ਨਵਮ ਪਰਿਚ੍ਛੇਦ

ਅਭਯਾਭਿਸੇਕੋ

੧. ਮਹੇਸੀ ਜਨਯੀ ਪੁਤ੍ਤੇ, ਦਸ ਏਕਞ੍ਚ ਧੀਤਰਂ;

ਸਬ੍ਬਜੇਟ੍ਠੋ’ਭਯੋ ਨਾਮ, ਚਿਤ੍ਤਾਨਾਮ ਕਨਿਟ੍ਠਿਕਾ.

੨. ਪਸ੍ਸਿਤ੍ਵਾ ਤਂ ਵਿਯਾਕਂਸੁ, ਬ੍ਰਾਹ੍ਮਣਾ ਮਨ੍ਤਪਾਰਗਾ;

‘‘ਰਜ੍ਜਹੇਤੁ ਸੁਤੋ ਅਸ੍ਸਾ, ਘਾਤਯਿਸ੍ਸਤਿ ਮਾਤੁਲੇ’’.

੩. ਘਾਤੇਸ੍ਸਾਮਿ ਕਨਿਟ੍ਠਿਨ੍ਤਿ, ਨਿਚ੍ਛਿਤੇ ਭਾਤਰਾ’ਭਯੋ;

ਵਾਰੇਸਿ ਕਾਲੇ ਵਾਸੇਸੁਂ, ਗੇਹਂ ਤਂ ਏਕਥੁਣਿਕੇ.

੪. ਰਞ੍ਞੋ ਚ ਸਿਰਿਗਬ੍ਭੇਨ, ਤਸ੍ਸ ਦ੍ਵਾਰਮਕਾਰਯੁਂ;

ਅਨ੍ਤੋ ਠਪੇਸੁਂ ਏਕਞ੍ਚ, ਦਾਸਿਂ ਨਰਸਤਂ ਬਹਿ.

੫. ਰੂਪੇਨੁ’ਮ੍ਮਾਦਯੀ ਨਰੇ, ਦਿਟ੍ਠਮਤ੍ਤਾਵ ਸਾਯਤੋ;

ਤਤੋ ਉਮ੍ਮਾਦਚਿਤ੍ਤਾ’ਤਿ, ਨਾਮਂ ਸੋਪਪਦਂ ਲਭਿ.

੬. ਸੁਤ੍ਵਾਨ ਲਂਕਾਗਮਨਂ, ਭਦ੍ਦਕਚ੍ਚਾਨਦੇਵਿਯਾ;

ਮਾਤਰਾ ਚੋਦਿਤਾ ਪੁਤ੍ਤਾ, ਠਪੇਤ੍ਵੇ’ਕਞ੍ਚ ਆਗਮੁਂ.

੭. ਦਿਸ੍ਵਾਨ ਤੇ ਪਣ੍ਡੁਵਾਸੁ-ਦੇਵਂ ਲਙ੍ਕਿਨ੍ਦਮਾਗਤਾ;

ਦਿਸ੍ਵਾਨ ਤਂ ਕਨਿਟ੍ਠਿਞ੍ਚ, ਰੋਦਿਤ੍ਵਾ ਸਹ ਤਾਯ ਚ.

੮. ਰਞ੍ਞਾ ਸੁਕਤਸਕ੍ਕਾਰਾ, ਰਞ੍ਞੋ’ਨੁਞ੍ਞਾਯ ਚਾਰਿਕਂ;

ਚਰਿਂਸੁ ਲਂਕਾਦੀਪਮ੍ਹਿ, ਨਿਵਸੁਞ੍ਚ ਯਥਾਰੁਚਿਂ.

੯. ਰਾਮੇਨ ਵੁਸਿਤਠਾਨਂ, ਰਾਮਗੋਣਨ੍ਤਿ ਵੁਚ੍ਚਤਿ;

ਉਰੁਵੇਲਾ’ਨੁਰਾਧਾਨਂ, ਨਿਵਾਸਾ ਚ ਤਥਾ ਤਥਾ.

੧੦. ਤਥਾ ਵਿਜਿਤਦੀਘਾਯੁ-ਰੋਹਣਾਨਂ ਨਿਵਾਸਕਾ;

ਵਿਜਿਤਗਾਮੋ ਦੀਘਾਯੁ-ਰੋਹਣਨ੍ਤਿ ਚ ਵੁਚ੍ਚਤਿ.

