੨. ਪੁਰਵਗ੍ਗ
੧੯੮. ਪੁਰਂ ਨਗਰ ਮਿਤ੍ਥੀ ਵਾ, ਠਾਨੀਯਂ ਪੁਟਭੇਦਨਂ;
ਥਿਯਂ ਤੁ ਰਾਜਧਾਨੀ [ਰਾਜਠਾਨੀ (ਟੀ.)] ਚ, ਖਨ੍ਧਾਵਾਰੋ ਭਵੇ ਥ ਚ.
੧੯੯. ਸਾਖਾਨਗਰ ਮਞ੍ਞਤ੍ਰ, ਯਂ ਤਂ ਮੂਲਪੁਰਾ ਪੁਰਂ;
ਬਾਰਾਣਸੀ ਚ ਸਾਵਤ੍ਥਿ, ਵੇਸਾਲੀ ਮਿਥਿਲਾ, ਲ਼ਵੀ.
੨੦੦. ਕੋਸਮ੍ਬੁ, ਜ੍ਜੇਨਿਯੋ ਤਕ੍ਕ, ਸਿਲਾ ਚਮ੍ਪਾ ਚ ਸਾਗਲਂ;
ਸੁਸੁਮਾਰਗਿਰਂ [ਸਂਸੁਮਾਰ (ਟੀਕਾ)] ਰਾਜ, ਗਹਂ ਕਪਿਲਵਤ੍ਥੁ ਚ.
੨੦੧. ਸਾਕੇਤ, ਮਿਨ੍ਦਪਤ੍ਥਞ੍ਚੋ, ਕ੍ਕਟ੍ਠਾ ਪਾਟਲਿਪੁਤ੍ਤਕਂ;
ਜੇਤੁਤ੍ਤਰਞ੍ਚ ਸਙ੍ਕਸ੍ਸਂ, ਕੁਸਿਨਾਰਾਦਯੋ ਪੁਰੀ.
੨੦੨. ਰਚ੍ਛਾ ਚ ਵਿਸਿਖਾ ਵੁਤ੍ਤਾ, ਰਥਿਕਾ ਵੀਥਿ ਚਾਪ੍ਯਥ;
ਬ੍ਯੂਹੋ ਰਚ੍ਛਾ ਅਨਿਬ੍ਬਿਦ੍ਧਾ, ਨਿਬ੍ਬਿਦ੍ਧਾ ਤੁ ਪਥਦ੍ਧਿ ਚ.
੨੦੩. ਚਤੁਕ੍ਕਂ ਚਚ੍ਚਰੇ ਮਗ੍ਗ, ਸਨ੍ਧਿ ਸਿਙ੍ਘਾਟਕਂ ਭਵੇ;
ਪਾਕਾਰੋ ਵਰਣੋ ਚਾਥ, ਉਦਾਪੋ [ਉਦ੍ਦਾਪ, ਉਦ੍ਦਾਪ] ਉਪਕਾਰਿਕਾ.
੨੦੪. ਕੁਟ੍ਟਂ ਤੁ ਭਿਤ੍ਤਿ ਨਾਰੀ ਥ, ਗੋਪੁਰਂ ਦ੍ਵਾਰਕੋਟ੍ਠਕੋ;
ਏਸਿਕਾ ਇਨ੍ਦਖੀਲੋ ਚ, ਅਟ੍ਟੋ ਤ੍ਵਟ੍ਟਾਲਕੋ ਭਵੇ.
੨੦੫. ਤੋਰਣਂ ਤੁ ਬਹਿਦ੍ਵਾਰਂ, ਪਰਿਖਾਤੁ ਚ ਦੀਘਿਕਾ;
ਮਨ੍ਦਿਰਂ ਸਦਨਾ, ਗਾਰਂ, ਨਿਕਾਯੋ ਨਿਲਯਾ, ਲਯੋ.
੨੦੬. ਆਵਾਸੋ ਭਵਨਂ ਵੇਸ੍ਮਂ, ਨਿਕੇਤਨਂ ਨਿਵੇਸਨਂ;
ਘਰਂ ਗਹਞ੍ਚਾ, ਵਸਥੋ, ਸਰਣਞ੍ਚ ਪਤਿਸ੍ਸਯੋ.
