੬. ਅਰਞ੍ਞਾਦਿਵਗ੍ਗ

੬੦੫. ਪਬ੍ਬਤੋ ਗਿਰਿ ਸੇਲੋ’ਦ੍ਦਿ, ਨਗਾ’ਚਲ, ਸਿਲੁਚ੍ਚਯਾ;

ਸਿਖਰੀ ਭੂਧਰੋਥ ਬ੍ਭ, ਪਾਸਾਣਾ’ਸ੍ਮੋ’ਪਲੋ ਸਿਲਾ.

੬੦੬. ਗਿਜ੍ਝਕੂਟੋ ਚ ਵੇਭਾਰੋ, ਵੇਪੁਲ੍ਲੋ’ਸਿਗਿਲੀ ਨਗਾ;

ਵਿਞ੍ਝੋ ਪਣ੍ਡਵ ਵਙ੍ਕਾਦੀ, ਪੁਬ੍ਬਸੇਲੋ ਤੁ ਚੋ’ਦਯੋ;

ਮਨ੍ਦਰੋ ਪਰਸੇਲੋ’ਤ੍ਥੋ, ਹਿਮਵਾ ਤੁ ਹਿਮਾਚਲੋ.

੬੦੭. ਗਨ੍ਧਮਾਦਨ ਕੇਲਾਸ, ਚਿਤ੍ਤਕੂਟ ਸੁਦਸ੍ਸਨਾ;

ਕਾਲਕੂਟੋ ਤਿਕੂਟਾ’ਸ੍ਸ, ਪਤ੍ਥੋ ਤੁ ਸਾਨੁ ਨਿਤ੍ਥਿਯਂ.

੬੦੮. ਕੂਟੋ ਵਾ ਸਿਖਰਂ ਸਿਙ੍ਗਂ, ਪਪਾਤੋ ਤੁ ਤਟੋ ਭਵੇ;

ਨਿਤਮ੍ਬੋ ਕਟਕੋ ਨਿਤ੍ਥੀ, ਨਿਜ੍ਝਰੋ ਪਸਵੋ’ਮ੍ਬੁਨੋ.

੬੦੯. ਦਰੀ’ਤ੍ਥੀ ਕਨ੍ਦਰੋ ਦ੍ਵੀਸੁ, ਲੇਣਂ ਤੁ ਗਬ੍ਭਰਂ ਗੁਹਾ;

ਸਿਲਾਪੋਕ੍ਖਰਣੀ ਸੋਣ੍ਡੀ, ਕੁਞ੍ਜਂ ਨਿਕੁਞ੍ਜ ਮਿਤ੍ਥਿ ਨ.

੬੧੦. ਉਦ੍ਧ ਮਧਿਚ੍ਚਕਾ ਸੇਲ, ਸ੍ਸਾਸਨ੍ਨਾ ਭੂਮ੍ਯੁ ਪਚ੍ਚਕਾ;

ਪਾਦੋ ਤੁ’ਪਨ੍ਤਸੇਲੋ ਥ,

ਧਾਤੁ’ਤ੍ਤੋ ਗੇਰਿਕਾਦਿਕੋ.

ਇਤਿ ਸੇਲਵਗ੍ਗੋ.

੬੧੧. ਮਿਗਿਨ੍ਦੋ ਕੇਸਰੀ ਸੀਹੋ, ਤਰਚ੍ਛੋ ਤੁ ਮਿਗਾਦਨੋ;

ਬ੍ਯਗ੍ਘੋ ਤੁ ਪੁਣ੍ਡਰੀਕੋ ਥ, ਸਦ੍ਦੂਲੋ ਦੀਪਿਨੀ’ਰਿਤੋ.

੬੧੨. ਅਚ੍ਛੋ ਇਕ੍ਕੋ ਚ ਇਸ੍ਸੋ ਤੁ,

ਕਾਲ਼ਸੀਹੋ ਇਸੋ ਪ੍ਯਥ;

ਰੋਹਿਸੋ ਰੋਹਿਤੋ ਚਾਥ,

ਗੋਕਣ੍ਣੋ ਗਣਿ ਕਣ੍ਟਕਾ.

