੧. ਪਿਟਕਤ੍ਤਯਪਰਿਚ੍ਛੇਦੋ

ਨਮਸ੍ਸੇਤ੍ਵਾਨ ਸਮ੍ਬੁਦ੍ਧਂ, ਅਗ੍ਗਵਂਸਵਰਂਵਰਂ;

ਨਤ੍ਵਾਨ ਧਮ੍ਮਂ ਬੁਦ੍ਧਜਂ, ਸਙ੍ਘਞ੍ਚਾਪਿਨਿਰਙ੍ਗਣਂ.

ਗਨ੍ਥਵਂਸਮ੍ਪਿ ਨਿਸ੍ਸਾਯ, ਗਨ੍ਥਵਂਸਂ ਪਕਥਿਸ੍ਸਂ;

ਤਿਪੇਟਕਸਮਾਹਾਰਂ, ਸਾਧੁਨਂ ਜਙ੍ਘਦਾਸਕਂ.

ਵਿਮਤਿਨੋਦਨਮਾਰਮ੍ਭਂ, ਤਂ ਮੇ ਸੁਣਾਥ ਸਾਧਵੋ;

ਸਬ੍ਬਮ੍ਪਿ ਬੁਦ੍ਧਵਚਨਂ, ਵਿਮੁਤ੍ਤਿ ਚ ਸਹੇਤੁਕਂ.

ਹੋਤਿ ਏਕਵਿਧਂਯੇਵ, ਤਿਵਿਧਂ ਪਿਟਕੇਨ ਚ;

ਤਞ੍ਚ ਸਬ੍ਬਮ੍ਪਿ ਕੇਵਲਂ, ਪਞ੍ਚਵਿਧਂ ਨਿਕਾਯਤੋ.

ਅਙ੍ਗਤੋ ਚ ਨਵਵਿਧਂ, ਧਮ੍ਮਕ੍ਖਨ੍ਧਗਣਨਤੋ;

ਚਤੁਰਾਸੀਤਿ ਸਹਸ੍ਸ, ਧਮ੍ਮਕ੍ਖਨ੍ਧਪਭੇਦਨਨ੍ਤਿ.

ਕਥਂ ਪਿਟਕਤੋ ਪਿਟਕਞ੍ਹਿ ਤਿਵਿਧਂ ਹੋਤਿ?

ਵਿਨਯਪਿਟਕਂ, ਅਭਿਧਮ੍ਮਪਿਟਕਂ ਸੁਤ੍ਤਨ੍ਤਪਿਟਕਨ੍ਤਿ. ਤਤ੍ਥ ਕਤਮਂ ਵਿਨਯ ਪਿਟਕਂ? ਪਾਰਾਜਿਕਕਣ੍ਡਂ, ਪਾਚਿਤ੍ਤਿਯਕਣ੍ਡਂ, ਮਹਾਵਗ੍ਗਕਣ੍ਡਂ, ਚੁਲ੍ਲਵਗ੍ਗਕਣ੍ਡਂ, ਪਰਿਵਾਰਕਣ੍ਡਨ੍ਤਿ. ਇਮਾਨਿ ਕਣ੍ਡਾਨਿ ਵਿਨਯਪਿਟਕਂ ਨਾਮ.

ਕਤਮਂ ਅਭਿਧਮ੍ਮਪਿਟਕਂ? ਧਮ੍ਮਸਙ੍ਗਣੀ-ਪਕਰਣਂ, ਵਿਭਙ੍ਗ-ਪਕਰਣਂ, ਧਾਤੁਕਥਾ-ਪਕਰਣਂ, ਪੁਗ੍ਗਲਪਞ੍ਞਤ੍ਤਿ-ਪਕਰਣਂ, ਕਥਾਵਤ੍ਥੁ-ਪਕਰਣਂ, ਯਮਕ-ਪਕਰਣਂ, ਪਟ੍ਠਾਨ-ਪਕਰਣਨ੍ਤਿ. ਇਮਾਨਿ ਸਤ੍ਤ ਪਕਰਣਾਨਿ ਅਭਿਧਮ੍ਮਪਿਟਕਂ ਨਾਮ. ਕਤਮਂ ਸੁਤ੍ਤਨ੍ਤਪਿਟਕਂ? ਸੀਲਕ੍ਖਨ੍ਧਵਗ੍ਗਾਦਿਕਂ, ਅਵਸੇਸਂ ਬੁਦ੍ਧਵਚਨਂ ਸੁਤ੍ਤਨ੍ਤਪਿਟਕਂ ਨਾਮ.

