ਏਕਪਞ੍ਞਾਸਤਿਮ ਪਰਿਚ੍ਛੇਦ

ਪਞ੍ਚਰਾਜਕੋ ਨਾਮ

੧. ਯੁਵਰਾਜਾ ਤਦਾ ਹੁਤ੍ਵਾ, ਰਾਜਾ ਦਪ੍ਪੁਲ਼ਨਾਮਕੋ;

ਠਪੇਸਿ ਓਪਰਜ੍ਜਮ੍ਹਿ, ਆਦਿਪਦਂ ਸਨਾਮਕਂ.

੨. ਮਰਿਚਵਟ੍ਟਿਵਿਹਾਰਸ੍ਸ, ਗਾਮਂ ਦਤ੍ਵਾ ਤਤੋ ਪੁਰੇ;

ਚਾਰਿਤ੍ਤਂ ਪੁਬ੍ਬਰਾਜੂਨਂ, ਰਕ੍ਖਿਤ੍ਵਾਨ ਮਹਿਂ ਇਮਂ.

੩. ਅਭੁਤ੍ਵਾ ਦੀਘਕਾਲਞ੍ਹਿ, ਪੁਬ੍ਬਕਮ੍ਮੇਨ ਅਤ੍ਤਨੋ;

ਰਾਜਾ ਸੋ ਸਤ੍ਤਮੇ ਮਾਸੇ, ਪਵਿਟ੍ਠੋ ਪਚ੍ਚੁਨੋ ਮੁਖਂ.

੪. ਉਪਰਾਜਾ ਅਹੁਰਾਜਾ, ਦਪ੍ਪੁਲ਼ੋ ਤਦਨਨ੍ਤਰਂ;

ਉਦਯਸ੍ਸਾਦਿਪਾਦਸ੍ਸ, ਯੁਵਰਾਜਪਦਂ ਅਦਾ.

੫. ਤਦਾ ਚੋਲ਼ਭਯਾ ਪਣ੍ਡੁ-ਰਾਜਂ ਜਨਪਦਂ ਸਕਂ;

ਚਜਿਤ੍ਵਾ ਨਾਵਮਾਰੁਯ੍ਹ, ਮਹਾਤਿਤ੍ਥਮੁਪਾਗਮਿ.

੬. ਆਣਾਪੇਤ੍ਵਾਨ ਤਂ ਰਾਜਾ, ਦਿਸ੍ਵਾ ਸਨ੍ਤੁਟ੍ਠਮਾਨਸੋ;

ਮਹਾਭੋਗਂ ਅਦਾ ਤਸ੍ਸ, ਨਿਵਾਸੇਸਿ ਪੁਰਾ ਬਹਿ.

੭. ਚੋਲ਼ਰਾਜੇਨ ਯੁਜ੍ਝਿਤ੍ਵਾ, ਗਹੇਤ੍ਵਾ ਪਟ੍ਟਨਦ੍ਵਯਂ;

ਪਣ੍ਡੁਰਾਜਸ੍ਸ ਦਮ੍ਮੀਤਿ, ਸਨ੍ਨਦ੍ਧੇ ਲਙ੍ਕਰਾਜਿਨਿ.

੮. ਕੇਨਾ’ਪਿ ਕਰਣੀਯੇਨ, ਖਤ੍ਤਿਯਾ ਦੀਪਵਾਸਿਨੋ;

ਅਕਂਸੁ ਵਿਗ੍ਗਹਂ ਘੋਰਂ, ਪਾਪਕਮ੍ਮੇਨ ਪਣ੍ਡੁਨੋ.

੯. ਪਣ੍ਡੁਰਾਜੇ’ਤ੍ਥ ਵਾਸੇਨ, ਕਮ੍ਮਂ ਨਤ੍ਥੀਤਿ ਚਿਨ੍ਤਿਯ;

ਠਪੇਤ੍ਵਾ ਮਕੁਟਾਦੀਨਿ, ਗਤੋ ਕੇਰਲ਼ਸਨ੍ਤਿਕਂ.

੧੦. ਵਿਗ੍ਗਹੇ ਨਿਟ੍ਠਿਤੇ ਰਾਜਾ, ਮਹਾਮੇਘਵਨੇ ਤਦਾ;

ਮਹਾਬੋਧਿਘਰਸ੍ਸਾ’ਦਾ, ਗਾਮਂ ਨਗਰਸਨ੍ਤਿਕੇ.