੬੧੩. ਖਗ੍ਗ ਖਗ੍ਗਵਿਸਾਣਾ ਤੁ, ਪਲਾਸਾਦੋ ਚ ਗਣ੍ਡਕੋ;

ਬ੍ਯਗ੍ਘਾਦਿਕੇ ਵਾਲ਼ਮਿਗੋ, ਸਾਪਦੋ ਥ ਪ੍ਲਵਙ੍ਗਮੋ.

੬੧੪. ਮਕ੍ਕਟੋ ਵਾਨਰੋ ਸਾਖਾ, ਮਿਗੋ ਕਪਿ ਵਲੀਮੁਖੋ;

ਪਲਵਙ੍ਗੋ, ਕਣ੍ਹਤੁਣ੍ਡੋ,

ਗੋਨਙ੍ਗੁਲੋ [ਗੋਨਙ੍ਗਲੋ (ਟੀ.)] ਤਿ ਸੋ ਮਤੋ.

੬੧੫. ਸਿਙ੍ਗਾਲੋ [ਸਿਗਾਲੋ (ਸੀ.)] ਜਮ੍ਬੁਕੋ ਕੋਤ੍ਥੁ, ਭੇਰਵੋ ਚ ਸਿਵਾ ਪ੍ਯਥ;

ਬਿਲ਼ਾਰੋ ਬਬ੍ਬੁ ਮਞ੍ਜਾਰੋ, ਕੋਕੋ ਤੁ ਚ ਵਕੋ ਭਵੇ.

੬੧੬. ਮਹਿਂਸੋ [ਮਹਿਸੋ (ਸੀ.)] ਚ ਲੁਲਾਯੋ ਥ,

ਗਵਜੋ ਗਵਯੋ ਸਮਾ;

ਸਲ੍ਲੋ ਤੁ ਸਲ੍ਲਕੋ ਥਾ’ਸ੍ਸ,

ਲੋਮਮ੍ਹਿ ਸਲਲਂ ਸਲਂ.

੬੧੭. ਹਰਿਣੋ ਮਿਗ ਸਾਰਙ੍ਗਾ, ਮਗੋ ਅਜਿਨਯੋਨਿ ਚ;

ਸੂਕਰੋ ਤੁ ਵਰੋਹੋ ਥ,

ਪੇਲਕੋ ਚ ਸਸੋ ਭਵੇ.

੬੧੮. ਏਣੇਯ੍ਯੋ ਏਣੀਮਿਗੋ ਚ, ਪਮ੍ਪਟਕੋ ਤੁ ਪਮ੍ਪਕੋ;

ਵਾਤਮਿਗੋ ਤੁ ਚਲਨੀ, ਮੂਸਿਕੋ ਤ੍ਵਾ’ਖੁ ਉਨ੍ਦੁਰੋ.

੬੧੯. ਚਮਰੋ ਪਸਦੋ ਚੇਵ, ਕੁਰੁਙ੍ਗੋ ਮਿਗਮਾਤੁਕਾ;

ਰੁਰੁ ਰਙ੍ਕੁ ਚ ਨੀਕੋ ਚ, ਸਰਭਾਦੀ ਮਿਗਨ੍ਤਰਾ.

੬੨੦. ਪਿਯਕੋ ਚਮੂਰੁ ਕਦਲੀ, ਮਿਗਾਦੀ ਚਮ੍ਮਯੋਨਯੋ;

ਮਿਗਾ ਤੁ ਪਸਵੋ ਸੀਹਾ, ਦਯੋ ਸਬ੍ਬਚਤੁਪ੍ਪਦਾ.

੬੨੧. ਲੂਤਾ ਤੁ ਲੂਤਿਕਾ ਉਣ੍ਣ, ਨਾਭਿ ਮਕ੍ਕਟਕੋ ਸਿਯਾ;

ਵਿਚ੍ਛਿਕੋ ਤ੍ਵਾ’ਲ਼ਿ ਕਥਿਤੋ, ਸਰਬੂ ਘਰਗੋਲ਼ਿਕਾ.

