૬. છક્કવારો

૩૨૬. [દી. નિ. ૩.૩૨૪] છ અગારવા. છ ગારવા. છ વિનીતવત્થૂનિ. છ સામીચિયો. છ આપત્તિસમુટ્ઠાના. છચ્છેદનકા આપત્તિયો. છહાકારેહિ આપત્તિં આપજ્જતિ. છાનિસંસા વિનયધરે. છ પરમાનિ. છારત્તં તિચીવરેન વિપ્પવસિતબ્બં. છ ચીવરાનિ. છ રજનાનિ. છ આપત્તિયો કાયતો ચ ચિત્તતો ચ સમુટ્ઠન્તિ ન વાચતો. છ આપત્તિયો વાચતો ચ ચિત્તતો ચ સમુટ્ઠન્તિ ન કાયતો. છ આપત્તિયો કાયતો ચ વાચતો ચ ચિત્તતો ચ સમુટ્ઠન્તિ. છ કમ્માનિ. છ વિવાદમૂલાનિ. છ અનુવાદમૂલાનિ. છ સારણીયા ધમ્મા દીઘસો. છ વિદત્થિયો, સુગતવિદત્થિયા, તિરિયં છ વિદત્થિયો. છ નિસ્સયપટિપ્પસ્સદ્ધિયો આચરિયમ્હા. છ નહાને અનુપઞ્ઞત્તિયો – વિપ્પકતચીવરં આદાય પક્કમતિ, વિપ્પકતચીવરં સમાદાય પક્કમતિ.

[મહાવ. ૮૫ આદયો] છહઙ્ગેહિ સમન્નાગતેન ભિક્ખુના ઉપસમ્પાદેતબ્બં નિસ્સયો દાતબ્બો સામણેરો ઉપટ્ઠાપેતબ્બો – અસેક્ખેન સીલક્ખન્ધેન સમન્નાગતો હોતિ, અસેક્ખેન સમાધિક્ખન્ધેન સમન્નાગતો હોતિ, અસેક્ખેન પઞ્ઞક્ખન્ધેન સમન્નાગતો હોતિ, અસેક્ખેન વિમુત્તિક્ખન્ધેન સમન્નાગતો હોતિ, અસેક્ખેન વિમુત્તિઞાણદસ્સનક્ખન્ધેન સમન્નાગતો હોતિ, દસવસ્સો વા હોતિ અતિરેકદસવસ્સો વા.

અપરેહિપિ છહઙ્ગેહિ સમન્નાગતેન ભિક્ખુના ઉપસમ્પાદેતબ્બં નિસ્સયો દાતબ્બો સામણેરો ઉપટ્ઠાપેતબ્બો – અત્તના અસેક્ખેન સીલક્ખન્ધે સમન્નાગતો હોતિ, પરં અસેક્ખે સીલક્ખન્ધે સમાદપેતા; અત્તના અસેક્ખેન સમાધિક્ખન્ધેન સમન્નાગતો હોતિ, પરં અસેક્ખે સમાધિક્ખન્ધે સમાદપેતા; અત્તના અસેક્ખેન પઞ્ઞક્ખન્ધેન સમન્નાગતો હોતિ, પરં અસેક્ખે પઞ્ઞક્ખન્ધે સમાદપેતા; અત્તના અસેક્ખેન વિમુત્તિક્ખન્ધેન સમન્નાગતો હોતિ, પરં અસેક્ખે વિમુત્તિક્ખન્ધે સમાદપેતા; અત્તના અસેક્ખેન વિમુત્તિઞાણદસ્સનક્ખન્ધેન સમન્નાગતો હોતિ, પરં અસેક્ખે વિમુત્તિઞાણદસ્સનક્ખન્ધે સમાદપેતા; દસવસ્સો વા હોતિ અતિરેકદસવસ્સો વા.

અપરેહિપિ છહઙ્ગેહિ સમન્નાગતેન ભિક્ખુના ઉપસમ્પાદેતબ્બં નિસ્સયો દાતબ્બો સામણેરો ઉપટ્ઠાપેતબ્બો – સદ્ધો હોતિ, હિરિમા હોતિ, ઓત્તપ્પી હોતિ, આરદ્ધવીરિયો હોતિ, ઉપટ્ઠિતસ્સતિ હોતિ, દસવસ્સો વા હોતિ અતિરેકદસવસ્સો વા.

