੨. ਅਸ੍ਸਦ੍ਧਸੁਤ੍ਤਂ

੨੦੨. ‘‘ਅਸਪ੍ਪੁਰਿਸਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ, ਅਸਪ੍ਪੁਰਿਸੇਨ ਅਸਪ੍ਪੁਰਿਸਤਰਞ੍ਚ; ਸਪ੍ਪੁਰਿਸਞ੍ਚ, ਸਪ੍ਪੁਰਿਸੇਨ ਸਪ੍ਪੁਰਿਸਤਰਞ੍ਚ. ਤਂ ਸੁਣਾਥ…ਪੇ….

‘‘ਕਤਮੋ ਚ, ਭਿਕ੍ਖਵੇ, ਅਸਪ੍ਪੁਰਿਸੋ? ਇਧ, ਭਿਕ੍ਖਵੇ, ਏਕਚ੍ਚੋ ਅਸ੍ਸਦ੍ਧੋ ਹੋਤਿ, ਅਹਿਰਿਕੋ ਹੋਤਿ, ਅਨੋਤ੍ਤਪ੍ਪੀ ਹੋਤਿ, ਅਪ੍ਪਸ੍ਸੁਤੋ ਹੋਤਿ, ਕੁਸੀਤੋ ਹੋਤਿ, ਮੁਟ੍ਠਸ੍ਸਤਿ ਹੋਤਿ, ਦੁਪ੍ਪਞ੍ਞੋ ਹੋਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਪ੍ਪੁਰਿਸੋ.

‘‘ਕਤਮੋ ਚ, ਭਿਕ੍ਖਵੇ, ਅਸਪ੍ਪੁਰਿਸੇਨ ਅਸਪ੍ਪੁਰਿਸਤਰੋ? ਇਧ, ਭਿਕ੍ਖਵੇ, ਏਕਚ੍ਚੋ ਅਤ੍ਤਨਾ ਚ ਅਸ੍ਸਦ੍ਧੋ ਹੋਤਿ, ਪਰਞ੍ਚ ਅਸ੍ਸਦ੍ਧਿਯੇ [ਅਸਦ੍ਧਾਯ (ਕ.)] ਸਮਾਦਪੇਤਿ; ਅਤ੍ਤਨਾ ਚ ਅਹਿਰਿਕੋ ਹੋਤਿ, ਪਰਞ੍ਚ ਅਹਿਰਿਕਤਾਯ ਸਮਾਦਪੇਤਿ; ਅਤ੍ਤਨਾ ਚ ਅਨੋਤ੍ਤਪ੍ਪੀ ਹੋਤਿ, ਪਰਞ੍ਚ ਅਨੋਤ੍ਤਪ੍ਪੇ ਸਮਾਦਪੇਤਿ; ਅਤ੍ਤਨਾ ਚ ਅਪ੍ਪਸ੍ਸੁਤੋ ਹੋਤਿ, ਪਰਞ੍ਚ ਅਪ੍ਪਸ੍ਸੁਤੇ ਸਮਾਦਪੇਤਿ; ਅਤ੍ਤਨਾ ਚ ਕੁਸੀਤੋ ਹੋਤਿ, ਪਰਞ੍ਚ ਕੋਸਜ੍ਜੇ ਸਮਾਦਪੇਤਿ; ਅਤ੍ਤਨਾ ਚ ਮੁਟ੍ਠਸ੍ਸਤਿ ਹੋਤਿ, ਪਰਞ੍ਚ ਮੁਟ੍ਠਸ੍ਸਚ੍ਚੇ [ਮੁਟ੍ਠਸਚ੍ਚੇ (ਸੀ. ਸ੍ਯਾ. ਕਂ. ਪੀ.)] ਸਮਾਦਪੇਤਿ; ਅਤ੍ਤਨਾ ਚ ਦੁਪ੍ਪਞ੍ਞੋ ਹੋਤਿ, ਪਰਞ੍ਚ ਦੁਪ੍ਪਞ੍ਞਤਾਯ ਸਮਾਦਪੇਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਪ੍ਪੁਰਿਸੇਨ ਅਸਪ੍ਪੁਰਿਸਤਰੋ.

