੬. ਸਿਲਾਯੂਪਸੁਤ੍ਤਂ

੨੬. ਏਕਂ ਸਮਯਂ ਆਯਸ੍ਮਾ ਚ ਸਾਰਿਪੁਤ੍ਤੋ ਆਯਸ੍ਮਾ ਚ ਚਨ੍ਦਿਕਾਪੁਤ੍ਤੋ ਰਾਜਗਹੇ ਵਿਹਰਨ੍ਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤਤ੍ਰ ਖੋ ਆਯਸ੍ਮਾ ਚਨ੍ਦਿਕਾਪੁਤ੍ਤੋ ਭਿਕ੍ਖੂ ਆਮਨ੍ਤੇਸਿ ( ) [(ਆਵੁਸੋ…ਪੇ… ਏਤਦਵੋਚ) (ਸੀ.)] – ‘‘ਦੇਵਦਤ੍ਤੋ, ਆਵੁਸੋ, ਭਿਕ੍ਖੂਨਂ ਏਵਂ ਧਮ੍ਮਂ ਦੇਸੇਤਿ – ‘ਯਤੋ ਖੋ, ਆਵੁਸੋ, ਭਿਕ੍ਖੁਨੋ ਚੇਤਸਾ ਚਿਤਂ ਹੋਤਿ, ਤਸ੍ਸੇਤਂ ਭਿਕ੍ਖੁਨੋ ਕਲ੍ਲਂ ਵੇਯ੍ਯਾਕਰਣਾਯ – ‘ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਮੀ’’’ਤਿ.

ਏਵਂ ਵੁਤ੍ਤੇ ਆਯਸ੍ਮਾ ਸਾਰਿਪੁਤ੍ਤੋ ਆਯਸ੍ਮਨ੍ਤਂ ਚਨ੍ਦਿਕਾਪੁਤ੍ਤਂ ਏਤਦਵੋਚ – ‘‘ਨ ਖੋ, ਆਵੁਸੋ ਚਨ੍ਦਿਕਾਪੁਤ੍ਤ, ਦੇਵਦਤ੍ਤੋ ਭਿਕ੍ਖੂਨਂ ਏਵਂ ਧਮ੍ਮਂ ਦੇਸੇਤਿ – ‘ਯਤੋ ਖੋ, ਆਵੁਸੋ, ਭਿਕ੍ਖੁਨੋ ਚੇਤਸਾ ਚਿਤਂ ਹੋਤਿ, ਤਸ੍ਸੇਤਂ ਭਿਕ੍ਖੁਨੋ ਕਲ੍ਲਂ ਵੇਯ੍ਯਾਕਰਣਾਯ – ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਮੀ’ਤਿ. ਏਵਞ੍ਚ ਖੋ, ਆਵੁਸੋ, ਚਨ੍ਦਿਕਾਪੁਤ੍ਤ, ਦੇਵਦਤ੍ਤੋ ਭਿਕ੍ਖੂਨਂ ਧਮ੍ਮਂ ਦੇਸੇਤਿ – ‘ਯਤੋ ਖੋ, ਆਵੁਸੋ, ਭਿਕ੍ਖੁਨੋ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ, ਤਸ੍ਸੇਤਂ ਭਿਕ੍ਖੁਨੋ ਕਲ੍ਲਂ ਵੇਯ੍ਯਾਕਰਣਾਯ – ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਮੀ’’’ਤਿ.

