੩. ਇਟ੍ਠਧਮ੍ਮਸੁਤ੍ਤਂ

੭੩. ‘‘ਦਸਯਿਮੇ, ਭਿਕ੍ਖਵੇ, ਧਮ੍ਮਾ ਇਟ੍ਠਾ ਕਨ੍ਤਾ ਮਨਾਪਾ ਦੁਲ੍ਲਭਾ ਲੋਕਸ੍ਮਿਂ. ਕਤਮੇ ਦਸ? ਭੋਗਾ ਇਟ੍ਠਾ ਕਨ੍ਤਾ ਮਨਾਪਾ ਦੁਲ੍ਲਭਾ ਲੋਕਸ੍ਮਿਂ; ਵਣ੍ਣੋ ਇਟ੍ਠੋ ਕਨ੍ਤੋ ਮਨਾਪੋ ਦੁਲ੍ਲਭੋ ਲੋਕਸ੍ਮਿਂ; ਆਰੋਗ੍ਯਂ ਇਟ੍ਠਂ ਕਨ੍ਤਂ ਮਨਾਪਂ ਦੁਲ੍ਲਭਂ ਲੋਕਸ੍ਮਿਂ; ਸੀਲਂ ਇਟ੍ਠਂ ਕਨ੍ਤਂ ਮਨਾਪਂ ਦੁਲ੍ਲਭਂ ਲੋਕਸ੍ਮਿਂ; ਬ੍ਰਹ੍ਮਚਰਿਯਂ ਇਟ੍ਠਂ ਕਨ੍ਤਂ ਮਨਾਪਂ ਦੁਲ੍ਲਭਂ ਲੋਕਸ੍ਮਿਂ; ਮਿਤ੍ਤਾ ਇਟ੍ਠਾ ਕਨ੍ਤਾ ਮਨਾਪਾ ਦੁਲ੍ਲਭਾ ਲੋਕਸ੍ਮਿਂ; ਬਾਹੁਸਚ੍ਚਂ ਇਟ੍ਠਂ ਕਨ੍ਤਂ ਮਨਾਪਂ ਦੁਲ੍ਲਭਂ ਲੋਕਸ੍ਮਿਂ; ਪਞ੍ਞਾ ਇਟ੍ਠਾ ਕਨ੍ਤਾ ਮਨਾਪਾ ਦੁਲ੍ਲਭਾ ਲੋਕਸ੍ਮਿਂ; ਧਮ੍ਮਾ ਇਟ੍ਠਾ ਕਨ੍ਤਾ ਮਨਾਪਾ ਦੁਲ੍ਲਭਾ ਲੋਕਸ੍ਮਿਂ; ਸਗ੍ਗਾ ਇਟ੍ਠਾ ਕਨ੍ਤਾ ਮਨਾਪਾ ਦੁਲ੍ਲਭਾ ਲੋਕਸ੍ਮਿਂ.

