੨. ਸਂਕਿਣ੍ਣਵਗ੍ਗ

੭੫੮. ਞੇਯ੍ਯਂ ਲਿਙ੍ਗ ਮਿਹ ਕ੍ਵਾਪਿ, ਪਚ੍ਚਯਤ੍ਥਵਸੇਨ ਚ;

ਕ੍ਰਿਯਾ ਤੁ ਕਿਰਿਯਂ ਕਮ੍ਮਂ,

ਸਨ੍ਤਿ ਤੁ ਸਮਥੋ ਸਮੋ;

ਦਮੋ ਚ ਦਮਥੋ ਦਨ੍ਤਿ, ਵਤ੍ਤਂ ਤੁ ਸੁਦ੍ਧਕਮ੍ਮਨਿ;

ਅਥੋ ਆਸਙ੍ਗਵਚਨਂ, ਤੀਸੁ ਵੁਤ੍ਤਂ ਪਰਾਯਣਂ.

੭੫੯. ਭੇਦੋ ਵਿਦਾਰੋ ਫੁਟਨਂ, ਤਪ੍ਪਨਂ ਤੁ ਚ ਪੀਣਨਂ;

ਅਕ੍ਕੋਸਨ ਮਭਿਸਙ੍ਗੋ,

ਭਿਕ੍ਖਾ ਤੁ ਯਾਚਨਾ’ਤ੍ਥਨਾ.

੭੬੦. ਨਿਨ੍ਨਿਮਿਤ੍ਤਂ ਯਦਿਚ੍ਛਾ ਥਾ’, ਪੁਚ੍ਛਨਾ ਨਨ੍ਦਨਾਨਿ ਚ;

ਸਭਾਜਨ ਮਥੋ ਞਾਯੋ,

ਨਯੋ ਫਾਤਿ ਤੁ ਵੁਦ੍ਧਿਯਂ.

੭੬੧. ਕਿਲਮਥੋ ਕਿਲਮਨਂ, ਪਸਵੋ ਤੁ ਪਸੂਤਿਯਂ;

ਉਕ੍ਕਂਸੋ ਤ੍ਵਤਿਸਯੋ ਥ,

ਜਯੋ ਚ ਜਯਨਂ ਜਿਤਿ.

੭੬੨. ਵਸੋ ਕਨ੍ਤਿ, ਬ੍ਯਧੋ ਵੇਧੋ,

ਗਹੋ ਗਾਹੋ ਵਰੋ ਵੁਤਿ;

ਪਚਾ ਪਾਕੋ ਹਵੋ ਹੁਤਿ [ਹੂਭਿ (ਸੀ. ਅਮਰਕੋਸ)],

ਵੇਦੋ ਵੇਦਨ ਮਿਤ੍ਥਿ ਵਾ.

੭੬੩. ਜੀਰਣਂ ਜਾਨਿ ਤਾਣਂ ਤੁ, ਰਕ੍ਖਣਂ ਪਮਿਤਿਪ੍ਪਮਾ;

ਸਿਲੇਸੋ ਸਨ੍ਧਿ ਚ ਖਯੋ,

ਤ੍ਵਪਚਯੋ ਰਵੋ ਰਣੋ.

੭੬੪. ਨਿਗਾਦੋ ਨਿਗਦੋ ਮਾਦੋ, ਮਦੋ ਪਸਿਤਿ ਬਨ੍ਧਨਂ;

ਆਕਰੋ ਤ੍ਵਿਙ੍ਗਿਤਂ ਇਙ੍ਗੋ,

ਅਥ’ਤ੍ਥਾਪਗਮੋ ਬ੍ਯਯੋ.

੭੬੫. ਅਨ੍ਤਰਾਯੋ ਚ ਪਚ੍ਚੂਹੋ,

ਵਿਕਾਰੋ ਤੁ ਵਿਕਤ੍ਯ’ਪਿ;

ਪਵਿਸਿਲੇਸੋ ਵਿਧੁਰਂ, ਉਪਵੇਸਨਮਾਸਨਂ.

੭੬੬. ਅਜ੍ਝਾਸਯੋ ਅਧਿਪ੍ਪਾਯੋ, ਆਸਯੋ ਚਾਭਿਸਨ੍ਧਿ ਚ;

ਭਾਵੋ ਧਿਮੁਤ੍ਤਿ ਛਨ੍ਦੋ ਥ,

ਦੋਸੋ ਆਦੀਨਵੋ ਭਵੇ.

