੭. ਮਹਾਲਿਸੁਤ੍ਤਂ

੪੭. ਏਕਂ ਸਮਯਂ ਭਗਵਾ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ. ਅਥ ਖੋ ਮਹਾਲਿ ਲਿਚ੍ਛਵਿ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਮਹਾਲਿ ਲਿਚ੍ਛਵਿ ਭਗਵਨ੍ਤਂ ਏਤਦਵੋਚ – ‘‘ਕੋ ਨੁ ਖੋ, ਭਨ੍ਤੇ ਹੇਤੁ, ਕੋ ਪਚ੍ਚਯੋ ਪਾਪਸ੍ਸ ਕਮ੍ਮਸ੍ਸ ਕਿਰਿਯਾਯ ਪਾਪਸ੍ਸ ਕਮ੍ਮਸ੍ਸ ਪਵਤ੍ਤਿਯਾ’’ਤਿ? ‘‘ਲੋਭੋ ਖੋ, ਮਹਾਲਿ, ਹੇਤੁ, ਲੋਭੋ ਪਚ੍ਚਯੋ ਪਾਪਸ੍ਸ ਕਮ੍ਮਸ੍ਸ ਕਿਰਿਯਾਯ ਪਾਪਸ੍ਸ ਕਮ੍ਮਸ੍ਸ ਪਵਤ੍ਤਿਯਾ. ਦੋਸੋ ਖੋ, ਮਹਾਲਿ, ਹੇਤੁ, ਦੋਸੋ ਪਚ੍ਚਯੋ ਪਾਪਸ੍ਸ ਕਮ੍ਮਸ੍ਸ ਕਿਰਿਯਾਯ ਪਾਪਸ੍ਸ ਕਮ੍ਮਸ੍ਸ ਪਵਤ੍ਤਿਯਾ. ਮੋਹੋ ਖੋ, ਮਹਾਲਿ, ਹੇਤੁ, ਮੋਹੋ ਪਚ੍ਚਯੋ ਪਾਪਸ੍ਸ ਕਮ੍ਮਸ੍ਸ ਕਿਰਿਯਾਯ ਪਾਪਸ੍ਸ ਕਮ੍ਮਸ੍ਸ ਪਵਤ੍ਤਿਯਾ. ਅਯੋਨਿਸੋ ਮਨਸਿਕਾਰੋ ਖੋ, ਮਹਾਲਿ, ਹੇਤੁ, ਅਯੋਨਿਸੋ ਮਨਸਿਕਾਰੋ ਪਚ੍ਚਯੋ ਪਾਪਸ੍ਸ ਕਮ੍ਮਸ੍ਸ ਕਿਰਿਯਾਯ ਪਾਪਸ੍ਸ ਕਮ੍ਮਸ੍ਸ ਪਵਤ੍ਤਿਯਾ. ਮਿਚ੍ਛਾਪਣਿਹਿਤਂ ਖੋ, ਮਹਾਲਿ, ਚਿਤ੍ਤਂ ਹੇਤੁ, ਮਿਚ੍ਛਾਪਣਿਹਿਤਂ ਚਿਤ੍ਤਂ ਪਚ੍ਚਯੋ ਪਾਪਸ੍ਸ ਕਮ੍ਮਸ੍ਸ ਕਿਰਿਯਾਯ ਪਾਪਸ੍ਸ ਕਮ੍ਮਸ੍ਸ ਪਵਤ੍ਤਿਯਾਤਿ. ਅਯਂ ਖੋ, ਮਹਾਲਿ, ਹੇਤੁ, ਅਯਂ ਪਚ੍ਚਯੋ ਪਾਪਸ੍ਸ ਕਮ੍ਮਸ੍ਸ ਕਿਰਿਯਾਯ ਪਾਪਸ੍ਸ ਕਮ੍ਮਸ੍ਸ ਪਵਤ੍ਤਿਯਾ’’ਤਿ.