ਦੁਤਿਯਮ੍ਪਿ ਖੋ ਆਯਸ੍ਮਾ ਚਨ੍ਦਿਕਾਪੁਤ੍ਤੋ ਭਿਕ੍ਖੂ ਆਮਨ੍ਤੇਸਿ – ‘‘ਦੇਵਦਤ੍ਤੋ, ਆਵੁਸੋ, ਭਿਕ੍ਖੂਨਂ ਏਵਂ ਧਮ੍ਮਂ ਦੇਸੇਤਿ – ‘ਯਤੋ ਖੋ, ਆਵੁਸੋ, ਭਿਕ੍ਖੁਨੋ ਚੇਤਸਾ ਚਿਤਂ ਹੋਤਿ, ਤਸ੍ਸੇਤਂ ਭਿਕ੍ਖੁਨੋ ਕਲ੍ਲਂ ਵੇਯ੍ਯਾਕਰਣਾਯ – ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਮੀ’’’ਤਿ. ਦੁਤਿਯਮ੍ਪਿ ਖੋ ਆਯਸ੍ਮਾ ਸਾਰਿਪੁਤ੍ਤੋ ਆਯਸ੍ਮਨ੍ਤਂ ਚਨ੍ਦਿਕਾਪੁਤ੍ਤਂ ਏਤਦਵੋਚ – ‘‘ਨ ਖੋ, ਆਵੁਸੋ ਚਨ੍ਦਿਕਾਪੁਤ੍ਤ, ਦੇਵਦਤ੍ਤੋ ਭਿਕ੍ਖੂਨਂ ਏਵਂ ਧਮ੍ਮਂ ਦੇਸੇਤਿ – ‘ਯਤੋ ਖੋ, ਆਵੁਸੋ, ਭਿਕ੍ਖੁਨੋ ਚੇਤਸਾ ਚਿਤਂ ਹੋਤਿ, ਤਸ੍ਸੇਤਂ ਭਿਕ੍ਖੁਨੋ ਕਲ੍ਲਂ ਵੇਯ੍ਯਾਕਰਣਾਯ – ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਮੀ’ਤਿ. ਏਵਞ੍ਚ ਖੋ, ਆਵੁਸੋ ਚਨ੍ਦਿਕਾਪੁਤ੍ਤ, ਦੇਵਦਤ੍ਤੋ ਭਿਕ੍ਖੂਨਂ ਧਮ੍ਮਂ ਦੇਸੇਤਿ – ‘ਯਤੋ ਖੋ, ਆਵੁਸੋ, ਭਿਕ੍ਖੁਨੋ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ, ਤਸ੍ਸੇਤਂ ਭਿਕ੍ਖੁਨੋ ਕਲ੍ਲਂ ਵੇਯ੍ਯਾਕਰਣਾਯ – ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਮੀ’’’ਤਿ.

ਤਤਿਯਮ੍ਪਿ ਖੋ ਆਯਸ੍ਮਾ ਚਨ੍ਦਿਕਾਪੁਤ੍ਤੋ ਭਿਕ੍ਖੂ ਆਮਨ੍ਤੇਸਿ – ‘‘ਦੇਵਦਤ੍ਤੋ, ਆਵੁਸੋ, ਭਿਕ੍ਖੂਨਂ ਏਵਂ ਧਮ੍ਮਂ ਦੇਸੇਤਿ – ‘ਯਤੋ ਖੋ, ਆਵੁਸੋ, ਭਿਕ੍ਖੁਨੋ ਚੇਤਸਾ ਚਿਤਂ ਹੋਤਿ, ਤਸ੍ਸੇਤਂ ਭਿਕ੍ਖੁਨੋ ਕਲ੍ਲਂ ਵੇਯ੍ਯਾਕਰਣਾਯ – ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਮੀ’’’ਤਿ. ਤਤਿਯਮ੍ਪਿ ਖੋ ਆਯਸ੍ਮਾ ਸਾਰਿਪੁਤ੍ਤੋ ਆਯਸ੍ਮਨ੍ਤਂ ਚਨ੍ਦਿਕਾਪੁਤ੍ਤਂ ਏਤਦਵੋਚ – ‘‘ਨ ਖੋ, ਆਵੁਸੋ ਚਨ੍ਦਿਕਾਪੁਤ੍ਤ, ਦੇਵਦਤ੍ਤੋ ਭਿਕ੍ਖੂਨਂ ਏਵਂ ਧਮ੍ਮਂ ਦੇਸੇਤਿ – ‘ਯਤੋ ਖੋ, ਆਵੁਸੋ, ਭਿਕ੍ਖੁਨੋ ਚੇਤਸਾ ਚਿਤਂ ਹੋਤਿ, ਤਸ੍ਸੇਤਂ ਭਿਕ੍ਖੁਨੋ ਕਲ੍ਲਂ ਵੇਯ੍ਯਾਕਰਣਾਯ – ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਮੀ’ਤਿ. ਏਵਞ੍ਚ ਖੋ, ਆਵੁਸੋ ਚਨ੍ਦਿਕਾਪੁਤ੍ਤ, ਦੇਵਦਤ੍ਤੋ ਭਿਕ੍ਖੂਨਂ ਧਮ੍ਮਂ ਦੇਸੇਤਿ – ‘ਯਤੋ ਖੋ, ਆਵੁਸੋ, ਭਿਕ੍ਖੁਨੋ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ, ਤਸ੍ਸੇਤਂ ਭਿਕ੍ਖੁਨੋ ਕਲ੍ਲਂ ਵੇਯ੍ਯਾਕਰਣਾਯ – ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਮੀ’’’ਤਿ.

