੪. ਤਦ੍ਧਿਤਕਣ੍ਡ

ਅਪਚ੍ਚਤਦ੍ਧਿਤ

੨੩੨. ਵਾਣਪਚ੍ਚੇ.

ਛਟ੍ਠਨ੍ਤਾ ਸਦ੍ਦਾ ‘‘ਤਸ੍ਸਾਪਚ੍ਚ’’ਮਿਚ੍ਚਸ੍ਮਿਂ ਅਤ੍ਥੇ ਣੋ ਵਾ ਹੋਤਿ. ਵਾਤਿ ਵਾਕ੍ਯਤ੍ਥਂ. ਣੇਨੇਵਾਪਚ੍ਚਤ੍ਥਸ੍ਸ ਵੁਤ੍ਤਤ੍ਤਾ ਅਪਚ੍ਚਸਦ੍ਦਾਪ੍ਪਯੋਗੋ.

‘‘ਤੇਸਂ ਵਿਭਤ੍ਯਾ’’ ਦੋ ਤੇਸਂਗਹਣੇਨ ਵਿਭਤ੍ਤਿਲੋਪੋ. ਤਥੋਤ੍ਤਰਤ੍ਰ.

‘‘ਤੇਸਂ ਣੋ ਲੋਪਂ’’ਤਿ ਪਚ੍ਚਯਾਨਂ ਣਸ੍ਸ ਲੋਪੋ.

‘‘ਵੁਦ੍ਧਾਦਿਸਰਸ੍ਸ ਵਾ ਸਂਯੋਗਨ੍ਤਸ੍ਸ ਸਣੇ ਚੇ’’ਤਿ ਸਣਕਾਰੇ ਪਰੇ ਅਸਂਯੋਗਨ੍ਤਸ੍ਸਾਦਿਸਰਸ੍ਸ ਵੁਦ੍ਧਿ.

ਤਸ੍ਸਾਪਨਿਯਮੇ –

ਅਯੁਵਣ੍ਣਾਨਞ੍ਚਾਯੋ ਵੁਦ੍ਧਿ.

ਅਕਾਰਿਵਣ੍ਣੁਵਣ੍ਣਾਨਂ ਆਏਓਵੁਦ੍ਧਿਯੋ ਹੋਨ੍ਤਿ, ਚਸਦ੍ਦੇਨ ਕ੍ਵਚਿ ਨ.

ਸਰਲੋਪਾਦਿ, ਤਦ੍ਧਿਤਤ੍ਤਾ ਨਾਮਮਿਵ ਕਤੇ ਸ੍ਯਾਦਿ.

ਤਦ੍ਧਿਤਾਭਿਧੇਯ੍ਯਲਿਙ੍ਗ–ਵਿਭਤ੍ਤਿਵਚਨਾ ਸਿਯੁਂ.

ਸਮੂਹਭਾਵਜਾ ਭੀਯੋ, ਸਕਤ੍ਥੇ ਣ੍ਯੋ ਨਪੁਂਸਕੇ.

ਤਾ ਤੁਤ੍ਥਿਯਂ ਨਿਪਾਤਾ ਤੇ, ਧਾਮਿਥਂਪਚ੍ਚਯਨ੍ਤਕਾ.

ਵਸਿਟ੍ਠਸ੍ਸਾਪਚ੍ਚਂ ਪੋਸੋ ਵਾਸਿਟ੍ਠੋ, ਇਤ੍ਥੀ ਵਾਸਿਟ੍ਠੀ, ਨਪੁਂਸਕਂ ਵਾਸਿਟ੍ਠਂ. ਵਿਕਪ੍ਪਵਿਧਾਨਤੋ ਤਦ੍ਧਿਤੇਨ ਸਮਾਸਸ੍ਸਾਚ੍ਚਨ੍ਤਂ ਬਾਧਾਯਾ ਭਾਵਾ ਵਸਿਟ੍ਠਾ ਪਚ੍ਚਨ੍ਤਿਪਿ ਹੋਤਿ.

ਨਪੁਂਸਕੇਨ ਵਾਪੀਤਿ, ਸਦ੍ਦਸਤ੍ਥਵਿਦੂ ਵਿਦੁਂ.

੨੩੩. ਵਾ ਅਪਚ੍ਚੇਤਿ ਚਾਧਿਕਾਰੋ.

ਣਾਯਨ ਣਾਨ ਵਚ੍ਛਾਦਿਤੋ.

ਵਚ੍ਛਾਦਿਤੋ ਗੋਤ੍ਤਗਣਤੋ ਣਾਯਨੋ ਣਾਨੋ ਚ ਵਾ ਹੋਤਿ.

ਅਪਚ੍ਚਂ ਪਪੁਤ੍ਤਪ੍ਪਭੁਤਿ ਗੋਤ੍ਤਂ. ਕਚ੍ਚਸ੍ਸਾਪਚ੍ਚਂ ਕਚ੍ਚਾਯਨੋ, ਕਚ੍ਚਾਨੋ ਵਾ. ਸਂਯੋਗਨ੍ਤਤ੍ਤਾ ਨ ਵੁਦ੍ਧਿ.

