ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਨਮਕ੍ਕਾਰਪਾਲ਼ਿ

੧. ਸੁਗਤਂ ਸੁਗਤਂ ਸੇਟ੍ਠਂ, ਕੁਸਲਂਕੁਸਲਂ ਜਹਂ;

ਅਮਤਂ ਅਮਤਂ ਸਨ੍ਤਂ, ਅਸਮਂ ਅਸਮਂ ਦਦਂ.

ਸਰਣਂ ਸਰਣਂ ਲੋਕਂ, ਅਰਣਂ ਅਰਣਂ ਕਰਂ;

ਅਭਯਂ ਅਭਯਂ ਠਾਨਂ, ਨਾਯਕਂ ਨਾਯਕਂ ਨਮੇ.

੨. ਨਯਨਸੁਭਗਕਾਯਙ੍ਗਂ,

ਮਧੁਰਵਰਸਰੋਪੇਤਂ;

ਅਮਿਤਗੁਣਗਣਾਧਾਰਂ,

ਦਸਬਲਮਤੁਲਂ ਵਨ੍ਦੇ.

੩. ਯੋ ਬੁਦ੍ਧੋ ਧਿਤਿਮਾਞ੍ਞਧਾਰਕੋ,

ਸਂਸਾਰੇ ਅਨੁਭੋਸਿ ਕਾਯਿਕਂ;

ਦੁਕ੍ਖਂ ਚੇਤਸਿਕਞ੍ਚ ਲੋਕਤੋ,

ਤਂ ਵਨ੍ਦੇ ਨਰਦੇਵਮਙ੍ਗਲਂ.

੪. ਬਾਤ੍ਤਿਂਸਤਿਲਕ੍ਖਣਚਿਤ੍ਰਦੇਹਂ,

ਦੇਹਜ੍ਜੁਤਿਨਿਗ੍ਗਤਪਜ੍ਜਲਨ੍ਤਂ;

ਪਞ੍ਞਾਧਿਤਿਸੀਲਗੁਣੋਘਵਿਨ੍ਦਂ,

ਵਨ੍ਦੇ ਮੁਨਿਮਨ੍ਤਿਮਜਾਤਿਯੁਤ੍ਤਂ.

੫. ਪਾਤੋਦਯਂ ਬਾਲਦਿਵਾਕਰਂਵ,

ਮਜ੍ਝੇ ਯਤੀਨਂ ਲਲਿਤਂ ਸਿਰੀਹਿ;

ਪੁਣ੍ਣਿਨ੍ਦੁਸਙ੍ਕਾਸਮੁਖਂ ਅਨੇਜਂ,

ਵਨ੍ਦਾਮਿ ਸਬ੍ਬਞ੍ਞੁਮਹਂ ਮੁਨਿਨ੍ਦਂ.

੬. ਉਪੇਤਪੁਞ੍ਞੋ ਵਰਬੋਧਿਮੂਲੇ,

ਸਸੇਨਮਾਰਂ ਸੁਗਤੋ ਜਿਨਿਤ੍ਵਾ;

ਅਬੋਜ੍ਝਿ ਬੋਧਿਂ ਅਰੁਣੋਦਯਮ੍ਹਿ,

ਨਮਾਮਿ ਤਂ ਮਾਰਜਿਨਂ ਅਭਙ੍ਗਂ.

੭. ਰਾਗਾਦਿਛੇਦਾਮਲਞਾਣਖਗ੍ਗਂ,

ਸਤੀਸਮਞ੍ਞਾਫਲਕਾਭਿਗਾਹਂ;

ਸੀਲੋਘਲਙ੍ਕਾਰਵਿਭੂਸਿਤਂ ਤਂ,

ਨਮਾਮਿਭਿਞ੍ਞਾਵਰਮਿਦ੍ਧੁਪੇਤਂ.