੧੧. ਆਵਾਸਂ ਰਕ੍ਖਕੋ ਨਾਮ, ਤਸ੍ਸ ਸੇਨਾਪਤੀ ਅਕਾ;

ਥੂਪਾਰਾਮਸਮੀਪਮ੍ਹਿ, ਇਲ਼ਙ੍ਗੋ ਰਾਜਨਾਮਕਂ.

੧੨. ਕਤਂ ਤਂ ਪੁਬ੍ਬਰਾਜੇਹਿ, ਰਾਜਾ ਸੋ ਪਰਿਪਾਲਿਯ;

ਪਤ੍ਤੋ ਦ੍ਵਾਦਸਮਂ ਵਸ੍ਸਂ, ਯਥਾਕਮ੍ਮਮੁਪਾਗਮਿ.

੧੩. ਉਦਯੋ ਯੁਵਰਾਜਾ’ਸਿ, ਲਂਕਾਵਾਸੀਨਮਿਸ੍ਸਰੋ;

ਸੇਨਨਾਮਾਦਿਪਾਦਂ ਸੋ, ਓਪਰਜ੍ਜੇ’ਭਿਸੇਚਯਿ.

੧੪. ਰਞ੍ਞੋ ਭੀਤਾ ਤਦਾਮਚ੍ਚਾ, ਪਵਿਸਿਂਸੁ ਤਪੋਵਨਂ;

ਰਾਜੋਪਰਾਜਾ ਗਨ੍ਤ੍ਵਾਨ, ਤੇਸਂ ਸੀਸਾਨਿ ਛੇਦਯੁਂ.

੧੫. ਤੇਨ ਕਮ੍ਮੇਨ ਨਿਬ੍ਬਿਨ੍ਨਾ, ਯਤਯੋ ਤਨ੍ਨਿਵਾਸਿਨੋ;

ਹਿਤ੍ਵਾ ਜਨਪਦਂ ਰਞ੍ਞੋ, ਤਦਾਗਚ੍ਛਿਂਸੁ ਰੋਹਣਂ.

੧੬. ਤਦਾ ਜਾਨਪਦਾ ਚੇਵ, ਨਾਗਰਾ ਚ ਬਲਾਨਿ ਚ;

ਕੁਪਿਤਾ ਚਣ੍ਡੁਵਾਤੇਨ, ਸਾਗਰੋ ਵਿਯ ਕਮ੍ਪਿਤੋ.

੧੭. ਰਤਨਪਾਸਾਦਮਾਰੁਯ੍ਹ, ਵਿਹਾਰੇ ਅਭਯੁਤ੍ਤਰੇ;

ਸਨ੍ਤਾਸੇਤ੍ਵਾਨ ਰਾਜਾਨਂ, ਦਸ੍ਸੇਤ੍ਵਾਨ ਵਿਭੀਸਿਕਂ.

੧੮. ਉਪਤ੍ਥਮ੍ਭਕਮਚ੍ਚਾਨਂ, ਵਿਗ੍ਗਹਸ੍ਸ ਤਪੋਵਨੇ;

ਤਦਾ ਸੀਸਾਨਿ ਛਿਨ੍ਦਿਤ੍ਵਾ, ਕਵਾਤੇਨ ਨਿਪਾਤਯੁਂ.

੧੯. ਤਂ ਸੁਤ੍ਵਾ ਯੁਵਰਾਜਾ ਚ, ਆਦਿਪਾਦੋ ਚ ਤਂ ਸਖਾ;

ਉਲ੍ਲਙ੍ਘਿਤ੍ਵਾਨ ਪਾਕਾਰਂ, ਸੀਘਂ ਗਚ੍ਛਿਂਸੁ ਰੋਹਣਂ.

੨੦. ਬਲਕਾਯੋਨੁਬਨ੍ਧਿਤ੍ਵਾ, ਯਾਵ ਕਣ੍ਹਨਦੀਤਟਾ;

ਅਲਾਭੇਨ ਚ ਨਾਵਾਨਂ, ਤਿਣ੍ਣਤ੍ਤਾ ਤੇਸਮਾਗਮਿ.

੨੧. ਰਾਜਪੁਤ੍ਤਾਗਤਾ ਤਤ੍ਥ, ਵਨੇ ਅਭਯਭੇਦਿਨੋ;

ਯਤੀਨਂ ਪੁਰਤੋ ਤੇਸਂ, ਨਿਪਜ੍ਜਿਤ੍ਵਾ ਉਰੇਨ ਤੇ.

