੫. ਪਕਿਣ੍ਣਕ-ਪਰਿਚ੍ਛੇਦੋ

ਨਾਮਂ ਆਰੋਪਨਂ ਪੋਤ੍ਥਕਂ ਗਨ੍ਥਕਾਰਸ੍ਸ ਚ. ਲੇਖਂਲੇਖਾਪਨਞ੍ਚੇਵ, ਵਦਾਮਿ ਤਦਨਨ੍ਤਰਨ੍ਤਿ. ਤਤ੍ਥ ਚਤੁਰਾਸੀਤਿਯਾ ਧਮ੍ਮਕ੍ਖਨ੍ਧਸਹਸ੍ਸਾਨਿ ਪਿਟਕ, ਨਿਕਾਯਙ੍ਗ, ਵਗ੍ਗ, ਨਿਪਾਤਾਦਿਕਂ ਨਾਮਂ, ਕੇਨਾਰੋਪਿਤਂ, ਕਤ੍ਥ ਆਰੋਪਿਤਂ, ਕਦਾ ਆਰੋਪਿਤਂ, ਕਿਮਤ੍ਥਂ ਆਰੋਪਿਤਨ੍ਤਿ? ਤਤ੍ਰਾਯਂ ਪਿਵਿਸਜ੍ਜਨਾਕੇਨ ਆਰੋਪਿਤਨ੍ਤਿ ਪਞ੍ਚਸਤਖੀਣਾਸਵੇਹਿ ਆਰੋਪਿਤਂ. ਤੇਹਿ ਸਬ੍ਬਬੁਦ੍ਧਵਚਨਂ ਸਙ੍ਗਾਯਨ੍ਤਿ, ਇਦਂ ਪਿਟਕਂ, ਅਯਂ ਨਿਕਾਯੋ, ਇਦਂ ਅਙ੍ਗਂ, ਅਯਂ ਵਗ੍ਗੋ, ਅਯਂ ਨਿਪਾਤੋਤਿ. ਏਵਮਾਦਿਕਂ ਨਾਮਂ ਆਰੋਪੇਨ੍ਤਿ. ਕਤ੍ਥ ਆਰੋਪਿਤਨ੍ਤਿ? ਰਾਜਗਹੇ ਵੇਭਾਰਪਬ੍ਬਤਸ੍ਸ ਪਾਦੇ ਧਮ੍ਮਮਣ੍ਡਪ੍ਪੇ ਆਰੋਪਿਤਂ. ਕਦਾ ਆਰੋਪਿਤਨ੍ਤਿ? ਭਗਵਤੋ ਪਰਿਨਿਬ੍ਬੁਤੇ ਪਠਮਸਙ੍ਗਾਯਨਕਾਲੇ ਆਰੋਪਿਤਂ. ਕਿਮਤ੍ਥਂ ਆਰੋਪਿਤਨ੍ਤਿ? ਧਮ੍ਮਕ੍ਖਨ੍ਧਾਨਂ ਵੋਹਾਰਸੁਖਤ੍ਥਾਯ ਸੁਖਧਾਰਣਤ੍ਥਾਯ ਚ ਆਰੋਪਿਤਂ. ਸਙ੍ਗੀਤਿਕਾਲੇ ਪਞ੍ਚਸਤਾ ਖੀਣਾਸਵਾ ਤੇਸਞ੍ਚ ਧਮ੍ਮਕ੍ਖਨ੍ਧਾਨਂ ਨਾਮ ਵਗ੍ਗਨਿਪਾਤਤੋ. ਇਮਸ੍ਸ ਧਮ੍ਮਕ੍ਖਨ੍ਧਸ੍ਸ ਅਯਂ ਨਾਮੋ ਹੋਤੁ, ਇਮਸ੍ਸ ਚ ਪਕਰਣਸ੍ਸ ਅਯਂ ਨਾਮੋਤਿ, ਅਬ੍ਰਵੁਂ ਸਬ੍ਬਂ ਨਾਮਾਦਿਕਂ ਕਿਚ੍ਚਂ ਅਕਂਸੁ. ਤੇ ਖੀਣਾਸਵਾ, ਯਦਿ ਨਾਮਾਦਿਕਂ ਕਿਚ੍ਚਂ ਅਕਤਂ ਨ ਸੁਪਾਕਤਂ ਤਸ੍ਮਾ ਵੋਹਾਰਸੁਖਤ੍ਥਾਯਨਾਮਾਦਿਕਂ ਕਿਚ੍ਚਂ ਕਤਂ ਅਨਾਗਤੇ ਪਨਤ੍ਥਾਯ ਨਾਮਾਦਿਕਂ ਪਵਤ੍ਤਿਤਂ ਅਸਞ੍ਜਾਤਨਾਮੋ ਨ ਸੁਟ੍ਠੁ ਪਾਕਤੋ ਸਬ੍ਬਸੋ ਭਵੇਤਿ. ਧਮ੍ਮਕ੍ਖਨ੍ਧਾਨਂ ਨਾਮ ਦੀਪਨਾ ਨਿਟ੍ਠਿਤਾ.

