਵਤਾ ਪਕਾਸਿਤਾ.

ਧਮ੍ਮਦਾਯਾਦਸੁਤ੍ਤ

ਪੁਚ੍ਛਾ – ਧਮ੍ਮਦਾਯਾਦਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ, ਭਗਵਤੋ ਚ ਭਨ੍ਤੇ ਭਿਕ੍ਖੁਸਙ੍ਘਸ੍ਸ ਚ ਤਦਾ ਮਹਾਲਾਭਸਕ੍ਕਾਰੋ ਉਦਪਾਦਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਤਤ੍ਥਾਵੁਸੋ ਦ੍ਵੇ ਅਨੁਸਨ੍ਧਯੋ, ਤੇਸੁ ਪਠਮੇ ਅਨੁਸਨ੍ਧਿਮ੍ਹਿ ਕਥਂ ਭਗਵਤਾ ਭਿਕ੍ਖੂਨਂ ਓਵਾਦੋ ਦਿਨ੍ਨੋ.

ਵਿਸ੍ਸਜ੍ਜਨਾ – ਪਠਮੇ ਭਨ੍ਤੇ ਅਨੁਸਨ੍ਧਿਮ੍ਹਿ ਧਮ੍ਮਦਾਯਾਦਾ ਮੇ ਭਿਕ੍ਖਵੇ ਭਵਥ ਮਾ ਆਮਿਸਦਾਯਾਦਾ, ਅਤ੍ਥਿ ਮੇ ਤੁਮ੍ਹੇਸੁ ਅਨੁਕਮ੍ਪਾ, ਕਿਨ੍ਤਿ ਮੇ ਸਾਵਕਾ ਧਮ੍ਮਦਾਯਾਦਾ ਭਵੇਯ੍ਯੁਂ ਨੋ ਆਮਿਸਦਾਯਾਦਾਤਿ ਏਵਮਾਦਿਨਾ ਭਗਵਤਾ ਭਿਕ੍ਖੂਨਂ ਓਵਾਦੋ ਦਿਨ੍ਨੋ.

ਧਮ੍ਮਦਾਯਾਦਾ ਮੇ ਭਿਕ੍ਖਵੇ ਭਵਥ ਮਾ ਆਮਿਸਦਾਯਾਦਾ, ਅਤ੍ਥਿ ਮੇ ਤੁਮ੍ਹੇਸੁ ਅਨੁਕਮ੍ਪਾ ਕਿਨ੍ਤਿ ਮੇ ਸਾਵਕਾ ਧਮ੍ਮਦਾਯਾਦਾ ਭਵੇਯ੍ਯੁਂ, ਨੋ ਆਮਿਸਦਾਯਾਦਾ.

ਪੁਚ੍ਛਾ – ਦੁਤਿਯੇ ਪਨਾਵੁਸੋ ਅਨੁਸਨ੍ਧਿਮ੍ਹਿ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਕੀਦਿਸੀ ਧਮ੍ਮਦੇਸਨਾ ਵਿਭਜਿਤ੍ਵਾ ਪਕਾਸਿਤਾ.

ਵਿਸ੍ਸਜ੍ਜਨਾ – ਦੁਤਿਯੇ ਪਨ ਭਨ੍ਤੇ ਅਨੁਸਨ੍ਧਿਮ੍ਹਿ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾਨਂ ਵਿਵੇਕਂ ਅਨਨੁਸਿਕ੍ਖਤਂ ਤੀਹਿ ਠਾਨੇਹਿ ਗਾਰਯੁਤਂ, ਅਨੁਸਿਕ੍ਖਨ੍ਤਾਨਞ੍ਚ ਤੀਹਿ ਠਾਨੇਹਿ ਪਾਸਂਸਤਂ, ਸੋਲ਼ਸ ਚ ਪਾਪਕੇ ਧਮ੍ਮੇ ਤੇਸਞ੍ਚ ਪਹਾਨਾਯ ਮਜ੍ਝਿਮਾ ਪਟਿਪਦਾ ਵਿਭਜਿਤ੍ਵਾ ਪਕਾਸਿਤਾ.

ਭਯਭੇਰਵਸੁਤ੍ਤ

ਪੁਚ੍ਛਾ – ਭਯਭੇਰਵਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਜਾਣੁਸ੍ਸੋਣਿਂ ਬ੍ਰਾਹ੍ਮਣਂ ਆਰਬ੍ਭ ਭਾਸਿਤਂ, ਜਾਣੁਸ੍ਸੋਣਿ ਭਨ੍ਤੇ ਬ੍ਰਾਹ੍ਮਣੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ ‘‘ਯੇ ਮੇ ਭੋ ਗੋਤਮ ਕੁਲਪੁਤ੍ਤਾ ਭਵਨ੍ਤਂ ਗੋਤਮਂ ਉਦ੍ਦਿਸ੍ਸ ਸਦ੍ਧਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤਾ, ਭਵਂ ਤੇਸਂ ਗੋਤਮੋ ਪੁਬ੍ਬਙ੍ਗਮੋ, ਭਵਂ

ਤੇਸਂ ਗੋਤਮੋ ਬਹੁਕਾਰੋ, ਭਵਂ ਤੇਸਂ ਗੋਤਮੋ ਸਮਾਦਪੇਤਾ, ਭੋਤੋ ਚ ਪਨ ਗੋਤਮਸ੍ਸ ਸਾ ਜਨਤਾ ਦਿਟ੍ਠਾਨੁਗਤਿਂ ਆਪਜ੍ਜਤੀ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਅਨਙ੍ਗਣਸੁਤ੍ਤ

ਪੁਚ੍ਛਾ – ਅਨਙ੍ਗਣਸੁਤ੍ਤਂ ਪਨਾਵੁਸੋ ਕਤ੍ਥ ਕਂ ਆਰਬ੍ਭ ਕੇਨ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ.

ਆਕਙ੍ਖੇਯ੍ਯਸੁਤ੍ਤ

ਪੁਚ੍ਛਾ – ਆਕਙ੍ਖੇਯ੍ਯਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ.

ਵਤ੍ਥਸੁਤ੍ਤ

ਪੁਚ੍ਛਾ – ਵਤ੍ਥਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ.

ਸਲ੍ਲੇਖਸੁਤ੍ਤ

ਪੁਚ੍ਛਾ – ਸਲ੍ਲੇਖਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਮਹਾਚੁਨ੍ਦਂ ਆਰਬ੍ਭ ਭਾਸਿਤਂ, ਆਯਸ੍ਮਾ ਮਹਾਚੁਨ੍ਦੋ ਭਨ੍ਤੇ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ ‘‘ਯਾ ਇਮਾ ਭਨ੍ਤੇ ਅਨੇਕਵਿਹਿਤਾ ਦਿਟ੍ਠਿਯੋ ਲੋਕੇ ਉਪ੍ਪਜ੍ਜਨ੍ਤਿ, ਅਤ੍ਤਵਾਦਪਟਿਸਂਯੁਤ੍ਤਾ ਵਾ ਲੋਕਵਾਦਪਟਿਸਂਯੁਤ੍ਤਾ ਵਾ, ਆਦਿਮੇਵ ਨੁ ਖੋ ਭਨ੍ਤੇ ਭਿਕ੍ਖੁਨੋ ਮਨਸਿਕਰੋਤੋ ਏਵਮੇਤਾਸਂ ਦਿਟ੍ਠੀਨਂ ਪਹਾਨਂ ਹੋਤਿ, ਏਵਮੇਤਾਸਂ ਦਿਟ੍ਠੀਨਂ ਪਟਿਨਿਸ੍ਸਗ੍ਗੋ ਹੋਤੀ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਤਤ੍ਥ ਚ ਆਵੁਸੋ ਕਤਿ ਪਰਿਯਾਯਾ ਕਤਿ ਚ ਅਨ੍ਤੋਗਧਪਦਾਨਿ ਭਗਵਤਾ ਵਿਭਜਿਤ੍ਵਾ ਪਕਾਸਿਤਾਨਿ.