੨੦੭. ਓਕਂ ਸਾਲਾ ਖਯੋ ਵਾਸੋ, ਥਿਯਂ ਕੁਟਿ ਵਸਤ੍ਯ’ਪਿ;
ਗੇਹਞ੍ਚਾ, ਨਿਤ੍ਥਿ ਸਦੁਮਂ, ਚੇਤਿਯਾ, ਯਤਨਾਨਿ ਤੁ.
੨੦੮. ਪਾਸਾਦੋ ਚੇਵ ਯੂਪੋ ਥ, ਮੁਣ੍ਡਚ੍ਛਦੋ ਚ ਹਮ੍ਮਿਯਂ;
ਯੂਪੋਤੁ ਗਜਕੁਮ੍ਭਮ੍ਹਿ, ਹਤ੍ਥਿਨਖੋ ਪਤਿਟ੍ਠਿਤੋ.
੨੦੯. ਸੁਪਣ੍ਣਵਙ੍ਕਚ੍ਛਦਨ, ਮਡ੍ਢਯੋਗੋ ਸਿਯਾ ਥ ਚ;
ਏਕਕੂਟਯੁਤੋ ਮਾਲ਼ੋ,
ਪਾਸਾਦੋ ਚਤੁਰਸ੍ਸਕੋ.
੨੧੦. ਸਭਾਯਞ੍ਚ ਸਭਾ ਚਾਥ, ਮਣ੍ਡਪਂ ਵਾ ਜਨਾਲਯੋ;
ਅਥੋ ਆਸਨਸਾਲਾਯਂ, ਪਟਿਕ੍ਕਮਨ ਮੀਰਿਤਂ.
੨੧੧. ਜਿਨਸ੍ਸ ਵਾਸਭਵਨ, ਮਿਤ੍ਥੀ ਗਨ੍ਧਕੁਟਿ ਪ੍ਯਥ;
ਥਿਯਂ ਰਸਵਤੀ ਪਾਕ, ਟ੍ਠਾਨਞ੍ਚੇਵ ਮਹਾਨਸਂ.
੨੧੨. ਆਵੇਸਨਂ ਸਿਪ੍ਪਸਾਲਾ, ਸੋਣ੍ਡਾ ਤੁ ਪਾਨਮਨ੍ਦਿਰਂ;
ਵਚ੍ਚਟ੍ਠਾਨਂ ਵਚ੍ਚਕੁਟਿ, ਮੁਨੀਨਂ ਠਾਨ ਮਸ੍ਸਮੋ.
੨੧੩. ਪਣ੍ਯਵਿਕ੍ਕਯਸਾਲਾ ਕੁ, ਆਪਣੋ ਪਣ੍ਯਵੀਥਿਕਾ;
ਉਦੋਸਿਤੋ ਭਣ੍ਡਸਾਲਾ, ਚਙ੍ਕਮਨਂ ਤੁ ਚਙ੍ਕਮੋ.
੨੧੪. ਜਨ੍ਤਾਘਰਂ ਤ੍ਵਗ੍ਗਿਸਾਲਾ, ਪਪਾ ਪਾਨੀਯਸਾਲਿਕਾ;
ਗਬ੍ਭੋ ਓਵਰਕੋ ਵਾਸਾ, ਗਾਰਂ ਤੁ ਸਯਨਿਗ੍ਗਹਂ.
੨੧੫. ਇਤ੍ਥਾਗਾਰਂ ਤੁ ਓਰੋਧੋ, ਸੁਦ੍ਧਨ੍ਤੋ’ ਨ੍ਤੇਪੁਰਮ੍ਪਿ ਚ;
ਅਸਬ੍ਬਵਿਸਯਟ੍ਠਾਨਂ, ਰਞ੍ਞਂ ਕਚ੍ਛਨ੍ਤਰਂ ਮਤਂ.
੨੧੬. ਸੋਪਾਨੋ ਵਾ’ਰੋਹਣਞ੍ਚ,
ਨਿਸ੍ਸੇਣੀ ਸਾ, ਧਿਰੋਹਿਣੀ;
ਵਾਤਪਾਨਂ ਗਵਕ੍ਖੋ ਚ, ਜਾਲਞ੍ਚ ਸੀਹਪਞ੍ਜਰਂ.