੮. ਦਯਾਲਯਂ ਸਬ੍ਬਧਿ ਦੁਕ੍ਕਰਂ ਕਰਂ,

ਭਵਣ੍ਣਵਾਤਿਕ੍ਕਮਮਗ੍ਗਤਂ ਗਤਂ;

ਤਿਲੋਕਨਾਥਂ ਸੁਸਮਾਹਿਤਂ ਹਿਤਂ,

ਸਮਨ੍ਤਚਕ੍ਖੁਂ ਪਣਮਾਮਿ ਤਂਮਿਤਂ.

੯. ਤਹਿਂ ਤਹਿਂ ਪਾਰਮਿਸਞ੍ਚਯਂ ਚਯਂ,

ਗਤਂ ਗਤਂ ਸਬ੍ਭਿ ਸੁਖਪ੍ਪਦਂ ਪਦਂ;

ਨਰਾਨਰਾਨਂ ਸੁਖਸਮ੍ਭਵਂ ਭਵਂ,

ਨਮਾਨਮਾਨਂ ਜਿਨਪੁਙ੍ਗਵਂ ਗਵਂ.

੧੦. ਮਗ੍ਗਙ੍ਗਨਾਵਂ ਮੁਨਿਦਕ੍ਖਨਾਵਿਕੋ,

ਈਹਾਫਿਯਂ ਞਾਣਕਰੇਨ ਗਾਹਕੋ;

ਆਰੁਯ੍ਹ ਯੋ ਤਾਯ ਬਹੂ ਭਵਣ੍ਣਵਾ,

ਤਾਰੇਸਿ ਤਂ ਬੁਦ੍ਧਮਘਪ੍ਪਹਂ ਨਮੇ.

੧੧. ਸਮਤਿਂਸਤਿਪਾਰਮਿਸਮ੍ਭਰਣਂ,

ਵਰਬੋਧਿਦੁਮੇ ਚਤੁਸਚ੍ਚਦਸਂ;

ਵਰਮਿਦ੍ਧਿਗਤਂ ਨਰਦੇਵਹਿਤਂ,

ਤਿਭਵੂਪਸਮਂ ਪਣਮਾਮਿ ਜਿਨਂ.

੧੨. ਸਤਪੁਞ੍ਞਜਲਕ੍ਖਣਿਕਂ ਵਿਰਜਂ,

ਗਗਨੂਪਮਧਿਂ ਧਿਤਿਮੇਰੁਸਮਂ;

ਜਲਜੂਪਮਸੀਤਲਸੀਲਯੁਤਂ,

ਪਥਵੀਸਹਨਂ ਪਣਮਾਮਿ ਜਿਨਂ.

੧੩. ਯੋ ਬੁਦ੍ਧੋ ਸੁਮਤਿ ਦਿਵੇ ਦਿਵਾਕਰੋਵ,

ਸੋਭਨ੍ਤੋ ਰਤਿਜਨਨੇ ਸਿਲਾਸਨਮ੍ਹਿ;

ਆਸੀਨੋ ਸਿਵਸੁਖਦਂ ਅਦੇਸਿ ਧਮ੍ਮਂ,

ਦੇਵਾਨਂ ਤਮਸਦਿਸਂ ਨਮਾਮਿ ਨਿਚ੍ਚਂ.

੧੪. ਯੋ ਪਾਦਪਙ੍ਕਜਮੁਦੁਤ੍ਤਲਰਾਜਿਕੇਹਿ,

ਲੋਕੇਹਿ ਤੀਹਿਵਿਕਲੇਹਿ ਨਿਰਾਕੁਲੇਹਿ;

ਸਮ੍ਪਾਪੁਣੇ ਨਿਰੁਪਮੇਯ੍ਯਤਮੇਵ ਨਾਥੋ,

ਤਂ ਸਬ੍ਬਲੋਕਮਹਿਤਂ ਅਸਮਂ ਨਮਾਮਿ.

੧੫. ਬੁਦ੍ਧਂ ਨਰਾਨਰਸਮੋਸਰਣਂ ਧਿਤਤ੍ਤਂ,

ਪਞ੍ਞਾਪਦੀਪਜੁਤਿਯਾ ਵਿਹਤਨ੍ਧਕਾਰਂ;

ਅਤ੍ਥਾਭਿਕਾਮਨਰਦੇਵਹਿਤਾਵਹਂ ਤਂ,

ਵਨ੍ਦਾਮਿ ਕਾਰੁਣਿਕਮਗ੍ਗਮਨਨ੍ਤਞਾਣਂ.