‘‘ਕਥਞ੍ਚ, ਆਵੁਸੋ, ਭਿਕ੍ਖੁਨੋ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ? ‘ਵੀਤਰਾਗਂ ਮੇ ਚਿਤ੍ਤ’ਨ੍ਤਿ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ; ‘ਵੀਤਦੋਸਂ ਮੇ ਚਿਤ੍ਤ’ਨ੍ਤਿ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ; ‘ਵੀਤਮੋਹਂ ਮੇ ਚਿਤ੍ਤ’ਨ੍ਤਿ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ; ‘ਅਸਰਾਗਧਮ੍ਮਂ ਮੇ ਚਿਤ੍ਤ’ਨ੍ਤਿ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ; ‘ਅਸਦੋਸਧਮ੍ਮਂ ਮੇ ਚਿਤ੍ਤ’ਨ੍ਤਿ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ; ‘ਅਸਮੋਹਧਮ੍ਮਂ ਮੇ ਚਿਤ੍ਤ’ਨ੍ਤਿ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ; ‘ਅਨਾਵਤ੍ਤਿਧਮ੍ਮਂ ਮੇ ਚਿਤ੍ਤਂ ਕਾਮਭਵਾਯਾ’ਤਿ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ; ‘ਅਨਾਵਤ੍ਤਿਧਮ੍ਮਂ ਮੇ ਚਿਤ੍ਤਂ ਰੂਪਭਵਾਯਾ’ਤਿ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ; ‘ਅਨਾਵਤ੍ਤਿਧਮ੍ਮਂ ਮੇ ਚਿਤ੍ਤਂ ਅਰੂਪਭਵਾਯਾ’ਤਿ ਚੇਤਸਾ ਚਿਤ੍ਤਂ ਸੁਪਰਿਚਿਤਂ ਹੋਤਿ. ਏਵਂ ਸਮ੍ਮਾ ਵਿਮੁਤ੍ਤਚਿਤ੍ਤਸ੍ਸ ਖੋ, ਆਵੁਸੋ, ਭਿਕ੍ਖੁਨੋ ਭੁਸਾ ਚੇਪਿ ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਚਕ੍ਖੁਸ੍ਸ ਆਪਾਥਂ ਆਗਚ੍ਛਨ੍ਤਿ, ਨੇਵਸ੍ਸ ਚਿਤ੍ਤਂ ਪਰਿਯਾਦਿਯਨ੍ਤਿ; ਅਮਿਸ੍ਸੀਕਤਮੇਵਸ੍ਸ ਚਿਤ੍ਤਂ ਹੋਤਿ ਠਿਤਂ ਆਨੇਞ੍ਜਪ੍ਪਤ੍ਤਂ, ਵਯਂ ਚਸ੍ਸਾਨੁਪਸ੍ਸਤਿ.