੬੨੨. ਗੋਧਾ ਕੁਣ੍ਡੋ ਪ੍ਯਥੋ ਕਣ੍ਣ, ਜਲੂਕਾ ਸਤਪਦ੍ਯਥ;

ਕਲਨ੍ਦਕੋ ਕਾਲ਼ਕਾ ਥ, ਨਕੁਲੋ ਮਙ੍ਗੁਸੋ ਭਵੇ.

੬੨੩. ਕਕਣ੍ਟਕੋ ਚ ਸਰਟੋ, ਕੀਟੋ ਤੁ ਪੁਲ਼ਵੋ ਕਿਮਿ;

ਪਾਣਕੋ ਚਾਪ੍ਯਥੋ ਉਚ੍ਚਾ,

ਲਿਙ੍ਗੋ ਲੋਮਸਪਾਣਕੋ.

੬੨੪. ਵਿਹਙ੍ਗੋ ਵਿਹਗੋ ਪਕ੍ਖੀ, ਵਿਹਙ੍ਗਮ ਖਗ’ਣ੍ਡਜਾ;

ਸਕੁਣੋ ਚ ਸਕੁਨ੍ਤੋ ਵਿ, ਪਤਙ੍ਗੋ ਸਕੁਣੀ ਦ੍ਵਿਜੋ.

੬੨੫. ਵਕ੍ਕਙ੍ਗੋ ਪਤ੍ਤਯਾਨੋ ਚ, ਪਤਨ੍ਤੋ ਨੀਲ਼ਜੋ ਭਵੇ;

ਤਬ੍ਭੇਦਾ ਵਟ੍ਟਕਾ ਜੀਵ, ਞ੍ਜੀਵੋ ਚਕੋਰ ਤਿਤ੍ਤਿਰਾ.

੬੨੬. ਸਾਲ਼ਿਕਾ ਕਰਵੀਕੋ ਚ, ਰਵਿਹਂਸੋ ਕੁਕੁਤ੍ਥਕੋ;

ਕਾਰਣ੍ਡਵੋ ਚ ਪਿਲਵੋ [ਬਿਲਵੋ (ਟੀ.)], ਪੋਕ੍ਖਰਸਾਤਕਾ’ਦਯੋ.

੬੨੭. ਪਤਤ੍ਤਂ ਪੇਖੁਣਂ ਪਤ੍ਤਂ, ਪਕ੍ਖੋ ਪਿਞ੍ਛਂ ਛਦੋ ਗਰੁ;

ਅਣ੍ਡਂ ਤੁ ਪਕ੍ਖਿਬੀਜੇ ਥ, ਨੀਲ਼ੋ ਨਿਤ੍ਥੀ ਕੁਲਾਵਕਂ.

੬੨੮. ਸੁਪਣ੍ਣਮਾਤਾ ਵਿਨਤਾ, ਮਿਥੁਨਂ ਥੀਪੁਮਦ੍ਵਯਂ;

ਯੁਗਂ ਤੁ ਯੁਗਲਂ ਦ੍ਵਨ੍ਦਂ, ਯਮਕਂ ਯਮਲਂ ਯਮਂ.

੬੨੯. ਸਮੂਹੋ ਗਣ ਸਙ੍ਘਾਤਾ, ਸਮੁਦਾਯੋ ਚ ਸਞ੍ਚਯੋ;

ਸਨ੍ਦੋਹੋ ਨਿਵਹੋ ਓਘੋ, ਵਿਸਰੋ ਨਿਕਰੋ ਚਯੋ.

੬੩੦. ਕਾਯੋ ਖਨ੍ਧੋ ਸਮੁਦਯੋ, ਘਟਾ ਸਮਿਤਿ ਸਂਹਤਿ;

ਰਾਸਿ ਪੁਞ੍ਜੋ ਸਮਵਾਯੋ, ਪੂਗੋ ਜਾਤਂ ਕਦਮ੍ਬਕਂ.

