ਦਾਠਾਵਂਸੋ |ਓ੦.੦੦੦੧|

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

੧. ਵਿਸਾਰਦਂ ਵਾਦਪਥਾਤਿ ਵਤ੍ਤਿਨਂ,

ਤਿਲੋਕਪਜ੍ਜੋਤਮਸਯ੍ਹਸਾਹਿਨਂ;

ਅਸੇਸ ਞੇਯ੍ਯਾਵਰਣਪ੍ਪਹਾਯਿਨਂ,

ਨਮਾਮਿ ਸਤ੍ਥਾਰਮਨਨ੍ਤਗੋਚਰਂ.

੨. |ਓ੦.੦੦੦੨|

ਤਿਲੋਕ ਨਾਥਪ੍ਪਭਵਂ ਭਯਾਪਹਂ,

ਵਿਸੁਦ੍ਧਵਿਜ੍ਜਾਚਰਣੇਹਿ ਸੇਵਿਤਂ;

ਪਪਞ੍ਚ ਸਂਯੋਜਨਬਨ੍ਧਨਚ੍ਛਿਦਂ,

ਨਮਾਮਿ ਧਮ੍ਮਂ ਨਿਪੁਣਂ ਸੁਦੁਦ੍ਦਸਂ.

੩. ਪਸਾਦਮਤ੍ਤੇਨ’ਪਿ ਯਤ੍ਥ ਪਾਣਿਨੋ,

ਫੂਸਨ੍ਤਿ ਦੁਕ੍ਖਕ੍ਖਯਮਚ੍ਚੁਤਂ ਪਦਂ;

ਤਮਾਹੁਣੇਯ੍ਯਂ ਸੁਸਮਾਹਿਤਿਨ੍ਦ੍ਰਿਯਂ,

ਨਮਾਮਿ ਸਙ੍ਘਂ ਮੁਨਿਰਾਜਸਾਵਕਂ.

੪. ਵਿਭੁਸਯਂ ਕਾਲ਼ਕਨਾਗਰਨ੍ਵ ਯਂ,

ਪਰਕ੍ਕਮੋ ਕਾਰੁਣਿਕੋ ਚਮੂਪਤਿ;

ਗਵੇਸਮਾਨੋ ਜਿਨਸਾਸਨਸ੍ਸ ਯੋ,

ਵਿਰੂਲ਼੍ਹਿਮਤ੍ਥਞ੍ਚ ਜਨਸ੍ਸ ਪਤ੍ਥਯਂ.

੫. |ਓ੦.੦੦੦੩|

ਸੁਧਾਮਯੂਖਾਮਲ ਪਣ੍ਡੁਵਂਸਜਂ,

ਵਿਰੂਲ਼੍ਹਸਦ੍ਧਂ ਮੁਨਿਰਾਜਸਾਸਨੇ;

ਪਿਯਂ ਵਦਂ ਨੀਤਿਪਥਾਨੁਵਤ੍ਤਿਨਿਂ,

ਸਦਾ ਪਜਾਨਂ ਜਨਿਕਂ’ਵ ਮਾਤਰਂ.

੬. ਪਿਯਂ ਪਰਕ੍ਕਨ੍ਤਿਭੁਜਸ੍ਸ ਰਾਜਿਨੋ,

ਮਹੇਸਿ ਮਚ੍ਚੁਨ੍ਨਤਖੁਦ੍ਧਿਸਮ੍ਪਦਂ;

ਵਿਧਾਯ ਲੀਲਾਵਤਿਮਿਚ੍ਛਿਤਤ੍ਥਦਂ,

ਅਸੇਸ ਲਙ੍ਕਾਤਲਰਜ੍ਜਲਕ੍ਖਿਯਂ.

੭. ਕੁਮਾਰਮਾਰਾਧਿਤਸਾਧੁਮਨ੍ਤਿਨਂ,

ਮਹਾਦਯਂ ਪਣ੍ਡੁਨਰਿਨ੍ਦ ਵਂਸਜਂ;

ਵਿਧਾਯ ਸਦ੍ਧਂ ਮਧੁਰਿਨ੍ਦਨਾਮਕਂ,

ਸੁਸਿਕ੍ਖੀਤਂ ਪਾਵਚਨੇ ਕਲਾਸੁ ਚ.

