੪. ਗਯਾਸੀਸਸੁਤ੍ਤਂ

੬੪. ਏਕਂ ਸਮਯਂ ਭਗਵਾ ਗਯਾਯਂ ਵਿਹਰਤਿ ਗਯਾਸੀਸੇ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ…ਪੇ… ‘‘ਪੁਬ੍ਬਾਹਂ, ਭਿਕ੍ਖਵੇ, ਸਮ੍ਬੋਧਾ ਅਨਭਿਸਮ੍ਬੁਦ੍ਧੋ ਬੋਧਿਸਤ੍ਤੋਵ ਸਮਾਨੋ ਓਭਾਸਞ੍ਞੇਵ ਖੋ ਸਞ੍ਜਾਨਾਮਿ, ਨੋ ਚ ਰੂਪਾਨਿ ਪਸ੍ਸਾਮਿ’’.

‘‘ਤਸ੍ਸ ਮਯ੍ਹਂ, ਭਿਕ੍ਖਵੇ, ਏਤਦਹੋਸਿ – ‘ਸਚੇ ਖੋ ਅਹਂ ਓਭਾਸਞ੍ਚੇਵ ਸਞ੍ਜਾਨੇਯ੍ਯਂ ਰੂਪਾਨਿ ਚ ਪਸ੍ਸੇਯ੍ਯਂ; ਏਵਂ ਮੇ ਇਦਂ ਞਾਣਦਸ੍ਸਨਂ ਪਰਿਸੁਦ੍ਧਤਰਂ ਅਸ੍ਸਾ’’’ਤਿ.

‘‘ਸੋ ਖੋ ਅਹਂ, ਭਿਕ੍ਖਵੇ, ਅਪਰੇਨ ਸਮਯੇਨ ਅਪ੍ਪਮਤ੍ਤੋ ਆਤਾਪੀ ਪਹਿਤਤ੍ਤੋ ਵਿਹਰਨ੍ਤੋ ਓਭਾਸਞ੍ਚੇਵ ਸਞ੍ਜਾਨਾਮਿ, ਰੂਪਾਨਿ ਚ ਪਸ੍ਸਾਮਿ; ਨੋ ਚ ਖੋ ਤਾਹਿ ਦੇਵਤਾਹਿ ਸਦ੍ਧਿਂ ਸਨ੍ਤਿਟ੍ਠਾਮਿ ਸਲ੍ਲਪਾਮਿ ਸਾਕਚ੍ਛਂ ਸਮਾਪਜ੍ਜਾਮਿ.

‘‘ਤਸ੍ਸ ਮਯ੍ਹਂ, ਭਿਕ੍ਖਵੇ, ਏਤਦਹੋਸਿ – ‘ਸਚੇ ਖੋ ਅਹਂ ਓਭਾਸਞ੍ਚੇਵ ਸਞ੍ਜਾਨੇਯ੍ਯਂ, ਰੂਪਾਨਿ ਚ ਪਸ੍ਸੇਯ੍ਯਂ, ਤਾਹਿ ਚ ਦੇਵਤਾਹਿ ਸਦ੍ਧਿਂ ਸਨ੍ਤਿਟ੍ਠੇਯ੍ਯਂ ਸਲ੍ਲਪੇਯ੍ਯਂ ਸਾਕਚ੍ਛਂ ਸਮਾਪਜ੍ਜੇਯ੍ਯਂ; ਏਵਂ ਮੇ ਇਦਂ ਞਾਣਦਸ੍ਸਨਂ ਪਰਿਸੁਦ੍ਧਤਰਂ ਅਸ੍ਸਾ’’’ਤਿ.

‘‘ਸੋ ਖੋ ਅਹਂ, ਭਿਕ੍ਖਵੇ, ਅਪਰੇਨ ਸਮਯੇਨ ਅਪ੍ਪਮਤ੍ਤੋ ਆਤਾਪੀ ਪਹਿਤਤ੍ਤੋ ਵਿਹਰਨ੍ਤੋ ਓਭਾਸਞ੍ਚੇਵ ਸਞ੍ਜਾਨਾਮਿ, ਰੂਪਾਨਿ ਚ ਪਸ੍ਸਾਮਿ, ਤਾਹਿ ਚ ਦੇਵਤਾਹਿ ਸਦ੍ਧਿਂ ਸਨ੍ਤਿਟ੍ਠਾਮਿ ਸਲ੍ਲਪਾਮਿ ਸਾਕਚ੍ਛਂ ਸਮਾਪਜ੍ਜਾਮਿ; ਨੋ ਚ ਖੋ ਤਾ ਦੇਵਤਾ ਜਾਨਾਮਿ – ਇਮਾ ਦੇਵਤਾ ਅਮੁਕਮ੍ਹਾ ਵਾ ਅਮੁਕਮ੍ਹਾ ਵਾ ਦੇਵਨਿਕਾਯਾਤਿ.

