(੭) ੨. ਸੁਖਵਗ੍ਗੋ

੬੫. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਗਿਹਿਸੁਖਞ੍ਚ ਪਬ੍ਬਜਿਤਸੁਖਞ੍ਚ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਪਬ੍ਬਜਿਤਸੁਖ’’ਨ੍ਤਿ.

੬੬. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਕਾਮਸੁਖਞ੍ਚ ਨੇਕ੍ਖਮ੍ਮਸੁਖਞ੍ਚ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਨੇਕ੍ਖਮ੍ਮਸੁਖ’’ਨ੍ਤਿ.

੬੭. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਉਪਧਿਸੁਖਞ੍ਚ ਨਿਰੁਪਧਿਸੁਖਞ੍ਚ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਨਿਰੁਪਧਿਸੁਖ’’ਨ੍ਤਿ.

੬੮. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਸਾਸਵਸੁਖਞ੍ਚ ਅਨਾਸਵਸੁਖਞ੍ਚ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਅਨਾਸਵਸੁਖ’’ਨ੍ਤਿ.

੬੯. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਸਾਮਿਸਞ੍ਚ ਸੁਖਂ ਨਿਰਾਮਿਸਞ੍ਚ ਸੁਖਂ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਨਿਰਾਮਿਸਂ ਸੁਖ’’ਨ੍ਤਿ.

੭੦. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਅਰਿਯਸੁਖਞ੍ਚ ਅਨਰਿਯਸੁਖਞ੍ਚ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਅਰਿਯਸੁਖ’’ਨ੍ਤਿ.

੭੧. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਕਾਯਿਕਞ੍ਚ ਸੁਖਂ ਚੇਤਸਿਕਞ੍ਚ ਸੁਖਂ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਚੇਤਸਿਕਂ ਸੁਖ’’ਨ੍ਤਿ.

੭੨. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਸਪ੍ਪੀਤਿਕਞ੍ਚ ਸੁਖਂ ਨਿਪ੍ਪੀਤਿਕਞ੍ਚ ਸੁਖਂ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਨਿਪ੍ਪੀਤਿਕਂ ਸੁਖ’’ਨ੍ਤਿ.

੭੩. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਸਾਤਸੁਖਞ੍ਚ ਉਪੇਕ੍ਖਾਸੁਖਞ੍ਚ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਉਪੇਕ੍ਖਾਸੁਖ’’ਨ੍ਤਿ.

੭੪. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਸਮਾਧਿਸੁਖਞ੍ਚ ਅਸਮਾਧਿਸੁਖਞ੍ਚ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਸਮਾਧਿਸੁਖ’’ਨ੍ਤਿ.

੭੫. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਸਪ੍ਪੀਤਿਕਾਰਮ੍ਮਣਞ੍ਚ ਸੁਖਂ ਨਿਪ੍ਪੀਤਿਕਾਰਮ੍ਮਣਞ੍ਚ ਸੁਖਂ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਨਿਪ੍ਪੀਤਿਕਾਰਮ੍ਮਣਂ ਸੁਖ’’ਨ੍ਤਿ.

੭੬. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਸਾਤਾਰਮ੍ਮਣਞ੍ਚ ਸੁਖਂ ਉਪੇਕ੍ਖਾਰਮ੍ਮਣਞ੍ਚ ਸੁਖਂ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਉਪੇਕ੍ਖਾਰਮ੍ਮਣਂ ਸੁਖ’’ਨ੍ਤਿ.

੭੭. ‘‘ਦ੍ਵੇਮਾਨਿ, ਭਿਕ੍ਖਵੇ, ਸੁਖਾਨਿ. ਕਤਮਾਨਿ ਦ੍ਵੇ? ਰੂਪਾਰਮ੍ਮਣਞ੍ਚ ਸੁਖਂ ਅਰੂਪਾਰਮ੍ਮਣਞ੍ਚ ਸੁਖਂ. ਇਮਾਨਿ ਖੋ, ਭਿਕ੍ਖਵੇ, ਦ੍ਵੇ ਸੁਖਾਨਿ. ਏਤਦਗ੍ਗਂ, ਭਿਕ੍ਖਵੇ, ਇਮੇਸਂ ਦ੍ਵਿਨ੍ਨਂ ਸੁਖਾਨਂ ਯਦਿਦਂ ਅਰੂਪਾਰਮ੍ਮਣਂ ਸੁਖ’’ਨ੍ਤਿ.

ਸੁਖਵਗ੍ਗੋ ਦੁਤਿਯੋ.