੧੧. ਕਾਰੇਸਿ ਅਨੁਰਾਧੋ ਸੋ, ਵਾਪਿਂ ਦਕ੍ਖਿਣਤੋ ਤਤੋ;

ਕਾਰਾਪੇਤ੍ਵਾ ਰਾਜਗੇਹਂ, ਤਤ੍ਥ ਵਾਸਮਕਪ੍ਪਯੀ.

੧੨. ਮਹਾਰਾਜਾ ਪਣ੍ਡੁਵਾਸੁ-ਦੇਵੋ ਜਟ੍ਠਸੁਤਂ ਸਕਂ;

ਅਭਯਂ ਉਪਰਜ੍ਜਮ੍ਹਿ, ਕਾਲੇ ਸਮਭਿਸੇਚਯਿ.

੧੩. ਦੀਘਾਯੁਸ੍ਸ ਕੁਮਾਰਸ੍ਸ, ਤਨਯੋ ਦੀਘਗਾਮਣਿ;

ਸੁਤ੍ਵਾ ਉਮ੍ਮਾਦਚਿਤ੍ਤਂ ਤਂ, ਤਸ੍ਸਂ ਜਾਤਕੁਤੂਹਲੋ.

੧੪. ਗਹੇਤ੍ਵਾ’ਪਤਿਸ੍ਸ ਗਾਮਂ, ਤਂ ਅਪਸ੍ਸਿ ਮਨੁਜਾਧਿਪਂ;

ਅਦਾ ਸਹੋਪਰਾਜੇਨ, ਰਾਜੁਪਟ੍ਠਾਨਮਸ੍ਸਸੋ.

੧੫. ਗਵਕ੍ਖਾਭਿਮੁਖਟ੍ਠਾਨੇ, ਤਂ ਉਪੇਚ੍ਚ ਠਿਤਂ ਤੁਸਾ;

ਦਿਸ੍ਵਾਨ ਗਾਮਿਣਿਂ ਚਿਤ੍ਤਾ, ਰਤ੍ਤਚਿਤ੍ਤਾ’ਹ ਦਾਸਿਕਂ.

੧੬. ‘‘ਕੋ ਏਸੋ’’ਤਿ ਤਤੋ ਸੁਤ੍ਵਾ,

ਮਾਤੁਲਸ੍ਸ ਸੁਤੋਇਤਿ;

ਦਾਸਿਂ ਤਤ੍ਥ ਨਿਯੋਜੇਸਿ,

ਸਦ੍ਧਿਂਕਤ੍ਵਾਨ ਸੋ ਤਤੋ.

੧੭. ਗਵਕ੍ਖਮ੍ਹਿ ਡਸਾਪੇਤ੍ਵਾ, ਰਤ੍ਤਿਂ ਕਕ੍ਕਟਯਨ੍ਤਕਂ;

ਆਰੁਯ੍ਹ ਛਿਨ੍ਦਯਿਤ੍ਵਾਨ, ਕਵਾਟਂ ਤੇਨ ਪਾਵਿਸਿ.

੧੮. ਤਾਯ ਸਦ੍ਧਿਂ ਵਸਿਤ੍ਵਾਨ, ਪਚ੍ਚੂਸੇਯੇਵ ਨਿਕ੍ਖਮਿ;

ਏਵਂ ਨਿਚ੍ਚਂ ਵਸੀ ਤਤ੍ਥ, ਛਿਦ੍ਦਾਭਾਵਾ ਅਪਾਕਟੋ.

੧੯. ਸਾ ਤੇਨ ਅਗ੍ਗਹੀ ਗਬ੍ਭਂ, ਗਬ੍ਭੇ ਪਰਿਣਤੇ ਤਤੋ;

ਮਾਤੁ ਆਰੋਚਯੀ ਦਾਸੀ, ਮਾਤਾ ਪੁਚ੍ਛਿਯ ਧੀਤਰਂ.

੨੦. ਰਞ੍ਞੋ ਆਰੋਚਯੀ ਰਾਜਾ, ਅਮਨ੍ਤੇਤ੍ਵਾ ਸੁਤੇ’ਬ੍ਰਹ੍ਮਾ;

ਪੋਸਿਯੋਸੋ’ਪਿ ਅਮ੍ਹੇਹਿ, ਦੇਵ ਤਸ੍ਸੇਵ ਤਂ ਇਤਿ.