‘‘ਕਤਮੋ ਚ, ਭਿਕ੍ਖਵੇ, ਸਪ੍ਪੁਰਿਸੋ? ਇਧ, ਭਿਕ੍ਖਵੇ, ਏਕਚ੍ਚੋ ਸਦ੍ਧੋ ਹੋਤਿ, ਹਿਰਿਮਾ ਹੋਤਿ, ਓਤ੍ਤਪ੍ਪੀ ਹੋਤਿ, ਬਹੁਸ੍ਸੁਤੋ ਹੋਤਿ, ਆਰਦ੍ਧਵੀਰਿਯੋ ਹੋਤਿ, ਸਤਿਮਾ ਹੋਤਿ, ਪਞ੍ਞਵਾ ਹੋਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਸਪ੍ਪੁਰਿਸੋ.

‘‘ਕਤਮੋ ਚ, ਭਿਕ੍ਖਵੇ, ਸਪ੍ਪੁਰਿਸੇਨ ਸਪ੍ਪੁਰਿਸਤਰੋ? ਇਧ, ਭਿਕ੍ਖਵੇ, ਏਕਚ੍ਚੋ ਅਤ੍ਤਨਾ ਚ ਸਦ੍ਧਾਸਮ੍ਪਨ੍ਨੋ ਹੋਤਿ, ਪਰਞ੍ਚ ਸਦ੍ਧਾਸਮ੍ਪਦਾਯ ਸਮਾਦਪੇਤਿ; ਅਤ੍ਤਨਾ ਚ ਹਿਰਿਮਾ ਹੋਤਿ, ਪਰਞ੍ਚ ਹਿਰਿਮਤਾਯ [ਹਿਰਿਸਮ੍ਪਦਾਯ (ਕ.)] ਸਮਾਦਪੇਤਿ; ਅਤ੍ਤਨਾ ਚ ਓਤ੍ਤਪ੍ਪੀ ਹੋਤਿ, ਪਰਞ੍ਚ ਓਤ੍ਤਪ੍ਪੇ ਸਮਾਦਪੇਤਿ; ਅਤ੍ਤਨਾ ਚ ਬਹੁਸ੍ਸੁਤੋ ਹੋਤਿ, ਪਰਞ੍ਚ ਬਾਹੁਸਚ੍ਚੇ ਸਮਾਦਪੇਤਿ; ਅਤ੍ਤਨਾ ਚ ਆਰਦ੍ਧਵੀਰਿਯੋ ਹੋਤਿ, ਪਰਞ੍ਚ ਵੀਰਿਯਾਰਮ੍ਭੇ ਸਮਾਦਪੇਤਿ; ਅਤ੍ਤਨਾ ਚ ਉਪਟ੍ਠਿਤਸ੍ਸਤਿ ਹੋਤਿ, ਪਰਞ੍ਚ ਸਤਿਉਪਟ੍ਠਾਨੇ [ਸਤਿਪਟ੍ਠਾਨੇ (ਸੀ. ਸ੍ਯਾ. ਕਂ. ਪੀ.)] ਸਮਾਦਪੇਤਿ; ਅਤ੍ਤਨਾ ਚ ਪਞ੍ਞਾਸਮ੍ਪਨ੍ਨੋ ਹੋਤਿ, ਪਰਞ੍ਚ ਪਞ੍ਞਾਸਮ੍ਪਦਾਯ ਸਮਾਦਪੇਤਿ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਸਪ੍ਪੁਰਿਸੇਨ ਸਪ੍ਪੁਰਿਸਤਰੋ’’ਤਿ. ਦੁਤਿਯਂ.