ਕਥਂ ਨਿਕਾਯਤੋ? ਨਿਕਾਯਾ ਪਞ੍ਚ ਵਿਧਾ ਹੋਨ੍ਤਿ. ਦੀਘਨਿਕਾਯੋ, ਮਜ੍ਝਿਮਨਿਕਾਯੋ, ਸਂਯੁਤ੍ਤਨਿਕਾਯੋ, ਅਙ੍ਗੁਤ੍ਤਰਨਿਕਾਯੋ, ਖੁਦ੍ਦਕਨਿਕਾਯੋਤਿ.

ਤਤ੍ਥ ਕਤਮੋ ਦੀਘ-ਨਿਕਾਯੋ? ਸੀਲਕ੍ਖਨ੍ਧਵਗ੍ਗੋ, ਮਹਾਵਗ੍ਗੋ, ਪਾਥਿਕਵਗ੍ਗੋਤਿ, ਇਮੇ ਤਯੋ ਵਗ੍ਗਾ ਦੀਘਨਿਕਾਯੋ ਨਾਮ. ਇਮੇਸੁ ਤੀਸੁ ਵਗ੍ਗੇਸੁ, ਚਤੁਤਿਂਸ ਵਗ੍ਗਾਨਿ ਚ ਹੋਨ੍ਤਿ. [ਚਤੁਤਿਂਸੇਵ ਸੁਤ੍ਤਨ੍ਤਾ, ਸੀਲਕ੍ਖਨ੍ਧਵਗ੍ਗਾਦਿਕਾ, ਯਸ੍ਸ ਭਵਨ੍ਤਿ ਸੋ ਯੇਵ ਦੀਘਨਿਕਾਯ ਨਾਮ ਹੋਤਿ.]

ਕਤਮੋ ਮਜ੍ਝਿਮਨਿਕਾਯੋ? ਮੂਲਪਣ੍ਣਾਸੋ, ਮਜ੍ਝਿਮਪਣ੍ਣਾਸੋ, ਉਪਰਿਪਣ੍ਣਾਸੋਤਿ, ਇਮੇ ਤਯੋ ਪਣ੍ਣਾਸਾ ਮਜ੍ਝਿਮਨਿਕਾਯੋ ਨਾਮ. ਇਮੇਸੁ ਤੀਸੁ ਪਣ੍ਣਾਸੇਸੁ ਦ੍ਵੇਪਞ੍ਞਾਸਾਧਿਕ-ਸੁਤ੍ਤ-ਸਤਾਨਿ ਹੋਨ੍ਤਿ [ਦਿਯਡ੍ਢਸਤਸੁਤ੍ਤਨ੍ਤਾ, ਦ੍ਵਿ ਸੁਤ੍ਤਂ ਯਸ੍ਸ ਸਨ੍ਤਿਸੋ, ਮਜ੍ਝਿਮਨਿਕਾਯੋ ਨਾਮੋ ਮੂਲਪਣ੍ਣਾਸਮਾਦਿ ਹੋਤਿ.]

ਕਤਮੋ ਸਂਯੁਤ੍ਤਨਿਕਾਯੋ? ਸਗਾਥਾਵਗ੍ਗੋ, ਨਿਦਾਨਵਗ੍ਗੋ, ਖਨ੍ਧਕਵਗ੍ਗੋ, ਸਲ਼ਾਯਤਨਵਗ੍ਗੋ, ਮਹਾਵਗ੍ਗੋਤਿ, ਇਮੇ ਪਞ੍ਚ ਵਗ੍ਗਾ ਸਂਯੁਤ੍ਤਨਿਕਾਯੋ ਨਾਮ. ਇਮੇਸੁ ਪਞ੍ਚਸੁ ਵਗ੍ਗੇਸੁ ਦ੍ਵਾਸਟ੍ਠਿਸੁਤ੍ਤਸਤ੍ਤਸਤਾਧਿਕਸਤ੍ਤ-ਸੁਤ੍ਤਸਹਸ੍ਸਾਨਿ ਹੋਨ੍ਤਿ. [ਦ੍ਵਾਸਟ੍ਠਿ-ਸਤ੍ਤ-ਸਤਾਨਿ, ਸਤ੍ਤਸਹਸ੍ਸਕਾਨਿ ਚ.] ਸੁਤ੍ਤਾਨਿ ਯਸ੍ਸ ਹੋਨ੍ਤਿ ਸੋ, ਸਗਾਥਾਦਿਕਵਗ੍ਗਕੋ, ਸਂਯੁਤ੍ਤਨਿਕਾਯੋ ਨਾਮੋ ਵੇਦਿਤਬ੍ਬੋ ਚ ਵਿਞ੍ਞੂਨਾਤਿ.