‘‘ਤਸ੍ਸ ਮਯ੍ਹਂ, ਭਿਕ੍ਖਵੇ, ਏਤਦਹੋਸਿ – ‘ਸਚੇ ਖੋ ਅਹਂ ਓਭਾਸਞ੍ਚੇਵ ਸਞ੍ਜਾਨੇਯ੍ਯਂ, ਰੂਪਾਨਿ ਚ ਪਸ੍ਸੇਯ੍ਯਂ, ਤਾਹਿ ਚ ਦੇਵਤਾਹਿ ਸਦ੍ਧਿਂ ਸਨ੍ਤਿਟ੍ਠੇਯ੍ਯਂ ਸਲ੍ਲਪੇਯ੍ਯਂ ਸਾਕਚ੍ਛਂ ਸਮਾਪਜ੍ਜੇਯ੍ਯਂ, ਤਾ ਚ ਦੇਵਤਾ ਜਾਨੇਯ੍ਯਂ – ਇਮਾ ਦੇਵਤਾ ਅਮੁਕਮ੍ਹਾ ਵਾ ਅਮੁਕਮ੍ਹਾ ਵਾ ਦੇਵਨਿਕਾਯਾ’ਤਿ; ਏਵਂ ਮੇ ਇਦਂ ਞਾਣਦਸ੍ਸਨਂ ਪਰਿਸੁਦ੍ਧਤਰਂ ਅਸ੍ਸਾ’’’ਤਿ.

‘‘ਸੋ ਖੋ ਅਹਂ, ਭਿਕ੍ਖਵੇ, ਅਪਰੇਨ ਸਮਯੇਨ ਅਪ੍ਪਮਤ੍ਤੋ ਆਤਾਪੀ ਪਹਿਤਤ੍ਤੋ ਵਿਹਰਨ੍ਤੋ ਓਭਾਸਞ੍ਚੇਵ ਸਞ੍ਜਾਨਾਮਿ, ਰੂਪਾਨਿ ਚ ਪਸ੍ਸਾਮਿ, ਤਾਹਿ ਚ ਦੇਵਤਾਹਿ ਸਦ੍ਧਿਂ ਸਨ੍ਤਿਟ੍ਠਾਮਿ ਸਲ੍ਲਪਾਮਿ ਸਾਕਚ੍ਛਂ ਸਮਾਪਜ੍ਜਾਮਿ, ਤਾ ਚ ਦੇਵਤਾ ਜਾਨਾਮਿ – ‘ਇਮਾ ਦੇਵਤਾ ਅਮੁਕਮ੍ਹਾ ਵਾ ਅਮੁਕਮ੍ਹਾ ਵਾ ਦੇਵਨਿਕਾਯਾ’ਤਿ; ਨੋ ਚ ਖੋ ਤਾ ਦੇਵਤਾ ਜਾਨਾਮਿ – ‘ਇਮਾ ਦੇਵਤਾ ਇਮਸ੍ਸ ਕਮ੍ਮਸ੍ਸ ਵਿਪਾਕੇਨ ਇਤੋ ਚੁਤਾ ਤਤ੍ਥ ਉਪਪਨ੍ਨਾ’ਤਿ…ਪੇ… ਤਾ ਚ ਦੇਵਤਾ ਜਾਨਾਮਿ – ‘ਇਮਾ ਦੇਵਤਾ ਇਮਸ੍ਸ ਕਮ੍ਮਸ੍ਸ ਵਿਪਾਕੇਨ ਇਤੋ ਚੁਤਾ ਤਤ੍ਥ ਉਪਪਨ੍ਨਾ’ਤਿ; ਨੋ ਚ ਖੋ ਤਾ ਦੇਵਤਾ ਜਾਨਾਮਿ – ‘ਇਮਾ ਦੇਵਤਾ ਇਮਸ੍ਸ ਕਮ੍ਮਸ੍ਸ ਵਿਪਾਕੇਨ ਏਵਮਾਹਾਰਾ ਏਵਂਸੁਖਦੁਕ੍ਖਪ੍ਪਟਿਸਂਵੇਦਿਨਿਯੋ’ਤਿ …ਪੇ… ਤਾ ਚ ਦੇਵਤਾ ਜਾਨਾਮਿ – ‘ਇਮਾ ਦੇਵਤਾ ਇਮਸ੍ਸ ਕਮ੍ਮਸ੍ਸ ਵਿਪਾਕੇਨ ਏਵਮਾਹਾਰਾ ਏਵਂਸੁਖਦੁਕ੍ਖਪ੍ਪਟਿਸਂਵੇਦਿਨਿਯੋ’ਤਿ; ਨੋ ਚ ਖੋ ਤਾ ਦੇਵਤਾ ਜਾਨਾਮਿ – ‘ਇਮਾ ਦੇਵਤਾ ਏਵਂਦੀਘਾਯੁਕਾ ਏਵਂਚਿਰਟ੍ਠਿਤਿਕਾ’ਤਿ…ਪੇ… ਤਾ ਚ ਦੇਵਤਾ ਜਾਨਾਮਿ – ‘ਇਮਾ ਦੇਵਤਾ ਏਵਂਦੀਘਾਯੁਕਾ ਏਵਂਚਿਰਟ੍ਠਿਤਿਕਾ’ਤਿ; ਨੋ ਚ ਖੋ ਤਾ ਦੇਵਤਾ ਜਾਨਾਮਿ ਯਦਿ ਵਾ ਮੇ ਇਮਾਹਿ ਦੇਵਤਾਹਿ ਸਦ੍ਧਿਂ ਸਨ੍ਨਿਵੁਤ੍ਥਪੁਬ੍ਬਂ ਯਦਿ ਵਾ ਨ ਸਨ੍ਨਿਵੁਤ੍ਥਪੁਬ੍ਬਨ੍ਤਿ.