ਵਿਸ੍ਸਜ੍ਜਨਾ – ਤਤ੍ਥ ਭਨ੍ਤੇ ਪਞ੍ਚ ਪਰਿਯਾਯਾ ਚਤੁਚਤ੍ਤਾਲੀਸ ਚ ਅਨ੍ਤੋਗਧਪਦਾਨਿ ਭਗਵਤਾ ਵਿਤ੍ਥਾਰੇਨ ਭਾਸਿਤਾਨਿ.

ਸਮ੍ਮਾਟ੍ਠਿਸੁਤ੍ਤ

ਪੁਚ੍ਛਾ – ਸਮ੍ਮਾਦਿਟ੍ਠਿਸੁਤ੍ਤਂ ਪਨਾਵੁਸੋ ਕਤ੍ਥ ਕਂ ਆਰਬ੍ਭ ਕੇਨ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਭਾਸਿਤਂ.

ਪੁਚ੍ਛਾ – ਕਸ੍ਸ ਆਵੁਸੋ ਵਚਨਂ.

ਵਿਸ੍ਸਜ੍ਜਨਾ – ਭਗਵਤੋ ਭਨ੍ਤੇ ਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.

ਪੁਚ੍ਛਾ – ਕੇਨਾਵੁਸੋ ਆਭਤਂ.

ਵਿਸ੍ਸਜ੍ਜਨਾ – ਪਰਮ੍ਪਰਾਯ ਭਨ੍ਤੇ ਆਭਤਂ.

ਮਹਾਸਤਿਪਟ੍ਠਾਨਸੁਤ੍ਤ

ਪੁਚ੍ਛਾ – ਮਹਾਸਤਿਪਟ੍ਠਾਨਸੁਤ੍ਤਂ ਪਨਾਵੁਸੋ ਯੋਗਾਵਚਰਾਨਂ ਬਹੁਪਕਾਰਤ੍ਤਾ ਦੀਘਨਿਕਾਯੇ ਚ ਇਧ ਚਾਤਿ ਦ੍ਵੀਸੁ ਨਿਕਾਯੇਸੁ ਪੋਰਾਣਕੇਹਿ ਸਂਗੀਤਿਕਾਰੇਹਿ ਦ੍ਵਿਕ੍ਖਤ੍ਤੁਂ ਸਂਗਾਯਿਤ੍ਵਾ ਵਿਤ੍ਥਾਰੇਨ ਪਤਿਟ੍ਠਾਪਿਤਂ, ਤਂ ਅਮ੍ਹੇਹਿ ਦੀਘਨਿਕਾਯੇ ਯਥਾਨੁਪ੍ਪਤ੍ਤਵਸੇਨ ਪੁਚ੍ਛਿਤਞ੍ਚ ਵਿਸ੍ਸਜ੍ਜਿਤਞ੍ਚ. ਤਥਾਪਿ ਯੋਗਾਵਚਰਾਨਂ ਬਹੁਪਕਾਰਤ੍ਤਾਯੇਵ ਤਂ ਇਦਾਨਿਪਿ ਯਥਾਨੁਪ੍ਪਤ੍ਤਵਸੇਨ ਪੁਨ ਪੁਚ੍ਛਿਸ੍ਸਾਮਿ, ਤਂ ਪਨੇਤਂ ਆਵੁਸੋ ਮਹਾਸਤਿਪਟ੍ਠਾਨਸੁਤ੍ਤਂ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਕੁਰੂਸੁ ਭਨ੍ਤੇ ਕਮ੍ਮਾਸਧਮ੍ਮੇ ਨਾਮ ਕੁਰੂਨਂ ਨਿਗਮੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਆਨਾਪਾਨਸ੍ਸਤਿ ਕਾਯਾਨੁਪਸ੍ਸਨਾ ਭਗਵਤਾ ਵਿਭਜਿਤ੍ਵਾ ਪਕਾਸਿਤਾ.

ਵਿਸ੍ਸਜ੍ਜਨਾ – ਇਧ ਭਿਕ੍ਖਵੇ ਭਿਕ੍ਖੁ ਅਰਞ੍ਞਗਤੋ ਵਾ ਰੁਕ੍ਖਮੂਲਗਤੋ ਵਾ ਸੁਞ੍ਞਾਗਾਰਗਤੋ ਵਾ ਨਿਸੀਦਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ ਸੋ ਸਤੋਵ ਅਸ੍ਸਸਤਿ, ਸਤੋਵ ਪਸ੍ਸਸਤਿ, ਦੀਘਂ ਵਾ ਅਸ੍ਸਸਨ੍ਤੋ ‘ਦੀਘਂ ਅਸ੍ਸਸਾਮੀ’ਤਿ ਪਜਾਨਾਤਿ, ਦੀਘਂ ਵਾ ਪਸ੍ਸਸਨ੍ਤੋ ‘ਦੀਘਂ ਪਸ੍ਸਸਾਮੀ’ਤਿ ਪਜਾਨਾਤਿ, ਏਵਮਾਦਿਨਾ ਭਨ੍ਤੇ ਤਤ੍ਥ ਆਨਾਪਾਨਸ੍ਸਤਿ ਕਾਯਾਨੁਪਸ੍ਸਨਾ ਭਗਵਤਾ ਵਿਭਜਿਤ੍ਵਾ ਪਕਾਸਿਤਾ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਇਰਿਯਾਪਥਕਾਯਾਨੁਪਸ੍ਸਨਾ ਭਗਵਤਾ ਵਿਭਜਿਤ੍ਵਾ ਪਕਾਸਿਤਾ.

ਵਿਸ੍ਸਜ੍ਜਨਾ – ਪੁਨ ਚਪਰਂ ਭਿਕ੍ਖਵੇ ਭਿਕ੍ਖੁ ਗਚ੍ਛਨ੍ਤੋ ਵਾ ਗਚ੍ਛਾਮੀਤਿ ਪਜਾਨਾਤਿ, ਠਿਤੋ ਵਾ ਠਿਤੋਮ੍ਹੀਤਿ ਪਜਾਨਾਤਿ, ਨਿਸਿਨ੍ਨੋ ਵਾ ਨਿਸਿਨ੍ਨੋਮ੍ਹੀਤਿ ਪਜਾਨਾਤਿ, ਸਯਾਨੋ ਵਾ ਸਯਾਨੋਮ੍ਹੀਤਿ ਪਜਾਨਾਤਿ, ਏਵਮਾਦਿਨਾ ਭਨ੍ਤੇ ਭਗਵਤਾ ਇਰਿਯਾਪਥਕਾਯਾਨੁਪਸ੍ਸਨਾ ਭਾਵਨਾ ਵਿਭਜਿਤ੍ਵਾ ਪਕਾਸਿਤਾ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਸਮ੍ਪਜਞ੍ਞਕਾਯਾਨੁਪਸ੍ਸਨਾ ਭਗਵਤਾ ਵਿਭਜਿਤ੍ਵਾ ਪਕਾਸਿਤਾ.