ਚਤੁਰਾਸੀਤਿ ਧਮ੍ਮਕ੍ਖਨ੍ਧਸਹਸ੍ਸਾਨਿ ਕੇਨ ਪੋਤ੍ਥਕੇ ਆਰੋਪਿਤਾਨਿ, ਕਦਾ ਆਰੋਪਿਤਾਨਿ, ਕਿਮਤ੍ਥਂ ਆਰੋਪਿਤਾਨੀਤਿ. ਤਤ੍ਰਾਯਂ ਵਿਸਜ੍ਜਨਾ ਕੇਨਾਰੋਪਿਤਾਨਿਤਿ? ਖੀਣਾਸਵਮਹਾਨਾਗੇਹਿ ਆਰੋਪਿਤਾਨਿ. ਕਤ੍ਥ ਆਰੋਪਿਤਾਨੀਤਿ? ਲਙ੍ਕਾਦੀਪੇ ਆਰੋਪਿਤਾਨਿ. ਕਦਾ ਆਰੋਪਿਤਾਨੀਤਿ? ਸਦ੍ਧਾਤਿਸ੍ਸਸ੍ਸਰਾਜਿਨੋ ਪੁਤ੍ਤਸ੍ਸ ਵਟ੍ਟਗਾਮਨਿ ਰਾਜਸ੍ਸ ਕਾਲੇ ਆਰੋਪਿਤਾਨਿ. ਕਿਮਤ੍ਥਂ ਆਰੋਪਿਤਾਨੀਤਿ? ਧਮ੍ਮਕ੍ਖਨ੍ਧਾਨਂ ਅਵਿਧਂਸਨਤ੍ਥਾਯ ਸਦ੍ਧਮ੍ਮਟ੍ਠਿਤਿਯਾ ਚ ਆਰੋਪਿਤਾਨਿ.

ਧਰਮਾਨੋ ਹਿ ਭਗਵਾ, ਅਮ੍ਹਾਕਂ ਸੁਗਤੋਧੀਰੋ;

ਨਿਕਾਯੇ ਪਞ੍ਚਦੇਸੇਤਿ, ਯਾਵ ਨਿਬ੍ਬਾਨਗਮਨਾ.

ਸਬ੍ਬੇਪਿ ਤੇ ਭਿਕ੍ਖੁ ਆਦਿ, ਮਨਸਾ ਵਚਸਾਹਾਰੋ;

ਸਬ੍ਬੇ ਚ ਵਾਚੁਗ੍ਗਤਾ ਹੋਨ੍ਤਿ, ਮਹਾਪਞ੍ਞਾਸਤਿਵਰਾ.

ਨਿਬ੍ਬੂਤੇ ਲੋਕਨਾਥਮ੍ਹਿ, ਤਤੋ ਵਸ੍ਸਸਤਂ ਭਵੇ;

ਅਰਿਯਾਨਰਿਯਾ ਚਾਪਿ ਚ, ਸਬ੍ਬੇ ਵਾਚੁਗ੍ਗਤਾ ਧੁਵਂ.

ਤਤੋ ਪਰਂ ਅਟ੍ਠਰਸਂ, ਦ੍ਵਿਸਤਂਵਸ੍ਸ ਗਣਨਂ;

ਸਬ੍ਬੇ ਪੁਥੁਜ੍ਜਨਾ ਚੇਵ, ਅਰਿਯਾ ਚ ਸਬ੍ਬੇਪਿਤੇ.

