੩. ਪਠਮਸਂਵਾਸਸੁਤ੍ਤਂ

੫੩. ਏਕਂ ਸਮਯਂ ਭਗਵਾ ਅਨ੍ਤਰਾ ਚ ਮਧੁਰਂ ਅਨ੍ਤਰਾ ਚ ਵੇਰਞ੍ਜਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨੋ ਹੋਤਿ. ਸਮ੍ਬਹੁਲਾਪਿ ਖੋ ਗਹਪਤੀ ਚ ਗਹਪਤਾਨਿਯੋ ਚ ਅਨ੍ਤਰਾ ਚ ਮਧੁਰਂ ਅਨ੍ਤਰਾ ਚ ਵੇਰਞ੍ਜਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਅਥ ਖੋ ਭਗਵਾ ਮਗ੍ਗਾ ਓਕ੍ਕਮ੍ਮ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ( ) [(ਪਞ੍ਞਤ੍ਤੇ ਆਸਨੇ) (ਪੀ. ਕ.)] ਨਿਸੀਦਿ. ਅਦ੍ਦਸਂਸੁ ਖੋ ਗਹਪਤੀ ਚ ਗਹਪਤਾਨਿਯੋ ਚ ਭਗਵਨ੍ਤਂ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸਿਨ੍ਨਂ. ਦਿਸ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨੇ ਖੋ ਤੇ ਗਹਪਤੀ ਚ ਗਹਪਤਾਨਿਯੋ ਚ ਭਗਵਾ ਏਤਦਵੋਚ –

‘‘ਚਤ੍ਤਾਰੋਮੇ, ਗਹਪਤਯੋ, ਸਂਵਾਸਾ. ਕਤਮੇ ਚਤ੍ਤਾਰੋ? ਛਵੋ ਛਵਾਯ ਸਦ੍ਧਿਂ ਸਂਵਸਤਿ, ਛਵੋ ਦੇਵਿਯਾ ਸਦ੍ਧਿਂ ਸਂਵਸਤਿ, ਦੇਵੋ ਛਵਾਯ ਸਦ੍ਧਿਂ ਸਂਵਸਤਿ, ਦੇਵੋ ਦੇਵਿਯਾ ਸਦ੍ਧਿਂ ਸਂਵਸਤਿ.

‘‘ਕਥਞ੍ਚ, ਗਹਪਤਯੋ, ਛਵੋ ਛਵਾਯ ਸਦ੍ਧਿਂ ਸਂਵਸਤਿ? ਇਧ, ਗਹਪਤਯੋ, ਸਾਮਿਕੋ ਹੋਤਿ ਪਾਣਾਤਿਪਾਤੀ ਅਦਿਨ੍ਨਾਦਾਯੀ ਕਾਮੇਸੁਮਿਚ੍ਛਾਚਾਰੀ ਮੁਸਾਵਾਦੀ ਸੁਰਾਮੇਰਯਮਜ੍ਜਪਮਾਦਟ੍ਠਾਯੀ ਦੁਸ੍ਸੀਲੋ ਪਾਪਧਮ੍ਮੋ ਮਚ੍ਛੇਰਮਲਪਰਿਯੁਟ੍ਠਿਤੇਨ ਚੇਤਸਾ ਅਗਾਰਂ ਅਜ੍ਝਾਵਸਤਿ ਅਕ੍ਕੋਸਕਪਰਿਭਾਸਕੋ ਸਮਣਬ੍ਰਾਹ੍ਮਣਾਨਂ; ਭਰਿਯਾਪਿਸ੍ਸ ਹੋਤਿ ਪਾਣਾਤਿਪਾਤਿਨੀ ਅਦਿਨ੍ਨਾਦਾਯਿਨੀ ਕਾਮੇਸੁਮਿਚ੍ਛਾਚਾਰਿਨੀ ਮੁਸਾਵਾਦਿਨੀ ਸੁਰਾਮੇਰਯਮਜ੍ਜਪਮਾਦਟ੍ਠਾਯਿਨੀ ਦੁਸ੍ਸੀਲਾ ਪਾਪਧਮ੍ਮਾ ਮਚ੍ਛੇਰਮਲਪਰਿਯੁਟ੍ਠਿਤੇਨ ਚੇਤਸਾ ਅਗਾਰਂ ਅਜ੍ਝਾਵਸਤਿ ਅਕ੍ਕੋਸਿਕਪਰਿਭਾਸਿਕਾ ਸਮਣਬ੍ਰਾਹ੍ਮਣਾਨਂ. ਏਵਂ ਖੋ, ਗਹਪਤਯੋ, ਛਵੋ ਛਵਾਯ ਸਦ੍ਧਿਂ ਸਂਵਸਤਿ.