੧੬. ਅਖਿਲਗੁਣਨਿਧਾਨੋ ਯੋ ਮੁਨਿਨ੍ਦੋਪਗਨ੍ਤ੍ਵਾ,

ਵਨਮਿਸਿਪਤਨਵ੍ਹਂ ਸਞ੍ਞਤਾਨਂ ਨਿਕੇਤਂ;

ਤਹਿਮਕੁਸਲਛੇਦਂ ਧਮ੍ਮਚਕ੍ਕਂ ਪਵਤ੍ਤੋ,

ਤਮਤੁਲਮਭਿਕਨ੍ਤਂ ਵਨ੍ਦਨੇਯ੍ਯਂ ਨਮਾਮਿ.

੧੭. ਸੁਚਿਪਰਿਵਾਰਿਤਂ ਸੁਰੁਚਿਰਪ੍ਪਭਾਹਿ ਰਤ੍ਤਂ,

ਸਿਰਿਵਿਸਰਾਲਯਂ ਗੁਪਿਤਮਿਨ੍ਦ੍ਰਿਯੇਹੁਪੇਤਂ;

ਰਵਿਸਸਿਮਣ੍ਡਲਪ੍ਪਭੁਤਿਲਕ੍ਖਣੋਪਚਿਤ੍ਤਂ,

ਸੁਰਨਰਪੂਜਿਤਂ ਸੁਗਤਮਾਦਰਂ ਨਮਾਮਿ.

੧੮. ਮਗ੍ਗੋਲ਼ੁਮ੍ਪੇਨ ਮੁਹਪਟਿਘਾਸਾਦਿਉਲ੍ਲੋਲਵੀਚਿਂ,

ਸਂਸਾਰੋਘਂ ਤਰਿ ਤਮਭਯਂ ਪਾਰਪਤ੍ਤਂ ਪਜਾਨਂ;

ਤਾਣਂ ਲੇਣਂ ਅਸਮਸਰਣਂ ਏਕਤਿਤ੍ਥਂ ਪਤਿਟ੍ਠਂ,

ਪੁਞ੍ਞਕ੍ਖੇਤ੍ਤਂ ਪਰਮਸੁਖਦਂ ਧਮ੍ਮਰਾਜਂ ਨਮਾਮਿ.

੧੯. ਕਣ੍ਡਮ੍ਬਂਮੂਲੇ ਪਰਹਿਤਕਰੋ ਯੋ ਮੁਨਿਨ੍ਦੋ ਨਿਸਿਨ੍ਨੋ,

ਅਚ੍ਛੇਰਂ ਸੀਘਂ ਨਯਨਸੁਭਗਂ ਆਕੁਲਣ੍ਣਗ੍ਗਿਜਾਲਂ;

ਦੁਜ੍ਜਾਲਦ੍ਧਂਸਂ ਮੁਨਿਭਿਜਹਿਤਂ ਪਾਟਿਹੇਰਂ ਅਕਾਸਿ,

ਵਨ੍ਦੇ ਤਂ ਸੇਟ੍ਠਂ ਪਰਮਰਤਿਜਂ ਇਦ੍ਧਿਧਮ੍ਮੇਹੁਪੇਤਂ.

੨੦. ਮੁਨਿਨ੍ਦਕ੍ਕੋ ਯ੍ਵੇਕੋ ਦਯੁਦਯਰੁਣੋ ਞਾਣਵਿਤ੍ਥਿਣ੍ਣਬਿਮ੍ਬੋ,

ਵਿਨੇਯ੍ਯਪ੍ਪਾਣੋਘਂ ਕਮਲਕਥਿਤਂ ਧਮ੍ਮਰਂਸੀਵਰੇਹਿ;

ਸੁਬੋਧੇਸੀ ਸੁਦ੍ਧੇ ਤਿਭਵਕੁਹਰੇ ਬ੍ਯਾਪਿਤਕ੍ਕਿਤ੍ਤਿਨਞ੍ਚ,

ਤਿਲੋਕੇਕਚ੍ਚਕ੍ਖੁਂ ਦੁਖਮਸਹਨਂ ਤਂ ਮਹੇਸਿਂ ਨਮਾਮਿ.