੨੩੪. ‘‘ਣੇਯ੍ਯੋ ਕਤ੍ਤਿਕਾਦੀਹੀ’’ਤਿ ਣੇਯ੍ਯੋ, ਵਿਨਤਾਯ ਅਪਚ੍ਚਂ ਵੇਨਤੇਯ੍ਯੋ ਵਿਨਤੇਯ੍ਯੋ ਵਾ. ਨ ਪਕ੍ਖੇ ਵੁਦ੍ਧਿ, ਣੇਯ੍ਯੋਤਿ ਯੋਗਵਿਭਾਗੇਨ ‘‘ਤਸ੍ਸ ਦੀਯਤੇ’’ ਤ੍ਯਤ੍ਥੇਪਿ ਣੇਯ੍ਯੋ, ਦਕ੍ਖਿਣਾ ਦੀਯਤੇ ਯਸ੍ਸ ਸੋ ਦਕ੍ਖਿਣੇਯ੍ਯੋ.

੨੩੫. ਅਤੋ ਣਿ ਵਾ.

ਅਕਾਰਨ੍ਤਤੋ ਅਪਚ੍ਚੇ ਣਿ ਵਾ ਹੋਤਿ, ਪੁਨ ਵਾਸਦ੍ਦੇਨ ਣਿਕੋ, ਅਕਾਰਨ੍ਤਾ ਅਨਕਾਰਨ੍ਤਾ ਚ ਬੋਪਿ.

ਦਕ੍ਖਿ, ਸਕ੍ਯਪੁਤ੍ਤਿਕੋ, ਮਣ੍ਡਬ੍ਬੋ, ਭਾਤੁਬ੍ਬੋ. ਦ੍ਵਿਤ੍ਤਂ.

੨੩੬. ‘‘ਣਵੋ ਪਗ੍ਵਾਦੀਹੀ’’ ਤਿ ਣਵੋ. ਮਨੁਨੋ ਅਪਚ੍ਚਂ ਮਾਣਵੋ.

੨੩੭. ‘‘ਣੇਰ ਵਿਧਵਾਦਿਤੋ’’ਤਿ ਣੇਰੋ, ਸਾਮਣੇਰੋ.

ਸਂਸਟ੍ਠਾਦਿਅਨੇਕਤ੍ਥਤਦ੍ਧਿਤ

੨੩੮. ‘‘ਯੇਨ ਵਾ ਸਂਸਟ੍ਠਂ ਤਰਤਿ ਚਰਤਿ ਵਹਤਿ ਣਿਕੋ’’ਤਿ ਣਿਕੋ. ਵਾਕਾਰੇਨ ਨੇਕਤ੍ਥੇਨੇਕਪਚ੍ਚਯਾ ਚ. ਘਤੇਨ ਸਂਸਟ੍ਠੋ ਘਾਤਿਕੋ, ਓਦਨੋ. ਉਲ਼ੂਪੇਨ ਤਰਤੀਤਿ ਓਲ਼ੂਪਿਕੋ, ਉਲ਼ੂਪਿਕੋ ਵਾ, ਨ ਪਕ੍ਖੇ ਵੁਦ੍ਧਿ.

ਸਕਟੇਨ ਚਰਤੀਤਿ ਸਾਕਟਿਕੋ. ਸੀਸੇਨ ਵਹਤੀਤਿ ਸੀਸਿਕੋ, ਨ ਵੁਦ੍ਧਿ.

ਇਤ੍ਥਿਲਿਙ੍ਗਤੋ ਏਯ੍ਯਕੋ, ਣਕੋ ਚ. ਚਮ੍ਪਾਯਂ ਜਾਤੋ ਚਮ੍ਪੇਯ੍ਯਕੋ. ਏਵਂ ਬਾਰਾਣਸੇਯ੍ਯਕੋ. ਣਕੋ – ਕੁਸਿਨਾਰਾਯਂ ਵਸਤੀਤਿ ਕੋਸਿਨਾਰਕੋ. ਜਨਪਦਤੋ ਣਕੋ ਚ – ਮਗਧੇਸੁ ਵਸਤਿ, ਤੇਸਂ ਇਸ੍ਸਰੋ ਵਾ ਮਾਗਧਕੋ.

ਤਜ੍ਜਾਤਿਯਾ ਵਿਸਿਟ੍ਠਤ੍ਥੇ ਆਜਾਨੀਯੋ. ਅਸ੍ਸਜਾਤਿਯਾ ਵਿਸਿਟ੍ਠੋ ਅਸ੍ਸਾਜਾਨੀਯੋ. ਞੋ - ਅਗ੍ਗਨ੍ਤਿ ਜਾਨਿਤਬ੍ਬਂ ਅਗ੍ਗਞ੍ਞਂ, ਦ੍ਵਿਤ੍ਤਂ.

