੯. ਸਦ੍ਧਸੁਤ੍ਤਂ

੯. ਏਕਂ ਸਮਯਂ ਭਗਵਾ ਨਾਤਿਕੇ ਵਿਹਰਤਿ ਗਿਞ੍ਜਕਾਵਸਥੇ. ਅਥ ਖੋ ਆਯਸ੍ਮਾ ਸਦ੍ਧੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਆਯਸ੍ਮਨ੍ਤਂ ਸਦ੍ਧਂ ਭਗਵਾ ਏਤਦਵੋਚ –

‘‘ਆਜਾਨੀਯਝਾਯਿਤਂ ਖੋ, ਸਦ੍ਧ, ਝਾਯ; ਮਾ ਖਲ਼ੁਙ੍ਕਝਾਯਿਤਂ [ਆਜਾਨੀਯਜ੍ਝਾਯਿਤਂ ਖੋ ਸਦ੍ਧ ਝਾਯਥ, ਮਾ ਖਲ਼ੁਙ੍ਕਜ੍ਝਾਯਿਤਂ (ਸੀ. ਪੀ.)]. ਕਥਞ੍ਚ, ਖਲ਼ੁਙ੍ਕਝਾਯਿਤਂ ਹੋਤਿ? ਅਸ੍ਸਖਲ਼ੁਙ੍ਕੋ ਹਿ, ਸਦ੍ਧ, ਦੋਣਿਯਾ ਬਦ੍ਧੋ [ਬਨ੍ਧੋ (ਸ੍ਯਾ. ਕ.)] ‘ਯਵਸਂ ਯਵਸ’ਨ੍ਤਿ ਝਾਯਤਿ. ਤਂ ਕਿਸ੍ਸ ਹੇਤੁ? ਨ ਹਿ, ਸਦ੍ਧ, ਅਸ੍ਸਖਲ਼ੁਙ੍ਕਸ੍ਸ ਦੋਣਿਯਾ ਬਦ੍ਧਸ੍ਸ ਏਵਂ ਹੋਤਿ – ‘ਕਿਂ ਨੁ ਖੋ ਮਂ ਅਜ੍ਜ ਅਸ੍ਸਦਮ੍ਮਸਾਰਥਿ ਕਾਰਣਂ ਕਾਰੇਸ੍ਸਤਿ, ਕਿਮਸ੍ਸਾਹਂ [ਕਮ੍ਮਸ੍ਸਾਹਂ (ਕ.)] ਪਟਿਕਰੋਮੀ’ਤਿ. ਸੋ ਦੋਣਿਯਾ ਬਦ੍ਧੋ ‘ਯਵਸਂ ਯਵਸ’ਨ੍ਤਿ ਝਾਯਤਿ. ਏਵਮੇਵਂ ਖੋ, ਸਦ੍ਧ, ਇਧੇਕਚ੍ਚੋ ਪੁਰਿਸਖਲ਼ੁਙ੍ਕੋ ਅਰਞ੍ਞਗਤੋਪਿ ਰੁਕ੍ਖਮੂਲਗਤੋਪਿ ਸੁਞ੍ਞਾਗਾਰਗਤੋਪਿ ਕਾਮਰਾਗਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ ਕਾਮਰਾਗਪਰੇਤੇਨ ਉਪ੍ਪਨ੍ਨਸ੍ਸ ਚ ਕਾਮਰਾਗਸ੍ਸ ਨਿਸ੍ਸਰਣਂ ਯਥਾਭੂਤਂ ਨਪ੍ਪਜਾਨਾਤਿ. ਸੋ ਕਾਮਰਾਗਂਯੇਵ ਅਨ੍ਤਰਂ ਕਤ੍ਵਾ ਝਾਯਤਿ ਪਜ੍ਝਾਯਤਿ ਨਿਜ੍ਝਾਯਤਿ ਅਵਜ੍ਝਾਯਤਿ, ਬ੍ਯਾਪਾਦਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ… ਥਿਨਮਿਦ੍ਧਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ… ਉਦ੍ਧਚ੍ਚਕੁਕ੍ਕੁਚ੍ਚਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ… ਵਿਚਿਕਿਚ੍ਛਾਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ ਵਿਚਿਕਿਚ੍ਛਾਪਰੇਤੇਨ, ਉਪ੍ਪਨ੍ਨਾਯ ਚ ਵਿਚਿਕਿਚ੍ਛਾਯ ਨਿਸ੍ਸਰਣਂ ਯਥਾਭੂਤਂ ਨਪ੍ਪਜਾਨਾਤਿ. ਸੋ ਵਿਚਿਕਿਚ੍ਛਂਯੇਵ ਅਨ੍ਤਰਂ ਕਤ੍ਵਾ ਝਾਯਤਿ ਪਜ੍ਝਾਯਤਿ ਨਿਜ੍ਝਾਯਤਿ ਅਵਜ੍ਝਾਯਤਿ. ਸੋ ਪਥਵਿਮ੍ਪਿ ਨਿਸ੍ਸਾਯ ਝਾਯਤਿ, ਆਪਮ੍ਪਿ ਨਿਸ੍ਸਾਯ ਝਾਯਤਿ, ਤੇਜਮ੍ਪਿ ਨਿਸ੍ਸਾਯ ਝਾਯਤਿ, ਵਾਯਮ੍ਪਿ ਨਿਸ੍ਸਾਯ ਝਾਯਤਿ, ਆਕਾਸਾਨਞ੍ਚਾਯਤਨਮ੍ਪਿ ਨਿਸ੍ਸਾਯ ਝਾਯਤਿ, ਵਿਞ੍ਞਾਣਞ੍ਚਾਯਤਨਮ੍ਪਿ ਨਿਸ੍ਸਾਯ ਝਾਯਤਿ, ਆਕਿਞ੍ਚਞ੍ਞਾਯਤਨਮ੍ਪਿ ਨਿਸ੍ਸਾਯ ਝਾਯਤਿ, ਨੇਵਸਞ੍ਞਾਨਾਸਞ੍ਞਾਯਤਨਮ੍ਪਿ ਨਿਸ੍ਸਾਯ ਝਾਯਤਿ, ਇਧਲੋਕਮ੍ਪਿ ਨਿਸ੍ਸਾਯ ਝਾਯਤਿ, ਪਰਲੋਕਮ੍ਪਿ ਨਿਸ੍ਸਾਯ ਝਾਯਤਿ, ਯਮ੍ਪਿਦਂ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਤਮ੍ਪਿ ਨਿਸ੍ਸਾਯ ਝਾਯਤਿ. ਏਵਂ ਖੋ, ਸਦ੍ਧ, ਪੁਰਿਸਖਲ਼ੁਙ੍ਕਝਾਯਿਤਂ ਹੋਤਿ.

