੫. ਉਪਵਾਣਸੁਤ੍ਤਂ

੧੭੫. ਅਥ ਖੋ ਆਯਸ੍ਮਾ ਉਪਵਾਣੋ ਯੇਨਾਯਸ੍ਮਾ ਸਾਰਿਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਤਾ ਸਾਰਿਪੁਤ੍ਤੇਨ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਉਪਵਾਣੋ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ –

‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ਵਿਜ੍ਜਾਯਨ੍ਤਕਰੋ ਹੋਤੀ’’ਤਿ?

‘‘ਨੋ ਹਿਦਂ, ਆਵੁਸੋ’’.

‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਚਰਣੇਨਨ੍ਤਕਰੋ ਹੋਤੀ’’ਤਿ?

‘‘ਨੋ ਹਿਦਂ, ਆਵੁਸੋ’’.

‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਵਿਜ੍ਜਾਚਰਣੇਨਨ੍ਤਕਰੋ ਹੋਤੀ’’ਤਿ?

‘‘ਨੋ ਹਿਦਂ, ਆਵੁਸੋ’’.

‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਅਞ੍ਞਤ੍ਰ ਵਿਜ੍ਜਾਚਰਣੇਨਨ੍ਤਕਰੋ ਹੋਤੀ’’ਤਿ?

‘‘ਨੋ ਹਿਦਂ, ਆਵੁਸੋ’’.

‘‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ਵਿਜ੍ਜਾਯਨ੍ਤਕਰੋ ਹੋਤੀ’ਤਿ, ਇਤਿ ਪੁਟ੍ਠੋ ਸਮਾਨੋ – ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ. ‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਚਰਣੇਨਨ੍ਤਕਰੋ ਹੋਤੀ’ਤਿ, ਇਤਿ ਪੁਟ੍ਠੋ ਸਮਾਨੋ – ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ. ‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਵਿਜ੍ਜਾਚਰਣੇਨਨ੍ਤਕਰੋ ਹੋਤੀ’ਤਿ, ਇਤਿ ਪੁਟ੍ਠੋ ਸਮਾਨੋ – ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ. ‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਅਞ੍ਞਤ੍ਰ ਵਿਜ੍ਜਾਚਰਣੇਨਨ੍ਤਕਰੋ ਹੋਤੀ’ਤਿ, ਇਤਿ ਪੁਟ੍ਠੋ ਸਮਾਨੋ – ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ. ਯਥਾ ਕਥਂ ਪਨਾਵੁਸੋ, ਅਨ੍ਤਕਰੋ ਹੋਤੀ’’ਤਿ?

‘‘ਵਿਜ੍ਜਾਯ ਚੇ, ਆਵੁਸੋ, ਅਨ੍ਤਕਰੋ ਅਭਵਿਸ੍ਸ, ਸਉਪਾਦਾਨੋਵ ਸਮਾਨੋ ਅਨ੍ਤਕਰੋ ਅਭਵਿਸ੍ਸ. ਚਰਣੇਨ ਚੇ, ਆਵੁਸੋ, ਅਨ੍ਤਕਰੋ ਅਭਵਿਸ੍ਸ, ਸਉਪਾਦਾਨੋਵ ਸਮਾਨੋ ਅਨ੍ਤਕਰੋ ਅਭਵਿਸ੍ਸ. ਵਿਜ੍ਜਾਚਰਣੇਨ ਚੇ, ਆਵੁਸੋ, ਅਨ੍ਤਕਰੋ ਅਭਵਿਸ੍ਸ, ਸਉਪਾਦਾਨੋਵ ਸਮਾਨੋ ਅਨ੍ਤਕਰੋ ਅਭਵਿਸ੍ਸ. ਅਞ੍ਞਤ੍ਰ ਵਿਜ੍ਜਾਚਰਣੇਨ ਚੇ, ਆਵੁਸੋ, ਅਨ੍ਤਕਰੋ ਅਭਵਿਸ੍ਸ, ਪੁਥੁਜ੍ਜਨੋ ਅਨ੍ਤਕਰੋ ਅਭਵਿਸ੍ਸ. ਪੁਥੁਜ੍ਜਨੋ ਹਿ, ਆਵੁਸੋ, ਅਞ੍ਞਤ੍ਰ ਵਿਜ੍ਜਾਚਰਣੇਨ. ਚਰਣਵਿਪਨ੍ਨੋ ਖੋ, ਆਵੁਸੋ, ਯਥਾਭੂਤਂ ਨ ਜਾਨਾਤਿ ਨ ਪਸ੍ਸਤਿ. ਚਰਣਸਮ੍ਪਨ੍ਨੋ ਯਥਾਭੂਤਂ ਜਾਨਾਤਿ ਪਸ੍ਸਤਿ. ਯਥਾਭੂਤਂ ਜਾਨਂ ਪਸ੍ਸਂ ਅਨ੍ਤਕਰੋ ਹੋਤੀ’’ਤਿ. ਪਞ੍ਚਮਂ.