੨੩੯. ਤਮਧੀਤੇ ਤੇਨ ਕਤਾਦਿਸਨ੍ਨਿਧਾਨਨਿਯੋਗਸਿਪ੍ਪਭਣ੍ਡ ਜੀਵਿਕਤ੍ਥੇਸੁ ਚ.

ਤਂ ਅਧੀਤੇ ਇਚ੍ਚਾਦੀਸ੍ਵਤ੍ਥੇਸੁ ਆਦਿਸਦ੍ਦੇਨ ਹਤਾਦੀਸੁ ਚ ਣਿਕੋ ਵਾ ਹੋਤਿ. ਅਭਿਧਮ੍ਮਮਧੀਤੇਤਿ ਆਭਿਧਮ੍ਮਿਕੋ, ਅਭਿਧਮ੍ਮਿਕੋ ਵਾ, ਨ ਪਕ੍ਖੇ ਵੁਦ੍ਧਿ. ਵਚਸਾ ਕਤਂ ਕਮ੍ਮਂ ਵਾਚਸਿਕਂ. ਏਵਂ ਮਾਨਸਿਕਂ, ਏਤ੍ਥ –

‘‘ਸ ਸਰੇ ਵਾਗਮੋ’’ਤੀਹਾਨੁਵਤ੍ਤਿਤਾਦਿਸਦ੍ਦੇਨ ਸਾਗਮੋ.

ਸਰੀਰੇ ਸਨ੍ਨਿਧਾਨਾ ਵੇਦਨਾ ਸਾਰੀਰਿਕਾ. ਦ੍ਵਾਰੇ ਨਿਯੁਤ੍ਤੋ ਦੋਵਾਰਿਕੋ, ਏਤ੍ਥ- ‘‘ਮਾਯੂਨਮਾਗਮੋ ਠਾਨੇ’’ਤਿ ਵਕਾਰਤੋ ਪੁਬ੍ਬੇ ਓਕਾਰਾਗਮੋ.

ਸਿਪ੍ਪਨ੍ਤਿ ਗੀਤਾਦਿਕਲਾ, ਵੀਣਾ ਅਸ੍ਸ ਸਿਪ੍ਪਨ੍ਤਿ ਵੇਣਿਕੋ, ਅਤ੍ਰ ਵੀਣੇਤਿ ਵੀਣਾਵਾਦਨਂ. ਗਨ੍ਧੋ ਅਸ੍ਸ ਭਣ੍ਡਨ੍ਤਿ ਗਨ੍ਧਿਕੋ, ਮਗੇ ਹਨ੍ਤ੍ਵਾ ਜੀਵਤੀਤਿ ਮਾਗਵਿਕੋ, ਵਕਾਰਾਗਮੋ. ਜਾਲੇਨ ਹਤੋ ਜਾਲਿਕੋ, ਸੁਤ੍ਤੇਨ ਬਦ੍ਧੋ ਸੁਤ੍ਤਿਕੋ, ਚਾਪੋ ਅਸ੍ਸ ਆਯੁਧਨ੍ਤਿ ਚਾਪਿਕੋ, ਵਾਤੋ ਅਸ੍ਸ ਆਬਾਧੋ ਅਤ੍ਥੀਤਿ ਵਾ ਵਾਤਿਕੋ, ਬੁਦ੍ਧੇ ਪਸਨ੍ਨੋ ਬੁਦ੍ਧਿਕੋ, ਵਤ੍ਥੇਨ ਕੀਤਂ ਭਣ੍ਡਂ ਵਤ੍ਥਿਕਂ.

ਕੁਮ੍ਭੋ ਅਸ੍ਸ ਪਰਿਮਾਣਂ, ਤ ਮਰਹਤਿ, ਤੇਸਂ ਰਾਸਿ ਵਾ ਕੁਮ੍ਭਿਕੋ. ਅਕ੍ਖੇਨ ਦਿਬ੍ਬਤੀਤਿ ਅਕ੍ਖਿਕੋ, ਮਗਧੇਸੁ ਵਸਤਿ, ਜਾਤੋਤਿ ਵਾ ਮਾਗਧਿਕੋ ਇਚ੍ਚਾਦਿ.

੨੪੦. ਣ ਰਾਗਾ ਤੇਨ ਰਤ੍ਤਂ ਤਸ੍ਸੇਦਮਞ੍ਞਤ੍ਥੇਸੁ ਚ.

ਤੇਨ ਰਤ੍ਤਂ ਤ੍ਯਾਦ੍ਯਤ੍ਥੇਸੁ ਣੋ ਵਾ ਹੋਤਿ. ਕਸਾਵੇਨ ਰਤ੍ਤਂ ਕਾਸਾਵਂ.

ਏਵਂ ਨੀਲਂ ਪੀਤਮਿਚ੍ਚਾਦਿ. ਨ ਵੁਦ੍ਧਿ, ਮਹਿਸਸ੍ਸ ਇਦਂ ਮਾਹਿਸਂ, ਸਿਙ੍ਗਂ.

