૫૯. ગમિકાદિનિસ્સયવત્થૂનિ

૧૨૧. તેન ખો પન સમયેન અઞ્ઞતરો ભિક્ખુ કોસલેસુ જનપદે અદ્ધાનમગ્ગપ્પટિપન્નો હોતિ. અથ ખો તસ્સ ભિક્ખુનો એતદહોસિ – ‘‘ભગવતા પઞ્ઞત્તં ‘ન અનિસ્સિતેન વત્થબ્બ’ન્તિ. અહઞ્ચમ્હિ નિસ્સયકરણીયો અદ્ધાનમગ્ગપ્પટિપન્નો, કથં નુ ખો મયા પટિપજ્જિતબ્બ’’ન્તિ? ભગવતો એતમત્થં આરોચેસું. અનુજાનામિ, ભિક્ખવે, અદ્ધાનમગ્ગપ્પટિપન્નેન ભિક્ખુના નિસ્સયં અલભમાનેન અનિસ્સિતેન વત્થુન્તિ.

તેન ખો પન સમયેન દ્વે ભિક્ખૂ કોસલેસુ જનપદે અદ્ધાનમગ્ગપ્પટિપન્ના હોન્તિ. તે અઞ્ઞતરં આવાસં ઉપગચ્છિંસુ. તત્થ એકો ભિક્ખુ ગિલાનો હોતિ. અથ ખો તસ્સ ગિલાનસ્સ ભિક્ખુનો એતદહોસિ – ‘‘ભગવતા પઞ્ઞત્તં ‘ન અનિસ્સિતેન વત્થબ્બ’ન્તિ. અહઞ્ચમ્હિ નિસ્સયકરણીયો ગિલાનો, કથં નુ ખો મયા પટિપજ્જિતબ્બ’’ન્તિ? ભગવતો એતમત્થં આરોચેસું. અનુજાનામિ, ભિક્ખવે, ગિલાનેન ભિક્ખુના નિસ્સયં અલભમાનેન અનિસ્સિતેન વત્થુન્તિ.

અથ ખો તસ્સ ગિલાનુપટ્ઠાકસ્સ ભિક્ખુનો એતદહોસિ – ‘‘ભગવતા પઞ્ઞત્તં ‘ન અનિસ્સિતેન વત્થબ્બ’ન્તિ. અહઞ્ચમ્હિ નિસ્સયકરણીયો, અયઞ્ચ ભિક્ખુ ગિલાનો, કથં નુ ખો મયા પટિપજ્જિતબ્બ’’ન્તિ? ભગવતો એતમત્થં આરોચેસું. અનુજાનામિ, ભિક્ખવે, ગિલાનુપટ્ઠાકેન ભિક્ખુના નિસ્સયં અલભમાનેન યાચિયમાનેન અનિસ્સિતેન વત્થુન્તિ.

તેન ખો પન સમયેન અઞ્ઞતરો ભિક્ખુ અરઞ્ઞે વિહરતિ. તસ્સ ચ તસ્મિં સેનાસને ફાસુ હોતિ. અથ ખો તસ્સ ભિક્ખુનો એતદહોસિ – ‘‘ભગવતા પઞ્ઞત્તં ‘ન અનિસ્સિતેન વત્થબ્બ’ન્તિ. અહઞ્ચમ્હિ નિસ્સયકરણીયો અરઞ્ઞે વિહરામિ, મય્હઞ્ચ ઇમસ્મિં સેનાસને ફાસુ હોતિ, કથં નુ ખો મયા પટિપજ્જિતબ્બ’’ન્તિ? ભગવતો એતમત્થં આરોચેસું. અનુજાનામિ, ભિક્ખવે, આરઞ્ઞિકેન ભિક્ખુના ફાસુવિહારં સલ્લક્ખેન્તેન નિસ્સયં અલભમાનેન અનિસ્સિતેન વત્થું – યદા પતિરૂપો નિસ્સયદાયકો આગચ્છિસ્સતિ, તદા તસ્સ નિસ્સાય વસિસ્સામીતિ.