ਵਿਸ੍ਸਜ੍ਜਨਾ – ਪੁਨ ਚਪਰਂ ਭਿਕ੍ਖਵੇ ਭਿਕ੍ਖੁ ਅਭਿਕ੍ਕਨ੍ਤੇ ਪਟਿਕ੍ਕਨ੍ਤੇ ਸਮ੍ਪਜਾਨਕਾਰੀ ਹੋਤਿ, ਆਲੋਕਿਤੇ ਵਿਲੋਕਿਤੇ ਸਮ੍ਪਜਾਨਕਾਰੀ ਹੋਤਿ, ਸਮਿਞ੍ਜਿਤੇ ਪਸਾਰਿਤੇ ਸਮ੍ਪਜਾਨਕਾਰੀ ਹੋਤਿ, ਸਙ੍ਘਾਟਿਪਤ੍ਤਚੀਵਰਧਾਰਣੇ ਸਮ੍ਪਜਾਨਕਾਰੀ ਹੋਤਿ, ਅਸਿਤੇ ਪੀਤੇ ਖਾਯਿਤੇ ਸਾਯਿਤੇ ਸਮ੍ਪਜਾਨਕਾਰੀ ਹੋਤਿ, ਉਚ੍ਚਾਰਪਸ੍ਸਾਵਕਮ੍ਮੇ ਸਮ੍ਪਜਾਨਕਾਰੀ ਹੋਤਿ, ਗਤੇ ਠਿਤੇ ਨਿਸਿਨ੍ਨੇ ਸੁਤ੍ਤੇ ਜਾਗਰਿਤੇ ਭਾਸਿਤੇ ਤੁਣ੍ਹੀਭਾਵੇ ਸਮ੍ਪਜਾਨਕਾਰੀ ਹੋਤਿ, ਏਵਮਾਦਿਨਾ ਭਨ੍ਤੇ ਭਗਵਤਾ ਤਤ੍ਥ ਸਮ੍ਪਜਞ੍ਞਕਾਯਾਨੁਪਸ੍ਸਨਾ ਵਿਭਜਿਤ੍ਵਾ ਪਕਾਸਿਤਾ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਪਟਿਕੂਲਮਨਸਿਕਾਰਕਾਯਾਨੁਪਸ੍ਸਨਾ ਭਗਵਤਾ ਵਿਭਜਿਤ੍ਵਾ ਪਕਾਸਿਤਾ.

ਵਿਸ੍ਸਜ੍ਜਨਾ – ਪੁਨ ਚਪਰਂ ਭਿਕ੍ਖਵੇ ਭਿਕ੍ਖੁ ਇਮਮੇਵ ਕਾਯਂ ਉਦ੍ਧਂ ਪਾਦਤਲਾ ਅਧੋ ਕੇਸਮਤ੍ਥਕਾ ਤਚਪਰਿਯਨ੍ਤਂ ਪੂਰਂ ਨਾਨਪ੍ਪਕਾਰਸ੍ਸ ਅਸੁਚਿਨੋ ਪਚ੍ਚਵੇਕ੍ਖਤਿ ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾਲੋਮਾ ਨਖਾ ਦਨ੍ਤਾ ਤਚੋ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਪਟਿਕੂਲਮਨਸਿਕਾਰਕਾਯਾਨੁਪਸ੍ਸਨਾ ਵਿਭਜਿਤ੍ਵਾ ਪਕਾਸਿਤਾ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਧਾਤੁਮਨਸਿਕਾਰਕਾਯਾਨੁਪਸ੍ਸਨਾ ਭਗਵਤਾ ਵਿਭਜਿਤ੍ਵਾ ਪਕਾਸਿਤਾ.

ਵਿਸ੍ਸਜ੍ਜਨਾ – ਪੁਨ ਚਪਰਂ ਭਿਕ੍ਖਵੇ ਭਿਕ੍ਖੁ ਇਮਮੇਵ ਕਾਯਂ ਯਥਾਠਿਤਂ ਯਥਾਪਣਿਹਿਤਂ ਧਾਤੁਸੋ ਪਚ੍ਚਵੇਕ੍ਖਤਿ ਅਤ੍ਥਿ ਇਮਸ੍ਮਿਂ ਕਾਯੇ ਪਥਵੀਧਾਤੁ ਆਪੋਧਾਤੁ ਤੇਜੋਧਾਤੁ ਵਾਯੋਧਾਤੁ ਏਵਮਾਦਿਨਾ ਭਨ੍ਤੇ ਭਗਵਤਾ ਧਾਤੁਮਨਸਿਕਾਰਕਾਯਾਨੁਪਸ੍ਸਨਾ ਵਿਭਜਿਤ੍ਵਾ ਪਕਾਸਿਤਾ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਨਵ ਸਿਵਥਿਕਕਾਯਾਨੁਪਸ੍ਸਨਾ ਭਗਵਤਾ ਵਿਭਜਿਤ੍ਵਾ ਪਕਾਸਿਤਾ.

ਵਿਸ੍ਸਜ੍ਜਨਾ – ਪੁਨ ਚਪਰਂ ਭਿਕ੍ਖਵੇ ਭਿਕ੍ਖੁ ਸੇਯ੍ਯਥਾਪਿ ਪਸ੍ਸੇਯ੍ਯ ਸਰੀਰਂ ਸਿਵਥਿਕਾਯ ਛਡ੍ਡਿਤਂ ਏਕਾਹਮਤਂ ਵਾ ਦ੍ਵੀਹਮਤਂ ਵਾ ਤੀਹਮਤਂ ਵਾ ਉਦ੍ਧੁਮਾਤਕਂ ਵਿਨੀਲਕਂ ਵਿਪੁਬ੍ਬਕਜਾਤਂ ਸੋ ਇਮਮੇਵ ਕਾਯਂ ਉਪਸਂਹਰਤਿ ‘‘ਅਯਮ੍ਪਿ ਖੋ ਕਾਯੋ ਏਵਂਧਮ੍ਮੋ ਏਵਂਭਾਵੀ ਏਵਂਅਨਤੀਤੋ’’ਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਨਵ ਸਿਵਥਿਕਕਾਯਾਨੁਪਸ੍ਸਨਾ ਭਾਵਨਾ ਵਿਭਜਿਤ੍ਵਾ ਪਕਾਸਿਤਾ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਵੇਦਨਾਨੁਪਸ੍ਸਨਾ ਭਗਵਤਾ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਇਧ ਭਿਕ੍ਖਵੇ ਭਿਕ੍ਖੁ ਸੁਖਂ ਵਾ ਵੇਦਨਂ ਵੇਦਯਮਾਨੋ ‘‘ਸੁਖਂ ਵੇਦਨਂ ਵੇਦਯਾਮੀ’’ਤਿ ਪਜਾਨਾਤਿ, ਦੁਕ੍ਖਂ ਵਾ ਵੇਦਨਂ ਵੇਦਯਮਾਨੋ ‘‘ਦੁਕ੍ਖ ਵੇਦਨਂ ਵੇਦਯਾਮੀ’’ਤਿ ਪਜਾਨਾਤਿ, ਅਦੁਕ੍ਖਮਸੁਖਂ ਵਾ ਵੇਦਨਂ ਵੇਦਯਮਾਨੋ ‘‘ਅਦੁਕ੍ਖਮਸੁਖਂ ਵੇਦਨਂ ਵੇਦਯਾਮੀ’’ਤਿ ਪਜਾਨਾਤਿ, ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਵੇਦਨਾਨੁਪਸ੍ਸਨਾ ਵਿਭਜਿਤ੍ਵਾ ਪਕਾਸਿਤਾ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਚਿਤ੍ਤਾਨੁਪਸ੍ਸਨਾ ਭਗਵਤਾ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਇਧ ਭਿਕ੍ਖਵੇ ਭਿਕ੍ਖੁ ਸਰਾਗਂ ਵਾ ਚਿਤ੍ਤਂ ‘‘ਸਰਾਗਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਵੀਤਰਾਗਂ ਵਾ ਚਿਤ੍ਤਂ ‘‘ਵੀਤਰਾਗਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਸਦੋਸਂ ਵਾ ਵੀਤਦੋਸਂ ਵਾ ਸਮੋਹਂ ਵਾ ਵੀਤਮੋਹਂ ਵਾ ਸਂਖਿਤ੍ਤਂ ਵਾ ਚਿਤ੍ਤਂ ‘‘ਸਂਖਿਤ੍ਤਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਵਿਕ੍ਖਿਤ੍ਤਂ ਵਾ ਚਿਤ੍ਤਂ ‘‘ਵਿਕ੍ਖਿਤ੍ਤਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਏਵਮਾਦਿਨਾ ਤਤ੍ਥ ਭਗਵਤਾ ਚਿਤ੍ਤਾਨੁਪਸ੍ਸਨਾ ਵਿਭਜਿਤ੍ਵਾ ਪਕਾਸਿਤਾ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਧਮ੍ਮਾਨੁਪਸ੍ਸਨਾ ਭਗਵਤਾ ਵਿਭਜਿਤ੍ਵਾ ਦੇਸਿਤਾ, ਤਂ ਸਙ੍ਖੇਪਮਤ੍ਤੇਨੇਵ ਵਿਸ੍ਸਜ੍ਜੇਹਿ.