੨੧. ਯੋ ਜਿਨੋ ਅਨੇਕਜਾਤਿਯਂ ਸਪੁਤ੍ਤਦਾਰਮਙ੍ਗਜੀਵਿਤਮ੍ਪਿ,

ਬੋਧਿਪੇਮਤੋ ਅਲਗ੍ਗਮਾਨਸੋ ਅਦਾਸਿਯੇਵ ਅਤ੍ਥਿਕਸ੍ਸ;

ਦਾਨਪਾਰਮਿਂ ਤਤੋ ਪਰਂ ਅਪੂਰਿ ਸੀਲਪਾਰਮਾਦਿਕਮ੍ਪਿ,

ਤਾਸਮਿਦ੍ਧਿਯੋਪਯਾਤਮਗ੍ਗਤਂ ਤਮੇਕਦੀਪਕਂ ਨਮਾਮਿ.

੨੨. ਦੇਵਾਦੇਵਾਤਿਦੇਵਂ ਨਿਧਨਵਪੁਧਰਂ ਮਾਰਭਙ੍ਗਂ ਅਭਙ੍ਗਂ,

ਦੀਪਂ ਦੀਪਂ ਪਜਾਨਂ ਜਯਵਰਸਯਨੇ ਬੋਧਿਪਤ੍ਤਂਧਿਪਤ੍ਤਂ;

ਬ੍ਰਹ੍ਮਾਬ੍ਰਹ੍ਮਾਗਤਾਨਂ ਵਰਗਿਰਕਥਿਕਂ ਪਾਪਹੀਨਂ ਪਹੀਨਂ,

ਲੋਕਾਲੋਕਾਭਿਰਾਮਂ ਸਤਤਮਭਿਨਮੇ ਤਂ ਮੁਨਿਨ੍ਦਂ ਮੁਨਿਨ੍ਦਂ.

੨੩. ਬੁਦ੍ਧੋ ਨਿਗ੍ਰੋਧਬਿਮ੍ਬੋ ਮੁਦੁਕਰਚਰਣੋ ਬ੍ਰਹ੍ਮਘੋਸੇਣਿਜਙ੍ਘੋ,

ਕੋਸਚ੍ਛਾਦਙ੍ਗਜਾਤੋ ਪੁਨਰਪਿ ਸੁਗਤੋ ਸੁਪ੍ਪਤਿਟ੍ਠਿਤਪਾਦੋ;

ਮੂਦੋਦਾਤੁਣ੍ਣਲੋਮੋ ਅਥਮਪਿ ਸੁਗਤੋ ਬ੍ਰਹ੍ਮੁਜੁਗ੍ਗਤ੍ਤਭਾਵੋ,

ਨੀਲਕ੍ਖੀ ਦੀਘਪਣ੍ਹੀ ਸੁਖੁਮਮਲਛਵੀ ਥੋਮ੍ਯਰਸਗ੍ਗਸਗ੍ਗੀ.

੨੪. ਚਤ੍ਤਾਲੀਸਗ੍ਗਦਨ੍ਤੋ ਸਮਕਲਪਨਜੋ ਅਨ੍ਤਰਂਸਪ੍ਪਪੀਨੋ,

ਚਕ੍ਕੇਨਙ੍ਕਿਤਪਾਦੋ ਅਵਿਰਲ਼ਦਸਨੋ ਮਾਰਜੁਸ੍ਸਙ੍ਖਪਾਦੋ.

ਤਿਟ੍ਠਨ੍ਤੋ ਨੋਨਮਨ੍ਤੋਭਯਕਰਮੁਦੁਨਾ ਜਣ੍ਣੁਕਾਨਾਮਸਨ੍ਤੋ,

ਵਟ੍ਟਕ੍ਖਨ੍ਧੋ ਜਿਨੋ ਗੋਤਰੁਣਪਖੁਮਕੋ ਸੀਹਪੁਬ੍ਬਡ੍ਢਕਾਯੋ.

