੧੭. ਝਾਨਪਚ੍ਚਯੋ

ਸਤ੍ਤ ਝਾਨਙ੍ਗਾਨਿ ਝਾਨਪਚ੍ਚਯੋ, ਵਿਤਕ੍ਕੋ ਵਿਚਾਰੋ ਪੀਤਿ ਸੋਮਨਸ੍ਸਂ ਦੋਮਨਸ੍ਸਂ ਉਪੇਕ੍ਖਾ ਏਕਗ੍ਗਤਾ. ਤੇਹਿ ਸਹਜਾਤਾ ਪਞ੍ਚਵਿਞ੍ਞਾਣਵਜ੍ਜਿਤਾ ਚਿਤ੍ਤਚੇਤਸਿਕਧਮ੍ਮਾ ਚ ਰੂਪਧਮ੍ਮਾ ਚ ਤਸ੍ਸ ਪਚ੍ਚਯੁਪ੍ਪਨ੍ਨਾ.

ਕੇਨਟ੍ਠੇਨ ਝਾਨਨ੍ਤਿ. ਉਪਨਿਜ੍ਝਾਯਨਟ੍ਠੇਨ ਝਾਨਂ. ਉਪਨਿਜ੍ਝਾਯ ਨਟ੍ਠੇਨਾਤਿ ਚ ਮਨਸਾ ਆਰਮ੍ਮਣਂ ਉਪਗਨ੍ਤ੍ਵਾ ਨਿਜ੍ਝਾਯਨਟ੍ਠੇਨ ਪੇਕ੍ਖਨਟ੍ਠੇਨ. ਯਥਾ ਹਿ ਇਸ੍ਸਾਸੋ ਦੂਰੇ ਠਤ੍ਵਾ ਖੁਦ੍ਦਕੇ ਲਕ੍ਖਮਣ੍ਡਲੇ ਸਰਂ ਪਵੇਸੇਨ੍ਤੋ ਹਤ੍ਥੇਹਿ ਸਰਂ ਉਜੁਕਞ੍ਚ ਨਿਚ੍ਚਲਞ੍ਚ ਕਤ੍ਵਾ ਮਣ੍ਡਲਞ੍ਚ ਵਿਭੂਤਂ ਕਤ੍ਵਾ ਚਕ੍ਖੁਨਾ ਨਿਜ੍ਝਾਯਨ੍ਤੋ ਪਵੇਸੇਤਿ. ਏਵਮੇਵ ਇਮੇਹਿ ਅਙ੍ਗੇਹਿ ਚਿਤ੍ਤਂ ਉਜੁਕਞ੍ਚ ਨਿਚ੍ਚਲਞ੍ਚ ਕਤ੍ਵਾ ਆਰਮ੍ਮਣਞ੍ਚ ਵਿਭੂਤਂ ਕਤ੍ਵਾ ਨਿਜ੍ਝਾਯਨ੍ਤੋ ਪੁਗ੍ਗਲੋ ਉਪਨਿਜ੍ਝਾਯਤੀਤਿ ਵੁਚ੍ਚਤਿ. ਏਵਂ ਉਪਨਿਜ੍ਝਾਯਿਤ੍ਵਾ ਯਂਕਿਞ੍ਚਿ ਕਾਯਕਮ੍ਮਂ ਵਾ ਵਚੀਕਮ੍ਮਂ ਵਾ ਮਨੋਕਮ੍ਮਂ ਵਾ ਕਰੋਨ੍ਤੋ ਅਵਿਰਜ੍ਝਮਾਨੋ ਕਰੋਤਿ.

