੧. ਰੂਪਾਦਿਵਗ੍ਗ

ਪੁਚ੍ਛਾ – ਏਕਕਨਿਪਾਤੇਪਿ ਆਵੁਸੋ ਰੂਪਾਦਿਵਗ੍ਗੋ ਨੀਵਰਣਪ੍ਪਹਾਨਵਗ੍ਗੋ ਅਕਮ੍ਮਨਿਯਵਗ੍ਗੋਤਿਆਦਿਨਾ ਵਗ੍ਗਭੇਦਵਸੇਨ ਬਹੁਵਿਧਾ. ਤਤ੍ਥ ਕਤਰਂ ਵਗ੍ਗਂ ਪਠਮਂ ਸਂਗਾਯਿਂਸੁ.

ਵਿਸ੍ਸਜ੍ਜਨਾ – ਏਕਕਨਿਪਾਤੇ ਭਨ੍ਤੇ ਰੂਪਾਦਿਵਗ੍ਗੋ ਨੀਵਰਣਪ੍ਪਹਾਨਵਗ੍ਗੋਤਿਆਦਿਨਾ ਵੀਸਤਿਯਾ ਵਗ੍ਗੇਸੁ ਰੂਪਾਦਿਵਗ੍ਗਂ ਪਠਮਂ ਸਂਗਾਯਿਂਸੁ.

ਪੁਚ੍ਛਾ – ਸਾਧੁ ਸਾਧੁ ਆਵੁਸੋ, ਮਯਮ੍ਪਿ ਦਾਨਿ ਆਵੁਸੋ ਤਤੋਯੇਵ ਪਟ੍ਠਾਯ ਸਂਗਾਹਨਤ੍ਥਾਯ ਸਂਗੀਤਿਪੁਬ੍ਬਙ੍ਗਮਾਨਿ ਧਮ੍ਮਪੁਚ੍ਛਨਵਿਸ੍ਸਜ੍ਜਨਕਿਚ੍ਚਾਨਿ ਆਵਹਿਤੁਂ ਸਮਾਰਭਾਮ. ਤੇਨਾਵੁਸੋ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਅਙ੍ਗੁਤ੍ਤਰਨਿਕਾਯੇ ਏਕਕਨਿਪਾਤੇ ਰੂਪਾਦਿਵਗ੍ਗੇ ਪੁਰਿਮਾਨਿ ਪਞ੍ਚ ਸੁਤ੍ਤਾਨਿ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਰੂਪਾਦਿਗਰੁਕਾਨਂ ਪਞ੍ਚਨ੍ਨਂ ਪੁਰਿਸਾਨਂ ਅਜ੍ਝਾਸਯਵਸੇਨ ‘‘ਨਾਹਂ ਭਿਕ੍ਖਵੇ ਅਞ੍ਞਂ ਏਕਰੂਪਮ੍ਪਿ ਸਮਨੁਪਸ੍ਸਾਮਿ, ਯਂ ਏਵਂ ਪੁਰਿਸਸ੍ਸ ਚਿਤ੍ਤਂ ਪਰਿਯਾਦਾਯ ਤਿਟ੍ਠਤਿ, ਯਥਯਿਦਂ ਭਿਕ੍ਖਵੇ ਇਤ੍ਥਿਰੂਪਂ, ਇਤ੍ਥਿਰੂਪਂ ਭਿਕ੍ਖਵੇ ਪੁਰਿਸਸ੍ਸ ਚਿਤ੍ਤਂ ਪਰਿਯਾਦਾਯ ਤਿਟ੍ਠਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਾਨਿ.

ਨਾਹਂ ਭਿਕ੍ਖਵੇ ਅਞ੍ਞਂ ਏਕਰੂਪਮ੍ਪਿ ਸਮਨੁਪਸ੍ਸਾਮਿ, ਯਂ ਏਵਂ ਪੁਰਿਸਸ੍ਸ ਚਿਤ੍ਤਂ ਪਰਿਯਾਦਾਯ ਤਿਟ੍ਠਤਿ, ਯਥਯਿਦਂ ਭਿਕ੍ਖਵੇ ਇਤ੍ਥਿਰੂਪਂ, ਇਤ੍ਥਿਰੂਪਂ ਭਿਕ੍ਖਵੇ ਪੁਰਿਸਸ੍ਸ ਚਿਤ੍ਤਂ ਪਰਿਯਾਦਾਯ ਤਿਟ੍ਠਤਿ.

