੯. ਪਠਮਇਧਲੋਕਿਕਸੁਤ੍ਤਂ

੪੯. ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਪੁਬ੍ਬਾਰਾਮੇ ਮਿਗਾਰਮਾਤੁਪਾਸਾਦੇ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਯੇਨ ਭਗਵਾ ਤੇਨੁਪਸਙ੍ਕਮਿ…ਪੇ…. ਏਕਮਨ੍ਤਂ ਨਿਸਿਨ੍ਨਂ ਖੋ ਵਿਸਾਖਂ ਮਿਗਾਰਮਾਤਰਂ ਭਗਵਾ ਏਤਦਵੋਚ –

‘‘ਚਤੂਹਿ ਖੋ, ਵਿਸਾਖੇ, ਧਮ੍ਮੇਹਿ ਸਮਨ੍ਨਾਗਤੋ ਮਾਤੁਗਾਮੋ ਇਧਲੋਕਵਿਜਯਾਯ ਪਟਿਪਨ੍ਨੋ ਹੋਤਿ, ਅਯਂਸ ਲੋਕੋ ਆਰਦ੍ਧੋ ਹੋਤਿ. ਕਤਮੇਹਿ ਚਤੂਹਿ? ਇਧ, ਵਿਸਾਖੇ, ਮਾਤੁਗਾਮੋ ਸੁਸਂਵਿਹਿਤਕਮ੍ਮਨ੍ਤੋ ਹੋਤਿ, ਸਙ੍ਗਹਿਤਪਰਿਜਨੋ, ਭਤ੍ਤੁ ਮਨਾਪਂ ਚਰਤਿ, ਸਮ੍ਭਤਂ ਅਨੁਰਕ੍ਖਤਿ.

‘‘ਕਥਞ੍ਚ, ਵਿਸਾਖੇ, ਮਾਤੁਗਾਮੋ ਸੁਸਂਵਿਹਿਤਕਮ੍ਮਨ੍ਤੋ ਹੋਤਿ? ਇਧ, ਵਿਸਾਖੇ, ਮਾਤੁਗਾਮੋ ਯੇ ਤੇ ਭਤ੍ਤੁ ਅਬ੍ਭਨ੍ਤਰਾ ਕਮ੍ਮਨ੍ਤਾ – ਉਣ੍ਣਾਤਿ ਵਾ ਕਪ੍ਪਾਸਾਤਿ ਵਾ – ਤਤ੍ਥ ਦਕ੍ਖਾ ਹੋਤਿ ਅਨਲਸਾ ਤਤ੍ਰੁਪਾਯਾਯ ਵੀਮਂਸਾਯ ਸਮਨ੍ਨਾਗਤਾ ਅਲਂ ਕਾਤੁਂ ਅਲਂ ਸਂਵਿਧਾਤੁਂ. ਏਵਂ ਖੋ, ਵਿਸਾਖੇ, ਮਾਤੁਗਾਮੋ ਸੁਸਂਵਿਹਿਤਕਮ੍ਮਨ੍ਤੋ ਹੋਤਿ.

‘‘ਕਥਞ੍ਚ, ਵਿਸਾਖੇ, ਮਾਤੁਗਾਮੋ ਸਙ੍ਗਹਿਤਪਰਿਜਨੋ ਹੋਤਿ? ਇਧ, ਵਿਸਾਖੇ, ਮਾਤੁਗਾਮੋ ਯੋ ਸੋ ਭਤ੍ਤੁ ਅਬ੍ਭਨ੍ਤਰੋ ਅਨ੍ਤੋਜਨੋ – ਦਾਸਾਤਿ ਵਾ ਪੇਸ੍ਸਾਤਿ ਵਾ ਕਮ੍ਮਕਰਾਤਿ ਵਾ – ਤੇਸਂ ਕਤਞ੍ਚ ਕਤਤੋ ਜਾਨਾਤਿ ਅਕਤਞ੍ਚ ਅਕਤਤੋ ਜਾਨਾਤਿ, ਗਿਲਾਨਕਾਨਞ੍ਚ ਬਲਾਬਲਂ ਜਾਨਾਤਿ ਖਾਦਨੀਯਂ ਭੋਜਨੀਯਞ੍ਚਸ੍ਸ ਪਚ੍ਚਂਸੇਨ ਸਂਵਿਭਜਤਿ. ਏਵਂ ਖੋ, ਵਿਸਾਖੇ, ਮਾਤੁਗਾਮੋ ਸਙ੍ਗਹਿਤਪਰਿਜਨੋ ਹੋਤਿ.

