ਤਿਗੁਮ੍ਬਚੇਤਿਯ ਥੋਮਨਾ

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧. ਯੋ ਦੀਪਙ੍ਕਰਮੂਲਮ੍ਹਿ, ਪਦਂ ਹਤ੍ਤਗਤਂ ਚਜਿ;

ਸਮ੍ਮਾਸਮ੍ਬੋਧਿ ਮਾਕਙ੍ਖਂ, ਵਨ੍ਦੇ ਤਸ੍ਸ ਸਿਰੋਰੁਹਂ.

(ਪਥ੍ਯਾਵਤ੍ਤਗਾਥਾ).

੨. ਪੂਰੇਤ੍ਵਾ ਬੋਧਿਸਮ੍ਭਾਰ-ਮਹੇਸਂ ਯੋ ਅਨੁਤ੍ਤਰਂ;

ਅਲਤ੍ਥ ਬੁਦ੍ਧਤ੍ਤਂ ਤਸ੍ਸ, ਕੇਸਧਾਤੁਵਰਂ ਨਮੇ.

(ਪਥ੍ਯਾਵਤ੍ਤਗਾਥਾ).

੩. ਲਦ੍ਧਾ ਬੁਦ੍ਧਤ੍ਤਂ ਛਠਾਨ-ਮਤਿਕ੍ਕਮ੍ਮ ਪਵੇਦਯਿ;

ਵਿਮੁਤ੍ਤਿਂ ਰਾਜਾਯਤਨੇ, ਤਸ੍ਸ ਕੇਸਵਰਂ ਨਮੇ.

(ਰਕਾਰ ਭਕਾਰਵਿਪੁਲਾ ਪਥ੍ਯਾਵਤ੍ਤਗਾਥਾ).

੪. ਤਤ੍ਥ ਸਕ੍ਕਦਤ੍ਤਿਯਮ੍ਪਿ, ਨਾਗਲਤਂ ਹਰੀਤਕਂ;

ਅਨੋਤਤ੍ਤੋਦਕਂ ਭੁਞ੍ਜਿ, ਵਨ੍ਦੇ ਤਸ੍ਸ ਸਿਰੋਰੁਹਂ.

(ਰਕਾਰਵਿਪੁਲਾ ਪਥ੍ਯਾਵਤ੍ਤਗਾਥਾ).

੫. ਤਦਾ ਮੁਗ੍ਗਸੇਲਪਤ੍ਤਂ, ਮਹਾਰਾਜੂਹਿ ਦਿਨ੍ਨਕਂ;

ਤਥਾਗਤੋ ਪਟਿਗ੍ਗਣ੍ਹਿ, ਵਨ੍ਦਾਮਿ ਤਸ੍ਸ ਸੀਸਜਂ.

(ਰਕਾਰਵਿਪੁਲਾ ਪਥ੍ਯਾਵਤ੍ਤਗਾਥਾ).

੬. ਤਦਾ ਦ੍ਵਿਨ੍ਨਂ ਦ੍ਵੇਭਾਤਿਕ-ਜਨੇਹਿ ਮਧੁਪਿਣ੍ਡਿਕਂ;

ਪਰਿਭੁਞ੍ਜੇਸਿ ਮਨ੍ਥਮ੍ਪਿ, ਤਸ੍ਸ ਸੀਸਸਿਰਿਂ ਨਮੇ.

(ਤਕਾਰਵਿਪੁਲਾ ਪਥ੍ਯਾਵਤ੍ਤਗਾਥਾ).

੭. ਯੋ ਤਪੁਸ੍ਸਭਲ੍ਲਿਕਾਨਂ, ਤਦਾ ਦ੍ਵਿਸਰਣਂ ਅਦਾ;

ਲੋਕਮ੍ਹਿ ਸਬ੍ਬਪਠਮਂ, ਤਸ੍ਸ ਸੀਰਿਵਹਂ ਨਮੇ.

(ਰਕਾਰ ਨਕਾਰ ਵਿਪੁਲਾਪਥ੍ਯਾਵਤ੍ਤਗਾਥਾ).

੮. ਤਦਾ ਤਤ੍ਥੁਪਟ੍ਠਕਾਨਂ, ਤੇਸਂ ਕੇਸੇ ਅਦਾ ਅਠ;

ਲੋਕਹਿਤ ਮਪੇਕ੍ਖਨ੍ਤੋ, ਨਾਥੋ ਯੋ ਤਸ੍ਸ ਤੇ ਨਮੇ.

(ਰਕਾਰਵਿਪੁਲਾ ਪਥ੍ਯਾਵਤ੍ਤਗਾਥਾ).

੯. ਤੇਪਿ ਤਂ ਆਹਾਰਿਤ੍ਵਾਨ, ਪੋਕ੍ਖਰਬ੍ਬਤਿਯਂ ਕਰੁਂ;

ਸਜੀਵਕੇਸ ਚੇਤਿਯਂ, ਨਮੇਤਂ ਸਬ੍ਬਪੁਬ੍ਬਕਂ.

(ਮਕਾਰਵਿਪੁਲਾ ਪਥ੍ਯਾਵਤ੍ਤਗਾਥਾ).

੧੦. ਉਪੋਸਥੁਪੋਸਥਮ੍ਹਿ, ਮੁਞ੍ਚਨ੍ਤਂ ਨੀਲਰਸ੍ਮਿਯੋ;

ਭਗਵਾਵ ਲੋਕਅਤ੍ਥਂ, ਕਰੋਨ੍ਤਂ ਤਂ ਸਦਾ ਨਮੇ.

(ਰਕਾਰਵਿਪੁਲਾ ਪਥ੍ਯਾਵਤ੍ਤਗਾਥਾ).

੧੧. ਚੂਲ਼ਾਮਣਿਦੁਸ੍ਸਚੇਤ੍ਯਂ, ਕਾਲਮ੍ਹਿ ਬੋਧਿਸਤ੍ਤਕੇ;

ਬੁਦ੍ਧਕਾਲੇ ਇਦਂ ਸਬ੍ਬ-ਪਠਮਂ ਤਂ ਨਮਾਮਹਂ.

(ਰਕਾਰਵਿਪੁਲਾ ਪਥ੍ਯਾਵਤ੍ਤਗਾਥਾ).

੧੨. ਨਮਾਮਹਂ ਵਨ੍ਦਾਮਹਂ, ਪੂਜੇਮਹਂ ਸਿਰੋਰੁਹਂ;

ਪੁਞ੍ਞਮਿਦਂ ਭਵਤੁ ਮੇ, ਪਚ੍ਚਯੋ ਆਸਵਕ੍ਖਯੇ.

(ਤਕਾਰ ਨਕਾਰਵਿਪੁਲਾ ਪਥ੍ਯਾਵਤ੍ਤਗਾਥਾ).

ਤਿਗੁਮ੍ਬਚੇਤਿਯਥੋਮਨਾ ਨਿਟ੍ਠਿਤਾ.