੧੫. ਆਹਾਰਪਚ੍ਚਯੋ

ਦੁਵਿਧੋ ਆਹਾਰਪਚ੍ਚਯੋ ਰੂਪਾਹਾਰਪਚ੍ਚਯੋ ਅਰੂਪਾਹਾਰ ਪਚ੍ਚਯੋ.

ਤਤ੍ਥ ਰੂਪਾਹਾਰਪਚ੍ਚਯੋ ਨਾਮ ਕਬਲ਼ੀਕਾਰਾਹਾਰਸਙ੍ਖਾਤਂ ਓਜ ਰੂਪਂ ਵੁਚ੍ਚਤਿ. ਸੋ ਚ ਅਜ੍ਝਤ੍ਤਾਹਾਰੋ ਬਹਿਦ੍ਧਾਹਾਰੋਤਿ ਦੁਵਿਧੋ. ਕਬਲ਼ੀਕਾਰਾਹਾਰਭਕ੍ਖਾਨਂ ਸਤ੍ਤਾਨਂ ਸਬ੍ਬੇਪਿ ਚਤੁਸਮੁਟ੍ਠਾਨਿਕਰੂਪਧਮ੍ਮਾ ਤਸ੍ਸ ਦੁਵਿਧਸ੍ਸ ਰੂਪਾਹਾਰਸ੍ਸ ਪਚ੍ਚਯੁਪ੍ਪਨ੍ਨਾ.

ਅਰੂਪਾਹਾਰੋ ਪਨ ਤਿਵਿਧੋ ਫਸ੍ਸਾਹਾਰੋ ਮਨੋਸਞ੍ਚੇਤਨਾ ਹਾਰੋ ਵਿਞ੍ਞਾਣਾਹਾਰੋ ਚ. ਤਯੋਪੇਤੇ ਧਮ੍ਮਾ ਸਹਜਾਤਾਨਂ ਨਾਮਰੂਪਧਮ੍ਮਾਨਂ ਆਹਾਰਪਚ੍ਚਯੋ ਹੋਨ੍ਤਿ. ਸਹਜਾਤਾ ਚ ਨਾਮਰੂਪ ਧਮ੍ਮਾ ਤੇਸਂ ਪਚ੍ਚਯੁਪ੍ਪਨ੍ਨਾ.

ਕੇਨਟ੍ਠੇਨ ਆਹਾਰੋਤਿ. ਭੁਸਂ ਹਰਣਟ੍ਠੇਨ ਆਹਾਰੋ. ਭੁਸਂ ਹਰਣਟ੍ਠੇਨਾਤਿਚ ਦਲ਼੍ਹਂ ਪਵਤ੍ਤਾਪਨਟ੍ਠੇਨ, ਚਿਰਕਾਲਂ ਠਿਤਿਯਾ ਵੁਡ੍ਢਿਯਾ ਵਿਰੁਲ਼੍ਹਿਯਾ ਵੇਪੁਲ੍ਲਾਯ ਉਪਤ੍ਥਮ੍ਭਨਟ੍ਠੇਨਾਤਿ ਵੁਤ੍ਤਂ ਹੋਤਿ. ਜਨਨਕਿਚ੍ਚਯੁਤ੍ਤੋਪਿ ਆਹਾਰੋ ਉਪਤ੍ਥਮ੍ਭਨਕਿਚ੍ਚਪ੍ਪਧਾਨੋ ਹੋਤੀਤਿ.

ਤਤ੍ਥ ਦੁਵਿਧੋ ਰੂਪਾਹਾਰੋ ਅਜ੍ਝਤ੍ਤਸਨ੍ਤਾਨੇ ਚਤੁਸਮੁਟ੍ਠਾਨਿਕਂ ਰੂਪਕਾਯਂ ਉਪਬ੍ਰੂਹਯਨ੍ਤੋ ਭੁਸਂ ਹਰਤਿ, ਦਲ਼੍ਹਂ ਪਵਤ੍ਤੇਤਿ, ਚਿਰਂ ਅਦ੍ਧਾਨਂ ਗਮੇਤਿ, ਤਂ ਤਂ ਆਯੁਕਪ੍ਪਪਰਿਯੋਸਾਨਂ ਪਾਪੇਤੀਤਿ ਆਹਾਰੋ.

