੩. ਅਸ੍ਸਾਜਾਨੀਯਸੁਤ੍ਤਂ

੧੩. ‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਰਞ੍ਞੋ ਭਦ੍ਦੋ ਅਸ੍ਸਾਜਾਨੀਯੋ ਰਾਜਾਰਹੋ ਹੋਤਿ ਰਾਜਭੋਗ੍ਗੋ, ਰਞ੍ਞੋ ਅਙ੍ਗਨ੍ਤੇਵ ਸਙ੍ਖਂ ਗਚ੍ਛਤਿ. ਕਤਮੇਹਿ ਅਟ੍ਠਹਿ? ਇਧ, ਭਿਕ੍ਖਵੇ, ਰਞ੍ਞੋ ਭਦ੍ਦੋ ਅਸ੍ਸਾਜਾਨੀਯੋ ਉਭਤੋ ਸੁਜਾਤੋ ਹੋਤਿ – ਮਾਤਿਤੋ ਚ ਪਿਤਿਤੋ ਚ. ਯਸ੍ਸਂ ਦਿਸਾਯਂ ਅਞ੍ਞੇਪਿ ਭਦ੍ਦਾ ਅਸ੍ਸਾਜਾਨੀਯਾ ਜਾਯਨ੍ਤਿ, ਤਸ੍ਸਂ ਦਿਸਾਯਂ ਜਾਤੋ ਹੋਤਿ. ਯਂ ਖੋ ਪਨਸ੍ਸ ਭੋਜਨਂ ਦੇਨ੍ਤਿ – ਅਲ੍ਲਂ ਵਾ ਸੁਕ੍ਖਂ ਵਾ – ਤਂ ਸਕ੍ਕਚ੍ਚਂਯੇਵ ਪਰਿਭੁਞ੍ਜਤਿ ਅਵਿਕਿਰਨ੍ਤੋ. ਜੇਗੁਚ੍ਛੀ ਹੋਤਿ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਅਭਿਨਿਸੀਦਿਤੁਂ ਵਾ ਅਭਿਨਿਪਜ੍ਜਿਤੁਂ ਵਾ. ਸੋਰਤੋ ਹੋਤਿ ਸੁਖਸਂਵਾਸੋ, ਨ ਚ ਅਞ੍ਞੇ ਅਸ੍ਸੇ ਉਬ੍ਬੇਜੇਤਾ. ਯਾਨਿ ਖੋ ਪਨਸ੍ਸ ਹੋਨ੍ਤਿ [ਯਾਨਿ ਖੋ ਪਨਸ੍ਸ ਤਾਨਿ (ਸ੍ਯਾ.)] ਸਾਠੇਯ੍ਯਾਨਿ ਕੂਟੇਯ੍ਯਾਨਿ ਜਿਮ੍ਹੇਯ੍ਯਾਨਿ ਵਙ੍ਕੇਯ੍ਯਾਨਿ, ਤਾਨਿ ਯਥਾਭੂਤਂ ਸਾਰਥਿਸ੍ਸ ਆਵਿਕਤ੍ਤਾ ਹੋਤਿ. ਤੇਸਮਸ੍ਸ ਸਾਰਥਿ ਅਭਿਨਿਮ੍ਮਦਨਾਯ ਵਾਯਮਤਿ. ਵਾਹੀ ਖੋ ਪਨ ਹੋਤਿ. ‘ਕਾਮਞ੍ਞੇ ਅਸ੍ਸਾ ਵਹਨ੍ਤੁ ਵਾ ਮਾ ਵਾ, ਅਹਮੇਤ੍ਥ ਵਹਿਸ੍ਸਾਮੀ’ਤਿ ਚਿਤ੍ਤਂ ਉਪ੍ਪਾਦੇਤਿ. ਗਚ੍ਛਨ੍ਤੋ ਖੋ ਪਨ ਉਜੁਮਗ੍ਗੇਨੇਵ ਗਚ੍ਛਤਿ. ਥਾਮਵਾ ਹੋਤਿ ਯਾਵ ਜੀਵਿਤਮਰਣਪਰਿਯਾਦਾਨਾ ਥਾਮਂ ਉਪਦਂਸੇਤਾ. ਇਮੇਹਿ ਖੋ, ਭਿਕ੍ਖਵੇ, ਅਟ੍ਠਹਿ ਅਙ੍ਗੇਹਿ ਸਮਨ੍ਨਾਗਤੋ ਰਞ੍ਞੋ ਭਦ੍ਦੋ ਅਸ੍ਸਾਜਾਨੀਯੋ ਰਾਜਾਰਹੋ ਹੋਤਿ ਰਾਜਭੋਗ੍ਗੋ, ਰਞ੍ਞੋ ਅਙ੍ਗਨ੍ਤੇਵ ਸਙ੍ਖਂ ਗਚ੍ਛਤਿ.

