੬. ਅਚ੍ਛਰਾਸਙ੍ਘਾਤਵਗ੍ਗੋ

੫੧. ‘‘ਪਭਸ੍ਸਰਮਿਦਂ, ਭਿਕ੍ਖਵੇ, ਚਿਤ੍ਤਂ. ਤਞ੍ਚ ਖੋ ਆਗਨ੍ਤੁਕੇਹਿ ਉਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠਂ. ਤਂ ਅਸ੍ਸੁਤਵਾ ਪੁਥੁਜ੍ਜਨੋ ਯਥਾਭੂਤਂ ਨਪ੍ਪਜਾਨਾਤਿ. ਤਸ੍ਮਾ ‘ਅਸ੍ਸੁਤਵਤੋ ਪੁਥੁਜ੍ਜਨਸ੍ਸ ਚਿਤ੍ਤਭਾਵਨਾ ਨਤ੍ਥੀ’ਤਿ ਵਦਾਮੀ’’ਤਿ. ਪਠਮਂ.

੫੨. ‘‘ਪਭਸ੍ਸਰਮਿਦਂ, ਭਿਕ੍ਖਵੇ, ਚਿਤ੍ਤਂ. ਤਞ੍ਚ ਖੋ ਆਗਨ੍ਤੁਕੇਹਿ ਉਪਕ੍ਕਿਲੇਸੇਹਿ ਵਿਪ੍ਪਮੁਤ੍ਤਂ. ਤਂ ਸੁਤਵਾ ਅਰਿਯਸਾਵਕੋ ਯਥਾਭੂਤਂ ਪਜਾਨਾਤਿ. ਤਸ੍ਮਾ ‘ਸੁਤਵਤੋ ਅਰਿਯਸਾਵਕਸ੍ਸ ਚਿਤ੍ਤਭਾਵਨਾ ਅਤ੍ਥੀ’ਤਿ ਵਦਾਮੀ’’ਤਿ. ਦੁਤਿਯਂ.

੫੩. ‘‘ਅਚ੍ਛਰਾਸਙ੍ਘਾਤਮਤ੍ਤਮ੍ਪਿ ਚੇ, ਭਿਕ੍ਖਵੇ, ਭਿਕ੍ਖੁ ਮੇਤ੍ਤਾਚਿਤ੍ਤਂ [ਮੇਤ੍ਤਂ ਚਿਤ੍ਤਂ (ਸੀ.), ਮੇਤ੍ਤਚਿਤ੍ਤਂ (ਸ੍ਯਾ. ਕਂ. ਪੀ. ਕ.)] ਆਸੇਵਤਿ; ਅਯਂ ਵੁਚ੍ਚਤਿ, ਭਿਕ੍ਖਵੇ – ‘ਭਿਕ੍ਖੁ ਅਰਿਤ੍ਤਜ੍ਝਾਨੋ ਵਿਹਰਤਿ ਸਤ੍ਥੁਸਾਸਨਕਰੋ ਓਵਾਦਪਤਿਕਰੋ, ਅਮੋਘਂ ਰਟ੍ਠਪਿਣ੍ਡਂ ਭੁਞ੍ਜਤਿ’. ਕੋ ਪਨ ਵਾਦੋ ਯੇ ਨਂ ਬਹੁਲੀਕਰੋਨ੍ਤੀ’’ਤਿ! ਤਤਿਯਂ.

੫੪. ‘‘ਅਚ੍ਛਰਾਸਙ੍ਘਾਤਮਤ੍ਤਮ੍ਪਿ ਚੇ, ਭਿਕ੍ਖਵੇ, ਭਿਕ੍ਖੁ ਮੇਤ੍ਤਾਚਿਤ੍ਤਂ ਭਾਵੇਤਿ; ਅਯਂ ਵੁਚ੍ਚਤਿ, ਭਿਕ੍ਖਵੇ – ‘ਭਿਕ੍ਖੁ ਅਰਿਤ੍ਤਜ੍ਝਾਨੋ ਵਿਹਰਤਿ ਸਤ੍ਥੁਸਾਸਨਕਰੋ ਓਵਾਦਪਤਿਕਰੋ, ਅਮੋਘਂ ਰਟ੍ਠਪਿਣ੍ਡਂ ਭੁਞ੍ਜਤਿ’. ਕੋ ਪਨ ਵਾਦੋ ਯੇ ਨਂ ਬਹੁਲੀਕਰੋਨ੍ਤੀ’’ਤਿ! ਚਤੁਤ੍ਥਂ.

੫੫. ‘‘ਅਚ੍ਛਰਾਸਙ੍ਘਾਤਮਤ੍ਤਮ੍ਪਿ ਚੇ, ਭਿਕ੍ਖਵੇ, ਭਿਕ੍ਖੁ ਮੇਤ੍ਤਾਚਿਤ੍ਤਂ ਮਨਸਿ ਕਰੋਤਿ; ਅਯਂ ਵੁਚ੍ਚਤਿ, ਭਿਕ੍ਖਵੇ – ‘ਭਿਕ੍ਖੁ ਅਰਿਤ੍ਤਜ੍ਝਾਨੋ ਵਿਹਰਤਿ ਸਤ੍ਥੁਸਾਸਨਕਰੋ ਓਵਾਦਪਤਿਕਰੋ ਅਮੋਘਂ ਰਟ੍ਠਪਿਣ੍ਡਂ ਭੁਞ੍ਜਤਿ’. ਕੋ ਪਨ ਵਾਦੋ ਯੇ ਨਂ ਬਹੁਲੀਕਰੋਨ੍ਤੀ’’ਤਿ! ਪਞ੍ਚਮਂ.