ਫਸ੍ਸਾਹਾਰੋ ਆਰਮ੍ਮਣੇਸੁ ਇਟ੍ਠਾਨਿਟ੍ਠਰਸਂ ਨੀਹਰਨ੍ਤੋ ਸਮ੍ਪਯੁਤ੍ਤਧਮ੍ਮੇ ਭੁਸਂ ਹਰਤਿ. ਮਨੋਸਞ੍ਚੇਤਨਾਹਾਰੋ ਕਾਯਵਚੀ ਮਨੋਕਮ੍ਮੇਸੁ ਉਸ੍ਸਾਹਂ ਜਨੇਨ੍ਤੋ ਸਮ੍ਪਯੁਤ੍ਤਧਮ੍ਮੇ ਭੁਸਂ ਹਰਤਿ. ਵਿਞ੍ਞਾਣਾਹਾਰੋ ਆਰਮ੍ਮਣਵਿਜਾਨਨਟ੍ਠੇਨ ਪੁਬ੍ਬਙ੍ਗਮਕਿਚ੍ਚਂ ਵਹਨ੍ਤੋ ਸਮ੍ਪਯੁਤ੍ਤਧਮ੍ਮੇ ਭੁਸਂ ਹਰਤਿ, ਦਲ਼੍ਹਂ ਪਵਤ੍ਤੇਤਿ, ਚਿਰਂ ਅਦ੍ਧਾਨਂ ਗਮੇਤੀਤਿ ਆਹਾਰੋ. ਸਮ੍ਪਯੁਤ੍ਤਧਮ੍ਮੇ ਭੁਸਂ ਹਰਨ੍ਤੋ ਸਹਜਾਤਰੂਪਧਮ੍ਮੇਪਿ ਭੁਸਂ ਹਰਤਿਯੇਵ.

ਇਧ ਸੁਤ੍ਤਨ੍ਤਨਯੋਪਿ ਵਤ੍ਤਬ੍ਬੋ. ਯਥਾ ਸਕੁਣਾ ਨਾਮ ਚਕ੍ਖੂਹਿ ਦਿਸਾਵਿਦਿਸਂ ਵਿਭਾਵੇਤ੍ਵਾ ਪਤ੍ਤੇਹਿ ਰੁਕ੍ਖਤੋ ਰੁਕ੍ਖਂ ਵਨਤੋ ਵਨਂ ਆਕਾਸੇਨ ਪਕ੍ਖਨ੍ਦਿਤ੍ਵਾ ਤੁਣ੍ਡਕੇਹਿ ਫਲਾਫਲਾਨਿ ਤੁਦਿਤ੍ਵਾ ਯਾਵਜੀਵਂ ਅਤ੍ਤਾਨਂ ਯਾਪੇਨ੍ਤਿ. ਤਥਾ ਇਮੇ ਸਤ੍ਤਾ ਛਹਿ ਵਿਞ੍ਞਾਣੇਹਿ ਆਰਮ੍ਮਣਾਨਿ ਵਿਭਾਵੇਤ੍ਵਾ ਛਹਿ ਮਨੋਸਞ੍ਚੇਤਨਾਹਾਰੇਹਿ ਆਰਮ੍ਮਣਵਤ੍ਥੁਪ੍ਪਟਿਲਾਭਤ੍ਥਾਯ ਉਸ੍ਸੁਕ੍ਕਨਂ ਕਤ੍ਵਾ ਛਹਿ ਫਸ੍ਸਾਹਾਰੇਹਿ ਆਰਮ੍ਮਣੇਸੁ ਰਸਂ ਪਾਤੁਭਵਨ੍ਤਂ ਕਤ੍ਵਾ ਸੁਖਦੁਕ੍ਖਂ ਅਨੁਭਵਨ੍ਤਿ. ਵਿਞ੍ਞਾਣੇਹਿ ਵਾ ਆਰਮ੍ਮਣਾਨਿ ਵਿਭਾਵੇਤ੍ਵਾ ਨਾਮਰੂਪ ਸਮ੍ਪਤ੍ਤਿਂ ਸਾਧੇਨ੍ਤਿ. ਫਸ੍ਸੇਹਿ ਆਰਮ੍ਮਣੇਸੁ ਰਸਂ ਪਾਤੁਭਵਨ੍ਤਂ ਕਤ੍ਵਾ ਆਰਮ੍ਮਣਰਸਾਨੁਭਵਨਂ ਵੇਦਨਂ ਸਮ੍ਪਾਦੇਤ੍ਵਾ ਤਣ੍ਹਾਵੇਪੁਲ੍ਲਂ ਆਪਜ੍ਜਨ੍ਤਿ. ਚੇਤਨਾਹਿ ਤਣ੍ਹਾਮੂਲਕਾਨਿ ਨਾਨਾਕਮ੍ਮਾਨਿ ਪਸਵੇਤ੍ਵਾ ਭਵਤੋ ਭਵਂ ਸਂਸਰਨ੍ਤਿ. ਏਵਂ ਆਹਾਰਧਮ੍ਮਾਨਂ ਮਹਨ੍ਤਂ ਆਹਾਰਕਿਚ੍ਚਂ ਵੇਦਿਤਬ੍ਬਨ੍ਤਿ. ਆਹਾਰਪਚ੍ਚਯਦੀਪਨਾ ਨਿਟ੍ਠਿਤਾ.