੮. |ਓ੦.੦੦੦੪|

ਨਰਿਨ੍ਦਸੁਞ੍ਞਂ ਸੁਚਿਰਂ ਤਿਸੀਹਲ਼ਂ,

ਇਤਿਪ੍ਪਤੀਤਂ ਅਯਸਂ ਅਪਾਨੁਦਿ;

ਚਿਰਂ ਪਣੀਤੇਨ ਚ ਚਿਵਰਾਦਿਨਾ,

ਸੁਸਞ੍ਞਤੇ ਸਂਯਮਿਨੋ ਅਤਪ੍ਪਯਿ.

੯. ਚਿਰਟ੍ਠਿਤਿਂ ਪਾਵਚਨਸ੍ਸ ਇਚ੍ਛਤਾ,

ਕਤਞ੍ਞੁਨਾ ਵਿਕ੍ਕਮ ਬੁਦ੍ਦਿਸਾਲਿਨਾ;

ਸਤੀਮਤਾ ਚਨ੍ਦਿਮ ਬਨ੍ਧੁਕਿਤ੍ਤਿਨਾ,

ਸਗਾਰਵਂ ਤੇਨ’ਭੀਯਾਚਿਤੋ ਅਹਂ.

੧੦. ਸਦੇਸ ਭਾਸਾਯ ਕਵੀਹਿ ਸੀਹਲ਼ੇ,

ਕਤਮ੍ਪਿ ਵਂਸਂ ਜਿਨਦਨ੍ਤਧਾਤੁਯਾ;

ਨਿਰੁਤ੍ਤਿਯਾ ਮਾਗਧਿਕਾਯ ਵੁਦ੍ਧਿਯਾ,

ਕਰੋਮਿ ਦੀਪਨ੍ਤਰਵਾਸਿਨਂ ਅਪਿ.

੧੧. |ਓ੦.੦੦੦੫|

ਜੀਨੋ’ਯਮਿਦ੍ਧੇ ਅਮਰਵ੍ਹਯੇ ਪੁਰੇ,

ਕਦਾਚਿ ਹੁਤ੍ਵਾਨ ਸੁਮੇਧਨਾਮਕੋ;

ਸਵੇਦਵੇਦਙ੍ਗਵਿਭਾਗਕੋਵਿਦੋ,

ਮਹਦ੍ਧਨੇ ਵਿਪ੍ਪਕੁਲਮ੍ਹਿ ਮਾਣਵੋ.

੧੨. ਅਹਞ੍ਹਿ ਜਾਤਿਬ੍ਯਸਨੇਨ ਪੀਲ਼ਿਤੋ,

ਜਰਾਭਿਭੁਤੋ ਮਰਣੇਨ ਓਤ੍ਥਟੋ;

ਸਿਵਂ ਪਦਂ ਜਾਤਿਜਰਾਦਿਨਿਸ੍ਸਟਂ,

ਗਵੇਸਯਿਸ੍ਸਂ’ਤਿ ਰਹੋ ਵਿਚਿਨ੍ਤਿਯ.

੧੩. ਅਨੇਕਸਙ੍ਖਂ ਧਨਧਞ੍ਞਸਮ੍ਪਦਂ,

ਪਤਿਟ੍ਠਪੇਤ੍ਵਾ ਕਪਣੇਸਿ ਦੁਚ੍ਚਜਂ;

ਅਨਪ੍ਪਕੇ ਪੇਮਭਰਾਨੁਬਨ੍ਧਿਨੋ,

ਵਿਹਾਯ ਮਿਤ੍ਤੇ ਚ ਸੁਤੇਚ ਬਨ੍ਧਵੇ.