ਏਵਂ ਰਾਜਪੋਰਿਸਂ, ਏਤ੍ਥ ‘‘ਅਯੁਵਣ੍ਣਾਨਞ੍ਚਾ’’ ਦੋ ਪੁਨ ਵੁਦ੍ਧਿਗ੍ਗਹਣੇਨ ਉਤ੍ਤਰਪਦਸ੍ਸ ਵੁਦ੍ਧਿ. ਮਗਧੇਹਿ ਆਗਤੋ, ਤਤ੍ਰ ਜਾਤੋ, ਤੇਸਂ ਇਸ੍ਸਰੋ, ਤੇ ਅਸ੍ਸ ਨਿਵਾਸੋਤਿ ਵਾ ਮਾਗਧੋ, ਕਤ੍ਤਿਕਾਦੀਹਿ ਯੁਤ੍ਤੋ ਕਤ੍ਤਿਕੋ, ਮਾਸੋ.

ਬੁਦ੍ਧੋ ਅਸ੍ਸ ਦੇਵਤਾਤਿ ਬੁਦ੍ਧੋ. ਬ੍ਯਾਕਰਣਂ ਅਵੇਚ੍ਚ ਅਧੀਤੇਤਿ ਵੇਯ੍ਯਾਕਰਣੋ. ਏਤ੍ਥ ‘‘ਮਾਯੂਨਮਾ’’ਦਿਨਾ ਯਕਾਰਤੋ ਪੁਬ੍ਬੇ ਏ ਆਗਮੋ, ਯਸ੍ਸ ਦ੍ਵਿਤ੍ਤਂ. ਸਗਰੇਹਿ ਨਿਬ੍ਬਤ੍ਤੋ ਸਾਗਰੋਇਚ੍ਚਾਦਿ.

੨੪੧. ਜਾਤਾਦੀਨਮਿਮਿਯਾ ਚ.

ਜਾਤਾਦੀਸੁ ਇਮੋ ਇਯੋ ਚ ਹੋਤਿ, ਚਸਦ੍ਦੇਨ ਕਿਯੋ ਚ. ਪਚ੍ਛਾ ਜਾਤੋ ਪਚ੍ਛਿਮੋ, ਮਨੁਸ੍ਸਜਾਤਿਯਾ ਜਾਤੋ ਮਨੁਸ੍ਸਜਾਤਿਯੋ. ਅਨ੍ਤੇ ਨਿਯੁਤ੍ਤੋ ਅਨ੍ਤਿਮੋ, ਅਨ੍ਤਿਯੋ.

ਏਵਂ ਅਨ੍ਧਕਿਯੋ. ਪੁਤ੍ਤੋ ਅਸ੍ਸ ਅਤ੍ਥੀਤਿ ਪੁਤ੍ਤਿਮੋ, ਪੁਤ੍ਤਿਯੋ. ਏਵਂ ਕਪ੍ਪਿਯੋ.

੨੪੨. ‘‘ਤਦਸ੍ਸਟ੍ਠਾਨਮੀਯੋ ਚੇ’’ਤਿ ਈਯੋ, ਚਕਾਰੇਨ ਹਿਤਾਦ੍ਯਤ੍ਥੇਪਿ, ਬਨ੍ਧਨਸ੍ਸ ਠਾਨਂ ਬਨ੍ਧਨੀਯਂ, ਚਙ੍ਕਮਨਸ੍ਸ ਹਿਤਂ ਚਙ੍ਕਮਨੀਯਂ.

੨੪੩. ‘‘ਆਲੁ ਤਬ੍ਬਹੁਲੇ’’ਤਿ ਆਲੁ. ਅਭਿਜ੍ਝਾਬਹੁਲੋ ਅਭਿਜ੍ਝਾਲੁ.

ਵਿਸੇਸਤਦ੍ਧਿਤ

੨੪੪. ਵਿਸੇਸੇ ਤਰਤਮਿਸ੍ਸਿਕਿਯਿਟ੍ਠਾ.

ਅਤਿਸਯਤ੍ਥੇ ਤਰਾਦਯੋ ਹੋਨ੍ਤਿ.

ਅਯਮੇਤੇਸਂ ਅਤਿਸਯੇਨ ਪਾਪੋਤਿ ਪਾਪਤਰੋ, ਪਾਪਤਮੋ, ਪਾਪਿਸ੍ਸਿਕੋ, ਪਾਪਿਯੋ, ਪਾਪਿਟ੍ਠੋ ਵਾ.

‘‘ਵੁਦ੍ਧਸ੍ਸ ਜੋ ਇਯਿਟ੍ਠੇਸੂ’’ਤਿ ਵੁਦ੍ਧਸ੍ਸ ਜਾਦੇਸੇ – ‘‘ਸਰਲੋਪਾ’’ਦੋ ਪਕਤਿਗ੍ਗਹਣੇਨ ਪਕਤ੍ਯਭਾਵਾ ਇਸ੍ਸ ਏ. ਜੇਯ੍ਯੋ, ਜੇਟ੍ਠੋ.