ਪੁਚ੍ਛਾ – ਤਤ੍ਥੇਵ ਆਵੁਸੋ ਪਚ੍ਛਿਮਾਨਿ ਪਞ੍ਚ ਸੁਤ੍ਤਾਨਿ ਭਗਵਤਾ ਕਤ੍ਥ ਕਂ ਆਰਬ੍ਭ ਕਥਞ੍ਚ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਤਸ੍ਮਿਂਯੇਵ ਭਨ੍ਤੇ ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਰੂਪਾਦਿਗਰੁਕਾਨਂ ਪਞ੍ਚਨ੍ਨਂ ਇਤ੍ਥੀਨਂ ਅਜ੍ਝਾਸਯਵਸੇਨ ‘‘ਨਾਹਂ ਭਿਕ੍ਖਵੇ ਅਞ੍ਞਂ ਏਕਰੂਪਮ੍ਪਿ ਸਮਨੁਪਸ੍ਸਾਮਿ, ਯਂ ਏਵਂ ਇਤ੍ਥਿਯਾ ਚਿਤ੍ਤਂ ਪਰਿਯਾਦਾਯ ਤਿਟ੍ਠਤਿ, ਯਥਯਿਦਂ ਭਿਕ੍ਖਵੇ ਪੁਰਿਸਰੂਪਂ, ਪੁਰਿਸਰੂਪਂ ਭਿਕ੍ਖਵੇ ਇਤ੍ਥਿਯਾ ਚਿਤ੍ਤਂ ਪਰਿਯਾਦਾਯ ਤਿਟ੍ਠਤੀ’’ਤਿ ਏਵਮਾਦਿਨਾ ਭਗਵਤਾ ਭਾਸਿਤਾਨਿ.

ਨਾਹਂ ਭਿਕ੍ਖਵੇ ਅਞ੍ਞਂ ਏਕਰੂਪਮ੍ਪਿ ਸਮਨੁਪਸ੍ਸਾਮਿ, ਯਂ ਏਵਂ ਇਤ੍ਥਿਯਾ ਚਿਤ੍ਤਂ ਪਰਿਯਾਦਾਯ ਤਿਟ੍ਠਤਿ, ਯਥਯਿਦਂ ਭਿਕ੍ਖਵੇ ਪੁਰਿਸਰੂਪਂ, ਪੁਰਿਸਰੂਪਂ ਭਿਕ੍ਖਵੇ ਇਤ੍ਥਿਯਾ ਚਿਤ੍ਤਂ ਪਰਿਯਾਦਾਯ ਤਿਟ੍ਠਤਿ.

ਨੀਤਤ੍ਥਵਸੇਨ, ਨੇਯ੍ਯਤ੍ਥਵਸੇਨ

ਪੁਚ੍ਛਾ – ਇਮਸ੍ਮਿਂ ਆਵੁਸੋ ਰੂਪਾਦਿਵਗ੍ਗੇ ਭਗਵਤਾ ਨੀਤਤ੍ਥਵਸੇਨ ਕਿਂ ਕਥਿਤਂ, ਨੇਯ੍ਯਤ੍ਥਵਸੇਨ ਪਨ ਕਿਂ ਞਾਪਿਤਂ.

ਵਿਸ੍ਸਜ੍ਜਨਾ – ਇਮਸ੍ਮਿਂ ਭਨ੍ਤੇ ਰੂਪਾਦਿਵਗ੍ਗੇ ਭਗਵਤਾ ਨੀਤਤ੍ਥਵਸੇਨ ਵਟ੍ਟਂ ਕਥਿਤਂ. ਨੇਯ੍ਯਤ੍ਥਵਸੇਨ ਪਨ ਵਿਵਟ੍ਟਮ੍ਪਿ ਞਾਪਿਤਂ.