(੧੫) ੫. ਆਭਾਵਗ੍ਗੋ

੧. ਆਭਾਸੁਤ੍ਤਂ

੧੪੧. ‘‘ਚਤਸ੍ਸੋ ਇਮਾ, ਭਿਕ੍ਖਵੇ, ਆਭਾ. ਕਤਮਾ ਚਤਸ੍ਸੋ? ਚਨ੍ਦਾਭਾ, ਸੂਰਿਯਾਭਾ, ਅਗ੍ਗਾਭਾ, ਪਞ੍ਞਾਭਾ – ਇਮਾ ਖੋ, ਭਿਕ੍ਖਵੇ, ਚਤਸ੍ਸੋ ਆਭਾ. ਏਤਦਗ੍ਗਂ, ਭਿਕ੍ਖਵੇ, ਇਮਾਸਂ ਚਤੁਨ੍ਨਂ [ਚਤਸ੍ਸਨ੍ਨਂ (ਸ੍ਯਾ. ਕਂ.) ਸਦ੍ਦਨੀਤਿਪਦਮਾਲਾ ਪਸ੍ਸਿਤਬ੍ਬਾ] ਆਭਾਨਂ ਯਦਿਦਂ ਪਞ੍ਞਾਭਾ’’ਤਿ. ਪਠਮਂ.

੨. ਪਭਾਸੁਤ੍ਤਂ

੧੪੨. ‘‘ਚਤਸ੍ਸੋ ਇਮਾ, ਭਿਕ੍ਖਵੇ, ਪਭਾ. ਕਤਮਾ ਚਤਸ੍ਸੋ? ਚਨ੍ਦਪ੍ਪਭਾ, ਸੂਰਿਯਪ੍ਪਭਾ, ਅਗ੍ਗਿਪ੍ਪਭਾ, ਪਞ੍ਞਾਪਭਾ – ਇਮਾ ਖੋ, ਭਿਕ੍ਖਵੇ, ਚਤਸ੍ਸੋ ਪਭਾ. ਏਤਦਗ੍ਗਂ, ਭਿਕ੍ਖਵੇ, ਇਮਾਸਂ ਚਤੁਨ੍ਨਂ ਪਭਾਨਂ ਯਦਿਦਂ ਪਞ੍ਞਾਪਭਾ’’ਤਿ. ਦੁਤਿਯਂ.

੩. ਆਲੋਕਸੁਤ੍ਤਂ

੧੪੩. ‘‘ਚਤ੍ਤਾਰੋਮੇ, ਭਿਕ੍ਖਵੇ, ਆਲੋਕਾ. ਕਤਮੇ ਚਤ੍ਤਾਰੋ? ਚਨ੍ਦਾਲੋਕੋ, ਸੂਰਿਯਾਲੋਕੋ, ਅਗ੍ਗਾਲੋਕੋ, ਪਞ੍ਞਾਲੋਕੋ – ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਆਲੋਕਾ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਚਤੁਨ੍ਨਂ ਆਲੋਕਾਨਂ ਯਦਿਦਂ ਪਞ੍ਞਾਲੋਕੋ’’ਤਿ. ਤਤਿਯਂ.

੪. ਓਭਾਸਸੁਤ੍ਤਂ

੧੪੪. ‘‘ਚਤ੍ਤਾਰੋਮੇ, ਭਿਕ੍ਖਵੇ, ਓਭਾਸਾ. ਕਤਮੇ ਚਤ੍ਤਾਰੋ? ਚਨ੍ਦੋਭਾਸੋ, ਸੂਰਿਯੋਭਾਸੋ, ਅਗ੍ਗੋਭਾਸੋ, ਪਞ੍ਞੋਭਾਸੋ – ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਓਭਾਸਾ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਚਤੁਨ੍ਨਂ ਓਭਾਸਾਨਂ ਯਦਿਦਂ ਪਞ੍ਞੋਭਾਸੋ’’ਤਿ. ਚਤੁਤ੍ਥਂ.