‘‘ਕਥਞ੍ਚ, ਸਦ੍ਧ, ਆਜਾਨੀਯਝਾਯਿਤਂ ਹੋਤਿ? ਭਦ੍ਰੋ ਹਿ, ਸਦ੍ਧ, ਅਸ੍ਸਾਜਾਨੀਯੋ ਦੋਣਿਯਾ ਬਦ੍ਧੋ ਨ ‘ਯਵਸਂ ਯਵਸ’ਨ੍ਤਿ ਝਾਯਤਿ. ਤਂ ਕਿਸ੍ਸ ਹੇਤੁ? ਭਦ੍ਰਸ੍ਸ ਹਿ, ਸਦ੍ਧ, ਅਸ੍ਸਾਜਾਨੀਯਸ੍ਸ ਦੋਣਿਯਾ ਬਦ੍ਧਸ੍ਸ ਏਵਂ ਹੋਤਿ – ‘ਕਿਂ ਨੁ ਖੋ ਮਂ ਅਜ੍ਜ ਅਸ੍ਸਦਮ੍ਮਸਾਰਥਿ ਕਾਰਣਂ ਕਾਰੇਸ੍ਸਤਿ, ਕਿਮਸ੍ਸਾਹਂ ਪਟਿਕਰੋਮੀ’ਤਿ. ਸੋ ਦੋਣਿਯਾ ਬਦ੍ਧੋ ਨ ‘ਯਵਸਂ ਯਵਸ’ਨ੍ਤਿ ਝਾਯਤਿ. ਭਦ੍ਰੋ ਹਿ, ਸਦ੍ਧ, ਅਸ੍ਸਾਜਾਨੀਯੋ ਯਥਾ ਇਣਂ ਯਥਾ ਬਨ੍ਧਂ ਯਥਾ ਜਾਨਿਂ ਯਥਾ ਕਲਿਂ ਏਵਂ ਪਤੋਦਸ੍ਸ ਅਜ੍ਝੋਹਰਣਂ ਸਮਨੁਪਸ੍ਸਤਿ. ਏਵਮੇਵਂ ਖੋ, ਸਦ੍ਧ, ਭਦ੍ਰੋ ਪੁਰਿਸਾਜਾਨੀਯੋ ਅਰਞ੍ਞਗਤੋਪਿ ਰੁਕ੍ਖਮੂਲਗਤੋਪਿ ਸੁਞ੍ਞਾਗਾਰਗਤੋਪਿ ਨ ਕਾਮਰਾਗਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ ਨ ਕਾਮਰਾਗਪਰੇਤੇਨ, ਉਪ੍ਪਨ੍ਨਸ੍ਸ ਚ ਕਾਮਰਾਗਸ੍ਸ ਨਿਸ੍ਸਰਣਂ ਯਥਾਭੂਤਂ ਪਜਾਨਾਤਿ, ਨ ਬ੍ਯਾਪਾਦਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ… ਨ ਥਿਨਮਿਦ੍ਧਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ… ਨ ਉਦ੍ਧਚ੍ਚਕੁਕ੍ਕੁਚ੍ਚਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ… ਨ ਵਿਚਿਕਿਚ੍ਛਾਪਰਿਯੁਟ੍ਠਿਤੇਨ ਚੇਤਸਾ ਵਿਹਰਤਿ ਨ ਵਿਚਿਕਿਚ੍ਛਾਪਰੇਤੇਨ, ਉਪ੍ਪਨ੍ਨਾਯ ਚ ਵਿਚਿਕਿਚ੍ਛਾਯ ਨਿਸ੍ਸਰਣਂ ਯਥਾਭੂਤਂ ਪਜਾਨਾਤਿ. ਸੋ ਨੇਵ ਪਥਵਿਂ ਨਿਸ੍ਸਾਯ ਝਾਯਤਿ, ਨ ਆਪਂ ਨਿਸ੍ਸਾਯ ਝਾਯਤਿ, ਨ ਤੇਜਂ ਨਿਸ੍ਸਾਯ ਝਾਯਤਿ, ਨ ਵਾਯਂ ਨਿਸ੍ਸਾਯ ਝਾਯਤਿ, ਨ ਆਕਾਸਾਨਞ੍ਚਾਯਤਨਂ ਨਿਸ੍ਸਾਯ ਝਾਯਤਿ, ਨ ਵਿਞ੍ਞਾਣਞ੍ਚਾਯਤਨਂ ਨਿਸ੍ਸਾਯ ਝਾਯਤਿ, ਨ ਆਕਿਞ੍ਚਞ੍ਞਾਯਤਨਂ ਨਿਸ੍ਸਾਯ ਝਾਯਤਿ, ਨ ਨੇਵਸਞ੍ਞਾਨਾਸਞ੍ਞਾਯਤਨਂ ਨਿਸ੍ਸਾਯ ਝਾਯਤਿ, ਨ ਇਧਲੋਕਂ ਨਿਸ੍ਸਾਯ ਝਾਯਤਿ, ਨ ਪਰਲੋਕਂ ਨਿਸ੍ਸਾਯ ਝਾਯਤਿ, ਯਮ੍ਪਿਦਂ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਤਮ੍ਪਿ ਨਿਸ੍ਸਾਯ ਨ ਝਾਯਤਿ; ਝਾਯਤਿ ਚ ਪਨ. ਏਵਂ ਝਾਯਿਞ੍ਚ ਪਨ, ਸਦ੍ਧ, ਭਦ੍ਰਂ ਪੁਰਿਸਾਜਾਨੀਯਂ ਸਇਨ੍ਦਾ ਦੇਵਾ ਸਬ੍ਰਹ੍ਮਕਾ ਸਪਜਾਪਤਿਕਾ ਆਰਕਾਵ ਨਮਸ੍ਸਨ੍ਤਿ –

‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਯਸ੍ਸ ਤੇ ਨਾਭਿਜਾਨਾਮ, ਯਮ੍ਪਿ ਨਿਸ੍ਸਾਯ ਝਾਯਸੀ’’ਤਿ.