ਏਵਂ ‘‘ਪਸਤ੍ਥਸ੍ਸ ਸੋ ਚੇ’’ਤਿ ਸਾਦੇਸੇ ਸੇਯ੍ਯੋ, ਸੇਟ੍ਠੋ.

ਅਸ੍ਸਤ੍ਥਿਤਦ੍ਧਿਤ

੨੪੫. ‘‘ਤਦਸ੍ਸਤ੍ਥੀਤਿ ਵੀ ਚੇ’’ਤਿ ਵੀ. ਮੇਧਾ ਅਸ੍ਸ ਅਤ੍ਥੀਤਿ ਮੇਧਾਵੀ.

੨੪੬. ਏਵਂ ‘‘ਤਪਾਦਿਤੋ ਸੀ’’ਤਿ ਸੀ, ਦ੍ਵਿਤ੍ਤਂ, ਤਪਸ੍ਸੀ.

੨੪੭. ‘‘ਦਣ੍ਡਾਦਿਤੋ ਇਕ ਈ’’ਤਿ ਇਕੋ, ਈ ਚ. ਦਣ੍ਡਿਕੋ, ਦਣ੍ਡੀ.

੨੪੮. ‘‘ਗੁਣਾਦਿਤੋ ਵਨ੍ਤੂ’’ਤਿ ਵਨ੍ਤੁ. ਗੁਣਵਾ, ਪਞ੍ਞਵਾ. ਯਦਾਦਿਨਾ ਰਸ੍ਸੋ.

੨੪੯. ‘‘ਸਤ੍ਯਾਦੀਹਿ ਮਨ੍ਤੂ’’ਤਿ ਮਨ੍ਤੁ. ਸਤਿਮਾ, ਭਾਨੁਮਾ.

੨੫੦. ‘‘ਆਯੁਸ੍ਸੁਕਾਰਾਸ੍ਮਨ੍ਤੁਮ੍ਹੀ’’ਤਿ ਉਸ੍ਸ ਅਸ. ਆਯਸ੍ਮਾ.

੨੫੧. ‘‘ਸਦ੍ਧਾਦਿਤੋ ਣ’’ ਇਤਿ ਣੋ. ਸਦ੍ਧੋ.

੨੫੨. ‘‘ਤਪ੍ਪਕਤਿਵਚਨੇ ਮਯੋ’’ਤਿ ਮਯੋ. ਸੁਵਣ੍ਣੇਨ ਪਕਤਂ ਸੋਵਣ੍ਣਮਯਂ, ਸੁਵਣ੍ਣਮਯਂ ਵਾ. ਪਕ੍ਖੇ - ਯਦਾਦਿਨਾ ਵੁਦ੍ਧਿ.

ਏਤੇਸਮੋ ਲੋਪੇ.

ਵਿਭਤ੍ਤਿਲੋਪੇ ਮਨਾਦੀਨਮਨ੍ਤਸ੍ਸ ਓ ਹੋਤਿ. ਮਨੋਮਯਂ.

ਸਙ੍ਖ੍ਯਾਤਦ੍ਧਿਤ

੨੫੩. ਸਙ੍ਖ੍ਯਾਪੂਰਣੇ ਤ੍ਯਧਿਕਾਰੋ.

‘‘ਦ੍ਵਿਤੀਹਿ ਤਿਯੋ’’ਤਿ ਤਿਯੋ, ‘‘ਤਿਯੇ ਦੁਤਾਪਿ ਚੇ’’ਤਿ ਦ੍ਵਿਤੀਨਂ ਦੁਤਾ. ਦ੍ਵਿਨ੍ਨਂ ਪੂਰਣੋ ਦੁਤਿਯੋ, ਏਵਂ ਤਤਿਯੋ.

੨੫੪. ‘‘ਚਤੁਚ੍ਛੇਹਿ ਥਠਾ’’ਤਿ ਥਠਾ. ਚਤੁਤ੍ਥੋ, ਛਟ੍ਠੋ.

੨੫੫. ਤੇਸਮਡ੍ਢੂਪਪਦੇਨ ਅਡ੍ਢੁਡ੍ਢ ਦਿਵਡ੍ਢ ਦਿਯਡ੍ਢਾਡ੍ਢਤਿਯਾ.

ਚਤੁਤ੍ਥ ਦੁਤਿਯ ਤਤਿਯਾਨਂ ਅਡ੍ਢੂਪਪਦੇਨ ਸਹ ਅਡ੍ਢੁਡ੍ਢ ਦਿਵਡ੍ਢ ਦਿਯਡ੍ਢਾਡ੍ਢਤਿਯਾ ਹੋਨ੍ਤਿ.

ਅਡ੍ਢੇਨ ਚਤੁਤ੍ਥੋ ਅਡ੍ਢੁਡ੍ਢੋ, ਅਡ੍ਢੇਨ ਦੁਤਿਯੋ ਦਿਵਡ੍ਢੋ, ਦਿਯਡ੍ਢੋ ਵਾ, ਅਡ੍ਢੇਨ ਤਤਿਯੋ ਅਡ੍ਢਤਿਯੋ.