੧੪. |ਓ੦.੦੦੦੬|

ਪਹਾਯ ਕਾਮੇ ਨਿਖਿਲੇ ਮਨੋਰਮੇ,

ਘਰਾਭਿਨਿਕ੍ਖਮ੍ਮ ਹਿਮਾਚਲਨ੍ਤਿਕੇ;

ਮਹੀਧਰਂ ਧਮ੍ਮਿਕਨਾਮ ਵਿਸ੍ਸੁਤਂ,

ਉਪੇਚ੍ਚ ਨਾਨਾਤਰੁਰਾਜਿਭੁਸਿਤਂ.

੧੫. ਮਨੋਨੁਕੂਲੇ ਸੁਰਰਾਜਨਿਮ੍ਮੀਤੇ,

ਅਸਮ੍ਮਿਗਾਨਂ ਅਗਤਿਮ੍ਹਿ ਅਸ੍ਸਮੇ;

ਨਿਵਤ੍ਤਚੀਰੋ ਅਜਿਨਕ੍ਖਿਪਂ ਵਹਂ,

ਜਟਾਧਰੋ ਤਾਪਸ ਵੇਸਮਗ੍ਗਹੀ.

੧੬. ਸੁਸਞ੍ਞਤਤ੍ਤੋਪਰਿਵਾਰਿ ਤਿਨ੍ਦ੍ਰਿਯੋ,

ਫਲਾਫਲਾਦੀਹਿ ਪਵਤ੍ਤਯਂ ਤਨੁਂ;

ਗਤੋ ਅਭਿਞ੍ਗ੍ਞਾਸੁ ਚ ਪਾਰਮਿਂ ਵਸੀ,

ਤਹਿਂ ਸਮਾਪਤ੍ਤਿ ਸੁਖਂ ਅਵਿਨ੍ਦਿ ਸੋ.

੧੭. |ਓ੦.੦੦੦੭|

ਸੁਸਜ੍ਜਿਤੇ ਰਮ੍ਮਪੁਰਾਧਿਵਾਸਿਨਾ,

ਮਹਾਜਨੇਨ’ਤ੍ਤਮਨੇਨ ਅਞ੍ਜਸੇ;

ਪਥਪ੍ਪਦੇਸੇ ਅਭਿਯਨ੍ਤਮਤ੍ਤਨੋ,

ਅਨਿਟ੍ਠਿਤੇਯੇਵ ਸੁਮੇਧ ਤਾਪਸੋ.

੧੮. ਅਗਾਧਞੇਯ੍ਯੋਦਧੀਪਾਰਦਸ੍ਸਿਨਂ,

ਭਵਨ੍ਤਗੁਂ ਨਿਬ੍ਬਨਥਂ ਵਿਨਾਯਕਂ;

ਅਨੇਕਖੀਣਾਸਵਲਕ੍ਖਸੇਵਿਤਂ,

ਕਦਾ ਚਿ ਦੀਪਙ੍ਕਰਬੁਦ੍ਧਮਦ੍ਦਸ.

੧੯. ਤਤੋ ਸਸਙ੍ਘਸ੍ਸ ਤਿਲੋਕਭਤ੍ਤੁਨੋ,

ਪਰਿਚ੍ਚਜਿਤ੍ਵਾਨ ਤਨੁਮ੍ਪਿ ਜੀਵਿਤਂ;

ਪਸਾਰਯਿਤ੍ਵਾਨ ਜਟਾਜਿਨਾਦਿਕਂ,

ਵਿਧਾਯ ਸੇਤੁਂ ਤਨੁਮੇਵ ਪਲ੍ਲਲੇ.

੨੦. |ਓ੦.੦੦੦੮|

ਅਨਕ੍ਕਮਿਤ੍ਵਾ ਕਲਲਂ ਮਹਾਦਯੇ,

ਸਭਿਕ੍ਖੁਕੋ ਗਚ੍ਚਤੁ ਪਿਟ੍ਠਿਯਾ ਇਤਿ;

ਅਧਿਟ੍ਠਹਿਤ੍ਵਾਨ ਨਿਪਨ੍ਨਕੋ ਤਹਿਂ,

ਅਨਾਥ ਮੇਤਂ ਤਿਭਵਂ ਸਮੇਕ੍ਖਿਯ.