ਮਨਸਾਵਚਸਾਯੇਵ, ਵਾਚੁਗ੍ਗਤਾਵ ਸਬ੍ਬਦਾ;

ਦੁਟ੍ਠਗਾਮਣਿਰਞ੍ਞੋ ਚ, ਕਾਲੇ ਵਾਚੁਗ੍ਗਤਾ ਧੁਵਂ.

ਅਰਿਯਾਨਰਿਯਾਪਿ ਚ, ਨਿਕਾਯੇ ਧਾਰਣਾਸਦਾ;

ਤਤੋ ਪਰਮ੍ਹਿ ਰਾਜਾ ਚ, ਤਤੋ ਚੁਤੋ ਚ ਤੁਸਿਤੇ.

ਉਪ੍ਪਜ੍ਜਿ ਦੇਵ ਲੋਕੇ ਸੋ, ਦੇਵੇਹਿ ਪਰਿਵਾਰਿਤੋ;

ਸਦ੍ਧਾ ਤਿਸ੍ਸੋਤਿ ਨਾਮੇਨ, ਤਸ੍ਸ ਕਨਿਟ੍ਠਕੋ ਹਿਤੋ.

ਤਤੋ ਲਦ੍ਧਰਟ੍ਠੋ ਹੋਤਿ, ਬੁਦ੍ਧਸਾਸਨਪਾਲਕੋ.

ਤਦਾ ਕਾਲੇ ਭਿਕ੍ਖੂ ਆਸੁਂ, ਸਬ੍ਬੇ ਵਾਚੁਗ੍ਗਤਾ ਸਦਾ;

ਨਿਕਾਯੇ ਪਞ੍ਚਵੇਧੇਵ, ਯਾਵ ਰਞ੍ਞੋ ਚ ਧਾਰਣਾ;

ਤਤੋ ਚੁਤੋ ਸੋ ਰਾਜਾ ਚ, ਤੁਸ੍ਸੀਤੇ ਉਪਪਜ੍ਜਤਿ;

ਦੇਵਲੋਕੇਟ੍ਠਿਤੋ ਸਨ੍ਤੋ, ਤਦਾ ਵਾਚੁਗ੍ਗਤਾ ਤਤੋ.

ਤਸ੍ਸ ਪੁਤ੍ਤਾਪਿ ਅਹੇਸੁਂ, ਅਨੇਕਾ ਵਰਜ੍ਜਂ ਗਤਾ;

ਅਨੁਕ੍ਕਮੇਨ ਚੁਤਤੇ, ਦੇਵਲੋਕਂ ਗਤਾ ਧੁਵਂ;

ਤਦਾਪਿਤੇ ਸਬ੍ਬੇ ਭਿਕ੍ਖੂ, ਵਾਚੁਗ੍ਗਤਾਵ ਸਬ੍ਬਦਾ;

ਨਿਕਾਯੇ ਪਞ੍ਚਵਿਧੇਵ, ਧਾਰਣਾਵਸਤਿਮਤਾ.

ਤਤੋ ਪਰਂ ਪੋਤ੍ਥਕੇਸੁ, ਨਿਕਾਯਾ ਪਞ੍ਚ ਪਿਟ੍ਠਿਤਾ;

ਤਦਾ ਅਟ੍ਠਕਥਾ ਟੀਕਾ, ਸਬ੍ਬੇ ਗਨ੍ਥਾ ਪੋਤ੍ਥਕੇ ਗਤਾ;

ਸਬ੍ਬੇ ਪੋਤ੍ਥੇਸੁ ਯੇ ਗਨ੍ਥਾ, ਪਾਲ਼ਿ ਅਟ੍ਠਕਥਾ ਟੀਕਾ;

ਸਂਟ੍ਠਿਤਾਸਂ ਠਿਤਾ ਹੋਨ੍ਤਿ, ਸਬ੍ਬੇਪਿ ਨੋ ਨ ਸਨ੍ਤਿਤੇ.

ਤਦਾ ਤੇ ਪੋਤ੍ਥਕੇਯੇਵ, ਨਿਕਾਯਾ ਪਿਠਿਤਾ ਖਿਲਾ;

ਤਦਾ ਅਟ੍ਠਕਥਾਦੀਨਿ, ਭਵਨ੍ਤੀਤਿ ਵਦਨ੍ਤਿ ਚ.