‘‘ਕਥਞ੍ਚ, ਗਹਪਤਯੋ, ਛਵੋ ਦੇਵਿਯਾ ਸਦ੍ਧਿਂ ਸਂਵਸਤਿ? ਇਧ, ਗਹਪਤਯੋ, ਸਾਮਿਕੋ ਹੋਤਿ ਪਾਣਾਤਿਪਾਤੀ ਅਦਿਨ੍ਨਾਦਾਯੀ ਕਾਮੇਸੁਮਿਚ੍ਛਾਚਾਰੀ ਮੁਸਾਵਾਦੀ ਸੁਰਾਮੇਰਯਮਜ੍ਜਪਮਾਦਟ੍ਠਾਯੀ ਦੁਸ੍ਸੀਲੋ ਪਾਪਧਮ੍ਮੋ ਮਚ੍ਛੇਰਮਲਪਰਿਯੁਟ੍ਠਿਤੇਨ ਚੇਤਸਾ ਅਗਾਰਂ ਅਜ੍ਝਾਵਸਤਿ ਅਕ੍ਕੋਸਕਪਰਿਭਾਸਕੋ ਸਮਣਬ੍ਰਾਹ੍ਮਣਾਨਂ; ਭਰਿਯਾ ਖ੍ਵਸ੍ਸ ਹੋਤਿ ਪਾਣਾਤਿਪਾਤਾ ਪਟਿਵਿਰਤਾ ਅਦਿਨ੍ਨਾਦਾਨਾ ਪਟਿਵਿਰਤਾ ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤਾ ਮੁਸਾਵਾਦਾ ਪਟਿਵਿਰਤਾ ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਪਟਿਵਿਰਤਾ ਸੀਲਵਤੀ ਕਲ੍ਯਾਣਧਮ੍ਮਾ ਵਿਗਤਮਲਮਚ੍ਛੇਰੇਨ ਚੇਤਸਾ ਅਗਾਰਂ ਅਜ੍ਝਾਵਸਤਿ ਅਨਕ੍ਕੋਸਿਕਪਰਿਭਾਸਿਕਾ ਸਮਣਬ੍ਰਾਹ੍ਮਣਾਨਂ. ਏਵਂ ਖੋ, ਗਹਪਤਯੋ, ਛਵੋ ਦੇਵਿਯਾ ਸਦ੍ਧਿਂ ਸਂਵਸਤਿ.

‘‘ਕਥਞ੍ਚ, ਗਹਪਤਯੋ, ਦੇਵੋ ਛਵਾਯ ਸਦ੍ਧਿਂ ਸਂਵਸਤਿ? ਇਧ, ਗਹਪਤਯੋ, ਸਾਮਿਕੋ ਹੋਤਿ ਪਾਣਾਤਿਪਾਤਾ ਪਟਿਵਿਰਤੋ ਅਦਿਨ੍ਨਾਦਾਨਾ ਪਟਿਵਿਰਤੋ ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ ਮੁਸਾਵਾਦਾ ਪਟਿਵਿਰਤੋ ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਪਟਿਵਿਰਤੋ ਸੀਲਵਾ ਕਲ੍ਯਾਣਧਮ੍ਮੋ ਵਿਗਤਮਲਮਚ੍ਛੇਰੇਨ ਚੇਤਸਾ ਅਗਾਰਂ ਅਜ੍ਝਾਵਸਤਿ ਅਨਕ੍ਕੋਸਕਪਰਿਭਾਸਕੋ ਸਮਣਬ੍ਰਾਹ੍ਮਣਾਨਂ; ਭਰਿਯਾ ਖ੍ਵਸ੍ਸ ਹੋਤਿ ਪਾਣਾਤਿਪਾਤਿਨੀ…ਪੇ… ਸੁਰਾਮੇਰਯਮਜ੍ਜਪਮਾਦਟ੍ਠਾਯਿਨੀ ਦੁਸ੍ਸੀਲਾ ਪਾਪਧਮ੍ਮਾ ਮਚ੍ਛੇਰਮਲਪਰਿਯੁਟ੍ਠਿਤੇਨ ਚੇਤਸਾ ਅਗਾਰਂ ਅਜ੍ਝਾਵਸਤਿ ਅਕ੍ਕੋਸਿਕਪਰਿਭਾਸਿਕਾ ਸਮਣਬ੍ਰਾਹ੍ਮਣਾਨਂ. ਏਵਂ ਖੋ, ਗਹਪਤਯੋ, ਦੇਵੋ ਛਵਾਯ ਸਦ੍ਧਿਂ ਸਂਵਸਤਿ.