ਕਤਮੋ ਅਙ੍ਗੁਤ੍ਤਰਨਿਕਾਯੋ? ਏਕ੍ਕਨਿਪਾਤੋ, ਦੁਕ੍ਕਨਿਪਾਤੋ, ਤਿਕ੍ਕਨਿਪਾਤੋ, ਚਤੁਕ੍ਕਨਿਪਾਤੋ, ਪਞ੍ਚਕਨਿਪਾਤੋ, ਛਕ੍ਕਨਿਪਾਤੋ, ਸਤ੍ਤਕਨਿਪਾਤੋ, ਅਟ੍ਠਕਨਿਪਾਤੋ, ਨਵਕਨਿਪਾਤੋ, ਦਸਕਨਿਪਾਤੋ, ਏਕਾਦਸਨਿਪਾਤੋਤਿ, ਇਮੇ ਏਕਾਦਸ ਨਿਪਾਤਾ ਅਙ੍ਗੁਤ੍ਤਰਨਿਕਾਯੋ ਨਾਮ. ਇਮੇਸੁ ਏਕਾਦਸ ਨਿਪਾਤੇਸੁ ਸਤ੍ਤ-ਪਞ੍ਞਾਸ-ਪਞ੍ਚ-ਸਤਾਧਿਕਨਵ-ਸੁਤ੍ਤ-ਸਹਸ੍ਸਾਨਿ ਹੋਨ੍ਤਿ. [ਨਵਸੁਤ੍ਤਸਹਸ੍ਸਾਨਿ, ਪਞ੍ਚਸਤਮਤ੍ਤਾਨਿ ਚ, ਸਤ੍ਤਪਞ੍ਞਾਸਾਧਿਕਾਨਿ, ਸੁਤ੍ਤਾਨਿ ਯਸ੍ਸ ਹੋਨ੍ਤਿ ਸੋ, ਅਙ੍ਗੁਤ੍ਤਰਨਿਕਾਯੋਤਿ, ਏਕ੍ਕਨਿਪਾਤਕਾਦਿਕੋਤਿ.]

ਕਤਮੋ ਖੁਦ੍ਦਕਨਿਕਾਯੋ? ਖੁਦ੍ਦਕਪਾਠੋ, ਧਮ੍ਮਪਦਂ, ਉਦਾਨਂ, ਇਤਿਵੁਤ੍ਤਕਂ, ਸੁਤ੍ਤਨਿਪਾਤੋ, ਵਿਮਾਨਵਤ੍ਥੁ, ਪੇਤਵਤ੍ਥੁ, ਥੇਰਕਥਾ, ਥੇਰੀਕਥਾ, ਜਾਤਕਂ, ਮਹਾਨਿਦ੍ਦੇਸੋ, ਪਟਿਸਮ੍ਭਿਦਾਮਗ੍ਗੋ, ਅਪਦਾਨਂ, ਬੁਦ੍ਧਵਂਸੋ, ਚਰਿਯਾਪਿਟਕਂ, ਵਿਨਯਪਿਟਕਂ, ਅਭਿਧਮ੍ਮਪਿਟਕਨ੍ਤਿ. ਇਮੇਸੁ ਸਤ੍ਤਰਸਸੁ ਗਨ੍ਥੇਸੁ ਅਨੇਕਾਨਿ ਸੁਤ੍ਤ-ਸਹਸ੍ਸਾਨਿ ਹੋਨ੍ਤਿ. [ਅਨੇਕਾਨਿ ਸੁਤ੍ਤ-ਸਹਸ੍ਸਾਨਿ, ਨਿਦ੍ਦਿਟ੍ਠਾਨਿ ਮਹੇਸਿਨਾ, ਨਿਕਾਯੇ ਪਞ੍ਚਮੇ ਇਮੇ, ਖੁਦ੍ਦਕੇ ਇਤਿ ਵਿਸੁਤੇਤਿ.]