ਵਿਸ੍ਸਜ੍ਜਨਾ – ਇਧ ਭਿਕ੍ਖਵੇ ਭਿਕ੍ਖੁ ਧਮ੍ਮੇਸੁ ਧਮ੍ਮਾਨੁਪਸ੍ਸੀ ਵਿਹਰਤਿ, ਪਞ੍ਚਸੁ ਨੀਵਰਣੇਸੁ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਪਞ੍ਚਹਿ ਪਬ੍ਬੇਹਿ ਧਮ੍ਮਾਨੁਪਸ੍ਸਨਾ ਵਿਭਜਿਤ੍ਵਾ ਪਕਾਸਿਤਾ.

ਚੂਲ਼ਸੀਹਨਾਦਸੁਤ੍ਤ

ਪੁਚ੍ਛਾ – ਚੂਲ਼ਨਸੀਹਨਾਦਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਪਰਿਹੀਨਲਾਭਸਕ੍ਕਾਰੇ ਨਾਨਾਤਿਤ੍ਥਿਯੇ ਆਰਬ੍ਭ ਭਾਸਿਤਂ, ਨਾਨਾਤਿਤ੍ਥਿਯਾ ਭਨ੍ਤੇ ਪਰਿਹੀਨਲਾਭਸਕ੍ਕਾਰਾ ਤੇਸੁ ਤੇਸੁ ਠਾਨੇਸੁ ਪਰਿਦੇਵਿਂਸੁ, ਚਤਸ੍ਸੋ ਚ ਭਨ੍ਤੇ ਪਰਿਸਾ ਭਗਵਤੋ ਏਕਮਤ੍ਥਂ ਆਰੋਚੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਮਹਾਸੀਹਨਾਦਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਮਹਾਸੀਹਨਾਦਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਵੇਸਾਲਿਯਂ ਭਨ੍ਤੇ ਸੁਨਕ੍ਖਤ੍ਤਂ ਲਿਚ੍ਛਵਿਪੁਤ੍ਤਂ ਆਰਬ੍ਭ ਭਾਸਿਤਂ, ਸਨੁਕ੍ਖਤ੍ਤੋ ਭਨ੍ਤੇ ਲਿਚ੍ਛਵਿਪੁਤ੍ਤੋ ਅਚਿਰਪਕ੍ਕਨ੍ਤੋ ਹੋਤਿ ਇਮਸ੍ਮਾ ਧਮ੍ਮਵਿਨਯਾ, ਸੋ ਵੇਸਾਲਿਯਂ ਪਰਿਸਤਿ ਏਵਂ ਵਾਚਂ ਭਾਸਤਿ ‘‘ਨਤ੍ਥਿ ਸਮਣਸ੍ਸ ਗੋਤਮਸ੍ਸ ਉਤ੍ਤਰਿਮਨੁਸ੍ਸਧਮ੍ਮਾ ਅਲਮਰਿਯਞਾਣਦਸ੍ਸਨਵਿਸੇਸੋ, ਤਕ੍ਕਪਰਿਯਾਹਤਂ ਸਮਣੋ ਗੋਤਮੋ ਧਮ੍ਮਂ ਦੇਸੇਤਿ ਵੀਮਂਸਾਨੁਚਰਿਤਂ ਸਯਂ ਪਟਿਭਾਨਂ. ਯਸ੍ਸ ਚ ਖ੍ਵਾਸ੍ਸ ਅਤ੍ਥਾਯ ਧਮ੍ਮੋ ਦੇਸਿਤੋ, ਸੋ ਨਿਯ੍ਯਾਤਿ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯਾ’’ਤਿ, ਏਤਮਤ੍ਥਂ ਭਨ੍ਤੇ ਆਯਸ੍ਮਾ ਸਾਰਿਪੁਤ੍ਤੋ ਭਗਵਤੋ ਆਰੋਚੇਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਕਤਿ ਪਨਾਵੁਸੋ ਤਤ੍ਥ ਭਗਵਤਾ ਤਥਾਗਤਸ੍ਸ ਤਥਾਗਤਬਲਾਨਿ ਵਿਭਜਿਤ੍ਵਾ ਪਕਾਸਿਤਾਨਿ, ਯੇਹਿ ਬਲੇਹਿ ਸਮਨ੍ਨਾਗਤੋ ਤਥਾਗਤੋ ਆਸਭਂ ਠਾਨਂ ਪਟਿਜਾਨਾਤਿ, ਪਰਿਸਾਸੁ ਸੀਹਨਾਦਂ ਨਦਤਿ, ਬ੍ਰਹ੍ਮਚਕ੍ਕਂ ਪਵਤ੍ਤੇਤਿ.

ਵਿਸ੍ਸਜ੍ਜਨਾ – ਦਸ ਭਨ੍ਤੇ ਤਥਾਗਤਸ੍ਸ ਤਥਾਗਤਬਲਾਨਿ ਭਗਵਤਾ ਵਿਭਜਿਤ੍ਵਾ ਪਕਾਸਿਤਾਨਿ, ਯੇਹਿ ਬਲੇਹਿ ਸਮਨ੍ਨਾਗਤੋ ਤਥਾਗਤੋ ਆਸਭਂ ਠਾਨਂ ਪਟਿਜਾਨਾਤਿ, ਪਰਿਸਾਸੁ ਸੀਹਨਾਦਂ ਨਦਤਿ, ਬ੍ਰਹ੍ਮਚਕ੍ਕਂ ਪਵਤ੍ਤੇਤਿ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਭਗਵਤਾ ਚਤੁਵੇਰਜ੍ਜਞਾਣਾਨਿ ਵਿਭਜਿਤ੍ਵਾ ਪਕਾਸਿਤਾਨਿ, ਯੇਹਿ ਵੇਸਾਰਜ੍ਜੇਹਿ ਸਮਨ੍ਨਾਗਤੋ ਤਥਾਗਤੋ ਆਸਭਂ ਠਾਨਂ ਪਟਿਜਾਨਾਤਿ, ਪਰਿਸਾਸੁ ਸੀਹਨਾਦਂ ਨਦਤਿ, ਬ੍ਰਹ੍ਮਚਕ੍ਕਂ ਪਵਤ੍ਤੇਤਿ.