੨੫੬. ‘‘ਸਙ੍ਖ੍ਯਾਪੂਰਣੇ ਮੋ’’ਤਿ ਮੋ, ਪਞ੍ਚਮੋ. ਇਤ੍ਥਿਯਂ ਪਞ੍ਚਨ੍ਨਂ ਪੂਰਣੀ ਪਞ੍ਚਮੀ.

ਏਕੋ ਚ ਦਸ ਚਾਤਿ ਦ੍ਵਨ੍ਦੇ ਕਤੇ –

ਦ੍ਵੇਕਟ੍ਠਾਨਮਾਕਾਰੋ ਵਾ.

ਸਙ੍ਖ੍ਯਾਨੇ ਉਤ੍ਤਰਪਦੇ ਦ੍ਵਿਏਕਅਟ੍ਠਇਚ੍ਚੇਤੇਸ ਮਨ੍ਤਸ੍ਸ ਆ ਵਾ ਹੋਤਿ. ਏਕਾਦਸ ਪਞ੍ਚੀਵ. ਏਵਂ ਦ੍ਵਾਦਸ.

ਯਦਾਦਿਨਾ ਤਿਸ੍ਸ ਤੇਆਦੇਸੇ ‘‘ਏਕਾਦਿਤੋ ਦਸ੍ਸ ਰ ਸਙ੍ਖ੍ਯਾਨੇ’’ਤਿ ਦਸਸਦ੍ਦੇ ਦਸ੍ਸ ਰੋ. ਤੇਰਸ.

੨੫੭. ‘‘ਚਤੂਪਪਦਸ੍ਸ ਲੋਪੋ ਤੁਤ੍ਤਰਪਦਾਦਿਚਸ੍ਸ ਚੁਚੋਪਿ ਨਵਾ’’ਤਿ ਚਤੁਸਦ੍ਦੇ ਤੁਸ੍ਸ ਲੋਪੋ ਚਸ੍ਸ ਚੁ ਚ. ਚੁਦ੍ਦਸ.

‘‘ਦਸੇ ਸੋ ਨਿਚ੍ਚਞ੍ਚੇ’’ਤਿ ਛਸ੍ਸ ਸੋਆਦੇਸੇ – ‘‘ਲ਼ ਦਰਾਨਂ’’ਤਿ ਦਸਸਦ੍ਦੇ ਦਸ੍ਸ ਲ਼ੋ. ਸੋਲ਼ਸ, ਅਟ੍ਠਾਰਸ.

੨੫੮. ‘‘ਵੀਸਤਿ ਦਸੇਸੁ ਬਾ ਦ੍ਵਿਸ੍ਸ ਤੂ’’ਤਿ ਦ੍ਵਿਸ੍ਸ ਬਾ. ਬਾਵੀਸਤਿ, ਏਕਾਦਸਨ੍ਨਂ ਪੂਰਣੋ ਏਕਾਦਸਮੋ.

੨੫੯. ‘‘ਏਕਾਦਿਤੋ ਦਸਸ੍ਸੀ’’ਤਿ ਇਤ੍ਥਿਯਂ ਈ. ਏਕਾਦਸੀ ਇਚ੍ਚਾਦਿ.

‘‘ਦ੍ਵਾਦਿਤੋ ਕੋਨੇਕਤ੍ਥੇ ਚੇ’’ਤਿ ਕੋ, ਦ੍ਵੇ ਪਰਿਮਾਣਾਨਿ ਅਸ੍ਸੇਤਿ ਦ੍ਵਿਕਂ. ਏਵਂ ਤਿਕਾਦਿ.

੨੬੦. ‘‘ਸਮੂਹਤ੍ਥੇ ਕਣ੍ਣਾ’’ਤਿ ਕਣ ਚ, ਣੋ ਚ. ਮਨੁਸ੍ਸਾਨਂ ਸਮੂਹੋ ਮਾਨੁਸ੍ਸਕੋ, ਮਾਨੁਸ੍ਸੋ ਵਾ.

ਣੇ ਕਤੇ – ‘‘ਝਲਾਨਮਿਯੁਵਾ ਸਰੇ ਵਾ’’ ਤੀਹ ਵਾਕਾਰੇਨ ਇਸ੍ਸ ਅਯਾਦੇਸੇ – ਦ੍ਵਯਂ, ਤਯਂ. ਏਵਂ ‘‘ਗਾਮਜਨਬਨ੍ਧੁਸਹਾਯਾਦੀਹਿ ਤਾ’’ਤਿ ਤਾ. ਗਾਮਤਾ, ਨਾਗਰਤਾ.

ਭਾਵਤਦ੍ਧਿਤ

੨੬੧. ਣ੍ਯਤ੍ਤਤਾ ਭਾਵੇ ਤੁ.

