૨૦૦. પલિબોધાપલિબોધકથા

૩૨૫. દ્વેમે, ભિક્ખવે, કથિનસ્સ પલિબોધા, દ્વે અપલિબોધા. કતમે ચ, ભિક્ખવે, દ્વે કથિનસ્સ પલિબોધા? આવાસપલિબોધો ચ ચીવરપલિબોધો ચ. કથઞ્ચ, ભિક્ખવે, આવાસપલિબોધો હોતિ? ઇધ, ભિક્ખવે, ભિક્ખુ વસતિ વા તસ્મિં આવાસે, સાપેક્ખો વા પક્કમતિ ‘‘પચ્ચેસ્સ’’ન્તિ. એવં ખો, ભિક્ખવે, આવાસપલિબોધો હોતિ. કથઞ્ચ, ભિક્ખવે, ચીવરપલિબોધો હોતિ? ઇધ, ભિક્ખવે, ભિક્ખુનો ચીવરં અકતં વા હોતિ વિપ્પકતં વા, ચીવરાસા વા અનુપચ્છિન્ના. એવં ખો, ભિક્ખવે, ચીવરપલિબોધો હોતિ. ઇમે ખો, ભિક્ખવે, દ્વે કથિનસ્સ પલિબોધા.

કતમે ચ, ભિક્ખવે, દ્વે કથિનસ્સ અપલિબોધા? આવાસઅપલિબોધો ચ ચીવરઅપલિબોધો ચ. કથઞ્ચ, ભિક્ખવે, આવાસઅપલિબોધો હોતિ? ઇધ, ભિક્ખવે, ભિક્ખુ પક્કમતિ તમ્હા આવાસા ચત્તેન વન્તેન મુત્તેન અનપેક્ખો [અનપેક્ખેન (ક.)] ‘‘ન પચ્ચેસ્સ’’ન્તિ. એવં ખો, ભિક્ખવે, આવાસઅપલિબોધો હોતિ. કથઞ્ચ, ભિક્ખવે, ચીવરઅપલિબોધો હોતિ? ઇધ, ભિક્ખવે, ભિક્ખુનો ચીવરં કતં વા હોતિ, નટ્ઠં વા વિનટ્ઠં વા દડ્ઢં વા, ચીવરાસા વા ઉપચ્છિન્ના. એવં ખો, ભિક્ખવે, ચીવરઅપલિબોધો હોતિ. ઇમે ખો, ભિક્ખવે, દ્વે કથિનસ્સ અપલિબોધાતિ.

પલિબોધાપલિબોધકથા નિટ્ઠિતા.

કથિનક્ખન્ધકો નિટ્ઠિતો સત્તમો.