‘‘ਤਸ੍ਸ ਮਯ੍ਹਂ, ਭਿਕ੍ਖਵੇ, ਏਤਦਹੋਸਿ – ‘ਸਚੇ ਖੋ ਅਹਂ ਓਭਾਸਞ੍ਚੇਵ ਸਞ੍ਜਾਨੇਯ੍ਯਂ, ਰੂਪਾਨਿ ਚ ਪਸ੍ਸੇਯ੍ਯਂ, ਤਾਹਿ ਚ ਦੇਵਤਾਹਿ ਸਦ੍ਧਿਂ ਸਨ੍ਤਿਟ੍ਠੇਯ੍ਯਂ ਸਲ੍ਲਪੇਯ੍ਯਂ ਸਾਕਚ੍ਛਂ ਸਮਾਪਜ੍ਜੇਯ੍ਯਂ, ਤਾ ਚ ਦੇਵਤਾ ਜਾਨੇਯ੍ਯਂ – ‘ਇਮਾ ਦੇਵਤਾ ਅਮੁਕਮ੍ਹਾ ਵਾ ਅਮੁਕਮ੍ਹਾ ਵਾ ਦੇਵਨਿਕਾਯਾ’ਤਿ, ਤਾ ਚ ਦੇਵਤਾ ਜਾਨੇਯ੍ਯਂ – ‘ਇਮਾ ਦੇਵਤਾ ਇਮਸ੍ਸ ਕਮ੍ਮਸ੍ਸ ਵਿਪਾਕੇਨ ਇਤੋ ਚੁਤਾ ਤਤ੍ਥ ਉਪਪਨ੍ਨਾ’ਤਿ, ਤਾ ਚ ਦੇਵਤਾ ਜਾਨੇਯ੍ਯਂ – ‘ਇਮਾ ਦੇਵਤਾ ਏਵਮਾਹਾਰਾ ਏਵਂਸੁਖਦੁਕ੍ਖਪ੍ਪਟਿਸਂਵੇਦਿਨਿਯੋ’ਤਿ, ਤਾ ਚ ਦੇਵਤਾ ਜਾਨੇਯ੍ਯਂ – ‘ਇਮਾ ਦੇਵਤਾ ਏਵਂਦੀਘਾਯੁਕਾ ਏਵਂਚਿਰਟ੍ਠਿਤਿਕਾ’ਤਿ, ਤਾ ਚ ਦੇਵਤਾ ਜਾਨੇਯ੍ਯਂ ਯਦਿ ਵਾ ਮੇ ਇਮਾਹਿ ਦੇਵਤਾਹਿ ਸਦ੍ਧਿਂ ਸਨ੍ਨਿਵੁਤ੍ਥਪੁਬ੍ਬਂ ਯਦਿ ਵਾ ਨ ਸਨ੍ਨਿਵੁਤ੍ਥਪੁਬ੍ਬਨ੍ਤਿ; ਏਵਂ ਮੇ ਇਦਂ ਞਾਣਦਸ੍ਸਨਂ ਪਰਿਸੁਦ੍ਧਤਰਂ ਅਸ੍ਸਾ’’’ਤਿ.