੨੧੭. ਆਲੋਕਸਨ੍ਧਿ ਵੁਤ੍ਤੋ ਥ, ਲਙ੍ਗੀ’ਤ੍ਥੀ ਪਲਿਘੋ ਭਵੇ;
ਕਪਿਸੀਸੋ, ਗ੍ਗਲਤ੍ਥਮ੍ਭੋ, ਨਿਬ੍ਬਂ ਤੁ ਛਦ੍ਦਕੋਟਿਯਂ.
੨੧੮. ਛਦਨਂ ਪਟਲਂ ਛਦ੍ਦ, ਮਜਿਰਂ ਚਚ੍ਚਰੋ, ਙ੍ਗਣਂ;
ਪਘਾਨੋ ਪਘਨਾ, ਲਿਨ੍ਦੋ, ਪਮੁਖਂ ਦ੍ਵਾਰਬਨ੍ਧਨਂ.
੨੧੯. ਪਿਟ੍ਠਸਙ੍ਘਾਟਕਂ ਦ੍ਵਾਰ, ਬਾਹਾ ਕੂਟਂ ਤੁ ਕਣ੍ਣਿਕਾ;
ਦ੍ਵਾਰਞ੍ਚ ਪਟਿਹਾਰੋ ਥ, ਉਮ੍ਮਾਰੋ ਦੇਹਨੀ, ਤ੍ਥਿਯਂ.
੨੨੦. ਏਲ਼ਕੋ ਇਨ੍ਦਖੀਲੋ ਥ, ਥਮ੍ਭੋ ਥੂਣੋ ਪੁਮਿਤ੍ਥਿਯਂ;
ਪਾਟਿਕਾ, ਡ੍ਢੇਨ੍ਦੁਪਾਸਾਣੇ, ਗਿਞ੍ਜਕਾ ਤੁ ਚ ਇਟ੍ਠਕਾ.
੨੨੧. ਵਲਭਿਚ੍ਛਾਦਿਦਾਰੁਮ੍ਹਿ, ਵਙ੍ਕੇ ਗੋਪਾਨਸੀ, ਤ੍ਥਿਯਂ;
ਕਪੋਤਪਾਲਿਕਾਯਂ ਤੁ, ਵਿਟਙ੍ਕੋ ਨਿਤ੍ਥਿਯਂ ਭਵੇ.
੨੨੨. ਕੁਞ੍ਚਿਕਾਵਿਵਰਂ ਤਾਲ਼, ਚ੍ਛਿਗ੍ਗਲੋ ਪ੍ਯਥ ਕੁਞ੍ਚਿਕਾ;
ਤਾਲ਼ੋ’ਵਾਪੁਰਣਂ ਚਾਥ, ਵੇਦਿਕਾ ਵੇਦਿ ਕਥ੍ਯਤੇ.
੨੨੩. ਸਙ੍ਘਾਤੋ ਪਕ੍ਖਪਾਸੋ ਚ, ਮਨ੍ਦਿਰਙ੍ਗਾ ਤੁਲਾ ਅਪਿ;
ਥਿਯਂ ਸਮ੍ਮੁਜ੍ਜਨੀ ਚੇਵ, ਸਮ੍ਮਜ੍ਜਨੀ ਚ ਸੋਧਨੀ.
੨੨੪. ਸਙ੍ਕਟੀਰਂ ਤੁ ਸਙ੍ਕਾਰ, ਟ੍ਠਾਨਂ ਸਙ੍ਕਾਰਕੂਟਕਂ;
ਅਥੋ ਕਚਵਰੋ, ਕ੍ਲਾਪੋ, ਸਙ੍ਕਾਰੋ ਚ ਕਸਮ੍ਬੁਪਿ.
੨੨੫. ਘਰਾਦਿਭੂਮਿ ਤਂ ਵਤ੍ਥੁ, ਗਾਮੋ ਸਂਵਸਥੋ ਥ ਸੋ;
ਪਾਕਟੋ ਨਿਗਮੋ ਭੋਗ, ਮਚ੍ਚਾਦਿਭ੍ਯੋ ਧਿ ਤੂਦਿਤੋ [‘ਅਧਿਭੂ’ਤਿ ਈਰਿਤੋ ਕਥਿਤੋ (ਟੀ.)].
੨੨੬. ਸੀਮਾ ਚ ਮਰਿਯਾਦਾ ਥ,
ਘੋਸੋ ਗੋਪਾਲਗਾਮਕੋਤਿ.
ਪੁਰਵਗ੍ਗੋ ਨਿਟ੍ਠਿਤੋ.