ਵਿਸ੍ਸਜ੍ਜਨਾ – ਖੀਣਾਸਵਸ੍ਸ ਤੇ ਪਟਿਜਾਨਤੋ ਇਮੇ ਆਸਵਾ ਅਪਰਿਕ੍ਖੀਣਾਤਿ ਤਤ੍ਰ ਵਤ ਮਂ ਸਮਣੋ ਵਾ ਬ੍ਰਾਹ੍ਮਣੋ ਵਾ ਦੇਵੋ ਵਾ ਮਾਰੋ ਵਾ ਬ੍ਰਹ੍ਮਾ ਵਾ ਕੋਚਿ ਵਾ ਲੋਕਸ੍ਮਿਂ ਸਹਧਮ੍ਮੇਨ ਪਟਿਚੋਦੇਸ੍ਸਤੀਤਿ ਨਿਮਿਤ੍ਤਮੇਤਂ ਸਾਰਿਪੁਤ੍ਤ ਨ ਸਮਨੁਪਸ੍ਸਾਮਿ, ਏਤਮਹਂ ਸਾਰਿਪੁਤ੍ਤ ਨਿਮਿਤ੍ਤਂ ਅਸਮਨੁਪਸ੍ਸਨ੍ਤੋ ਖੇਮਪ੍ਪਤ੍ਤੋ ਅਭਯਪ੍ਪਤ੍ਤੋ ਵੇਸਾਰਜ੍ਜਪ੍ਪਤ੍ਤੋ ਵਿਹਰਾਮਿ. ਏਵਮਾਦਿਨਾ ਭਨ੍ਤੇ ਤਤ੍ਥ ਚਤੁਵੇਸਾਰਜ੍ਜਞਾਣਾਨਿ ਭਗਵਤਾ ਵਿਤ੍ਥਾਰੇਨ ਵਿਭਜਿਤ੍ਵਾ ਪਕਾਸਿਤਾਨਿ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਭਗਵਤਾ ਪਞ੍ਚਗਤਿਪਰਿਚ੍ਛੇਦਞਾਣਂ ਵਿਭਜਿਤ੍ਵਾ ਪਕਾਸਿਤਂ.

ਵਿਸ੍ਸਜ੍ਜਨਾ – ਪਞ੍ਚ ਖੋ ਇਮਾ ਸਾਰਿਪੁਤ੍ਤ ਗਤਿਯੋ, ਕਤਮਾ ਪਞ੍ਚ, ਨਿਰਯੋ ਤਿਰਚ੍ਛਾਨਯੋਨਿ ਪੇਤ੍ਤਿਵਿਸਯੋ ਮਨੁਸ੍ਸਾ ਦੇਵਾ, ਏਵਮਾਦਿਨਾ ਭਨ੍ਤੇ ਭਗਵਤਾ ਤਤ੍ਥ ਪਞ੍ਚਗਤਿਪਰਿਚ੍ਛੇਦਕਞਾਣਂ ਵਿਭਜਿਤ੍ਵਾ ਪਕਾਸਿਤਂ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਤਥਾਗਤੋ ਅਤ੍ਤਨੋ ਪਞ੍ਞਾਵੇਯ੍ਯਤ੍ਤਿਯਾ ਅਪਰਿਹਾਨਿਂ ਪਕਾਸੇਸਿ.

ਵਿਸ੍ਸਜ੍ਜਨਾ – ਸਨ੍ਤਿ ਖੋ ਪਨ ਸਾਰਿਪੁਤ੍ਤ ਏਕੇ ਸਮਣਬ੍ਰਾਹ੍ਮਣਾ ਏਵਂਵਾਦਿਨੋ ਏਵਂਦਿਟ੍ਠਿਨੋ ਯਾਵਦੇਵਾਯਂ ਭਵਂ ਪੁਰਿਸੋ ਦਹਰੋ ਹੋਤਿ, ਏਵਮਾਦਿਨਾ ਭਨ੍ਤੇ ਤਤ੍ਥ ਤਥਾਗਤੋ ਅਤ੍ਤਨੋ ਪਞ੍ਞਾਵੇਯ੍ਯਤ੍ਤਿਯਾ ਅਪਰਿਹਾਨਿਂ ਪਕਾਸੇਸਿ.

ਮਹਾਦੁਕ੍ਖਕ੍ਖਨ੍ਧਸੁਤ੍ਤ

ਪੁਚ੍ਛਾ – ਮਹਾਦੁਕ੍ਖਕ੍ਖਨ੍ਧਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਿਤ੍ਥਿਯੇ ਆਰਬ੍ਭ ਭਾਸਿਤਂ, ਸਮ੍ਬਹੁਲਾ ਭਨ੍ਤੇ ਅਞ੍ਞਤਿਤ੍ਥਿਯਾ ਭਿਕ੍ਖੂ ਏਤਦਵੋਚੁਂ ‘‘ਸਮਣੋ ਆਵੁਸੋ ਗੋਤਮੋ ਕਾਮਾਨਂ ਪਰਿਞ੍ਞਂ ਪਞ੍ਞਪੇਤਿ, ਮਯਮ੍ਪਿ ਕਾਮਾਨਂ ਪਰਿਞ੍ਞਂ ਪਞ੍ਞਪੇਮ, ਸਮਣੋ ਆਵੁਸੋ ਗੋਤਮੋ ਰੂਪਾਨਂ ਵੇਦਨਾਨਂ ਪਰਿਞ੍ਞਂ ਪਞ੍ਞਪੇਤਿ, ਮਯਮ੍ਪਿ ਰੂਪਾਨਂ ਵੇਦਨਾਨਂ ਪਰਿਞ੍ਞਂ ਪਞ੍ਞਪੇਮ, ਇਧ ਨੋ ਆਵੁਸੋ ਕੋ ਵਿਸੇਸੋ, ਕੋ ਅਧਿਪ੍ਪਯਾਸੋ, ਕਿਂ ਨਾਨਾਕਰਣਂ ਸਮਣਸ੍ਸ ਵਾ ਗੋਤਮਸ੍ਸ ਅਮ੍ਹਾਕਂ ਵਾ ਯਦਿਦਂ ਧਮ੍ਮਦੇਸਨਾਯ ਵਾ ਧਮ੍ਮਦੇਸਨਂ ਅਨੁਸਾਸਨਿਯਾ ਵਾ ਅਨੁਸਾਸਨਿ’’ਨ੍ਤਿ, ਏਤਮਤ੍ਥਂ ਭਿਕ੍ਖੂ ਭਗਵਤੋ ਆਰੋਚੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਚੂਲ਼ਦੁਕ੍ਖਕ੍ਖਨ੍ਧਸੁਤ੍ਤ

ਪੁਚ੍ਛਾ – ਚੂਲ਼ਦੁਕ੍ਖਕ੍ਖਨ੍ਧਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਕਪਿਲਵਤ੍ਥੁਸ੍ਮਿਂ ਮਹਾਨਾਮਂ ਸਕ੍ਕਂ ਆਰਬ੍ਭ ਭਾਸਿਤਂ, ਮਹਾਨਾਮੋ ਭਨ੍ਤੇ ਸਕ੍ਕੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ ‘‘ਦੀਘਰਤ੍ਤਾਹਂ ਭਨ੍ਤੇ ਭਗਵਤਾ ਏਵਂ ਧਮ੍ਮਂ ਦੇਸਿਤਂ ਆਜਾਨਾਮਿ ‘ਲੋਭੋ ਚਿਤ੍ਤਸ੍ਸ ਉਪਕ੍ਕਿਲੇਸੋ, ਦੋਸੋ ਚਿਤ੍ਤਸ੍ਸ ਉਪਕ੍ਕਿਲੇਸੋ, ਮੋਹੋ ਚਿਤ੍ਤਸ੍ਸ ਉਪਕ੍ਕਿਲੇਸੋ’ਤਿ, ਏਵਞ੍ਚਾਹਂ ਭਨ੍ਤੇ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮਿ ‘ਲੋਭੋ ਚਿਤ੍ਤਸ੍ਸ ਉਪਕ੍ਕਿਲੇਸੋ, ਦੋਸੋ ਚਿਤ੍ਤਸ੍ਸ ਉਪਕ੍ਕਿਲੇਸੋ, ਮੋਹੋ ਚਿਤ੍ਤਸ੍ਸ ਉਪਕ੍ਕਿਲੇਸੋ’ਤਿ. ਅਥ ਚ ਪਨ ਮੇ ਏਕਦਾ ਲੋਭਧਮ੍ਮਾਪਿ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤਿ, ਦੋਸਧਮ੍ਮਾਪਿ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤਿ, ਮੋਹਧਮ੍ਮਾਪਿ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤਿ, ਤਸ੍ਸ ਮਯ੍ਹਂ ਭਨ੍ਤੇ ਏਵਂ ਹੋਤਿ ‘ਕੋ ਸੁ ਨਾਮ ਮੇ ਧਮ੍ਮੋ ਅਜ੍ਝਤ੍ਤਂ ਅਪ੍ਪਹਿਨੋ, ਯੇਨ ਮੇ ਏਕਦਾ ਲੋਭਧਮ੍ਮਾਪਿ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤਿ, ਦੋਸਧਮ੍ਮਾਪਿ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤਿ, ਮੋਹਧਮ੍ਮਾਪਿ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤੀ’ਤਿ’’, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਅਨੁਮਾਨਸੁਤ੍ਤ