੬੩੧. ਬ੍ਯੂਹੋ ਵਿਤਾਨ ਗੁਮ੍ਬਾ ਚ, ਕਲਾਪੋ ਜਾਲ ਮਣ੍ਡਲਂ;

ਸਮਾਨਾਨਂ ਗਣੋ ਵਗ੍ਗੋ,

ਸਙ੍ਘੋ ਸਤ੍ਥੋ ਤੁ ਜਨ੍ਤੁਨਂ.

੬੩੨. ਸਜਾਤਿਕਾਨਂ ਤੁ ਕੁਲਂ, ਨਿਕਾਯੋ ਤੁ ਸਧਮ੍ਮਿਨਂ;

ਯੂਥੋ ਨਿਤ੍ਥੀ ਸਜਾਤਿਯ, ਤਿਰਚ੍ਛਾਨਾਨਮੁਚ੍ਚਤੇ.

੬੩੩. ਸੁਪਣ੍ਣੋ ਵੇਨਤੇਯ੍ਯੋ ਚ, ਗਰੁਲ਼ੋ ਵਿਹਗਾਧਿਪੋ;

ਪਰਪੁਟ੍ਠੋ ਪਰਭਤੋ, ਕੁਣਾਲੋ ਕੋਕਿਲੋ ਪਿਕੋ.

੬੩੪. ਮੋਰੋ ਮਯੂਰੋ ਵਰਹੀ, ਨੀਲਗੀਵ ਸਿਖਣ੍ਡਿਨੋ;

ਕਲਾਪੀ ਚ ਸਿਖੀ ਕੇਕੀ, ਚੂਲ਼ਾ ਤੁ ਚ ਸਿਖਾ ਭਵੇ.

੬੩੫. ਸਿਖਣ੍ਡੋ ਵਰਹਞ੍ਚੇਵ, ਕਲਾਪੋ ਪਿਞ੍ਛ ਮਪ੍ਯਥ;

ਚਨ੍ਦਕੋ ਮੇਚਕੋ ਚਾਥ, ਛਪ੍ਪਦੋ ਚ ਮਧੁਬ੍ਬਤੋ.

੬੩੬. ਮਧੁਲੀਹੋ ਮਧੁਕਰੋ, ਮਧੁਪੋ ਭਮਰੋ ਅਲਿ;

ਪਾਰਾਵਤੋ ਕਪੋਤੋ ਚ, ਕਕੁਟੋ ਚ ਪਾਰੇਵਤੋ.

੬੩੭. ਗਿਜ੍ਝੋ ਗਦ੍ਧੋਥ ਕੁਲਲੋ, ਸੇਨੋ ਬ੍ਯਗ੍ਘੀਨਸੋ ਪ੍ਯਥ;

ਤਬ੍ਭੇਦਾ ਸਕੁਣਗ੍ਘਿ’ਤ੍ਥੀ, ਆਟੋ ਦਬ੍ਬਿਮੁਖਦ੍ਵਿਜੋ.

੬੩੮. ਉਹੁਙ੍ਕਾਰੋ ਉਲੂਕੋ ਚ, ਕੋਸਿਯੋ ਵਾਯਸਾਰਿ ਚ;

ਕਾਕੋ ਤ੍ਵ’ਰਿਟ੍ਠੋ ਧਙ੍ਕੋ ਚ, ਬਲਿਪੁਟ੍ਠੋ ਚ ਵਾਯਸੋ.

੬੩੯. ਕਾਕੋਲੋ ਵਨਕਾਕੋ ਥ,

ਲਾਪੋ ਲਟੁਕਿਕਾ ਪ੍ਯਥ;

ਵਾਰਣੋ ਹਤ੍ਥਿਲਿਙ੍ਗੋ ਚ, ਹਤ੍ਥਿਸੋਣ੍ਡਵਿਹਙ੍ਗਮੋ.