‘‘ਏਵਮੇਵਂ ਖੋ, ਭਿਕ੍ਖਵੇ, ਅਟ੍ਠਹਿ ਧਮ੍ਮੇਹਿ ਸਮਨ੍ਨਾਗਤੋ ਭਿਕ੍ਖੁ ਆਹੁਨੇਯ੍ਯੋ ਹੋਤਿ…ਪੇ… ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸ. ਕਤਮੇਹਿ ਅਟ੍ਠਹਿ? ਇਧ, ਭਿਕ੍ਖਵੇ, ਭਿਕ੍ਖੁ ਸੀਲਵਾ ਹੋਤਿ, ਪਾਤਿਮੋਕ੍ਖਸਂਵਰਸਂਵੁਤੋ ਵਿਹਰਤਿ ਆਚਾਰਗੋਚਰਸਮ੍ਪਨ੍ਨੋ ਅਣੁਮਤ੍ਤੇਸੁ ਵਜ੍ਜੇਸੁ ਭਯਦਸ੍ਸਾਵੀ, ਸਮਾਦਾਯ ਸਿਕ੍ਖਤਿ ਸਿਕ੍ਖਾਪਦੇਸੁ. ਯਂ ਖੋ ਪਨਸ੍ਸ ਭੋਜਨਂ ਦੇਨ੍ਤਿ – ਲੂਖਂ ਵਾ ਪਣੀਤਂ ਵਾ – ਤਂ ਸਕ੍ਕਚ੍ਚਂਯੇਵ ਪਰਿਭੁਞ੍ਜਤਿ ਅਵਿਹਞ੍ਞਮਾਨੋ. ਜੇਗੁਚ੍ਛੀ ਹੋਤਿ ਕਾਯਦੁਚ੍ਚਰਿਤੇਨ ਵਚੀਦੁਚ੍ਚਰਿਤੇਨ ਮਨੋਦੁਚ੍ਚਰਿਤੇਨ; ਜੇਗੁਚ੍ਛੀ ਹੋਤਿ ਅਨੇਕਵਿਹਿਤਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਸਮਾਪਤ੍ਤਿਯਾ. ਸੋਰਤੋ ਹੋਤਿ ਸੁਖਸਂਵਾਸੋ, ਨ ਅਞ੍ਞੇ ਭਿਕ੍ਖੂ ਉਬ੍ਬੇਜੇਤਾ. ਯਾਨਿ ਖੋ ਪਨਸ੍ਸ ਹੋਨ੍ਤਿ ਸਾਠੇਯ੍ਯਾਨਿ ਕੂਟੇਯ੍ਯਾਨਿ ਜਿਮ੍ਹੇਯ੍ਯਾਨਿ ਵਙ੍ਕੇਯ੍ਯਾਨਿ, ਤਾਨਿ ਯਥਾਭੂਤਂ ਆਵਿਕਤ੍ਤਾ ਹੋਤਿ ਸਤ੍ਥਰਿ ਵਾ ਵਿਞ੍ਞੂਸੁ ਵਾ ਸਬ੍ਰਹ੍ਮਚਾਰੀਸੁ. ਤੇਸਮਸ੍ਸ ਸਤ੍ਥਾ ਵਾ ਵਿਞ੍ਞੂ ਵਾ ਸਬ੍ਰਹ੍ਮਚਾਰੀ ਅਭਿਨਿਮ੍ਮਦਨਾਯ ਵਾਯਮਤਿ. ਸਿਕ੍ਖਿਤਾ ਖੋ ਪਨ ਹੋਤਿ. ‘ਕਾਮਞ੍ਞੇ ਭਿਕ੍ਖੂ ਸਿਕ੍ਖਨ੍ਤੁ ਵਾ ਮਾ ਵਾ, ਅਹਮੇਤ੍ਥ ਸਿਕ੍ਖਿਸ੍ਸਾਮੀ’ਤਿ ਚਿਤ੍ਤਂ ਉਪ੍ਪਾਦੇਤਿ. ਗਚ੍ਛਨ੍ਤੋ ਖੋ ਪਨ ਉਜੁਮਗ੍ਗੇਨੇਵ ਗਚ੍ਛਤਿ; ਤਤ੍ਰਾਯਂ ਉਜੁਮਗ੍ਗੋ, ਸੇਯ੍ਯਥਿਦਂ – ਸਮ੍ਮਾਦਿਟ੍ਠਿ…ਪੇ… ਸਮ੍ਮਾਸਮਾਧਿ. ਆਰਦ੍ਧਵੀਰਿਯੋ ਵਿਹਰਤਿ – ‘ਕਾਮਂ ਤਚੋ ਚ ਨ੍ਹਾਰੁ [ਨਹਾਰੁ (ਸੀ. ਸ੍ਯਾ. ਕਂ. ਪੀ.)] ਚ ਅਟ੍ਠਿ ਚ ਅਵਸਿਸ੍ਸਤੁ, ਸਰੀਰੇ ਉਪਸੁਸ੍ਸਤੁ ਮਂਸਲੋਹਿਤਂ; ਯਂ ਤਂ ਪੁਰਿਸਥਾਮੇਨ ਪੁਰਿਸਵੀਰਿਯੇਨ ਪੁਰਿਸਪਰਕ੍ਕਮੇਨ ਪਤ੍ਤਬ੍ਬਂ, ਨ ਤਂ ਅਪਾਪੁਣਿਤ੍ਵਾ ਵੀਰਿਯਸ੍ਸ ਸਣ੍ਠਾਨਂ ਭਵਿਸ੍ਸਤੀ’ਤਿ. ਇਮੇਹਿ ਖੋ, ਭਿਕ੍ਖਵੇ, ਅਟ੍ਠਹਿ ਧਮ੍ਮੇਹਿ ਸਮਨ੍ਨਾਗਤੋ ਭਿਕ੍ਖੁ ਆਹੁਨੇਯ੍ਯੋ ਹੋਤਿ…ਪੇ… ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾ’’ਤਿ. ਤਤਿਯਂ.