੫. ਪਜ੍ਜੋਤਸੁਤ੍ਤਂ

੧੪੫. ‘‘ਚਤ੍ਤਾਰੋਮੇ, ਭਿਕ੍ਖਵੇ, ਪਜ੍ਜੋਤਾ. ਕਤਮੇ ਚਤ੍ਤਾਰੋ? ਚਨ੍ਦਪਜ੍ਜੋਤੋ, ਸੂਰਿਯਪਜ੍ਜੋਤੋ, ਅਗ੍ਗਿਪਜ੍ਜੋਤੋ, ਪਞ੍ਞਾਪਜ੍ਜੋਤੋ – ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਪਜ੍ਜੋਤਾ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਚਤੁਨ੍ਨਂ ਪਜ੍ਜੋਤਾਨਂ ਯਦਿਦਂ ਪਞ੍ਞਾਪਜ੍ਜੋਤੋ’’ਤਿ. ਪਞ੍ਚਮਂ.

੬. ਪਠਮਕਾਲਸੁਤ੍ਤਂ

੧੪੬. ‘‘ਚਤ੍ਤਾਰੋਮੇ, ਭਿਕ੍ਖਵੇ, ਕਾਲਾ. ਕਤਮੇ ਚਤ੍ਤਾਰੋ? ਕਾਲੇਨ ਧਮ੍ਮਸ੍ਸਵਨਂ, ਕਾਲੇਨ ਧਮ੍ਮਸਾਕਚ੍ਛਾ, ਕਾਲੇਨ ਸਮ੍ਮਸਨਾ [ਕਾਲੇਨ ਸਮਥੋ (ਸੀ. ਸ੍ਯਾ. ਕਂ. ਪੀ.)], ਕਾਲੇਨ ਵਿਪਸ੍ਸਨਾ – ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਕਾਲਾ’’ਤਿ. ਛਟ੍ਠਂ.

੭. ਦੁਤਿਯਕਾਲਸੁਤ੍ਤਂ

੧੪੭. ‘‘ਚਤ੍ਤਾਰੋਮੇ, ਭਿਕ੍ਖਵੇ, ਕਾਲਾ ਸਮ੍ਮਾ ਭਾਵਿਯਮਾਨਾ ਸਮ੍ਮਾ ਅਨੁਪਰਿਵਤ੍ਤਿਯਮਾਨਾ ਅਨੁਪੁਬ੍ਬੇਨ ਆਸਵਾਨਂ ਖਯਂ ਪਾਪੇਨ੍ਤਿ. ਕਤਮੇ ਚਤ੍ਤਾਰੋ? ਕਾਲੇਨ ਧਮ੍ਮਸ੍ਸਵਨਂ, ਕਾਲੇਨ ਧਮ੍ਮਸਾਕਚ੍ਛਾ, ਕਾਲੇਨ ਸਮ੍ਮਸਨਾ, ਕਾਲੇਨ ਵਿਪਸ੍ਸਨਾ – ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਕਾਲਾ ਸਮ੍ਮਾ ਭਾਵਿਯਮਾਨਾ ਸਮ੍ਮਾ ਅਨੁਪਰਿਵਤ੍ਤਿਯਮਾਨਾ ਅਨੁਪੁਬ੍ਬੇਨ ਆਸਵਾਨਂ ਖਯਂ ਪਾਪੇਨ੍ਤਿ.