ਕਥਂ ਅਙ੍ਗਤੋ ਅਙ੍ਗਹਿ ਨਵ ਵਿਧਂ ਹੋਤਿ? ਸੁਤ੍ਤਂ, ਗੇਯ੍ਯਂ, ਵੇਯ੍ਯਾਕਰਣਂ, ਗਾਥਾ, ਉਦਾਨਂ, ਇਤਿਵੁਤ੍ਤਕਂ, ਜਾਤਕਂ, ਅਬ੍ਭੁਤਧਮ੍ਮਂ, ਵੇਦਲ੍ਲਨ੍ਤਿ, ਨਵਪ੍ਪਭੇਦਂ ਹੋਤਿ. ਤਤ੍ਥ ਉਭਤੋ ਵਿਭਙ੍ਗਨਿਦ੍ਦੇਸਖਨ੍ਧਕਪਰਿਵਾਰਾ, ਸੁਤ੍ਤਨਿਪਾਤੇ, ਮਙ੍ਗਲਸੁਤ੍ਤ, ਰਤਨਸੁਤ੍ਤ, ਤੁਵਟ੍ਟਕਸੁਤ੍ਤਾਨਿ. ਅਞ੍ਞਮ੍ਪਿ ਸੁਤ੍ਤਨਾਮਕਂ ਤਥਾਗਤਵਚਨਂ, ਸੁਤ੍ਤਨ੍ਤਿ ਵੇਦਿਤਬ੍ਬਂ. ਸਬ੍ਬਂ ਸਗਾਥਕਂ ਗੇਯ੍ਯਨ੍ਤਿ ਵੇਦਿਤਬ੍ਬਂ. ਵਿਸੇਸਨਸਂਯੁਤ੍ਤਕੇ ਸਕਲੋਪਿ ਸਗਾਥਕਵਗ੍ਗੋ, ਸਕਲਂ ਅਭਿਧਮ੍ਮਪਿਟਕਂ ਨਿਗਾਥਕਞ੍ਚ ਸੁਤ੍ਤਯਞ੍ਚ ਅਞ੍ਞਮ੍ਪਿ ਅਟ੍ਠਹਿ ਅਙ੍ਗੇਹਿ ਅਸਙ੍ਗਹਿਤਂ ਬੁਦ੍ਧਵਚਨਂ ਤਂ ਵੇਯ੍ਯਾਕਰਣਨ੍ਤਿ ਵੇਦਿਤਬ੍ਬਂ. ਧਮ੍ਮਪਦਂ, ਥੇਰਕਥਾ, ਥੇਰੀਕਥਾ, ਸੁਤ੍ਤਨਿਪਾਤੇ, ਨੋ ਸੁਤ੍ਤਨਾਮਿਕਾ ਸੁਦ੍ਧਿਕਗਾਥਾ, ਗਾਥਾਤਿ ਵੇਦਿਤਬ੍ਬਾ. ਸੋਮਨਸ੍ਸ ਞਾਣਮਯਿਕਗਾਥਾ ਪਟਿਕ-ਸਂਯੁਤ੍ਤਾ ਦ੍ਵੇ ਅਸੀਤਿਸੁਤ੍ਤਨ੍ਤਾ ਉਦਾਨਨ੍ਤਿ ਵੇਦਿਤਬ੍ਬਾ. ਵੁਤ੍ਤਞ੍ਹੇਤਂ ਭਗਵਤਾਤਿਆਦਿਨਯਪ੍ਪਵਤ੍ਤਾ ਦਸੁਤ੍ਤਰਸਤਸੁਤ੍ਤਨ੍ਤਾ, ਇਤਿਵੁਤ੍ਤਕਨ੍ਤਿ ਵੇਦਿਤਬ੍ਬਾ. ਅਪਣ੍ਣਕਜਾਤਕਾਦੀਨਿ ਪਞ੍ਞਾਸਾਦਿਕਾਨਿ. ਪਞ੍ਚਜਾਤਕਸਤਾਨਿ, ਜਾਤਕਨ੍ਤਿ ਵੇਦਿਤਬ੍ਬਂ. ਚਤ੍ਤਾਰੋ ਮੇ ਭਿਕ੍ਖਵੇ ਅਚ੍ਛਰਿਯਾ ਅਭੂਤਧਮ੍ਮਾ, ਆਨਨ੍ਦੇਤਿਆਦਿਨਯਪ੍ਪਵਤ੍ਤਾ ਸਬ੍ਬੇਪਿ ਅਚ੍ਛਰਿਯ ਅਭੂਤਧਮ੍ਮਪਟਿਸਂਯੁਤ੍ਤਾ ਸੁਤ੍ਤਨ੍ਤਾ ਅਭੂਤਧਮ੍ਮਨ੍ਤਿ ਵੇਦਿਤਬ੍ਬਾ. ਚੁਲ੍ਲਵੇਦਲ੍ਲ, ਮਹਾਵੇਦਲ੍ਲ, ਸਮ੍ਮਾਦਿਟ੍ਠਿ, ਸਕ੍ਕਪਞ੍ਹ, ਸਙ੍ਖਾਰਭਾਜਨਿਯ, ਮਹਾਪੁਣ੍ਣਮਸੁਤ੍ਤਨ੍ਤਾਦਯੋ ਸਬ੍ਬੇਪਿ ਵੇਦਞ੍ਚ ਤੁਟ੍ਠਿਞ੍ਚ ਲਦ੍ਧਾ [ਪੁਚ੍ਛ] ਲਦ੍ਧਾ ਪੁਚ੍ਛਿਤਸੁਤ੍ਤਨ੍ਤਾ, ਵੇਦਲ੍ਲਨ੍ਤਿ ਵੇਦਿਤਬ੍ਬਾ. ਕਤਮਾਨਿ ਚਤੁਰਾਸੀਤਿ ਧਮ੍ਮਕ੍ਖਨ੍ਧਸਹਸ੍ਸਾਨਿ ਦੁਜਾਨਾਨਿ, ਚਤੁਰਾਸੀਤਿ ਧਮ੍ਮਕ੍ਖਨ੍ਧਸਹਸ੍ਸਾਨਿ ਸਚੇ ਵਿਤ੍ਥਾਰੇਨ ਕਥਿਸ੍ਸਂ ਅਤਿਪਪਞ੍ਚੋ ਭਵਿਸ੍ਸਤਿ. ਤਸ੍ਮਾ ਨਯ ਵਸੇਨ ਕਥਿਸ੍ਸਾਮਿ. ਏਕਂ ਵਤ੍ਥੁ, ਏਕੋ ਧਮ੍ਮਕ੍ਖਨ੍ਧੋ, ਏਕਂ ਨਿਦਾਨਂ ਏਕੋ ਧਮ੍ਮਕ੍ਖਨ੍ਧੋ, ਏਕਂ ਪਞ੍ਹਾ ਪੁਚ੍ਛਨ੍ਤਂ ਏਕੋ ਧਮ੍ਮਕ੍ਖਨ੍ਧੋ, ਏਕਂ ਪਞ੍ਹਾ ਵਿਸਜ੍ਜਨਂ ਏਕੋ ਧਮ੍ਮਕ੍ਖਨ੍ਧੋ, ਚਤੁਰਾਸੀਤਿ ਧਮ੍ਮਕ੍ਖਨ੍ਧਸਹਸ੍ਸਾਨਿ ਕੇਨ ਭਾਸਿਤਾਨਿ, ਕਤ੍ਥ ਭਾਸਿਤਾਨਿ, ਕਦਾ ਭਾਸਿਤਾਨਿ, ਕਮਾਰਬ੍ਭ ਭਾਸਿਤਾਨਿ, ਕਿਮਤ੍ਥਂ ਭਾਸਿਤਾਨਿ, ਕੇਨ ਧਾਰਿਤਾਨਿ, ਕੇਨਾਭਤਾਨਿ, ਕਿਮਤ੍ਥਂ ਪਰਿਯਾਪੁਣਿਤਬ੍ਬਾਨਿ. ਤਤ੍ਰਾਯਂ ਵਿਸਜ੍ਜਨਾ, ਕੇਨ ਭਾਸਿਤਾਨੀਤਿ? ਬੁਦ੍ਧਾਨੁ ਬੁਦ੍ਧੇਹਿ ਭਾਸਿਤਾਨਿ. ਕਤ੍ਥ ਭਾਸਿਤਾਨੀਤਿ? ਦੇਵੇਸੁ ਚ ਮਾਨੁਸ੍ਸੇਸੁ ਚ, ਭਾਸਿਤਾਨਿ. ਕਦਾ ਭਾਸਿਤਾਨੀਤਿ? ਭਗਵਤੋ ਧਰਮਾਨਕਾਲੇ ਚੇਵ ਪਚ੍ਛਿਮਕਾਲੇ ਚ ਭਾਸਿਤਾਨਿ. ਕਤਮਾਰਬ੍ਭ ਭਾਸਿਤਾਨੀਤਿ? ਪਞ੍ਚਵਗ੍ਗਿਯਾਦਿਕੇ ਵੇਨੇਯ੍ਯ ਬਨ੍ਧਵੇ ਆਰਬ੍ਭ ਭਾਸਿਤਾਨੀਤਿ. ਕਿਮਤ੍ਥਂ ਭਾਸਿਤਾਨੀਤਿ? ਤਿਵਜ੍ਜਞ੍ਚ ਅਵਜ੍ਜਞ੍ਚ ਞਤ੍ਵਾ ਵਜ੍ਜਂ ਪਹਾਯ ਅਵਜ੍ਜੇ ਪਟਿਪਤ੍ਤਿਤ੍ਵਾ ਨਿਬ੍ਬਾਨਪਰਿਯਨ੍ਤੇ. ਦਿਟ੍ਠ-ਧਮ੍ਮਿਕਸਮ੍ਪਰਾਯਿਕਤ੍ਥੇ ਸਮ੍ਪਾਪੁਣਿਤੁਂ.