ਤਤ੍ਥ ਕਾਯਕਮ੍ਮਂ ਨਾਮ ਅਭਿਕ੍ਕਮਪ੍ਪਟਿਕ੍ਕਮਾਦਿਕਂ ਵੁਚ੍ਚਤਿ. ਵਚੀਕਮ੍ਮਂ ਨਾਮ ਅਕ੍ਖਰਵਣ੍ਣਪਰਿਪੁਣ੍ਣਂ ਵਚੀਭੇਦਕਰਣਂ ਵੁਚ੍ਚਤਿ. ਮਨੋਕਮ੍ਮਂ ਨਾਮ ਯਂਕਿਞ੍ਚਿ ਮਨਸਾ ਆਰਮ੍ਮਣਵਿਭਾਵਨਂ ਵੁਚ੍ਚਤਿ. ਦਾਨਕਮ੍ਮਂ ਵਾ ਪਾਣਾਤਿਪਾਤ ਕਮ੍ਮਂ ਵਾ ਅਨੁਰੂਪੇਹਿ ਝਾਨਙ੍ਗੇਹਿ ਵਿਨਾ ਦੁਬ੍ਬਲੇਨ ਚਿਤ੍ਤੇਨ ਕਾਤੁਂ ਨ ਸਕ੍ਕਾ ਹੋਤਿ. ਏਸ ਨਯੋ ਸੇਸੇਸੁ ਕੁਸਲਾਕੁਸਲ ਕਮ੍ਮੇਸੂਤਿ.

ਅਯਞ੍ਚ ਅਤ੍ਥੋ ਵਿਤਕ੍ਕਾਦੀਨਂ ਝਾਨਙ੍ਗਧਮ੍ਮਾਨਂ ਵਿਸੁਂ ਵਿਸੁਂ ਸਭਾਵ ਲਕ੍ਖਣੇਹਿ ਦੀਪੇਤਬ੍ਬੋ. ਸਮ੍ਪਯੁਤ੍ਤਧਮ੍ਮੇ ਆਰਮ੍ਮਣਾਭਿਨਿਰੋਪਨ ਲਕ੍ਖਣੋ ਵਿਤਕ੍ਕੋ, ਸੋ ਚਿਤ੍ਤਂ ਆਰਮ੍ਮਣੇ ਦਲ਼੍ਹਂ ਨਿਯੋਜੇਤਿ. ਆਰਮ੍ਮਣਾਨੁਮਜ੍ਜਨਲਕ੍ਖਣੋ ਵਿਚਾਰੋ, ਸੋ ਚਿਤ੍ਤਂ ਆਰਮ੍ਮਣੇ ਦਲ਼੍ਹਂ ਸਂਯੋਜੇਤਿ. ਆਰਮ੍ਮਣਸਮ੍ਪਿਯਾਯਨਲਕ੍ਖਣਾਪੀਤਿ, ਸਾ ਚਿਤ੍ਤਂ ਆਰਮ੍ਮਣੇ ਪਰਿਤੁਟ੍ਠਂ ਕਰੋਤਿ. ਤਿਸ੍ਸੋਪਿ ਵੇਦਨਾ ਆਰਮ੍ਮਣਰਸਾਨੁ ਭਵਨਲਕ੍ਖਣਾ, ਤਾਪਿ ਚਿਤ੍ਤਂ ਆਰਮ੍ਮਣੇ ਇਟ੍ਠਾਨਿਟ੍ਠਮਜ੍ਝਤ੍ਤਰਸਾਨੁਭਵਨ ਕਿਚ੍ਚੇਨ ਦਲ਼੍ਹਪ੍ਪਟਿਬਦ੍ਧਂ ਕਰੋਨ੍ਤਿ. ਸਮਾਧਾਨਲਕ੍ਖਣਾ ਏਕਗ੍ਗਤਾ, ਸਾਪਿ ਚਿਤ੍ਤਂ ਆਰਮ੍ਮਣੇ ਨਿਚ੍ਚਲਂ ਕਤ੍ਵਾ ਠਪੇਤੀਤਿ. ਝਾਨਪਚ੍ਚਯਦੀਪਨਾ ਨਿਟ੍ਠਿਤਾ.