‘‘ਸੇਯ੍ਯਥਾਪਿ, ਆਵੁਸੋ, ਸਿਲਾਯੂਪੋ ਸੋਲ਼ਸਕੁਕ੍ਕੁਕੋ. ਤਸ੍ਸਸ੍ਸੁ ਅਟ੍ਠ ਕੁਕ੍ਕੂ ਹੇਟ੍ਠਾ ਨੇਮਙ੍ਗਮਾ, ਅਟ੍ਠ ਕੁਕ੍ਕੂ ਉਪਰਿ ਨੇਮਸ੍ਸ. ਅਥ ਪੁਰਤ੍ਥਿਮਾਯ ਚੇਪਿ ਦਿਸਾਯ ਆਗਚ੍ਛੇਯ੍ਯ ਭੁਸਾ ਵਾਤਵੁਟ੍ਠਿ, ਨੇਵ ਨਂ ਸਙ੍ਕਮ੍ਪੇਯ੍ਯ ਨ ਸਮ੍ਪਵੇਧੇਯ੍ਯ; ਅਥ ਪਚ੍ਛਿਮਾਯ… ਅਥ ਉਤ੍ਤਰਾਯ… ਅਥ ਦਕ੍ਖਿਣਾਯ ਚੇਪਿ ਦਿਸਾਯ ਆਗਚ੍ਛੇਯ੍ਯ ਭੁਸਾ ਵਾਤਵੁਟ੍ਠਿ, ਨੇਵ ਨਂ ਸਙ੍ਕਮ੍ਪੇਯ੍ਯ ਨ ਸਮ੍ਪਵੇਧੇਯ੍ਯ. ਤਂ ਕਿਸ੍ਸ ਹੇਤੁ? ਗਮ੍ਭੀਰਤ੍ਤਾ, ਆਵੁਸੋ, ਨੇਮਸ੍ਸ, ਸੁਨਿਖਾਤਤ੍ਤਾ ਸਿਲਾਯੂਪਸ੍ਸ. ਏਵਮੇਵਂ ਖੋ, ਆਵੁਸੋ, ਸਮ੍ਮਾ ਵਿਮੁਤ੍ਤਚਿਤ੍ਤਸ੍ਸ ਭਿਕ੍ਖੁਨੋ ਭੁਸਾ ਚੇਪਿ ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਚਕ੍ਖੁਸ੍ਸ ਆਪਾਥਂ ਆਗਚ੍ਛਨ੍ਤਿ, ਨੇਵਸ੍ਸ ਚਿਤ੍ਤਂ ਪਰਿਯਾਦਿਯਨ੍ਤਿ; ਅਮਿਸ੍ਸੀਕਤਮੇਵਸ੍ਸ ਚਿਤ੍ਤਂ ਹੋਤਿ ਠਿਤਂ ਆਨੇਞ੍ਜਪ੍ਪਤ੍ਤਂ, ਵਯਂ ਚਸ੍ਸਾਨੁਪਸ੍ਸਤਿ.

‘‘ਭੁਸਾ ਚੇਪਿ ਸੋਤਵਿਞ੍ਞੇਯ੍ਯਾ ਸਦ੍ਦਾ… ਘਾਨਵਿਞ੍ਞੇਯ੍ਯਾ ਗਨ੍ਧਾ… ਜਿਵ੍ਹਾਵਿਞ੍ਞੇਯ੍ਯਾ ਰਸਾ… ਕਾਯਵਿਞ੍ਞੇਯ੍ਯਾ ਫੋਟ੍ਠਬ੍ਬਾ… ਮਨੋਵਿਞ੍ਞੇਯ੍ਯਾ ਧਮ੍ਮਾ ਮਨਸ੍ਸ ਆਪਾਥਂ ਆਗਚ੍ਛਨ੍ਤਿ, ਨੇਵਸ੍ਸ ਚਿਤ੍ਤਂ ਪਰਿਯਾਦਿਯਨ੍ਤਿ; ਅਮਿਸ੍ਸੀਕਤਮੇਵਸ੍ਸ ਚਿਤ੍ਤਂ ਹੋਤਿ ਠਿਤਂ ਆਨੇਞ੍ਜਪ੍ਪਤ੍ਤਂ, ਵਯਂ ਚਸ੍ਸਾਨੁਪਸ੍ਸਤੀ’’ਤਿ. ਛਟ੍ਠਂ.