ਕੇਨ ਧਾਰਿਤਾਨੀਤਿ? ਅਨੁਬੁਦ੍ਧੇਹਿ ਚੇਵ ਸਿਸ੍ਸਾਨੁਸਿਸ੍ਸੇਹਿ ਚ ਧਾਰਿਤਾਨਿ. ਕੇਨਾ ਭਤਾਨੀਤਿ? ਆਚਰਿਯ ਪਰਂਪਰੇਹਿ ਆਭਤਾਨਿ. ਕਿਮਤ੍ਥਂ ਪਰਿਯਾਪੁਣਿਤਬ੍ਬਾਨੀਤਿ? ਵਜ੍ਜਞ੍ਚ ਅਵਜ੍ਜਞ੍ਚ ਞਤ੍ਵਾ ਵਜ੍ਜਂ ਪਹਾਯ ਅਵਜ੍ਜੇ ਪਟਿਪਤ੍ਤਿਤ੍ਵਾ ਨਿਬ੍ਬਾਨਪਰਿਯਨ੍ਤੇ ਦਿਟ੍ਠਧਮ੍ਮਿਕਸਮ੍ਪਰਾਯਿਕਤ੍ਥੇ, ਸਂਪਾਪੁਣਿਤੁਂ, ਯਦੇਵਂ ਤਾਯ ਨਿਬ੍ਬਾਨਪਰਿਯਨ੍ਤੇ ਦਿਟ੍ਠਧਮ੍ਮਿਕਸਮ੍ਪਰਾਯਿਕਤ੍ਥੇ ਸਾਧਿਕਾਨਿ ਹੋਨ੍ਤਿ. ਤੇਵ ਤਤ੍ਥ ਕੇਹਿ ਅਪ੍ਪਮਤ੍ਤੇਨ ਪਰਿਯਾਪੁਣਿਤਬ੍ਬਾਨਿ ਧਾਰੇਤਬ੍ਬਾਨਿ ਧਾਰੇਤਬ੍ਬਾਨਿ ਵਾਚੇਤਬ੍ਬਾਨਿ ਸਜ੍ਝਾਯਂ ਕਾਤਬ੍ਬਾਨੀਤਿ [ਇਤਿ ਚੁਲ੍ਲਗਨ੍ਥਵਂਸੇ ਪਿਟਕਤ੍ਤਯ ਦੀਪਕੋ ਨਾਮ ਪਠਮੋ ਪਰਿਚ੍ਛੇਦੋ.]