‘‘ਸੇਯ੍ਯਥਾਪਿ, ਭਿਕ੍ਖਵੇ, ਉਪਰਿਪਬ੍ਬਤੇ ਥੁਲ੍ਲਫੁਸਿਤਕੇ ਦੇਵੇ ਵਸ੍ਸਨ੍ਤੇ ਤਂ ਉਦਕਂ ਯਥਾਨਿਨ੍ਨਂ ਪਵਤ੍ਤਮਾਨਂ ਪਬ੍ਬਤਕਨ੍ਦਰਪਦਰਸਾਖਾ ਪਰਿਪੂਰੇਤਿ; ਪਬ੍ਬਤਕਨ੍ਦਰਪਦਰਸਾਖਾ ਪਰਿਪੂਰਾ ਕੁਸੋਬ੍ਭੇ ਪਰਿਪੂਰੇਨ੍ਤਿ; ਕੁਸੋਬ੍ਭਾ ਪਰਿਪੂਰਾ ਮਹਾਸੋਬ੍ਭੇ ਪਰਿਪੂਰੇਨ੍ਤਿ; ਮਹਾਸੋਬ੍ਭਾ ਪਰਿਪੂਰਾ ਕੁਨ੍ਨਦਿਯੋ ਪਰਿਪੂਰੇਨ੍ਤਿ; ਕੁਨ੍ਨਦਿਯੋ ਪਰਿਪੂਰਾ ਮਹਾਨਦਿਯੋ ਪਰਿਪੂਰੇਨ੍ਤਿ; ਮਹਾਨਦਿਯੋ ਪਰਿਪੂਰਾ ਸਮੁਦ੍ਦਂ [ਸਮੁਦ੍ਦਂ ਸਾਗਰਂ (ਸੀ. ਪੀ. ਕ.), ਸਮੁਦ੍ਦਸਾਗਰਂ (ਸ੍ਯਾ. ਕਂ.)] ਪਰਿਪੂਰੇਨ੍ਤਿ. ਏਵਮੇਵਂ ਖੋ, ਭਿਕ੍ਖਵੇ, ਇਮੇ ਚਤ੍ਤਾਰੋ ਕਾਲਾ ਸਮ੍ਮਾ ਭਾਵਿਯਮਾਨਾ ਸਮ੍ਮਾ ਅਨੁਪਰਿਵਤ੍ਤਿਯਮਾਨਾ ਅਨੁਪੁਬ੍ਬੇਨ ਆਸਵਾਨਂ ਖਯਂ ਪਾਪੇਨ੍ਤੀ’’ਤਿ. ਸਤ੍ਤਮਂ.

੮. ਦੁਚ੍ਚਰਿਤਸੁਤ੍ਤਂ

੧੪੮. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਵਚੀਦੁਚ੍ਚਰਿਤਾਨਿ. ਕਤਮਾਨਿ ਚਤ੍ਤਾਰਿ? ਮੁਸਾਵਾਦੋ, ਪਿਸੁਣਾ ਵਾਚਾ, ਫਰੁਸਾ ਵਾਚਾ, ਸਮ੍ਫਪ੍ਪਲਾਪੋ – ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਵਚੀਦੁਚ੍ਚਰਿਤਾਨੀ’’ਤਿ. ਅਟ੍ਠਮਂ.

੯. ਸੁਚਰਿਤਸੁਤ੍ਤਂ

੧੪੯. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਵਚੀਸੁਚਰਿਤਾਨਿ. ਕਤਮਾਨਿ ਚਤ੍ਤਾਰਿ? ਸਚ੍ਚਵਾਚਾ, ਅਪਿਸੁਣਾ ਵਾਚਾ, ਸਣ੍ਹਾ ਵਾਚਾ, ਮਨ੍ਤਭਾਸਾ – ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਵਚੀਸੁਚਰਿਤਾਨੀ’’ਤਿ. ਨਵਮਂ.

੧੦. ਸਾਰਸੁਤ੍ਤਂ

੧੫੦. ‘‘ਚਤ੍ਤਾਰੋਮੇ, ਭਿਕ੍ਖਵੇ, ਸਾਰਾ. ਕਤਮੇ ਚਤ੍ਤਾਰੋ? ਸੀਲਸਾਰੋ, ਸਮਾਧਿਸਾਰੋ, ਪਞ੍ਞਾਸਾਰੋ, ਵਿਮੁਤ੍ਤਿਸਾਰੋ – ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਸਾਰਾ’’ਤਿ. ਦਸਮਂ.

ਆਭਾਵਗ੍ਗੋ ਪਞ੍ਚਮੋ.