ਭਾਵਤ੍ਥੇ ਣ੍ਯਤ੍ਤਤਾ ਹੋਨ੍ਤਿ. ਤੁਸਦ੍ਦੇਨ ਤ੍ਤਨੋ ਚ. ਸਕਤ੍ਥਾਦੀਸੁਪਿ ਣ੍ਯੋ, ਸਕਤ੍ਥੇ ਤਾ ਚ.

੨੬੨. ਹੋਨ੍ਤ੍ਯਸ੍ਮਾ ਸਦ੍ਦਞਾਣਾਨਿ,

ਭਾਵੋ ਸਾ ਸਦ੍ਦਵੁਤ੍ਤਿਯਾ;

ਨਿਮਿਤ੍ਤਭੂਤਂ ਨਾਮਞ੍ਚ,

ਜਾਤਿ ਦਬ੍ਬਂ ਕ੍ਰਿਯਾ ਗੁਣੋ.

੨੬੩. ਯਥਾ – ਚਨ੍ਦਸ੍ਸ ਭਾਵੋ ਚਨ੍ਦਤ੍ਤਂ. ਇਹ ਨਾਮਵਸਾ ਚਨ੍ਦਸਦ੍ਦੋ ਚਨ੍ਦਦ੍ਦਬ੍ਬੇ ਵਤ੍ਤਤੇ, ਨਿਮਿਤ੍ਤਸ੍ਸ ਰੂਪਾਨੁਗਤਞ੍ਚ ਞਾਣਂ. ਏਵਂ ਮਨੁਸ੍ਸਤ੍ਤਨ੍ਤਿ ਮਨੁਸ੍ਸਜਾਤਿਵਸਾ. ਯਦਾਦਿਨਾ ਈਸ੍ਸ ਰਸ੍ਸੇ – ਦਣ੍ਡਿਤ੍ਤਨ੍ਤਿ ਦਣ੍ਡਦ੍ਦਬ੍ਬਸਮ੍ਬਨ੍ਧਾ. ਪਾਚਕਤ੍ਤਨ੍ਤਿ ਪਚਨਕ੍ਰਿਯਾਸਮ੍ਬਨ੍ਧਾ. ਨੀਲਤ੍ਤਨ੍ਤਿ ਨੀਲਗੁਣਵਸਾ.

ਏਵਂ ਣ੍ਯਾਦੀਸੁਪਿ ਯਥਾਯੋਗਂ ਞੇਯ੍ਯਂ. ਣ੍ਯੋ.

ਅਵਣ੍ਣੋ ਯੇ ਲੋਪਞ੍ਚ.

ਯੇ ਪਰੇ ਅਵਣ੍ਣੋ ਲੁਪ੍ਯਤੇ, ਚਕਾਰੇਨ ਇਕਾਰੋਪਿ.

ਯਵਤਂ ਤਲਣਦਕਾਰਾਨਂ ਬ੍ਯਞ੍ਜਨਾਨਿ ਚਲਞ ਜਕਾਰਤ੍ਤ’’ਨ੍ਤਿ ਯਕਾਰਯੁਤ੍ਤਾਨਂ ਤਾਦੀਨਂ ਚਾਦਯੋ, ਕਾਰਗ੍ਗਹਣੇਨ ਸਕਪਭਮਾਦਿਤੋ ਪਰਯਕਾਰਸ੍ਸ ਪੁਬ੍ਬੇਨ ਸਹ ਕ੍ਵਚਿ ਪੁਬ੍ਬਰੂਪਞ੍ਚ, ਦ੍ਵਿਤ੍ਤਂ. ਪਣ੍ਡਿਚ੍ਚਂ, ਕੋਸਲ੍ਲਂ, ਸਾਮਞ੍ਞਂ, ਸੋਹਜ੍ਜਂ, ਪੋਰਿਸ੍ਸਂ, ਨੇਪਕ੍ਕਂ, ਸਾਰੁਪ੍ਪਂ, ਓਸਬ੍ਭਂ, ਓਪਮ੍ਮਂ.

ਆਤ੍ਤਞ੍ਚ.

ਇਉਇਚ੍ਚੇਤੇਸਂ ਆ ਹੋਤਿ, ਰਿਕਾਰਾਗਮੋ ਚ ਠਾਨੇ.

ਸਰਲੋਪਾਦਿਨਾ ਇਲੋਪੋ. ਇਸਿਨੋ ਭਾਵੋ.

ਆਰਿਸ੍ਸਂ. ਏਵਂ ਮੁਦੁਤਾ, ਅਰਹਤਾ, ਨ੍ਤਸ੍ਸ ਯਦਾਦਿਨਾ ਲੋਪੋ.

ਪੁਥੁਜ੍ਜਨਤ੍ਤਨਂ, ਅਕਿਞ੍ਚਨਮੇਵ ਆਕਿਞ੍ਚਞ੍ਞਂ, ਕੁਣ੍ਡਨਿਯਾ ਅਪਚ੍ਚਂ ਕੋਣ੍ਡਞ੍ਞੋ, ਏਤ੍ਥ ਵੁਦ੍ਧਾਦੋ ਵਾਕਾਰੇਨ ਸਂਯੋਗਨ੍ਤਸ੍ਸਾਪਿ ਵੁਦ੍ਧਿ.