ਏਵਂ ਵੁਤ੍ਤੇ ਆਯਸ੍ਮਾ ਸਦ੍ਧੋ ਭਗਵਨ੍ਤਂ ਏਤਦਵੋਚ – ‘‘ਕਥਂ ਝਾਯੀ ਪਨ, ਭਨ੍ਤੇ, ਭਦ੍ਰੋ ਪੁਰਿਸਾਜਾਨੀਯੋ [ਪੁਰਿਸਾਜਾਨੀਯੋ ਝਾਯਤਿ, ਸੋ (ਸੀ. ਸ੍ਯਾ. ਪੀ.), ਪੁਰਿਸਾਜਾਨੀਯੋ, ਸੋ (ਕ.)] ਨੇਵ ਪਥਵਿਂ ਨਿਸ੍ਸਾਯ ਝਾਯਤਿ, ਨ ਆਪਂ ਨਿਸ੍ਸਾਯ ਝਾਯਤਿ, ਨ ਤੇਜਂ ਨਿਸ੍ਸਾਯ ਝਾਯਤਿ, ਨ ਵਾਯਂ ਨਿਸ੍ਸਾਯ ਝਾਯਤਿ, ਨ ਆਕਾਸਾਨਞ੍ਚਾਯਤਨਂ ਨਿਸ੍ਸਾਯ ਝਾਯਤਿ, ਨ ਵਿਞ੍ਞਾਣਞ੍ਚਾਯਤਨਂ ਨਿਸ੍ਸਾਯ ਝਾਯਤਿ, ਨ ਆਕਿਞ੍ਚਞ੍ਞਾਯਤਨਂ ਨਿਸ੍ਸਾਯ ਝਾਯਤਿ, ਨ ਨੇਵਸਞ੍ਞਾਨਾਸਞ੍ਞਾਯਤਨਂ ਨਿਸ੍ਸਾਯ ਝਾਯਤਿ, ਨ ਇਧਲੋਕਂ ਨਿਸ੍ਸਾਯ ਝਾਯਤਿ, ਨ ਪਰਲੋਕਂ ਨਿਸ੍ਸਾਯ ਝਾਯਤਿ, ਯਮ੍ਪਿਦਂ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਤਮ੍ਪਿ ਨਿਸ੍ਸਾਯ ਨ ਝਾਯਤਿ; ਝਾਯਤਿ ਚ ਪਨ? ਕਥਂ ਝਾਯਿਞ੍ਚ ਪਨ, ਭਨ੍ਤੇ, ਭਦ੍ਰਂ ਪੁਰਿਸਾਜਾਨੀਯਂ ਸਇਨ੍ਦਾ ਦੇਵਾ ਸਬ੍ਰਹ੍ਮਕਾ ਸਪਜਾਪਤਿਕਾ ਆਰਕਾਵ ਨਮਸ੍ਸਨ੍ਤਿ –

‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਯਸ੍ਸ ਤੇ ਨਾਭਿਜਾਨਾਮ, ਯਮ੍ਪਿ ਨਿਸ੍ਸਾਯ ਝਾਯਸੀ’’ਤਿ.