ਪੁਚ੍ਛਾ – ਅਨੁਮਾਨਸੁਤ੍ਤਂ ਪਨਾਵੁਸੋ ਕਤ੍ਥ ਕਂ ਆਰਬ੍ਭ ਕੇਨ ਭਾਸਿਤਂ.

ਵਿਸ੍ਸਜ੍ਜਨਾ – ਭਗ੍ਗੇਸੁ ਭਨ੍ਤੇ ਸੁਸੁਮਾਰਗਿਰੇ ਭੇਸਕਲ਼ਾਵਨੇ ਆਯਸ੍ਮਤਾ ਮਹਾਮੋਗ੍ਗਲ੍ਲਾਨਤ੍ਥੇਰੇਨ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ.

ਚੇਤੋਖਿਲਸੁਤ੍ਤ

ਪੁਚ੍ਛਾ – ਚੇਤੋਖਿਲਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ.

ਵਨਪਤ੍ਥਸੁਤ੍ਤ

ਪੁਚ੍ਛਾ – ਵਨਪਤ੍ਥਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ.

ਮਧੁਪਿਣ੍ਡਿਕਸੁਤ੍ਤ

ਪੁਚ੍ਛਾ – ਮਧੁਪਿਣ੍ਡਿਕਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਦਣ੍ਡਪਾਣਿਂ ਸਕ੍ਕਂ ਆਰਬ੍ਭ ਭਾਸਿਤਂ, ਦਣ੍ਡਪਾਣਿ ਭਨ੍ਤੇ ਸਕ੍ਕੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ ‘‘ਕਿਂ ਵਾਦੀ ਸਮਣੋ ਕਿਮਕ੍ਖਾਯੀ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਦ੍ਵੇਧਾਵਿਤਕ੍ਕਸੁਤ੍ਤ

ਪੁਚ੍ਛਾ – ਦ੍ਵੇਧਾਵਿਤਕ੍ਕਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ.

ਵਿਤਕ੍ਕਸਣ੍ਠਾਨਸੁਤ੍ਤ

ਪੁਚ੍ਛਾ – ਵਿਤਕ੍ਕਸਣ੍ਠਾਨਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ.

ਕਕਚੂਪਮਸੁਤ੍ਤ

ਪੁਚ੍ਛਾ – ਤੇਨਾਵੁਸੋ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਕਕਚੂਪਮਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਮੋਲ਼ਿਯਫਗ੍ਗੁਨਂ ਆਰਬ੍ਭ ਭਾਸਿਤਂ, ਆਯਸ੍ਮਾ ਭਨ੍ਤੇ ਮੋਲ਼ਿਯਫਗ੍ਗੁਨੋ ਭਿਕ੍ਖੁਨੀਹਿ ਸਦ੍ਧਿਂ ਅਤਿਵੇਲਂ ਸਂਸਟ੍ਠੋ ਵਿਹਰਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਅਥ ਖੋ ਆਵੁਸੋ ਆਯਸ੍ਮਤੋ ਮੋਲ਼ਿਯਫਗ੍ਗੁਨਸ੍ਸ ਤਂ ਭਗਵਤੋ ਓਵਾਦਂ ਸੁਤ੍ਵਾ ਕਥਂ ਚਿਤ੍ਤਂ ਉਪ੍ਪਨ੍ਨਂ, ਕਥਞ੍ਜ ਭਗਵਾ ਉਤ੍ਤਰਿ ਭਿਕ੍ਖੂਨ ਓਵਾਦਮਦਾਸਿ.

ਵਿਸ੍ਸਜ੍ਜਨਾ – ਅਥ ਖੋ ਭਨ੍ਤੇ ਮੋਲ਼ਿਯਫਗ੍ਗੁਨਸ੍ਸ ਭਗਵਤੋ ਇਮਂ ਓਵਾਦਂ ਸੁਤ੍ਵਾ ਭਿਕ੍ਖੁਨਿਸਂਸਗ੍ਗਤੋ ਓਰਮਿਸ੍ਸਾਮਿ ਵਿਰਮਿਸ੍ਸਾਮੀਤਿਪਿ ਚਿਤ੍ਤਂ ਨ ਉਪ੍ਪਨ੍ਨਂ, ਅਸਂਵਰਮੇਵ ਭਨ੍ਤੇ ਚਿਤ੍ਤਂ ਉਪ੍ਪਨ੍ਨਂ, ਭਗਵਾ ਚ ਭਨ੍ਤੇ ਆਰਾਧਯਿਂਸੁ ਵਤ ਮੇ ਭਿਕ੍ਖਵੇ ਭਿਕ੍ਖੂ ਏਕਂ ਸਮਯਂ ਚਿਤ੍ਤਂ, ਏਵਮਾਦਿਨਾ ਉਤ੍ਤਰਿ ਭਿਕ੍ਖੂਨਂ ਓਵਾਦਮਦਾਸਿ.

ਉਭਤੋ ਦਣ੍ਡਕੇਨ ਚੇਪਿ ਭਿਕ੍ਖਵੇ ਕਕਚੇਨ ਚੋਰਾ ਓਚਰਕਾ ਅਙ੍ਗਮਙ੍ਗਾਨਿ ਓਕਨ੍ਤੇਯ੍ਯੁਂ.

ਅਲਗਦ੍ਦੂਪਮਸੁਤ੍ਤ

ਪੁਚ੍ਛਾ – ਅਲਗਦ੍ਦੂਪਮਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਰਿਟ੍ਠਂ ਭਿਕ੍ਖੁਂ ਗਦ੍ਧਬਾਧਿਪੁਬ੍ਬਂ ਆਰਬ੍ਭ ਭਾਸਿਤਂ, ਅਰਿਟ੍ਠਸ੍ਸ ਭਨ੍ਤੇ ਭਿਕ੍ਖੁਨੋ ਗਦ੍ਧਬਾਧਿਪੁਬ੍ਬਸ੍ਸ ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ ‘‘ਤਥਾਹਂ ਭਗਵਤਾ ਧਮ੍ਮਂ ਦੇਸਿਤਂ ਆਜਾਦਾਮਿ, ਯਥਾ ਯੇਮੇ ਅਨ੍ਤਰਾਯਿਕਾ ਧਮ੍ਮਾ ਵੁਤ੍ਤਾ ਭਗਵਤਾ, ਤੇ ਪਟਿਸੇਵਤੋ ਨਾਲਂ ਅਨ੍ਤਰਾਯਾਯਾ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਅਥ ਖੋ ਆਵੁਸੋ ਆਯਸ੍ਮਤੋ ਅਰਿਟ੍ਠਸ੍ਸ ਗਦ੍ਧਬਾਧਿਪੁਬ੍ਬਸ੍ਸ ਕਥਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ, ਕਥਞ੍ਚ ਭਗਵਾ ਉਤ੍ਤਰਿ ਭਿਕ੍ਖੁਨਂ ਧਮ੍ਮਦੇਸਨਂ ਪਵਤ੍ਤੇਸਿ.