੭੬੭. ਆਨਿਸਂਸੋ ਗੁਣੋ ਚਾਥ,

ਮਜ੍ਝਂ ਵੇਮਜ੍ਝ ਮੁਚ੍ਚਤੇ;

ਮਜ੍ਝਨ੍ਹਿਕੋ [ਮਜ੍ਝਨ੍ਤਿਕੋ (ਟੀ. ਸੀ. ਪੀ.)] ਤੁ ਮਜ੍ਝਨ੍ਹੋ, ਵੇਮਤ੍ਤਂ ਤੁ ਚ ਨਾਨਤਾ.

੭੬੮. ਵਾ ਜਾਗਰੋ ਜਾਗਰਿਯਂ [ਜਾਗਰਿਯੋ (ਟੀ.)], ਪਵਾਹੋ ਤੁ ਪਵਤ੍ਤਿ ਚ;

ਬ੍ਯਾਸੋ ਪਪਞ੍ਚੋ ਵਿਤ੍ਥਾਰੋ,

ਯਾਮੋ ਤੁ ਸਂਯਮੋ ਯਮੋ.

੭੬੯. ਸਮ੍ਬਾਹਨਂ ਮਦ੍ਦਨਞ੍ਚ, ਪਸਰੋ ਤੁ ਵਿਸਪ੍ਪਨਂ;

ਸਨ੍ਥਵੋ ਤੁ ਪਰਿਚਯੋ,

ਮੇਲਕੋ ਸਙ੍ਗ ਸਙ੍ਗਮਾ.

੭੭੦. ਸਨ੍ਨਿਧਿ ਸਨ੍ਨਿਕਟ੍ਠਮ੍ਹਿ, ਵਿਨਾਸੋ ਤੁ ਅਦਸ੍ਸਨਂ;

ਲਵੋ ਭਿਲਾਵੋ ਲਵਨਂ,

ਪਤ੍ਥਾਵੋ’ਵਸਰੋ ਸਮਾ.

੭੭੧. ਓਸਾਨਂ ਪਰਿਯੋਸਾਨਂ, ਉਕ੍ਕਂਸੋ’ਤਿਸਯੋ ਭਵੇ [ਅਵਸਾਨਂ ਸਮਾਪਨਂ (?)];

ਸਨ੍ਨਿਵੇਸੋ ਚ ਸਣ੍ਠਾਨਂ, ਅਥਾ’ਬ੍ਭਨ੍ਤਰ ਮਨ੍ਤਰਂ.

੭੭੨. ਪਾਟਿਹੀਰਂ ਪਾਟਿਹੇਰਂ, ਪਾਟਿਹਾਰਿਯ ਮੁਚ੍ਚਤੇ;

ਕਿਚ੍ਚਂ ਤੁ ਕਰਣੀਯਞ੍ਚ, ਸਙ੍ਖਾਰੋ ਵਾਸਨਾ ਭਵੇ.

੭੭੩. ਪਵਨਂ ਪਵ ਨਿਪ੍ਪਾਵਾ, ਤਸਰੋ ਸੁਤ੍ਤਵੇਠਨਂ;

ਸਙ੍ਕਮੋ ਦੁਗ੍ਗਸਞ੍ਚਾਰੋ, ਪਕ੍ਕਮੋ ਤੁ ਉਪਕ੍ਕਮੋ.

੭੭੪. ਪਾਠੋ ਨਿਪਾਠੋ ਨਿਪਠੋ, ਵਿਚਯੋ ਮਗ੍ਗਨਾ ਪੁਮੇ;

ਆਲਿਙ੍ਗਨਂ ਪਰਿਸ੍ਸਙ੍ਗੋ, ਸਿਲੇਸੋ ਉਪਗੂਹਨਂ.

੭੭੫. ਆਲੋਕਨਞ੍ਚ ਨਿਜ੍ਝਾਨਂ, ਇਕ੍ਖਣਂ ਦਸ੍ਸਨਂ ਪ੍ਯਥ;

ਪਚ੍ਚਾਦੇਸੋ ਨਿਰਸਨਂ, ਪਚ੍ਚਕ੍ਖਾਨਂ ਨਿਰਾਕਤਿ.

੭੭੬. ਵਿਪਲ੍ਲਾਸੋ’ਞ੍ਞਥਾਭਾਵੋ, ਬ੍ਯਤ੍ਤਯੋ ਵਿਪਰੀਯਯੋ;

ਵਿਪਰਿਯਾਸੋ’ਤਿਕ੍ਕਮੋ, ਤ੍ਵ’ਤਿਪਾਤੋ ਉਪਚ੍ਚਯੋ.

ਇਤਿ ਸਂਕਿਣ੍ਣਵਗ੍ਗੋ.