੨੫. ਸਤ੍ਤਪ੍ਪੀਨੋ ਚ ਦੀਘਙ੍ਗੁਲਿ ਮਥ ਸੁਗਤੋ ਲੋਮਕੂਪੇਕਲੋਮੋ,

ਸਮ੍ਪਨ੍ਨੋਦਾਤਦਾਠੋ ਕਨਕਸਮਤਚੋ ਨੀਲਮੁਦ੍ਧਗ੍ਗਲੋਮੋ.

ਸਮ੍ਬੁਦ੍ਧੋ ਥੂਲਜਿਵ੍ਹੋ ਅਥ ਸੀਹਹਨੁਕੋ ਜਾਲਿਕਪ੍ਪਾਦਹਤ੍ਥੋ,

ਨਾਥੋ ਉਣ੍ਹੀਸਸੀਸੋ ਇਤਿਗੁਣਸਹਿਤਂ ਤਂ ਮਹੇਸਿਂ ਨਮਾਮਿ.

੨੬. ਬੁਦ੍ਧੋਬੁਦ੍ਧੋਤਿਘੋਸੋ ਅਤਿਦੁਲਭਤਰੋ ਕਾ ਕਥਾ ਬੁਦ੍ਧਭਾਵੋ,

ਲੋਕੇ ਤਸ੍ਮਾ ਵਿਭਾਵੀ ਵਿਵਿਧਹਿਤਸੁਖਂ ਸਾਧਵੋ ਪਤ੍ਥਯਨ੍ਤਾ.

ਇਟ੍ਠਂ ਅਤ੍ਥਂ ਵਹਨ੍ਤਂ ਸੁਰਨਰਮਹਿਤਂ ਨਿਬ੍ਭਯਂ ਦਕ੍ਖਿਣੇਯ੍ਯਂ,

ਲੋਕਾਨਂ ਨਨ੍ਦਿਵਡ੍ਢਂ ਦਸਬਲਮਸਮਂ ਤਂ ਨਮਸ੍ਸਨ੍ਤੁ ਨਿਚ੍ਚਂ.

੨੭. ਪੁਞ੍ਞੇਨੇਤੇਨ ਸੋਹਂ ਨਿਪੁਣਮਤਿ ਸਤੋ ਸਮ੍ਪਰਾਯੇ ਚ ਤਿਤ੍ਤੋ,

ਦਕ੍ਖੋ ਦਿਟ੍ਠੁਜ੍ਜੁਪਞ੍ਞੋ ਅਵਿਕਲਵੀਰਿਯੋ ਭੋਗਵਾ ਸਂਵਿਭਾਗੀ.

ਤਿਕ੍ਖੋ ਸੂਰੋ ਧਿਤਤ੍ਤੋ ਸਪਰਹਿਤਚਰੋ ਦੀਘਜੀਵੀ ਅਰੋਗੋ,

ਧਞ੍ਞੋ ਵਣ੍ਣੋ ਯਸਸ੍ਸੀ ਅਤਿਬਲਵਧਰੋ ਕਿਤ੍ਤਿਮਾ ਖਨ੍ਤੁਪੇਤੋ.

੨੮. ਸਦ੍ਧੋ ਦਾਤਙ੍ਗੁਪੇਤੋ ਪਰਮਸਿਰਿਧਰੋ ਦਿਟ੍ਠਧਮ੍ਮੇ ਵਿਰਤ੍ਤੋ,

ਲਜ੍ਜੀ ਕਲ੍ਯਾਣਮਿਤ੍ਤੋ ਅਭਿਰਤਕੁਸਲੋ ਪਞ੍ਚਸੀਲਾਦਿਰਕ੍ਖੋ.