ਵਿਸ੍ਸਜ੍ਜਨਾ – ਅਥ ਖੋ ਭਨ੍ਤੇ ਅਰਿਟ੍ਠਸ੍ਸ ਭਿਕ੍ਖੁਨੋ ਗਦ੍ਧਬਾਧਿਪੁਬ੍ਬਸ੍ਸ ‘‘ਕਿਞ੍ਚਾਪਿ ਮਂ ਭਗਵਾ ਮੋਘਪੁਰਿਸਵਾਦੇਨ ਵਦੇਸਿ, ਨ ਖੋ ਪਨ ਮੇ ਮਗ੍ਗਫਲਾਨਂ ਉਪਨਿਸ੍ਸਯੋ ਨ ਹੋਤਿ, ਸ੍ਵਾਹਂ ਆਰਭਿਤ੍ਵਾ ਘਟ੍ਟੇਤ੍ਵਾ ਮਗ੍ਗਫਲਾਨਿ ਨਿਬ੍ਬਤ੍ਤੇਸ੍ਸਾਮੀ’’ਤਿ, ਏਵਂ ਖੋ ਭਨ੍ਤੇ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ, ਭਗਵਾ ਚ ਭਨ੍ਤੇ ਦੁਪ੍ਪਞ੍ਞਸ੍ਸ ਅਲਗਦ੍ਦੂਪਮਂ ਦਸ੍ਸੇਤ੍ਵਾ ਅਲਗਦ੍ਦੂਪਮਂ ਪਰਿਯਤ੍ਤਿਞ੍ਚ ਦਸ੍ਸੇਤ੍ਵਾ ਪਞ੍ਞਵਤੋ ਅਲਗਦ੍ਦੂਪਮਾਯ ਚ ਕੁਲ੍ਲੂਪਮਾਯ ਚ ਪਞ੍ਞਵਤੋ ਨਿਸ੍ਸਰਣਪਰਿਯਤ੍ਤਿਂ ਦਸ੍ਸੇਤ੍ਵਾ ਛ ਚ ਦਿਟ੍ਠਿਟ੍ਠਾਨਾਨਿ, ਤੇਸਞ੍ਚ ਛਨ੍ਨਂ ਦਿਟ੍ਠਿਟ੍ਠਾਨਾਨਂ ਵਿਨਿਵੇਠਨਾਕਾਰਂ ਦਸ੍ਸੇਤ੍ਵਾ ਪਰਿਯੋਸਾਨੇ ਚ ਖਨ੍ਧਕਮ੍ਮਟ੍ਠਾਨਂ ਅਰਹਤ੍ਤਨਿਕੂਟੇਨ ਦਸ੍ਸੇਤ੍ਵਾ ਉਤ੍ਤਰਿ ਭਿਕ੍ਖੂਨਂ ਧਮ੍ਮਕਥਂ ਪਵਤ੍ਤੇਸਿ.

ਵਮ੍ਮਿਕਸੁਤ੍ਤ

ਪੁਚ੍ਛਾ – ਧਮ੍ਮਿਕਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਕੁਮਾਰਕਸ੍ਸਪਂ ਆਰਬ੍ਭ ਭਾਸਿਤਂ. ਆਯਸ੍ਮਾ ਭਨ੍ਤੇ ਕੁਮਾਰਕਸ੍ਸਪੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਮ੍ਮਿਕਪਞ੍ਹਂ ਪੁਚ੍ਛਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਰਥਵਿਨੀਤਸੁਤ੍ਤ

ਪੁਚ੍ਛਾ – ਰਥਵਿਨੀਤਸੁਤ੍ਤਂ ਪਨਾਵੁਸੋ ਕਤ੍ਥ ਕੇਨ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਤਾ ਚ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਆਯਸ੍ਮਤਾ ਚ ਪੁਣ੍ਣੇਨ ਮਨ੍ਤਾਣਿਪੁਤ੍ਤੇਨ ਅਞ੍ਞਮਞ੍ਞਂ ਪੁਚ੍ਛਾਵਿਸ੍ਸਜ੍ਜਨਵਸੇਨ ਭਾਸਿਤਂ.

ਨਿਵਾਪਸੁਤ੍ਤ

ਪੁਚ੍ਛਾ – ਨਿਵਾਪਸੁਤ੍ਤਂ ਪਨਾਵੁਸੋ ਭਗਵਤਾ ਕਤ੍ਥ ਕਂ ਆਰਬ੍ਭ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ.

ਪੁਚ੍ਛਾ – ਇਮਸ੍ਮਿਂ ਆਵੁਸੋ ਸੁਤ੍ਤੇ ਕੋ ਨਿਵਾਪੋ ਕੋ ਨੇਵਾਪਿਕੋ ਕਾ ਨੇਵਾਪਿਕਪਰਿਸਾ ਕਾ ਮਿਗਜਾਤਾ ਕਥਞ੍ਚੇਤਿਸ੍ਸਾ ਉਪਮਾਯ ਅਤ੍ਥੋ ਦਟ੍ਠਬ੍ਬੋ.

ਵਿਸ੍ਸਜ੍ਜਨਾ – ਇਮਸ੍ਮਿਂ ਭਨ੍ਤੇ ਸੁਤ੍ਤੇ ਨਿਵਾਪੋਤਿ ਖੋ ਭਨ੍ਤੇ ਪਞ੍ਚਨ੍ਨੇਤਂ ਕਾਮਗੁਣਾਨਂ ਅਧਿਵਚਨਂ, ਨੇਵਾਪਿਕੋਤਿ ਖੋ ਭਨ੍ਤੇ ਮਾਰਸ੍ਸੇਤਂ ਪਾਪਿਮਤੋ ਅਧਿਵਚਨਂ, ਨੇਵਾਪਿਕਪਰਿਸਾਤਿ ਖੋ ਭਨ੍ਤੇ ਮਾਰਪਰਿਸਾਯੇਤਂ ਅਧਿਵਚਨਂ, ਮਿਗਜਾਤਾਤਿ ਖੋ ਭਨ੍ਤੇ ਸਮਣਬ੍ਰਾਹ੍ਮਣਾਨਮੇਤਂ ਅਧਿਵਚਨਂ, ਇਮਸ੍ਮਿਂ ਭਨ੍ਤੇ ਸੁਤ੍ਤੇ ਏਤਸ੍ਸ ਅਤ੍ਥੋ ਏਵਂ ਦਟ੍ਠਬ੍ਬੋ.

ਪਾਸਰਾਸਿਸੁਤ੍ਤ

ਪੁਚ੍ਛਾ – ਕੇਨਾਵੁਸੋ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਪਾਸਰਾਸਿਸੁਤ੍ਤਂ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਭਾਸਿਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਭਾਸਿਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਰਮ੍ਮਕਸ੍ਸ ਬ੍ਰਾਹ੍ਮਣਸ੍ਸ ਅਸ੍ਸਮੇ ਭਗਵਨ੍ਤਂ ਆਰਬ੍ਭ ਧਮ੍ਮਿਯਾ ਕਥਾਯ ਸਨ੍ਨਿਸੀਦਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਭਾਸਿਤਂ.

ਪੁਚ੍ਛਾ – ਅਥ ਖੋ ਆਵੁਸੋ ਤੇਸਂ ਸਮ੍ਬਹੁਲਾਨਂ ਭਿਕ੍ਖੂਨਂ ਧਮ੍ਮਿਯਾ ਕਥਾਯ ਸਨ੍ਨਿਸਿਨ੍ਨਾਨਂ ਕੀਦਿਸਂ ਧਮ੍ਮਕਥਂ ਕਥੇਸਿ.