੬੪੦. ਉਕ੍ਕੁਸੋ ਕੁਰਰੋ ਕੋਲ,ਟ੍ਠਿਪਕ੍ਖਿਮ੍ਹਿ ਚ ਕੁਕ੍ਕੁਹੋ;

ਸੁਵੋ ਤੁ ਕੀਰੋ ਚ ਸੁਕੋ, ਤਮ੍ਬਚੂਲ਼ੋ ਤੁ ਕੁਕ੍ਕੁਟੋ.

੬੪੧. ਵਨਕੁਕ੍ਕੁਟੋ ਚ ਨਿਜ੍ਜਿਵ੍ਹੋ, ਅਥ ਕੋਞ੍ਚਾ ਚ ਕੁਨ੍ਤਨੀ;

ਚਕ੍ਕਵਾਕੋ ਤੁ ਚਕ੍ਕਵ੍ਹੋ, ਸਾਰਙ੍ਗੋਤੁ ਚ ਚਾਤਕੋ.

੬੪੨. ਤੁਲਿਯੋ ਪਕ੍ਖਿਬਿਲ਼ਾਲੋ,

ਸਤਪਤ੍ਤੋ ਤੁ ਸਾਰਸੋ;

ਬਕੋ ਤੁ ਸੁਕ੍ਕਕਾਕੋਥ,

ਬਲਾਕਾ ਵਿਸਕਣ੍ਠਿਕਾ.

੬੪੩. ਲੋਹਪਿਟ੍ਠੋ ਤਥਾ ਕਙ੍ਕੋ, ਖਞ੍ਜਰੀਟੋ ਤੁ ਖਞ੍ਜਨੋ;

ਕਲਵਿਙ੍ਕੋ ਤੁ ਚਾਟਕੋ, ਦਿਨ੍ਦਿਭੋ ਤੁ ਕਿਕੀ ਭਵੇ.

੬੪੪. ਕਾਦਮ੍ਬੋ ਕਾਲ਼ਹਂਸੋਥ, ਸਕੁਨ੍ਤੋ ਭਾਸਪਕ੍ਖਿਨਿ;

ਧੂਮ੍ਯਾਟੋ ਤੁ ਕਲਿਙ੍ਗੋਥ,

ਦਾਤ੍ਯੂਹੋ ਕਾਲ਼ਕਣ੍ਠਕੋ.

੬੪੫. ਖੁਦ੍ਦਾਦੀ ਮਕ੍ਖਿਕਾਭੇਦਾ, ਡਂਸੋ ਪਿਙ੍ਗਲਮਕ੍ਖਿਕਾ;

ਆਸਾਟਿਕਾ ਮਕ੍ਖਿਕਾਣ੍ਡਂ, ਪਤਙ੍ਗੋ ਸਲਭੋ ਭਵੇ.

੬੪੬. ਸੂਚਿਮੁਖੋ ਚ ਮਕਸੋ, ਚੀਰੀ ਤੁ ਝਲ੍ਲਿਕਾ [ਝਿਲ੍ਲਿਕਾ (ਕ.)] ਥ ਚ;

ਜਤੁਕਾ ਜਿਨਪਤ੍ਤਾ ਥ, ਹਂਸੋ ਸੇਤਚ੍ਛਦੋ ਭਵੇ.

੬੪੭. ਤੇ ਰਾਜਹਂਸਾ ਰਤ੍ਤੇਹਿ, ਪਾਦਤੁਣ੍ਡੇਹਿ ਭਾਸਿਤਾ;

ਮਲ੍ਲਿਕਾ’ਖ੍ਯਾ ਧਤਰਟ੍ਠਾ, ਮਲੀਨੇਹ੍ਯ’ਸਿਤੇਹਿ ਚ.

੬੪੮. ਤਿਰਚ੍ਛੋ ਤੁ ਤਿਰਚ੍ਛਾਨੋ, ਤਿਰਚ੍ਛਾਨਗਤੋ ਸਿਯਾਤਿ.

ਇਤਿ ਅਰਞ੍ਞਾਦਿਵਗ੍ਗੋ.