੫੬. ‘‘ਯੇ ਕੇਚਿ, ਭਿਕ੍ਖਵੇ, ਧਮ੍ਮਾ ਅਕੁਸਲਾ ਅਕੁਸਲਭਾਗਿਯਾ ਅਕੁਸਲਪਕ੍ਖਿਕਾ, ਸਬ੍ਬੇ ਤੇ ਮਨੋਪੁਬ੍ਬਙ੍ਗਮਾ. ਮਨੋ ਤੇਸਂ ਧਮ੍ਮਾਨਂ ਪਠਮਂ ਉਪ੍ਪਜ੍ਜਤਿ, ਅਨ੍ਵਦੇਵ ਅਕੁਸਲਾ ਧਮ੍ਮਾ’’ਤਿ. ਛਟ੍ਠਂ.

੫੭. ‘‘ਯੇ ਕੇਚਿ, ਭਿਕ੍ਖਵੇ, ਧਮ੍ਮਾ ਕੁਸਲਾ ਕੁਸਲਭਾਗਿਯਾ ਕੁਸਲਪਕ੍ਖਿਕਾ, ਸਬ੍ਬੇ ਤੇ ਮਨੋਪੁਬ੍ਬਙ੍ਗਮਾ. ਮਨੋ ਤੇਸਂ ਧਮ੍ਮਾਨਂ ਪਠਮਂ ਉਪ੍ਪਜ੍ਜਤਿ, ਅਨ੍ਵਦੇਵ ਕੁਸਲਾ ਧਮ੍ਮਾ’’ਤਿ. ਸਤ੍ਤਮਂ.

੫੮. ‘‘ਨਾਹਂ, ਭਿਕ੍ਖਵੇ, ਅਞ੍ਞਂ ਏਕਧਮ੍ਮਮ੍ਪਿ ਸਮਨੁਪਸ੍ਸਾਮਿ ਯੇਨ ਅਨੁਪ੍ਪਨ੍ਨਾ ਵਾ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ ਉਪ੍ਪਨ੍ਨਾ ਵਾ ਕੁਸਲਾ ਧਮ੍ਮਾ ਪਰਿਹਾਯਨ੍ਤਿ ਯਥਯਿਦਂ, ਭਿਕ੍ਖਵੇ, ਪਮਾਦੋ. ਪਮਤ੍ਤਸ੍ਸ, ਭਿਕ੍ਖਵੇ, ਅਨੁਪ੍ਪਨ੍ਨਾ ਚੇਵ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ ਉਪ੍ਪਨ੍ਨਾ ਚ ਕੁਸਲਾ ਧਮ੍ਮਾ ਪਰਿਹਾਯਨ੍ਤੀ’’ਤਿ. ਅਟ੍ਠਮਂ.

੫੯. ‘‘ਨਾਹਂ, ਭਿਕ੍ਖਵੇ, ਅਞ੍ਞਂ ਏਕਧਮ੍ਮਮ੍ਪਿ ਸਮਨੁਪਸ੍ਸਾਮਿ ਯੇਨ ਅਨੁਪ੍ਪਨ੍ਨਾ ਵਾ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ ਉਪ੍ਪਨ੍ਨਾ ਵਾ ਅਕੁਸਲਾ ਧਮ੍ਮਾ ਪਰਿਹਾਯਨ੍ਤਿ ਯਥਯਿਦਂ, ਭਿਕ੍ਖਵੇ, ਅਪ੍ਪਮਾਦੋ. ਅਪ੍ਪਮਤ੍ਤਸ੍ਸ, ਭਿਕ੍ਖਵੇ, ਅਨੁਪ੍ਪਨ੍ਨਾ ਚੇਵ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ ਉਪ੍ਪਨ੍ਨਾ ਚ ਅਕੁਸਲਾ ਧਮ੍ਮਾ ਪਰਿਹਾਯਨ੍ਤੀ’’ਤਿ. ਨਵਮਂ.

੬੦. ‘‘ਨਾਹਂ, ਭਿਕ੍ਖਵੇ, ਅਞ੍ਞਂ ਏਕਧਮ੍ਮਮ੍ਪਿ ਸਮਨੁਪਸ੍ਸਾਮਿ ਯੇਨ ਅਨੁਪ੍ਪਨ੍ਨਾ ਵਾ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ ਉਪ੍ਪਨ੍ਨਾ ਵਾ ਕੁਸਲਾ ਧਮ੍ਮਾ ਪਰਿਹਾਯਨ੍ਤਿ ਯਥਯਿਦਂ, ਭਿਕ੍ਖਵੇ, ਕੋਸਜ੍ਜਂ. ਕੁਸੀਤਸ੍ਸ, ਭਿਕ੍ਖਵੇ, ਅਨੁਪ੍ਪਨ੍ਨਾ ਚੇਵ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ ਉਪ੍ਪਨ੍ਨਾ ਚ ਕੁਸਲਾ ਧਮ੍ਮਾ ਪਰਿਹਾਯਨ੍ਤੀ’’ਤਿ. ਦਸਮਂ.

ਅਚ੍ਛਰਾਸਙ੍ਘਾਤਵਗ੍ਗੋ ਛਟ੍ਠੋ.