ਵਿਸ੍ਸਜ੍ਜਨਾ – ਸਾਧੁ ਭਿਕ੍ਖਵੇ ਏਤਂ ਖੋ ਭਿਕ੍ਖਵੇ ਤੁਮ੍ਹਾਕਂ ਪਤਿਰੂਪਂ ਕੁਲਪੁਤ੍ਤਾਨਂ ਸਦ੍ਧਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤਾਨਂ, ਯਂ ਤੁਮ੍ਹੇ ਧਮ੍ਮਿਯਾ ਕਥਾਯ ਸਨ੍ਨਿਸੀਦੇਯ੍ਯਾਥ, ਸਨ੍ਨਿਪਤਿਤਾਨਂ ਵੋ ਭਿਕ੍ਖਵੇ ਦ੍ਵਯਂ ਕਰਣੀਯਂ ਧਮ੍ਮੀ ਵਾ ਕਥਾ ਅਰਿਯੋ ਵਾ ਤੁਣ੍ਹੀਭਾਵੋ. ਦ੍ਵੇਮਾ ਭਿਕ੍ਖਵੇ ਪਰਿਯੇਸਨਾ ਅਰਿਯਾ ਚ ਪਰਿਯੇਸਨਾ ਅਨਰਿਯਾ ਚ ਪਰਿਯੇਸਨਾ. ਏਵਮਾਦਿਨਾ ਭਨ੍ਤੇ ਭਗਵਾ ਸਨ੍ਨਿਪਤਿਤਾਨਂ ਤੇਸਂ ਭਿਕ੍ਖੂਨਂ ਅਰਿਯਪਰਿਯੇਸਨਞ੍ਚ ਅਨਰਿਯਪਰਿਯੇਸਨਞ੍ਚ ਵਿਭਜਿਤ੍ਵਾ ਦੇਸੇਸਿ.

ਪੁਚ੍ਛਾ – ਕਥਞ੍ਚਾਵੁਸੋ ਭਗਵਾ ਅਤ੍ਤਨਾਪਿ ਅਨਰਿਯਪਰਿਯੇਸਨਂ ਪਹਾਯ ਅਰਿਯਪਰਿਯੇਸਨਾਯ ਪਰਿਯੇਸਿਤਭਾਵਂ ਪਕਾਸੇਸਿ.

ਵਿਸ੍ਸਜ੍ਜਨਾ – ਅਹਮ੍ਪਿ ਸੁਦਂ ਭਿਕ੍ਖਵੇ ਪੁਬ੍ਬੇਵ ਸਮ੍ਬੋਧਾ ਅਨਭਿਸਮ੍ਬੁਦ੍ਧੋ ਬੋਧਿਸਤ੍ਤੋਵ ਸਮਾਨੋ ਅਤ੍ਤਨਾ ਜਾਤਿਧਮ੍ਮੋ ਸਮਾਨੋ ਜਾਤਿਧਮ੍ਮਂਯੇਵ ਪਰਿਯੇਸਾਮਿ, ਅਤ੍ਤਨਾ ਜਰਾਧਮ੍ਮੋ ਬ੍ਯਾਧਿਧਮ੍ਮੋ ਮਰਣਧਮ੍ਮੋ ਸੋਕਧਮ੍ਮੋ ਸਂਕਿਲੇਸਧਮ੍ਮੋ ਸਮਾਨੋ ਸਂਕਿਲੇਸਧਮ੍ਮਂਯੇਵ ਪਰਿਯੇਸਾਮਿ. ਏਵਮਾਦਿਨਾ ਭਨ੍ਤੇ ਭਗਵਾ ਅਤ੍ਤਨਾਪਿ ਅਨਰਿਯਪਰਿਯੇਸਨਂ ਪਹਾਯ ਅਰਿਯਪਰਿਯੇਸਨਾਯ ਪਰਿਯੇਸਿਤਭਾਵਂ ਪਕਾਸੇਸਿ.

ਪੁਚ੍ਛਾ – ਏਵਂ ਪਠਮਾਭਿਸਮ੍ਬੁਦ੍ਧਸ੍ਸ ਆਵੁਸੋ ਭਗਵਤੋ ਅਜਪਾਲਨਿਗ੍ਰੋਧਰੁਕ੍ਖਮੂਲੇ ਨਿਸਿਨ੍ਨਸ੍ਸ ਧਮ੍ਮਦੇਸਨਾਯ ਕਤਸਨ੍ਨਿਟ੍ਠਾਨਸ੍ਸ ਕੀਦਿਸੋ

ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ, ਕਥਞ੍ਚ ਧਮ੍ਮਦੇਸਨਾਯ ਚਾਰਿਕਾ ਅਹੋਸਿ, ਕਥਞ੍ਚ ਪਠਮਾ ਧਮ੍ਮਦੇਸਨਾ ਅਹੋਸਿ.

ਵਿਸ੍ਸਜ੍ਜਨਾ – ‘‘ਕਸ੍ਸ ਨੁ ਖੋ ਅਹਂ ਪਠਮਂ ਧਮ੍ਮਂ ਦੇਸੇਯ੍ਯਂ, ਕੋ ਇਮਂ ਧਮ੍ਮਂ ਖਿਪ੍ਪਮੇਵ ਆਜਾਨਿਸ੍ਸਤੀ’’ਤਿ ਏਵਂ ਖੋ ਭਨ੍ਤੇ ਭਗਵਤੋ ਪਠਮਾਭਿਸਮ੍ਬੁਦ੍ਧਸ੍ਸ ਅਜਪਾਲਨਿਗ੍ਰੋਧਮੂਲੇ ਧਮ੍ਮਦੇਸਨਾਯ ਕਤਸਨ੍ਨਿਟ੍ਠਾਨਸ੍ਸ ਪਰਿਵਿਤਕ੍ਕੋ ਉਦਪਾਦਿ, ਅਥ ਭਨ੍ਤੇ ਭਗਵਾ ਉਰੁਵੇਲਾਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਬਾਰਾਣਸੀ, ਤੇਨ ਪਦਸਾਯੇਵ ਚਾਰਿਕਂ ਪਕ੍ਕਾਮਿ ਧਮ੍ਮਦੇਸਨਾਯ, ਦ੍ਵੇਮੇ ਭਿਕ੍ਖਵੇ ਅਨ੍ਤਾ ਪਬ੍ਬਜਿਤੇਨ ਨ ਸੇਵਿਤਬ੍ਬਾ, ਕਤਮੇ ਦ੍ਵੇ, ਯੋ ਚਾਯਂ ਕਾਮੇਸੁ ਕਾਮਸੁਖਲ੍ਲਿਕਾਨੁਯੋਗੋ ਹੀਨੋ ਗਾਮ੍ਮੋ ਪੋਥੁਜ੍ਜਨਿਕੋ ਅਨਰਿਯੋ ਅਨਤ੍ਤਸਂਹਿਤੋ, ਏਵਮਾਦਿਨਾ ਭਨ੍ਤੇ ਭਗਵਤੋ ਪਠਮਾ ਧਮ੍ਮਦੇਸਨਾ ਅਹੋਸਿ.

ਸਬ੍ਬਾਭਿਭੂ ਸਬ੍ਬਵਿਦੂਹਮਸ੍ਮਿ,

ਸਬ੍ਬਧਮ੍ਮੇਸੁ ਅਨੂਪਲਿਤ੍ਤੋ;

ਸਬ੍ਬਞ੍ਜਹੋ ਤਣ੍ਹਾਕ੍ਖਯੇ ਵਿਮੁਤ੍ਤੋ,

ਸਯਂ ਅਭਿਞ੍ਞਾਯ ਕਮੁਦ੍ਦਿਸੇਯ੍ਯਂ.