ਅਪ੍ਪਿਚ੍ਛੋ ਅਪ੍ਪਕੋਧੋ ਅਤਿਵੁਜੁਹਦਯੋ ਇਦ੍ਧਿਮਾ ਅਪ੍ਪਮੇਯ੍ਯੋ,

ਪਾਸਂਸੋ ਪੇਮਵਾਚੋ ਸੁਜਨਗੁਣਵਿਦੂ ਮਾਮਕੋ ਸੋ ਭਵੇਯ੍ਯਂ.

੨੯. ਇਤ੍ਥਂ ਅਸਙ੍ਖਯੇ ਨਾਥ, ਗੁਣੇ ਲਕ੍ਖਣਦੀਪਿਤੇ;

ਗਾਥਾਸੁ ਸੂਚਕਾਸ੍ਵੇਕ, ਗਾਥਮ੍ਪਿ ਸਰਤੇ ਬੁਧੋ.

੩੦. ਚਤੁਰਾਪਾਯਮੁਤ੍ਤੋ ਸੋ, ਸਾਧਕਤ੍ਥਦ੍ਵਯਸ੍ਸ ਚ;

ਹਤੂਪਦ੍ਦਵਜਾਲੋ ਚ, ਲਾਭੀ ਹਿਤਸੁਖਸ੍ਸ ਚ.

੩੧. ਅਧਿਪੋ ਨਰਦੇਵਾਨਂ, ਚਤੁਦੀਪਿਸ੍ਸਰੋਪਿ ਵਾ;

ਭਵੇਯ੍ਯ ਅਨ੍ਤਿਮੇ ਦੇਹੇ, ਤਮਞ੍ਞਂ ਸੇਤਛਤ੍ਤਕਂ.

੩੨. ਭਾਵਨਾਯਾਨਮਾਰੁਯ੍ਹ, ਸਮਮੇਸ੍ਸਤਿ ਸੁਬ੍ਬਤੋ;

ਇਮਸ੍ਮਿਂ ਅਤ੍ਤਭਾਵੇਪਿ, ਅਰੋਗੋ ਦੀਘਜੀਵਿਕੋ.

੩੩. ਪੂਜਿਤੋ ਸਬ੍ਬਲੋਕੇਹਿ, ਭਾਵਨਾਭਿਰਤੀਮਨੋ;

ਜਨਪ੍ਪਿਯੋ ਮਨਾਪੋ ਚ, ਕਾ ਕਥਾਖਿਲਧਾਰਣੇ.

ਨਮਕ੍ਕਾਰਪਾਲ਼ਿ ਨਿਟ੍ਠਿਤਾ.

ਨਮਕ੍ਕਾਰਟੀਕਾ

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧. ਸੁਗਤਨ੍ਤ੍ਯਾਦਿਵਣ੍ਣੇਹਿ, ਪਸਤ੍ਥਞ੍ਚ ਸੁਖਦ੍ਦਦਂ;

ਵਨ੍ਦਨ੍ਤਾਨਂ ਜਿਨਂ ਨਤ੍ਵਾ, ਧਮ੍ਮਂ ਸੁਦ੍ਧਂ ਗਣੁਤ੍ਤਮਂ.

੨. ਨਮਕ੍ਕਾਰਂ ਹਿਤਤ੍ਥੀਹਿ, ਪੋਰਾਣਾਚਰਿਯੇਹਿ ਚ;

ਲਿਖਿਤ੍ਵਾ ਠਪਿਤਂ ਪੁਞ੍ਞ, ਬੁਦ੍ਧਿਯਾ ਤੇਨ ਵਨ੍ਦਿਨਂ.

੩. ਤਸ੍ਸਤ੍ਥਵਣ੍ਣਨਂ ਕਸ੍ਸਂ, ਗਮ੍ਭੀਰਤ੍ਥਸੁਬੋਧਨਂ;

ਮੋਵਿਪੁਨਾਮੇਨ ਸਨ੍ਤੇਨ, ਸੀਲੁਪੇਤੇਨ ਯਾਚਿਤੋ.