੨੨. ਅਲ੍ਲਵਤ੍ਥਾ’ਲ੍ਲਕੇਸਾ ਚ, ਪਰਿਦੇਵਿਤ੍ਥ’ਨੇਕਧਾ;

ਕਨ੍ਦੀਤ੍ਵਾ ਰੋਦਨਂ ਕਤ੍ਵਾ, ਖਮਾਪੇਸੁਂ ਤਪਸ੍ਸਿਨੋ.

੨੩. ਖਨ੍ਤਿਮੇਤ੍ਤਾਨੁਭਾਵੇਨ, ਤੇਸਂ ਸਾਸਨਸਾਮਿਨਂ;

ਪੁਞ੍ਞੋਦਯੋ ਅਹੁ ਤੇਸਂ, ਉਭਿਨ੍ਨਂ ਦੀਪਸਾਮਿਨਂ.

੨੪. ਯੁਵਰਾਜਬਲਞ੍ਚੇਵ, ਨਿਕਾਯਤ੍ਤਯਵਾਸਿਨੋ;

ਗਮਿਂਸੁ ਤੇਸਮਾਨੇਤੁਂ, ਸਨ੍ਤਿਭੂਤੇ ਮਹਾਬਲੇ.

੨੫. ਰਾਜਪੁਤ੍ਤਾ ਉਭੋ ਬ੍ਯਤ੍ਤਾ, ਪਣ੍ਡਿਤਾ ਪਂਸੁਕੂਲਿਨੋ;

ਯਾਚਿਤ੍ਵਾ ਤੇਸਮਾਦਾਯ, ਅਗਮਂਸੁ ਸਕਂ ਪੁਰਂ.

੨੬. ਭਿਕ੍ਖੂਨਂ ਪੁਰਤੋ ਮਗ੍ਗਂ, ਰਾਜਾਗਨ੍ਤਾ ਖਮਾਪਯਿ;

ਆਦਾਯ ਤੇ ਵਨਂ ਤੇਸਂ, ਨੇਤ੍ਵਾ ਰਾਜਘਰਂ ਗਤੋ.

੨੭. ਤਤੋ ਪਟ੍ਠਾਯ ਚਾਰਿਤ੍ਥਂ, ਪਾਲੇਤ੍ਵਾ ਪੁਬ੍ਬਰਾਜੁਨਂ;

ਰਾਜਾ ਸੋ ਤਤਿਯੇ ਵਸ੍ਸੇ, ਯਥਾਕਮ੍ਮਮੁਪਾਗਮਿ.

੨੮. ਲਂਕਾਭਿਸੇਕਂ ਪਤ੍ਵਾਨ, ਸੇਨੋ ਸੋ ਮਤਿਮਾ ਤਤੋ;

ਉਦਯਂ ਆਦਿਪਾਦਂ ਤਂ, ਯੁਵਰਾਜਂ ਅਕਾ ਸਖਂ.

੨੯. ਕਹਾਪਣਸਹਸ੍ਸਂ ਸੋ, ਦੁਗ੍ਗਤਾਨਂ ਉਪੋਸਥੇ;

ਹੋਤੁ’ਪੋਸਥਿਕੋ ਦਤ੍ਵਾ, ਯਾਵਜੀਵਂ ਨਰਾਧਿਪੋ.

੩੦. ਪਟਿਮਾ ਭਤ੍ਤਵਤ੍ਥਾਨਿ, ਭਿਕ੍ਖੂਨਂ ਧਰਣੀ ਪਤਿ;

ਅਦਾ ਦਣ੍ਡਿਸ੍ਸਰਂ ਦਾਨਂ, ਯਾਚਕਾਨਞ੍ਚ ਸਿਪ੍ਪੀਨਂ.

੩੧. ਠਾਨੇ ਕਤ੍ਥਚਿ ਸਿਪ੍ਪੀਨਂ, ਪਾਸਾਦੇਸੁ ਮਨੋਹਰੇ;

ਕਾਰੇਤ੍ਵਾ ਭੋਗਗਾਮੇ ਚ, ਅਦਾਪੇਸਿ ਮਹਾਮਤਿ.

੩੨. ਕਹਾਪਣਸਹਸ੍ਸਂ ਵਾ, ਦਤ੍ਵਾ ਪਞ੍ਚਸਤਾਨਿ ਵਾ;

ਲਙ੍ਕਾਯਂ ਜਿਣ੍ਣਕਾਵਾਸੇ, ਨਵਕਮ੍ਮਮਕਾਰਯੀ.