ਪਰਿਹਾਰੋ ਪਣ੍ਡਿਤੇਹਿ ਵਤ੍ਤਬ੍ਬੋਵ;

ਲਙ੍ਕਾਦੀਪਸ੍ਸ ਰਞ੍ਞੋਵ, ਸਦ੍ਧਾ ਤਿਸ੍ਸਸ੍ਸ ਰਾਜਿਨੋ.

ਪੁਤ੍ਤਕੋ ਲਙ੍ਕਾਦੀਪਸ੍ਸ, ਇਸ੍ਸਰੋ ਧਮ੍ਮਿਕੋ ਵਰੋ;

ਤਦਾ ਖੀਣਾਸਵਾ ਸਬ੍ਬੇ, ਓਲੋਕੇਨ੍ਤਿ ਅਨਗਤੇ.

ਖੀਣਾਸਵਾ ਪਸ੍ਸਨ੍ਤਿ ਤੇ, ਦੁਪਞ੍ਞੇਵ ਪੁਥੁਜ੍ਜਨੇ;

ਸਬ੍ਬੇਪਿ ਤੇ ਭਿਕ੍ਖੂ ਆਸੁਂ, ਬਹੁਂਤਰਾ ਪੁਥੁਜ੍ਜਨਾ;

ਨ ਸਕ੍ਖਿਸ੍ਸਨ੍ਤਿ ਤੇ ਪਞ੍ਚ, ਨਿਕਾਯੇ ਵਾਚੁਗ੍ਗਤਂ ਇਤਿ;

ਪੋਤ੍ਥਕੇਸੁ ਸਬ੍ਬੇ ਪਞ੍ਚ, ਆਰੋਪੇਨ੍ਤਿ ਖੀਣਾਸਵਾ.

ਸਦ੍ਧਮ੍ਮਟ੍ਠਿਤਿ ਚਿਰਤ੍ਤਾਯ, ਜਨਾਨਂ ਪੁਞ੍ਞਤ੍ਥਾਯ ਚ;

ਤਤੋ ਪਟ੍ਠਾਯਤੇ ਸਬ੍ਬੇ, ਨਿਕਾਯਾ ਹੋਨ੍ਤਿ ਪੋਤ੍ਥਕੇ;

ਅਟ੍ਠਕਥਾ ਟੀਕਾ ਸਬ੍ਬੇ, ਤੇ ਹੋਨ੍ਤਿ ਪੋਤ੍ਥਕੇਟ੍ਠਿਤਾ.

ਤਤੋ ਪਟ੍ਠਾਯਤੇ ਸਬ੍ਬੇ, ਭਿਕ੍ਖੁ ਆਦਿ ਮਹਾਗਣਾ;

ਪੋਤ੍ਥਕੇਸੁ ਠਿਤੇਯੇਵ, ਸਬ੍ਬੇ ਪਸ੍ਸਨ੍ਤਿ ਸਬ੍ਬਦਾ.

[ਪੋਤ੍ਥਕੇ ਆਰੋਪਨ ਦੀਪਕਾ ਨਿਟ੍ਠਿਤਾ.]