੪. ਵਣ੍ਣਨ੍ਤੋਪਿ ਚ ਤਸ੍ਸਤ੍ਥਂ, ਤਂ ਤਂ ਅਟ੍ਠਕਥਾਦਿਸੁ;

ਵੁਤ੍ਤਞਾਯੇਨ ਕਸ੍ਸਾਮਿ, ਸਦ੍ਧਾ ਸੁਣਾਥ ਸਾਧਵੋ.

੫. ਨਮਨਂ ਨਮਤੀਤੀ ਵਾ, ਨਮਤੀ ਤੇਨ ਵਾ ਨਮੋ;

ਤਸ੍ਸ ਕਾਰੋਨ੍ਤਿ ਤਾਹੀਤਿ, ਨਮਕ੍ਕਾਰੋਤਿ ਵੁਚ੍ਚਤਿ.

੬. ਤਞ੍ਚ ਬੁਦ੍ਧਘੋਸਾਚਰਿ, ਯੇਨ ਪੁਬ੍ਬਸੁਤਂ ਕਤਂ;

ਬੁਦ੍ਧਘੋਸੁਪ੍ਪਤ੍ਤਿਯਞ੍ਚ, ਤਂ ਤਂ ਪਨ ਕਥਾਦਿਸੁ.

੭. ਨ ਦਿਟ੍ਠਂ ਕਤਕਾਰਣਂ, ਤਸ੍ਮਾ ਹਿਤਤ੍ਥਿਕੇਹਿ ਚ;

ਪੋਰਾਣਾਚਰਿਯੇਹੀ ਚ, ਠਪਿਤਨ੍ਤਿ ਮਯਾ ਵੁਤ੍ਤਂ;

ਤਂ ਕਾਰਣਂ ਵਿਞ੍ਞੂਹੀ ਚ, ਵਿਚਾਰੇਤ੍ਵਾ ਵਿਜਾਨਿਤਨ੍ਤਿ.

੧. ਸੁਗਤਂ ਸੁਗਤਂ ਸੇਟ੍ਠਂ, ਕੁਸਲਂਕੁਸਲਂ ਜਹਂ;

ਅਮਤਂ ਅਮਤਂ ਸਨ੍ਤਂ, ਅਸਮਂ ਅਸਮਂ ਦਦਂ.

ਸਰਣਂ ਸਰਣਂ ਲੋਕਂ, ਅਰਣਂ ਅਰਣਂ ਕਰਂ;

ਅਭਯਂ ਅਭਯਂ ਠਾਨਂ, ਨਾਯਕਂ ਨਾਯਕਂ ਨਮੇ.

੧. [ਕ] ਇਦਾਨਿ ਪਠਮਂ ਤਾਵ ਸੁਗਤਨ੍ਤ੍ਯਾਦੀਹਿ ਅਟ੍ਠਾਰਸਹਿ ਗੁਣੇਹਿ ਥੋਮੇਤ੍ਵਾ ਬੁਦ੍ਧਸ੍ਸ ਵਨ੍ਦਿਤੁਕਾਮੇਨ ਸੁਗਤਨ੍ਤਿਆਦਿ ਗਾਥਾਦ੍ਵਯਂ ਆਰਦ੍ਧਂ. ਅਯਂ ਪਨ ਸਬ੍ਬਪਾਦਾਦਿਯਮਕਪਥ੍ਯਾ ਵਤ੍ਤਗਾਥਾਤਿ ਦਟ੍ਠਬ੍ਬਂ. ਤਂ ਪਨ ਯਮਕਂ ਸੁਬੋਧਾਲਙ੍ਕਾਰੇ ਕਿਲਿਟ੍ਠਦੋਸਨ੍ਤਿ ਵੁਤ੍ਤਂ.

ਵੁਤ੍ਤਞ੍ਹਿ ਤਤ੍ਥ –

‘‘ਯਂ ਕਿਲਿਟ੍ਠਪਦਂ ਮਨ੍ਦਾ, ਭਿਧੇਯ੍ਯਂ ਯਮਕਾਦਿਕਂ;

ਕਿਲਿਟ੍ਠਪਦਦੋਸੇਵ, ਤਮ੍ਪਿ ਅਨ੍ਤੋ ਕਰੀਯਤੀ’’ਤਿ.