ਪਦਾਯ ਹਿਤਂ ਪਜ੍ਜਂ, ਧਨਾਯਂ ਸਂਵਤ੍ਤਨਿਕਂ ਧਞ੍ਞਂ, ਸਤਿਤੋ ਸਮ੍ਭੂਤਂ ਸਚ੍ਚਂ, ਇਲੋਪੋ, ਤੀਸੁ ਨ ਵੁਦ੍ਧਿ. ਦੇਵੋ ਏਵ ਦੇਵਤਾ.

੨੬੪. ‘‘ਣ ਵਿਸਮਾਦੀਹੀ’’ਤਿ ਭਾਵੇ ਣੋ. ਵੇਸਮਂ. ਉਜੁਨੋ ਭਾਵੋ ਅਜ੍ਜਵਂ. ਏਤ੍ਥ ਉਸ੍ਸ ਆਤ੍ਤੇ ਪਰੂਕਾਰਸ੍ਸ ਯਦਾਦਿਨਾ ਅਵੋ.

੨੬੫. ‘‘ਰਮਣੀਯਾਦਿਤੋ ਕਣ੍ਤਿ ਕਣ. ਮਾਨਞ੍ਞਕਂ.

ਅਬ੍ਯਯਤਦ੍ਧਿਤ

੨੬੬. ‘‘ਵਿਭਾਗੇ ਧਾ ਚੇ’’ਤਿ ਧਾ, ਚਕਾਰੇਨ ਸੋਪ੍ਪਚ੍ਚਯੋ ਚ. ਏਕੇਨ ਵਿਭਾਗੇਨ ਏਕਧਾ, ਨਿਪਾਤਤ੍ਤਾ ਸਿਲੋਪੋ. ਪਦਵਿਭਾਗੇਨ ਪਦਸੋ.

੨੬੭. ‘‘ਸਬ੍ਬਨਾਮੇਹਿ ਪਕਾਰਵਚਨੇ ਤੁ ਥਾ’’ਤਿ ਥਾ. ਤੁਕਾਰੇਨ ਥਤ੍ਤਾ ਚ. ਸਬ੍ਬੋ ਪਕਾਰੋ, ਸਬ੍ਬੇਨ ਪਕਾਰੇਨ ਵਾ ਸਬ੍ਬਥਾ. ਏਵਂ ਅਞ੍ਞਥਤ੍ਤਾ.

੨੬੮. ‘‘ਕਿਮਿਮੇਹਿ ਥ’’ਨ੍ਤਿ ਥਂ, ਕਾਦੇਸੇ-ਕਥਂ. ਇਆਦੇਸੇ-ਇਤ੍ਥਂ, ਥਨ੍ਤਿ ਯੋਗਵਿਭਾਗੇਨ ਥਂ-ਬਹੁਤ੍ਥਂ.

੨੬੯. ਅਮਲਿਨਂ ਮਲਿਨਂ ਕਰੋਤੀਤ੍ਯਾਦ੍ਯਤ੍ਥੇ-ਅਭੂਤਤਬ੍ਭਾਵੇ ਗਮ੍ਯਮਾਨੇ ਕਰਭੂਯੋਗੇ ਸਤਿ ਨਾਮਤੋ ਯਦਾਦਿਨਾ ਈਪ੍ਪਚ੍ਚਯੋ, ਮਲਿਨੀਕਰੋਤਿ ਸੇਤਂ. ਅਭਸ੍ਮਨੋ ਭਸ੍ਮਨੋ ਕਰਣਨ੍ਤਿ ਭਸ੍ਮੀਕਰਣਂ ਕਟ੍ਠਸ੍ਸ. ਅਮਲਿਨੋ ਮਲਿਨੋ ਭਵਤੀਤਿ ਮਲਿਨੀਭਵਤਿ ਸੇਤੋ. ਈਪ੍ਪਚ੍ਚਯਨ੍ਤੋਪਿ ਨਿਪਾਤੋ. ਅਭੂਤਤਬ੍ਭਾਵੇਤਿ ਕਿਂ, ਘਟਂ ਕਰੋਤਿ, ਘਟੋ ਭਵਤਿ.

ਕਰਭੂਯੋਗੇਤਿ ਕਿਂ, ਅਮਲਿਨੋ ਮਲਿਨੋ ਜਾਯਤੇ.

ਅਵਤ੍ਥਾਵਤੋਵਤ੍ਥਯਾ, ਭੂਤਸ੍ਸਞ੍ਞਾਯ ਵਤ੍ਥੁਨੋ.

ਤਾਯਾਵਤ੍ਥਾਯ ਭਵਨਂ, ਅਭੂਤਤਬ੍ਭਵਂ ਵਿਦੁਂ.

ਤਦ੍ਧਿਤੋ.