ਯੋ ਕੋਚਿ ਪਣ੍ਡਿਤੋ ਧੀਰੋ, ਅਟ੍ਠਕਥਾਦਿਕਂ ਗਨ੍ਥਂ ਕਰੋਤਿ ਵਾ ਕਾਰਾਪੇਤਿ ਵਾ, ਤਸ੍ਸ ਅਨਨ੍ਤਕੋ ਹੋਤਿ ਪੁਞ੍ਞਸਂਚਯੋ, ਅਨਨ੍ਤਕੋ ਹੋਤਿ ਪੁਞ੍ਞਾਨਿਸਂਸੋ. ਚਤੁਰਾਸੀਤਿ ਚੇਤਿਯਸਹਸ੍ਸ ਕਰਣਸਦਿਸੋ, ਚਤੁਰਾਸੀਤਿ ਬੁਦ੍ਧਰੂਪਸਹਸ੍ਸ ਕਰਣਸਦਿਸੋ, ਚਤੁਰਾਸੀਤਿ ਬੋਧਿਰੁਕ੍ਖਸਹਸ੍ਸਰੋਪਨਸਦਿਸੋ, ਚਤੁਰਾਸੀਤਿ ਵਿਹਾਰਸਹਸ੍ਸ ਕਰਣਸਦਿਸੋ, ਯੋ ਚ ਬੁਦ੍ਧਵਚਨਮਞ੍ਜੂਸਂ ਕਰੋਤਿ ਵਾ ਕਾਰਾਪੇਤਿ ਵਾ, ਯੋ ਚ ਬੁਦ੍ਧਵਚਨਂ ਮਣ੍ਡਨਂ ਕਰੋਤਿ ਵਾ ਕਾਰਾਪੇਤਿ ਵਾ, ਯੋ ਚ ਬੁਦ੍ਧਵਚਨਂ ਲੇਖਂ ਕਰੋਤਿ ਵਾ ਕਾਰਾਪੇਤਿ ਵਾ, ਯੋ ਚ ਪੋਤ੍ਥਕਂ ਵਾ, ਯੋ ਚ ਪੋਤ੍ਥਕਮੂਲਂ ਵਾ, ਦੇਤਿ ਵਾ ਦਾਪੇਤਿ ਵਾ, ਯੋ ਚ ਤੇਲਂ ਵਾ ਚੁਣ੍ਣਂ ਵਾ, ਧਞ੍ਞਂ ਵਾ ਪੋਤ੍ਥਕਭਞ੍ਜਨਤ੍ਥਾਯ ਯਂ ਕਿਞ੍ਚਿ ਨਿਤ੍ਥਂ ਵਾ ਪੋਤ੍ਥਕਛਿਦ੍ਦੇ ਆਵੁਨਤ੍ਥਾਯ, ਯਂ ਕਿਞ੍ਚਿ ਸੁਤ੍ਤਂ ਵਾ ਕਟ੍ਠਫਲਕਦ੍ਵਯਂ ਵਾ ਪੋਤ੍ਥਕਂ ਪੁਟਨਤ੍ਥਾਯ ਯਂ ਕਿਞ੍ਚਿ ਵਤ੍ਥਂ ਵਾ, ਪੋਤ੍ਥਕ-ਬਨ੍ਧਨਤ੍ਥਾਯ, ਯਂ ਕਿਞ੍ਚਿ ਯੋਤ੍ਤਂ ਵਾ ਪੋਤ੍ਥਕਲਾਪ ਪੂਟਨਤ੍ਥਾਯ ਯਂ ਕਿਞ੍ਚਿ ਥਵਿਕਂ ਦੇਤਿ ਵਾ ਦਾਪੇਤਿ ਵਾ.

ਯੋ ਚ ਹਰਿਤਾਲੇਨ ਵਾ ਮਨੋਸਿਲਾਯ ਵਾ, ਸੁਵਣ੍ਣੇਨ ਵਾ ਰਜਤੇਨ ਵਾ ਪੋਤ੍ਥਕਮਣ੍ਡਨਂ ਵਾ ਕਟ੍ਠਫਲਕਮਣ੍ਡਨਂ ਵਾ ਕਰੋਤਿ ਵਾ ਕਾਰਾਪੇਤਿ ਵਾ, ਤਸ੍ਸ ਅਨਨ੍ਤਕੋ ਹੋਤਿ ਪੁਞ੍ਞਸਂਚਯੋ, ਅਨਨ੍ਤਕੋ ਹੋਤਿ ਪੁਞ੍ਞਾਨਿਸਂਸੋ. ਚਤੁਰਾਸੀਤਿ ਚੇਤਿਯਸਹਸ੍ਸ ਕਰਣਸਦਿਸੋ, ਚਤੁਰਾਸੀਤਿ ਵਿਹਾਰਸਹਸ੍ਸ ਕਰਣਸਦਿਸੋ.

ਭਵੇ ਨਿਬ੍ਬਤ੍ਤਮਾਨੋ ਸੋ, ਸੀਲਗੁਣਮੁਪਾਗਤਾ;

ਮਹਾ ਤੇਜੋ ਸਦਾ ਹੋਤਿ, ਸੀਹਨਾਦੋ ਵਿਸਾਰਦੋ.

ਆਯੁਵਣ੍ਣਬਲੁਪ੍ਪੇਤੋ, ਧਮ੍ਮਕਾਮੋ ਭਵੇ ਸਦ੍ਦਾ;

ਦੇਵਮਨੁਸ੍ਸਲੋਕੇਸੁ, ਮਹੇਸਕ੍ਖੋ ਅਨਾਮਯੋ.