‘‘ਸੋ ਖੋ ਅਹਂ, ਭਿਕ੍ਖਵੇ, ਅਪਰੇਨ ਸਮਯੇਨ ਅਪ੍ਪਮਤ੍ਤੋ ਆਤਾਪੀ ਪਹਿਤਤ੍ਤੋ ਵਿਹਰਨ੍ਤੋ ਓਭਾਸਞ੍ਚੇਵ ਸਞ੍ਜਾਨਾਮਿ, ਰੂਪਾਨਿ ਚ ਪਸ੍ਸਾਮਿ, ਤਾਹਿ ਚ ਦੇਵਤਾਹਿ ਸਦ੍ਧਿਂ ਸਨ੍ਤਿਟ੍ਠਾਮਿ ਸਲ੍ਲਪਾਮਿ ਸਾਕਚ੍ਛਂ ਸਮਾਪਜ੍ਜਾਮਿ, ਤਾ ਚ ਦੇਵਤਾ ਜਾਨਾਮਿ – ‘ਇਮਾ ਦੇਵਤਾ ਅਮੁਕਮ੍ਹਾ ਵਾ ਅਮੁਕਮ੍ਹਾ ਵਾ ਦੇਵਨਿਕਾਯਾ’ਤਿ, ਤਾ ਚ ਦੇਵਤਾ ਜਾਨਾਮਿ – ‘ਇਮਾ ਦੇਵਤਾ ਇਮਸ੍ਸ ਕਮ੍ਮਸ੍ਸ ਵਿਪਾਕੇਨ ਇਤੋ ਚੁਤਾ ਤਤ੍ਥ ਉਪਪਨ੍ਨਾ’ਤਿ, ਤਾ ਚ ਦੇਵਤਾ ਜਾਨਾਮਿ – ‘ਇਮਾ ਦੇਵਤਾ ਏਵਮਾਹਾਰਾ ਏਵਂਸੁਖਦੁਕ੍ਖਪ੍ਪਟਿਸਂਵੇਦਿਨਿਯੋ’ਤਿ, ਤਾ ਚ ਦੇਵਤਾ ਜਾਨਾਮਿ – ‘ਇਮਾ ਦੇਵਤਾ ਏਵਂਦੀਘਾਯੁਕਾ ਏਵਂਚਿਰਟ੍ਠਿਤਿਕਾ’ਤਿ, ਤਾ ਚ ਦੇਵਤਾ ਜਾਨਾਮਿ ਯਦਿ ਵਾ ਮੇ ਦੇਵਤਾਹਿ ਸਦ੍ਧਿਂ ਸਨ੍ਨਿਵੁਤ੍ਥਪੁਬ੍ਬਂ ਯਦਿ ਵਾ ਨ ਸਨ੍ਨਿਵੁਤ੍ਥਪੁਬ੍ਬਨ੍ਤਿ.

‘‘ਯਾਵਕੀਵਞ੍ਚ ਮੇ, ਭਿਕ੍ਖਵੇ, ਏਵਂ ਅਟ੍ਠਪਰਿਵਟ੍ਟਂ ਅਧਿਦੇਵਞਾਣਦਸ੍ਸਨਂ ਨ ਸੁਵਿਸੁਦ੍ਧਂ ਅਹੋਸਿ, ਨੇਵ ਤਾਵਾਹਂ, ਭਿਕ੍ਖਵੇ, ‘ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ’ਤਿ [ਅਭਿਸਮ੍ਬੁਦ੍ਧੋ (ਸੀ. ਸ੍ਯਾ. ਪੀ.)] ਪਚ੍ਚਞ੍ਞਾਸਿਂ. ਯਤੋ ਚ ਖੋ ਮੇ, ਭਿਕ੍ਖਵੇ, ਏਵਂ ਅਟ੍ਠਪਰਿਵਟ੍ਟਂ ਅਧਿਦੇਵਞਾਣਦਸ੍ਸਨਂ ਸੁਵਿਸੁਦ੍ਧਂ ਅਹੋਸਿ, ਅਥਾਹਂ, ਭਿਕ੍ਖਵੇ, ‘ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ’ਤਿ ਪਚ੍ਚਞ੍ਞਾਸਿਂ; ਞਾਣਞ੍ਚ ਪਨ ਮੇ ਦਸ੍ਸਨਂ ਉਦਪਾਦਿ; ਅਕੁਪ੍ਪਾ ਮੇ ਚੇਤੋਵਿਮੁਤ੍ਤਿ [ਵਿਮੁਤ੍ਤਿ (ਕ. ਸੀ. ਕ.)]; ਅਯਮਨ੍ਤਿਮਾ ਜਾਤਿ ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ. ਚਤੁਤ੍ਥਂ.