੨੧. ਦਯਾਯ ਸਞ੍ਚੋਦਿਤਮਾਨਸੋ ਜਨੇ,

ਭਵਣ੍ਣਵਾ ਉਦ੍ਧਰਿਤੁਂ ਦੁਖਦ੍ਦਿਤੇ;

ਅਕਾਸਿ ਸਮ੍ਬੋਧਿਪਦਸ੍ਸ ਪਤ੍ਤਿਯਾ,

ਮਹਾਭਿਨੀਹਾਰਮੁਦਗ੍ਗਵਿਕ੍ਕਮੋ.

੨੨. |ਓ੦.੦੦੦੯|

ਅਥੋ ਵਿਦਿਤ੍ਵਾ ਵਸਿਨੋ ਤਮਾਸਯਂ,

ਅਦਾਸਿ ਸੋ ਵ੍ਯਾਕਰਣਂ ਮਹਾਮੁਨਿ;

ਤਤੋ ਪੁਰਂ ਤਮ੍ਹਿ ਤਥਾਗਤੇ ਗਤੇ,

ਸਯਂਵਸੀ ਸਮ੍ਮਸਿ ਪਾਰਮਿਗੁਣੇ.

੨੩. ਤਤੋ ਚ ਕਪ੍ਪਾਨਮਲੀਨਵਿਕ੍ਕਮੋ,

ਅਸਂਖਿਯੇ ਸੋ ਚਤੁਰੋ ਸਲਕ੍ਖਕੇ;

ਤਹਿਂ ਤਹਿਂ ਜਾਤਿਸੁ ਬੋਧਿਪਾਚਨੇ,

ਵਿਸੁਦ੍ਧਸਮ੍ਭਾਰਗੁਣੇ ਅਪੂਰਯਿ;

ਅਥਾਭਿਜਾਤੋ ਤੁਸਿਤੇ ਮਹਾਯਸੋ,

ਵਿਸੁਦ੍ਧਸਮ੍ਬੋਧਿਪਦੋਪਲਦ੍ਧਿਯਾ;

ਉਦਿਕ੍ਖਮਾਨੋ ਸਮਯਂ ਦਯਾਧਨੋ,

ਚਿਰਂ ਵਿਭੁਤਿਂ ਅਨੁਭੋਸਿ ਸਬ੍ਬਸੋ.

੨੫. |ਓ੦.੦੦੧੦|

ਸਹਸ੍ਸਸਙ੍ਖਾ ਦਸਚਕ੍ਕਵਾਲਤੋ,

ਸਮਾਗਤਾਨੇਕਸੁਰਾਧਿਪਾਦਿਹਿ;

ਉਦਗ੍ਗੁਦਗ੍ਗੇਹਿ ਜਿਨਤ੍ਤਪਤ੍ਤਿਯਾ,

ਸਗਾਰਵਂ ਸੋ ਅਭਿਗਮ੍ਮ ਯਾਚਿਤੋ.

੨੬. ਤਤੋ ਚਵਿਤ੍ਵਾ ਕਪਿਲ਼ਵ੍ਹਯੇ ਪੁਰੇ,

ਸਦਾ ਸਤੋ ਸਕ੍ਯਕੁਲੇਕਕੇਤੁਨੋ;

ਅਹੋਸਿ ਸੁਦ੍ਧੋਦਨਭੁਮਿਭਤ੍ਤੁਨੋ,

ਮਹਾਦਿਮਾਯਾਯ ਮਹੇਸਿਯਾ ਸੁਤੋ.

੨੭. |ਓ੦.੦੦੧੧|

ਵਿਜਾਤਮਤ੍ਤੋ’ਵ ਵਸੁਨ੍ਧਰਾਯ ਸੋ,

ਪਤਿਟ੍ਠਹਿਤ੍ਵਾਨ ਦਿਸਾ ਵਿਲੋਕਯੀ;

ਤਦਾ ਅਹੇਸੁਂ ਵਿਵਟਙ੍ਗਨਾ ਦਿਸਾ,

ਅਪੂਜਯੁਂ ਤਤ੍ਥ ਚ ਦੇਵਮਾਨੁਸਾ.