‘‘ਕੋ ਪਨ, ਭਨ੍ਤੇ, ਹੇਤੁ ਕੋ ਪਚ੍ਚਯੋ ਕਲ੍ਯਾਣਸ੍ਸ ਕਮ੍ਮਸ੍ਸ ਕਿਰਿਯਾਯ ਕਲ੍ਯਾਣਸ੍ਸ ਕਮ੍ਮਸ੍ਸ ਪਵਤ੍ਤਿਯਾ’’ਤਿ? ‘‘ਅਲੋਭੋ ਖੋ, ਮਹਾਲਿ, ਹੇਤੁ, ਅਲੋਭੋ ਪਚ੍ਚਯੋ ਕਲ੍ਯਾਣਸ੍ਸ ਕਮ੍ਮਸ੍ਸ ਕਿਰਿਯਾਯ ਕਲ੍ਯਾਣਸ੍ਸ ਕਮ੍ਮਸ੍ਸ ਪਵਤ੍ਤਿਯਾ. ਅਦੋਸੋ ਖੋ, ਮਹਾਲਿ, ਹੇਤੁ, ਅਦੋਸੋ ਪਚ੍ਚਯੋ ਕਲ੍ਯਾਣਸ੍ਸ ਕਮ੍ਮਸ੍ਸ ਕਿਰਿਯਾਯ ਕਲ੍ਯਾਣਸ੍ਸ ਕਮ੍ਮਸ੍ਸ ਪਵਤ੍ਤਿਯਾ. ਅਮੋਹੋ ਖੋ, ਮਹਾਲਿ, ਹੇਤੁ, ਅਮੋਹੋ ਪਚ੍ਚਯੋ ਕਲ੍ਯਾਣਸ੍ਸ ਕਮ੍ਮਸ੍ਸ ਕਿਰਿਯਾਯ ਕਲ੍ਯਾਣਸ੍ਸ ਕਮ੍ਮਸ੍ਸ ਪਵਤ੍ਤਿਯਾ. ਯੋਨਿਸੋ ਮਨਸਿਕਾਰੋ ਖੋ, ਮਹਾਲਿ, ਹੇਤੁ, ਯੋਨਿਸੋ ਮਨਸਿਕਾਰੋ ਪਚ੍ਚਯੋ ਕਲ੍ਯਾਣਸ੍ਸ ਕਮ੍ਮਸ੍ਸ ਕਿਰਿਯਾਯ ਕਲ੍ਯਾਣਸ੍ਸ ਕਮ੍ਮਸ੍ਸ ਪਵਤ੍ਤਿਯਾ. ਸਮ੍ਮਾਪਣਿਹਿਤਂ ਖੋ, ਮਹਾਲਿ, ਚਿਤ੍ਤਂ ਹੇਤੁ, ਸਮ੍ਮਾਪਣਿਹਿਤਂ ਚਿਤ੍ਤਂ ਪਚ੍ਚਯੋ ਕਲ੍ਯਾਣਸ੍ਸ ਕਮ੍ਮਸ੍ਸ ਕਿਰਿਯਾਯ ਕਲ੍ਯਾਣਸ੍ਸ ਕਮ੍ਮਸ੍ਸ ਪਵਤ੍ਤਿਯਾ. ਅਯਂ ਖੋ, ਮਹਾਲਿ, ਹੇਤੁ, ਅਯਂ ਪਚ੍ਚਯੋ ਕਲ੍ਯਾਣਸ੍ਸ ਕਮ੍ਮਸ੍ਸ ਕਿਰਿਯਾਯ ਕਲ੍ਯਾਣਸ੍ਸ ਕਮ੍ਮਸ੍ਸ ਪਵਤ੍ਤਿਯਾ. ਇਮੇ ਚ, ਮਹਾਲਿ, ਦਸ ਧਮ੍ਮਾ ਲੋਕੇ ਨ ਸਂਵਿਜ੍ਜੇਯ੍ਯੁਂ, ਨਯਿਧ ਪਞ੍ਞਾਯੇਥ ਅਧਮ੍ਮਚਰਿਯਾਵਿਸਮਚਰਿਯਾਤਿ ਵਾ ਧਮ੍ਮਚਰਿਯਾਸਮਚਰਿਯਾਤਿ ਵਾ. ਯਸ੍ਮਾ ਚ ਖੋ, ਮਹਾਲਿ, ਇਮੇ ਦਸ ਧਮ੍ਮਾ ਲੋਕੇ ਸਂਵਿਜ੍ਜਨ੍ਤਿ, ਤਸ੍ਮਾ ਪਞ੍ਞਾਯਤਿ ਅਧਮ੍ਮਚਰਿਯਾਵਿਸਮਚਰਿਯਾਤਿ ਵਾ ਧਮ੍ਮਚਰਿਯਾਸਮਚਰਿਯਾਤਿ ਵਾ’’ਤਿ. ਸਤ੍ਤਮਂ.