੩੩. ਚਤ੍ਤਾਲੀਸਸਹਸ੍ਸਾਨਿ, ਅਭਯੁਤ੍ਤਰਚੇਤਿਯੇ;

ਸਿਲਾਪਤ੍ਥਰਣਤ੍ਥਾਯ, ਦਾਪੇਸਿ ਚ ਮਹੀਪਤਿ.

੩੪. ਮਹਾਵਾਪੀਸੁ ਲਂਕਾਯਂ, ਜਿਣ੍ਣਨਿਦ੍ਧਮਨੇ ਅਕਾ;

ਨਵਕਮ੍ਮਞ੍ਚ ਮਰਿਯਾਦਂ, ਥਿਯਂ ਪਾਸਾਣਪਂਸੁਨਾ.

੩੫. ਅਕਾ ਰਾਜਘਰੇ ਰਮ੍ਮਂ, ਮਾਲਾਗੇਹਂ ਮਹਾਰਹਂ;

ਠਪਿਤਂ ਪੁਨਰਾਜੂਹਿ, ਦਾਨਂ ਸਮ੍ਮਾਪਵਤ੍ਤਯਿ.

੩੬. ਕਤਂ ਮਲਯਰਾਜੇਨ, ਅਮਚ੍ਚੇਨ’ਗ੍ਗ ਬੋਧਿਨਾ;

ਪਰਿਵੇਣਂ ਨਾਗਸਾਲਂ, ਦਿਸ੍ਵਾ ਗਾਮ ਮਦਾ ਤਦਾ.

੩੭. ਕਤ੍ਵਾ ਚਤੁਵਿਹਾਰੇਸੁ, ਰੂਪਕਮ੍ਮਾਨਿ ਸਾਧੁਕਂ;

ਮਣ੍ਡਪਾਨਿ ਚ ਰਮ੍ਮਾਨਿ, ਧਾਤੁਪੂਜਂ ਅਕਾ ਸਦਾ.

੩੮. ਏਵਮਾਦੀਨਿ ਪੁਞ੍ਞਾਨਿ, ਅਨੇਕਾਨਿ ਅਨੇਕਧਾ;

ਕਤ੍ਵਾ ਸੋ ਨਵਮੇ ਵਸ੍ਸੇ, ਯਥਾਕਮ੍ਮਮੁਪਾਗਮਿ.

੩੯. ਲਂਕਾਭਿਸੇਕਂ ਪਤ੍ਵਾਨ, ਯੁਵਰਾਜੋਦਯੋ ਤਤੋ;

ਸੇਨਨਾਮਾਦਿਪਾਦਂ ਸੋ, ਓਪਰਜ੍ਜੇ’ਭਿ ਸੇਚਯਿ.

੪੦. ਨਿਦ੍ਦਾਲੁ ਮਜ੍ਜਪੋ ਆਸਿ, ਰਾਜਾ ਪਾਪੇਨ ਜਨ੍ਤੁਨਂ;

ਚੋਲ਼ੋ ਪਮਤ੍ਤਤਂ ਤਸ੍ਸ, ਸੁਤ੍ਵਾ ਸਨ੍ਤੁਟ੍ਠਮਾਨਸੋ.

੪੧. ਪਣ੍ਡੁਦੇਸਾਤਿਸੇਕਂ ਸੋ, ਪਤ੍ਤੁਕਾ ਮੇਤ੍ਥ ਪੇਸਯਿ;

ਮਕੁਟਾਦੀਨਮਤ੍ਥਾਯ, ਠਪਿਤਾਨਂਵ ਪਣ੍ਡੁਨਾ.

੪੨. ਤਾਨਿ ਨਾਦਾਸਿ ਸੋ ਰਾਜਾ, ਤੇਨ ਚੋਲ਼ੋ ਮਹਬ੍ਬਲੋ;

ਬਲਂ ਸਨ੍ਨਯ੍ਹ ਪੇਸੇਸਿ, ਬਲਕ੍ਕਾਰੇਨ ਗਣ੍ਹਿਤੁਂ.

੪੩. ਤਦਾ ਸੇਨਾਪਤਿ ਏਤ੍ਥ, ਪਚ੍ਚਨ੍ਤੇ ਕੁਪਿਤੇ ਗਤੋ;

ਆਣਾਪੇਤ੍ਵਾਨ ਤਂ ਰਾਜਾ, ਯੁਜ੍ਝਨਤ੍ਥਾਯ ਪੇਸਯਿ.