੨੮. ਆਧਾਰਯੁਂ ਆਤਪਵਾਰਣਾਦਿਕਂ,

ਅਦਿਸ੍ਸਮਾਨਾਵ ਨਭਮ੍ਭਿ ਦੇਵਤਾ;

ਪਦਾਨਿ ਸੋ ਸਤ੍ਤ ਚ ਉਤ੍ਤਰਾਮੁਖੋ,

ਉਪੇਚ੍ਚ ਨਿਚ੍ਛਾਰਯਿ ਵਾਚਮਾਸਭਿਂ.

੨੯. ਯਥਤ੍ਥਸਿਦ੍ਧਤ੍ਤਕੁਮਾਰਨਾਮਕੋ,

ਮਹਬ੍ਬਲੋ ਯੋਬ੍ਬਨਹਾਰਿਵਿਗ੍ਗਹੋ;

ਉਤੁਤ੍ਤਯਾਨੁਚ੍ਛਵਿਕੇਸੁ ਤੀਸੁ ਸੋ,

ਨੁਭੋਸਿ ਪਾਸਾਦਵਰੇਸੁ ਸਮ੍ਪਦਂ.

੩੦. |ਓ੦.੦੦੧੨|

ਕਦਾਚਿ ਉਯ੍ਯਾਨਪਥੇ ਜਰਾਹਤਂ,

ਤਥਾਤੁਰਂ ਕਾਲਕਤਞ੍ਚ ਸਂਯਮਿਂ;

ਕਮੇਨ ਦਿਸ੍ਵਾਨ ਵਿਰਤ੍ਤਮਾਨਸੋ,

ਭਵੇਸੁ ਸੋ ਪਬ੍ਬਜਿਤੁਂ ਅਕਾਮਯਿ.

੩੧. ਸਪੁਪ੍ਫਦੀਪਾਦੀਕਰੇਹਿ ਰਤ੍ਤਿਯਂ,

ਪੁਰਕ੍ਖਤੋ ਸੋ ਤਿਦਿਵਾਧਿਵਾਸਿਹਿ;

ਸਛਨ੍ਨਕੋ ਕਨ੍ਤਕਵਾਜਿਯਾਨਤੋ,

ਤਤੋ ਮਹਾਕਾਰੁਣਿਕੋ’ਭਿਨਿਕ੍ਖਮਿ.

੩੨. ਕਮੇਨ ਪਤ੍ਵਾਨ ਅਨੋਮਮਾਪਗਂ,

ਸੁਧੋਤਮੁਤ੍ਤਾਫਲਹਾਰਿਸੇਕਤੇ;

ਪਤਿਟ੍ਠਹਿਤ੍ਵਾ ਵਰਮੋਲ਼ਿਬਨ੍ਧਨਂ,

ਸਿਤਾਸਿਲੂਨਂ ਗਗਨੇ ਸਮੁਕ੍ਖਿਪੀ.

੩੩. |ਓ੦.੦੦੧੩|

ਪਟਿਗ੍ਗਹੇਤ੍ਵਾ ਤਿਦਸਾਨਮਿਸ੍ਸਰੋ,

ਸੁਵਣ੍ਨਚਙ੍ਗੋਟਵਰੇਨ ਤਂ ਤਦਾ;

ਤਿਯੋਜਨਂ ਨੀਲਮਣੀਹਿ ਚੇਤਿਯਂ,

ਅਕਾਸਿ ਚੂਲ਼ਾਮਣਿਮਤ੍ਤਨੋ ਪੁਰੇ.

੩੪. ਤਤੋ ਘਟੀਕਾਰਸਰੋਜਯੋਨਿਨਾ,

ਸਮਾਹਟਂ ਧਾਰਯੀ ਚੀਵਰਾਦਿਕਂ;

ਅਥੋ ਸਕਂ ਵਤ੍ਥਯੁਗਂ ਨਭਤ੍ਥਲੇ,

ਪਸਤ੍ਥਵੇਸਗ੍ਗਹਣੋ ਸਮੁਕ੍ਖਿਪੀ.