੭. ਰੋਗਸੁਤ੍ਤਂ

੧੫੭. ‘‘ਦ੍ਵੇਮੇ, ਭਿਕ੍ਖਵੇ, ਰੋਗਾ. ਕਤਮੇ ਦ੍ਵੇ? ਕਾਯਿਕੋ ਚ ਰੋਗੋ ਚੇਤਸਿਕੋ ਚ ਰੋਗੋ. ਦਿਸ੍ਸਨ੍ਤਿ, ਭਿਕ੍ਖਵੇ, ਸਤ੍ਤਾ ਕਾਯਿਕੇਨ ਰੋਗੇਨ ਏਕਮ੍ਪਿ ਵਸ੍ਸਂ ਆਰੋਗ੍ਯਂ ਪਟਿਜਾਨਮਾਨਾ, ਦ੍ਵੇਪਿ ਵਸ੍ਸਾਨਿ ਆਰੋਗ੍ਯਂ ਪਟਿਜਾਨਮਾਨਾ, ਤੀਣਿਪਿ ਵਸ੍ਸਾਨਿ ਆਰੋਗ੍ਯਂ ਪਟਿਜਾਨਮਾਨਾ, ਚਤ੍ਤਾਰਿਪਿ ਵਸ੍ਸਾਨਿ ਆਰੋਗ੍ਯਂ ਪਟਿਜਾਨਮਾਨਾ, ਪਞ੍ਚਪਿ ਵਸ੍ਸਾਨਿ ਆਰੋਗ੍ਯਂ ਪਟਿਜਾਨਮਾਨਾ, ਦਸਪਿ ਵਸ੍ਸਾਨਿ ਆਰੋਗ੍ਯਂ ਪਟਿਜਾਨਮਾਨਾ, ਵੀਸਤਿਪਿ ਵਸ੍ਸਾਨਿ ਆਰੋਗ੍ਯਂ ਪਟਿਜਾਨਮਾਨਾ, ਤਿਂਸਮ੍ਪਿ ਵਸ੍ਸਾਨਿ ਆਰੋਗ੍ਯਂ ਪਟਿਜਾਨਮਾਨਾ, ਚਤ੍ਤਾਰੀਸਮ੍ਪਿ ਵਸ੍ਸਾਨਿ ਆਰੋਗ੍ਯਂ ਪਟਿਜਾਨਮਾਨਾ, ਪਞ੍ਞਾਸਮ੍ਪਿ ਵਸ੍ਸਾਨਿ ਆਰੋਗ੍ਯਂ ਪਟਿਜਾਨਮਾਨਾ, ਵਸ੍ਸਸਤਮ੍ਪਿ, ਭਿਯ੍ਯੋਪਿ ਆਰੋਗ੍ਯਂ ਪਟਿਜਾਨਮਾਨਾ. ਤੇ, ਭਿਕ੍ਖਵੇ, ਸਤ੍ਤਾ ਸੁਦੁਲ੍ਲਭਾ [ਦੁਲ੍ਲਭਾ (ਸੀ. ਸ੍ਯਾ. ਕਂ. ਪੀ.)] ਲੋਕਸ੍ਮਿਂ ਯੇ ਚੇਤਸਿਕੇਨ ਰੋਗੇਨ ਮੁਹੁਤ੍ਤਮ੍ਪਿ ਆਰੋਗ੍ਯਂ ਪਟਿਜਾਨਨ੍ਤਿ, ਅਞ੍ਞਤ੍ਰ ਖੀਣਾਸਵੇਹਿ.