અપરેહિપિ છહઙ્ગેહિ સમન્નાગતેન ભિક્ખુના ઉપસમ્પાદેતબ્બં નિસ્સયો દાતબ્બો સામણેરો ઉપટ્ઠાપેતબ્બો – ન અધિસીલે સીલવિપન્નો હોતિ, ન અજ્ઝાચારે આચારવિપન્નો હોતિ, ન અતિદિટ્ઠિયા દિટ્ઠિવિપન્નો હોતિ, બહુસ્સુતો હોતિ, પઞ્ઞવા હોતિ, દસવસ્સો વા હોતિ અતિરેકદસવસ્સો વા.

અપરેહિપિ છહઙ્ગેહિ સમન્નાગતેન ભિક્ખુના ઉપસમ્પાદેતબ્બં નિસ્સયો દાતબ્બો સામણેરો ઉપટ્ઠાપેતબ્બો – પટિબલો હોતિ અન્તેવાસિં વા સદ્ધિવિહારિં વા ગિલાનં ઉપટ્ઠાતું વા ઉપટ્ઠાપેતું વા, અનભિરતં વૂપકાસેતું વા વૂપકાસાપેતું વા [અનભિરતિં (ક.)], ઉપ્પન્નં કુક્કુચ્ચં ધમ્મતો વિનોદેતું [વિનોદેતું વા વિનોદાપેતું વા (સ્યા.) મહાવ. ૮૫], આપત્તિં જાનાતિ, આપત્તિવુટ્ઠાનં જાનાતિ, દસવસ્સો વા હોતિ અતિરેકદસવસ્સો વા.

અપરેહિપિ છહઙ્ગેહિ સમન્નાગતેન ભિક્ખુના ઉપસમ્પાદેતબ્બં નિસ્સયો દાતબ્બો સામણેરો ઉપટ્ઠાપેતબ્બો – પટિબલો હોતિ અન્તેવાસિં વા સદ્ધિવિહારિં વા આભિસમાચારિકાય સિક્ખાય સિક્ખાપેતું, આદિબ્રહ્મચારિયકાય સિક્ખાય વિનેતું, અભિધમ્મે વિનેતું, અભિવિનયે વિનેતું, ઉપ્પન્નં દિટ્ઠિગતં ધમ્મતો વિવેચેતું, દસવસ્સો વા હોતિ અતિરેકદસવસ્સો વા.

અપરેહિપિ છહઙ્ગેહિ સમન્નાગતેન ભિક્ખુના ઉપસમ્પાદેતબ્બં નિસ્સયો દાતબ્બો સામણેરો ઉપટ્ઠાપેતબ્બો – આપત્તિં જાનાતિ, અનાપત્તિં જાનાતિ, લહુકં આપત્તિં જાનાતિ, ગરુકં આપત્તિં જાનાતિ, ઉભયાનિ ખો પનસ્સ પાતિમોક્ખાનિ વિત્થારેન સ્વાગતાનિ હોન્તિ સુવિભત્તાનિ સુપ્પવત્તીનિ સુવિનિચ્છિતાનિ સુત્તસો અનુબ્યઞ્જનસો, દસવસ્સો વા હોતિ અતિરેકદસવસ્સો વા.

છ અધમ્મિકાનિ પાતિમોક્ખટ્ઠપનાનિ, છ ધમ્મિકાનિ પાતિમોક્ખટ્ઠપનાનીતિ.

છક્કં નિટ્ઠિતં.

તસ્સુદ્દાનં –

અગારવા ગારવા ચ, વિનીતા સામીચિપિ ચ;

સમુટ્ઠાના છેદના ચેવ, આકારાનિસંસેન ચ.

પરમાનિ ચ છારત્તં, ચીવરં રજનાનિ ચ;

કાયતો ચિત્તતો ચાપિ, વાચતો ચિત્તતોપિ ચ.

કાયવાચાચિત્તતો ચ, કમ્મવિવાદમેવ ચ;

અનુવાદા દીઘસો ચ, તિરિયં નિસ્સયેન ચ.

અનુપઞ્ઞત્તિ આદાય, સમાદાય તથેવ ચ;

અસેક્ખે સમાદપેતા, સદ્ધો અધિસીલેન ચ;

ગિલાનાભિસમાચારી, આપત્તાધમ્મધમ્મિકાતિ.