ਭਵੇ ਨਿਬ੍ਬਤ੍ਤਮਾਨੋ ਸੋ, ਪਞ੍ਞਵਾ ਸੁਸਮਾਹਿਤੋ;

ਅਧਿਪਚ੍ਚ ਪਰਿਵਾਰੋ, ਸਬ੍ਬਸੁਖਾਧਿ ਗਚ੍ਛਤਿ.

ਸਦ੍ਦੋਹੀਰਿਮਾ ਵਦਞ੍ਞੂ, ਸਂਵਿਗ੍ਗ ਮਾਨਸੋ ਭਵੇ;

ਅਙ੍ਗਪਚ੍ਚਙ੍ਗ ਸਮ੍ਪਨ੍ਨੋ, ਆਰੋਹ ਪਰਿਣਾਹਵਾ.

ਸਬ੍ਬੇ ਸਤ੍ਤਾਪਿ ਯੋ ਲੋਕੇ, ਸਬ੍ਬਤ੍ਥ ਪੂਜਿਤਾਭਵੇ;

ਦੇਵਮਨੁਸ੍ਸ ਸਞ੍ਚਰੋ, ਮਿਤ੍ਤਸਹਾਯ ਪਾਲਿਤੋ.

ਦੇਵਮਨੁਸ੍ਸ ਸਮ੍ਪਤ੍ਤਿਂ, ਅਨੁਭੋਤਿ ਪੁਨਪ੍ਪੁਨਂ;

ਅਰਹਤ੍ਤ ਫਲਂ ਪਤ੍ਤੋ, ਨਿਬ੍ਬਾਨਂ ਪਾਪੁਣਿਸ੍ਸਤਿ.

ਪਟਿਸਮ੍ਭਿਦਾ ਚਤਸ੍ਸੋ, ਅਭਿਞ੍ਞਾ ਛਬ੍ਬਿਧੇ ਵਰੇ;

ਵਿਮੋਕ੍ਖੇ ਅਟ੍ਠਕੇ ਸੇਟ੍ਠੇ, ਗਮਿਸ੍ਸਤਿ ਅਨਾਗਤੇ.

ਤਸ੍ਮਾਹਿ ਪਣ੍ਡਿਤੋ ਪੋਸੋ, ਸਂਪਸ੍ਸਂ ਹਿਤ ਮਤ੍ਤਨੋ;

ਕਾਰੇਯ੍ਯ ਸਾਮ ਗਨ੍ਥੇ ਚ, ਅਞ੍ਞੇ ਚਾਪਿ ਕਾਰਾਪਯੇ.

ਪੋਤ੍ਥਕੇ ਚ ਠਿਤੇ ਗਨ੍ਥੇ, ਪਾਲ਼ਿ ਅਟ੍ਠਕਥਾਦਿਕੇ;

ਧਮ੍ਮਮਞ੍ਜੂਸਾ ਗਨ੍ਥੇ ਚ, ਲੇਖਂ ਕਰੇ ਕਾਰਾਪਯੇ.

ਪੋਤ੍ਥਕਂ ਪੋਤ੍ਥਕਮੂਲਞ੍ਚ, ਤੇਸਂ ਚੁਲ੍ਲਥੂਸਮ੍ਪਿ ਚ;

ਪਿਲੋਤਿਕਾਦਿਕਂ ਸੁਤ੍ਤਂ, ਕਟ੍ਠਫਲਦ੍ਵਯਮ੍ਹਿ ਚ.

ਧਮ੍ਮਬਨ੍ਧਨਤ੍ਥਾਯ ਚ, ਯਂ ਕਿਞ੍ਚਿ ਮਹਗ੍ਘਂ ਵਤ੍ਥਂ;

ਧਮ੍ਮਬਨ੍ਧਨਯੋਤ੍ਤਞ੍ਚ, ਯਂ ਕਿਞ੍ਚਿ ਥਵਿਕਮ੍ਪਿ ਚ.