‘‘ਕਥਞ੍ਚ, ਗਹਪਤਯੋ, ਦੇਵੋ ਦੇਵਿਯਾ ਸਦ੍ਧਿਂ ਸਂਵਸਤਿ? ਇਧ, ਗਹਪਤਯੋ, ਸਾਮਿਕੋ ਹੋਤਿ ਪਾਣਾਤਿਪਾਤਾ ਪਟਿਵਿਰਤੋ…ਪੇ… ਸੀਲਵਾ ਕਲ੍ਯਾਣਧਮ੍ਮੋ ਵਿਗਤਮਲਮਚ੍ਛੇਰੇਨ ਚੇਤਸਾ ਅਗਾਰਂ ਅਜ੍ਝਾਵਸਤਿ ਅਨਕ੍ਕੋਸਕਪਰਿਭਾਸਕੋ ਸਮਣਬ੍ਰਾਹ੍ਮਣਾਨਂ; ਭਰਿਯਾਪਿਸ੍ਸ ਹੋਤਿ ਪਾਣਾਤਿਪਾਤਾ ਪਟਿਵਿਰਤਾ…ਪੇ… ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਪਟਿਵਿਰਤਾ ਸੀਲਵਤੀ ਕਲ੍ਯਾਣਧਮ੍ਮਾ ਵਿਗਤਮਲਮਚ੍ਛੇਰੇਨ ਚੇਤਸਾ ਅਗਾਰਂ ਅਜ੍ਝਾਵਸਤਿ ਅਨਕ੍ਕੋਸਿਕਪਰਿਭਾਸਿਕਾ ਸਮਣਬ੍ਰਾਹ੍ਮਣਾਨਂ. ਏਵਂ ਖੋ, ਗਹਪਤਯੋ, ਦੇਵੋ ਦੇਵਿਯਾ ਸਦ੍ਧਿਂ ਸਂਵਸਤਿ. ਇਮੇ ਖੋ, ਗਹਪਤਯੋ, ਚਤ੍ਤਾਰੋ ਸਂਵਾਸਾ’’ਤਿ.

‘‘ਉਭੋ ਚ ਹੋਨ੍ਤਿ ਦੁਸ੍ਸੀਲਾ, ਕਦਰਿਯਾ ਪਰਿਭਾਸਕਾ;

ਤੇ ਹੋਨ੍ਤਿ ਜਾਨਿਪਤਯੋ, ਛਵਾ ਸਂਵਾਸਮਾਗਤਾ.

‘‘ਸਾਮਿਕੋ ਹੋਤਿ ਦੁਸ੍ਸੀਲੋ, ਕਦਰਿਯੋ ਪਰਿਭਾਸਕੋ;

ਭਰਿਯਾ ਸੀਲਵਤੀ ਹੋਤਿ, ਵਦਞ੍ਞੂ ਵੀਤਮਚ੍ਛਰਾ;

ਸਾਪਿ ਦੇਵੀ ਸਂਵਸਤਿ, ਛਵੇਨ ਪਤਿਨਾ ਸਹ.

‘‘ਸਾਮਿਕੋ ਸੀਲਵਾ ਹੋਤਿ, ਵਦਞ੍ਞੂ ਵੀਤਮਚ੍ਛਰੋ;

ਭਰਿਯਾ ਹੋਤਿ ਦੁਸ੍ਸੀਲਾ, ਕਦਰਿਯਾ ਪਰਿਭਾਸਿਕਾ;

ਸਾਪਿ ਛਵਾ ਸਂਵਸਤਿ, ਦੇਵੇਨ ਪਤਿਨਾ ਸਹ.

‘‘ਉਭੋ ਸਦ੍ਧਾ ਵਦਞ੍ਞੂ ਚ, ਸਞ੍ਞਤਾ ਧਮ੍ਮਜੀਵਿਨੋ;

ਤੇ ਹੋਨ੍ਤਿ ਜਾਨਿਪਤਯੋ, ਅਞ੍ਞਮਞ੍ਞਂ ਪਿਯਂਵਦਾ.

‘‘ਅਤ੍ਥਾਸਂ ਪਚੁਰਾ ਹੋਨ੍ਤਿ, ਫਾਸੁਕਂ [ਫਾਸਤ੍ਤਂ (ਸੀ.), ਵਾਸਤ੍ਥਂ (ਪੀ.)] ਉਪਜਾਯਤਿ;

ਅਮਿਤ੍ਤਾ ਦੁਮ੍ਮਨਾ ਹੋਨ੍ਤਿ, ਉਭਿਨ੍ਨਂ ਸਮਸੀਲਿਨਂ.

‘‘ਇਧ ਧਮ੍ਮਂ ਚਰਿਤ੍ਵਾਨ, ਸਮਸੀਲਬ੍ਬਤਾ ਉਭੋ;

ਨਨ੍ਦਿਨੋ ਦੇਵਲੋਕਸ੍ਮਿਂ, ਮੋਦਨ੍ਤਿ ਕਾਮਕਾਮਿਨੋ’’ਤਿ. ਤਤਿਯਂ;