‘‘ਚਤ੍ਤਾਰੋਮੇ, ਭਿਕ੍ਖਵੇ, ਪਬ੍ਬਜਿਤਸ੍ਸ ਰੋਗਾ. ਕਤਮੇ ਚਤ੍ਤਾਰੋ? ਇਧ, ਭਿਕ੍ਖਵੇ, ਭਿਕ੍ਖੁ ਮਹਿਚ੍ਛੋ ਹੋਤਿ ਵਿਘਾਤਵਾ ਅਸਨ੍ਤੁਟ੍ਠੋ ਇਤਰੀਤਰਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰੇਨ. ਸੋ ਮਹਿਚ੍ਛੋ ਸਮਾਨੋ ਵਿਘਾਤਵਾ ਅਸਨ੍ਤੁਟ੍ਠੋ ਇਤਰੀਤਰਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰੇਨ ਪਾਪਿਕਂ ਇਚ੍ਛਂ ਪਣਿਦਹਤਿ ਅਨਵਞ੍ਞਪ੍ਪਟਿਲਾਭਾਯ ਲਾਭਸਕ੍ਕਾਰਸਿਲੋਕਪ੍ਪਟਿਲਾਭਾਯ. ਸੋ ਉਟ੍ਠਹਤਿ ਘਟਤਿ ਵਾਯਮਤਿ ਅਨਵਞ੍ਞਪ੍ਪਟਿਲਾਭਾਯ ਲਾਭਸਕ੍ਕਾਰਸਿਲੋਕਪ੍ਪਟਿਲਾਭਾਯ. ਸੋ ਸਙ੍ਖਾਯ ਕੁਲਾਨਿ ਉਪਸਙ੍ਕਮਤਿ, ਸਙ੍ਖਾਯ ਨਿਸੀਦਤਿ, ਸਙ੍ਖਾਯ ਧਮ੍ਮਂ ਭਾਸਤਿ, ਸਙ੍ਖਾਯ ਉਚ੍ਚਾਰਪਸ੍ਸਾਵਂ ਸਨ੍ਧਾਰੇਤਿ. ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਪਬ੍ਬਜਿਤਸ੍ਸ ਰੋਗਾ.

‘‘ਤਸ੍ਮਾਤਿਹ, ਭਿਕ੍ਖਵੇ, ਏਵਂ ਸਿਕ੍ਖਿਤਬ੍ਬਂ – ‘ਨ ਮਹਿਚ੍ਛਾ ਭਵਿਸ੍ਸਾਮ ਵਿਘਾਤਵਨ੍ਤੋ ਅਸਨ੍ਤੁਟ੍ਠਾ ਇਤਰੀਤਰਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰੇਨ, ਨ ਪਾਪਿਕਂ ਇਚ੍ਛਂ ਪਣਿਦਹਿਸ੍ਸਾਮ ਅਨਵਞ੍ਞਪ੍ਪਟਿਲਾਭਾਯ ਲਾਭਸਕ੍ਕਾਰਸਿਲੋਕਪ੍ਪਟਿਲਾਭਾਯ, ਨ ਉਟ੍ਠਹਿਸ੍ਸਾਮ ਨ ਘਟੇਸ੍ਸਾਮ ਨ ਵਾਯਮਿਸ੍ਸਾਮ ਅਨਵਞ੍ਞਪ੍ਪਟਿਲਾਭਾਯ ਲਾਭਸਕ੍ਕਾਰਸਿਲੋਕਪ੍ਪਟਿਲਾਭਾਯ, ਖਮਾ ਭਵਿਸ੍ਸਾਮ ਸੀਤਸ੍ਸ ਉਣ੍ਹਸ੍ਸ ਜਿਘਚ੍ਛਾਯ ਪਿਪਾਸਾਯ ਡਂਸਮਕਸਵਾਤਾਤਪਸਰੀਸਪਸਮ੍ਫਸ੍ਸਾਨਂ ਦੁਰੁਤ੍ਤਾਨਂ ਦੁਰਾਗਤਾਨਂ ਵਚਨਪਥਾਨਂ, ਉਪ੍ਪਨ੍ਨਾਨਂ ਸਾਰੀਰਿਕਾਨਂ ਵੇਦਨਾਨਂ ਦੁਕ੍ਖਾਨਂ ਤਿਬ੍ਬਾਨਂ ਖਰਾਨਂ ਕਟੁਕਾਨਂ ਅਸਾਤਾਨਂ ਅਮਨਾਪਾਨਂ ਪਾਣਹਰਾਨਂ ਅਧਿਵਾਸਕਜਾਤਿਕਾ ਭਵਿਸ੍ਸਾਮਾ’ਤਿ. ਏਵਞ੍ਹਿ ਵੋ, ਭਿਕ੍ਖਵੇ, ਸਿਕ੍ਖਿਤਬ੍ਬ’’ਨ੍ਤਿ. ਸਤ੍ਤਮਂ.