ਦਦੇਯ੍ਯ ਧਮ੍ਮਖੇਤ੍ਤਮ੍ਹਿ, ਵਿਪ੍ਪਸ੍ਸਨ੍ਨੇਨ ਚੇਤਸਾ;

ਅਞ੍ਞੋ ਚਾਪਿ ਦਜ੍ਜਾਪੇਯ੍ਯ, ਮਿਤ੍ਤਸਹਾਯਬਨ੍ਧਵੇਤਿ.

ਗਨ੍ਥਾਕਰਲੇਖਲੇਖਾਪਨਾਨਿਸਂਸ ਦੀਪਨਾ ਨਿਟ੍ਠਿਤਾ.

[ਇਤਿ ਚੂਲਗਨ੍ਥਵਂਸੇ ਪਕਿਣ੍ਣਕਦੀਪਕੋ ਨਾਮ ਪਞ੍ਚਮੋ ਪਰਿਚ੍ਛੇਦੋ.]

ਸੋਹਂ ਹਂਸਾਰਟ੍ਠ ਜਾਤੋ, ਨਨ੍ਤਪਞ੍ਞੋਤਿ ਵਿਸ੍ਸੁਤੋ

ਸਦ੍ਧਾ ਸੀਲ ਵੀਰਪ੍ਪੇਤੋ, ਧਮ੍ਮਰਸਂ ਗਵੇਸਨੋ.

ਸੋਹਂ ਤਤੋ ਗਨ੍ਤ੍ਵਾ ਚਿਮਂ, ਜਿਨ ਨਵਂ ਯਂ ਪੂਰਂ;

ਸਬ੍ਬ ਧਮ੍ਮਂ ਵਿਚਿਨਨ੍ਤੋ, ਵੀਸਤਿ ਵਸ੍ਸਮਾਗਤੋ.

ਸਬ੍ਬ ਧਮ੍ਮਂ ਵਿਸ੍ਸੇਜ੍ਜੇਨ੍ਤੋ, ਕਿਕਾਰੇ ਨੇਵ ਭਿਕ੍ਖੁਨੋ;

ਛ ਵਸ੍ਸਾਨਂ ਗਣਂ ਭਿਤ੍ਵਾ, ਕਾਮਾਨਂ ਅਭਿਮਦ੍ਦਨਂ.

ਸਨ੍ਤਿ ਸਭਾ ਚ ਨਿਬ੍ਬਾਨਂ, ਗਵੇਸਿਞ੍ਚ ਪੁਨਪ੍ਪੁਨਂ;

ਵਸਨ੍ਤੋਹਂ, ਵਨਾਰਮ੍ਮਂ, ਪਿਟਕਤ੍ਤਯ ਸਙ੍ਗਹਂ;

ਗਨ੍ਥਵਂਸਂ ਇਮਂ ਖੁਦ੍ਦਂ, ਅਰਿਯਸਙ੍ਘਦਾਸਕਨ੍ਤਿ.

ਇਤਿ ਪਾਮੋਜ੍ਜਤ੍ਥਾਯ ਅਰਞ੍ਞਵਾਸਿਨਾ, ਨਨ੍ਦਪਞ੍ਞਾਚਰਿਯੇਨ ਕਤੋ ਚੂਲ਼ਗਨ੍ਥਵਂਸੋ ਨਿਟ੍ਠਿਤੋ.

ਧਮ੍ਮਵਟਂਸਕਨਾਮੇਨ ਵਿਸੁਤੋ ਥੇਰੋ, ਯਂ ਪਕਰਣਂ ਲਿਕ੍ਖਿਤਂ ਤਂ ਪਰਿਪੁਣ੍ਣਂ ਤੇਨ ਪੁਞ੍ਞੇਨ ਤਂ ਪਿਟਕਂ ਪਰਿਸਿਪ੍ਪਂ ਪਰਿਨਿਟ੍ਠਿਤਂ.

ਮਮੇਵ ਸਿਸ੍ਸਸਮੂਹਾਨਞ੍ਚ ਪਰਿਸਿਪ੍ਪਂ ਪਰਿਨਿਟ੍ਠਿਤਂ. ਤਵੇ ਸਿਸ੍ਸਾਨੂ ਸਿਸ੍ਸਾਨਿ ਚ, ਪਰਿਸਿਪ੍ਪਂ ਪਰਿਨਿਟ੍ਠਿਤਂ.

ਚੂਲ਼ਗਨ੍ਥਵਂਸੋ ਨਿਟ੍ਠਿਤੋ.