‘‘ਕਥਞ੍ਚ, ਵਿਸਾਖੇ, ਮਾਤੁਗਾਮੋ ਭਤ੍ਤੁ ਮਨਾਪਂ ਚਰਤਿ? ਇਧ, ਵਿਸਾਖੇ, ਮਾਤੁਗਾਮੋ ਯਂ ਭਤ੍ਤੁ ਅਮਨਾਪਸਙ੍ਖਾਤਂ ਤਂ ਜੀਵਿਤਹੇਤੁਪਿ ਨ ਅਜ੍ਝਾਚਰਤਿ. ਏਵਂ ਖੋ, ਵਿਸਾਖੇ, ਮਾਤੁਗਾਮੋ ਭਤ੍ਤੁ ਮਨਾਪਂ ਚਰਤਿ.

‘‘ਕਥਞ੍ਚ, ਵਿਸਾਖੇ, ਮਾਤੁਗਾਮੋ ਸਮ੍ਭਤਂ ਅਨੁਰਕ੍ਖਤਿ? ਇਧ, ਵਿਸਾਖੇ, ਮਾਤੁਗਾਮੋ ਯਂ ਭਤ੍ਤਾ ਆਹਰਤਿ ਧਨਂ ਵਾ ਧਞ੍ਞਂ ਵਾ ਰਜਤਂ ਵਾ ਜਾਤਰੂਪਂ ਵਾ ਤਂ ਆਰਕ੍ਖੇਨ ਗੁਤ੍ਤਿਯਾ ਸਮ੍ਪਾਦੇਤਿ, ਤਤ੍ਥ ਚ ਹੋਤਿ ਅਧੁਤ੍ਤੀ ਅਥੇਨੀ ਅਸੋਣ੍ਡੀ ਅਵਿਨਾਸਿਕਾ. ਏਵਂ ਖੋ, ਵਿਸਾਖੇ, ਮਾਤੁਗਾਮੋ ਸਮ੍ਭਤਂ ਅਨੁਰਕ੍ਖਤਿ. ਇਮੇਹਿ ਖੋ, ਵਿਸਾਖੇ, ਚਤੂਹਿ ਧਮ੍ਮੇਹਿ ਸਮਨ੍ਨਾਗਤੋ ਮਾਤੁਗਾਮੋ ਇਧਲੋਕਵਿਜਯਾਯ ਪਟਿਪਨ੍ਨੋ ਹੋਤਿ, ਅਯਂਸ ਲੋਕੋ ਆਰਦ੍ਧੋ ਹੋਤਿ.

‘‘ਚਤੂਹਿ ਖੋ, ਵਿਸਾਖੇ, ਧਮ੍ਮੇਹਿ ਸਮਨ੍ਨਾਗਤੋ ਮਾਤੁਗਾਮੋ ਪਰਲੋਕਵਿਜਯਾਯ ਪਟਿਪਨ੍ਨੋ ਹੋਤਿ, ਪਰਲੋਕੋ ਆਰਦ੍ਧੋ ਹੋਤਿ. ਕਤਮੇਹਿ ਚਤੂਹਿ? ਇਧ, ਵਿਸਾਖੇ, ਮਾਤੁਗਾਮੋ ਸਦ੍ਧਾਸਮ੍ਪਨ੍ਨੋ ਹੋਤਿ, ਸੀਲਸਮ੍ਪਨ੍ਨੋ ਹੋਤਿ, ਚਾਗਸਮ੍ਪਨ੍ਨੋ ਹੋਤਿ, ਪਞ੍ਞਾਸਮ੍ਪਨ੍ਨੋ ਹੋਤਿ.

‘‘ਕਥਞ੍ਚ, ਵਿਸਾਖੇ, ਮਾਤੁਗਾਮੋ ਸਦ੍ਧਾਸਮ੍ਪਨ੍ਨੋ ਹੋਤਿ? ਇਧ, ਵਿਸਾਖੇ, ਮਾਤੁਗਾਮੋ ਸਦ੍ਧੋ ਹੋਤਿ, ਸਦ੍ਦਹਤਿ ਤਥਾਗਤਸ੍ਸ ਬੋਧਿਂ – ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’ਤਿ. ਏਵਂ ਖੋ, ਵਿਸਾਖੇ, ਮਾਤੁਗਾਮੋ ਸਦ੍ਧਾਸਮ੍ਪਨ੍ਨੋ ਹੋਤਿ.