੨੧. ਪੁਤ੍ਤੋ ਚੇ ਮਾਰਯਿਸ੍ਸਾਮ, ਤ’ਨ੍ਤਿ ਤਸ੍ਸ ਅਦਂਸੁ ਤਂ;

ਸਾ ਸੂਤਿਕਾਲਸਮ੍ਪਤ੍ਤੇ, ਸੂਤਿ ਗੇਹਞ੍ਚ ਪਾਵਿਸਿਂ.

੨੨. ਸਙ੍ਕਿਤ੍ਵਾ ਗੋਪਕਂ ਚਿਤ੍ਤਂ, ਕਾਲਵੇਲਞ੍ਚ ਦਾਸਕਂ;

ਤਸ੍ਮਿਂ ਕਮ੍ਮੇ ਨਿਸ੍ਸਾਯਾ’ਤਿ, ਗਾਮਣਿ ਪਰਿਚਾਰਕੇ.

੨੩. ਤੇ ਪਟਿਞ੍ਞਂ ਅਦੇਨ੍ਤੇ ਤੇ, ਰਾਜਪੁਤ੍ਤਾ ਅਘਾਤਯੁਂ;

ਯਕ੍ਖਾ ਹੁਤ੍ਵਾਨ ਰਕ੍ਖਿਂਸੁ, ਉਭੋ ਗਬ੍ਭੇ ਕੁਮਾਰਕਂ.

੨੪. ਅਞ੍ਞਂ ਉਪਵਿਜਞ੍ਞਂ ਸਾ, ਸਲ੍ਲਕ੍ਖਾ ਪੇਸਿ ਦਾਸਿਯਾ;

ਚਿਤ੍ਤਾ ਸਾ ਜਨਯੀ ਪੁਤ੍ਤਂ, ਸਾ ਇਤ੍ਥਿ ਪਨ ਧੀਤਰਂ.

੨੫. ਚਿਤ੍ਤਂ ਸਹਸ੍ਸਂ ਦਾਪੇਤ੍ਵਾ, ਤਸ੍ਸਾ ਪੁਤ੍ਤਂ ਸਕਮ੍ਪਿ ਚ;

ਆਣਾਪੇਤ੍ਵਾ ਧੀਤਰਂ ਤਂ, ਨਿਪਜ੍ਜਾਪੇਸਿ ਸਨ੍ਤਿਕੇ.

੨੬. ਧੀਤਾ ਲਦ੍ਧਾ’ਤਿ ਸੁਤ੍ਵਾਨ, ਤੁਟ੍ਠਾ ਰਾਜਸੁਤਾ ਅਹੁਂ;

ਮਾਤਾ ਚ ਮਾਤੁਮਾਤਾ ਚ, ਉਭੋ ਪਨ ਕੁਮਾਰਕਂ.

੨੭. ਮਾਤਾਮਹਸ੍ਸ ਨਾਮਞ੍ਚ, ਜੇਟ੍ਠਸ੍ਸ ਮਾਤੁਲਸ੍ਸ ਚ;

ਏਕਂ ਕਤ੍ਵਾ ਤਮਕਰੁਂ, ਪਣ੍ਡੁਕਾਭਯਨਾਮਕਂ.

੨੮. ਲਂਕਾ ਪਾਲੋ ਪਣ੍ਡੁਵਾਸੁ-ਦੇਵੋ ਰਜ੍ਜਮਕਾਰਯਿ;

ਤਿਂਸ ਵਸ੍ਸਮ੍ਹਿ ਜਾਤਮ੍ਹਿ, ਮਤੋ ਸੋ ਪਣ੍ਡੁਕਾਭਯੇ.

੨੯. ਤਸ੍ਮਿਂ ਮਤਸ੍ਮਿਂ ਮਨੁਜਾਧਿਪਸ੍ਮਿਂ,

ਸਬ੍ਬੇ ਸਮਾਗਮ੍ਮ ਨਰਿਨ੍ਦਪੁਤ੍ਤਾ;

ਤਸ੍ਸਾਭਯਸ੍ਸਾਭਯਦਸ੍ਸ ਭਾਤੁ,

ਰਾਜਾਭਿਸੇਕਂ ਅਕਰੁਂ ਉਲ਼ਾਰਾਤਿ.

ਸੁਜਨਪ੍ਪਸਾਦ ਸਂਵੇਗਤ੍ਥਾਯ ਕਤੇ ਮਹਾਵਂਸੇ

ਅਭਯਾਭਿਸੇਕੋ ਨਾਮ

ਨਵਮੋ ਪਰਿਚ੍ਛੇਦੋ.