੪੪. ਹਤੋ ਸੇਨਾਪਤਿ ਤਤ੍ਥ, ਯੁਜ੍ਝਿ ਨ ਰਣੇ ਮਤੋ;

ਕਕੂਟਾਦੀਨਿ ਆਦਾਯ, ਰਾਜਾ ਸੋ ਰੋਹਣਂ ਅਗਾ.

੪੫. ਗਨ੍ਤ੍ਵਾ ਚੋਲ਼ਬਲਂ ਤਤ੍ਥ, ਅਲਭਿਤ੍ਵਾ ਪਵੇਸਨਂ;

ਨਿਵਤ੍ਤਿਤ੍ਵਾ ਸਕਂ ਰਟ੍ਠਂ, ਅਗਮਾਸਿ ਇਧਤਾ ਭਯਾ.

੪੬. ਤਤੋ ਸੇਨਾਪਤਿਟ੍ਠਾਨੇ, ਵਿਦੁਰਗ੍ਗਂ ਤੁ ਨਾਯਕਂ;

ਠਪੇਸਿ ਰਾਜਾ ਲਂਕਿਨ੍ਦੋ, ਤੇਜਵਨ੍ਤਂ ਮਹਾਮਤਿਂ.

੪੭. ਪਚ੍ਚਨ੍ਤਂ ਚੋਲ਼ਰਾਜਸ੍ਸ, ਘਾਤੇਤ੍ਵਾ ਸੋ ਚਮੂਪਤਿ;

ਆਣਾਪੇਸਿ ਇਤੋ ਨੀਤਂ, ਦਸ੍ਸੇਤ੍ਵਾਨ ਵਿਭੀਸਿਤਂ.

੪੮. ਤਤੋ ਦਾਪੇਸਿ ਸੋ ਸਬ੍ਬ-ਪਰਿਕ੍ਖਾਰਂ ਮਹਾਰਹਂ;

ਪਂਸੁਕੂਲਿਕਭਿਕ੍ਖੂਨਂ, ਸਬ੍ਬੇਸਂ ਦੀਪਵਾਸਿਨਂ.

੪੯. ਮਹਾਵਿਹਾਰੇ ਲਂਕਿਨ੍ਦੋ, ਪਟਿਬਿਮ੍ਬਸ੍ਸ ਸਤ੍ਥੁਨੋ;

ਜਲਨ੍ਤਂ ਮਣਿਰਂਸੀਹਿ, ਅਕਾ ਚੂਲ਼ਾਮਣਿਂ ਤਦਾ.

੫੦. ਓਰੋਧਾ ਵਿਦੁਰਾ ਤਸ੍ਸ, ਪਾਦਜਾਲੇਨ ਪੂਜਯਿ;

ਮਣੀਹਿ ਪਜ੍ਜਲਨ੍ਤੇਹਿ, ਪਟਿਮਂ ਤਂ ਸਿਲਾਮਯਂ.

੫੧. ਝਾਪਿਤਂ ਚੋਲ਼ਰਾਜਸ੍ਸ, ਬਲੇਨ ਮਣਿਨਾਮਕਂ;

ਪਾਸਾਦਂ ਕਾਤੁਮਾਰਦ੍ਧੋ, ਚੁਤੋ ਵਸ੍ਸਮ੍ਹਿ ਅਟ੍ਠਮੇ.

੫੨. ਪਞ੍ਚੇਤੇ ਵਸੁਧਾਧਿਪਾ ਵਸੁਮਹਿਂ ਏਕਾਤਪਤ੍ਤਙ੍ਕਿਤਂ;

ਭੁਤ੍ਵਾ ਨਿਗ੍ਗਹਸਙ੍ਗਹੇਹਿ ਸਕਲਂ ਲੋਕਂ ਵਸੇ ਵਤ੍ਤਿਯ;

ਯਾ ਤਾ ਮਚ੍ਚੁਵਸਂ ਸਪੁਤ੍ਤਵਣਿਤਾ ਸਾਮਚ੍ਚਮਿਤ੍ਤਾਨੁਗਾ;

ਇਚ੍ਚੇਵਂ ਸਤਤਂ ਸਰਨ੍ਤੁ ਸੁਜਨਾ ਹਾਤੁਂ ਪਮਾਦਂ ਮਦਂ.

ਸੁਜਨਪ੍ਪਸਾਦਸਂਵੇਗਤ੍ਥਾਯ ਕਤੇ ਮਹਾਵਂਸੇ

ਪਞ੍ਚਰਾਜਕੋ ਨਾਮ

ਏਕਪਞ੍ਞਾਸਤਿਮੋ ਪਰਿਚ੍ਛੇਦੋ.