‘‘ਇਧ, ਸਦ੍ਧ, ਭਦ੍ਰਸ੍ਸ ਪੁਰਿਸਾਜਾਨੀਯਸ੍ਸ ਪਥਵਿਯਂ ਪਥਵਿਸਞ੍ਞਾ ਵਿਭੂਤਾ ਹੋਤਿ, ਆਪਸ੍ਮਿਂ ਆਪੋਸਞ੍ਞਾ ਵਿਭੂਤਾ ਹੋਤਿ, ਤੇਜਸ੍ਮਿਂ ਤੇਜੋਸਞ੍ਞਾ ਵਿਭੂਤਾ ਹੋਤਿ, ਵਾਯਸ੍ਮਿਂ ਵਾਯੋਸਞ੍ਞਾ ਵਿਭੂਤਾ ਹੋਤਿ, ਆਕਾਸਾਨਞ੍ਚਾਯਤਨੇ ਆਕਾਸਾਨਞ੍ਚਾਯਤਨਸਞ੍ਞਾ ਵਿਭੂਤਾ ਹੋਤਿ, ਵਿਞ੍ਞਾਣਞ੍ਚਾਯਤਨੇ ਵਿਞ੍ਞਾਣਞ੍ਚਾਯਤਨਸਞ੍ਞਾ ਵਿਭੂਤਾ ਹੋਤਿ, ਆਕਿਞ੍ਚਞ੍ਞਾਯਤਨੇ ਆਕਿਞ੍ਚਞ੍ਞਾਯਤਨਸਞ੍ਞਾ ਵਿਭੂਤਾ ਹੋਤਿ, ਨੇਵਸਞ੍ਞਾਨਾਸਞ੍ਞਾਯਤਨੇ ਨੇਵਸਞ੍ਞਾਨਾਸਞ੍ਞਾਯਤਨਸਞ੍ਞਾ ਵਿਭੂਤਾ ਹੋਤਿ, ਇਧਲੋਕੇ ਇਧਲੋਕਸਞ੍ਞਾ ਵਿਭੂਤਾ ਹੋਤਿ, ਪਰਲੋਕੇ ਪਰਲੋਕਸਞ੍ਞਾ ਵਿਭੂਤਾ ਹੋਤਿ, ਯਮ੍ਪਿਦਂ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਤਤ੍ਰਾਪਿ ਸਞ੍ਞਾ ਵਿਭੂਤਾ ਹੋਤਿ. ਏਵਂ ਝਾਯੀ ਖੋ, ਸਦ੍ਧ, ਭਦ੍ਰੋ ਪੁਰਿਸਾਜਾਨੀਯੋ ਨੇਵ ਪਥਵਿਂ ਨਿਸ੍ਸਾਯ ਝਾਯਤਿ…ਪੇ… ਯਮ੍ਪਿਦਂ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਤਮ੍ਪਿ ਨਿਸ੍ਸਾਯ ਨ ਝਾਯਤਿ; ਝਾਯਤਿ ਚ ਪਨ. ਏਵਂ ਝਾਯਿਞ੍ਚ ਪਨ, ਸਦ੍ਧ, ਭਦ੍ਰਂ ਪੁਰਿਸਾਜਾਨੀਯਂ ਸਇਨ੍ਦਾ ਦੇਵਾ ਸਬ੍ਰਹ੍ਮਕਾ ਸਪਜਾਪਤਿਕਾ ਆਰਕਾਵ ਨਮਸ੍ਸਨ੍ਤਿ –

‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਯਸ੍ਸ ਤੇ ਨਾਭਿਜਾਨਾਮ, ਯਮ੍ਪਿ ਨਿਸ੍ਸਾਯ ਝਾਯਸੀ’’ਤਿ. ਨਵਮਂ;