‘‘ਇਮੇਸਂ ਖੋ, ਭਿਕ੍ਖਵੇ, ਦਸਨ੍ਨਂ ਧਮ੍ਮਾਨਂ ਇਟ੍ਠਾਨਂ ਕਨ੍ਤਾਨਂ ਮਨਾਪਾਨਂ ਦੁਲ੍ਲਭਾਨਂ ਲੋਕਸ੍ਮਿਂ ਦਸ ਧਮ੍ਮਾ ਪਰਿਪਨ੍ਥਾ [ਪਰਿਬਨ੍ਧਾ (ਕ.)] – ਆਲਸ੍ਯਂ ਅਨੁਟ੍ਠਾਨਂ ਭੋਗਾਨਂ ਪਰਿਪਨ੍ਥੋ, ਅਮਣ੍ਡਨਾ ਅਵਿਭੂਸਨਾ ਵਣ੍ਣਸ੍ਸ ਪਰਿਪਨ੍ਥੋ, ਅਸਪ੍ਪਾਯਕਿਰਿਯਾ ਆਰੋਗ੍ਯਸ੍ਸ ਪਰਿਪਨ੍ਥੋ, ਪਾਪਮਿਤ੍ਤਤਾ ਸੀਲਾਨਂ ਪਰਿਪਨ੍ਥੋ, ਇਨ੍ਦ੍ਰਿਯਅਸਂਵਰੋ ਬ੍ਰਹ੍ਮਚਰਿਯਸ੍ਸ ਪਰਿਪਨ੍ਥੋ, ਵਿਸਂਵਾਦਨਾ ਮਿਤ੍ਤਾਨਂ ਪਰਿਪਨ੍ਥੋ, ਅਸਜ੍ਝਾਯਕਿਰਿਯਾ ਬਾਹੁਸਚ੍ਚਸ੍ਸ ਪਰਿਪਨ੍ਥੋ, ਅਸੁਸ੍ਸੂਸਾ ਅਪਰਿਪੁਚ੍ਛਾ ਪਞ੍ਞਾਯ ਪਰਿਪਨ੍ਥੋ, ਅਨਨੁਯੋਗੋ ਅਪਚ੍ਚਵੇਕ੍ਖਣਾ ਧਮ੍ਮਾਨਂ ਪਰਿਪਨ੍ਥੋ, ਮਿਚ੍ਛਾਪਟਿਪਤ੍ਤਿ ਸਗ੍ਗਾਨਂ ਪਰਿਪਨ੍ਥੋ. ਇਮੇਸਂ ਖੋ, ਭਿਕ੍ਖਵੇ, ਦਸਨ੍ਨਂ ਇਟ੍ਠਾਨਂ ਕਨ੍ਤਾਨਂ ਮਨਾਪਾਨਂ ਦੁਲ੍ਲਭਾਨਂ ਲੋਕਸ੍ਮਿਂ ਇਮੇ ਦਸ ਧਮ੍ਮਾ ਪਰਿਪਨ੍ਥਾ.

‘‘ਇਮੇਸਂ ਖੋ, ਭਿਕ੍ਖਵੇ, ਦਸਨ੍ਨਂ ਧਮ੍ਮਾਨਂ ਇਟ੍ਠਾਨਂ ਕਨ੍ਤਾਨਂ ਮਨਾਪਾਨਂ ਦੁਲ੍ਲਭਾਨਂ ਲੋਕਸ੍ਮਿਂ ਦਸ ਧਮ੍ਮਾ ਆਹਾਰਾ – ਉਟ੍ਠਾਨਂ ਅਨਾਲਸ੍ਯਂ ਭੋਗਾਨਂ ਆਹਾਰੋ, ਮਣ੍ਡਨਾ ਵਿਭੂਸਨਾ ਵਣ੍ਣਸ੍ਸ ਆਹਾਰੋ, ਸਪ੍ਪਾਯਕਿਰਿਯਾ ਆਰੋਗ੍ਯਸ੍ਸ ਆਹਾਰੋ, ਕਲ੍ਯਾਣਮਿਤ੍ਤਤਾ ਸੀਲਾਨਂ ਆਹਾਰੋ, ਇਨ੍ਦ੍ਰਿਯਸਂਵਰੋ ਬ੍ਰਹ੍ਮਚਰਿਯਸ੍ਸ ਆਹਾਰੋ, ਅਵਿਸਂਵਾਦਨਾ ਮਿਤ੍ਤਾਨਂ ਆਹਾਰੋ, ਸਜ੍ਝਾਯਕਿਰਿਯਾ ਬਾਹੁਸਚ੍ਚਸ੍ਸ ਆਹਾਰੋ, ਸੁਸ੍ਸੂਸਾ ਪਰਿਪੁਚ੍ਛਾ ਪਞ੍ਞਾਯ ਆਹਾਰੋ, ਅਨੁਯੋਗੋ ਪਚ੍ਚਵੇਕ੍ਖਣਾ ਧਮ੍ਮਾਨਂ ਆਹਾਰੋ, ਸਮ੍ਮਾਪਟਿਪਤ੍ਤਿ ਸਗ੍ਗਾਨਂ ਆਹਾਰੋ. ਇਮੇਸਂ ਖੋ, ਭਿਕ੍ਖਵੇ, ਦਸਨ੍ਨਂ ਧਮ੍ਮਾਨਂ ਇਟ੍ਠਾਨਂ ਕਨ੍ਤਾਨਂ ਮਨਾਪਾਨਂ ਦੁਲ੍ਲਭਾਨਂ ਲੋਕਸ੍ਮਿਂ ਇਮੇ ਦਸ ਧਮ੍ਮਾ ਆਹਾਰਾ’’ਤਿ. ਤਤਿਯਂ.