‘‘ਕਥਞ੍ਚ, ਵਿਸਾਖੇ, ਮਾਤੁਗਾਮੋ ਸੀਲਸਮ੍ਪਨ੍ਨੋ ਹੋਤਿ? ਇਧ, ਵਿਸਾਖੇ, ਮਾਤੁਗਾਮੋ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ…ਪੇ… ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਪਟਿਵਿਰਤੋ ਹੋਤਿ. ਏਵਂ ਖੋ, ਵਿਸਾਖੇ, ਮਾਤੁਗਾਮੋ ਸੀਲਸਮ੍ਪਨ੍ਨੋ ਹੋਤਿ.

‘‘ਕਥਞ੍ਚ, ਵਿਸਾਖੇ, ਮਾਤੁਗਾਮੋ ਚਾਗਸਮ੍ਪਨ੍ਨੋ ਹੋਤਿ? ਇਧ, ਵਿਸਾਖੇ, ਮਾਤੁਗਾਮੋ ਵਿਗਤਮਲਮਚ੍ਛੇਰੇਨ ਚੇਤਸਾ ਅਗਾਰਂ ਅਜ੍ਝਾਵਸਤਿ ਮੁਤ੍ਤਚਾਗਾ ਪਯਤਪਾਣਿਨੀ ਵੋਸ੍ਸਗ੍ਗਰਤਾ ਯਾਚਯੋਗਾ ਦਾਨਸਂਵਿਭਾਗਰਤਾ. ਏਵਂ ਖੋ, ਵਿਸਾਖੇ, ਮਾਤੁਗਾਮੋ ਚਾਗਸਮ੍ਪਨ੍ਨੋ ਹੋਤਿ.

‘‘ਕਥਞ੍ਚ, ਵਿਸਾਖੇ, ਮਾਤੁਗਾਮੋ ਪਞ੍ਞਾਸਮ੍ਪਨ੍ਨੋ ਹੋਤਿ? ਇਧ, ਵਿਸਾਖੇ, ਮਾਤੁਗਾਮੋ ਪਞ੍ਞਵਾ ਹੋਤਿ…ਪੇ… ਏਵਂ ਖੋ, ਵਿਸਾਖੇ, ਮਾਤੁਗਾਮੋ ਪਞ੍ਞਾਸਮ੍ਪਨ੍ਨੋ ਹੋਤਿ. ਇਮੇਹਿ ਖੋ, ਵਿਸਾਖੇ, ਚਤੂਹਿ ਧਮ੍ਮੇਹਿ ਸਮਨ੍ਨਾਗਤੋ ਮਾਤੁਗਾਮੋ ਪਰਲੋਕਵਿਜਯਾਯ ਪਟਿਪਨ੍ਨੋ ਹੋਤਿ, ਪਰਲੋਕੋ ਆਰਦ੍ਧੋ ਹੋਤੀ’’ਤਿ.

‘‘ਸੁਸਂਵਿਹਿਤਕਮ੍ਮਨ੍ਤਾ, ਸਙ੍ਗਹਿਤਪਰਿਜ੍ਜਨਾ;

ਭਤ੍ਤੁ ਮਨਾਪਂ ਚਰਤਿ, ਸਮ੍ਭਤਂ ਅਨੁਰਕ੍ਖਤਿ.

‘‘ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਵਦਞ੍ਞੂ ਵੀਤਮਚ੍ਛਰਾ;

ਨਿਚ੍ਚਂ ਮਗ੍ਗਂ ਵਿਸੋਧੇਤਿ, ਸੋਤ੍ਥਾਨਂ ਸਮ੍ਪਰਾਯਿਕਂ.

‘‘ਇਚ੍ਚੇਤੇ ਅਟ੍ਠ ਧਮ੍ਮਾ ਚ, ਯਸ੍ਸਾ ਵਿਜ੍ਜਨ੍ਤਿ ਨਾਰਿਯਾ;

ਤਮ੍ਪਿ ਸੀਲਵਤਿਂ ਆਹੁ, ਧਮ੍ਮਟ੍ਠਂ ਸਚ੍ਚਵਾਦਿਨਿਂ.

‘‘ਸੋਲ਼ਸਾਕਾਰਸਮ੍ਪਨ੍ਨਾ, ਅਟ੍ਠਙ੍ਗਸੁਸਮਾਗਤਾ;

ਤਾਦਿਸੀ ਸੀਲਵਤੀ ਉਪਾਸਿਕਾ;

ਉਪਪਜ੍ਜਤਿ ਦੇਵਲੋਕਂ ਮਨਾਪ’’ਨ੍ਤਿ. ਨਵਮਂ;